Tuesday 12 August 2008

الرقص مالية حاكمة ام البلد

ما تبطلوا تقولوا لي: اسألي يبقى مين خاله؟ اسألي مين صاحب شركة مش عارف ايه؟ اسأل مين يعني؟ شايفيني كل ليلة سهرانة مع مجموعة من رجال الاعمال في نادي شباب الحقانية؟
انا مش ح اسأل حد انا باسألكوا انتوا واللي عارف يقول لي وانا ح اصدقه
مين خاله؟
ما اظنش انه ابن خالة جمال لاني اعرف ان سوزان لها اخ واحد بس ومالهاش اخوات بنات
مين صاحب شركة هيرمس؟
ما اللي عارف يقول يا اخوانا
دلوقت اللي بيتردد ان الحكومة خايفة تسبق باتهام هشام عشان البورصة ما تقعش، لانه عامل مدينتي وواخد قروض من البنوك ولو اتهم في قضية زي دي ح يتخرب بيت البلد كلها والبورصة ح تتبهدل
وفي اليومين اللي اتردد فيهم الاشاعات البورصة نزلت عشرة في المية وخسروا مليارات، آه بقول خسروا مش خسرنا لان احنا مالناش فيه...مالناش فيه يا باشمهندز، مالناش فيه ح الظابط، مالناش فيه يا...يا ايه؟ يا بتاع المكرونة...انتوا اللي ليكوا فيه
طيب بالذمة دي رأسمالية؟
دي رأسمالية؟
دييييييييييي رأسمالية؟
انك تحط اقتصاد بلد ومستقبلها في ايد كام واحد يتعدوا على صوابع الايد الواحدة، واساسا مش انتاجيين وانما سماسرة في المقام الاول وبعدين ترفعهم الى مصاف الالهة لان لو بيوتهم اتخربت البلد كلها ببورصتها وبنوكها ح تتخرب وطبعا ماحدش ح يلبس غيرنا عشان الاسعار اللي ح تولع، وتسيبهم يعيثوا في الارض فسادا ولا يساءلوا عشان اصل لو تمت مساءلتهم وللا خضعوا لسيادة القانون البلد ح تتخرب واقتصادنا ح يتنيل زيادة ماهو متنيل؟ وتخضع القانون والصحافة لقانون رجال الاعمال اللي هو مش قانون اساسا ده على حسب مزاجه...مزاجه جايب هايفا يبقى كلنا هايفين مزاجه طالب نانسي يبقى كلنا ناسيين مزاجه طالب سوزان تميم يبقى كلنا مسوسين
انهي بلد رأسمالي في العالم بيعمل كده حد يقول لي؟ الله؟ دي مصر نفسها في عز الاحتلال وسيطرة الاعيان اللي كانوا بيعلقوا الفلاحين من رجليهم ويدفنوا اللحمة اللي بتفيض من عزوماتهم ما كانتش كده، طب ما طلعت حرب ساب بنك مصر قبل ما يموت بشهرين والمشروع ما خسرش، وطلعت حرب، فشروا ولا واحد فيهم يسوى شراب مقطوع من شراباته اللي رماهم في الزبالة، ما كانش فوق القانون او الصحافة ده اتشتم في حياته على السبحة
مين بلد في الدنيا حاطة رقبتها وبنوكها واراضيها ورأسمالها وشعبها طبعا ده اساسي في ايد شرذمة اللي منهم سكري واللي منهم نسوانجي واللي منهم اسباجتي وللا بشاميل واللي خلل واللي ولا حاجة من دول يا سيدي، ملاك ينقصه الجناحين بس ممكن يعمل حادثة في الطريق العام، ويخبط عربية، ما يروحش القسم عشان البورصة ما تقعش؟ ينعلن ميتين البورصة، الهي يبتليهم بقطيع ابراص يلحس وشوشهم الطرية الناعمة القوية اللي كلها حنية

No comments: