المصابين من اهل المحلة في مستشفى المنصورة

اولا احب اهلل جامد جدا للمدونين اللي غطوا احداث المحلة بامانة ومصداقية للاسف افتقدت في الاعلام وخاصة اعلام الفضائيات اللي بيدعي انه اعلام حر واكرر تهليلي الشديد جدا لجريدة البديل اللي ما ينفعش يتقال عليها اقل من انها الاكثر احتراما
احنا في انتظار فيديوهات اكتر لاحداث المحلة لما احمد عبد الفتاح يصحى من النوم لانه رجع من المحلة شبه مغمن عليه وفيديوهات كريم البحيري لما ربنا ينجيه من الحصار الامني المفروض حاليا على كل اهالي المحلة حيث اني لما كلمته كنت سامعة ضرب الرصاص وهو بيقول لي انه من صباحية ربنا والرصاص ما بطلش ضرب بالطريقة دي
بس فيه جانب مهم قوي من التغطية قام بيه المدون معتز صاحب مدونة منفي لان مصابي المحلة كانوا بيتنقلوا على مستشفى المنصورة وهو راح ونقل الصورة كاملة
قبل ما انزل الفيديوهات - اللي لسة لها كمالة - نستخلص من تقرير معتز النقاط التالية:
1- المصابون ما بين 14 لـ 30 سنة
2- اربعة على الاقل فقدوا بصرهم
3- تم اطلاق الرصاص الحي على اهالي المحلة وفور انتزاعه من اجسادهم في مستشفى المنصورة كان يتم مصادرة الرصاص
4- الحصار الامني مفروض على المصابين في المستشفيات زي ماهو مفروض على اهل المحلة
5- فيه مصابين لا عمال ولا معتصمين ولا نيلة دول ناس كانوا ماشيين في الشارع
6- المصابون لم يتلقوا الرعاية الصحية الكافية وفيه منهم خرج والرصاص لسة في جسمه وفي عينه كمان
للاطلاع على التقرير الكامل اضغط هنا
ودي بعض الفيديوهات
http://www.youtube.com/watch?v=BkzYKz0UKcw

http://www.youtube.com/watch?v=DX8xYdjT8BU

http://www.youtube.com/watch?v=UTe3GS8PqFg