Wednesday 6 August 2008

مجاري أساتذة جامعة عين شمس

انا ساكنة في مجاري....قصدي في مساكن هيئة تدريس جامعة عين شمس اللي في ارض المطبعة مش اللي في الدمرداش، وطبعا واضح من اسمها ان جل السكان من اساتذة جامعة عين شمس، والمساكن دي ليها مجلس ادارة زي اي مجموعة سكنية - المفروض - انها محترمة
عندنا مشكلة ان المجموعة السكنية اوطى من الجامعة، اي والله اوطى قلبا وقالبا، وبما انها اوطى فالمجاري بتاعة الجامعة بتطفح علينا
بقالنا سنين في الباللو ده، وطبعا المجموعة السكنية اللي هي عبارة عن تسع عمارات كل عمارة اربعتاشر دور وكل دور فيه اربع شقق وكلهم ساكنين يعني بالميت فيه حوالي استاذ جامعة واحد على الاقل في كل دور يعني بالميت تاني اربعتاشر استاذ جامعة اضربهم في تسعة يعني مش اقل من مية ستة وعشرين استاذ واستاذة جامعة في جميع التخصصات، اكيد فيهم مهندس واحد يقدر يحل المشكلة، اكيد فيهم واحد يقدر يتصل برئيس الحي، اكيد فيهم واحد من اللي في مجلس الادارة يقدر يلم من الناس فلوس ويجيب كاسحة الغام قصدي كاسحة خرا من اللي احنا عايشين فيه
الكسح والشفط كان بيتم طول السنين اللي فاتت، السنة دي بقى الظاهر اعضاء مجلس الادارة حارنين على بعض ومتخانقين وكل واحد بيعند على التاني وسايبين المجاري تعمل لنا فينيسيا الخرا: اللي مش عايز يدفع، واللي بيتعامل ببرود، واللي يعوز يحل يقولوا له: انت اصلا عضو هيئة تدريس في جامعة تانية مش في جامعة عين شمس يعني مالكش صفة.... واللي ما يحضرش اجتماعات مجلس الادارة من اساسه
والعجب العجاب ياخويا كلهم بيصلوا ومعلقين لنا في الاسانسير احاديث نبوية شريفة ومسجد المجموعة السكنية قدام العمارة بتاعتنا - اللي حظيت بالنصيب الاكبر من الخرا - يعني عشان تعدي للمسجد لازم تغوص في الخرا، يعني بيصلوا بالنجاسة؟
السنة دي المجاري فوق الوصف، فوق الاحتمال، كل واحد فيهم مكلف شقته مش اقل من نص مليون جنيه وكل واحد فيهم بينزل من شقته المنيفة على فينيسيا المجاري ولا يرمش لهم جفن، لو ابن بواب وقع في المجاري دي يروح في داهية ماهو ابن بواب يعني
لو حد ماعندوش عربية يمشي وسط الخرا ما جراش حاجة ما هو مش من مستوانا
طيب انا بكرة ح اكلم مكتب المحافظ وهو ما يعرفنيش، واذا سمعني وما قاليش انت مين يا شاطرة هاتي لي حد كبير اكلمه ح اقول له على الوضع واطلب منه كاسحة الغام واطلب كمان انه ياخد مجلس الادارة مخالفة
يارب يسجنوهم
يارب يشنقوهم في ميدان عام
لما اساتذة الجامعة اللي بيربوا النشء قدام بيتهم مجاري وهم ما بيتحركوش والله اعلم فلوس الصيانة بتروح فين امال مستغربين ليه على حال البلد؟
صدقتوني لما قلت لكوا الطبقة المتوسطة احقر طبقة في مصر؟

No comments: