بس انا مش شايفة التهرش الجنسي له علاقة بقمع الستات

المجتمع ذكوري معفن وكل حاجة، وكل واحدة مخلفة ولد متهيالها انها جابت الديب من ديله وبتنقل الاحساس ده للواد لحد ما يكبر ويتجنن ويتهياله انه يقعد على البساط وياخد ست البنات
بس تقرير التحرش الجنسي اللي نشرته البي بي سي مالوش اي علاقة بده
بداية الاعتداءات الجنسية مالهاش اي علاقة بالكبت الجنسي او الرغبة الجنسية دي لها علاقة بالرغبة في فرض السيطرة
عشان كده في جوانتانمو وابو غريب مثلا بيغتصبوا المساجين...مش عشان هم شواذ زي ما بيقولوا في المثل الدارج
it is not about sex it is about power
ده مش جنس ده احساس بالقوة، بالهيمنة، باحساس الشخص انه قادر يذل الضحية
ده كبت بس من نوع تاني مالوش علاقة بالكبت الجنسي، الكبت الجنسي اهون انواع الكبت، فيه كبت من نوع تاني، البني ادم المنسحق المقهور المذلول بيعاني منه عشان كده بيحب يعذب وبيحب يغتصب كنوع من انواع التنفيس عن الاحلام الكبرى اللي تحولت الى كوابيس وتعويض الاحباطات الشخصية مالوش علاقة بالجنس ولا بقلة الجواز خالص...مافيش انسان طبيعي بيبقى مستمتع بممارسة الجنس مع واحدة بتكرهه وبتعبر عن كراهيتها له بكل الوسائل والطرق
في فترة من الفترات ازدادت معدلات الاغتصاب في مصر، الكلام ده من حوالي خمستاشر سنة مثلا، ما كانتش النسبة كبيرة في حد ذاتها لكن كانت كبيرة بالنسبة للمجتمع المصري
ودي كان لها علاقة بالذل والقهر والرغبة في التنفيس عن القهر ده، احساس المواطن انه له حقوق ومش عارف ياخدها، كل شيء حواليه خارج عن سيطرته، لحد ماحس انه مالوش قيمة فبيحاول يفرض سيطرته دي على ضحية ضعيفة من خلال الاغتصاب كأنه بيحلم انه في اللحظة دي قوي ومسيطر
الظاهرة الغريبة والجديرة بالتأمل ان الاغتصاب في انحسار وحل محله بمعدلات كبيرة قوي التحرش الجنسي
ده معناه ايه؟
معناه ان الانسان المصري انكسر قوي لدرجة انه حتى ما بقاش عنده الشجاعة انه يغتصب عشان ينفس في الضحية مابقاش عنده الرغبة في السيطرة والقوة حتى في وهم الاغتصاب
ايه هو التحرش؟ التحرش عبارة عن واحد اهبل بيحاول يحتك بواحدة - او واحد بقى على حسب ميوله - بشكل موحي جنسيا وليس جنسي
يعني شبه الجنس..وهم الجنس مش الجنس نفسه
واذا قلنا ان التحرش مقدمة للاغتصاب او يعني الصورة المخففة جدا من الاغتصاب
لا هو مش الصورة المخففة من الاغتصاب هو الصورة المخصية للاغتصاب...حلم الاغتصاب...أمنية يفتقد صاحبها القدرة على تحقيقها فبيعمل حاجة تفكره بيها
بيعمل ايه المصري؟ كان عنده حلم السيطرة على حياته وامتلاك بلده اللي هو حق له...ما قدرش وكل ما يحاول ينكسر ويتهان، فبقى يعوض انكساره واحلامه بانه يغتصب والاغتصاب هو حلم القوة غير المحقق، وفي الاخر انكسر قوي لدرجة انه بيتحرش وبس يعني بيحلم بالاغتصاب اللي هو حلم القوة..يعني بيحلم بالحلم

المصري ما بقاش حتى عنده رغبة مكبوتة في فرض السيطرة بينفسها في الاغتصاب او الضرب
ده وصل بيه الامر ان اقصى تنفيساته هي التحرش..التحرش بالبلدي يعني المضايقة، يعني المصري ما بقاش عنده امنيات غير انه يضايق الحكومة مش انه يستلم منها القوة، وبما انه مش قادر يضايق الحكومة فبيضايق الستات لانهم العنصر الاضعف في الشارع، ولو عرف يضايق الطفل او يضايق واد فافي شوية ح يعمل كده
الجمعية النسائية اللي عملت الاحصائية وبتقول ان نسبة التحرش في الشارع المصري وصلت لستين في المية بتطالب بتشريعات تحمي المرأة
معلش ده مطلب مهم وكل حاجة وانا معاه وابصم عليه بالعشرة
بس يكون واضح في اذهانا انه حل مؤقت....حل مؤقت لكسرة نفس الانسان المصري اللي بقى ينفس عن عدم قدرته على التنفيس