دولا القوة ودولا العز

خاف من ربنا بقى

تحديث:
جاني الميل ده من مالك مصطفى:
تم القبض تمام التاسعة من مساء اليوم,على الناشط في حركة كفاية الحج فتحي
الحفناوي من منزلة بمدينة بسيون بمحافظة الغربية
والمحامين يتجهون بعد قليل الى نيابة امن الدولة بالتجمع الخامس.
شكل الموضوع حيكبر
------
دول راضعين من اطهر بز
هز يا محلة هلالك هز
واحنا وراك ملايين جايين

بقى دول بلطجية وصيع وهمج؟
قطع لسان الجربوع اللي يقول عليهم كده، فيه كام ح الظابط قالوا كلام بتاع الامن، وفيه ناس عايشين في الخيال قالوا كلام وهمي، الحقيقة انا باحب احاول اشوف الصورة زي ماهي
اللي يقول الاضراب يوم فارق للتغيير بلا بلا بلا يبقى بيهجص
واللي يقول الاضراب فشل وبتوع المحلة دول صيع يبقى امن انا ما عنديش استعداد اتناقش في الموضوع ده بالذات
اللي انا شايفاه على ضوء يوم الاضراب ان المريض اللي كان في غيبوبة وكنا افتكرناه ح يموت خلاص ابتدى يحرك اطرافه ويبربش بعنيه ودي علامات على انه فيه امل كبير قوي انه يفوق
هو لسة ما فاقش...لسة مافاقش
بس فيه امل كبير انه يفوق، امل اكتر من تسعين في المية، عشان كده زي ما اللي ح يدي حقنة موت للمريض بادعاء انه مافيهوش امل ومافيهوش فايدة يبقى امن اكيد كمان اللي ح يمسكه من ايده ويتوقع انه يجري تلاتين لفة حوالين التراك يبقى اهطل
بتوع المحلة ابطال مش لانهم عملوا ثورة
بس لانهم عندهم كرامة، الحقيقة اللي حتى الحكومة ما تقدرش تنكرها ان التظاهرة ابتدت سلمية جدا وعادية بل اقل من العادية لانهم كانوا خارجين في اخر النهار بعد ما تم اجبارهم على الشغل
وبما اني ما عملتش تقصي حقائق فانا ما اقدرش اؤكد كلام الحكومة بان اللي عملوا التخريب كانوا من اهل المحلة
لكن ح نفترض ان اهل المحلة هم اللي عملوا كده، وح نطنش على كل الصور والمؤشرات اللي بتقول ان الامن والبلطجية بتوعه هم اللي عملوا الشغب
لو قلنا ان اهل المحلة اللي ابتدوا بمظاهرة سلمية انتهى بهم الامر للتخريب بعد تصعيد الامن واستخدامه "المفرط" للقوة زي ما الاعلام بيقول يبقى برضه الامن هو المسئول، ويبقى ساعتها كل ذنب اهل المحلة انهم ما قبلوش ينضربوا ودمهم يسيح ويسكتوا
دي بقى جديدة
ودي معناها ان المريض بربش وحرك صوابعه ورجليه كمان
احنا ما اتعودناش على كده، بصراحة ما اتعودناش يبقى عندنا كرامة
واللي حصل في الاضراب - بالذات في اسكندرية اجدع ناس - وفي المحلة يخليني انا، انا اللي هو انا: المتشائمة التاريخية اتفائل...شوية انا مش باحب اتفائل كتير يعني
وده برضه يخليني مش شايفة اي وجاهة في اقتراح اربعة مايو، وشايفة ان اقتراح اربعة مايو ده شبه خديجة آه مصر لأ، تهريج يعني
واظن ان مؤشرات تحسن المريض عدت بينا مرحلة العبثية، كده ما ينفعش نهرج، كده اللي ناكشة شعرها تلمه واللي مدلدل البنطلون ومبين البوكسر الاحمر يرفع بنطلونه لو سمح احنا دخلنا في الجد
نبلع ريقنا ونجمد قلبنا بقى وننط واللي عايزه ربنا يكون والتكال عليه