تمرد.. سحب الثقة

ولو اني ما منحتش مرسي اي ثقة، ولا غير مرسي، وافخر اني عملت كل حاجة غلط في حياتي الا اني انتخب واحد اخوانجي.. لا في شعب ولا في شورى ولا في رئاسة

ومع ذلك وقعت اهو على استمارة سحب الثقة هنا.. وبالنسبة للي عصروا لمون، وانا بالمناسبة متعاطفة معاهم ومتفهمة موقفهم.. فباب التوبة مفتوح للذين عملوا السوء بجهالة، وممكن توقع على الاستمارة، وتكفر عن خطيئتك بإنك تسحب على الاقل عشر نسخ وتمضي عليها الناس.

ممكن كمان لو تليفونك فيه نت مش بالمنافيللا زي تليفوني تنزل تمضي الناس برقمهم القومي على تليفونك وده حيضمن لك انك تاخد اكبر عدد من الموقعين.

واظن كمان كل من ساعد مرسي في انه يجتاز مرحلة الاعادة ملزوم انه يساعد في ان الاستمارة دي توصل للعدد اللي هم عايزينه واللي هو 15 مليون. سواء كتاب كبار، او مقدمين برامج، او نشطاء.

في كذا حاجة لازم نتكلم فيها في موضوع الاستمارة دي واهميتها:

أولا:

الناس اللي حتتكلم عن الوضع القانوني للاستمارة، هو ايه كان الوضع القانوني للتوقيعات اللي اتجمعت لسعد باشا زغلول تحت الاحتلال؟ ايه الوضع القانوني لثورة يناير نفسها اللي مشت مبارك؟ وايه التكييف القانوني لرحيل مبارك؟ هو بشكل عام مافيش وضع قانوني لاي حاجة في مصر، مصر نفسها في اللي هي فيه دلوقت وضعها مش قانوني، صدقني. الارادة الشعبية لها قوة القانون والدستور كمان. 

ثانيا: 

الحملة دي مهمة في كونها سلمية وبتدفع في اتجاه تأمين البلد والحفاظ على أمنها القومي، لاني زي ما قلت قبل كده، وباكررها تاني، الاخوان ما عندهمش اي مانع من اشعال حرب اهلية في البلد، وكل شوية يسلطوا الجهاديين يهددوا الناس ان لو مرسي مشي حننزل بالسلاح... ولاد القرعة اللي كانوا هربانين وقعدنا نشحت لهم عشان يرجعوا البلد وقعدوا يتمسكنوا ويقولوا احنا مرضى ومافيناش حيل نعمل حاجة، قال سلاح قال.. السلاح ده تحطه فييييييي عينك.. آه.. والمصريين ما بيحبوش كده، وعندهم هسهس من ان الوضع يقلب لسوريا، وبصراحة انا كمان زيهم... سلاح ايه بقى؟ احنا ما بنحبوش السلاح ده.. فأنت لو سبت الناس فريسة لتهديدات الجهاديين، وفي نفس الوقت انت ما بتقدمش لهم اي بديل غير انك تنزل مظاهرة تقلب في الاخر بان الاخوان ينزلوا لك فتجري وراهم بالطوب كده هم حيقعدوا في البيت ويستنوا فرج ربنا، والحقيقة معاهم حق، حد في الدنيا يدفع بلده لحرب اهلية الا اذا كان خاين؟ لكن حاجة زي دي حتشجع الناس انهم يتخذوا اجراء ايجابي يضمن لهم تماسك البلد.

ثالثا:

دي مش اول مرة نجمع توقيعات، احنا قاومنا الاحتلال الانجليزي بالتوقيعات والاكتتابات ونجحت، واكتر مقاومتنا ضد الاحتلال كانت سلمية بالاعتصامات والتوقيعات والاضرابات والعصيان المدني، ودي الطريقة اللي مشينا بيها كل احتلال جالنا واللي مشينا بيها مبارك.. بإننا نزهقهم ونوقف لهم البلد لحد اما يمشوا.. احنا اصلا حبسنا زكريا عزمي وفتحي سرور وصفوت الشريف بميت الف توقيع.. والتوقيعات دي تسهل بعد كده اي تصعيدات ثورية سلمية

رابعا:

ما تشغلش بالك كتير بردود افعال الاخوان والاسلاميين بشكل عام، طبيعي انهم يعملوا رد فعل، امال يعني عايز تجمع توقيعات ضدهم وهم يقعدوا ساكتين؟ ليه يعني ماسك عليهم صور؟ ثم دول مش مبارك، دول فاهمين كويس ان التوقيعات دي بتجيب نتيجة ولها قوة القانون ومهمة وبتهددهم فعلا.. انت ناسي انهم هم نفسهم شاركوا في جمع توقيعات ضد مبارك؟ طبيعي انهم يعملوا حملة توقيعات مضادة، وطبيعي انهم ينزلوا يضربوا اللي بيعمل حملة التوقيعات، وطبيعي ان داخليتهم تقبض على الشباب وهم بيجمعوا التوقيعات، وممكن يركتبوا حماقات كتير... كويس.. ده كله كويس، كويس قوي، وحيخسرهم، ويصغرهم، ويهيفهم زيادة ماهم هايفين

لانهم لما يعملوا حملة توقيعات مضادة وهم ماسكين السلطة حيظهروا قدام الناس انهم مرتبكين ومش عارفين يعملوا ايه

لما يقبضوا على الناس او يضربوهم ده حيكره الناس فيهم زيادة وحيزيد اقبال الناس على التوقيعات

وبالعكس ردود افعالهم العصبية دي حتخلي الناس تثق في حملة التوقيعات لانهم ممكن الاول يقولوا لك: يعني التوقيعات دي حتعمل حاجة؟ لكن لما يشوفوا الاخوان بيعملوا ردود افعال عصبية حيحسوا انها حتعمل حاجة

واول الحماقات اللي ارتكبت ان حملة حازمون عايزين يعملوا حملة توقيعات لحازم قوامها 50 مليون توقيع هههههههههههههههههههههههههه

اذا كان كل اللي له حق التصويت، يعني معاه بطاقة، عددهم كله على بعضه 50 مليون، وايه حازم ده اللي بيستخدموه بعبع؟ يعني هم مش مكسوفين انهم يتعاملوا مع ابو اسماعيل على انه العو؟ "لو مشيتوا مرسي حنجيب لكوا العو".

كل ده كويس.. ومش عايزة حد ينجر لمعارك جانبية، ولو هم حيلجأوا للعنف يا رييييييييييييت.. خليهم يغلطوا، واحنا ما نغلطش، اول ما يلجأوا للعنف من طرف واحد حيتحاصروا والناس تتعامل معاهم بوصفهم مجرمين.

خامسا:

ما تشغلش بالك برضه بالاشاعات، يعني مثلا حتلاقي ان الاخوان مطلعين اشاعات ان اللي بيجمعوا توقيعات دول بيجبروا الناس على التوقيع، وبيهددوهم، وبيسرقوا بطايقهم، وبيدفعوا لهم فلوس.. الخ الخ الخ.. دمااااااااااااااااااااغك... دماغك خالص، الناس كلها عارفة مين اللي بيدفع فلوس وزيت وسكر ومين اللي بيهدد عيانا بيانا.

دي ارقام حملة تمرد انا عايزاك دلوقت وانت قاعد تسجل، وتطبع اللي في اللنك ده عشر نسخ، واذا كان الانسان العادي حيطبع 10 نسخ، فاللي عصر لمون حيطبع 20 نسخة، واللي شجع الناس تعصر لمون حيطبع 50 نسخة على الاقل... كفر عن خطيئتك، ايا كان مكانك، وتمضي الناس عليه وتبعت للحملة، واذا كانت الحملة في عز ضعفها لمت 2 مليون، احنا نقدر نعدي ال15 مليون، لكن ما تتوقعش ان المهمة حتبقى سهلة، حتبقى صعبة، وحيبقى فيه اعتقالات، وحيبقى فيه ناس تنزل تضرب الشباب في الشارع، وحيبقى فيه تشويه، وحيبقى فيه حملات مضادة... عااااااادي.. عادي، ياما دقت على الراس طبول.. يعني هم اتخن من المدرعة المرتبكة؟
وده لنك تاني للتواصل مع حركة تمرد

جزاء سنمار

قريت خبر القبض على احمد ماهر من المطار، وافتكرته تهييسة او اشاعة لحد لما لقيت الوطن والمصري اليوم وكل المواقع كاتبة ان ماهر اسمه كان على قوائم ترقب الوصول وهو راجع من امريكا اتقبض عليه في المطار... 

انا مش عارفة اقول ايه.. اي كلام حيتقال حيبقى حاجة مش حتعبر عن الاحساس اللي جوايا.. قعدت على التويتر اتف على مرسي وبعدين دخلت نمت وانا نايمة حلمت اني باكلم واحدة صاحبتي في التليفون وعمالة ازعق واقولها: احمد ماهر يتقبض عليه من المطار زي المهربين؟ احمد ماهر اللي لولاه كان زمان شفيق رئيس جمهورية دلوقت مرسي يحبسه كده؟ البلد دي لو فيها رجالة وناس بتعرف ربنا وبتخاف منه مرسي ما يقعدش فيها النهاردة قبل بكرة.. وفضلت ازعق لحد اما صحيت على صوتي.. صحيت لقيت خبر ان احمد اخد اربع ايام على ذمة التحقيق والتهم الموجهة له التحريض على التجمهر وقطع الطريق العام ومقاومة السلطات اثناء ضبطه واهانتهم

بصوا، انا في اللحظة دي مش حادي حد امل، ولا حاقوله بكره احسن، ولا حاطلب منه الصبر، انا صابرة وناوية اكمل صبر ان شاء الله لان انا اصلا زملكاوية وواخدة على الصبر.. لكن اللي مش عايز يصبر او مش قادر يصبر مش حاقدر الومه، ولا حاشحته كمان

انا مش ندمانة على حاجة، اقصد مش ندمانة اني حشدت ليوم 25 ونزلت فيه ووقفت قدام المجلس العسكري وقدام الاخوان.. ده انا حتى مش ندمانة اني دافعت عن الاخوان ايام مبارك... انا عملت الواجب، ووقت ما كنت باعمل الواجب ما كانش عندي امل ولا حاجة، كنت باعمل الواجب عشان ده واجب ولازم يتعمل، يمكن بعد الثورة بقى عندي امل، بس انا رجعت لمرحلة اني اعمل الواجب عشان ده واجب.. وحافضل اعمله

لكن انا كمان لازم اعبر عن نفسي، انا حاسة بخزي، وخذلان، وطعن في الضهر، ومرارة، واحساس كده بحتمية انتصار الشر في نهاية المطاف، وان الاعمال النبيلة دايما ما يحصدش نتائجها غير الناس الخسيسة، وإن دي سنة الحياة، يموت احسن ناس، عشان يبكيهم رفقاؤهم، واللي خانوهم يحصدوا ثمرة مجهودهم، وقاعدة عشان اخفف عن نفسي اقرا كتاب مقاتل الطالبيين اللي بيرصد قتل سلسال سيدنا النبي وابو طالب.. طبعا حد حيقولي عشان تخففي عن نفسك تقري تاريخ قتل اهل البيت؟ جدا... على فكرة وانت كمان لو مكتئب وحاسس بالخذلان والخزي زيي لازم تقراه.. انت كمان لو جات لك لحظة قلت فيها وانا كان عليا من ده كله بايه؟ لازم تقراه اهو حمله لانه حيديك امل.. اه وربنا زمبؤلك كده..

هو صحيح انت حتقعد تقرا في ناس كل شوية حد يستغيث بيها تروح جري تغيثه فيطلع اللي بيستغيثوا دول اندال او عاملين لهم كمين، وكل شوية حد يكدب عليهم، وهم ما يرضوش يكدبوه عشان عيب.. افرض طلع صادق؟ يعني اخد ذنب اني كدبت صادق؟ ودايما قبل ما يتقتل اي حد فيهم، ربنا يمكن كل واحد فيهم من قاتله، بس هو ما يرضاش يقتله، ما يرضاش يقتله عشان ما بيحبش القتل غيلة وغدر، او عشان اترجاه وهو اشفق عليه، او عشان ما كانش ساعتها رافع سلاح عليه وهو مش عايز يعتدي في القتل، او عشان توسم ان لو اداله فرصة يعيش يمكن يتوب ويشوف الحق.. فتكون النتيجة، ان المعفي عنه اللي الاخ ما رضاش يقتله هو بالذات اللي يقتل هذا الشخص اللي عفا عنه... ده ملخص سير اهل البيت بالتسلسل، والغريب ان كل واحد فيهم بيعمل اللي ابوه وجده عمله بالظبط، ولما واحد قال لسيدنا زيد بن علي زين العابدين ما معناه: هو انتوا يا اخي ما بتتعلموش من اللي بيتعمل فيكوا؟ قال له برضه ما معناه: احنا بنعمل الصح.. وابويا وجدودي ما غلطوش في حاجة عشان اتعلم انا.. هم صح وانا باقتدي بيهم

وعلى فكرة برضه على طول الناس كانت بتلوم عليهم، اللي منهم يتصالح يقولوا له يا مذل المؤمنين، يا جبان، يا متخاذل ياللي عصرت لمون منك لله انت السبب في اللي احنا فيه.. ييجي حد منهم يقول خلاص بالاها عصر اللمون نتخانق.. يقوموا يخلعوا منه ويلاقي نفسه لوحده وبعد اما يموت يفضلوا هم هم نفس الناس يقولوا عنه: وهو ايه اللي وداه هناك؟ اه وربنا وربنا وربنا زمبؤلك كده.. مش مصدقني اقرا الكتاب.. وبرضه الناس تفضل تقولهم انتوا السبب، منكوا لله خربتوها.. انت بقى لما تقرا الكتاب ده حالتك حتتحسن كتير، لانك حتحس انك مش لوحدك، واهي ناس اهي.. اظن بقى دول احسن ناس في الدنيا كلها في الاولين والاخرين بعد سيدنا النبي والانبيا مافيش حد احسن منهم.. صح؟ اهم برضه حصل لهم اكتر من اللي بيحصل لك، وبنفس الطريقة، وبرضه بيعملوا الواجب والمبدأ حتى لو هم عارفين النتائج، وبرضه بيغيثوا اللي بيستغيث بيهم حتى لو هم عارفين انهم اندال وكدابين وامهم امريكانية، وبرضه ماشيين بمبدأ من خدعنا خدعنا له، ولما حد يقولهم: فلان ده كداب، يقولوا له عيب ما تكدبش الناس، لما يتبين كدبه ابقى كدبه انما من غير دليل ما تظلمش، وبرضه الناس طول الوقت تلوم عليهم وتقولهم انتوا السبب.............................. وبرضه عمرهم في حياتهم ما وصلوا للسلطة، ولو ربنا عارف ان السلطة فيها خير ما كانش ضن بيها على اهل بيت نبيه

طبعا مالكش دعوة بالسلفيين اللي حيقعدوا يقولوا لك ابو الفرج شيعي وكل الهلاوس بتاعتهم دي.. خليهم كده يقعدوا يطاردوا اشباح في خيالهم لحد اما يتجننوا زيادة ماهم مجانين، وقالك حزب النور لقى بؤرة شيعية مكونة من تلاتين واحد في معبد الكرنك وفي الاخر طلعوا ناس من قبيلة الجعافرة اللي مكونة حوالي نص الصعيد وممكن الموضوع يقلب بغم لان الصعايدة في الحاجات دي مش حيتفاهموا وياخدوا ويدوا في الكلام... المهم، ابو الفرج ده لا سني ولا شيعي، وما كانش بيستحمى اصلا عشان خاطر يتوضى ويصلي حتى، ده كان راجل صايع، الله يرحمه بقى، ومالوش غير في اللت والعجن في سير النسوان وفتنة الغلمان، بس كان من جهابذة الثقافة في وقته وجليس الخلفاء وكتب كتاب تأريخي، حتلاقي في النص كده مش قادر يقاوم ميوله للت في سير النسوان بس عموما دي بتبقى جملة او جملتين، حكاية او اتنين في وسط الاحداث التاريخية اللي بيسردها واللي موجودة عند الطبري وابن كثير وابن سعد في الطبقات، لان دي احداث ما يقدرش يزور فيها، وهو عمل الكتاب ده لإنه جزء من منجزه الثقافي ولإن دي شغلانته اللي بياكل منها عيش

مش قصدي انكد عليك.. انا عايزاك بس تعرف انك لازم تفضل تعمل واجبك، وتعمل الصح يا حزلئوم، ومالكش دعوة بالنتائج.. احنا كنا بنقف خمسين واحد على سلم النقابة، وساعات كنا بنبقى عشرة، ومرة ظبطت عمر اسد ومعاه اتنين صحابه هم التلاتة عاملين وقفة على سلم النقابة، وكان بيبقى قدامنا قد عددنا 1000 مرة عساكر امن مركزي، وما بطلناش ولا يأسنا، مش عشان كان عندنا امل ولا حاجة، عشان ده واجبنا اللي عملناه وحنفضل نعمله، وعشان انت مش لازم تندم انك عملت الواجب، وعشان مش لازم يوجعك ان لما قرايبك وجيرانك يبقوا عارفين انك "الواد او البت بتوع المظاهرات" فيفضلوا يقولوا لك: عاجبكوا كده؟ انتوا السبب في اللي احنا فيه... لان اللي بيقولك كده ما عملش حاجة، وبيلومك عشان عملت حاجة، واللي يقولك انتوا السبب قول له: انا اتسببت في الحاجة الوحشة اللي حصلت.. حضرتك بقى ما اتسببتش ليه في حاجة احسن؟ ولا انت قاعد في البيت مستنينا نغلط عشان تلومنا؟ وانت ما غلطتش في حاجة.. انت عاملت ضميرك، وفي كل الاحوال انت كسبان، لو مت تبقى شهيد، لو اتصابت يبقى جزء منك سبقك للجنة، لو اتحبست يبقى ارتاحت من وشوش عكرة قارفاك في عيشتك باللوم والتقريع.. وانا عايزاك تعرف ان ناس احسن منك وحصل لهم اوحش من اللي حصل لك، وفي جملة جميلة قوي في الكتاب ده بتوصف الناس اللي من اهل البيت اللي حبسهم ابو جعفر المنصور - وبالمناسبة العباسيين استغلوا اهل البيت عشان يوصلوا للسلطة وبعد كده قتلوهم وحبسوهم زي واحد صاحبي انت ما تعرفوش - الجملة بتقول: كانوا صبرا.. كسبيكة الذهب، كلما اوقد عليها النار ازدادت خلاصا

اذا كان احمد دومة اتحبس ولما الاخوان حبوا يشوهوا سمعته ما لقوش حاجة يقولوها غير: ده كان اخوان وسابهم.. كويس انهم عارفين ان الانتماء للاخوان معرة يتعاير بيها الانسان، واذا كان احمد ماهر اللي ساند مرسي بكل قوته، واللي فعلا لولا ان ستة ابريل ساندت مرسي في الاعادة كان زمان شفيق هو اللي رئيس دلوقت، واذا كان احمد ماهر كل الناس لامته، وبعضهم نبذوه، واتهموه في شرفه الوطني، وقالوا له يا خاين يا عميل يا امنجي يا اخوان خلايا نايمة ياللي اتفقت مع الامريكان عشان تجيبوا الاخوان ياللي طمعان في وزارة... واحمد حيطمع في وزارة من الاخوان ليه؟ لو كان طمعان في وزارة ما خدهاش من مبارك ولا المجلس العسكري ليه؟ اللي فاكراه ان ستة ابريل قالوا احنا حندعم مرسي رغم اننا عارفين ان المجلس العسكري حينجح شفيق، يعني هم وقتها كانوا معتقدين انهم بيراهنوا على الحصان الخسران، وللتذكرة، اكتر حد قدم شهداء في العباسية كانت ستة ابريل.. بس حازمون الانطاع نسيوا.. اذا كان جو الاسطورة مقبوض عليه، اذا كان جيكا وكريستي انتخبوا مرسي وقتلهم.. اذا كان علاء عبد الفتاح اتمرمط ايام مبارك عشان بيدافع عن الاخوان، وهو في محبسه ايام المجلس العسكري انتخب الاخوان في مجلس الشعب، ولما خرج عمل مسيرة تسليم السلطة لمجلس الشعب والاخوان ضربوه وعصر لمون وانتخب مرسي واخرتها يعملوا له ضبط واحضار عشان الاميرة جومانا... اذا كنت انت قاعد مستني دورك في القتل او الاصابة او الاعتقال... ما تزعلش... احسن منك وحصل لهم كده، وفي الاخر، مين اللي الناس خلدت اسمه؟ مين اللي ناس عملته ولي بتتبارك بيه؟ يعني انت حتموت ومرسي هو اللي حيعيش؟ ما كلنا ميتين... وكلنا مقابلين ربنا

"هذا يوم ينفع الصادقين صدقهم"

يا بخت من بكاني وبكي عليا

الا انا قرفانة قوي.. وقرفي مش حينفع اعبر عنه على التويتر.. لاني عايزة اخد اكبر عدد من البشر غسيل ومكوى

بصوا.. انا قرفي نابع من ان تلات اربع مشاكلنا نابعة من غباوتنا والربع الباقي نابعة من استغلال اعداءنا لغباوتنا

مش كل حاجة حسن نية وطيبة

اه معظم الثوار، او كل الثوار اللي ينفع يتقال  عليهم ثوار بجد، نزلوا على باب الله، ومالهمش في المؤامرات وشايلين شنطتهم على الاعتصامات والناس عمالة تلعب البخت على قفاهم، ومالهمش اطماع في فلوس ولا سلطة

دي حقيقة

بس مش كل الاطماع فلوس وسلطة.. في اطماع ذاتية، ومش كل المشاكل هبل.. في جزء من المشاكل غباوة، وانانية، وذاتية، وفيها لاخفيها، واصرار على المزايدة عشان فرد يطلع كويس قدام نفسه في مقابل مصلحة مجموع، ومش كل حاجة الاخوان متآمرين فيها او بخطة المجلس العسكري او امن الدولة مدبرها

انا مش بانكر دور اي من الجهات المذكورة في افشال الثورة.. لكن صدقوني احنا موفرين عليهم مجهود كتير بعيوب فينا مش عايزين نعترف بيها

ما تيجوا نقرا المشهد بشكل تاني، سهل قوي اننا نشتم الاخوان، الاخوان عاملين في نفسهم بلاوي مخلية حصى الارض يشتم فيهم، وبعد اللي عملوه عند دار القضاء بقى ناقص المرشد نفسه يهتف يسقط يسقط حكم المرشد، وعشان نبقى منصفين، كل الخصم اللي اتخصم من الاخوان كان بجهدهم الحقيقة... المنافسين ما بذلوش اي جهد الا في انهم يخصموا من نفسهم هم كمان.. ورجع الناس تاني ما تثقش في حد ولا في نفسها وبقى عند الناس العادية احساس بالفشل والخزي والخذلان، وبقوا حاسين انهم مهما بذلوا اقصى طاقتهم مافيش امل وده اللي مخليهم متنحين ومكسلين ومستسلمين

ماشي.. الاخوان كدابين، منافقين، نصابين، جبنا، فيهم خسة وندالة تدرس في الجامعات والمعاهد العليا

لكن الاخوان كمان فيهم مميزات مش فينا وعشان كده لحد دلوقت المعركة إيفن.. مش حاقول هم كاسبينها، لانهم مش كسبانين اي حاجة، كل يوم بيخسروا، وبيخسروا ناس، لكن لما بيخسروا ناس الناس دول بتقعد في البيت، مش بتروح لحد تاني

الاخوان في انتخابات مجلس الشعب اخدوا خمستاشر مليون، في الرئاسة اخدوا خمسة في الاول وفي الاعادة اخدوا 13، في الاستفتاء اخدوا 10.. ولو عملت انتخابات دلوقت الاخوان مش حياخدوا مليون على بعضه... بس اللي بيبطل ينتخب الاخوان مش بيروح ينتخب حد تاني.. بيقعد في البيت.. زي ايام مبارك بالظبط

وبصراحة معاه حق

حينتخب مين طيب؟

حينتخب ناس ذواتهم وغرورهم وصورتهم في المراية اهم عندهم من اي حاجة؟ والجديد بقى المزايدة بالموضوعية، والتكالب على الزهد.. او التزهد، ماهو زي ما الاخوان بتتكالب على المناصب والمكاسب في ناس بتتكالب على ان كل واحد فيهم يبان زاهد اكتر من التاني، ومش زاهد ويسيبها لغيره؟ لا ده زاهد وبيزايد على غيره: ازاي تاخد موقف تزايد بيه على اي حد وتستموت عليهم.. ازاي تعمل فضيحة بجلاجل لاي حد بلا اي مبرر وتترصد له على الساقطة واللقطة عشان تبقى ثوري مظبوط.. ازاي نفرج الناس علينا ونخلي اللي ما يشتري يتفرج ونشمت الكلاب فينا... ازاي تاخد مواقف غلط ونقع في الكمين الغلط عشان نثبت اننا موضوعيين.. ازاي اطلع ميتين ام اي حد مني وله افضال على الثورة وافرح الناس فيه عشان اثبت اني مش تبع حد..  انا افهم ان الحاجات دي بتتعمل بحسن نية مرة.. مرتين.. تلاتة.. انما لما تبقى اسلوب حياة يبقى فيه مشكلة، قشطة جدا، كل دي حركات مراهقة زي اللي بتدلق جاز على نفسها عشان تهدد اهلها انها حتولع في نفسها.. لعبنا كتير والله، وزايدنا على بعض كتير

ممكن بقى نفوق لنفسنا شوية

هو حضرتك عمرك سمعت ان اخوانجي بيتخانق مع اخوانجي؟ عمرك شوفت حد فيهم بيزايد على التاني؟ عمرنا سمعنا واحد اخوانجي متكحرت بيقر على الشاطر ويقول معاه فلوس وجابها منين؟

طيب اذا كانوا هم فعلا خرفان.. فبرضه احنا ذاتيين، وكل واحد بيفكر في نفسه

ماشي انت بتقول على الاخوان خرفان عشان هو مستعد ينزل في اي حاجة في اي حتة ويضرب اي حد ما يعرفوش ولا يعرف هو عمل ايه اساسا بس عشان مسئوله قال له انزل.. ايوه، عنده من الايثار اللي حوله لانسان آلي مش بني ادم.. وانا مش باقول انك تبقى انسان آلي... بس كمان حضرتك وحضرتي وحضرته وحضرتها.. ما احناش اينشتاين يعني ولا كل واحد عايش في دور رئيس جمهورية نفسه وهاتك يا تشليت في خلق الله لحد ما بقى الثوار متفرقين ومش عارفين اصلا هم عايزين ايه؟

هم عايزين يعتصموا.. مبدئيا كده عشان نبقى على مية بيضا.. وعايزين يزايدوا.. وكل واحد عايز يثبت لنفسه ان عنده نقاء ثوري اكتر من اي حد تاني

فالنقاء الثوري ده يخليك لوحدك ومتشتت

اللي بقوله ده مش جديد... وبقوله من زمان، بس مش بالمفتشر عشان ما اشمتش الاعادي.. وعشان انا عارفة ومتأكدة من حسن النية، وعشان انا شايفة بعينيا ان الناس اللي بتعمل كده ما كلتش حاجة تشرب عليها مية.. بس انتوا عارفين ايه اللي زاد قرفي؟؟

موقف كنت اخدته زماااااااااااااان واغلب الناس غلطتني.. واخيرا، وبعد طول انتظار، وصلتني معلومات مؤكدة ان موقفي ده كان صح، وان اغلب الناس اللي غلطتني دي كانت بس عايزة تزايد وتعمل ثورية.. وفي ناس من اللي هاجموني وصلتهم نفس المعلومات وسكتوا عشان مش عايزين فضايح.. طب مش عايزين فضايح في الموقف ده وانا معاكوا ومش حاعمل فضايح بس عشان اطلع نفسي صح لان ماحدش حيستفيد من ده.. بس ليه العقل والحكمة دول مش في كل حاجة بقى؟ وانا مش حاقولكوا ايه الموقف ده.. حاسيبكوا كده مغشوشين ومخدوعين.. تستاهلوا 

والله ما انا قايلة

بس.. هه..  خليكوا كده لحد لما تشوفوا بعينيكوا وتتأكدوا بنفسكوا، ومدام المعلومات دي وصلتني يبقى هي في طريقها ليكوا

انا ممكن اعرف هي الناس بتعمل كده ليه؟

مش عايزة اتك قوي على الناس عشان انا عارفة انهم قدموا تضحيات ومخلصين ومتفانيين ومبهدلين روحهم.. بس عايزة اعرف بيعملوا كده ليه؟

ليه احضر اجتماع يبوظ عشان اتنين كانوا بيتخانقوا مين اللي دعا للمظاهرة اللي قبل اللي فاتت الاول؟

ليه عمالين نفرج الناس علينا ونشتم في بعضينا؟ معلش... ليه؟ هاه؟ هاه؟ هاه؟ واول حاجة تحصل مع اي خلاف: انت بعت القضية.. انت اشتروك.. انت زيك زي الاخوان.. انت شربت شاي بالياسمين.. على طول كده؟ الاتهام جاهز على طول؟
مافيش التماس اعذار؟ مافيش انك تفتكر للشخص ده مواقف عملها قبل كده؟ صحيح احنا خدنا على قفانا كتير واتغشينا في ناس.. لكن ده مش مبرر اننا يا اما نفوت قوي يا اما نتشكك قوي

انتوا عارفين انا ساعات بازعل قوي ان الاخوان طلعوا وحشين كده.. كان نفسي يطلعوا كويسين، وكان نفسي ان الاخلاص والتفاني دول يبقى لمصلحة البلد مش لمصلحة الجماعة.. مش عشان انا ساذجة ولا عبيطة، بس عشان نستريح احنا... ساعات اقعد كده واقول: يعني كان جرا ايه يا اخوان لو كنتوا اتقيتوا ربنا فينا بدل ما اتحوجنا لقفا اللي ما كناش نطيق نبص في وشهم؟ وبدل ما الناس عمالة تناكف في بعض واول ما الحاجة تخرب يقولوا مؤامرة؟

لا بقى مش مؤامرة.. اللي حاصل في حزب الدستور مثلا وفي جرنال التحرير مش مؤامرة ولا حاجة.. الانقسامات والناس اللي عمالة تمسك في شواشي بعض مش مؤامرة ولا حاجة.. الخناقة اللي اتنشرت لجبهة الانقاذ مش مؤامرة ولا حاجة.. مافيش طرف متآمر.. ولا عملاء الاخوان وامن الدولة تدخلوا لتقويض الكيان من الداخل والكلام الخايب ده.. دي غباوة

في حزب الدستور الخناقة على اللايحة، وناس تقول استنوا لما سنة تعدي باللايحة دي وبعدين نغيرها وفقا للقانون وناس تانية تقولهم لا احنا في ثورة يالا نغيرها دلوقت.. وراحوا معتصمين، واللي ماسكين في اللايحة مصغرين مخهم واللي عايزين يغيروا اللايحة مش عايزين يتفاهموا والناس عمالة تعمل شغل عظبجية على بعض.. حلو كده يعني؟ جميل لما الناس تتفرج عليكوا؟ ما تقعدوا وتتخانقوا وتشتموا بعض وتحدفوا الكراسي على بعض من غير ما حد يسمع بيكوا ولا يشوفكوا وانتوا بتعملوا كده، لازم الناس تسمع بيكوا وتتفرج عليكوا وتشتمت فيكوا؟ لازم الناس الحيرانة تفقد الثقة فيكوا وتقول اذا كانوا بيعملوا كده في بعض امال لو مسكوا البلد حيعملوا فينا ايه؟ ما كل الناس بتختلف.. ايه حكاية الاعتصامات دي وفرجة العالم؟ هو انت مش عارف مين معاك ومين عليك؟ بقى بعض الثوار يعصروا لمون على الاخوان اللي عملوا اللي عملوه فينا في محمد محمود ومش عارفين يعصروا لمون على بعض؟ وكل ما الناس تتجمع في كيان يختلفوا والكيان يتقسم ونفضل نقول: ستة ابريل الاولانية ولا التانية؟ كفاية الاولانية ولا التانية؟ بظرميط الاولانية ولا التانية؟ وحيبقى بقى حزب الدستور الاولاني ولا التاني؟ وليه التخوين؟ وليه الشتيمة؟ تتفها تنزل في عبك يا اخي

وبالنسبة لجرنال التحرير ابراهيم عيسى عين 30 وما عينش 7... وبصرف النظر عن التفاصيل هو قالهم حاعينكوا في شهر سبعة وهم قالوا عايزين عقد وهو قالهم انتوا ما بتشتغلوش وهم قالوا له كده طب احنا حنعتصم! الله.. واحنا ليه نعرف كل التفاصيل دي؟ وليه نعرف قالهم ايه وقالوا له ايه ومشي لا ماشيش لا راجع لا مش راجع.. هو اصلا ليه الدبكة والقلبان ده كله؟ وناس تقول ماهو عين 30 ما السبعة يستنوا لشهر يوليو... طيب هو عين 30 ما كانش جرا حاجة لو كانوا بقوا 37.. هم يعني السبعة دول اللي حينقصوا دخل الجرنال بمرتباتهم؟ طب هو ما عينهمش.. ما كانش جرا حاجة لو كانوا استنوا لشهر سبعة.. طب هو ما عينهمش وهم ما استنوش وقرروا يعتصموا.. ما كانش جرا حاجة لما يبقى خلاف اداري واعتصام جوه الجرنال من غير شتايم وحملة وتخوين ونلاقي صحفيين بيشتغلوا مع كناسة رؤساء التحرير في الارض بيزايدوا على ابراهيم عيسى؟ والعدو يشمت، والنجس يمسح نجاسته في جرنال التحرير عشان يطلع ثوري، طب وده وقته؟ اذا كنت انا وانا باكتب دلوقت قلت كناسة رؤساء التحرير وما رضتش اكتب اسامي لانه مش وقته اشتم حتى كناسة رؤساء التحرير مدام فاتحين باب للمعارضة وما حبكش اعمل معاهم معركة جانبية، يا سيدي ابراهيم عيسى مفتري وظالم، ولو اني مش شايفة كده انا شايفة انه ركبه العند في حاجة ما كانتش متساهلة كل العند.. بس حافترض انه مفتري وظالم.. ده وقته يتعمل حملة عليه؟ ما افتكرتلوش انه اول واحد كتب لمبارك: انك ميت؟ ما افتكرتلوش انه يوم 25 كان من الصبح معانا وقال لنا احنا قاعدين ماحدش يروح وقت ما كان رئيس جمهوريتكوا مستخبي هو وجماعته مستنيين يشوفوا الدنيا رايحة فين؟ مش فاكر له انه شوكة في حلق مرسي وجماعته ومش منيمهم الليل وممشيهم يكلموا نفسهم؟ وقته دلوقت القلبان ده؟ وانت راخر يا ابراهيم ما كنت تعينهم يعني.. هي جات على التلات شهور دول؟ بس هو لحد دلوقت ما غلطش في حد... عشان عيب، يتفها تنزل في عبه.. واللي غلطوا فيه برضه تفوها ونزلت في عبهم
ملحوظة:
انا مش عايزة حد يخش يشرح لي مشكلة حزب الدستور ومشكلة جرنال التحرير من وجهة نظره ويقولي انت فاهمة غلط... لاني ما كنتش عايزة افهم اساسا عن المشاكل دي، وما كنتش عايزة اسمع عنها، وما كانش مفروض حد يسمع عنها انشالله تكونوا خزقتوا عينين بعض.. وانا اخدت المثالين دول كمثال لحالات كتير بس دول اقرب مثالين جم في دماغي

ونفسنة بقى

ودي بقى عنصر آخر لفشل الثورة: النفسنة.. ومش عيب الناس تنفسن على بعض خصوصا ان اغلب شباب الثورة سنهم صغير ودي طبيعة الفترة العمرية بتاعتهم

بس تفتكروا يعني الاخوان مافيش بينهم نفسيات؟ مافيهمش واحد ظالم التاني؟ مافيهمش واحد معترض على اداء التاني؟

اكيد لا.. طيب عمرنا شوفنا غسيلهم الوسخ؟

ابدا..

ليه؟

عشان هو بالنسبة له الحفاظ على الجماعة اهم من اي حاجة، اهم من طموحه، ومن شكله قدام الناس، ومن شغله، ومن الاضواء متسلطة عليه ولا متسلطة على زميله اللي اصغر منه... يعني اكيد يعني في من شباب الاخوان عيال بتنفسن على المغير عشان الجماعة ملمعاه اكتر منهم، وممكن يكون بيقول لنفسه اشمعنى هو يعني اللي عاملينه رئيس مراجيح مولد النبي وانا اللي ساهمت اكتر وتعبت اكتر ويمكن اتحبست ويمكن اتضربت ويمكن ضربت ابقى ولا كأني موجود... بس هو بيبلع ده كله عشان مصلحة الجماعة

عشان كده زعلانة ومتغاظة منهم انهم طلعوا وحشين.. طب هي مصر وحشة يعني؟ طب جرا ايه لما الاخلاص ده كله يبقى لمصر مش للجماعة يعني؟ مش كنا استريحنا

انتوا عارفين.. انا باشتغل دلوقت مع مجموعة.. تصوروا ايه؟ تصوروا خايفة اكتب هي مجموعة ايه ولا بتعمل ايه ولا بتشتغل على ايه لبعدين الناس تيجي المجموعة دي والعدد يزيد وتبتدي الاجتماعات تتحول من شغل الى مزايدات وتنظيرات ونفسنات وخناقات؟ والله.. اي والله ولا ليكوا عليا يمين، مع ان المفروض المجموعة دي معمولة عشان تكبر وتتوسع.. بس احنا اي حاجة بتكبر وتتوسع بنعملها بتخرب.. واوعى حد يقولي مؤامرة
انا مش فاهمة اذا كان الواحد مفهم نفسه انه مدام ما بيطلعش بفلوس ولا منصب يبقى هو كده في السليم يبقى لازم يراجع نفسه.. عشان ممكن يكون ركبنا العجب وبقينا نتصنع الزهد
نساع بعضينا عشان الامور تمشي... ولا انتوا مش واخدين بالكوا من اللي حاصل؟
الناس نفسيتها تعبت ورجعت زي ايام مبارك في اليأس واسخم... ليه كده؟ احنا كنا ما صدقنا راقوا ورجعت لهم ثقتهم في نفسهم

عن رحلة بورسعيد

بصوا.. انا الموبايل بتاعي لا بيصور ولا بيخش على النت، مع اني شارياه من مركز موبينيل اللي في الميرغني، اسمه هاواوي باين.. وقاطعين عني النت، كل ما اتصل بيهم يقولوا العيب في تليفونك، نروح لهم المركز يصلحوه ويرجع يبوظ تاني

فانا ان شاء الله حاستنى اما اقبض واجيب موبايل تاني.. لو الموبايل التاني ما اشتغلش عليه النت برضه يبقى لا لأخونة موبينيل

الخلاصة يعني انا حاحكي الرحلة كلها بس للاسف كلامي مش موثق بفيديو ولا بصور الصور والفيديو حتلاقوها عند محمد واكد ورامي غانم

+++

ايه اللي مخليني عايزة احكي اللي حصل كله في بورسعيد، اني قابلت راجل صوفي جميل كده، كان راكب عربية واحد صاحبه ولما شافنا في الشارع نزل مخصوص وقال لي: انت لازم تقولي كل حاجة، واهم حاجة تقولي مشاعر البورسعيدية اكتر من الاحداث

+++

انا عارفة ان فيه ناس بتخلط ما بين جرايم قتل وبين الكورة ومدخلين ده في ده، ومحولين جريمتين قتل الى منافسة كروية، اللي هم اولتراس اهلاوي واولتراس جرين ايجلز بدون ذكر اسماء، دول عايزين بورسعيد كلها تتحرق، ودوكهمة شايفين ان ماحدش من بورسعيد يتحاكم خالص، حتى لو قاتل، والمطلبين حاجة مش معقول، بس هو من امتى مشجع الكورة في اي حتة في العالم بيطلب اي حاجة معقولة؟ هو كده لجل بختنا المدوحس الحكاية اتكعبلت في مشجعين كورة، ما تقدرش تلوم مشجعين الكورة لان دي دماغهم، زي مشجعين الدين كده، ما هو الاسلاميين دول بيشجعوا دين مش مؤمنين بدين، حتى امي الست العاقلة دي بتشجع مرسي، مش مصدقاه، امي ست بتفهم يعني، فهي عارفة ان مرسي زفت وطين، بس ما ينفعش تقول عليه زفت وطين وهي بتشجعه، لازم تقول الحكم ظلمنا

انا باشجع كورة من زمان، وزملكاوية من تانية ابتدائي، يعني متدربة على "الحكم ظلمنا" دي وانا عارفة ومتأكدة انه ولا ظالمنا ولا نيلة، بس يعني حاطلع الفريق بتاعي حمار؟

الحقيقة انا شايفة ان تشجيع الكورة بوخ بقى، وحيتحول لجريمة في حد ذاته، وشايفة انه ابتدا يتحول لجريمة من ايام ماتش ام درمان اللي كان مع الجزائر... فاكرين؟ لما قاطعت الشعب كله وقررت اشجع اي فريق يلعب قصاد المنتخب

المهم مش دي قصتنا

قصتنا بقى ان فيه ضحايا راحوا، سواء من اولتراس اهلاوي ولا من بورسعيد، والاتنين مش حييجي حقهم

مش حييجي ابدا.. مش بس لان الحاكم ظالم، كمان لان المطالب بالحق مش عارف يطالب بحقه ولا يطالب بالماتش.. ولا حينفع ان بورسعيد كلها تتحرق او تتعزل او تتعاقب او يتقتل اهلها قتل عشوائي، لان مش بورسعيد كلها اللي قتلتهم، ولو مدينة بورسعيد كلها اللي قتلتهم مش حيبقى الضحايا عددهم 74 بس.. ولا حينفع ان 74 يتقتلوا في مكان وماحدش في المكان ده كله يتسئل حتى دول ماتوا ازاي.. مش كائنات فضائية نزلت قتلتهم يعني، وطول مافي طرف بيطالب بان بورسعيد كلها تتعاقب، يبقى اللي مات حقه مش حييجي من اللي قتله، وطول مافي طرف بيطالب ان ماحدش يتعاقب خالص يبقى بورسعيد كلها حتشيل الطين... وهي حلقة مفرغة، والله يخرب بيت الكورة على اللي اخترعها.. انا بطلتها من ايام الجزائر وربنا شفاني والحمد لله

لكن اهالي بورسعيد اللي مالهمش علاقة بالكورة، مش عايزين ان العدل ما ياخدش مجراه، بالعكس، هم كل شوية يبدوا استعدادهم انهم يتعاونوا مع السلطات لتقديم الجاني الحقيقي للعدالة.. بس هم مش شايفين ان السلطات عندها النية دي

+++

الزيارة لبورسعيد اتأخرت جدا، كان عندي امل اننا نعرف نعمل عصيان مدني، او حتى مسيرات مكثفة في القاهرة، وكنت شايفة اننا لو رحنا هبطنا على البورسعيدية وهم عاملين عصيان مدني يبقى بنحملهم عبء، هم حيتخانقوا ولا حيضايفونا؟

العصيان المدني جه على اثر قتل 30 واحد قصاد السجن، و7 في الجنازة

ومطالب العصيان المدني هو معاملة شهداء بورسعيد زي شهداء 25 يناير.. دي المطالب، لكن مش هو ده الدافع

الدافع الحقيقي واللي لمسته من اهالي بورسعيد انهم حسوا انهم بيتعاقبوا عقوبة جماعية على جريمة هم ما عملوهاش، وان الموضوع اتحول الى استقطاب كروي اكتر منه تحقيق العدالة، وده قلب عليهم كل المواجع القديمة قوي من سنة 56 لما واجهوا لوحدهم، وايام التهجير في 67 لما اتعاملوا وحش قوي في القاهرة، والحقيقة، باعتراف القاهريين اللي حضروا اياميهم هم عاملوهم وحش فعلا، عارف اللي امه بتموت وهي بتولده فابوه يكرهه لان ده بوز الفقر اللي اتسبب في موت مراته؟ اهو القاهريين اتعاملوا مع اهالي مدن القناة وقتها بنفس النفسية: دول بوز الفقر اللي مجيتهم كانت مع الهزيمة، مع ان دول كانوا جايين مصابين واللي جوزها مات، واللي ابنه اتسرع من صوت القنابل وبيجيله كوابيس، وبدل ما يلاقوا حد يخفف عنهم ولا حتى تشكرهم انهم شالوا المسئولية لوحدهم لقوا ناس بتعاملهم على انهم بوز الفقر، ده غير بقى يفط كتير مكتوبة للتذكرة بالمعاملة القذرة اللي اتعاملتها بورسعيد ايام مبارك بعد ما ظلم ابو العربي ولفق له تهمة وقتله، والراجل كان عايز يدي له شكوى.. مش يقتله زي ما مبارك اتبلى عليه

الخلفيات دي مهمة لفهم طبيعة اهالي بورسعيد، واهالي القناة كلهم، ومهمة لانهم بيجيبوا سيرتها، ومدام بيجيبوا سيرتها تبقى واجعاهم لحد دلوقت، ولو كانوا حسوا باي اختلاف ما كانش القديم اتقلب عليهم

اللي قلب عليهم القديم هو انهم حاسين ان الهدف من المحاكمة هو الانتقام من بورسعيد مش البحث عن الجاني الحقيقي ومحاكمته، لانهم هم نفسهم شهدوا في تحقيقات المدبحة على اللي قتلوا، بس لاحظوا في الاول ان بيتم القبض بشكل عشوائي على ناس مالهاش علاقة، ده غير ان الحكم بالاعدام صدر ضد ناس منهم واحد ما حضرش الماتش، وواحد اهلاوي كان جاي يشجع الاهلي، وواحد مش متوجه له تهمة اساسا في المحضر، وواحد متصور وهو حاطط ايده على كتف حسام حسن، الاهم من ده كله، واللي محسسهم ان الحكم مقصود بيه عقاب بورسعيد مش عقاب الجناة من بورسعيد، هو ان الداخلية لم يوجه اليها اي تهم ناهيك عن ان اي حد منها يتحاكم، لحد دلوقت، وبعد احكام الاعدام، ماحدش حل لغز قطع النور، ماحدش حل لغز الابواب الملحومة... طب هم كمان عايزين يفهموا مين اللي عمل كده، زي ما اهالي الشهداء اكيد عايزين يفهموا هم كمان ويعرفوا ليه عمل كده واللي عمل كده ضروري يتحاكم وياخد اعدام هو كمان

ده غير بقى ان الديفولت بتاعهم هو ان الداخلية بتتبلى عليهم، ومش بيصدقوا كلام الحكومة خالص، خصوصا بعد ما مبارك بذات نفسه وهو رئيس الدولة، اتبلى على واحد منهم وقال كان عايز يقتلني وعملي واوا في ايدي وهم كلهم شايفينه وهو بيديله ورقة فيها شكوى

وكل الناس بتجيب سيرة اي حد اتظلم من مبارك، وماحدش بيجيب سيرة ابو العربي اللي اتقتل ظلم، وكمان بورسعيد كلها اتعاقبت بذنب هو ما عملوش.. فعندهم احساس ان ايه بقى؟ هو انتوا ما عندكوش حد غيرنا تظلموه ولا ايه؟ حتى مش عارفين تقولوا لنا البقية في حياتكوا في اللي مات؟ للدرجة دي يعني هو احنا اسرائيل؟ ده انتوا بتعزوا في الاسرائيليين بخطابات رسمية

ولو تلاحظوا مطلب العصيان المدني: معاملة شهداء بورسعيد زي شهداء 25 يناير... وزي ما كلنا راسيين، شهداء 25 يناير ما خدوش غير طلب الرحمة.. يعني كل العصيان المدني ده عشان مرسي يبطل يقول على اللي ماتوا بلطجية، وعشان الناس تبطل تقول: احسن انهم ماتوا.. لحد دلوقت ما سمعوش كلمة: البقاء لله

+++

اول ما وصلنا بورسعيد رحنا عند السجن اللي حصلت عنده المدبحة، اول ما بتوصل بتلاقي على الناصية عمارة هي دي اللي كان واقف عليها القناصة، وفي شارع متفرع من الشارع الرئيسي فيه سوق في اخر الشارع ده السجن، كل اللي ماتوا واتصابوا كانوا في الشارع الرئيسي، مش في الشارع اللي فيه السجن، يعني بعيد خالص عن السجن، كلهم اخدوا طلق مباشر من القناصة اللي فوق العمارة اللي على الناصية، او من قوات الامن اللي كانت متقدمة على اول الشارع اللي فيه السجن

الشباب اللي استقبلونا مثلوا لنا الجريمة لانهم شهود عيان، كان في كشك متخرم، الكشك ده كان مستخبي وراه اتنين، واحد قال لصاحبه اقف ورايا وتعالى نستخبى ورا الكشك، الامن فضل يضرب على الكشك بالطلق الحارق لحد ما الشاب ده اتصاب في كتفه بطلقة دخلت في كتفه من قدام وخرجت من ورا وراحت داخلة في رقبة صاحبه اللي كان مستخبي وراه وقتلته، كان من ضمن القتلى واحد بيشتغل بياع على فرشة كان رايح السوق يجيب  حاجات للفرشة، ده غير الراجل القعيد اللي كلنا شوفنا الفيديو بتاعه، المصابين بيقولوا انهم كانوا شايفين قوات الامن وهم بينشنوا عليهم، يعني الضرب ما كانش عشوائي، كمان احمد خير الله قال لي انهم كانوا بيشوفوا ناس معاها مسدسات، كان الواحد فيهم يطلع فجأة يضرب طلق ناحية السجن ويجري يختفي، بعد الطلق بتاعه الداخلية تنزل ضرب في الناس واللي ضرب الطلق مش لاقيينه اصلا ولا عارفين هو اختفى فين.

بعدها عدينا على القسم اللي كان حاصل عنده مواجهات، لقينا الحيطان والعواميد الحجر اللي في الشارع متخرمة كلها بطلق كتير قوي، واحمد خير الله قال لنا برضه ان كان فيه ناس بتظهر تضرب من الشارع طلقة على القسم وتختفي، وبيقول ان اللي عايز يضرب القسم فعلا كان يقدر يطلع فوق اسطح العمارات، خصوصا انها قدام القسم مباشرة، وفوق السطح كان حيبقى الشرطة تحتيه فيقدر يصيبهم، لكن اللي كان بيضرب طلقة ويجري يختفي ده كان بيضرب من الشارع عشان الشرطة تضرب على الناس، بعدين بيضرب طلقة ليه؟ هي الطلقة دي حتعمل له ايه غير انها تدي مسوغ للشرطة انها تضرب الناس وخلاص؟

لما تشوف القسم، تلاقي عدد الطلق اللي على حيطانه ما يجيش واحد على عشرة من عدد الطلق اللي على الحيطان والعواميد اللي قدام القسم، يعني قصاد طلقة واحدة الشرطة كانت بتمطر الناس بالطلقات

بعدين رحنا عند الجبانات

كان حصل بقى لبس في مين اللي ضرب الجنازة، لان في بعض ناس قالت ان الجيش هو اللي ابتدا ضرب على الجنازة، بس اللي كانوا معانا، وهم من شهود العيان، قالوا ان اللبس ده حصل لان نادي الشرطة جنب نادي الجيش، وده اللي خلا الناس تفتكر ان الجيش هو اللي ضرب، والحقيقة ان الشرطة هي اللي ضربت

في روايات اخرى اتقالت بان كان فيه ظابط جيش جوه عربيته وان الشباب وهم بيحدفوا نادي الشرطة بالطوب جات طوبة على عربيته كسرت له الازاز وانه بعدها نزل وضرب نار على الجنازة فالشرطة ضربت نار على الجنازة

لكن الشهادة دي الشباب اللي معانا ما شافوهاش وهم كانوا حاضرين الجنازة، هم بيقولوا لنا ان فيه كذا حد قال لهم كده، لكن هم اللي شافوه بالظبط ان الجنازة كانت معدية، وان واحد رمى طوبة على نادي الشرطة فكان الرد هو وابل من الرصاص على الجنازة، وكلهم شافوا جثة واحد من الشهداء وهي بتقع والجثة اخدت طلقة في الراس وهي واقعة على الارض

الناس قعدت تلملم الجثث من على الارض، ولما وصلوا المقابر بقوا مش عارفين مين تبع مين، ما كانش فيه غير شهيد واحد بس اللي اسمه مكتوب على الكفن، غير كده الجثث اتلخبطت، وبقوا يفتحوا الاكفان عشان يشوفوا وش كل واحد ويعرفوا هو تبع انهي اسرة

الحقيقة الناس في  بورسعيد بيحبوا الجيش لسبب غامض، وكذا حد قابلني وقال لي: احنا كنا مش بنحبك عشان بتشتمي الجيش بس بقينا نحبك عشان قلتي كلمة حق عن بورسعيد

لما قلت لهم ان الجيش قتل صحابي، صمموا ان اللي قتل صحابي هم الطرف التالت اللي هم الاخوان، وان الجيش ما بيقتلش حد!

مش عارفة لحد دلوقت هم بيحبوا الجيش ليه؟ الشباب اللي استقبلونا بيقولوا ان الجيش له تاريخ مع بورسعيد!

تاريخ؟

تاريخ اسود ومنيل... سابهم لوحدهم في 56 وسابهم لوحدهم يواجهوا في 67... حتى في 73، اعتمدوا على المقاومة الشعبية، خصوصا في السويس - وبالمناسبة السويس بيحبوا الجيش برضه.. مش بيحبوه، لان السوايسة عادة مش بيحبوا حد احتياطي كده ليطلع ابن كلب D: بس مش بيكرهوه يعني - فانا مش فاهمة ايه التاريخ اللي بينهم غير انه بيضحك في وشهم ومش بيرضى يضربهم؟ هم كمان عايزينه يضربهم؟ يعني هم شايلين عنه وبيقاوموا مقاومة شعبية وكمان حيضربهم؟ ليه؟ هو اخوان؟

الخلاصة.. الكلام ده فضفضة بناتنا.. ماحدش يقول لحد بورسعيدي الكلام ده عن الجيش عشان حتتعور في وشك وحتزعل وتجيب ناس تزعل

+++

بعد كده رحنا القسم الشعبي، ولقيناهم كاتبين يفط كتير تريقة على مرسي، ومن ضمن اليفط اللي كنت عايزة اصورها يافطة بتقول انهم مش عايزين يستقلوا  ولا حاجة بس القسم ده عاملينه سخرية من الشرطة وعايزين يدوهم درس في كيفية اداء واجبهم كشرطة

عملت محضر في محمود عزت، وخيرت الشاطر، وحطيت اسم مرسي برضه ما يجراش حاجة اما اديله برستيجه على اساس انه رئيس وكده، انا عارفة يعني ان الراجل عبد المأمور ومالوش في حاجة، بس برضه ما يصحش الواحد يتجاهله، عشان سنه حتى

ووجهت لهم التهم الآتية:

* ادارة ميليشيات غير قانونية من شأنها ترويع المواطنين

* خيانة الوطن وبيعه

* القتل مع سبق الاصرار والترصد

وكل اللي كانوا في القافلة وقعوا تضامنا على المحضر

واحنا واقفين مرت عربية خضرا على الاعتصام ووقفت نزل منها راجل صوفي جميل قوي، وجه قالي كلام كتير انا مش في حل اني اقوله، بس وصاني اني انقل مشاعر البورسعيدية اكتر من اني انقل احداث شوفتها، ومشي

بعدها رحنا على الاعتصام، المطالب متعلقة وكان نفسي اصورها عشان بس الناس اللي عمالة تقول ده اعتصام القتلة تشوف المطالب بنفسها

قعدنا شوية مع الناس، بعدين ظهر راجل كده وقعد يزعق لنا ويقول احنا مش عايزين حد انتوا جايين "بتتزيدوا علينا وتتاجروا بينا" وكلام كتير كده مالوش لازمة، والناس اتخانقت معاه وخدوني بعيد عنه

الراجل ده واحنا ماشيين راح لمحمد واكد وقال له: احنا عايزين نبني مصر، لازم تتصلوا بخيرت الشاطر وتخلوه يتعاون مع رجال الاعمال عشان نبني مصر، ويتصالحوا بقى مع رجال الاعمال وهو وهم يبنوا البلد!

والله العظيم قال كده.. محمد واكد فتح بقه كده وبعدين قال له: نتصل بخيرت الشاطر؟ قال له: ايوه.. احنا تعبنا، وعايزين نبني مصر.. فواكد قال له: حاضر.. ههههههه طب حيقوله ايه طيب؟

بس انا مستغربة ان الراجل ده ما قالش: انا مش اخوان على فكرة بس باحترمهم

بعدها رحنا كلنا ساندوتش كده في مطعم اسمه مجدي وشوفنا خطاب مرسي هناك

بعدين رحنا بورفؤاد.. منطقة جميلة قوي

على فكرة انا باروح بورسعيد كتير قوي، من سنة 2006 وانا باروح دايما، كل ما الاقي نفسي مخنوقة اخد بعضي واروح بورسعيد، اركب المعدية رايح جاي، واقرا الفاتحة للشهداء اللي حفروا القناة، واكتب لهم جواب وارميه في المية، واروح ازور شهداء المقاومة في المقابر وارجع.. اول لما اعمل كده الكرب يتفك

بس كنت باركب المعدية رايح جاي من غير ما انزل بورفؤاد... تقول الاسطورة ان اللي يركب المعدية رايح جاي من غير ما ينزل منها الكرب بيتفك... وانا جربتها ونفعت :)

عمري ما نزلت بورفؤاد ولا شوفتها، هي منطقة راقية، زي الزمالك في القاهرة كده، بس طبعا مش زحمة وتلوث زي الزمالك، فيها الفلل بتاعة موظفين القناة الاجانب بتوع زمان، وتخطيطها حلو

رحنا حتة اسمها نادي الاسرة عشان نقابل النشطاء الثوار هناك، معظمهم مستقلين، وفيهم ناس في حركة اسمها رابطة ثوار بورسعيد او شباب بورسعيد مش فاكرة.. المهم يعني ان دول الناس اللي زينا كده اللي بينزلوا ينضربوا ويشموا غاز، ولما ما يلاقوش ضرب في بورسعيد ينزلوا لنا ينضربوا في اي محافظة فيها ضرب

واحنا في الاجتماع جه شاب كده وقال لنا لازم تروحوا اعتصام المسلة، الاعتصام ده لبعض الشباب البورسعيدي ردا على كلام مرسي بان اهالي بورسعيد بلطجية عشان عاملين عصيان مدني.. خلينا مجموعة منا قاعدين مع الشباب، ورحت انا مع المجموعة اللي رايحة اعتصام المسلة

لما رحنا اعتصام المسلة جبنا لهم مصيبة

ما تعرفش بقى الظاهر اننا مرصودين من ساعة ما جينا، او الظاهر ان مجيتنا دي عملت قلق لبعض الاطراف اللي انا لسه ما اقدرش اجزم هم مين.. بدليل ظهور الراجل بتاع كلموا خيرت الشاطر عايزين نبني البلد ده في وسط الاعتصام الاولاني وهو بيزعق لنا ويقول لنا امشوا من هنا مش عايزينكوا.. ولما غلسنا وما مشيناش جاي ورانا يقول لنا كلموا خيرت الشاطر!

لما وصلنا عند اعتصام المسلة في بورفؤاد كان العدد قليل قوي، خيمتين بس، وشباب بعدد قليل، وكل همهم يقولوا لنا: وصلوا للناس ان احنا مش بلطجية، احنا طلبة جامعة، وولاد ناس، ومحترمين... وكلام كده من اللي يوجع القلب

بعدين واحد منهم قال لنا ان السلفيين اتصلوا بيهم وقالوا لهم انهم عايزين ينزلوا معاهم ويتضامنوا معاهم على شرط ماحدش يشتم مرسي!

فانا طبعا وداني سخنت، وسلمى فؤاد شعر راسها وقف، وقلنا لهم ينزلوا معاكوا ليه؟ الجدع لسه بيوضح لنا انه مجرد بيحكي لنا الواقعة ما ادينالوش فرصة.. وانا بقى اتفتحت كالعادة، وقلت له دي ناس ما بتعرفش ربنا، دول انا نزلت معاهم في العباسية ورجلي اتفتحت وكانوا بيتحاموا في ضهري انا ورشا عزب في الاخر الاقي نفس الوشوش اللي كانت بتتحامى فيا في العباسية نازلة شايلة شوم علينا في الاتحادية.. دول ما يعرفوش ربنا خالص.. وسلمى تقول له: هم حيتشرطوا عليكوا ولا حيربوكوا، عايزين ينزلوا ينزلوا بشروطكوا، يعني ايه ما تشتموش مرسي؟ الجدع قال لنا: والله انا عارف ده كله، بس انا باقولكوا يعني ان حتى السلفيين قلبوا عليهم.. فقلت له: دي تمثيلية عشان يحجموا الحراك بتاعكوا، يعني ايه حننزل معاكوا بس ما تشتموش مرسي؟ امال انتوا هنا ليه؟

واحنا واقفين كده اذ بينا نفاجأ ان ناس ابتدت تهل على الاعتصام اللي كان مهوي اصلا.. قلنا خير وبركة، وانا مش من عادتي اشك في الناس بطريقة: "اشكال غريبة" اللي دايما الثوار يقولوها دي.. اشكال غريبة اللي هو ازاي يعني؟ طالع لهم ديل؟

بس الظاهر اني غلط.. لان محمد موسى بقرون استشعاره ابتدا يحس فعلا ان فيه "اشكال غريبة" دخلت الاعتصام بعد دخولنا بعشر دقايق، فجه قال لي: يالا يا نوارة بسرعة من هنا... 

وانا خارجة لقيت واحد وقف في وشي وقال لي: وانت بقى يا استاذة مش عايزة ليه تقولي الجيش والشعب ايد واحدة؟

قلت له: عشان قتلوا صحابي

قال لي: يعني مين اللي حيمشي الاخوان يعني؟

فانا ومحمد موسى في نفس واحد قلنا له: والله لو الجيش نزل يمشي الاخوان احنا مش حنعترضه ولا حنمنعه.. بس انت شايف انه نزل يمشيهم؟

ولو كان عايز يمشيهم جابهم من الاصل ليه؟ والله لو نزل قتلهم يبقى عدل ربنا بعد ما قتلوا كل الناس دي.. بس لو عايز يقتلهم بجرايمهم ما كانش قتل صحابنا من غير جريمة

فجأة لقينا عدد كبير تكأكأ علينا، قام محمد موسى غامز رامي غانم عشان يمشيني، راح رامي ساحبني انا وسلمى ومروة ومعانا راجل كمان في القافلة معلش نسيت اسمه، وموسى يا عيني هو اللي اتزنق في وسطهم واستملوه

المهم يعني رحنا نتضامن مع الناس بوظنا لهم اعتصامهم ومليناه تحريات

رجلنا خضرا

رجعنا على نادي الاسرة وانا كنت خلاص ابتديت اعمل شات داون، وحاسة اننا مش بنعمل حاجة مفيدة، فقلت لهم خشوا قولوا لمحمد واكد يبطل كلام عشان نلحق نروح الدنيا ليل وفي شبورة

كل واحد يخش يفشل طبعا يسكت واكد D: لحد ما قلت ما بدهاش بقى، حاخش امارس سلطاتي واسكته عشان نمشي

وبالفعل ما يجيبها الا نوسة، ماحدش عرف يسكته غيري

وركبنا الميكروباص عشان نمشي، واحنا ماشيين عدينا على الاعتصام اللي خربناه ده، لقينا اللي كان فيه خمسة بالعدد بقى فيه حوالي الف واحد بالتزامن مع خبر قراهولنا رامي بدعوات لتوكيل القوات المسلحة لادارة شئون البلاد

تاني يوم عرفنا ان السيسي رفض التوكيلات دي :)

رميت الورد طفيت الشمع يا سيسي

ناس غلبانة قوي.. يعني طنطاوي قعد سنة ونص يجهد فينا بمدابح شهرية عشان يعبد الطريق للاخوان ويسلمهم البلد وبعدها يجيب لهم السيسي وفوقيه بوسة وياخد القلادة عشان في الاخر الجيش يقلب على الاخوان؟ طب كان ليه من الاول عمل كده؟

وقال على رأي واحد على التويتر "مش اخوان بس بيحترمهم" قال: بقى الجيش حينزل يضرب اللي وقفوا معاه بعد الثورة عشان ينقذ اللي كانوا بيسبوا له من القتل؟

اخيرا للاخوة اللي قاعدين مستنيين السيسي اللي راح يجيب ورقة بوستة وجاي: اللي عايز يعمل حاجة بيعملها ما بيشتناش توكيلات، بقى كل القتل ده ما يحركهمش واللي يحركهم توكيلات ووقفة عند المنصة الجمعة دي؟ ايه الغلب اللي انتوا فيه ده؟ انتوا عمالين تبعتوا جوابات لواحدة بتحبوها على العنوان اللي غيرته بعد ما اتجوزت واحد غيركوا

ومن وجهة نظري المتواضعة، التوكيلات دي اتعملت مخصوص عشان تزود من عزل بورسعيد، وتخلي ناس كتير ما تضامنش معاها، يعني انا ما رحتش الشهر العقاري، بس مراسل اون تي في قال انه راح الصبح يشوف العدد اللي رايح يعمل توكيلات لقاهم ما يزيدوش عن 50 نفر، ومع ذلك المستشار قفل الشهر العقاري عشان الخبر يسمع ويتنشر في الجرايد، وكل ده بهدف تحويل مطلب العصيان المدني من حق الشهداء الى المطالبة بنزول الجيش اللي مش كل الناس موافقة عليه، زي ما اتحول مطلب اولتراس اهلاوي من حق الشهداء الى عقوبة بورسعيد اللي برضه مش كل الناس موافقة عليه

انا باعامل ضميري... ومش طالبة غير رضا ربنا ولو على سخط الناس

والله الموفق والمستعان

الاخوان والسلفيين بيستعدوا لحرب اهلية

وما عندهمش اي مانع انهم يعملوا حرب اهلية، بالعكس ده جزء من خطتهم للسيطرة على مقاليد الحكم لاسباب عديدة، أولا: الناس دي ما عندهاش مفهوم الوطن اللي عندنا، هم عندهم الدنيا فسطاطين، فسطاط كفر وفسطاط ايمان، مافيش حاجة اسمها وطن، فعادي جدا ان ضميرهم يرتاح للحرب الاهلية من غير ما يرمشوا ولا يحسوا باي حرج ولا تأنيب ضمير، ده اذا كان عندهم ضمير اصلا. ثانيا: الناس دي عايشة في كتب التاريخ، وما عندهاش تصور الدولة في دماغها، دول بيتكلموا بديوان المظالم، وناقص يسموا وزير الداخلية كبير البصاصين، شكل الدولة الحديثة مش متبلور في دماغهم. ثالثا: الناس دول ولاءاتهم ايديولوجية، واظن خير دليل على ده موضوع الاندونيسي المسلم اللي يحكم مصر احسن من المسيحي المصري، وطظ في مصر، وكل الهراء اللي بيقولوه عادة. رابعا: بصوا على تواجد التيار الاسلامي في اي مكان الدولة تبقى فيه في حالة سيولة، زي افغانستان او العراق او حتى سوريا... اول حاجة تيجي على بالهم يشيلوا سلاح على اعداء الله اللي هم الشعب العادي ده

فهم الناس دول مش مصريين، حتى دمهم تقيل، هو فيه مصري دمه تقيل؟ طب دمك تقيل ليه يابني؟ انت ابن حرام؟ 

طيب.. هم دلوقت جات لهم صرعة احكام الهيمنة على مصر وفيها لاخفيها، وعاملين الاعلان الديكتاتوري ده، وطبخوا الدستور وخلصوه، وناويين ينزلوا لنا يوم السبت الجاي عشان يبتدوا الحرب الاهلية اللي هي في خطتهم، وبالمناسبة مش اول مرة يشيروا الى الحرب الاهلية، ايام محمد محمود بعتوا لنا رسالة اننا لو اصرينا على مجلس رئاسي مدني فهم مستعدين للحرب الاهلية

احنا حنعمل ايه؟

كان فيه عدة اقتراحات من الناس اللي عايزة تحقن الدماء بان الحركات السياسية تعلن نزولها يوم الجمعة ثم انسحابها من الميدان قبل ما هم ييجوا لتجنب الصدام وقالوا لنا: ام الطفل هي اللي ما ترضاش ابنها يتقسم نصين بالسكين

طيب.. الكلام ده نظريا جميل وما عنديش مانع منه بس هو مش عملي للاسباب الاتية:

اولا: اللي في الميدان دول مش خرفان، دول كل واحد فيهم رئيس جمهورية نفسه، يعني الحركات السياسية تعلن زي ما تعلن براحتها، تشوف مين حيمشي وراها، ماحدش بيسمع كلام حد في الميدان ما انتوا عارفين، والناس حتفضل في الميدان، واعلان القوى السياسية الانسحاب من الميدان حقنا للدماء مش حيعمل اكتر من اراقة بحور من الدماء مالهاش دية ومالهاش اي غطاء سياسي، الناس دي حتقعد وحتتعجن جوة الميدان وحيموتوا بلاش.. يبقى القوى السياسية دي ما عملتش حاجة غير انها بررت قتلهم لو انسحبت

ثانيا: اللي حيفضلوا في الميدان عندهم حق، لانهم لو روحوا حيتاخدوا من البيوت.. التيار الاسلامي في حالة هياج وانزعاج واحساس بإن الارض بتميد بيه، وهم ما صدقوا مسكوا في السلطة كلب ولقى عضمة، ولو المعتصمين سابوا الميدان ومشيوا مافيش واحد فيهم حيبات في بيته ليلتها.. والاخوان والسلفيين مستعدين يقبضوا على خمسين الف في ليلة واحدة ولا يهمهم، اذا كانوا ما عندهمش مانع من حرب اهلية، حيخافوا يقبضوا على الشعب كله؟ فإذا المرواح فيه خطورة كبيرة على المعتصمين، ووجودهم في الميدان اكثر امنا ليهم، ومافيش وسيلة لزيادة تأمينهم جوة الميدان غير ان عدد المعتصمين يزيد بحيث ان اللي جايين يجروا شكل ويعملوا حرب اهلية ما يعرفوش يخشوا الميدان

دلوقت احنا قدامنا كام حاجة لازم تتعمل عشان نأمن نفسنا، ونأمن البلد

السلفيين ناويين ييجوا يعملوا مدبحة في الميدان، وقالوا كده علنا، شيخ سلفي قال سنلقي في قلوبهم الرعب.. واصلا مجرد توجههم للميدان يوم السبت وهم عارفين ان فيه ناس معتصمة ده لوحده جر شكل وتفجير لحرب اهلية

طبعا اللي في الميدان رجالة ومش حيسيبوه وهم قد المواجهات، بس الخوف من تفاقهم المواجهات حاجة اساسية، ان الدم لو زاد قوي في الميدان ده حيخلي الجيش ينزل ويعلن حظر تجول ويفضي الميدان من كل الناس وياخد السلطة الى الابد وسط ترحيب عارم من حزب الكنبة اللي نزل اول مرة الميدان والفلول طبعا، ويمكن بعض الثوار يغريهم نزول الجيش لانه اول ما ينزل حينكل بالاسلاميين، الجيش خلاص عرف اننا طاهرين ومتوضيين ومالناش اطماع في السلطة، احنا شوية عيال بتنزل تشمشم على الموت وتشوفه هو فين وتجري عليه.. اللي طمعان في السلطة فعلا هم الاسلاميين، ولو الاسلاميين حيقودوا البلد لحرب اهلية الجيش مش حيسمح لهم يعملوا ده وحيقمعهم قمع التنين، وبسبب الغل اللي مالي قلوبنا كلنا من الخونة دول ممكن بعض ناس من الثوار يقولوا ايوه هم حياقهم الجيش مالهمش غيره يعلقهم على المشانق اللي يستاهلوها.. وبالطريقة دي الجيش بلع البلد وبقت الجزائر.. وسوف نندم حين لا ينفع الندم

الاسلاميين عارفين كده؟ 

طبعا لا.. دول بهايم دول هم دول بيفهموا؟ واللي فيهم بيفهم، بيشتغل مع امن الدولة، زي كتير من رموز السلفيين

طيب احنا في ايدنا ايه نعمله؟

اللي في ايدنا نعمله اننا ما نروحش خالص... ننزل بكثافة كبيرة يوم الجمعة، ونحشد للنزول، بحيث الميدان يبقى مافيهوش موطئ قدم، واللي موجود ما يروحش، يبات في الميدان ليوم السبت، بحيث الميدان يبقى مليان بطريقة ما تمكنهمش من الدخول للصدام اللي هم جايين عشانه

دي اول حاجة

تاني حاجة: المعركة الدايرة في سيمون بوليفار دي لازم تتوقف فورا.. الداخلية طبعا مش عايزة توقفها، ويبدو ان الداخلية عندها معلومات ان السلفيين نازلين يعملوها مدبحة وعشان كده بتنهك الثوار وبتفتح ثغرة في ضهرهم، بحيث السلفيين يبقوا من امامهم والداخلية من ضهرهم وتسيل بحور دم.. يبقى مدام الداخلية مش عايزة توقف ضرب، احنا نبني متاريس عند شارع سيمون بوليفار بحيث نسد الجبهة دي خالص ونرتاح اليومين دول عشان نقدر نواصل جمعة وسبت

تالت حاجة: نحط متاريس كبيرة على كل المداخل 

رابع حاجة: نقدم بلاغ في مرسي وجماعته، وحزب النور اللي بيحشد ليوم السبت ونتهمهم بمحاولة اشعال حرب اهلية، حتقولوا لي نقدم بلاغ عند النائب العام بتاع مرسي؟ ايوه.. هو حياخد البلاغ يحطه في الدرج، بس ان شاء الله لما يمشي هو والجماعة، وبالمناسبة هم حيمشوا اسرع مما تتخيلوا ان شاء الله، ومرسي ده نهايته قربت قوي.. خلي خيرت الشاطر اللي هو ماشي دلدول وراه ينفعه، يبقى يتحقق معاهم كلهم لان البلاغ حيبقى موجود وحنبقى مقدمينه قبل ما تحصل اي حاجة.. وفي البلاغ ده نحمل مرسي ونادر بكار مسئولية اي خسائر في الارواح تنتج عن مواجهات بين المتظاهرين

خامس حاجة: من دلوقت نطهر الميدان من عناصر الاخوان اللي مندسة في وسط الميدان، انا مستغربة جدا منكوا انهم لما بييجوا ويقعدوا يفتحوا مناقشات بتقعدوا تتناقشوا معاهم.. انتوا لسه عشمانين فيهم يفهموا حاجة؟ دول خرفاااااااااااااان.. خرفان وخونة للبلد، وما يعرفوش ربنا.. ما يعرفوهوش خالص، ولا سمعوا عنه، يعرفوا المرشد بس، هو ده ربهم.. اي اخواني يتقفش مدسوس وبيفتح نقاش يعمل فتنة يترن علقة وينطرد برة الميدان

سادس حاجة: اللي يمسك البوابات ناس معروفة ويبقى تحت ايدهم ناس عارفينهم.. مش اي حد يتطوع يأمن البوابات

سابع حاجة: الدخول والخروج لحد يوم الجمعة، بداية من ليلة السبت مافيش دخول ولا خروج

واخيرا... احنا لو خرجنا من الميدان ده مش حنرجعه تاني.. نتقابل على المشنقة بقى

احنا شغلتنا نحمي بلدنا.. ده اختيارنا في الحياة ولازم نلتزم بيه، وهي غلبانة ومالهاش حد غيرنا 

قائمة احتياجات مستشفى دار الشفاء في غزة

أنا رجعت من غزة عندي دور برد جامد قوي.. بس نزلت شوية محمد محمود امبارح، وباحاول اخد ادوية عشان اتحسن وننزل هناك تاني

قبل ما احكي عن اللي حصل وقبل ما اعلق على اللي بيحصل لازم اكتب لكم قائمة احتياجات مستشفى دار الشفاء لانها كتير، كمان انا مش راضية عن نفسي برغم ترحاب الناس هناك، ده من كرمهم وحسن ضيافتهم مع نكبتهم، بس انا مش راضية عن نفسي، هم مش قرود في جبلاية وانا رايحة اتفرج عليهم وهم بيعملوا ميتين.. احنا لازم نمرر سلاح للناس دي والا نبقى بلد وسخة بكل معاني الكلمة

دلوقت خدوا قائمة الاحتياجات:

- عدد 2 أجهزة مينتور philips

- عدد 1 جهاز Fibro optic bronchoscopy

- عدد 6 أجهزة تنفس صناعي عناية مركزة Dragar sabina 

- عدد 10 جهاز تنظيم محلول (سيرينج) Syringe pump

- عدد 10 جهاز محلول Infusion pump

- عدد 8 أسررة عناية مركزة جديدة بدل القديمة

- عدد 50 Arterial line set مستهلك + Cable for Philips monitor 5

- عدد 5 Arterial line pressure cuff مستهلك

- عدد 100 arterial line catheter 

- عدد 100 pediatric corrigulated tube

- عدد 50 PICC peripheral inserted catheter

- عدد 6 Air mattress

- عدد 10 swangan catheter (complete set)

- عدد 20 dextran 50

- dilatational percuteneous toacheostomy kits

- arterial canullae

- toxogoanin

- meropenem 

- electrolytes and blood gases machines

مطلوب ايضا

أطباء للقسم يتناسب مع العمل والطوارئ

تكملة أثاث القسم

أدوية غير موجودة مثل

obdixime Toxoginin and albumin

هم كمان محتاجين أجهزة للتبرع بالصفائح لانهم بيفصلوا الصفايح بشكل بدائي جدا بعد ما تتبرع بالدم

رجاء النشر على أوسع نطاق

ملحوظة:

في اخر اربع حاجات في الليستة الدكتور كان كاتبهم بايده وخط ايده مش واضح قوي فلو دكتور شاف اني غلطت في حاجة ياريت يكتب لي تعليق وانا اصلحها

قل لا لدستور ام ترتر

انا مش فاهمة الناس اللي قررت تقاطع ده بناء على ايه؟ كده احنا حنلبس في دستور ام ترتر

فيه ناس بتقول لان اللجنة اصلا باطلة

بس لو اللجنة اصلا باطلة المقاطعة حتعمل ايه؟ وفيه ناس مش عايزة تصوت بلا عشان السلفيين حيصوتوا بلا ومش عايزين يخشوا في القرف بتاع المنافسة بين الاخوان والسلفيين: لو قلت لا حتخش الجنة.. لا وربنا ده لو قلت نعم حتخش الجنة

على فكرة انا شايفة ان دي حاجة كويسة وفي صالح ان الناس تبتدي تفكر بقى وتاخد بالها ان الجنة والنار عاملينها على هواهم ومصالحهم ولما مصالحهم اتعارضت كل واحد عمل لنفسه جنة ونار بتوعه زي يوم جمعة قندهار لما كل واحد فيهم عمل جماعة لوحده

السلفيين حيقولوا لا على الدستور عشان مش فاشيست بالقدر اللي هم عايزينه

بس ده مش معناه اننا نقاطع.. احنا مش لازم نلبس في الدستور ده ابدا.. الدستور ده عيب وحرام ويتهز له سبع سموات

حتى اقروا المسودة اهي 

وانا ناوية ان شاء الله استلمهم عشان يبطلوا يربونا

جماعة الاخوان المسلمين كل يوم بتثبت انها جماعة اسسها مدرس ابتدائي.. كل الدستور عبارة عن تربية وتنشئة وتقاليد مصرية اصيلة.. ايه يا خالتي؟ ناقص يحطوا مادة في الدستور: الست ما تسيبش بيت جوزها.. متخانق مع مراتك انت تنزل تشوف لك حتة تبات فيها لكن هي ما تخرجش برة بيتها..

- يحظر الدستور ان يلعب الطفل في مراخيره حظرا تاما

والبيان الختامي للدستور:

الجماعة جاية تربينا انتوا فاهمين غلط.. مافيش حد بيربي شعب.. خصوصا الشعب المصري، ده احنا نربي اللي جابوكوا ونتوبكوا

مامة محمد وديع تدخل يومها العشرين في الاضراب/ ياسر رزق

دلوقت مامة محمد وديع مضربة عن الطعام قدام ديوان عام المحافظة بقالها عشرين يوم، ومعاها ناس متضامنين منهم اتنين راحوا المستشفى، والله العظيم لولا عندي ظرف صحي ما يسمحليش ابدا اني اضرب عن الطعام والله كنت رحت اضربت معاهم

اشمعنى محمد مش بيخرج يعني؟

ده الخبر ودول اسامي الناس المضربة.. احنا عايزين نروح لهم كل يوم حتى نشوفهم احوالهم ايه ونتابعهم، ولو ينفع اللي صحته تستحمل يضرب معاهم يزود عدد المضربين.. الست كده مش حينفع تكمل هي مش صغيرة عشان تقعد ده كله مضربة

-------

دلوقت ايه الطراش اللي ياسر رزق كاتبه ده؟ وما ادراك اذا غضب الجيش.. خاف يا عيد.. يامي يامي يامي

ومرسي بيقول انا بحبهم وهم بيحبوني وعلى اتصال دائم

وطبعا زي ما احنا عارفين الاخوان احرص ناس على المتاجرة بدم الشهدا، ما افتكروش دم الشهدا الا لما حبوا يقيلوا النائب العام عشان بينهم وبينه مشاكل... فين دم الشهيد مع طنطاوي وعنان السفاحين؟

قال وما ادراك اذا غضب الجيش.. على نفسه يا حاج.. على نفسه يا بابا ابو مدرعة مرتبكة.. ينزل لنا تاني ونوريه مقامه؟ ما يعمل سبع في سينا اللي عمال ياكل فيها على قفاه شوية من الارهابيين وشوية من اسرائيل

اعمل راجل ع الصينية وعالحدود اعمل ولية

حسبي الله ونعم الوكيل فيك يا شعب

الا كل ما امشي في حتة ياخويا الناس توقفني وتقولي: والاخوان بقى حيقعدوا على كده؟ طب وانت عاجبك اللي بيحصل؟ خلاص؟ سلمتوا البلد للاخوان وارتاحتوا؟

تقولش ياخويا انا اللي انتخبت الاخوان؟ المصيبة لما تاخد وتدي معاهم في الكلام شوية تكتشف انهم انتخبوا الاخوان في البرلمان.. 

طب بيسألوني انا الاخوان حيقعدوا ولا يمشوا ليه؟ يشهد ربنا عمري ما خطت يميني.. يميني ايه؟ انا باكتب بالشمال، عمري ما خطت شمالي علامة صح قدام اخواني لا في برلمان ولا شورى ولا رئاسة ولما وصلتوا الاعادة بين الفلول والاخوان يا شعب قاطعت.. حيقعدوا لو انتوا عايزينهم يقعدوا، وحيمشوا لو انتوا عايزينهم يمشوا انتوا بتزعقوا لنا احنا ليه؟

احنا ما سلمناش البلد للاخوان... نعلن نحن المجموعة اللي قلتوا عليها خربت البلد اننا نزلنا نتبهدل عشان نسلمكوا انتوا صندوق الانتخابات تختاروا اللي انتوا عايزينه، سميتونا بلطجية، وقلتوا لنا خربتوا البلد، وانتخبتوا الاخوان، وشتمتونا عشان بتقولوا علينا:"خرجتوا الاخوان من السجن".. متشكرين يا ولاد الاصول
ده انتوا شعب لاسع فعلا
المجموعة اللي خربت البلد اللي فضلتوا طول سنتين تقولوا: مش هم دول الشباب الطاهر اللي نزلوا يوم 25.. مع ان الشباب الطاهر اللي نزلوا يوم 25 واللي ما كانوش اخوان ولا منتمين لاي تيارات سياسية.. هم هم نفسهم الشباب النجس اللي نزل في كل المواجهات واللي دلوقت نكش شعره وكشف راسه ودعا عليكوا
عارفين الشوية اللي نزلت يوم 25.. اللي هم بتوع خمسين الف دول؟ هم دول اللي بينزلوا كل ما يحصل دب

الى الحقوقيين والمحامين واخوة المرمطة والاعتصامات.. رجاء اتخاذ الاجراء اللازم

انا مش عارفة ايه حكايتهم دول غير لما قريت الخبر في اليوم السابع

دول خمس عمال تم نقلهم في السكة الحديد لانهم شاركوا في اضراب ولما الادارة طلبت خمسة يتكلموا باسم المضربين اختاروا الخمسة دول فالشرطة كتبت اساميهم وبعدين تم نقلهم

الخبر من اليوم السابع

دي اسماء العمال اللي تم نقلهم:

علاء نظير عبد الرحمن، وعلى أبو شباك محمد أحمد، وعبد الرحمن مصطفى، ومحمود جمال حسن، وأسامة محمد أحمد.
عايزين نعرف مين بيتصل بيهم، ولو مافيش حد بيتصل بيهم يتصل
ونتضامن معاهم عشان ياخدوا حقوقهم ويرجعوا اماكنهم تاني
من غير كلام كتير يعني كل واحد فينا عارف حيعمل ايه..
وشكرا

الرئيس المؤمن حيكفر الشعب

يا اخ يا رئيس يا مؤمن.. لو حتخرج تصلي كده يبقى صلي في بيتكوا وثوابك حيبقى اكبر ان شاء الله وفي رقبتي انا شخصيا.. يوم القيامة حاقول انا اللي شورت عليه الشورة دي.. فليسعك بيتك مدام كل ما حتخرج حتعمل لنا دبكة وعطلة وترهبنا بالامن المركزي كأنك نازل تحرر فلسطين واحنا الاسرائيليين 

صلي في البيت صلي في البيت صلي في البيت وفي رقبتي انا قدام ربنا

ولا حتى ما تصليش خالص

حتعمل ايه بالصلاة لما اسعاف تتعطل ويموت فيها مريض زي ما حصل ما مبارك قبل كده؟ 

حتعمل ايه بالصلاة لما تلقي الرعب في قلوب المصلين بجيش الامن المركزي اللي انت نازل بيه ده؟ انت ما تعرفش ان شكلهم لوحده ممكن يروع الناس ومن روع مؤمنا روعه الله يوم القيامة؟

حتعمل ايه بالصلاة لما انت تنزل تصلي بالهلولة دي وعشان حضرتك بتصلي واحد تاني مواطن مسكين، مالوش الا ربنا فعلا، لا له جماعة ولا رئاسة ولا امن مركزي، ونازل يصلي عشان عايز يقابل ربنا فعلا مش عايز يستعرض قدامنا انه بيصلي، تروح عليه الصلاة في الجامع ويضطر يصليها في بيتهم ولا في الطريق ولا ما يعرفش يروح ولا يرجع وتروح عليه خالص؟

يا عم اعمل جامع في جنينة القصر الجمهوري وخد الحرس يصلوا معاك على الضيق كده بدل البوليكة اللي بتعملها على كل فرض، ولما تبقى تسافر المحافظات زي كده ابقى صلي في استراحة الرئاسة وجماعة انشالله بمراتك وعيالك الاتنين اللي بيتخانقوا مع ظباط الشرطة ويضربوهم عشان بيسألوهم عن البطاقة، حتخلونا نتعاطف مع الشرطة كمان؟ هو ايه ياختي ده؟ احنا عمرنا ما مر علينا رئيس كل ما يتوضى يبقى خبر عاجل كل ما يصلي يبقى مانشيت... شكرا عرفنا انك مؤمن.. ما تبسطهاش اكتر من كده

مبارك كانت كل الناس بتدعي عليه.. بس اكتر دعوات كان بياخدها بسبب التشريفات ولما واحد مات في الاسعاف بسببه سواق تاكسي قالي: الراجل ده مش حيكمل السنة دي.. ربنا ما يرضاش بكده.. وفعلا.. صدق سواق التاكسي

يا حاج مرسي: وسكنتم في مساكن الذين ظلموا أنفسهم وتبين لكم كيف فعلنا بهم وضربنا لكم الأمثال، وقد مكروا مكرهم، وعند الله مكرهم، وإن كان مكرهم لتزول منه الجبال

الله الله الله.. حلوووووووووووووةةةة.. حلوة قوي، بتخش في النخاشيش بتاعة الجلد كده.. هو فيه نخاشيش في الجلد؟ ما اعرفش.. بس هي بتخش وتتشرب كده كأنك داهن فيكس او ابو فاس.. بتعمل حاجات الاية دي

فأنت يا حاج مرسي مكرك انت والجماعة مكر خايب ونايب وفاشل مش زي مكر مبارك، يعني لا تزول منه الجبال ولا حتى الناموسة.. خليك ماشي بستر الله بلاش تتغر

اتق ربنا أمرسي.. اتق ربنا.. انت خارج تصلي ولا ترازي الناس وتخليهم يدعوا عليك.. ما هو الناس يا اما حيدعوا عليك يا اما حيكفروا

انا لحد دلوقت اعرف 5 بنات قلعوا الحجاب بس بسبب الاخوان والسلفيين.. حتقابلوا ربنا بالناس دي ازاي؟ والبنات مش عايزين يتحنتفوا ولا حاجة، ده واحدة منهم تقريبا ما بتتسرحش ولامة شعرها كحكة.. بس مش عايزة تبقى شبهكوا في حاجة

ما هو يا تحلوا عن الاسلام يا تحلوا عنا... ويا ريت تحلوا عن الاتنين نبقى شاكرين جدا

ملخص امبارح/ بالنوسبة لسوريا

اليوم امبارح كان يوم كويس، طبعا ما قعدتش كتير عشان مافيش دب، الامور كانت مستقرة، الاعداد كانت كويسة قوي بما يوصل رسالة للاخوان انهم مش مسيطرين على البلد ولا حاجة، ولو ان حصل حاجات كتير والله العظيم طول السنتين اللي فاتوا يقولوا ان الاخوان مش مسيطرين على البلد، يرتبكوا شوية لما يتفاجئوا بالحقيقة، وبعدين يرجعوا تاني ينسوا نفسهم نقوم نرجع نلبهم وهكذا

العدد كان حيبقى اكبر لو كان فيه دب 

D:

تداعيات اليوم حتبقى ايه مش عارفة لسه، بس عموما الاخوان قعدوا يوزعوا بطاطين ووجبات ولحمة في المحافظات والاحياء الشعبية.. مش فاهمة ده ايه علاقته بالموضوع.. يمكن بيعملوا زي الست لما تبقى متغاظة تقوم على البيت تغسل الحيطان وتنكت الشقة؟ 

سيبكوا مش ده المهم

المهم دلوقت اني باقرا تقرير، هو مش جديد، من شهر اغسطس، وارجو منكوا ان يكون عندكوا الصبر تقعدوا تقروه

هو هنا

عن اللي بيحصل في سوريا

انا عرفت موضوع البنات السوريات اللي بيتقال عليهم انهم بيتباعوا والكلام ده

دلوقت اللي بيحصل ان كل الاطراف بتلعب في سوريا، غير ان الوضع كده مش حيلخص ابدا، التقرير بيقول ان النظام السوري تحول الى قلب صلب وميليشيا... وبناء عليه، مافيش مليشيا بتقع، يعني حيفضل كده الوضع ان الناس بتموت في بعض

كمان المعارضة السورية منقسمة، فيه اللي اصلا ضد التسليح وان كان شايف ان اللي اتسلحوا كانوا مضطرين، وفيه من جوه المسلحين منقسمين على بعض، وبيساعد على الانقسام ده الاطراف اللي بتلعب من الخارج خصوصا دول الخليج، ولو تشوف فتاوى مشايخ الخليج تعرف ان استمرار الوضع على ما هو عليه في مصلحتهم، بيقعدوا يقولوا للمقاتلين في سوريا مش اي حد يشيل سلاح ضد بشار يبقى معاكوا، ولازم يكون لوجه الله ولنصرة اهل السنة وكلام كده، فهم بيتعمدوا انهم يفرقوا الصف زيادة ماهو متفرق، وخناقة علماني واسلامي ابتدت بدري قوي في سوريا غير ان اصلا فيه خناقة مسلم ومسيحي وسني وشيعي 

فالوضع كالتالي: اولا النظام السوري تحول الى ميليشيا باليات دولة وهي اليات اقوى من اليات الثوار الفردية، ثانيا النظام السوري متماسك لانه بيدافع عن بقائه، بينما المعارضة مشتتة، بيتخانقوا على حاجات مش وقتها خالص زي الايديولوجية ونظم الحكم، وامكانياتهم اقل من النظام السوري... لكن ده مش معناه ان بشار حيعرف يقضي عليهم وترجع الامور كما كانت

ولا هم بصراحة كده حيعرفوا يقضوا على بشار

الموضوع كده ان كل واحد صباعه تحت ضرس التاني، وممكن يفضلوا يموتوا في بعض كده الى الابد لحد ما تحصل حاجة من برة توقفهم.. القيامة تقوم بقى، المسيح ينزل، اي حاجة.. الحرب الدائرة دي، ووفقا للتقرير القائم مش حتنتهي

لو المشكلة مع بشار يبقى ممكن تنتهي، لكن المشكلة ان بشار ده عامل زي ما يكون ابليس متجسد فعلا

عارفين ابليس لما خرج من الجنة فقرر يورط البني ادمين معاه بمنطق: لا انا مش داخل النار لوحدي على فكرة.. اهو بشار كده لانه ورط معاه طوائف من المجتمع سواء علويين او شيعة او مسيحيين او دروز واجبرهم على ممارسات تخلي يبقى فيه تار عليهم، والعكس صحيح، المعارضة جزء كبير منها، مش كلها، وباكرر مش كلها، طائفي جدا، ومن اول لحظة، من قبل ما يبتدوا يشيلوا سلاح، وهم بيتكلموا عن السنة والشيعة والكلام ده.. انا متفهمة المشاعر الطائفية المتبادلة في سوريا، من ناحية السنة هم مشحونين انهم يبقوا هم الاغلبية والاقلية هي اللي بتحكمهم وكمان بتذلهم، والعلويين زمان كانوا درجة عاشرة فالسنة حاسين ان خدامة بكيزة بتتحكم فيهم وان هم بكيزة وازاي يعني دول يتحكموا فينا ويموتونا كمان، من ناحية العلويين، هم لهم تاريخ طويل في الاضطاد والسنة بهدلوهم صراحة زمان، فجواهم احساس ان: انتوا ما ينفعش تتحكموا على حد تاني انتوا لما بتقدروا ما بتعفوش.. بس التفهم الانساني لمشاعر الاطراف حاجة والتعامل مع النتائج المتسببة فيها المشاعر دي حاجة تانية، ينفع تنجح تسقط فرد، نظام، حزب، لكن ما ينفعش تعادي طائفة وتنجح ابدا.. العلويين لهم تاريخ طويل من الاضطهاد في بلاد الشام، وكما يقول الشاعر في قصيدة بنت كرم: يا وليهم من شر مظلوم حكم.. مافيش حد بيتعرض لاضطهاد لفترات طويلة ولما يتمكن يرحم ابدا.. كل اللي اتعمل فيه بيعمله في الناس، وعليه، فالطائفة العلوية مش ممكن تحت اي بند من البنود انها ترجع لكابوس الاضطهاد السابق المحمل كمان بالتار اللي جد عليها دلوقت.. دلوقت كل طرف في المجتمع بقى عليه تار، وبناء عليه مش ممكن يسيب السلاح من ايده ابدا

مين المسئول عن ده كله، بشار طبعا، امال امي، شيطان شيطان يعني، ومن اول لحظة وهو حاسبها انه "انا مش حاقع لوحدي" وعشان كده ورط مثلا الدروز والمسيحيين في الموضوع، الاكتر من كده انه ورط سنة ما كانوش ناويين يتورطوا، يعني فيه ناس من الطائفة السنية ما كانش ليها في الطور ولا الطحين وما كانتش ناوية تضم على الثوار بس لما الجيش بتاعه ارتكب جرائم طائفية بحق اهلهم وذويهم بقى كل اللي له اب ولا ابن ولا اخ اتقتل على ايد جيش بشار عشان سني يشيل سلاح عشان ينتقم للي له

فيه حاجة كمان مهمة جدا 

الموضوع مش كله طائفي، فيه ناس فعلا خايفة من فكرة ان امريكا واسرائيل والسعودية بيدعموا الثورة السورية وشايفين انها مش ثورة وطنية وبتهدد المقاومة، وناس كويسة 

يعني مثلا انا ليا صديقتين من سوريا، والاتنين انا عارفاهم كويس قوي، ولا فيهم واحدة عميلة، ولا خاينة، ولا فاشيست، ولا جاهلة، ولا بتدي ودنها للاعلام ولا اي حاجة من دي

واحدة شيعية اثنى عشرية، والتانية سنية

السنية بتحب بشار ومساندة له، مع انها سنة متدينة ويمكن حد يقول عليها متشددة، لانها مثلا ما بترضاش تصلي جماعة ورا امام مش سني، بس هي شايفة ان بشار بيواجه مؤامرة امريكية اسرائيلية عشان هو من حزب الممانعة، ولما تطول معاها في المناقشة تقولك اديني تفسير واحد يخلي السعودية تدعم "المتمردين" في سوريا.. مسمياهم المتمردين، ووجهة نظرها ان السعودية ضد كلمة ثورة من باب وتلت.. ايه اللي يخليها تدعم المعارضة السورية ومعروف ان السعودية مخلب امريكا واسرائيل في العالم الاسلامي

الشيعية مع الثورة جدا ومساندة لها ومنهارة وزعلانة قوي من حسن نصر الله وقعدت تقولي اخر حاجة كنت اتوقعها ان السيد حسن اللي كنت باحبه وباحترمه يقف جنب سفاح بيقتل الناس ويقول اصله ساعدني.. احنا اللي ساعدناه، احنا اللي استقبلنا اللاجئين اللبنانيين واحنا اللي اتبرعنا للمقاومة واحنا اللي لولا موقفنا الداعم له كان بشار شاف له سكة مع امريكا واسرائيل.. هو بشار ايه اللي بيخليه يدعم المقاومة الا عشان يكتسب شرعية وسط الشارع؟ المفروض كان يثق فينا اكتر من كده

المفارقة بقى ان السنية ممكن جدا ميليشيات بشار تقتلها على الهوية.. والشيعية ممكن جدا بعض من ميليشيات المعارضة تقتلها على الهوية.. لان الوضع اتحول لطائفي فظيع

الخلاصة من اللت ده كله

احنا كمصر يعني ايه موقفنا غير ان رجالتنا بيريلوا على السوريات وما صدقوا يجولنا لاجئات عشان يتجوزوهم على مراتاتهم؟ 

اهم حاجة دلوقت ان القتل يتوقف.. والقتل مش حيتوقف طول ما كل الاطراف دلوقت مش حاسة بالامان وحاسة ان الطرف التاني لو هي سابت السلاح حينتقم منها على اللي عملته.. ويفضل كل طرف فيهم عامل زي ماكبث كده كل ما يحاول يهرب من جريمته اللي فاتت يرتكب جريمة جديدة

في المعارضة السورية جزء مدني مهتم بتحقيق اهداف الثورة فعلا ما اتحولش اهتمام للانتقام لاهله وذويه

المفروض مصر بدل ما تقعد تبعت في جوابات لبيريز وتعدي سفن القتل من قناة السويس تعمل وساطة بمساندة الجزء المدني ده المعارض في سوريا باي وسيلة كانت عشان توقف القتل من الجانبين.. انشالله تروح قوات عربية لحفظ السلام وبعدين يدوا ضمانات للطوائف على بعضها بحيث ماحدش فيهم ينتقم من التاني ويبقى الوضع لا غالب ولا مغلوب زي لبنان كده

واظن ان الطوائف العلوية والدرزية والمسيحية لو لقوا ضمانات كويسة ما يتقتلوش ولا يرجعوا لايام الاضطهاد القديمة حيبيعوا بشار، ولو بشار مش متأكد من انهم مستعدين يبيعوه ما كانش اجبر عناصر منهم انها ترتكب جرائم وهي بتعلن عن انتمائها الطائفي عشان تتسجل على طايفتهم ويبقوا في مرمى الانتقام

انا مش فاهمة مصر ليه ما تعملش اجتماع لكل القوى المتصارعة في سوريا هنا في القاهرة وتحل المشكلة دي؟ يعني احنا مبسوطين باستمرار القتل ده؟ طب احنا مستفيدين ايه؟ بالعكس، المصريين، دونا عن كل الشعوب اللي في العالم، متضررين جدا من اللي بيحصل في سوريا وحنتضرر اكتر لو لا قدر الله الوضع تفاقم كمان عن كده ووصل لابعاد مش عايزة اقولها من كتر ما هي كابوسية

الخليج مستفيدين امريكا مستفيدة ايران مستفيدة وكله اكل عيشهم.. احنا بالنسبة لنا ده خراب بيتنا ان الوضع في سوريا يستمر كده

هم عداهم العيب انهم بيسعوا على مصلحتهم حتى لو على دم السوريين.. احنا فين مش بندور على مصلحتنا ليه؟ 

احبك.. مواه.. اعبدك.. مواه.. اموت في هواك

قالك ده جواب بروتوكولي عادي...

هو من البروتوكول انكوا تخدشوا حياءنا كده..

السيد بيريز وصديقه الوفي

Have a room

وقال على رأي المثل: عالقدس.. رايحين.. نبوس الاسرائيليين

واذكر فيما اذكر ايام الحرب على غزة، الاخوان اعلنوا عن وقفة احتجازية في مسجد الفتح، قمنا رحنا احنا طبعا عشان نوحد الصف وكدهون يعني، انتوا عارفين يعني، الناس الكفار دول بتوع الاشتراكيين الثوريين وستة ابريل والاناركيين بتوع بي فور بانديتا، ومن سماحة الاسلام ان الاخوان رضيوا يدخلوا ناس كفار زينا كده الجامع

وطبعا كلنا عارفين ان مبارك كان قافل المعبر.. فهتفنا: يسقط يسقط حسني مبارك.. راح الاخوان مغطيين على هتافنا وقالوا: عالقدس رايحين شهداء بالملايين.. قمنا قلنا يمكن ما يقصدوش.. او ما سمعوناش.. علي صوتك شوية... احم احم: يسقط يسقط حسـ.... يروحوا ناطين في زورنا عالقدس رايحين شهداء بالملايين

قام مسكوا البلد بقى.. بعد الثورة.. قام بعتوا الجواب الغورامي ده دون اي مراعاة لان فيه اطفال بيتفرجوا على الجرايد وبنات لسه ما اتجوزتش وممكن عينيهم تتفتح لما يشوفوا الخطاب ده 

ييجي واحد يقولي: امال فين خيبر خيبر يا يهود.. اقوله: طب وهو بيريز ماله ومال خيبر؟ انت دايما ظالم كده؟ اثثثثثبتتتتت ان بيريز من يهود خيبر.. ايه دليلك؟ ممكن لنك؟ شوية رتيبة وانصاف رشدي
وزي ما داليا بتحب ماركس ونادر بيحب جيفارا، مرسي بيحب بيريز والمرشد بيحب شارون

الفلول حيبرشطوا علينا بكرة

الاسبوع اللي فات الاخوان برشطوا علينا وضربونا

الاسبوع ده الفلول حيبرشطوا علينا... بس دول غالبا احنا اللي حنضربهم... انا طيبة وقلبي ابيض عشان كده باقول لتوفيق عكاشة ومرتضى منصور وغيرهم من الفلول بلاش تنزلوا.. انا ما اضمنش العيال يبقوا مرقدين لكوا ومستنينكوا يطلعوا عليكوا غلب السنتين اللي فاتوا وترجعوا تقولوا دول بلطجية... اديني حذرت اهو... دي ناس خلقها في مناخيرها وقرفانة في عيشتها ودافنة صحابها وممكن تشوف وشوشكوا العكرة اللي اتسببت في كل اللي احنا فيه ما تحسش بنفسها..

انج سعد.. فقد هلك سعيد.. اذا كانوا من كتر الغل جروا الاخوان من الميدان وهم كان عددهم اقل واتاخدوا على خوانة ومش هم اللي باديين الضرب ولا كانوا حاطينه في بالهم.. انتوا حتاخدوا في ايدهم سبع دقايق بالظبط.. احترموا نفسكوا كده وخليكوا في نفسكوا تابعوا من التلفزيون باحترامكوا... بلاش يام بدوي

والله العظيم دي نصيحة مخلصة مش عشانكوا، بس عشان ماليش مزاج اليوم بتاع بكرة يبوظ راخر زي المرة اللي فاتت، لازمتها ايه المرازية دي انتوا تنزلوا ودماغتكوا تتفتح واحنا نتشتم وتبقى هيصة وبوليكة... ما تخليكوا في حالكوا

هو ايه البخت المايل ده... يا اما الاخوان يقولوا لنا انا جاي معاكوا كده يا اما الفلول يقولوا انا جاي معاكوا كده؟ ما تبصوا في ورقتكوا بقى ما ذاكرتوش ثورة طول السنتين اللي فاتوا وجايين تغشوا منا؟

عبد الله بدر لازم يترفد من الازهر

انا عايزة افهم هو الازهر بقى فاتحها ايه بالظبط عشان واحد زي عبد الله بدر ده يشتغل فيه ويدرس فيه للعيال كمان؟

انا لسه جايبة جرنال التحرير وكنت باتصفحه لقيت خبر لتغطية القضية اللي الهام شاهين رافعاها عليه وكاتبين انه هو انصاره دايرين بصور الست على باب المحكمة يوزعوها، وكاتبين خبر ناشرين فيه صورة لفتاة بورنو رومانية ونفس الصورة معمولة فوتوشوب لالهام شاهين وكاتبين ان عبد الله بدر واخد الصورة بتاعة فتاة البورنو الرومانية وحاطط عليها وش الهام شاهين وعمال يوزعها على الناس على باب المحكمة

ايه الانسان المريض ده؟ واضح ان عنده مشكلة حقيقية محتاجة علاج، بيتفرج على مواقع بورنو وكمان بيعمل صورها فوتوشوب وواضح ان عنده هوس قديم بالهام شاهين وبيحبها... طب هي ذنبها ايه؟

انا قرفت جدا.. ايه ده؟ اييييه ده؟ ايه القرف ده؟ وهو والناس اللي معاه قاعدين يوزعوا الصورة دي ويهتفوا اسلامية اسلامية

هو الازهر فتحها ماخور امتى معلش يعني؟ هي دي مؤسسة بتحترم دين ربنا وبتحترم نفسها ولا ايه؟ واحد زي ده يفضل يشتغل عندهم ازاي؟ والله العظيم دي لو شركة سياحة وكان بيشتغل فيها واحد زي ده وعمل الامراض دي كان زمانها رفدته

والست دي مالهاش نصير يعني؟ يعني دمها حلال كده؟ حرام يا ناس.. انتوا ما عندكوش ولايا؟ ما عندكوش رجولة؟ البلد دي فيها رجالة ولا كاوركات، ولا هي عشان فلول؟ 

هي فلول ومن بتوع ابناء مبارك والمجلس العسكري، بس انا والله العظيم لما قريت الخبر ده وشوفت اللي هو عامله قعدت ادعي لها من قلبي ربنا ينصفها.. ربنا ينصفها 

ايه الكائن ده؟ ما تشوفوا له مصحة يتعالج فيها

هي البلد دي مافيهاش رجالة تحط الاشكال المريضة دي عند حدها؟ انت تقبل ان انسانة يتعمل لها صور فوتوشوب بالطريقة دي وتتوزع قدام المحاكم على الناس بكرة الست الوالدة يتعمل لها فوتوشوب وتتوزع صورتها.. اللي يرضاها يشوفها

يا رب ينصرك يا الهام شاهين.. ربنا ينصرك

آخر حاجة كنت اتوقعها في حياتي اني ادعي لالهام شاهين، ومن قلبي... 

قال ايه الهام شاهين فلول.. وعبد الله بدر ده بقى ثوري؟ تصدقوا بايه؟ تغور الثورة وملعون ابوها الف مرة لو عبد الله بدر يبقى ممثلها