الصعايدة وصلوا

من ساعة ما رجعت من برة لحد دلوقت قاعدة احاول افتكر صعيدي واحد عرفته في حياتي وطلع دمه تقيل مش لاقية....هايفة انا مش كده؟ انا حرة دي مدونتي واهيف فيها زي ما انا عايزة، بس بجد انا عايزة افهم ايه سر ان كل الصعايدة اللي عرفتهم في حياتي من اول ما تقعد معاهم لحد ما تقوم تفضل تضحك لحد ما بطنك توجعك مع انهم هم ما بيضحكوش، ولهم نكتة خاصة جدا لدرجة اني بقيت اعرفهم من افيهاتهم وما اعرفش مخهم بيجيب الخيال الكوميدي ده منين؟ وما اعرفش ازاي ورا بعضه ورا بعضه كده وكلها كوميديا سوداء، عشان كده بينكتوا وهم مكشرين وانت اللي تقعد تضحك بحيث ان اللي يبص عليكوا من بعيد يتهيأله انك بني ادم مجنون ورقيع وتافه وقاعد مع دكتور نفسي بيحاول يعقلك ويكلمك لمصلحتك ويقول لك ما يصحش الهيافة بتاعتك دي انت اهبل وللا ايه؟ طب ليه بيطلعوا الصعايدة في المسلسلات رخمين؟ ده معناه ان اللي بيكتب المسلسلات دي ما قعدش مع صعيدي واحد يوحد ربنا
انما صحيح لو حد صعيدي قرا التدوينة دي السيدة في ضهره ليقول لي ايه الحكاية؟
آه وفيه حاجة تانية...مافيش صعيدي قابلته وطلع ممل...ليه بقى كده؟ ها؟ هو سواد القلب بيعمل ده كله؟
:)