Monday 11 August 2008

هو الحكومة المصرية ايه اللي عاملاه عند المعبر ده؟

انا عايزة افهم هي اسرائيل ماسكة على الحكومة المصرية صور مخلة بالاداب؟ نسيوا عندها فانلة داخلية؟ قفشتهم وهم بيقرصوا بنت البواب؟ لقت عندهم خاتم سوليتير بتاع جارتنا؟ فيه ايه؟
ايه اللي بيعملوه على المعبر ده؟
كل ما نكلمهم في اي حاجة يقولوا لنا احنا مجبرين، طب انا عايزة اعرف ايه وجه الاجبار في ان مصر ما تفتحش من جانب واحد الا لما محمود عباس يوافق ويسيطر على غزة؟ طب ايه سلطة محمود عباس علينا؟ ده راخر خايفين منه؟ يعني خايفين من امريكا واسرائيل قلنا ماشي، خايفين من الحكومة السعودية والكويت عشان البسبس اللي بينهم وبين اعضاء الحكومة وعشان هم اللي على حجر امريكا دلوقت وقلنا ماشي..ولو انه مش ماشي قوي يعني دول اخرهم يضربونا بالملقاط اللي بينتفوا بيه حواجبهم، خايفين من الاتحاد الاوروبي ...ماشي خايفين من اي كلب معدي في الشارع، لكن كمان خايفين من محمود عباس؟ وده يخوف في ايه اللي كل شوية يقابل اولمرت وينزلوا بوس في بعض؟ ده بيبوس بس
وبعدين بقى؟
وبعدين ايه؟ اما انا هابلة والله، انا متخلفة فعلا...عشان ممدوح اسماعيل موت الف واحد وبيلعب في مناخيره دلوقت، يعني ما صعبش عليهم المصريين الغلابة ح يصعب عليهم الفلسطينيين الغلابة ليه؟
وقال على رأي المثل المنوفي الشهير: اللي يصعب عليك يفقرك

No comments: