Wednesday 30 April 2008

اسماء المحامين المتطوعين للدفاع عن البشريات

استوحياطا ليوم اربعة مايو ماحدش ضامن عمره
محمد اسماعيل 0108294435
أحمد رضا طلبة 0105702704
محمد صلاح نصاري 0161444874
سيد فتحي 0122308443
أحمد صابر احمد ابو عيش 0124951656
احمد الزيني 0123818827
عصام سعيد محمد 0121955760
مجموعة المساعدة القانونية لحقوق الانسان
مكتب: 25778688
فاكس: 25778722
اشرف الدعدع : 0125107410
احمد عزت محمد : 0103978913
محمد اللق : 0101934456
0126182618
علي سليمان : 0122473016
وليد خيري: 0107078482
طارق رمضان: 0187060341
سيدة عبد الفتاح: 0106812203
وفاء المصري: 0106708404
الى جانب المحامين اللي كانوا متطوعين المرة اللي فاتت وارقامهم على البوست ده

ما باعرفش اعمل بانرات


بس الجيش بيقول لك اتصرف
اللي يقدر يعمل تعديلات على البانر يعمله
انا خ ادوس بقى في بقية الاسماء

فين ام البانرات؟؟؟

اسماء المحتجزين على البوست ده

عايزين بانرات باسمائهم
والتوقيعات كمان عشان البلاغ على نفس البوست
يا تعملوا لينك يا تبعتوا البانرات على الميل ده

nawaranegm@yahoo.com
اخلصوا انا نازلة هشام مبارك دلوقت

ربنا يعدي اربعة مايو على خير ان شاء الله

باذن الله، وينجح فيه واحد دخل لي وقال لي سواء نجح وللا ما نجحش نعمل اضراب ورا التاني ع السخن كده
انا موافقة
ايه رأيكوا في خمستاشر مايو ذكرى النكبة؟
عموما ده كلام سابق لاوانة ان شاء الله ح يبان يوم اربعة مايو
ما تنسوش توقعوا في البوست اللي فات بالاسم ورقم البطاقة وانا مش بانزل التوقيعات على المدونة انا عاملة مودريشن وح اوديها هشام مبارك
عشان نكمل الحدوتة
:)
مافيش حواديت لو ما مضيتوش

Tuesday 29 April 2008

اسماء المحتجزين عايزين بانرات


تحديث:
عملت مودريشن عشان اللي عايز يكتب اسمه ورقم بطاقته ما يضطرش ان كل البشريات يشوفوا اسمه ورقم بطاقته وان شاء الله على بكرة العصر ح اخد الاسماء واروح بيها هشام مبارك







انا جبت اسماء المحتجزين من على الحيطة بتاعة هشام مبارك لان الاسماء موجودة مفرطة على الموقع متهيالي الاسماء واضحة انا شايفاها بس لو مش واضحة اضغط على الصورة تقوم الاسماء توضح اكتر
عايزين يتعمل بانرات باسماء المحتجزين النهاردة اعتقل حسام شحاتة ومدحت شاكر ح تلاقوا التفاصيل على موقع هشام مبارك
----
بالنسبة للبلاغ للنائب العام خالد علي ما رضيش اننا نقدمه يوم اربعة مايو، بصراحة لهم حق هم اللي بيلبسوا، قال لي قدموها قبلها بيوم اللي هو يوم السبت عشان ح يبقوا بيتعرضوا على النيابة
طبعا هم في هشام مبارك اللي بيكتبوا البيان واحنا نمضي عليه وملخص البلاغ اننا طالبين الافراج عن كلهم
اللي عايز يوقع يكتب في التعليقات اسمه ورقم بطاقته وانا ح اخدها بكرة لهشام مبارك واديها لهم
وممكن لو هم ح يقدموها يوم تلاتة مايو يبقى نروح معاهم
-----
الاخوان مشاركين معانا في الاضراب
الحمد لله انتصرت الاصوات الشابة النضيفة

على فكرة منعم واحمد عبد الفتاح اجدع ناس
وطبعا محمد عبد القدوس والميكروفون
---
شدوا حيلكوا يا شباب عايزين بانرات بسرعة وتنزلوها على المدونات وتبعتولي اللنك انزل انا كمان البانرات وتوزعوها على الفيس بوك
اسكتوا اسكتوا مش روز اليوسف بتقول على بتوع الفيس بوك كل دماغهم في قلة الادب والجنس
يا حلاوة يا ولااااااد عشنا وبقينا منحرفين اللهم لك الحمد ولك الشكر يا رب
----
مش معنى كده ان الحدوتة انتهت
ده بس فاصل ونعود
------
اه ودي اسماء المحتجزين في برج العرب
كمال محمد السيد الفيومي - عامل
عبد الكريم علي البحيري عبد الكريم - عامل
اللي هو كريم البحيري
طارق عبد الحميد امين - عامل
اللي هو طارق السنوسي
ابراهيم الزغبي - اهالي
احمد محمد احمد - حارس امن
ابراهيم اليمني - طبيب
عبد الحليم احمد - عامل
وكلهم من غزل المحلة
شدوا حيلكوا انا لسة مش شايفة بنرات ولا حاجة

حدوتة ملتوتة3


قبل ما نكمل الحكاية، ارجو من الاخوة الاعضاء الوضع في الاعتبار اني واحدة تافهة وسطحية وعندي ارتداد للطفولة فياريت ما يحملوش الحدوتة بتاعتي اكتر مما تحتمل، نكمل بقى
وبعدييييييييييييييييييييييييين
يا سيدي لما انت، فوجئ اولاد ناسنا بيه وهو شايل الكنز وبيتقدم للساحة وبيحط الكنز ما بين ايدين الغول، الغول ضحك ضحكته وقال له انت فاكر بعد كل اللي حصل ح ترجع لي الكنز وارجع لك مراتك وخلاص؟ ناسنا قال له لا، انا عارف انك عايزني انا، انا باترجاك تديني عهد انك تسيب ولادي وتطلق سراح مراتي وتاخد روحي بدالهم
الغول بص باندهاش وكل جيشه بقى يبص لبعضه اما اولاده فزعقوا بتقول ايه يا ابونا، التفت لهم ناسنا وقال لهم انا كبرت ومافيش حاجة تخليني اتمسك بالحياة خصوصا اني ربيتكوا احسن تربية وانا عارف الغول عايز ايه، وراح حاطط راسه على صندوق الكنز وقال للغول تقدر تقطع رقبتي على شرط تديني العهد، بص له الغول بابتسامة صفرا وقال له: لك العهد. والغول بيرفع السيف صرخ اسطلبان ابن ناسنا وجري عليه وقال له يا ابويا تعالى نحارب وننتصر لكن ناسنا بص على اولاد الغول وقال لاسطلبان يابني احنا بننتصر في ارض محايدة اما ارضهم الملعونة فبتعوقنا من النصر وانا كنت عارف ان اليوم ده جاي بسبب الكنز الملعون وخفض راسه وراح الغول مطير راسه والدم طرطش على وش اسطلبان اللي بكى وصرخ وجري معاه لاسيوش وهو بيبكي على ابوه ومن وراهم كل ولاد ناسنا
وهم بيبكوا ابوهم وقائدهم فوجئوا باولاد الغول وهم بيقبضوا عليهم صرخ لاسيوش: العهد يا غول، ضحك الغول ضحكة مدوية وقال: ابوك مخلول، حد يعمل عهد مع غول؟
اتسلسل اولاد ناسنا قدام الغول وقال لهم ح تعيشوا اسرى وعبيد وعمركم ما ح تشوفوا النور واخدوهم اولاد الغول في قبو وهم متسلسلين وحطوهم في قبو مظلم وفي الليل ياخدوهم يشغلوهم عبيد يشيلوا حجر يبنوا بيه قلعة للمولود الجديد اللي الغول مستنيه
تمثل الغول في صورة عابر سبيل وجري على المدينة ونقل للامهات الاخبار ونصحهم بان كل واحدة عايزة ابنها تروح تترجى الغول وتناشده بالعهد اللي بينه وبين ناسنا
راحت تينفاش اول واحدة للغول وركعت بين ايديه وبكت وقالت له ابني، قال لها لو عايزة ابنك لازم تباتي معايا الليلة دي وتوهبيني نفسك
تينفاش فزعت وبعدين فكرت وقالت، لا زوج ولا ابن، اعمل ايه؟ وبعدين قبلت انها تقضي الليلة مع الغول، في الصباح الغول ضحك ضحكته وقال لتينفاش انها حامل وانه مش ح يديها ابنها الا لما تولد جنينه وابنه قصاد ابنها واخدها ولاده وحبسوها في الجب مع ليمسار اول ما اتقابلت ليمسار وتينفاش كان بينهم دموع واستسماح وكل واحدة بكت على كتف التانية وطلبت الصفح من اختها
بقية نساء القرية قلقوا على تينفاش اللي اتأخرت كتير، فراحت وراها نصشاع، وحصل معاها نفس اللي حصل مع تينفاش، وست ورا ست، لحد ما بقي مجموعة صغيرة من النساء، فقالوا هو ليه كل واحدة بتروح مش بترجع، تطوعت واحدة انها تروح فقالت واحدة تانية عاقلة مش ممكن اي واحدة تروح فرداني ابدا، لازم نروح مجموع عشان نحمي بعض، الستات استحلوا الفكرة وراحوا بالدروع والسيوف ووقفوا برة الكهف وطلبوا الغول، كانت هسناد شجاعة وقوية قالت للنساء نقتل الغول، لو واخد اولادنا ونساءنا ح يخرجوا لما هو يموت ولو كان قتلهم يبقى انتقمنا منه، لكن نعسروك قالت لهم العقل يا نساء، لو قتلناه وهو حاجز نساءنا واولادنا عمرنا ما ح نعرف هو فين والسر ح يموت معاه ويمكن نعرض نفسنا لانتقام اولاده، هسناد قالت اولاده مالهمش قوة غير بيه، المهم حصلت ما بينهم خلاف وصوتهم علي، وكل واحدة فيهم بقت تعاير التانية وحصل الانقسام لحد ما سمعهم الغول وخرج لهم وهم بيتخانقوا مع بعض فسكتوا وبصوا له ضحك الغول وقال لهم انا كنت مستنيكوا من زمان، اتفضلوا، لكن هسناد قالت لا مش ح نخش طلع لنا نساءنا واولادنا والا دبحناك زي البعير واشهرت سيفها لكن بقية النساء ما اشهروش سيفهم فضحك الغول وقال كلهم ضدك يا هنساد، مش تعقلي كده؟ وهجم عليها اولاده وهي شاهرة السيف وحدها صرخت وصرخ النساء وابتدوا يحاولوا يشهروا السيوف لكن كان بقية اولاده بيقبضوا عليهم واحدة واحدة والغول يضحك ويقول: الجيش ما يعدش عتاده قدام العدو يا نساء جهلة
وقام اولاد الغول وكتفوهم ومكنوا الغول منهم يغتصب كل واحدة فيهم وهم يصرخوا، وبعدين رموهم في الجب مع بقية النساء ومعاهم الخادمة اللي وشها ممسوح، شعرها على قمة راسها، وقفاها ووشها ممسوحين مافيش فرق بينهم، ووشها شبه ضهرها، تشوفها ما تعرفش جاية وللا رايحة، تترجاها النساء وهي لا تجيب، تحط قدامهم الطعام والشراب، وكل ما واحدة فيهم تبان عليها مصيبتها وتحاول تتخلص من الجنين تكتفها وتقيدها لحد ما حان معاد الميلاد
وقفت مجموعة من الخادمات اللي شبه الخادمة ام وش ممسوح وفتحوا في الجدار باب ودخلوا اول واحدة ليسمار عشان تولد، ويوم ورا يوم كل واحدة يحين معاد ميلادها، تولد جنينها ويخدروها الخادمات ويعطوا الطفل للغول، الغول يحمل ابنه ويضحك يضحك ويرفعه لفوق، ويسقيه من عين الشر، يقوم فجأة الطفل الرضيع يكبر ويبقى راجل كبير، كل واحد من المولودين الجدد يشبه اخوه لامه في الشكل لكن في الجوهر هو ابن الغول وزي الغول، واحب اولاد الغول اليه كان ابن ليسمار: تملوع، لما فاقت الامهات كل واحدة فيهم بحثت عن مولودها فجالهم صوت من تحت الارض شبه الفحيح بيقول: ابكين بالدم يا مكلومات كل مولود ليكم مات
صرخن الامهات، لكن هنساد قالت بدل ما تحمدوا خالق الاكوان اننا تخلصنا من الاجنة الحرام؟ احنا لازم نبحث عن اولادنا فين اولادنا الحقيقيين
ليسمار قالت: بس ده جنيني اللي حملته في احشائي، هنساد قالت لها: ده مش ابنك، ده نبتة شيطان اتزرعت غصب عنك
بعد البكا والنواح فتحت الخادمات الابواب والشمس شعاعها تسرب الى القبو، النساء وقفن مبهوتات، هنساد قالت: مستنيين ايه ياللا نخرج
لكن النساء كانوا خايفين من طول مدة الحبس، خايفين يخرجوا وخايفين يستنوا، هنساد كمان رغم شجاعتها الا انها كانت خايفة تخرج لوحدها كانت بتستحث النساء انهن يخرجن معاها قربت من طاقة النور لقت اقدام شبان رفعت بصرها لقت ابنها واولاد النساء صرخت من الفرحة: اولادنا اولادنا وخرجت من القبو تجري واترمت في حضن ابنها اسطلبان بصت وراها امرأة في شجاعتها وهي نصشاع ام لاسيوش وجريت حضنت ابنها وخرج النساء كلهن وحضنوا اولادهم ما بين الفرح والدموع
وهتفت نصشاع ياللا نهرب ونرجع مديتنا
لكن ابن ليسمار وقف على تبة الجبل وقال كلام....ادهش الجميع
وخلا عقول النساء في حيرة
يتبع
الللللللللللللللل لسة فاضل حلقة واحدة بس
على فكرة وانا باقراها تاني لقيت اسم اسطلبان، طبعا مش محتاجة اوضح ان مافيش اي رمزية لها علاقة بطلبان وافغانستان يعني
:))
الاسم زي ما بيطلع معايا بالخبط شوية حروف ويطلع زي ما يطلع

حدوتة ملتوتة2


وبعدين

بقى يا سادة يا كرام ولاد ناسنا دول كانوا شباب يفرح القلب كل واحد فيهم زي التانيين وفي نفس الوقت فيه حاجة مخصوص تميزه عن الباقيين وما تقدرش تقول مين فيهم احسن من التاني، ولانهم اولاد ضراير كانت كل ام تتباهى بابنها على بقية الستات وكان بيحصل بينهم كتير صراعات، لكن ناسنا كان دايما يهدي الخلافات اللي بينهم ويقول لهم انهم مالهمش غير بعض والحقيقة هم كانوا بيبقوا يد واحدة في المعارك

صحيو الصبح وكل شاب فيهم طالع يتباهى بجماله وقوته وام كل واحد فيهم ماشية وراه وفجأة خرج عليهم لاتيبك ابن ليسمار وهو بيصرخ وبيقول امي اتخطفت مش لاقي امي، فزع ناسنا وبان عليه الرعب وجري في كل المدينة يدور ومعاه ولاده لحد ما صرخت تنفاش وهي بتبكي وتقول سامحوني سامحوني انا السبب انا اديتها للغول نزل عليهم الخبر زي السهم ما ينفذ في القلب كملت تنفاش وهي بتبكي وتقول الغيرة اكلت قلبي ودلوقت انا ملعونة

ناسنا بص لولاده وقال لهم لازم نروح لحد كهف الغول ونحاربه عشان نخلص ليسمار منه

كانوا بيحشدوا الجيوش في لحظة ما الغول كان بيتأمل جمال ليسمار وهي لسة نايمة واول ما فتحت عينيها صرخت من الرعب وبكت واترجته يرجعها لجوزها وابنها ومدينتها لكن الغول بكى على اقدامها واترجاها تفضل معاه لانه حبها ووعدها انه يخليها اسعد نساء العالم لكن ليسمار اصرت وقالت له انها ح تهرب وبالفعل حاولت تجري وكان بيطاردها اولاد الغول لحد ما واحد فيهم مسكها وكان ح يقتلها لكن الغول صرخ فيه وقال له ما تقتلهاش ليسمار دلوقت حامل مني صرخت ليسمار لكن الغول قال لها ان ده ح يبقى احب اولاده لانه ثمرة حبه ليها وانه كان يتمنى انها تحبه زي ما هو بيحبها وامر اولاده انهم ياخدوها بمنتهى الادب والرفق ويحبسوها في قلعة الظلام لحد ما تولد ابنه اللي ح يسميه تملوع

حمل اولاده ليسمار وهي بتقاوم وتبكي وتندب حظها وتلوم نفسها على طمعها وطلعوا بيها فوق الجبل وحبسوها في قلعة الظلام وهم فوق شافوا جيش ناسنا وهو قادم عشان ينقذ ليسمار، حبسوا ليسمار في القلعة جوة جب وقفلوا عليها مع خادمة وشها ممسوح مافيهوش ولا ملمح ومش بتقدر تتكلم بس تقدم لها الاكل والشرب وترعاها لحد ما تولد ونزلوا بسرعة لابوهم الغول وقالوا له على خبر جيش ناسنا

الغول زعق زعقته ولبس درعه وصرخ في اولاده وهو بيضحك ضحكة شريرة: جه اليوم اللي ح نقدر نخلص فيه من ناسنا

وقال لاولاده في المعركة اوعوا حد يقرب من ناسنا...ناسنا ده انا الوحيد اللي ابارزه، ويا اما اقتله يا اما يقتلني

خرج الغول بجيشه ووقفوا يستنوا جيش ناسنا لحد ما وصل الجيش ووقف في مواجهة جيش الغول

بص ناسنا لقى الغيلان معاهم اسلحة فتاكة وبص لولاده وخاف عليهم من القتل ففكر في فكرة

يتبع......

لسة فيه كمالة

Monday 28 April 2008

حدوته ملتوتة

جات لي سخطة، فجأة لقيت نفسي عايزة احكي حواديت بتاعة خيال اطفال، الخيال بتاع القصة دي جالي وانا باستحمى احسن افكار هابلة تجيلك وانت بتستحمى، القصة دي بتاعة اطفال عادية خالص لا فيها حداثة ولا هي تربوية، غول وابو رجل مسلوخة، اصل انا لا باحب الحداثة ولا باحب التربية، احسن حاجة العيال ما يتربوش، اديني اتربيت والله ايه النتيجة؟
اتفضلوا القصة الجزء الاول:

كان ياما كان يا سادة يا كرام ولا يحلى الكلام الا بذكر النبي عليه الصلاة والسلام

وموسى نبي عيسى نبي محمد نبي وكل من له نبي يصلي عليه

اللهم صلي عليهم جميعا

كان فيه مدينة جميلة عايشة سعيدة كل ولف وله وليفة بس كان حاجة غريبة

ماكانش فيه راجل بيخلف في المدينة دي غير راجل واحد بس اسمه ناسنا وكان ناسنا شاب فقير لكن وسيم وجميل شجاع وقوي وبيحب الخير لكل المخلوقات كان قلبه رقيق وعقله دقيق وجسمه قوي ووجهه زي بدر التمام

وفجأة لاح في الافق غول متوحش، بيتغذى على الانس كان اول ظهوره جسد ناحل وكان بيغوي الرجال بالطمع، كان يستفرد بكل راجل ويقول له عندي ليك كنز كبير ح تبقى اغنى واقوى واحد في المدينة وياخده للكهف بتاعه واول ما يدخل الراجل المسكين الغول ياكله ويضحك يضحك وبعد ما يهضم الراجل يخرج من بقه كائن متوحش شبه الراجل اللي التهمه بس مش هو كائن شيطاني شرير يروح المدينة ويغوي راجل تاني عشان يجيبه للغول وهكذا لحد ما المدينة خليت من الرجال وما فضلش فيها غير ناسنا اللي كان اول ما يسمع خطى الغول ياخد الناي بتاعه ويهرب على الكهف ويستخبى وكان لما يجيله ولاد الغول في شكل اصحابه يحاول يرجعهم لعقولهم لكن يكتشف ان ده غول متخفي في شكل صديق وتبدأ بينهم المبارزة وفي كل مرة كان ناسنا يغلب ويقتل ابن من ابناء الغول

الغول بقى يخاف على ولاده وبقى ينبههم انهم يستنوا شوية ما يواجهوش ناسنا دلوقت قبل ما يقووا اكتر بعدد اكبر لحد ما خلص كل الرجال اللي في المدينة

فضلت النساء تبكي ازواجها وكلهم لجأوا لناسنا عشان ينقذهم، وكان ناسنا حاسس بالوحدة فقال لهم انه ما يقدرش يحميهم من غير جيش معاه فتقدمت كل ست ووهبت نفسها لناسنا عشان تخلف منه ولد قوي وشديد عشان يقدر ناسنا يكون جيش يواجه بيه الغول واولاده

وفعلا كل ست في المدينة وهبت نفسها لناسنا وجابت منه طفل جميل قوي ذكي طيب وحنون وكلهم شبه ابوهم في المظهر والجوهر، وقدر لفترة ناسنا انه يواجه جيش الغول في مرات كتيرة ويهزمهم مرة ورا مرة وساعات كانوا يهزموه بس هو كان يرجع ويعبأ جيشه تاني من ولاده اللي كلهم شبهه باختلافات بسيطة

كان من ضمن نساء ناسنا واحدة جميلة قوي وقوية قوي بس عيبها ان رضاها صعب قوي وفيها من طمع رجال المدينة بس كانت بتحب ناسنا وكانت بتقول له لو يروح من ورا الغول وياخد بعض الكنوز اللي عنده ممكن يبقى اقوى لكن ناسنا قال لها مش هو ده الحل

في مرة من المرات ليمسار مرات ناسنا قالت لابنها لو يروح ياخد من الكنز من ورا الغول لكن ابنها رفض وقال لها انه بيشتغل وان ابوه مش ح يرضى بحاجة زي دي

كانت ليمسار قوية وجريئة اخدت زوادها وراحت على الكهف من ورا الغول دخلت وجابت من دهب الغول كتير كتير وهربت بيه لجوزها لكن جوزها اول ما شاف الدهب بكى وقال لها حلت علينا اللعنة الكنز ده شيطاني ملعون لكن ليمسار حاولت تقنعه ان الغول كان بيستغل الكنز في الشر عشان كده ملعون لكن لو استغلوه في الخير ح يبقى مبروك لكن ناسنا كان حاسس ان فيه خطر وان فيه مصيبة ح تحصل اما بقية المدينة اللي هم الستات واولادهم حملوا ليمسار على الاعناق وطافوا بيها وهم فرحين وبقت ليمسار هي اقوى ست بين كل ضرايرها لانها هي اللي جابت الكنز اللي عاشت منه المدينة لكن واحدة من ضرايرها غارت منها وكانت الغيرة بتاكل قلبها

الغول واولاده ما كانوش يقدروا يقربوا جنب المدينة طول ما ناسنا كان فيها في مرة من المرات تمثل الغول في عابر سبيل وقابل تينفاش الست الغيورة وقعد يقول لها انت اذكى واحسن واطيب واحدة في المدينة لكن انا مستغرب من ليمسار ليه هي اللي قوية الغيرة اكلت قلب تينفاش عابر السبيل قال لتينفاش لو تسقي ليمسار من المحلول ده في الشراب قبل النوم وتحملها له عشان يعطيها للغول وتخلص منها

في الاول تينفاش خافت واستبشعت الفكرة لكن لما كانت بتشوف ناسنا بيهتم بيها وبيزيد حبه ليها يوم عن يوم قلبها كان بيشتعل من الغيرة وفي يوم دخلت تينفاش على ليمسار بكوب من الحليب الدافي الممزوج بالعسل وقالت لها هدية من الخادمة الى مولاتي ليمسار اخدته ليمسار وشربته ونامت نوم عميق قام تينفاش شالت ليمسار على كتفها وحملتها الى عابر السبيل اللي كان متنظرها تحت الشجرة ورمت قدامه ليمسار وهربت

الغول تأمل ليمسار لقاها آية من آيات الحسن والجمال طلع الخنجر لكن ما قدرش يقتلها فضل يتأمل جمالها وبص وقال مش حرام الجمال ده كله ياخده ناسنا وانا اتحرم منه انا عايش انا وولادي بلا انثى تجمل حياتنا انا ح اخد ليمسار وارجع بيها الى الكهف

شال ليمسار وهي لسة بلا وعي ولا دارية باللي نابها

ابو ذر الغفاري..دي مسيهي دي؟

الواد مينو كتب بوست عن مقولة: عجبت لرجل لا يجد قوت يومه كيف لا يخرج على الناس شاهرا سيفه، وبما ان مينو مش مطلوب منه انه يبقى معاه دكتوراه في الحديث فهو اشار الى انه مش متأكد اذا كان ده حديث نبوي شريف وللا مقولة عن ابي ذر، واذ بي افوجأ ان حد داخل يقول له ما معناه يا مسيحي يا لئيم مالك انت ومالنا واحنا عارفين انت قصدك ايه انت بتقومنا طب ما تقول حاجة من الكتاب المقدس، ثم ان انت ما قلتش سياق المقولة او الحديث!!!!! والحقيقة انا مش عارفة ح تفرق مع الاخ المجهول في ايه انه يعرف سياق مقولة ابو ذر
واذا كان ضروري بقى يبقى يلبس دي في وشه: ابو ذر كان بيقول الكلام ده في عهد معاوية بن ابي سفيان، وسيدنا ابو ذر اللي تنبأ له الرسول بانه ح يعيش لوحده ويموت لوحده ويبعث لوحده، وهو كان من خيرة الصحابة الذين انفقوا من قبل الفتح وجاهدوا، كان من معارضين لمعاوية بن ابي سفيان لان كان فيه ناس جعانة في عهده، وكان ابو ذر بيحرض الناس على معاوية وبيشكك في شرعية خلافته
ها؟ كان لازم يعني نفتح الموضوع ده ونضايق الناس اللي عمالة تقول معاوية رضي الله عنه؟
ودي احاديث في فضل ابو ذر وما شفتش احاديث في فضل اللي هو كان بيحرض على الثورة ضده:

ألا إن الجنة اشتاقت إلى أربعة من أصحابي فأمرني ربي أن أحبهم فانتدب صهيب الرومي وبلال بن رباح وطلحة والزبير وسعد بن أبي وقاص وحذيفة بن اليمان وعمار بن ياسر فقالوا يا رسول الله من هؤلاء الأربعة حتى نحبهم قال رسول الله صلى الله عليه وسلم يا عمار عرفك الله المنافقين وأما هؤلاء الأربعة فأحدهم علي بن أبي طالب والمقداد بن الأسود الكندي والثالث سلمان الفارسي والرابع أبو ذر الغفاري

إن جبريل عليه السلام أتاني فقال إن ربك يحب من أصحابك أربعة ويأمرك أن تحبهم قال بعض أصحابه سمهم لنا يا رسول الله قال أما إن عليا منهم حتى إذا كان الغد قالوا يا رسول الله النفر الذين أخبرك الله أنه يحبهم قال علي وأبو ذر الغفاري والمقداد بن الأسود وسلمان الفارسي

أمرت بحب أربعة من أصحابي ، و أخبرني الله أنه يحبهم : علي ، و أبو ذر الغفاري ، و سلمان الفارسي ، و المقداد بن الأسود .

وفيه احاديث كتيرة قوي تانية، طبعا فقهاء السلاطين، واللي بيصادف ان معظمهم سنة بيأيروا شوية من ابي ذر لانه كان بيلطش للسلطان وش كده من غير حسابات وما كانش تنظيمي ولا تبع فريق من الفرق طالع لوحده كده يهزأ كل ظالم من غير ما يفكر في حسابات سياسية
قووووووم مينو لانه نحس وغفاري النزعة ساب كل الاحاديث والاقوال وما نقاش غير ابو ذر اللي بيحط فقهاء السلاطين واتباعهم في محنة كبيرة: ما يقدروش يشككوا فيه وفي نفس الوقت لو قالوا عليه الكلام اللي بيقولوه على اي صحابي تاني الناس ح تقول لهم ها؟ طب ايه؟ فبيفضلوا انهم ما يجيبوش سيرته خالص منعا للاحراج هو وكام صحابي تاني زي عمار بن ياسر مثلا وعلى عينهم بيجيبوا سيرة سيدنا علي يعني ودايما يجيبوا سيرته في اطار بطولاته العسكرية وقفل على كده بقى مش عايزين وجع دماغ

مع ان اللي عايز يتجنب المشاكل مع السلطة الاحسن له انه ما يجبش سيرة سيدنا محمد من اساسه بقى ده اكبر احراج في الدنيا يعني
لا بيجيبه سيرته ويقولوا اصل الكلام ده ايام مكة، منسوخ يعني منسوخ
والخناقة اللي اتعملت مع مينو لانه مسيحي كفتس لئيم بيحرض المسلمين انهم يثوروا على الجوع بس على مين يا عابد الصليب يا ازرق احنا ح نجوع وح نستحمل بالعند فيك روح خلي المسيحيين يضربوا يا دسيسة
كل الخناقة في ان ده مش حديث دي مقولة لواحد صحابي وكأن ابو ذر ده مسيحي والعياذ بالله ومش بعيد يكون انجيلي كمان استغفر الله العظيم مع ان مينو نهى البوست بتاعه بحديث نبوي صحيح اقوى بكتير من مقولة ابو ذر: افضل الجهاد كلمة حق عند سلطان جائر
واحنا كلنا عارفين ان ذروة سنام الاسلام الجهاد
الناس حاسة ان مقولة ابو ذر قوية عشان فيها كلمة سيف، بس لو تأملتها ح تلاقيها بتدعو لاستخدام السيف عند الجوع
لكن حديث الرسول صلى الله عليه وسلم الصحيح الحقيقة بيدعو للجهاد ضد السلطان الجائر قبل الوصول لمرحلة الجوع بكتير
افضل الجهاد كلمة حق عند سلطان جائر، يعني تجهز لسانك سلخ على اي حاكم تسول له نفسه انه يجور في اي قضية من القضايا
لا وفيه حديث اقوى بكتير: الساكت عن الحق شيطان أخرس
ده وش ده، على كده انت مش ح تسكت خالص، واقوى بكتير برضه من مقولة ابو ذر اللي لا تدعو الى الثورة والاعتراض الا في حال الجوع، لكن احدايث الرسول بتقول لك وانت ح تستنى لما تجوع وللا ايه؟
ده غير مقولة سيدنا علي لو كان الفقر رجلا لقتلته وغير حكم سيدنا عمر لما جاله واحد جارر الخادم بتاعه وبيقول له ده سرق فسيدنا عمر قال له سرقت ليه الخادم قال له جعان فسيدنا عمر قال للسيد انا ح اقطع ايدك انت عشان سايب الخادم جعان لحد ما سرق
عموما الواد الكفتس مينو خلاص مش ح يتلائم ويتكلم في الاسلام تاني وقرر انه يدور في الكتاب المقدس عن ايات بنفس المعنى
على الله بقى ما حدش يدخل يقول له انت فاتح المدونة للتبشير
عشان يبقى يوم ما يقول حديث نبوي او مقولة اسلامية يبقى وانت مالك انت يا ازرق
ويوم ما يتكلم عن الكتاب المقدس يبقى ايها الزنديق الحبظلم بظاظا انت بتستخدم المدونة النجسة للتنصير
ارجمووووووووووووووهم
البني ادم يقدر يتغابي ويفهم الكلام زي ما هو عايز ويلوي عنق الحقائق عشان يشتت نفسه والناس ويريح ضميره
عشان كده انا شايفة ان الغباوة خطيئة كبيرة
البني ادم دأب على انه يتصدر في الهايفة زي انه يقول ده مش حديث دي مقولة او زي اللي قالوا لي انت بتقولي على الرسول واطي بتعمد الاستهبال والتغابي وتمثيل عدم الفهم عشان يتهرب من مواجهة نفسه
البني ادم يقدر يعمل حاجات وسخة كتير يهرب بيها من الدين والقانون والاخلاق وهو بيوهم نفسه واللي حواليه انه شيخ طريقة وخيرة البشر
البني ادم مافيش شيطان ولا ملاك اقوى منه وهو اللي بيقرر يدي قياد دماغه وحياته للشيطان وللا للملاك وللا لضميره وفطرته اللي هي اقوى بكتير من اي شيطان او ملاك
البني ادم ظلوم وجهول وقتور وجبان وغبي وتافه وزي الزيبق ماحدش يقدر يمسكه من غير ارادته غير اللي خلقه
البني ادم في ايده يبقى عادل وعالم وكريم وباسل وذكي بس لو هو عايز.....بس لو هو عايز
البني ادم مافيش حاجة ح تخليه يتحمل المسئولية اللي ربنا اوكلها له غير ارادته الشخصية الحرة اللي نابعة من جواه
وهي دي المشكلة

من النهاردة مافيش كرة تلج، انا كرة التلج

انا كرة التلج، اصل الكلمة دي بقت تستفزني، مش لمعناها او لسياق استخدامها بس لاني كل ما اشوف حد يقول لي كرة التلج كأنهم تافين في بق بعض
الحمد لله اكلت الفسيخ ونقدر بقى نمخمخ
من امبارح كان فيه اقتراحات منها قائمة باسماء كل المعتقلين ودي عليا انا دي سيبوهالي ان شاء الله على بكرة اكون جبتها من بابا هشام مبارك ابانا الذي في حقوق الانسان
واننا نوقع على بلاغ للنائب العام ونتجمع يوم اربعة مايو عشان نقدم البلاغ ده، برضه ح اسألكوا في هشام مبارك مدى قانونية اننا نوقع على البيان المتوجه للنائب العام بكرة واقول لكوا الاخبار
صور للمعتقلين فيه كريم البحيري ما اعرفش بقية الصور
بانرات افرجوا عن مصر دي حد غيري يعملها انا كتر خيري على النت لحد كده قوي ده انا بقيت على لينكس يعني صعت تكنولوبيا خالص
بالنسبة للبلاغ هل نقدمة قبلها بيوم وللا في نفس اليوم افضل برضه دي تتوقف على الظروف وبرضه ح اسأل بكرة في هشام مبارك ابانا الذي في حقوق الانسان وهم برضه يقدروا يقولوا اقتراحات اكثر عملية
وبكده يبقى لبس الاسود له معنى على الاقل نبقى لابسين اسود عشان المعتقلين
النهاردة عشان اجازة فالمركز مش فاتح حاولت ادخل على الموقع لقيته مش حاطط كل اسامي المعتقلين عشان كده لزمن وحتمن اجيبه من المركز نفسه ولو عرفت اجيب صور ان شاء الله هو النهاردة كام في الشهر
يانهااااار، احنا لازم نلحق بسرعة
هو دايما زكريا يقول قبل ما القطر يتحرك كده
بس ملحوقة انشاء الله، وكمان لازم اعمل التوكيل بتاع هشام مبارك اللي عمالة اتلكع في عمايله ده
بكرة بكرة ان شاء الله

ننوس عين مامته

من عند ماك
احد الضحايا اللي سابوا البلد من وش حمادة عزو



منعا للاحراج يوم اربعة مايو

دلوقت حسام الحملاوي كان كلمني وقال لي ان يوم اربعة مايو ده ح يبقى يوم الاحراج العالمي لحزب الفيس بوك، وقلت له اني كنت معترضة على اضراب اربعة مايو لاسباب عديدة منها التاريخ نفسه فيه شخصنة ومنها ان الموضوع شكله كده ح يقلب تهريج بس لما الحكاية زادت وبقت الناس تاخد افراج من النيابة ويتعمل لها تجديد اعتقال قلت لازم نعمل حاجة ومدام خلاص الناس اتفقت على اربعة مايو فليكن اربعة مايو لكن ياريت مايبقاش فيه شخصنة
بس طبعا هم مين، عملوا الغنوة البايخة دي ام دم تقيل والغريبة ان الناس انباساطت وضحكت مع انها
bad taste
وطبيعة النكتة بتاعتها شكلها خواجاتي كده، مش نكتة مصري يعني احنا لينا نكتتنا الخاصة جدا واللي مش من ضمنها التهريج القاسي ده
انما ده تهريج مستورد، وعشان ماحدش يفهمني غلط ويفتكر اني باتهم اللي عملوا الاغنية بالعمالة وللا حاجة احسن الناس بقت على صرخة واحدة انا اقصد ان طبيعة النكتة خواجاتي، يعني اللي عملوها ممكن يبقوا عيال فافي من اللي بيتكلموا عربي شبه مكسر ومعظم تكوينهم الثقافي افلام امريكاني، ما اقصدش ابدا ابدا ابدا انهم عملاء ولا مزقوقين ولا قابضين الله يخليكوا ركزوا معايا والنبي احسن كل كلمة بقت تتاخد بحساسية زيادة اليومين دولم
المهم الموضوع رجع تهريج تاني مع اننا كنا اتفقنا انه ما يبقاش تهريج
طب فيه اقتراحات اخرى من الناس اللي عايزة تحول مسار الدفة من التهريج، وتهريج بضان كمان، للجد خصوصا ان الموضوع دمه تقل قوي بعد تجديد الحبس للناس وبعد قانون حنفي
حسام بيقترح اننا نخصص يوم اربعة مايو ده للتضامن مع الاسرى اللي تم تجديد اعتقالهم، خصوصا اني عرفت من مركز هشام مبارك ان معتقلي المحلة تم تعذيبهم وصعقهم بالكهربا
حسام بيقول ان احسن يبقى فيه حاجة على الارض، انا مش عارفة ايه اللي ممكن يبقى على الارض، خصوصا ان الارض ح تبقى ملبشة امن، انا لسة مع ان الناس تقعد في البيت، حسام بيقول، ههههههههههه حسام بيقول دي فكرتني بزكريا بيقول، المهم حسام بيقول ان القعدة في البيت ح تخلي الناس تتعرض للاحراج اللي هو بيقول عليه خصوصا ان الناس مش ح تقعد في البيت ولا حاجة ومش ح يقعد في البيت غير قلة قليلة
مافيش امل غير ان يوميها تقوم عاصفة ترابية تانية
مش عارفة انا بافكر بصوت عالي، مع الوضع في الاعتبار اني انا وحسام ما كناش متحمسين قوي للفكرة من الاساس لكن مدام الفكرة اتعملت واتفق عليها الناس يبقى لازم تبقى فعالة مش تهريجية
ومع الوضع في الاعتبار ان ناس كتير في السجن
وان المحلة اتظلمت قوي من الاعلام ومن الدولة ومن الناس العادية كمان
وان الاغنية دمها تقيل وخواجاتي، نوع نكتة كده انجليزي مش عارفة، باردة
حسام على فكرة كان بيكلمني وهو نازل مظاهرة في سان فرانسيسكو للتضامن مع المحلة
انتوا ايه رأيكوا
ومش عايزين تهريج
واحنا مقصرين مع بتوع المحلة، انا اقصد المدونين، احنا مقصرين فعلا، وانا على رأس المقصرين طبعا، الموضوع نام مننا عايزين نصحصحه تاني، وانا شخصيا مقصرة مع معتقلي المحلة لاني اتلهيت في اللي كانوا هنا، وبصراحة اتلهيت في ابني
الشرقاوي يعني
طب ايه اقتراحاتكوا انا كلي اذان صاغية اهو اتفضلوا الميكروفون معاكوا
واقترحوا عليا انا كمان اعمل ايه عشان انا حاسة بالذنب تجاه المحلة

Sunday 27 April 2008

ويرضه خير تاني

العرصات المشار اليهم في البوست السابق، بيدخلوا عندي ليه؟ بجد ده سؤال بيطرح نفسيته على الطبلية
لسة واحدة مدونة مكلماني بتقول لي على حاجة وفوجئت بيها بتقول لي: والله انا مبسوطة اني باكلمك ولو ان كان بينا سوء تفاهم
وطبعا فوء التساهم ده انا ولا كان عندي خبر بيه، اتاري واحد من المرضى اللي بيدخلوا عندي انونيمس ويتعارص عليا وبعدين يرجع يدخل باسمه ويقول لي كلام من قبيل يا ستنا ويا امنا ونيلك جوا دمنا والكلام اللي كله نفاق ده لا وايه؟ وقدام الناس اللي هو لسة شاتمني معاهم، وقال للبت الغلبانة اني باقول عليها امن
!!!!!!!!!
طب هل انا حد يعرف عني اني لا سمح الله بامسك لساني مثلا؟ ده انا اللي اكرهه الله يكون في عونه باعمل للي جابوه فضيحة وشنشلة واخلي اللي ما يشتري يتفرج عليه من امتى انا ح اتكلم من ورا حد عليه وادخل مدونته عادي واسيب تعليقات عادي ولا كأن فيه حاجة عادي
طب انا اعمل ايه انا دلوقت
ماهو البعدا لو كانوا رجالة كانوا دخلوا باساميهم واسامي مدوناتهم وكنت فرجت عليهم امة لا اله الا الله، وامة "عباد الصليب" اللي هم حاطينهم في دماغهم وفاكرين نفسهم بيجاهدوا في سبيل الله بانهم يشتموا مخاليق ربنا عشان بس اختاروا دين تاني
لكن اقول ايه بقى؟ مافيهمش راجل يقدر يقف بوشه قدام واحدة فقيرة الى الله زيي
طب بييجوا عندي ليه؟ ليه؟ بيحبوا يعذبوا نفسهم؟
طب خليهم يتعذبوا بقى انا عن نفسي مبسوطة، للدرجة دي مش قادرين على بعادي؟ والله ما كنت اعرف، انا لو اعرف كنت حطيت لهم صورة على المدونة عشان يطبعوها ويشيلوها في المحفظة مدام ما بيقدروش يستغنوا عني للدرجة دي
ولو كنت اعرف ما كنتش حطمت قلوبهم الكسيرة يا سكمنس
ياختي ياختي ياختي انجغغغغغغغغغغغغ
----
بمناسبة "عباد الصليب" هل هنأتم اخاكم عيسى بالعيد؟
انا والله مضروبة على دماغي وما فقتش غير لما سمعت اجراس الكتدرائية اللي جنبنا
كل سنة وانتوا طيبين بمناسبة عيد القيامة
وشم الفسيخ

خير بقى؟

هي الدنيا مالها اتملت عرصات وبهايم ومتخلفين وجهلة متعالمين؟
ليه؟
وطفحوا على الوش كده مرة واحدة بوم
وللا انا اللي حظي اني اشوط في الخرا منين ما امشي؟
ياللا الدنيا مليانة اشكال

بمناسبة قانون حنفي

كل البشرية، ومن ضمنهم انا كمان يعني انا بشرية برضه، مزبهلين من قانون حنفي اللي بيحكم البلد
النيابة تقول: اللي يدخل جيب السبع لا ممكن يخرج ابدا
امن الدولة: حنفي
النيابة: مافيش حنفي، انا كلمتي لا ممكن تنزل الارض ابدا
امن الدولة: حنفي
النيابة: خلاص تنزل المرة دي انما اعملي حسابك المرة الجاية لا ممكن تنزل الارض ابدا
ومع هذا الارتباك ما بين حنفي وام حميدة فاحنا كمان مرتبكين، ايه المشكلة في امن الدولة؟ مش انه شرير، كان من يومين مالك مصطفى بيشتكي لي من واحد غبي، مع انه قبل كده حذرني من الاغبيا وسبحان الله النصيب وقعه فيهم، قلت له الشرير له حلول كتير قوي
منها انك تتجنبه ولو ان دي طريقة مش مضمونة، بما انه شرير فهو بيستمتع باذية الناس خصوصا اللي بيتجنبوه
ومنها انك تكسر سمه بسم انقح منه ودي طريقة رغم انها تبدو انتحارية انما اضمن كتير
اللي مالوش حل فعلا هو الغبي، خالص، لانه عامل زي واحد مش بيعرف يسوق ولا عمره ركب عربية ابدا ولا حتى في الكنبة الورانية ومرة واحدة ساق عربية مافيهاش فرامل وداس بنزين على الطريق الزراعي، طبعا العربية ح تتقلب بيه، بس على ما تتقلب بيه ح يكون قتل كام بني ادم وكام جاموسة ورمى كام عربية في الترعة ولما تتقلب العربية بيه يا ترى ح تتقلب في الترعة؟ يا ترى ح تتقلب في غيط وتولع فيه وفي الغيطان اللي حواليه؟ يا ترى ح ياخد كام عربية في سكته وهو بيتقلب؟ وممكن ربنا يستر بس دي تبقى ستر ربنا وبس
وهي دي المشكلة في الغبي عشان كده: عدو عاقل خير من صديق جاهل
حتى مالك سألني باستنكار: طب وايه الفرق ما بين الدسيسة والغبي قلت له الدسيسة احسن واضمن الحقيقة
مشكلة امن الدولة انه زي عم السواق ده، عامل القصة ما بينه وبين الناس عند مش اكتر
والعند يورث الكفر، وكل الحكاية استعراض عضلات والكلام مش موجه لينا الكلام موجه للجناح التاني في الحكومة عشان يقول لهم انا اللي حاكم البلد مش انتوا، واحنا اللي بنتفعص في النص
طب خلينا كده نفكر في سيناريو تاني بعد الاضراب: لو امن الدولة تجاهل الاضراب تماما كأنه لم يحدث بالمرة، وكمان تجاهل المحلة، بل لم يتواجد فيها اصلا، وعدى الاضراب ومشي والامن ما انتشرش في الشارع ولا حذر ولا انذر ولا اعذر ولا دياولو
كام واحد كان ح يقعد في بيته؟
وكان ايه اللي حصل في المحلة؟
وكان ايه اللي ح يحصل بعد الاضراب؟
عايزين الحق وللا ابن عمه؟
ولا حاجة، ولا حاجة خالص مالص فالص بالص طالص
البتة البطة
الدولة بدورها كانت ح تتجاهل الاضراب ومش ح تنزل اسعار السلع، والناس اللي ما نزلتش من الخوف كانت نزلت الشارع، وعمال المحلة كانوا اعتصموا والمصنع ما اشتغلش يوم وكان رجع اشتغل تاني يوم، بلاش تاني يوم، تالت يوم، انشالله بعدها باسبوع، يعني هي الدولة اسم الله فارق معاها الانتاج قوي
ويمكن كمان الاعلام ما كانش غطى بجد بقى لان مافيش حاجة تتغطى ولا تتعرى
ويمكن كان غطى ان الناس نزلت الشارع عاتشي في المعاتشي ولا كأن فيه ام اضراب، نص الناس اللي ما نزلتش ما نزلتش عشان خايفة من الحضور الامني اللي في الشارع مش عشان مضربة
ويا سيدي يضربوا يوم من نفسهم ويعدي اليوم ولا كأن فيه كلاب بتنبح
انما ازاي بقى؟ ازاي؟ وليه ما نتغاباش ونزود في الغباوة؟
الجناح الامني عايز يقول للجناح القانوني انا اللي حاكم البلد والجناح القانوني عايز يقول للجناح الامني .....مناخير امك، مشيها مناخير
اهي كلها اعضاء في الجسم البشري
هو الحقيقة مافيش اي اهتمام بالشعب المصري الشقيق، لا من الجناح ده ولا من الجناح ده كل واحد فيهم بيكلم التاني وبيستخدمنا كقطع شطرنج
طب هل يعني ايه؟ هل هم عارفين ان قطع الشطرنج دي بتاكل وتشرب وتتنفس ولها ارادة؟ مش ممكن يبقوا بالغباوة دي
الكلام عن شعب سلبي وشعب وسخ وشعب ابن وسخة ده كلام ما يقولوش غير حد هو ذات نفسيته ابن وسخة الشعب المصري مش شعب ابن وسخة ده شعب عجوز وعنده سبعتلاف سنة وبيفهم ويحس ومش بيحب الانفجارات بس ح تيجي لحظة ينبه جوز المتصارعين دولم انه موجود، هي مش لحظة قريبة قوي لان المصريين بيحبوا يجربوا كل وسائل الاصلاح قبل ما ينسفوا حمامهم القديم
احنا احسن سباكين في الدنيا نركب جلدة للحنفيات ونعلق حبل في السيفون ونربط الاكرة بسلك قديم ونعدم كل حاجة العافية قبل ما نرميها
بس لما غبي يدخل الحمام ويتعمد انه يكسر كل حاجة عشان يبعت رسالة لغبي تاني انه عتريس وبلوة سودا حتى بصوا
ح يضطر اصحاب الحمام انهم يغيروه، ونخش في تكاليف بقى وهد وبنا ووجع دماغ وعمال داخلة وخارجة ويمكن حاجة تتنشل من البيت عشان الرجل كتيرة وممكن يتنصب علينا في الفلوس وممكن السباك يجيب لنا صيني ويقول عليه الماني وصداع احنا مش عايزينه ومش ح نلجأ له الا لما تكون كل حيل الشعب العجوز ده نفدت خلاص
فياريت الغبي يبطل غباوة، لان الغباوة ينفع تتبطل اسهل من السجاير على فكرة، ربنا خلق كل البني ادمين اذكيا والا ما كانش حاسبهم على تصرفاتهم، بس لو البني ادم يبطل يتغابى
آه
انا طالبة من السادة العلماء الاجتهاد والافتاء بان التغابي من الكبائر
---------
ملحوظة: ياريت تسيبوا اسراء في حالها,...ياريت تسيبوها في حالها...من فضلكوا يعني
احسن ما ربنا يخليكوا تلاقوا نفسكوا مكانها، ربنا مش بيسيب حق حد
اسراء....انا باحبك، وانت في عيني زي ما انت، ومن حقك تختاري اي اختيار في حياتك وانا مسانداكي فيه عمياني ومن غير ما اعرف هو ايه، انا شخصيا يعني، وانت بنت كويسة وح تفضلي كبيرة في عيني، وما تلتفتيش لاي حد بيجرح فيكي، ماحدش يابنتي بيحس بحد غير لما يتحط مكانه
ربنا معاكي

Saturday 26 April 2008

اخبار جديدة؟

أنا اصلي كنت مقطوعة عن العالم لان طبعا ايدي ورجلي كانوا مقطوعين كلهم حصان طروادة
بس النهاردة كان فيه اخبار من مركز هشام مبارك ان مجموعة كبيرة من المعتقلين في المحلة، ودولم غير اللي في برج العرب، اتعمل لهم امر تجديد والمحكمة رفضت استئنافهم وفيه منهم ناس اتعذبت
دلوقت احمد الصباغ بيقول لي ان دكتور ممدوح المنير من المحلة اتعمل له امر اعتقال بعد افراج النيابة عنه
والله واضح ان النيابة دي يعني سواء قبلت الاستئناف وللا رفضته مالهاش كلمة على امن الدولة
حنفي.....خلاص تنزل المرة دي
انما اعملي حسابك المرة الجاية لا ممكن تنزل الارض ابدا

أنا على لينكس

يا عيب شووووووووووووووم
ما حطتش لنك للاسعاف ناين مالك مصطفى مالك مصطفى
هنا يقطن المدعو مالك مصطفى
بسكوا عليه اي حد عايز يحمل لينكس ينطلق فورا اليه
وهو كل يوم في مركز هشام مبارك واحد شارع التوفيقية هاتف رقم
25758908
هييييا يا شباب
ارجمهووووووووووووهممممممممممم


الحقيقة الصخص اللي دخل الكمبيوتر بتاعي عاث فيه فسادا وبوظ لي كام ملف بس الحمد لله كنت اخدت الملفات على ديسك وبعدين طلبت رقم الاسعاف: مالك مصطفى صفرين مالك مصطفى، قامت الاسعاف ردت عليا على طول وما سابونيش على المزيكا وجه مالك عععععععنننننننننننننننننننن وحمل لي لينكس والعبي يا مدرسة الالعاب

نصيحة لوجه الله تعالى كله يحمل لينكس لان ده مش محتاج انتي فايرس ولا حاجة وايتها صخص مش ح يعرف يدخل وببلاش وعيشوا بقى وطبعا وكالة الحاج حسام الحملاوي للحملات قرر انه يعمل حملة تعميم للينكس عشان كل المدونين يستخدموه
وعلى فكرة سهل يعني، اظن مافيش احمر مني في التكنولوبيا ومع ذلك اهو طلع الموضوع لطيف ومافيش طروادة وقهر تاني كل الاماني بقت حقايق واي حد مش فاهم لينكس ممكن يدخل عند مالك مصطفى او يطلب رقم الاسعاف: مالك مصطفى صفرين مالك مصطفى هي دي رقم التربلشوتر اللي بيصلحوا لي الكمبيوتر، على فكرة والعربية كمان مع ان علاء سيف بيقول لي ان اقصى علاقة مالك بالعربيات انه كان بيجري وراها في الشارع لما كان عيل، بس اهو صلح لي العربية ونفعت

Thursday 24 April 2008

هو ايه حصان طروادة ده؟

الكمبيوتر بتاعي بيقول لي الفايلات بتاعتك دخل عليها حصان طروادة
بيعمل ايه ده؟ مين عايز مني ايه؟ او من اللاب توب بتاعي؟
هو انا عشان قلت عندي احراز لاب توب امبارح صدقوا ايه الغباوة دي؟ طب ح يدخلوا على الفرن اللي بالكهربا ازاي؟
عموما اديني عمالة اقتل الفيروسات
وربنا يستر انا اصلي معوقة تكنلوجيا
زي اخوانا البعدا بالظبط

اسماء اسرى المحلة

دي اسماء اسرى المحلة من عند الحاج حسام الحملاوي للحملات
هو شبشب قانون الطوارئ ده ح يفضل مرفوع كده كتير وكل شوية ينزل على ام دماغنا؟
وياريته بيطبق
طب ياريت يطبقوا قانون الطوارئ
انا بقى عايزة قانون الطوارئ يطبق عدل
هو قانون الطوارئ يخليك تحجز عمال واهالي وناس عادية جدا في احداث هم مالهمش اي يد فيها وكمان واخدين افراج من النيابة واحيانا من النائب العام زي حالة اسراء؟
هو قانون الطوارئ بروح امهم مش بيطبق على ممدوح اسماعيل بتاع العبارة ليه؟ اشمعنى اطبق على ممدوح اسماعيل المحامي عشان لقوا عنده فلاشة من ضمن الضبطيات؟
يالهو بالي ياما، ده انا عندي ممنوعات كتير قوي: ايشي فلاشة على لاب توب على تلفزيون ملون بيجيب قناة المعلومات وفيديون وريسيفر وحاجات قلة ادب كتير قوي، وعندنا كمان فرن بالكهربا...اه وربنا، كل دي احراز ربنا يستر بقى ان شاء الله ح اخبيهم بسرعة في مكان آمن احسن لو لقوهم عندي تنظيم التهييس ح يتكشف وح نروح كلنا في داهية وانا ح اعترف عليكوا واحد واحد، بس يقطعوا عني التكييف في الحر ده
طب قانون الطوارق والنوازل ما اطبقش على هاني سرور ليه؟ وللا يكونش الناس هي اللي لوثت الدم بغباوة قلوبهم؟
اشمعنى قانون الطوارق ما بيطرقش غير باب الغلابة اللي مالهمش في حاجة، وعلى رأي حسام الحملاوي، بيقول لي هو مش ده معمول عشان الارهاب زي ما بيقولوا لنا؟ طب هم دول ارهابيين في ايه؟ دول عمال
الاسماء اهية
Kamal Mohamed el-Sayyed el-Fayoumi, Ghazl el-Mahalla worker
Tarek Abdel Hamid Amin (Tarek el-Senoussi), Ghazl el-Mahalla worker
Abdel Kareem Ali el-Beheiri Abdel Kareem (Kareem el-Beheiri), Ghazl el-Mahalla worker and blogger
Ibrahim el-Zoghby, Mahalla resident
Ahmad Mohamed Ahmad, Security guard at Ghazl el-Mahalla
Ibrahim el-Yamani, doctor
Abdel Halim Ahmad, Ghazl el-Mahalla worker

كريم البحيري في سجن برج العرب


تحديث بخصوص كريم البحيري:
ده التعليق اللي سابه حسام الحملاوي عندي:

كريم وكمال الفيومي وعدد من عمال غزل المحلة ومواطني المحلة كانو محتجزين بأمن دولة المحلة بعض صدور قرارات الإفراج من النيابة ودلوقتي اتحولوا على سجن برج العرب.. المحامين بيحاولوا دلوقتي يطلعوا تصاريح زيارة ويروحوا... وأنا بأدعو الناس انها تحاول تروح تزورهم وما تسيبهومش لوحديهم في المحنة ديه
أنا حأبعتلك دلوقتي نمرة محام رايح على الميل...

انتهى التعليق واحكي لكوا اللي حصل:
كنت باتصل بكريم مش بيرد وبعدين تليفوناته اتقفلت، اتصلت بالمحامية صفاء زكي مراد وقالت لي ان اسم كريم البحيري مش في المحتجزين بتوع المحلة، ماما قالت لي حرام عليكي ليكون الواد مستخبي سيبيه في حاله بقى
طبعا الكلام ده كان يوم تمانية او تسعة ابريل مش متذكرة، واعتمادا على ان امي دايما تحسسني بالذنب قلت طب خلاص، لو فيه خبر جديد او حد عرف انه في امن الدولة اكيد ح تتنشر في المدونات
وبتوع المحلة اخدوا اخلاء سبيل والناس هيصت وزأططت وانبساطات
واتباعا لسياسة عدم التنجيم ماحدش جاب سيرة كريم غير حسام من كام يوم وانا قلت ياااااه الواد لسة مستخبي لحد دلوقت؟
لحد ما حداويت دخل عندي وقال لي كريم فين يا نوارة وانا كل ده مقتنعة انه غطسان وبعدين الفار لعب في عبي رحت لحد حسام فقال لي الاخبار دي
طب هل كريم اتعرض على النيابة؟ واذا كان اتعرض على النيابة ماحدش قال لي ليه؟ اكيد صفاء زكي مراد لحد يوم تمانية او تسعة، وهي محامية من بتوع المحلة ما كانتش تعرف ان كريم هناك وده معناه انهم خفوه شوية
يخفوه بقى وللا يغور في داهية مش كده؟ ما احنا مش عايزين نعمله نجم
افففففففففففففففففففففففففففففففففففففففففففففففففففف
ان شاء الله ح اتصل بالنمرة اللي بعتها لي حسام واشوف نطلع امتى واقول لكوا

لسة حالا حسام الحملاوي باعت لي ميل بيقول لي ان كريم البحيري محبوس في سجن برج العرب
يعني ايه الكلام ده؟ طب وخافيينه عن المحامين ليه؟ وازاي يدخل سجن برج العرب من غير ما يعدي على امن الدولة؟ ولما عدى على امن الدولة انكره ليه؟ طب اتعرض على النيابة وللا لا
يا حساااااااااااااام رد عليا
اي حد يعرف يقول لي، طب فيه زيارات له في سجن برج العرب؟
لو كده نروح له

مافيش نجوم لاننا مش ممثلين

الحقيقة انا الروح دي مش عاجباني خالص، اه لامؤاخذة اصلي باكمل حوار في دماغي، موضوع النجوم ده، اصل كذا حد فتحه معايا، اعداد مهولة من البشر، كل ما واحد يتقبض عليه، والطبيعي اننا نعمل له هيصة وبوليكة لان ماحيلتناش غير اننا نفتح الشباك ونرقع بالصوت زي البت اللي ابوها بيعذبها في العشوائيات، يطلع لنا كام واحد زي الخازوق المألوظ يقول لنا انتوا ح تعملوا فلان وللا فلانة نجم بقى؟
انا مش باحب احلل نفسيات الناس لان ده مش تخصصي ولان النفس ما يعرفهاش غير اللي خلقها، واللي بيدوا نفسهم حق انهم يحللوا بول لنفسيات الناس ليس لهم مني الا كل احتقار، بصراحة ربنا كده يعني
بس دي روح شريرة في التعامل مع الامور لعدة اسباب
اولا: والله المحبوس ده لو اخد جايزة اوسكار للحبسجية ما ح يخفف عنه نقطة من الالم اللي بيحسه وهو جوه السجن ولما بيطلع براه وربنا ما يكتبها على مخلوق يا رب ويفك اسر كل المظلومين، قولوا امين
ثانيا: انا مش فاهمة الناس اللي بتتكلم كده بيشتغلوا في التدوين ليه اصلا؟ ماهو شغلانة المدون انه يعمل باللو ومالناش سلاح في الدنيا غير كده، والحمد لله شغلانة مجاني وربنا يديمها كده ويكفينا شر القبض والمقبوض بكل ما تحمله الكلمة من معان
هو احنا لما عملنا باللو على فيديو عماد الكبير كنا بنعمل منه نجم؟ وهل بفرض ان الحملة اللي اتعملت لمساندة عماد الكبير عملت منه نجم، هل ده خفف عنه اي الم؟ صحيح ساعد في القضية والحمد لله وده من عند ربنا يعني ولان الناس كانت مخلصة النية ومش عايزة اي مقابل بس لو اسلام نبيه ده اخد اعدام حتى، حد عارف الليل لحد دلوقت بيعدي على عماد ازاي؟
وقال على رأي اللي قال، اللي هو مينو خطيبي المسيحي: يخرج نجم احسن ما يخرج مكسور
ثالثا: قبل ما الناس تتكلم بالطريقة دي على اي حد مش بيحطوا نفسهم مكانه ليه؟ وايه الروح القاسية دي؟
امال حروق لسان ايه وحريات ايه وانسانيات ايه واخلاق ايه اللي بيتكلموا عنها وهم بمنتهى القسوة عايزين يكتموا نفس اي حد يتكلم عن اي حد تاني في السجن بدعوى: ما تعملهوش بطل ما تعملهوش نجم
ومالهم بقى ومال مبارك زعلانين منه ليه؟ هو بيحبس الناس وهم عايزين يطنشوا عليه
المفروض ولله الحمد والمنة اننا ما عندناش ابطال ولا عندنا شخصية كاريزمية ولا عندنا زعماء والحمد لله على كده دي احسن حاجة حصلت لنا في التاريخ وربنا ما يوعدنا ابدا بزعيم ولا بطل عشان نستبدل الطاغية المكروه بطاغية محبوب كأننا بنطلق ونتجوز سيد سيده مش كأننا شعب بيدور على حقوقه
واحسن حاجة حصلت في الهليلة دي ان كلها شباب مافيهاش حد جلده تخين قاعد ينظر على قفا امنا وياكل دماغنا ويقول لنا نعمل ايه وما نعملش ايه
واحسن حاجة في الحدوتة انها عفوية وتلقائية وشعبية لا فيها خلايا ولا انسجة، ويلعن ابو النخبوية
ومع ذلك الناس ما سلمتش والشعب كله بقى قلة مندسة، على الحكومة طبعا، ولما ربنا بيبتلي واحد او واحدة من الشباب العادي جدا، العفوي جدا، اللي مافيش حاجة بتحركه غير انه بيحب ام البلد دي بالسجن وللا ظلم يقع عليه، ولاننا مالناش غير بعض، فالمفروض اننا كلنا نتلم نسانده ونعمل له هيصة وظمبليطة في الصالون عشان ما يندمش انه عبر قرعة البلد دي باي حاجة، وعشان هو مش وراه حزب ولا حركة بركة ولا نيلة تسانده، وعشان هو ما بيقبضش من حد، وعشان كمان احنا نتشجع، احنا نفسنا ما نخافش ونحس ان لو حد فينا لا قدر الله وقع الوقعة دي ح يلاقي ناس حواليه يقوى بيهم، واحنا لما بنساند سين او صاد او لام الف او همزة على نبرة بنساند نفسنا قبل ما نكون بنسانده وبنتلم على بعض، والنجم في القصة كلها هم الناس
ده اذا كان المفروض يبقى فيه نجم اصلا، انا ما اعرفش ان الحكاية تمثيلية وللا فيلم ولو الحكاية كده قولوا لي دلوقت حالا عشان اجيب ضرف ام المدونة دي بلا وجع دماغ، انا اصلي ما كانش ليا طموح في التمثيل انا وانا في تانية ابتدائي كنت عايزة اطلع رقاصة، وبما ان الوقت فات على الانحراف واللي ذاكر ذاكر فعلى الاقل اشوف لي شغلانة تانية غير مهنة التمثيل اللي انا مش موهوبة فيها
اصل فلان لما اتنجم خرج من السجن اتقالط على الناس
كحك بجد، مين قال لك ان فلانة وللا فلان خرجوا اتقالطوا على الناس، مين قال لك انه خارج سليم اصلا وللا عارف هو بيتصرف ازاي؟ بدل ما ترحمه وتحس انه محتاج حضن الناس اللي هو اتنيل اتسجن عشانهم تقول اتقالط على الناس؟
الروح دي تخوف
تخوف اي حد انه يحاول يعمل اي حاجة لام البلد دي، وتخلينا مش متأكدين ان اي حد فينا لو اتعرض لاذية ح يلاقي حد جنبه واحنا مالناش حل تاني احنا ضهرنا للحيط ورجلينا في الهوا وتكالنا على الله، ولما حد بيقع مالوش بعد ربنا غيرنا واحنا مالناش بعد ربنا غير بعض
ويمكن كمان يلاقي ناس بتطعنه في ضهره وتخليه مسخة ويتريقوا عليه وهو في الحبسة ويقولوا ما تعملهوش نجم
امال لو ماكناش معظمنا طافحين مع بعض عيش وخرا
الفاتحة لقلة الاصل
ولا الضااااااااااااااليييييييييين
آمين

Wednesday 23 April 2008

حمد الله ع السلامة يا اسراء

الف حمد الله ع السلامة يا رب تكوني بخير
عقبال الباقي واحنا قاعدين كده عاملين زي امير الانتقام: الاول، الثاني، الثالث
بس امير الانتقام كان عنده اربعة، احنا عندنا مئات
يا رب
-------
في حدود انها معمول لها تجديد اعتقال اسراء بخير، ما حصلهاش اي حاجة وحشة

اللي حصل ان مكتب وزير الداخلية بعت لاهلها وقال لهم ان وزير الداخلية استجاب لالتماسهم وطلب منهم ييجوا ياخدوها قبل ما يسافروا العمرة، وهم مسافرين بكرة ان شاء الله، وهم دلوقت واقفين قدام امن الدولة ان شاء الله في انتظار انهم يا يدخلوا لها ياخدواها يا تخرج لهم
فيما عدا ذلك، اسراء زي الفل ما حصلهاش اي حاجة وحشة خالص
ارجو من الجميع انه ما ياخدش اخبار من اي مواقع الاخبار الحقيقية ان شاء الله تلاقوها على المدونات وبس واحنا متابعين مع المحامين والمحامين متابعين معاها ومع اهلها وهي دي بس المصادر الموثوق منها واي موقع حقير يكتب كلام حقير عن اسراء او اي حد جزمته انضف من مديري الموقع ما يستاهلش غير انكوا تسيبوا له تفة كبيرة وتمشوا وتسيبوه
وحسبنا الله ونعم الوكيل

عملت قرد يا اوباما وبرضه ح تسقط

جتك خيبة، والله قلت لا يستحيل الواد ينجح عشان الثقافة الامريكية ثقافة عنصرية قالوا لي انتي اللي عنصرية
والواد عمل كل مالا ممكن ابدا ونزل في امنا شتيمة وقال انه ضد حق العودة وانه ضد قرار 242 وان مافيش حاجة اسمها العودة لحدود سبعة وستين وحتى شتم القسيس اللي عمده عشان الراجل اخدته الجلالة وقال لك العمر واحد والرب واحد اقول كلمة حق وامري لله وقال امريكا دفعت تمن سياستها الخارجية في حداشر سبتمبر وبررررضه مافيش فايدة واسهمه اهي عمالة تنزل برضه
ياض انت اسود، انت اسود في بلد اي خنزير ابيض بيعتبروه بيه، واي ملون يبقى عبد حتى لو كنت حليوة وذكي وكفء ومثقف وعملت لهم عجين الفلاحة
دي لسة حماماتكوا الخاصة ما فاتش عليها تلاتين سنة انت اهبل وللا ايه؟
احمد ربنا انهم سابوك تترشح من غير ما يقتلوك
خلاص بقى غسالة تلاجة العالم لبس في مجنون او مجنونة تانية بعد بوش وريتشاردوني قالها كلمة حكمة: السياسة الامريكية الخارجية سياسة واحدة بصرف النظر عن مين اللي بينجح ولو كان كارتر مكان بوش في نفس الظروف كان اتصرف بنفس الطريقة
بس
بس
انا ما اقدرش استحمل المرة الشرموطة دي، ماكين جنرال الكازوزة اهون
بس هي شكلها كده ح تنجح لانها ماعندهاش انسانية خالص

وده يبقى اسمه ايه؟

لا ده انت غبي بقى
الا اذا كان بيعمل تموين، ولو كده يبقى غبي برضه

Tuesday 22 April 2008

انا باحب جرنال البديل

الكمال لله وحده، وما اعرفش الناس كلها عشمانة بزيادة في البديل، انتوا عارفين ده بقاله قد ايه عشان كل العشم ده يتحط فيه، صحيح العشم على قد المحبة، بس سو فار يعني حتى الان بيتقدم مش بيتأخر، فيه ناس كتير بتهاجمه عشان هم عشمانين في اكتر من كده او اداء احسن من كده بس كل حاجة تتقيم بمحيطها، انهي جرنال اكثر احتراما من البديل؟ شاورولي كده
صحيح ساعات بيعملوا جنرالات كازوزة، بس يعني جنرالات كازوزة احسن ما يبقوا مخبرين زي المخبر اليوم، او انهزاميين او اي حاجة
بصراحة ناس محترمة انا باختلف معاهم كتير وساعات بيضحكوني لما النبرة تعلا بس باحترمهم
وكمان بيعملوا صحافة كويسة

خلوا بالكوا من بلال دياب


هو ده بلال دياب، ولازم ينجح السنة دي، ماليش دعوة ذاكر ما ذاكرش، الواد ده لو حد داس له على طرف ح نعمل فضيحة ورحمة شرفهم لابعت استغاثة للقلل المنتحرة والانتحار الاورومبي واخلي اللي ما يشتري يتفرج عليهم
الصورة من جرنال البديل عملت لها سكان


ربنا يحميك يا بلال

بلال دياب: الجامعة زي الفل والعملية التعليمية زي الفل ورغيف العيش والديمقراطية موجودة والحديد موجود، طيب مصر حزينة ليه يا ريس؟ والشباب معتقلين ليه من يوم ٦ أبريل؟ افرج عن مصر يا ريس.. افرج عن مصر يا ريس.
ربنا يحميك يا بلال انت وكل اللي صقفوا

اصلهم مسكوه في اخر الجلسة وبعدين سابوه
بس ح يحطوه في دماغهم، هو وكل اللي صقفوا، والقاعة كلها صقفت، وانا كمان باصقف اهو ....اهو...اهو
ح تقبضوا على مين وللا مين بقى؟
ح تقبضوا على البلد كلها؟
انا والله عندي حل، ممكن تسيجوا مصر كلها بسياج حديد عشان مافيش سجن ح يساع الشعب كله، فاحسن اقلبوا مصر سجن، مع الاشغال الشاقة المؤبدة، هو انا مش قلت لكوا قبل كده احنا مش بلد اكصلانصات؟ ارحلوا عنا بقى انتوا اكصلانصات واحنا جرابيع، وانتوا خسارة فينا
حد عنده صورة بلال دياب، عايزين نحط صورته عشان تبقى عينا عليه، احسن يتئذي وللا حاجة
وهو ما عملش حاجة غريبة هو سأل السؤال اللي كلنا بنسأله: مصر حزينة ليه؟ افرج عن مصر يا ريس
المصيبة ان الموكوس مش يقوم يمشي او يغير الموضوع من الاحراج
لا قال قال له ايه: قال له انا زي اللي صفقوا لك بس انا "حاسس" بنبرة سخرية في كلامك
ههههههههههههههههه
الراجل ده خريج هندسة؟ عشان تعرفوا ان فوبيا المجموع الكبير اللي عند الدكاترة والمهندسين دي مالهاش اي اساس
مع كامل الاحترام يعني لكل المهن التمثيلية
اهو اهو...مهندس واتصالات كمان اللي هو اصعب قسم في الهندسة وبيقول له: حاسس بنبرة سخرية، لا سمح الله، في كلامك
يا حبيييييييييييييبييييييييييييي
لا وقال له رغيف العيش اللي بتقفوا في الطابور عشان تاخدوه ده وبتتبطروا عليه فيه ناس مش لاقياه
كان ناقص يقول له: اتبطروا عشان النعمة تزول من وشكوا يا كفرة
وطبعا طبعا زي ما انتوا عارفين حرس الجامعة اخد بلال نص ساعة بس عشان يتأكد من اوراقه
بس يعني مش عشان حاجة تانية ولا حاجة لا سمح الله
الواد ده لو ما نجحش السنة دي ح نعمل هيصة وزمبليطة في الصالون، هو اداب القاهرة مش عارفة قسم ايه
عايزين ندعبس ونحط عينا عليه احسن يتهور ويضربهم بوشه على ايدهم وللا حاجة

جمال مبارك زعيم المنوفية الاوحد

اظن جميع جماهير الشعب شافت الحوار اللوذعي اللي اجراه عبد اللطيف المناوي مع الزعيم المنوفي الاوحد جمال مبارك
انا ما اقدرش استحمل كل المنوفية دي ولكل الفترة الطويلة دي صعب عليا بجد انا اعصابي باظت
ده بيقنعنا ان الغلا ده في مصلحتنا، ورب ضارة نافعة، ده انا شلت من عليكوا عبء، وكمان ده ح يخلي الفلاحين يزرعوا اكتر
!!!!!!!!!!!!!!!!!!!!!
يعني السادات ومبارك منايفة صحيح بس فلاحين وظباط وده ممكن يخفف من وطئة المنوفية شوية
انما جمال منوفي سيك، من غير ظابط ولا فلاح وطبعا من غير صودا ولا تلج
واتركن على جنبه وقال وهو بيبتسم وبيبص بجنب عينه: انا ممكن ما ابيعش...وممكن ارخص...ماحدش ح يقول لي حاجة
بس.....وقال كلام كتير تهت منه خالص بس الخلاصة ان بيع البلد والاسعار الغالية دي كلها في مصلحتنا يعني بس احنا اللي مش عارفين مصلحتنا كويس مصلحتنا في ايه مش عارفة، بس هي كان فيها خير اللهم اجعله خير رب ضارة نافعة وفيها "انا" شلت من عليكوا عبء مش عارفة بيقول انا ليه؟ وما اعرفش عبء ايه اللي شاله من علينا ينكن مثلا يكون فيها تكفير لذنوبنا عشان ندخل الجنة حدف او حاجة زي كده؟ يعني شال من علينا عبء حساب الآخرة بقى

انا مش قلت المنوفية تستقل ويتعمل لها جدار فصل عنصري ومنايفة تمانية واربعين يرجعوا منوفيا الكبرى؟ ويتحاصروا بحيث ما يلاقوش غير بعض وساعتها ربنا يهلك المنايفة بالمنايفة ويخرجنا احنا وكل السلايفة اللهم آمين

Monday 21 April 2008

حمد الله ع السلامة يا شرقاوي

نام كويس وكل كويس وارتاح اهم حاجة سلامتك وعقبال سلامة الباقيين
ويلعن ميتين ام الغنوة التافهة ام دم تقيل على ميتين ام اللي الفها واللي لحنها واللي غناها
على ميتين ابو اللي بيتفه ويسفه اوجاع الناس ومصايبهم ويهيف اللي ما ينفعش يتهيف
على ميتين اهل اللي دمهم تقيييييييييييييل في العالم كللللللهمممممممم
هو انا قلت في البوست اللي فات اربعة ابريل؟
والله ما بقت فارقة اربعة زنجبيل من سلسبيل مدام قلبت تهريج
يا الواحد يعمل حاجة جد ويبقى قد المسئولية يا يروح يهرج في الطين

ام المثقفين على دماغهم الفاضية

ايه السفسطات النخبوية دي
يلعن ميتين كده فعلا بقى ناس فاضية وتايهة وعمالة برضه تهيس في المتهيس
ثم ايه بقى الاكتشافات العبقرية والمفاجأة غير السارة في الكلام ده وللا هو فضا وتهجيص وخلاص؟

وقته الكلام ده وللا هم بيهددونا وللا بيطفشوا الناس وللا بيلهوهم وللا بيهببوا ايه بالظبط
الناس مش عايزة غير العيش والكرامة
انا مضربة يوم اربعة ابريل عشان العيش والكرامة
ومش باهرج ولا باغني ولا باهيس ولا باستظرف دمي ولا عايزة اسمع مناقشات بيزنطية تاكل دين ام دماغي ولا عايزة ادمغة وسخة ترمي مجاريها عليا
جتكوا القرف مليتوا البلد

ندوة في الصحفيين للتضامن مع المحلة/ عرص في المتعرص

النهاردة ان شاء الله الساعة سبعة ح يبقى فيه ندوة للتضامن مع المحلة في نقابة الصحفيين وح يبقى فيه شهادات ناس
موضوع المحلة مش لازم ينام، التحقيق في موضوع المحلة لازم يفضل مفتوح
لو موضوع المحلة اتقفل يبقى الامن اكل لحمنا واستطعمه وما نزعلش بقى لو اتكرر في كل حتة وفي اي حتة
ومش بعيد يدخلوا على الناس البيوت ويموتوهم...مدام بنموت في الشارع ونسكت
----
الغنوة بتاعة اربعة مايو سم ناقع ودمها تقيل وبايخة وانا مش مبسوطة منها
مافيش مجال للتهريج، ولو الموضوع تهريج بعد ما كل الناس دي اتفشخت يبقى الامن حابس الغلابة دول ليه وعامل لهم تجديد اعتقال؟
الامن ما عندوش
sense of humor
???
وللا اللي بيهرجوا دمهم تقيل وعقابا على تقل دمهم حابس ناس تانية وقتل الناس في المحلة؟
ماحدش يهيس في المتهيس القصة مش
funny
فيه ناس مش لاقية عيش وناس ماتت وناس واخدة افراج من النائب العام واتعمل لها تجديد اعتقال وعمال فقدوا عينيهم وهاني سرور اخد براءة وابرياء اتحبسوا وقبل ده وده فيه قانون طوارئ وقبضة امنية خانقة وفوضى ومش عارفة ازاي المعادلة دي اتعملت قبضة امنية وفوضى مع بعض ومعارصة اوسخ من حكومة وحكومة اعرص من معارصة والمفروض ان الاضراب ده احتجاج على الاوضاع دي مش للتهريج والنكت السخيفة والاغاني العبيطة
صحيح اللي يمشي ورا العيال ما يخلاش من التقريص
مشيها التقريص
اديني قاعدة اقرا موضوع في البديل ولما اخلصه ح نبقى نتكلم عنه

Sunday 20 April 2008

عسكر عسكر عسكر ليه؟ احنا في حرب وللا ايه؟

المدون أحمد الجيزاوي عمل تغطية لقلة مندسة تانية غير القلة المندسة الاولانية، المعتقلين الهمج ودولم همج تانيين غير الهمج الاولانيين عشان احنا كلنا شعب ابن ستين كلب وبنضرب الحكومة بايدنا على وشها
شوفو الفيديو ده

والفيديو ده

وكمان الفيديو ده

ولمعرفة تفاصيل اكتر اندس هنا

طب يا نائل مش تعرف مين اللي كاتب القصيدة الاول

نائل الطوخي كاتب تدوينة جميلة قوي باسلوبه الادبي الرائع والذكي واللي بيعتمد كتير على قوة الملاحظة اسمها "نجم، في مذمة العدو"، الحقيقة انا باحب اعادة النظر في كل حاجة والنظرة المختلفة عشان انا دايما من عادتي اني افضي الشنط بتاعتي وعادة بالاقي فيها حاجات غريبة قوي زي مقص خياطة، رباط جزمة، كالون باب، وساعات كمان بالاقي فيها حاجات ضايعة ما كنتش لاقياها وبيبقى عادة مش مكانها شنطة ايدي فعمري ما ادور عليها فيها، وعليه فانا مهتمة دائما بمتابعة اتنين: نائل الطوخي وعمرو غربية عشان هم دايما يفضوا الشنط
المرة دي نائل كان بيفضي شنطة بابا، وانا على فكرة باحب بابا قوي على انه بابا مش على انه احمد فؤاد نجم، بدليل ان فيه حاجات انا مختلفة فيها قوي مع بابا، زي "قالوا البلد عايزة ولد ياخد بتار المظلومين" القصيدة حلوة والاغنية حلوة، بس المظلومين اللي مستنيين ولد واحد ياخد لهم بتارهم يتنيلوا على عينهم ويخرسوا خالص، عشان اذا كان كلهم مش عارفين ياخدوا بتارهم اشمعنى الولد ده اللي ح يعرف ياخد بتارهم
ثم ان ده فيه تكريس للديكتاتور الرحيم اللي انا باكرهه عشان مافيش ديكتاتور رحيم اولا
ثانيا عشان حتى لو كان رحيم ده عبد فقير الى الله مش ح يشوف غير زاوية واحدة بس، اتنين تلاتة بالكتير، ثم انا عندي اعتقاد ان الزعيم ده زي الممثل، لازم يبقى وراه مخرج وسيناريست او كاتب مسرحي وكوستيوم ديزاينر ومدير تصوير عشان يعرف يتنجم كويس من غير ما يضر الناس المصرة على "الولد" لكن لما بيرتجل الدنيا بتخرب، وعادة الديكتاتور بيرتجل، لانه بيغير، زي اي ممثل ما بيغير من اي ممثل تاني
المهم خلينا في تدوينة نائل، انا دخلت عشان اشوف نائل عمل ايه، لقيته فضى شنطة واحد تاني وفاكرها شنطة احمد فؤاد نجم
وباني التدوينة كلها باستنتاجاتها وتحليلاتها على قصيدة مش بتاعة بابا اصلا
وبيرصد التناقض مابين مصر ام طرحة وجلابية والفلاحين اللي بيغيروا الكتان بالكاكي
:)
في الحالة دي اللي يتهم بالتناقض هو الشيخ امام مش بابا، لان قصيدة الفلاحين بتاعة زين العابدين فؤاد، مش بتاعة بابا
معلش احنا بنتكلم يعني يا نائل مافيهاش حاجة، كنت كلف نفسك واسأل، خسارة التعب في التدوينة دي، دي حلوة

Saturday 19 April 2008

هو فيه حد مراقب تليفونات العاشرة مساء؟

تحديث:
ايوة صح يا خيبتي
البرنامج في اجازة والحلقة دي معادة
فيه اخ معلق فكرني بالموضوع ده، طبعا انا كان ممكن امسح التدوينة دي
بس انا خليتها عشان الناس اللي بتحاسبني على اساس اني واحدة مركزة وماحدش مصدق اني مهيسة
--------------------
دلوقت حاليا قاعدة باتفرج على السفير ريتشاردوني الاهبل بتاع الموالد في برنامج العاشرة مساء، الشهادة لله منى الشاذلي مسحت بيه وباهله البلاط وخلته ما يسواش تلاتة نكلة وهي مبتسمة وهادية، وهو اتكلم عن المعونة الامريكية وقال: الهمد لله مسر ما بقتش مهتاجة مأونة من امريكا أشان كمان المأونة بتستغل من كبل الهكومة والمؤاردة

جيت ابعت للنمرة 91235 بتاعة الرسايل، الرسالة بندينج لحد دلوقت، اتصل بالنمرة اللي هم منزلينها تدي مشغول وبعدين جرس وماحدش بيرد هو فيه حد مراقب تليفونات بورنامج العاشرة مساء وهم بينزلوا النمر دي تموين؟ طب فيه ناس بتتصل وبتبعت ورسايلها بتتقري، طب هل عارفين النمرة السورية؟ طب اشمعنى هم عارفين النمرة السورية وواحدة مسكينة زيي من الغوغاء والدهماء ما تعرفهاش؟
الحقيقة انا مش باحب اتصل بالتليفون في البرامج بس المرة دي كنت عايزة اقول له كلمة واحدة: ولا احنا كمان عايزين معونة امك يا روح امك
بس...دول الكلمتين اللي كانوا بيمغصوا في نفسيتي
منى بتقول ان بتوع الكنترول روم ردوا على التليفونات ولقوا الاسئلة متكررة وعشان كده حجبوا الاتصالات
طب يعني اذا كان الكنترول روم قالوا لها كده يبقى بيضحكوا عليها وغالبا الواد بتاع الكنترول روم راح يكلم المزة ع النوباين
طب ده التليفون
طب والرسايل؟

عشان ما تنضربش على قفاك1

إمتى يدخل الظابط بيتك وما يكونش غلطان؟

إيه الحالات اللي ممكن الظباط يدخلوا فيها البيوت من غير إذن نيابة؟
ج: من حق الشرطة يدخلوا البيوت لو حد من أصحاب البيت طلب منهم المساعدة أو النجدة داخل البيت
س: زي ايه الحالات دي؟
ج: مثلا لو كان فيه حريق أو تسرب غاز أو بوتجاز من بيت أو شقة
س: من حق ظباط المطافي أو المرور يعملوا قضايا للناس؟
ج: أيوة من حقهم لو لقوا حاجة بالصدفة وهم بيقوموا بشغلهم (مخدرات، سلاح مثلا) يمسكوها ويعملوا بيها محضر تلبس يعملوه ويسلموه لأقرب قسم شرطة
س: وايه حالات الضرورة الأخرى؟
ج: يجوز للشرطة اللي ليهم السلطة الضبطية دخول البيوت لو كانوا بيتعقبوا شخص له امر ضبط واحضار من النيابة أو المحكمة ومطلوب القبض عليه

البيوت لها حرمة وتفتيشها له قواعد وأسس...ولازم تعرفها

إمتى تطلع الإجراء باطل وتتهم الضابط في قضية تزوير محضر وتلفيق اتهام؟
للبيوت حرمات ولا يجوز لأي حد إنه يدخل بيت أو يفتشه إلا بأمر النيابة العامة أو المحكمة المختصة، ويكون أمر التفتيش مسبب، وأي حد يدخل بيت أو يفتشه بدون أمر قضائي يبقى ارتكب جريمة انتهاك حرمة مسكن.
س: اعمل ايه لو كنت في بيتي ولقيت حد من الشرطة خبط على باب البيت وعايز يفتش بيتي؟
ج: لازم تتمالك نفسك وما تخافش وتتحقق من شخصيته وتشوف كارنيهه وتعرف هو مين وبيشتغل ايه وفين وتطلب منه يوريك امر التفتيش الاول قبل ما تدخله بيتك عشان يفتشه
س: إيه هو البيت؟
ج: للبيوت حرمة والبيت هو كل مكان خاص بيقيم فيه الانسان فترة من الزمن طويلة كانت او قصيرة بصفة دايمة او مؤقتة واي حاجة تتبع البيت او ملحقة بيه تعتبر بيت ولها نفس حرمة البيت ولو كان ملحق بالبيت حديقة او مخزن
س: هل شقة المصيف اللي بيقيم فيها الشخص فترة قصيرة من الزمن كل سنة تعتبر بيت ولها نفس حرمة البيت؟
ج: شقة المصيف بيت ولها حرمة البيت
س: اعمل ايه لو حد حاول يفتش بيتي بالعافية من غير امر تفتيش؟
ج: تزعق وتلم عليه الجيران والناس اللي ماشية في الشارع وتشهدهم عليه بانه انتهك حرمة بيتك وارتكب جريمة انتهاك حرمة مسكن وتعمل محضر على طول وتطلب النجدة على رقم 122 عشان تثبت حالة
س: اعمل ايه لو حد طلب مني انه يفتش بيتي ومش معاه اذن نيابة واحرجني؟
ج: لازم ترفض لانك لو وافقت انه يفتش بيتك من غير اذن نيابة بتسقط حقك في الرفض وتبقى اديته الحق في تفتيشك برضاك ولو فيه حاجة عندك ممنوعة (سلاح مش مترخص مثلا) تبقى حالة تلبس ومن حقه يقبض عليك ويبقى التفتيش سليم مادام وافقت عليه بمزاجك بدون اكراه او ضرب او تهديد
س: لو كان الظابط معاه اذن تفتيش وما فتحتش له من حقه يكسر الباب؟
ج: الظابط لو معاه اذن تفتيش من حقه يكسر الباب ويفتش حتى اودة النوم
س: بنسمع ان الظباط بيفتشوا وبعدين يعملوا اذن التفتيش. نعمل ايه في الحالة دي؟
انتظرونا في الحلقة القادمة

عاجل: قرار النيابة باخلاء سبيل محمد الشرقاوي

دلوقت حالا، على الله يطلع هو واسراء بقى، على فكرة نادية خرجت بس اسراء ما خرجتش
الاول الواحد كان بيفرح بقرارات النيابة، بس دلوقت بقت قرارات النيابة ما تفرحش قوي لحد ما نعرف راسنا من رجلينا
الله يحرق قانون الطوارئ على اللي بدعه
الا هو مين اللي بدعه؟

امن الدولة بيلعب الشرقاوي الكلب الحيران

اخدوا محمد الشرقاوي نيابة الجيزة، وبعدين نيابة ستة اكتوبر وبعدين رجعوه الجيزة وبعدين مرجعينه تاني ستة اكتوبر، كلمت نيرة دلوقت وقالت لي انهم سايقين وراه رايح جاي
ومحمد بس اللي بيحصل معاه كده، ممكن افهم ليه؟ اشمعنى هو اللي بيتعمل معاه كده؟ عايزين يطفشوه مثلا من البلد؟ عايزين يشغلوه مخبر غصبن عنه؟ عايزين منه ايه بالظبط؟

Friday 18 April 2008

بكرة التحقيق مع محمد الشرقاوي

بكرة في نيابة الجيزة في ميدان الجيزة مبنى مجمع محاكم الجيزة، ح يحققوا تاني مع محمد الشرقاوي عشان نشوف اذا اخلاء سبيل وللا حاجة تانية
نايرة قالت لي انها رايحة من الساعة تسعة، الله يخليكوا عايزين عدد يروح انا مضطرة بكرة اودي ماما عند الدكتور، لو عرفت اجي ساعة حتى ح اجي ان شاء الله بس عايزين كمان ناس تروح

حد قرا البديل بتاع النهاردة

بتاع النهاردة مش بتاع امبارح ومش نازل على النت لحد دلوقت
رجاء بس: مصريون ضد الاسلام (التمييز الديني سابقا) وللا ما اعرفش ده بقى اسم حركي، ممكن ترحموا دين ابونا؟

Wednesday 16 April 2008

هي اسراء مختفية؟

اسراء ان الدولة اتعمل لها تجديد حبس بعد قرار اخلاء السبيل بامر من النائب العام
يلعن ابو قانون الطوارئ احنا ح نفضل في الذل ده لامتى؟
--------------
اصلي قريت الكلام ده على العربية نت ومالك ووائل كانوا قالوا لي ان العربية نت عادة بتألف الاخبار، والله انا ما شفتش عليهم كدب لحد دلوقت وبعدين لقيت ماما بتقول لي وهي مخضوضة: اسراء اختفت واهلها مبلغين وسألتها مين قال لك قالت لي واحدة صاحبتي

هي اسراء فين؟
----
ايوة اتأكدت من الخبر اسراء مختفية واهلها مبلغين النائب العام
يعني ايه ده؟ هي بقت كده؟ احنا محكومين بشيوخ منصر وللا ايه؟

بالنوسبة للاخوان: انا دمي محروق..انتوا دمكوا مش محروق ليه

انا الموضوع عمال يكبر في دماغي من امبارح، اصل انا ردود افعالي بطيئة شوية
ممكن اعرف الاخوان بعد الاحكام دي ما بيرفعوش شكوى للقلل المنتحرة ليه؟
ممكن اعرف ما بيعملوش اضراب عن الطعام ليه؟ ده اجراء قانوني ومشروع، هم مش بيقولوا ان عددهم سبعة مليون؟ متهيالي لو سبعة مليون اضربوا عن الطعام ح يبقى فيه تأثير
ممكن اعرف ما بيسحبوش كل فلوسهم اللي في البورصة ليه مرة واحدة؟ هم مش بيقولوا ان لهم فلوس كتير في البورصة وانهم هم اللي مقومينها؟
ما يشاركوش في اضراب اربعة مايو لان بصراحة كده ماحدش عايزهم فيه
بس فيه في الكون ستميت خطوة قانونية وسلمية ودستورية يعملوها بعد الاحكام الجنونية دي اكتر من انهم يحسبنوا
ممكن افهم مبدأ: تهجرني برضه احبك، تنساني برضه احبك، تلاوعني برضه احبك ده مبني على اي اساس؟
استباقا: بالنوسبة للناس اللي بتكره الاخوان وبتقول عليهم عاملين صفقة، ياريت تجيب لي دليل مادي قبل ما تقول الكلام ده عشان لو دي صفقة يبقى لازم يتم الكشف على قوى كل اعضاء الاخوان العقلية، ماحدش بيعمل صفقة عشان يتسجن وفلوسه تتصادر ويخرج من الانتخابات ويتفشخ تلتمية وستين درجة لحد ما رجليه تسلم على بعضها فوق راسه الا اذا كان مختل عقليا
وكل ده عشان ايه؟ يكسبوا تعاطف، تعاطف ايه ماحدش متعاطف ده انا ام قلب رهيف قرفت منهم
بالنوسبة للاخوان والمتعاطفين معاهم: لو سمحت اتكلم بالاطة وفوقية زي ما انت عايز، وقول لي: الحكاية مش جهجهوني كده يا ديماجوجية يا شعبوية فيه خطة، فيه فكر، فيه منهج، الاخوان جماعة منظمة مش عشوائية زيكوا يا كلاب يا قطط يا فيران يا صراصير، الاخوان هم اللي في الشارع، الاخوان هم المعارضة الحقيقية، والنبي انا عتريس والنبي انا بلوة سودا حتى بصوا اني ح اخد الاتاوة الطاج طاجين...إلخ، بس اديني امارة للفتونة دي
مش عارفة ليه افتكرت فيلم بوحة لما كان المعلم بيضربه بالقلم في القسم وهو عمال يقول له: تسلم ايد يا معلم
بالنوسبة للناس اللي انا باحترمهم: ح نعمل ايه؟ ماهو ح نرجع تاني للحق احق ان يتبع، ما ينفعش ده يحصل في بلدنا ونسكت عليه، انا عارفة والله الناس المبضونة لها حق، بس ايه؟ لازم المطالبة بالغاء تحويل المدنيين لمحاكم عسكرية يبقى مطلب اساسي، ماحدش عارف بكرة فيه ايه، وما ينفعش تبقى اموال البيني ادمين عرضة كده للمصادرة بدون اي وجه حق، ثم ان دي حاجة لوجه الله يعني مش عشان حد، يا اخي لو واحدة جوزها بيضربها ح تحوش عنها حتى لو بعد ما انقذتها قالت لك: وانتش مالك انتش...جوزي وهو حر فيا، وللا ح تطنش؟

هم البشرية مطنشين على محمد الشرقاوي ليه؟

الواد ماكانش له في القصة خالص وبقاله سنة مالوش في القصة وما دونش بقاله كتير، بس هو مدون، وهو الوحيد في قبضية القاهرة اللي اتعامل معاملة وحشة وتاه وفضلنا ساعات مش عارفين هو فين، وهو الوحيد اللي النيابة لطعته تمن ساعات، والمحامين بيقولوا فيه تكدير متعمد ضد محمد الشرقاوي بالتحديد، وبعدين اقتحام دار النشر بتاعته واستدعاء خطيبته، ايوة احنا بنطالب بالافراج عن الكل بس فيه حالات خاصة لازم التركيز عليها اللي هي الحالات اللي الامن بيتعمد يكدرها، خصوصا لما تبقى حالة زي محمد الشرقاوي بيتكدر من غير سبب واضح، ومع ذلك انا شايفة ان نسبة لا بأس بها من الناس مطنشين على محمد الشرقاوي بالذات، وكأن التكدير جايله من الامن ومن زمايله في التدوين، تكدير ستريو يعني
ممكن اعرف ليه؟ انا واحدة باقدر المشاعر الانسانية جدا وباشجع على التعبير عنها مهما كانت شريرة، بس كون ان محمد البنات بتحبه وزملاته الشباب بيغيروا منه عشان الموضوع ده، فدي حاجة هابلة ومش وقت التعبير عنها دلوقت حاليا، يعني ممكن بعد ما يخرج تتلموا عليه وترنوه علقة عشان يبطل سمبسة، واهي تيجي بفايدة لنيرة
بس دلوقت حاليا الشرقاوي محتاج الكل يقف جنبه، او على الاقل نفهم هم بيكدروه هو بالذات كده ليه؟

Tuesday 15 April 2008

غيرت رأيي انا مضربة يوم اربعة مايو

هو انا ما غيرتوش قوي انا كده كده كنت ح اضرب مع الناس بس كنت ح اضرب وانا كارهة
بس دلوقت ح اضرب وانا حابة بعد بوليس الاداب وهايديلينا مافيش بقعة تستعصى علينا واحكام القضاء العسكري
بس ليا اقتراحات لو تسمحوا:
اولا خلاص مدام الناس قررت اربعة مايو فليكن اربعة مايو لكن ياريت ما يبقاش له علاقة بعيد ميلاد حسني لاننا ما عندناش مشكلة انه اتولد احنا عندنا مشكلة مع النظام
ثانيا: كل اضراب له مطالب، ايه مطلب الاضراب ده؟ مش معقول يعني يبقى مطلب الاضراب ان الريس ينقل من برج التور لبرج القوس مثلا،
ياريت يبقى فيه لستة مطالب واضحة وتعمم على الكل والكل ينشرها عنده ولو يتعمل بيها بوستر او بانر
انا شخصيا ح اضرب مطالبة باقالة حكومة احمد نظيف
دي نمرة واحد: الحكومة كلها تقال بما فيهم المحنطين اللي بيروح عليهم حكومات وييجي حكومات وهم متصبرين في مقاعدهم
ثانيا: ان يتم اختيار رئيس الحكومة بالانتخاب وليس بالتعيين ومن خلال برنامج انتخابي واضح وان تتم الانتخابات تحت اشراف كامل من القضاء مش القضاء العسكري طبعا
ثالثا: قبل ما الوزرات تمشي، كل وزارة تقدم تقرير كامل عن ميزانيتها مواردها وانفاقها وتنشره في الجرنال
والدولة تنشر لنا بالظبط مدخولاتها وانفاقاتها بما في ذلك كل حاجة: دخل قناة السويس والضرايب والمعونات اللي بيشحتوها على حسنا كل حاجة بالمليم والسحتوت تتنشر في الجرايد وينشروا مصارف الدخول دي برضه بالمليم والسحتوت بما فيها التشريفات بتتكلف كام والمهرجانات والمسخرة والرقص والحال المايل بيصرفوا عليهم كام ونعرف
خطة الصناعة والزراعة والتنمية
احنا بقى عايزين نعرف ايه اللي بيحصل في دين ام البلد دي احنا مش بنتنيل ندفع ضرايب؟ واخرتها بنتضرب ونتسحل وكمان نتشتم ويتقال علينا بلطجية وصيع؟ احنا بقى عايزين نعرف راسنا من رجلينا
رابعا: كل رجل اعمال، من اصغر واحد لاحوت واحد ينشروا اقرارات ذمتهم المالية ونعرف مصادر ثرواتهم، والمشاريع اللي هم عاملينها وهل هي مشاريع تنموية وللا مشاريع تعريصية، واحنا اللي نحدد اذا كنا موافقين على المشاريع دي وللا لا مش هم رجال اعمال شرفاء وفلوسهم ما اتصادرتش؟ طب احنا عايزين نعرف بقى ايه الفرق بينهم وبين اللي اتصادرت قصدي اتسرقت اموالهم
خامسا: يبقى فيه خطة استثمارات تنموية يحطها مجموعة من الخبراء واحنا نصوت عليها يا موافقين يا رافضين، وياريت يبقى فيه كذا خطة واحنا نفاضل بينها
اما بقى عن الاميين، فما تقلقوش، احنا كفيلين بان كل واحد بيعرف يقرا ويكتب ينزل يشرح لعشرة اميين الحكاية من طأطأ لسلامو عليكوا
وام البلد دي بلدنا ومش ح نسيبها، وح نخلف عيال كتير كمان، واعملوا حسابكوا اننا تمانين مليون وان شاء الله السنة الجاية نبقى ميت مليون وح نزيد مش ح نقل ومش ح نمشي ونسيب لكوا البلد تبيعوها، واللي باع ميدان التحرير يتحاكم بروح امه، ومطرح ما تحطوا راسكوا حطوا رجليكوا احنا اللي بنأكلكوا
احنا مش عبيد احساناتكم احنا اولياء نعمتكم، كلكوا من اول رئيس الجمهورية لحد اصغر امين شرطة فيكي يا مصر
احنا اللي بنصرف عليكوا من ضرايبنا وانتوا موجودين عشان تخدمونا واللي مش عاجبه يرحل عنا
احنا اصلنا مش بلد اكسلانسات، احنا بلد جرابيع، وبرضه لحم كتافكوا من خير الجرابيع
اتكلوا على الله بقى
الغازية لازم تنزل
دي مطالبي
وكل حد مشارك في الاضراب من دلوقت يكتب مطالبه وياريت يبقى فيه مجموعة سرية علنية تجمع المطالب دي
وتلحق تصيغها وتعمل لها شعار
انا باقترح شعار الاضراب: احنا اولياء نعمتكوا مش عبيد احساناتكوا
ده اقتراح
وبالنسبة لتعليق الحتة السودا والمكوث في المنزل وعدم شراء الصحف القومية فده انا موافقة عليه
الموافق على الاقتراح يتفضل برفع يده
موافقة اجماع

ندوة عن شهادات الاعلاميين والضحايا في المحلة

اتصلت بيا الدكتورة ماجدة من مركز النديم وقالت لي ان بكرة فيه ندوة عن وقائع المحلة في مركز هشام مبارك واحد شارع التوفيقية الدور الخامس الساعة حداشر الصبح، ده ح يبقى تقريبا مؤتمر صحفي ح يتكلم فيه الاعلاميين اللي اتبهدلوا في المحلة والضحايا واظن ح يبقى فيه فيلم كمان

هو ايه علاقة هاني سرور بكريم عبد العزيز

طالع معاه في العاشرة مساء وعمال يحضن فيه
وهاني سرور عمال يقول: ده شرف لينا كهايديلينا
وكمان اخدوا صفقة جديدة
طب اكياس الدم الملوثة مين اللي لوثها
هاني سرور بريء وكل اللي معاه
طب مين اللي لوث اكياس الدم؟ يبقى اكيد الناس اللي ماتت هي اللي ملوثة، من جواهم غبي واسود وعشان كده الدم اتلوث من غباوة قلوبهم

ليه؟

ليه خيرت الشاطر سبع سنين وحسن مالك سبع سنين ومصادرة امواله؟
ليه الاحكام كده؟
يا اخوان مستنيين ايه؟ مستنيين ايه بقى؟ ح يحصل لكوا ايه اكتر من اللي حصلكوا؟
اظن مافيش تنكيل اكتر من كده....مستنيين ايه؟
------
آه وهايدلينا طلعوا براءة
وبكرة تجار الحمير يطلعوا براءة عشان كانوا بيعملوا عمل خيري
ومحمد الشرقاوي هو بتاع الاداب
ها....واخرتها؟

عااااااجل: مباحث الاداب تقتحم دار ملامح


من امتى دور النشر بتدخلها مباحث الاداب يا كلاب

دول جزمتهم اطهر منكوا يا انجاس
اتصلت بيا نايرة دلوقت حالا خطيبة محمد الشرقاوي وقالت لي ان مباحث الاداب اقتحمت دار نشر ملامح وصادرت رواية مترو ومضوا المحاسب على تعهد بانه يجيب لهم نسخ من المكتبات على مسئوليته الشخصية والعقيد اللي اقتحم الدار طلب حضور نايرة خطيبة محمد في الدور التلاتاشر في مجمع التحرير الليلة ده، عقيد في مباحث الاداب طالب خطيبة الشرقاوي في الدور التلاتاشر
كده الوساخة زادت قوي
كده فاقت الحد يا حكومة وسخة بنضارات حمرا
يلعن ابو اشكالكوا على ابونا ان سكتنا عليكوا بعد كده
واحنا بقى طالبين اقتحام وزارة الثقافة ومجلس الشورى كمان
انا مضربة يوم اربعة مايو ومطلبي في الاضراب: كشف ملفات الاداب للحكومة المصرية
انا باكتب وانا ايدي بتترعش من الغيظ وحرقة الدم
-----
توضيح: طبعا فيه حالة استقصاد لمحمد الشرقاوي عشان يقرفوه
اتصلت باحمد سيف الاسلام وهو بيقول لي ان فيه احتمال ان يكون حد حريص على "الاخلاء" قدم بلاغ ضد الرواية
انا ما قرتش الرواية بس مصطفى الحسيني بيقول لي انه قراها وان مافيهاش حاجة خالص يعني ما تجيش نص عمارة يعقوبيان ولا ربعها حتى مثلا
بس طبعا احنا عارفين ان الاخلاء سبيل على راي النيابة فمن حق اي انسان يتدخل فيها
واضح زي الشمس ان البلاغ ده واقتحام الدار من قبل بوليس الاداب حلقة في سلسة تطفيش محمد من البلد او قرفه لان المفروض ان الرقابة على المصنفات هي اللي تباشر البلاغات دي مش بوليس الاداب
ومش بطلب حضور نايرة الشيخ في الدور التلاتاشر بتاع يسرا