Monday 11 August 2008

طب ليه كده يا جورجيا تقفي في وش العو؟

السياسة لعبة قذرة عارفينها دي، شطرنج وسخ قوي، ذاكرناه برضه، بس يوصل للوساخة دي؟ مش باتكلم على وساخة روسيا باتكلم على وساخة جورجيا انها تقبل تقوم بدور ناموسة تقرص نيابة عن امريكا راحت روسيا عملت لهم زي محمود المليجي وقالت لهم: بوش انا....وهي نازلة هربدة فيهم
طب بقى حكومة جورجيا برضه ممسوك عليها ملابس داخلية عشان تخدم مصالح امريكا بالدرجة دي؟
المتغطي بالامريكان عريان حتى اسألوا كل العريانين، كلهم كانوا متغطيين بامريكا، عقبال حكومات الخليج كده لما نشوفهم ملط قريب قوي ان شاء الله، ماحدش بقى غبي يقول لي والحكومة المصرية كمان معاهم، عشان الحكومة المصرية ح تتعرى اكتر من كده ايه؟ ح يسلخوها؟ المهم بقى يا سيدي لما انت التصريح ده بتاع كوندوليزا فكرني بتصريح قريته لمي عز الدين: ما بيني وبين عماد متعب هو صداقة بريئة
طبعا واحدة زيي ما كانتش ح تعرف اللي بين مي عز الدين وبين متعب من غير التصريح ده...اقصد الصداقة البريئة يعني
وكمان العالم كله ما عرفش بخبر الحرب الباردة غير من تصريح كوندوليزا

No comments: