دلوقت الكويت مش عايزة تسقط ديون العراق

وكل الناس مستندلاهم بس فكروا فيها شوية، ماهو لو ما اخدتهاش الحكومة الكويتية ح تاخدها امريكا، هي الحكومة العراقية الموجودة دلوقت يعني جاية بثورة شعبية؟ ماهي جاية بالاحتلال
بس المشكلة ان اللي ح يدفع الفلوس دي لا الحكومة العميلة ولا امريكا، ح يدفعها الناس الغلابة
يادي الخيبة، يادي الوكسة، جه اليوم اللي العراقيين يتوصفوا فيه بالغلابة؟ دول كانوا بيفطروا لحمة ويتغدوا لحمة ويتعشوا لحمة، ومش لحمة حمير زي اللي بناكلها
امال يا توماس انت وايمن لو احنا مكانهم كنا عملنا ايه؟ كنا اكلنا بعض
مش عارفة الحكاية كده ملعبكة ومش باين لها اول من اخر، الكويت بتقول فلوسنا ناخدها
وطبعا المالكي ح يقطعها من لحم العراقيين مش ح يهون عليه ياخد من الاتاوة اللي بيدفعها للامريكان ولا ياخد من السمسرة بتاعته
طب والعراقيين ذنبهم ايه؟ هو بشكل عام موقف ندالة، بس هي جات عليهم هم، ما العراق بقى بوفيه مفتوح وكل اللي جعان رايح ياكل منه الا العراقيين اللي اتوكسوا وكسة عمرهم ما شافوها في تاريخهم ابدا
دول ياعيني بقوا عاملين زينا
والنبي اللي رايحين يأجروا علينا امريكا يرحمونا، اذا العراق بقت كده: ماكو ماي، ماكو كهربا، ماكو صرف صحي. امال احنا اللي خلقة ربنا كده ماكو ماي ماكو كهربا ماكو صرف صحي ح يتعمل فينا ايه؟
تصدقوا بالله ممكن ما يتعملش فينا حاجة؟ اه والله دي تبقى نكتة زي نكتة الاحداث الطائفية كده: كل مرة شيخ زاوية ما بيعرفش يفك الخط يسخن شوية سنكرية على سباكين ويقول لهم الى الجهاااااااااد يروحوا المسيحيين جاريين ومستخبيين لحد ما الخناقة تخلص وبعدين يطلعوا راسهم من تحت الكنبة ولما الخناقة تخلص يطلعوا عشرتلاف واحد ويعملوا مظاهرة بس بادبهم برضه استحوياطان ليكون فيه حد راقد لهم بسنجة وللا حاجة، دول حتى لما جابوا سيرة حسني مبارك قالوا: حسني مبارك يا طيار
كويس ما قالوش يا سعادة اللوا
اهو لو لا قدر الله امريكا سمعت كلام اللي بيعيطوا عليها ممكن تبقى نكتة زي دي ويتزنقوا هنا وقال يا قرد ح يسخطوك
ياللا خليهم يعيطوا عليها بقى من هنا للصبح