Monday 7 April 2008

انا مش شايفة نكتة لطيفة في اضراب مايو

لو الحكاية تهريج يبقى تقولوا من الاول، لو عيال وبنلعب قولوا لي عشان اعمل واجب المدرسة قبل اللعب
البديل كاتبة ان فيه دعوة للاضراب يوم 4 مايو عيد ميلاد الريس، وعلى رأي عبده البرماوي، كون الريس مولود يوم اربعة مايو او خمستاشر مايو او ستة اكتوبر او العاشر من رمضان دي حاجة ما تهمناش في حاجة، والحقيقة ان تاريخ ميلاده مش هو بالتحديد اللي مضايقنا الا اذا كان فيه حد بينه وبين برج الثور مشاكل ويفضل عليه برج الجدي او الحمل الوديع مثلا.
دلوقت اضراب امبارح نتج عنه ناس ماتت...ناس ماتت، فاهمين يعني ايه ناس ماتت، ناس، عمال غلابة
الاضراب نجح من حيث ان الناس ما نزلتش الشارع فعلا، بس بعد المذبحة اللي حصلت امبارح ما ينفعش الناس تهني بعض وتبارك لبعض كأنه فرح، وبتوع الفيس بوك يقولوا نجحنا يا رجالة، البلد منصوب فيها ميتم
واللي حصل امبارح ما ينفعش يتعدى، لاننا لو عديناه هم مش ح يعدوه وكل الحرائق والتخريب والشغب اللي عمله الامن امبارح لو تمكنوا من تلبيسه للعمال - وهم بيحضروا لكده بدليل انهم كانوا بيصادروا الرصاصات اللي بتطلع من جسم المصابين - ح يبقى فيها اعدام
انتوا فاهمين احنا مقبلين على ايه؟
امبارح ما خلصش، واللي بالنسبة له اليوم خلص بالنسبة للدولة اليوم ما خلصش ومش ح يخلص قبل ما النقاط تتحط على الحروف
وكل من سولت له نفسه المشاركة او الدعوة للتضامن مع عمال المحلة وبما فيهم عمال المحلة والمدونين والفيس بوكيين وخلافه والمحامين اللي دافعوا عن المعتقلين وحتى الصحفيين اللي غطوا بامانة كل واحد من دول متحضر له انه يدفع التمن
نهدا كده ونصلي على اللي ح يشفع فينا ونستشرف الصورة ونعرف ايه الخطوة اللي جاية
ازاي المذبحة اللي حصلت امبارح ما نعديهاش
وازاي الجعانين يشبعوا
وازاي ما نبقاش عايشين طول عمرنا كده تحت رحمة القبضة الامنية يا تفكها يا تكلبشها هي ومزاجها
زي ما الدولة عايزة تحط النقاط فوق الحروف
احنا كمان عايزين نحط نقاطنا فوق الحروف ونقاطنا بسيطة جدا: رغيف العيش وابسط الحقوق الانسانية
يعني انا مش عارفة مين اللي امبارح اشاع ان اضراب امبارح ده مقدمة الثورة؟
انا شخصيا واحدة من الناس انضميت للاضراب عشان رغيف العيش وتضامنا مع عمال مصر كلهم ولو اعرف ان اضراب امبارح كان مقدمة للثورة المزعومة ما كنتش انضميت ليه، انا مش باحب الثورة ومش من انصارها ثم ثورة ايه؟ مين ده اللي ح يعمل ثورة؟
انا مهيسة...ماشي
بس فيه حاجات ما تحتملش التهييس ولا التهريج بالذات لما يبقى فيها ارواح ناس
هي مش لعبة لعبناها وعجبتنا وعايزين نلعب تاني
ومافيش داعي لمسخرة الامور وتبقى يوم عيد ميلاد الرئيس ونجيب له تورتة بقى وشموع في الشارع
التهريج له صيغ كتير مش من ضمنها التهريج بارواح الناس
اول ما تحط راسك على المخدة كرر تلات مرات: عمال المحلة ماتوا بسبب اني ركبت على كتافهم
عمال المحلة ماتوا بسبب اني ركبت على كتافهم
عمال المحلة ماتوا بسبب اني ركبت على كتافهم
وبطلوا تقولوا نجحنا بقى

No comments: