Saturday 27 February 2010

المحاولة دي مش عشانا احنا

انا بس سايباكوا تحلموا عشان ما اصدمكوش في مشاعركوا، بس ركزوا شوية
دي محاولة لتعديل الدستور بحيث انه يبقى في المستقبل في فرصة للاجيال الجاية انها تعرف تنتخب حد عدل وما يقعدوش يدفعوا تمن اللي احنا عملناه زي ما حصل لنا مع اللي قبلنا
عشان كده انا متمسكة بتغيير الدستور بما يضمن انتخابات الناس تعرف تختار فيها، واي تنازلات او زمزآت او حلول وسط ح ارقع بالصوت والطم واشد شعري واخلي اللي ما يشتري يتفرج واعمل حملة مضادة كمان، اديني باحذر اهو، احنا فينا اللي مكفينا ومش طالبة تسلية على مواجعنا
وانا عارفة ان الاختيار دلوقت ممكن جدا حسني مبارك ينجح باكتساح في انتخابات حرة نزيهة
وللا انتوا نسيتوا ان الصحفيين انتخبوا مكرم في انتخابات نزيهة؟ 
بس مش مهم، على الاقل مش ح ياخد اكتر من مدتين، على الاقل ننوع، مرة ينتخبوا حسني، مرة ينتخبوا جمال، مرة ينتخبوا علاء، مرة ينتخبوا صفوت الشريف
هيهيهيهيييييييييييي تخيلوا يا عيال لو رئيسنا صفوت الشريف بشنبه ده
اهو على الاقل العرب بقى يفوقوا (وخصوصا الغزاوية) ويبطلوا يفرقوا بين الشعب والحكومة ويبطلوا يفضلوا حاطين امل على الشعب اللي ح يثور، ويتصدموا بقى ويروحوا ينتحروا انتحار جماعي ونخلص بلا وجع دماغ
حتى لو البرادعي طلع مقلب ما يهمش
وحطوا الاحتمال ده ارجوكوا بلاش العشم الزايد ده
فيه احتمال ان البرادعي يطلع مقلب، وحياة حبيبكوا النبي حطوا الاحتمال ده ولو بنسبة واحد في المليون، ده سيدنا عمر ما وثقش في سيدنا محمد نفسه عليه الصلاة والسلام غير بعد خمس سنين من البعثة
ابوس ايديكوا... وارد، وارد انه يطلع تمثيلية او مقلب او محاولة لانقاذ النظام او حتى انقاذ اتفاقية السلام، يا سيدي اسمعني وارمي الكلام ده ورا ضهرك، وقول مجنونة بس اهو برضه تبقى حاطط احتمال ربع في المليار... والنبي، تحسبا للانهيار العصبي، ومش عشانا، عشان احنا لما بننهار بنعمل تصرفات غير مسئولة قد تؤثر على الاجيال المستقبلية
بس حتى لو طلع انشالله جاسوس اسرائيلي، مش مهم، هو احنا ايه؟ احنا نفسنا جيل مش مهم
احنا خلاص كده، اتورطنا في اتفاقية السلام دي، وبقينا فعليا محتلين بموجبها، وما عندناش الاستعداد ولا الروح ولا الجرأة اننا نحررها وندفع تمن اي حاجة، والبلد خربت على دماغنا واحنا اضفنا ابداعتنا الشخصية في الخراب
احنا جيل العبارة والدويقة والقطارات المقلوبة
احنا الجيل اللي باع البلد بمصانعها وارضها وناسها ونط في البحر عشان يخلص منها
احنا الجيل اللي بيقول: بالروح بالدم رزق عيالنا اهم وما عندوش فرصة يفكر غير في الاكل والخلاص الفردي
احنا الجيل اللي نسي ان اسرائيل دي ماهي الا اكبر عملية سطو مسلح في التاريخ
احنا جيل الجدار العازل والعيال اللي اتحرقت واحنا قافلين عليهم وغزوة الجزائر
احنا جيل الاضمحلال والفوضى
وبعد الفوضى اللي احنا عملناها دي لازم ح ييجي حاجة
اللي جايين ح يتفوا على قبورنا لو سيبنا لهم البلد كده، يمكن لو حاولنا، ولو مجرد محاولة، اننا نسيب لهم قوانين يعرفوا يستغلوها لما يحبوا يصلحوا على الاقل يعذرونا ومش لازم يترحموا علينا
زي احكام تصدير الغاز اللي لسه ما وقفش، زي قضية الجدار اللي حتى لو كسبناها الجدار اتبنى
مش مهم، المهم الجايين يبقى في ايدهم ورق عليه ختم النسر يثبت حقهم وربنا يسهل ويبقى عندهم الشجاعة والاستعداد للتضحية اللي مش عندنا
الفوضى اللي احنا عملناها في البلد ح تأدي لاحتمالين
اما ييجي واحد يقول: يا نهار اسود ومنيل... لالالالالا لم لم لم، هو ده كله ح يتنضف امتى؟ ويلاقي نفسه مضطر يبقى مستبد عشان يقدر ينضف
مش ممكن، مش ح نفضل نلف في الحلقة المفرغة دي
او اننا نبقى سايبين لهم قوانين وتشريعات ودستور احنا ما عرفناش نفعلهم بس اهم موجودين في الدفاتر ومختومين والورق تمام كده مظبوط، نقوم نقطع عليهم نص الطريق وما يبقاش قدامهم غير يفعلوه عشان يصلحوا اللي احنا عملناه
ولو عرفنا نصلح التلات مواد اياهم 76 و77 و88 ونشرع قانون للانتخابات، وما عملناش بيهم حاجة خالص
يبقى شكرا جدا، البلد دي مش عايزة من خلقتنا حاجة تاني وكفاية اللي عملناه فيها وكتر خيرنا اننا مش سايبين لها ميراث زبالة
على الاقل زبالتنا تدفن معانا
واذكر نفسي واياكم بحاجتين
1- مافيش داعي نهستر ونعبر عن احلام قد لا تتحقق لما نيجي نكتب عشان اعمل حسابك انك ميت وح ييجي ناس تقرا الكلام ده وتضرب كف على كف، والله لو فضلت
keeping low profile
ومقلل نبرة الخطابة والهيستريا والنتيجة طلعت احسن ح يقولوا كانوا ناس عاقلين، لو رسيت في الاخر على ورق مختوم، او حتى مجرد محاولة فاشلة ح يقولوا الناس حاولت واهي نصيبها
انما افتكر انت كمان ان الكلام الحنجوري بتاع  الاجيال السابقة اللي كان عندها كل اسباب الامل ونزل على مافيش ازاي اثر فينا وخلانا عدميين وبنتريق عليهم دلوقت، مع انهم، والشهادة لله، كانوا احسن مننا، على الاقل ما كانوش واخدين خوانة، انما احنا عندنا كل الاسباب اللي تخلينا ناخد خوانة، ما تعملش في الجايين زي ما اتعمل فينا
2- نحط في بالنا ان تعديل الدستور وتوفير قانون يضمن للاجيال الجاية فرصة للاصلاح ده العمل الوحيد العدل اللي في جيلنا، مالناش اي حاجة ايجابية تانية نقابل بيها ربنا، وده مشروع عمرنا، نعمل اللي ربنا يقدرنا عليه عشان نسيب صدقة جارية على الاقل ونبقى حريصين اننا ما نسيبش لعنة جارية زي اللي ساب لنا اتفاقية السلام اللي اتوحلنا فيها زي الدبانة اللي وقعت في العجين
عشان كده ناخد المحاولة بجدية ومن غير عشوائية ولا مجاملات ولا سلق بيض ولا هرجلة عشان احنا مش منتظرين ثمرتها في حياتنا
دي حاجة سايبينها لولاد ولادنا، يمكن، جايز، ربما يطلعوا رجالة
لو رسيت على اننا سايبين لهم مجرد محاولة، مجرد مشروع حاولنا نطبقه وفشلنا اهو برضه يبقى في ايدهم مشروع يمكن هم يعرفوا يطبقوه ويستفيدوا بيه
كفاية انهم ح يتولدوا يلاقوا البلد اتباعت... مش كمان ما يلاقوش اي حق قانوني في بلدهم
واياك حد يقول بتحبطينا، مش معقولة ابدا تبقى خريج ثانوي صنايع ونفسك تبقى دكتور ولما اقول لك ما ينفعش تقول لي بتحبطيني
طب خش ثانوي عام وذاكر ويا سيدي لو جبت مجموع الطب يبقى خير وبركة لو ما جبتوش اديك حاولت والمذاكرة دايما تنفع ما تضرش، ولو دخلت تجارة كويس برضه مش وحش، انما لسه ما قدمتش ورق الانتساب للثانوي وعمال تحوش عشان تشتري عيادة؟

لالالالالالالالا دي صيغة توكيل ما تنفعش ابدا ابدا ابدا

هو انا مش عارفة الجروب ده فاكس وللا تبع الحملة
بس في كل الاحوال اشكرهم على الاستجابة السريعة والحماس
احنا ما اتفقناش على كده
1- ما اتفقناش على الاسامي دي مع كامل احترامي لهم، بس فيهم ناس بدون ذكر اسماء لو معاهم توكيل الجنة مش ح اوكلهم، وفيهم ناس انا ممكن اوكلهم بس غيري مش ح يوكلهم، وفيهم ناس انا وغيري نوكلهم بس غيرنا حد تالت مش ح يوكلهم
والمفروض ان البرادعي مافيهوش اي حاجة جديدة غير انه يحوز ثقة الجميع وكل الناس ممكن توكله ومعاه ناس قانونيين زي العوا والبسطويسي ومحمود عبد العزيز عشان دول قانونيين
لكن بقية الاسماء تمثل توجهات سياسية مش كلنا مجمعين عليها، انا ما اوكلش الغزالي حرب غيري ما يوكلش حمدين صباحي وهكذا
2- احنا موكلينهم على ايه؟ تعديلات دستورية نقطة من اول السطر
لا
انا شخصيا مش ح اوكل على تعديلات دستورية على اطلاقها كده، انا مش ح اوكل على الغاء المادة التانية من الدستور مثلا، افرض وكلت واتاكلت انا بقى على قفايا
احنا لنا مطالب واضحة
الطعن في شرعية المادتين 76 و77 عشان مش بيدوا فرصة لاي حد بالترشح
والمطالبة بمراقبة الانتخابات قضائيا ودوليا
والانتخاب بالرقم القومي في الانتخابات النيابية والرئاسية والغاء الانتخاب بالبطاقات الانتخابية نظرا لانها عبارة عن تهريج
هم دول التلات مطالب اللي بيجمع عليهم الكل من اول اسامة الغزالي حرب لحاااااااااااااااااااااااد حمدين صباحي
وهي دي المطالب اللي انا شخصيا على اساسها تحمست للمشروع اللي كتبه البرادعي، وما عنديش ثقة في اي حد يدخل في الليلة بقى معلش
فرجاء من الاخوة مديري المجموعة تعديل الاستمارة
اولا: اسم البرادعي ومعاه القانونيين المذكورين اعلاه بحد اقصى
اكتر من كده انا مش ح اوقع، حتى لو فيهم ناس انا باثق فيهم، مش ح اوقع ومش ح ادعو غيري للتوقيع
ما الناس دول موجودين بقالهم سنين يعني، لو كنا عايزين نوكلهم كنا وكلناهم، امال بعتوا جبتوا الراجل على ملا وشه ليه؟ ما كان قاعد مرتاح مدام كل دول سباع البرمبة؟
ثانيا: تحديد المطالب اللي على اساسها التوكيل
انا ما اسلمش رقبتي بالرقم القومي والبصمة على بياض لحد ابدا ولا لامي وابويا
والسلام ختام

Friday 26 February 2010

ايوة اسمهم لا دينيين ويحترموا نفسيتهم بقى

انا ما اتعودتش اخش في معارك امي وابويا لاسباب عديدة منها انهم امي وابويا، ومنها برضه ان معظم اهتمامتي غير اهتماماتهم
بس مؤاخرا حصلت معركة اللا دينية دي، وعادي يعني امي قدها وقدود. انا بس ما غاظنيش غير كلمة واحدة: الشق عن الصدور
اولا: احب اوضح ان الناس اللي امي ردت عليهم انا شايفة انهم ما يستاهلوش الرد اساسا لانهم بصراحة شوية واغش ورايش وماحدش بيعيرهم اهتمام ولا بيصدقهم، بالذمة حد يرد على نبيل عمر ونبيل شرف الدين؟ وللا حتى مين بيتأثر بكلام احمد عبد المعطي حجازي مع حفظ قدره كشاعر كبير؟ وللا جابر عصفور؟ طب اللي بيقرا جابر عصفور غير امي يرفع ايده، وللا نوال السعداوي وليلى تكلا وسعد هجص؟ 
ومع ذلك، من ناحية تانية امي شايفة اني هايفة عشان بارد على علاء مبارك بكل "عوراته الذهنية" كما وصفته
خلاص، كل واحد بيرد على حد او على حاجة او على فكرة معينة مضايقاه
هو حرررررررررررررر
ثانيا: طب انا لما اكلم حد مخه على قده، مش اكلمه على قد مخه؟ ناس بتكتب عواميد بس ما بتفكش الخط ونبيل عمر ده بالذات وحياة النبي تعالوا على نفسكوا واقروا له شوية، ده كل ده بعد ما المصححين صححوا له يا عيني
هي وصفتهم بلا دينيين عشان ده توصيف اكاديمي مظبوط، وعشان التوصيف ده مش شتيمة. لا ديني لا تعني ان الانسان ملحد او كافر، ممكن واحد لا ديني وبيصلي وبيصوم وبيحج
تعريف اللا ديني هو كل من يرى فصل المظاهر الدينية عن كل او بعض مناحي الحياة العامة، بصرف النظر عن دوافعه، قد تكون دوافعه الحادية بالفعل، وقد تكون دوافعه صوفية مثلا، مش عايز يصلي قدام الناس عشان ما يتفهمش انه منافق، مش عايز يبين مظهر دينه عشان هو عايز دينه خبيئة بينه وبين ربنا، وقد يكون مؤمن بالديانة الانسانية، وقد يكون علماني، وقد يكون لا ادري، وقد يكون مؤمن
لا ديني حاجة، ولا ايماني حاجة تانية
irreligious
غير
non-believer
بس امي غلطانة، عشان الرسول بيقول خاطبوا الناس على قدر عقولهم، ناس باين من كتابتها انهم سواقين ميكروباص (استثني جابر عصفور واحمد عبد المعطي حجازي وليلى تكلا، بصرف النظر عن الخلاف الفكري، انما على الاقل متعلمين وبيفكوا الخط، والغريبة بقى ان دول التلاتة اللي ما ردوش عشان عارفين انها بتتكلم صح وعندهم فكرة عن المصطلح وتعريفه) انما الباقيين سواقين ميكروباص ولا حتى حصلوا سواقين التاكسي، تقوم تقول لهم كلام يصعب على امثالهم فهمه؟  اذا كانت الويكيبيديا العربي مش عارفة الفرق ما بين اللا ديني واللا ايماني، دول ح يعرفوا؟ 
ثالثا: لا بقى، هي غلطانة، هم مش لا دينيين، هم الحاديين
ومافيش شق عن الصدور في الحكاية دي، انا باقرا اللي مكتوب وماليش دعوة بالكاتب وممارسته الشخصية واللي في قلبه
اللي يكتب يقول: مافيش حاجة اسمها مشيئة القدر وانما هي مشيئة الانسان
- مافيش حاجة اسمها غيبيات الغيبيات تفكير متخلف
- مافيش حاجة اسمها جنة ونار
- ما تقولوش السلام عليكم عشان دي تحية اسلامية(مع ان يعني المسيحيين بيقولوا سلام لكم واليهود بيقولوا شالوم، يعني مش بالضرورة تحية اسلامية، بس التحية بالسلام فعلا تحية دينية دي حقيقة)
 - الصلاة مالهاش لازمة
ده بقى ما اسموش تفكير لا ديني
ده تفكير الحادي، والالحاد مش شتيمة، ده فكر، واذا كانوا مش ملحدين يبقى عندهم مشكلة ازدواجية
قد يكون اللي كتب المقال ده خلصه ونزل صلى الضهر في الجامع جماعة، قد يكون صايم صيام داوود يوم ويوم، قد يكون لسه راجع من العمرة
ما يخصنيش انا الكلام ده انا مش ح افتش في القلوب واروح له البيت اشوفه بيصلي وللا لا
انا ليا باللي بيقوله
طيب ده اللي هم قالوه، انا شخصيا قريته وما حبتش ارد عليه
غيري، اللي هي امي، قرته وحبت ترد عليه، وحبت ياعيني تبقى مؤدبة وما تقولش ان ده تفكير الحادي، قالت لا ديني عشان يبقى التعبير مهذب وما يبقاش فيه تكفير
قاموا: 
1- اغبيا ما فهموش وما كلفوش نفسهم يقروا كتاب واحد وللا حتى يدوروا في الانسيكلوبيديا وللا على النت حتى لتعريف لا ديني
2- ما ردوش على ولا فكرة من الافكار اللي هي قالتها، هي كانت بترد على افكارهم، وانا شايفة انها شهرتهم، ولا حد حاسس بيهم اساسا، راحوا مشخصنين ونازلين شتيمة فيها هي، طب يعني انتوا كاتبين كلام مش عارفين تدافعوا عنه؟
3- ايه كمية الرعب والخوف والرعددة اللي هم فيها دي؟ 
كله بقى الا الجبن، انا ما احبش الانسان المنافق الجبان، وان قلت ما تخافش وان خفت ما تعملش
انا دلوقت لابسة بدلة رقص وبارقص، لما حد يقول لي يا رقاصة اقول له انت بتخوض في عرضي؟ 
انا محجبة وباصلي، لما حد يقول لي يا مسلمة اقول له انت بتبلغ عني الاف بي اي؟ هلا شققت عن صدري؟ 
انت كاتب، وكتبت تقول مافيش غيب ولا فيه قدر ولا فيه مشيئة قدر ولا الصلاة لها لازمة والقرآن بيحرض على العنف وشيلوا منه شوية ايات مش مناسبة ومافيش حاجة اسمها جنة ونار وما تقولوش سلامو عليكو
جات الست بالادب قالت لك انت لا ديني، وانت الحقيقة ملحد مش لا ديني، وبترد على افكارك، الله، مش انت حضرتك كاتب الافكار دي في مقال برضه وللا قلتها لها في قعدة خاصة؟ مدام اتكتب في مقال يبقى قابل للنقاش، اذا كنت حضرتك بتناقش ايات القرآن وشايف ان فيها ايات مش مناسبة، اشمعنى ايات حضرتك مش قابلة للنقاش؟ 
تقوم تترعب وتتخض وتقول: بتكفرني... الحقووووونييي، ح اتقتل، ح ييجي عيل بالدبلون يطخني
جرا ايه يا امور انت وهو؟ مش تسترجل كده وتخليك قد الكلام اللي بتقوله؟

عيب يعني لما كريم عامر اللي كان عيل عنده 21 سنة يبقى واد راجل كده وقد الكلام اللي بيقوله ويتحمل نتيجة كلامه واراءه وانتوا شحطة كده قد ابوه وجدوده كمان وتخافوا زي العيال الصغيرة 
انت ملحد.. ده حقك، ماحدش يقدر يفرض عليك ايمان انت مش عايزه، دافع عن اعتقادك واعلنه وخليك محترم كده عشان الناس تحترمك، ماحدش ح يجيلك لحد عندك ويطبطب على قرعتك ويقول لك انت ملحد وخايف تقول يا حبيبي؟ طب انا ح اغطيك باللحاف واقوم ادافع عنك
حقك في الاعتقاد انت تدافع عنه، وحق غيرك انه يتناقش معاك فيه طالما كتبته في مقال والناس قرته، ولما حد يرد على كلامك تناقشه وتدافع عن اعتقادك حتى النفس الاخير زي الناس المحترمة بصرف النظر اتفق او اختلف معاك في الاعتقاد، مش تحولها لمعركة شخصية وتقلع ملط وتترعب، واحدة ست ومش خايفة تتناقش وانتوا رجالة بشنبات خايفين من حتى المناقشة؟
ثم ايه الاستموات ده؟ مين اللي ده اللي حيقتلكوا؟ ما اللي عايز يموتك ح يموتك عشان الكلام اللي انت كاتبه مش عشان توصيف اقل ما يقال عليه انه توصيف مجامل
وبعدين ايه حكاية: سايبة القضايا المهمة وبترد علينا دي؟ 
ههههههههههههه
صح، فدي انا معاكوا، ومغلطاها والله، انتوا فعلا مش مهمين واللي بتكتبوه يادوبك كده يتلف فيه كام قرص طعمية وللا يتحط للقطة عشان تعمل عليه بيبي
وبعد كده اللي مش قد الكلام ما يكتبوش، ماهي بتكتب اللي هي عايزاه وبيتهموها زورا انها اخوانية وشيعية وشيوعية في ذات الوقت ومش هاممها ولا بترد على الكلام ده، وفهمي هويدي بيكتب اللي هو عايزه وبيتقال عليه مافي الخمر ومش هامه
لو فيه مناقشة في الافكار بيردوا عليها
وغيرهم ناس كتير، لا شرشحوا ولا هللوا ولا حاجة، فاضلين يكتبوا اللي هم عايزينه
وح نروح بعيد ليه؟ ما احمد عبد المعطي حجازي نفسه بيكتب اللي هو عايزه مهما يتقال عليه من غير شرشحة ولا شخصنة ومن غير ما يخاف عنده رد بيرد ما عندوش بيكمل كلامه وخلاص
ثم بقى لازم النقط تتحط فوق الحروف لمصلحة الجميع
مصلحة اللي عايز حرية اعتقاد انه يحارب عشانها مش يخاف لما يتواجه بحقيقة اعتقاده
ومصلحتي انا كمؤمنة ان ما يبقاش في ناس زي عبد الله بن ابي بن سلول كده، يدعوا الايمان ويدسوا كلام 
لما واحد يقرا لك بوصفك لا ديني استقباله ح يبقى حاجة تانية غير لما يقرا لك بوصفك ديني
ولما انت تكتب بصفتك العقائدية الحقيقية انت نفسك ح تبقى مرتاح اكتر ومحترم نفسك كده وراضي عن نفسك بدل ما تهر على روحك لما حد يناقشك في افكارك يا جباااان، يااااااااا جباااااااااااااااااان
اقرف ما اقرف منه اني اشوف راجل جبان ورعديد ومنافق
وما تسألونيش اشمعنى راجل انت ذكورية؟ 
ما اعرفش دي ذكورية وللا ايه؟ بس ده احساس نفسي كده، الراجل المنافق الخواف بيصيبني بالغثيان، ممكن لو ست او خصوصا بنوتة تصعب عليا
لكن راجل لا

إحالة المدون أحمد مصطفى إلى محاكمة عسكرية بسبب تدوينة

هو فيه ايه؟ احنا محسودين وللا حاجة؟ المدون احمد مصطفى اتحول لمحاكمة عسكرية بسبب تدوينة كاتبها من سنة
طب اشمعنى دلوقت؟ 

حيوا ربيب العلا والكوكب المهتدى


سناه عم الأنام
وبث فيه السلام
وصد عنه الغمام
والنور عنه انجلى
جادت به البادية
كالدرة الغالية
والروضة الحانية
أحيا شذاها الفلا

رضيع سعد السعود
ربيع حلم وجود
قد زاد منه الوجود
ربيعه المقبلا








ومبلغ العلم فيه أنه بشر.. وأنه خير الخلق الله كلهم

---------
وفي ليالي الظلْم والظلَم... يفتقد محمد:
محمد أشرف الأعراب والعجم ‍ ‍
محمد خيـــــــر من يمشي على قــــدم
محمــد باسط المعروف جامعه ‍ ‍
محمـــــد صاحب الإحســان والكــــرم
محمــد تاج رسل الله قاطبــــة ‍ ‍
محمـــــــد صــــــادق الأقوال والكلـــم
محمــــــد ثابت الميثاق حافظــه ‍
محمـــــــد طيــب الأخــلاق والشيــــم
محمـــد رُوِيَت بالنور طينتُــــهُ ‍ ‍
محمــــد لم يــــزل نــــــوراً من القِدم
محمــــد حاكم بالعدل ذو شرفٍ ‍ ‍
محمـــــد معــــدن الإنعام والحكــــــم
محمد خير خلق الله من مضـــــر ‍ ‍
محمــــد خيـــر رســـــل الله كلهـــــم
محمــــــد دينه حـــق نديـــن بـــه ‍ ‍
محمــــــــد مجمــــلاً حقاً على علــــم
محمـــد ذكـــره روح لأنفسنــــــــا ‍ ‍
محمد شكره فــــرض على الأمــــم
محمد زينة الدنيا وبهجتهـــــــــــا ‍ ‍
محمــــــــد كاشــــــف الغمات والظلم
محمــــد سيـــــــد طابت مناقبـــــهُ ‍ ‍
محمــــد صاغه الرحمــــــن بالنعـــــم
محمــــد صفـــوة الباري وخيرتـــــه ‍ ‍
محمــــد طاهـــــــر من سائر التهـــم
محمـــد ضاحــــك للضيف مكرمــــه ‍ ‍
محمـــــــــد جـــــــاره والله لم يضـــم
محمــــد طابـــــت الدنيــــا ببعثتــــه ‍ ‍
محمـــــد جـــاء بالآيـــات والحكـــــــم
محمــــد يـــوم بعث النــــاس شافعنــــا ‍ ‍
محمـــــــد نوره الهــــادي من الظلــــم
محمــــــــد قائـــــــــــم لله ذو همـــــــــم ‍ ‍
محمـــــــد خاتـــــــم للرســــــل كلهــــم
صلى الله على محمد صلى الله عليه وسلم
وحشتنا قوي

Thursday 25 February 2010

فصل مدونة تانية من عملها بسبب بوست نشرته

ما انا ستميت مرة قلت لها ما تشتغليش مع رأسماليين سيس... بس هي مديرة مبيعات، ح تشتغل في مصنع الغزل والنسيج يعني؟
فنون، كتب البوست ده، وحطته نوت على الفيس بوك، اتاري صاحب الشركة اللي بتشتغل فيها شافه على الفيس بوك، لان طبعا الاشكال اللي زي المدير ده مش بيدخلوا مدونات، لقاها كاتبة الكلام ده، او بالاحرى اكتشف اساسا انها مدونة وماشية في البطال راح فاصلها من الشغل كده بمنتهى البساطة، انا خايفة بس اكون ليا يد في الموضوع ده عشان اديتها الاختبار ده وطلعت يسار ديمقراطي (معظمنا طلع يسار ديمقراطي ما عدا مواطن مصري طلع رأسمالي سلطوي) وراحت برضه حاطاها على الفيس بوك وقعدت تمتحن صحابها
:)
هو اغلب الظن صاحب الشغل مافهمش ايه ده ولا مين فين؟ هو بس شافها في المربع الاخضر وفاتحة مدونة سودا وبتقول دستور قام قال لك دي اخوان مسلمين
طب ده بقى مش فصل تعسفي؟ هو عشان قطاع خاص من حقه يفصل الناس كده من غير ابداء اسباب؟ ومافيش حقوق عمل خالص بقى؟
ودي لطافة الرأسمالية وظرفها وابداعيتها؟ ان الناس تترفد من شغلها عشان صاحب العمل مش فاهم ايه اللي مكتوب على الاكاونت بتاع الموظف اللي عنده على الفيس بوك؟
بس لما تصحى من النوم اعرف منها اسم الشركة والمدير ونسيح له بقى مدام مافيش قانون يقتص منه
-------
ملحوظة: فنون كانت بتشتغل من غير عقد ولا حاجة، وكانوا مستعبدينها في الشغل، ومش بيدوها على قد مجهودها مع انها
highly qualified
مش عارفة اقولها ازاي، يعني مؤهلاتها احسن من الوظيفة كمان، وشغيلة زي التور في الساقية
كل ده من غير عقد وبفلوس اقل من حقها وكمان تترفد عشان عندها مدونة
ان شاء الله ح ييجي يوم ونطير رقاب الرأسماليين بالجيوتين

اسماء ابراهيم براءة

والكلية حولت الدكتورة للتحقيق... وان شاء الله منه بقى على مستشفى الامراض العقلية، انا اول ما سمعت الموضوع بصراحة الحكاية على بعضها حسيت انها غريبة، ومالك مصطفى قال لي: يا نوارة مافيش حد في الدنيا غبي كده.. عشان الدكتورة تروح ترفع قضية لازم حصل حاجة، فقلت له انا مصدقة لحد ان الدكتورة كتبت اسم اسرائيل على فلسطين، ممكن تكون البنت شافت المنظر قامت بهدلتها لكن انا معاك ان الحكاية زي ما هي محكية غريبة قوي
ومن معجزات الزمن ان الحكاية الغريبة اللي احنا ما كناش مصدقينها طلعت مختصرة اختصار مخل، وطلعت الحكاية الاصلية اغرب واوسخ، الكتاب تأليف جوزها وهي كتبت على سيناء وفلسطين والاردن اسم اسرائيل وقالت عليها دولة عربية والاغرب ان البنت ما غلطتش فيها فعلا والاغرب والاغرب انها سقطت سبعين في المية من الدفعة والاغرب والاغرب والاغرب انها عملت محضر سب وقذف وهي عارفة ان الطلبة كلهم شهود على ان البنت ما عملتش حاجة 
يعني انا ومالك مصطفى احسنا الظن بيها جدا وطلعنا احنا اللي هبل.. او هي بقى فيه حاجة مش مظبوطة في مخها، يعني سيحت لروحها وفضحت نفسها ولو كانت اسماء هي اللي خدت القضية للاعلام وللا راحت عملت محضر كان ناس قالوا عليها عايزة تعمل بطلة، البنت ما عملتش حاجة، اعترضت وروحت بيتهم تتغدى عادي
معقولة الجنان اللي احنا عايشين فيه ده؟

Monday 22 February 2010

عموما ما تخافوش

لو لا قدر الله اخدنا مقلب مش ناوية اقطمكوا لان المرة دي كل الناس صعبانة عليا فعلا، نفسهم يحلموا
انا صاحية اهو، المرة دي بقى عاملة حسابي... وان شاء الله ربنا ما يكسرش بخاطر الغلابة
وبالنسبة للخوافين اللي زيي، يارب يطلع اللي نخاف منه ما يجيش احسن منه ان شاء الله، ولو لا قدر الله لا قدر الله لا قدر الله ما طلعش كده ما تقطموش الناس والنبي والنبي والننننننبي
المرة دي فعلا ما يستاهلوش التقطيم سوا اتحقق حلمهم وللا اخدوا على قفاهم وللا مبارك اتدخل في اخر لحظة عشان يصعقهم بالكهربا زي ما بيعمل كل مرة
وبعدين ربنا موجود، وربنا قادر على كل شيء، والناس غلابة
يمكن يكون ح يعفي عنهم بقى، والمرة دي انا معاهم، عشان هم فعلا غلابة وفعلا نفسهم يعملوا حاجة، لو حلو علينا كلنا لو وحش برضه علينا كلنا

وغلاوة حبيبك النبي ما تكسر بخاطر الغلابة يارب

حلو الحوار اللي منى الشاذلي عملته مع الدكتور البرادعي قوي
ممتازة منى، الوحيدة اللي عرفت تعصره وجابت لنا اخره، المسلماني كان عاقل ومتعاطف زيادة عن اللزوم، وعمرو اديب عبارة عن مادة مشعة للعته والتخلف وطرطش تخلفه على الراجل خلانا مش عارفين نفهم منه حاجة
انا لحد ما اتكلم مع منى الشاذلي ما كنتش عارفة هو مين وعايز مننا ايه ع المسا؟ انا شخصيا فيا اللي مكفيني وياما اتصدمت في البلد دي ومش عايزة اتصدم تاني الحقيقة
والوضع كما فهمته ان المشروع الاساسي بتاعه انه يغير الدستور بحيث يسمح للمترشحين انهم يترشحوا وتبقى فترة الرئاسة زي بقية مخاليق ربنا اربع سنين ومدتين بس، يعني هو لسه ما اتكلمش عن برنامجه الانتخابي لان اصلا الخطوة دي مش مطروحة دلوقت من اساسه لحد ما الدستور يتعدل
وان الناس، زي ما تامر موافي قال لي، عاملين زي اللي ما صدقت جالها عريس، وانه في الاخر قال لها: يا ست انا جاي اشوف عداد النور
طيب... خلاص فهمت كده هو عايز ايه
اذا كان على تغيير الدستور كلنا موافقين.. اتكل على الله
ها؟
ح يعمل ايه تاني بعد حواره مع منى الشاذلي؟
انا بس الناس الفرحانة والناس اللي اتصلت بالتليفون ومنهم واحدة خلت البرادعي يعيط صعبوا عليا ومش عايزة ربنا يكسر خاطرهم ويطلع الموضوع فشنك واخره حوارات تلفزيون وخلاص.. يعني انا متوقعة مثلا انه يجمع توكيلات كتير ويرفع قضية لتغيير الدستور ويجمع توقيعات بالالاف وللا حتى الميت الف واحد اللي على الفيس بوك يعملوا له توكيلات، وفي حالة زي دي كلنا ح نعمل توكيلات ان شاء الله، ولو الشهر العقاري استهبل علينا نوقع بالرقم القومي.. ده اللي انا متوقعاه منه، وده اللي انا متوقعاه من اصحاب هيستيريا البرادعي على الاقل يعملوا له توكيلات
( استروا بقى مرة واحدة في حياتكوا مش ح تعيشوا عمركوا تصيحوا وساعة الجد تدوبوا)
وكده يعني.. اذا ما كانش كده يبقى حرام الناس دي كلها تتعشم
ح نشوف
والنبي يارب، وحياة حبيبك النبي يارب ما تكسر خاطر الناس الغلابة دول
بس منى الشاذلي كانت راااااااااااااااائعة
عموما.. ادي احنا مستنيين

Sunday 21 February 2010

وقفة تضامنية مع عمال طنطا

بكرة ان شاء الله الساعة حداشر الصبح امام مجلس الشعب وقفة تضامنية مع عمال طنطا للكتان

Saturday 20 February 2010

الله يخرب بيت امك يا اوباما

فين الامامير بتوع هيستريا اوباما؟ فين؟ فين؟ ابن الكلب نازل قتل في المدنيين في افغانستان ولا كأنه بيرش بايروسول على ناموس
مين معبرهم؟ مين بيصوت عليهم؟ مش مهمين طبعا عشان جيمس بوند هو اللي بيموتهم
ده اللي واخد جايزة نوفل للسلام.... سفااااااااااااااااااااااااح، بس سفاح امور 
بالمناسبة كمان، انا علمت على كل اللي تحمسوا لاوباما ايام مولد سيدي اوباما، ليه؟ ده مجرد اختلاف في الرأي؟ ماشي
بس فيه ناس بتنخدع بسهولة بالدجالين (انا طبعا مش باتكلم عن اللي بيسترزقوا دول ناس زي الفل، على الاقل اكلوا حاجة وشربوا عليها مية) بس اللي ينخدع في دجال ينخدع في عشرة، خلي بالكوا بقى... اقروا سورة الكهف
بصوا بقى يا كتاكيت، فاكرين لما قلت لكوا انا عندي ماكين يكسب الانتخابات احسن؟ 
عشان امريكا ودلاديلها واللي زيها ماشيين بسيستم، والرئيس ده مجرد واجهة، وح يموتك ح يموتك، وح ينفذ الخطة الاستراتيجية اللي حاطاها اجهزة وبيتحكم فيها مصالح ناس بتتاجر في قوت البني ادمين ودمهم شئت ام ابيت
لما اللي ينفذ السياسة دي يبقى شخص مهبوش ومجنون ومكروه من البشرية ده ح يبقى افيد للضحية لان كل الناس ح تكره الجاني وتتضامن مع الضحية
لما اللي ينفذ السياسة دي يبقى شخص امور وكتكوت كده ولطيف ح تبقى بتاخد على قفاك والناس كلها عمالة تبرر للكتكوت، ويمكن انت كمان تبرر له، انا لسه من يومين واحد المفروض انه بيفهم قعد يبرر لاوباما المذبحة اللي عاملها في افغانستان ويقول لي: اصله غصب عنه.. اصل امريكا لازم لها عدو تفضل تضرب فيه واحنا اللي جينا في سكتها هم ما يقصدوناش
!!!!!!!!
يعني تاخد على قفاك بمزاجك وانت مبسوط، واللي يديك على قفاك ياخد جايزة نوفل للسلام كمان
عمل ايه اوباما، اضافة الى المذابح اللي بيعملها في افغانستان وكلنا قاعدين فاتحين بقنا، نشل امريكا من ازمة اقتصادية كان ممكن تخلصنا منها ولو لفسحة من الزمن، وبدل ما يهلل زي بوش على حق اسرائيل في الدفاع عن نفسها، سايبها تعمل ما بدا لها، بهدوء كده، تتوسع في المستوطنات، وتقتل الناس (ما سمعناش صوت امه تعقيبا على اختراق دولة واغتيال المبحوح، بقى لو كان اللي عمل كده ايران كان سكت؟) والخطة اللي صوت عليها الكونجرس لاسقاط النظام في ايران ماشية زي الحلاوة في عهد اوباما، وبسبب اوباما بالتحديد ماحدش قادر يشوف الواضح وضوح الشمس ان اللي بيحصل في ايران ده زي الثورة البرتقالية بالظبط، ليه؟ عشان اللي بيبدي استياءه من ديكتاتورية نجاد (اللي ح يمشي كمان اربع سنين) هو الراجل الامور نجم السيما، لو كان ده بوش كان كل الناس تعاطفت مع نجاد من وش بوش العكر، وبدل ما يهوبص ويصيح ومرة يشتم مبارك ومرة يشتم السعودية زي بوش الاهبل، بيحط الخطط بتاعته ويقول لهم اللي عاجبه ع الكحل يتكحل اللي مش عاجبه يترحل، ع الهادي كده، واديه بيبني لنا الجدار وبيبعت وفد يتفقد العمل في الجدار كأنهم جايين مستعمرة امريكية يشوفوا الرعية، ودلوقت بقى، في عهد اوباما، المخابرات الامريكية في عصرها الذهبي وعمالة ترتع يمين وشمال وببجاحة كمان، والتعذيب ما بطلش في جوانتانمو، اللي اصلا ما اتقفلش ولا حاجة، والراجل لسانه حلو وبينقط سكر وكل الناس مبسوطة، طبق الاصل العلقة الاولانية وكل الناس مبسوطة
والناشطين اللي كانوا ضد سياسة بوش في امريكا هبطوا
والعالم كله هبط خلاص، وكل السياسات اللي كانت ايام بوش ماشية زي السكينة في الزبدة وماحدش بيفتح بقه
هو ده التغيير بقى اللي الناس قعدت تتكلم عليه: اوباما ح يغير وجه العالم
صح؟
التغيير ان الضحايا يبقوا مبسوطين وساكتين والعالم يبرر للقتلة ويديهم جايزة نوبل للسلام، هو ده الجديد.. يس وي كان
ومافيش حد انتخبه انتخاب ديمقراطي ولا حاجة، لو المصريين نزلوا في الشارع يشتموا الجزائر بمزاجهم من غير ما يتلعب في دماغهم يبقى الامريكان انتخبوا اوباما بمزاجهم برضه
فوقوا بقى... الواحد مش عارف يكهربكوا بايه في مخكوا؟ كام فولت؟ مافيش حاجة اسمها انتخابات ديمقراطية... لو جبت سنكري ولبسته ونجمته وحفظته كلمتين واخدت له لقطات من زوايا معينة مع خلفيات بالوان معينة سهل جدا تأثر في عاطفة الناس... سهل جدا، امال السينما بتتعمل ازاي؟ امال ايه الفرق ما بين المخرج الكويس والمخرج الوحش؟ امال ازاي تشوف ممثل على الشاشة تفتح بقك وتنبهر ويمكن لو قابلته بشكل شخصي مصادفة وجه نصيبك تقعد معاه تبقى ح تموت من الزهق وتتصدم انه مش زي ما شفته على الشاشة؟ 
الديمقراطية بتتعمل كده، ومش مصادفة ان اشطر ناس في السينما هم اشطر ناس في اللعب بالديمقراطية وتوجيه الناس عشان ينتخبوا اللي وقع عليه الاختيار من قبل اجهزة الاستخبارات عشان ينفذ الخطة اللي هو مالوش اي اسهام فيها
اشمعنى الكل دلوقت بيتكلم على الضغوط اللي على اوباما وماحدش بيتكلم على الضغوط اللي كانت على بوش؟ عشان شكله مش حلو واهبل؟ ايه التفكير المراهق ده؟
انا عايزة افهم، احنا ايه اعتراضنا على بوش؟ انه رخم؟
 اصلا لا بوش ولا اوباما هم اللي بيكتبوا خطبهم عشان تحاسبوهم على كلامهم، ولا هم اللي بياخدوا قرار الحرب ولا اي قرار تاني، وكان مقصود انهم يسلطوا علينا واحد يقعد يهينا كلاميا تمن سنين وبعدها يجيبوا لنا واحد لسانه حلو عشان ما نصدق نسمع كلمتين حلوين، لكن السياسة هي هي، وحتى الكلام هو هو، بس بصياغة احسن
افففففففففففففففففففففففففف، ربنا ميز الانسان بالعقل، اعقل الكلام اللي بتسمعه وبتقراه والافعال اللي بتشوفها بصرف النظر عن الممثل اللي بيقوم بالدور، مش مهم هو عادل ادهم وللا رشدي اباظة، اوباما في خطابه هنا في مصر قال كل الكلام اللي كان بيقوله بوش، بس هو ربنا مديله قبول
واللي خلاه هو او اسرائيل مش بيضربوا ايران دلوقت مثلا انهم مش ح ينفع يعملوا كده، ولو بوش او ماكين ما كانوش ضربوا ايران دلوقت
وخلينا كده على طول... خلينا نسمع الكلام ونعقله بصرف النظر عن مين اللي بيقوله، وبصرف النظر عن تنميق الكلام، مش ح تفرق كتير ان واحد جاهل قال لك: ينعل ابو شكل امك وواحد تاني عشان متعلم ومتسأف بيقول لك: يلعن ابا شكل والدة سيادتكم
واللي هللوا لاوباما، ملزومين اخلاقيا، لله والتاريخ وللامانة، انهم يعتذروا ويقروا بانهم غلطوا
لان دي مش ح تبقى اول ولا اخر نصباية

Friday 19 February 2010

تعذيب/ قضية اسماء/ دحلان

ايه الكربسة دي؟
اولا قسم شرطة محرم بيك عذب اسرة كاملة، راجل وخمس ستات وهدد واحدة منهم بالاغتصاب والتفاصيل والفيديوهات هنا
------
ثانيا:
اسرائيل دي عايشة عشان احنا اللي عايزينها تعيش، مش عشان شطارتها، ايه الخيابة دي؟ المبحوح الله يرحمه لا متأمن وغالبا ما كانش مسلح وقاعد في فندق وكان نازل يشتري مش عارفة ايه في كيس كده، وبصراحة بقى، الله يرحمه كان مستهتر قوي بالتأمين، ده ماشي كده زي ما انا بامشي في صالة بيتنا، والامارات لسبب او لآخر قررت ما تأمنش الراجل ولا حتى ببودي جارد بيلعب تايكوندو. بالذمة واحد بالمواصفات دي في فندق في دبي يتقتل ازاي؟ لو بعت اخوك الصغير ح يقتله ويرجع عادي
ايه اللي موساد عمله ده؟ جندوا اتنين جواسيس فلسطينيين، وبعتوا حداشر واحد، حدااااااااااااااااااااااااشر واحد، وضربوا باسبورات، وطلعوا معاه في الاسانسير وقعدوا يراقبوه بطريقة عاطف السكري وشكلهم باين جدا، الله يرحمه ازاي ما خدش باله؟ وللا خد باله وطنش زي المرحوم يحيى عياش؟ 
(ملحوظة: طول فترة الشغل في المقاومة بييجوا في الاخر يزهقوا ويسيبوا التأمين، لاسباب كتيرة، منها انه زهق من الخنقة بتاعة التأمين، ومنها انه بيبقى شخصيا مر بمواقف توريه ان التأمين حقيقي ما بيعملش حاجة والمسألة مسألة عمر، ده كلامهم هم)
وبعد كل فيلم ميونخ الطويل العريض ده كله، كاميرات الفيديو قفشتهم والناس كلها بتضحك عليهم، واتعرفوا واحد واحد، ويقول لك براعة شرطة دبي.... براعتها في ايه؟ في انها شغلت شريط الفيديو واتفرجت عليه؟ 
انا كان ليا وجهة نظر والظاهر انها صح، الخونة هم اللي بيشغلوا اسرائيل مش العكس
المرحوم المبحوح كان شكله اشتاق للشهادة، رحمة الله عليه، بس انا قرفانة من اسرائيل، بصراحة انا اشجع اللعبة الحلوة، ودي لعبة خايبة اخر حاجة
ده غير بقى اني متضايقة جدا انهم دفعوا كل الفلوس دي لحداشر واحد غير الاتنين الجواسيس، ايه السفه ده؟ اللي معاه قرش محيره يجيب حمام ويطيره
-----------------------
اسماء
اسماء ابراهيم في مواجهة الدكتورة ماجدة جمعة اللي قالت لهم على فلسطين ولبنان وسيناء والاردن: اسمها اسرائيل غصب عنكوا
لا
الانسة دي صعبت عليا... كده الست دي يا اتجننت يا اتجننت
مالك كان بيقول لي اكيد الموضوع فيه حاجة تانية، مش ممكن تبقى غبية كده
بس طلعت الحكاية كده واوسخ من كده والقصة كلها هنا، والانسة فرايداي ما راحتش المحكمة
 








وسقطت سبعين في المية من الدفعة

اوختشي... انت مجنونة؟
القضية اتحجزت للحكم ليوم 25 فبراير
زي ما قلت لكوا احنا عايزين نعذبها.... او نعالجها بقى

Thursday 18 February 2010

مؤتمر للتضامن مع عمال طنطا للكتان

النهاردة الساعة ستة مساء في نقابة الصحفيين
والنبي والنبي تيجوا، دي ناس غلابة ومحتاجين يحسوا ان فيه حد معاهم
العمال اكتر ناس في الدنيا تستاهل التضامن.. تتضامن كده وانت مغمض عينيك عشان دايما قضيتهم عادلة
-----
قضية اسماء اتحجزت للحكم واحنا مستنيين ايمان تنزل الفيديوهات وتكتب بوست

هو انا كنت فين لما عمرو علي واحمد ماهر اتقبض عليهم

طب يا جماعة مش تسيبوا لي تعليق وللا تبعتوا لي على التويتر؟
انا لسه عارفة دلوقت حالا من انفيتيشن على الفيس بوك
طب ايه اخبارهم؟ حد عنده اخبار؟ حد راح لهم؟  ثم اتقبض عليهم ليه اساسا؟ حد عنده فكرة بملابسات الموضوع؟
ده انا ح اسود عيشتكوا كلكوا عشان سايبيني اعرف من جروب على الفيس بوك

احد الناجين من الهولوكوست يشبه الاسرائيليين بالنازي

في الفيديو ده مش عارفة انزل الكود
والناجين من الهولوكوست دول شكلهم ح يتقتلوا، هم باين تلاتة اصلا ونازلين شتيمة في اسرائيل وواحدة منهم اضربت عن الطعام تضامنا مع غزة


Tuesday 16 February 2010

الجلسة اتأجلت لـ2 مارس

ماحدش سألني يعني عملت ايه في الجلسة النهاردة؟
عقدت الجلسة واتكلم المحامين، ومحامين الحكومة طلبوا التأجيل والقاضي كان ح يأجل لشهر خمسة، قام محامي، قالوا لي اسمه ونسيته، انهار على المحكمة وقال لهم ده اسعاف، ما يحدث الان على المعبر جريمة، ح نسيب الناس تموت جوعا لشهر خمسة؟
قام القاضي أجلها لـ2 مارس، وحاول محامي الحكومة انه يعترض فهاجت القاعة وماجت والراجل سكت
---------
كلمت مركز هشام مبارك عشان اسماء وان شاء الله جلستها في محكمة حلوان الخميس 18 فبراير الساعة تسعة الصبح، سألت ايمان بدوي فين محكمة حلوان بالظبط (عشان هي ساكنة في حلوان) قالت لي جنب المترو!!! انا ح اسأل حد تاني ساكن في حلوان يكون بيعرف يروّح
ح تبقى الساعة تسعة الصبح ان شاء الله
----------
كورس السيناريو (الى جانب المرور اللي ما بيتحركش) خلاني اتأمل الناس.. تصدقوا فعلا احنا شعب خيالي وهروبي؟
الصيف دخل.. الصيف دخل... والناس مصممة تلبس الشتوي كنوع من انواع انها بتشتغل نفسها
وفعلا الستات خيالهم اوسع من الرجالة وعايشين فيه بيضحكوا على نفسهم، لقيت حوالي 6 رجالة في السكة خلاص لبسوا صيفي لأن الصيف دخل، بس اغلب الرجالة لسه لابسين شتوي.. لاننا شعب عاطفي بطبعه
اما الستات كلهم، بلا استثناء، بتلبس على اساس النتيجة المتعلقة على الباب، مش على ان الحرارة تلاتين
وجايبين شتوي جديد وح يلبسوه يعني ح يلبسوه، وكأن الحر ده (اللي خلى تكييف العربية ما يبردش من كتر السخونة) مجرد نوع من انواع الاستظراف علينا
بقيت نفسي اطلع راسي من الشباك واقول للستات اللي لابسين شتوي:
- لما يقول لك انت تستاهلي حد احسن مني يبقى بيخلع منك مش بيحبك وظروفه مش سامحة
- لما صاحبتك كل شوية تتصل بجوزك يبقى عايزة تعلقه منك مش زي اخوها وبتستشيره
- لما الحرارة تبقى تلاتين والشمس اورت راسك يبقى احنا في الصيف حتى لو كان شهر فبراير


زئير الأسد

زئير الأسد: 
يدخل فيران اسرائيل الجحر... ويطمن الأشبال... ويقتل ضباع العرب غيظا
(الا لعنة الله على ضباع العرب)

تليفون أم زينب معتاد بعد كل خطاب لسماحة السيد، بس النهاردة:
السيد حسن طلع دين ام الاسرائيليين... ربنا يخليهولنا ويحفظه


اللهم آمين

Monday 15 February 2010

بكرة الساعة عشرة في مجلس الدولة ان شاء الله

بكرة ان شاء الله اول جلسة للقضية المرفوعة ضد الجدار الساعة عشرة في مجلس الدولة زي ما قلت قبل كده واللي ما جابش توكيلاته يجيبها

است ماجدة محمد.... اسمها فلسطين غصب عن بوزك

قال ورافعة على اسماء ابراهيم قضية سب وقذف، طب والنبي تريحي قلبي يا ضاكطورة وتقولي لي سبتك وقذفتك بايه عشان ناري تبرد
قذفتك بالجزمة وللا لسه؟ 
لو لسه تبقى بت اي كلام، المفروض الطلبة كلهم كانوا واحد اتنين: جزم اخلاااااااااااااااع
جزم ارفااااااااااااااااااااااااع
بوز الجزمةةةةةة سنة الدباااااانة
اضرااااااااااااااااااااااااااااااااااااااااااب
لحد ما يدفنوا الدكتورة دي وسط جزمهم
انا متضامنة مع اسماء واشترك في الفيس بوك لو سمحت هنا عايزين اكبر عدد، وانا ح اكلم السفير ابراهيم يسري وح اكلم هشام مبارك ونشوف نقدر نتضامن معاها ازاي
قال اللي مش ح يكتب اسرائيل ح اسقطه... طب حد يشوفها لنا الضاكطورة دي ويجيب لنا قرارها... انا بقى ح احطها في دماغي
يعني هم نفسهم بينهم وبين نفسهم ما هماش عارفين ايه فين وليه؟ لا وعملتها دولة عربية.... ههههههههههههه
يا حلوة، طب وماله، زي ما الاسرائيليين مؤخرا سرقوا الكوفية الفلسطيني وبقوا يلبسوها ويقولوا دي اصلا يهودي خليهم كده، كل ما يلاقوا حاجة عندنا ينسبوها لنفسهم لحد ما يبقوا دولة عربية فعلا... ويبقى ايه المشكلة؟
بقى عايزة تسقطي العيال عشان كيان حفيد احد كبار المؤسسين له بيقول ما كانش مفروض يتأسس من اصله؟ 
ده احنا ح نسود عيشتك يا است ماجدة
سب وقذف؟ 
طب انا عايزة اكبر عدد من المدونات يطلع عينها واما نشوف ح ترفع قضية على مين وللا مين
وبرضه حد يدور لنا وراها ويعرف قرارها ايه الست دي
ده القطة كلت عيالها 

Sunday 14 February 2010

الاسرائيلية اللي اتشتمت في بطولة خواجاتي ح تروح دبي

البت دي راحت في بطولة مش فاكرة ايه، بس في بلاد الفرنجة، واتشتمت واتلعن لها سنسفيل جدودها عشان اللي اسرائيل عملته في غزة
طااااب بقى.. احنا عايزين نتضامن مع المناضليين الغربيين ضد العالم العربي الامبريالي

ده جر شكل وللا حاجة؟

بقى هالله هالله ع الجد والجد هالله هالله عليه، بنتي لازم تطلللللق
شهداء الكشح ما اتاخدش حقهم لحد اللحظة دي، شهداء نجع حمادي اتقدم الفاعل كبش فدا والمحرض اطرمخ عليه، المسيحيين اللي اتحرقت بيوتهم اتنازلوا عن المحاضر بالغصب، المسيحيين المصريين لهم حق في بناء كنائس من غير ما يطلع تلاتينهم كل مرة ويا تتبني الكنيسة يا ما تتبنيش، الانسان له حق في شغل المنصب اللي هو استحقه بمجهوده وعلمه بصرف النظر عن دينه، الدولة لازم تبطل تطلق على الناس دعاة يبثوا فيهم الكراهية لناس ابرياء لمجرد انهم مختلفين في الدين، المسلمين المصريين لازم يستوعبوا ان اللي امريكا بتعمله في العراق مالوش دخل بالمسيحيين اللي هنا، بل على العكس، له علاقة بواحد مسلم شهرته عوكل، هو اللي ساعدهم، مش المسيحيين المصريين، مش هم، هم مالهمش دعوة، مالهمش ذنب، مش هم مش هم... مافيش خليفة مسلمين اسمه السادات، ما تولعش سجارة بين الخطبتين، ابو جهل كافر بس ما ينفعش تقول عليه ابن قـ*** خـ** ... مش هم، مششششششش هممممممممم حتى بصوا الراجل المسيحي ده بيقول لكوا ايه؟



الراجل بيقول لكوا "روحوا اعملوا رجالة على اسرائيل اللي مبهدلة العرب مش علينا احنا اخواتكوا... ده مش جهاد ده، اللي عايز يجاهد يروح مع حسن نصر الله" اهو.. اهو... مسيحي ده وللا مش مسيحي؟ وبيقول ان اللي بيعتدوا على المسيحيين واخدين دعم من الامن


اندرو وماريو من حقهم اختيار دينهم والاقامة مع امهم، اي انسان في الدنيا من حقه اختيار دينه، دي شريعة الاسلام
كلللللللللللللللللللللللل ده بقى
ايه علاقته بتدريس الدين في المدارس؟
احياء ذكرى الشهداء باي طريقة يشوفها المسيحيين المصريين (حتى بمفتاح الحياة برغم انه رمز وثني مش مسيحي) هم احرار فيه
حتى باللغة القبطية اللي احنا مش فاهمينها وده معناه: الشهداء دول بتوعنا واحنا بنحيي ذكراهم اللي مش فاهم بنقول ايه يتكل على الله من هنا... برضه هم احرار فيه وحقهم تماما ماحدش يزايد عليهم فيه، سيطرة الكنيسة على المسيحيين... زي بعضه، مدام هم عايزين كده، الكلام عن "شعب الكنيسة" رغم انه متنافي مع المواطنة انما ما حبكش ندق على الناس وهم واخدين على دماغهم وبيعانوا، ده رد فعل طبيعي
بس مال ده برضه بتدريس الدين في المدارس؟ وماله كمان بالمادة التانية بقى مدام الموضوع اتفتح؟
تاني: هالله هالله ع الجد والجد هالله هالله عليه
المسيحية بتقول اعط ما لقيصر لقيصر وما لله لله.. ترجمة ده على ارض الواقع، ان ح يفضل المسيحي تابع للكنيسة وقيصر ده في النهاية قيصر يعني، اهو بيديله ضرايبه ويتقي شره وخلاص، ولو مش شرير يبقى خير وبركة
والمسيحية بتقول من ضربك على خدك الايمن ادر له خدك الايسر، دي تعاليم المسيح اللي قالها لليهود وهم تحت الاحتلال الروماني، امال هم تآمروا عليه ليه؟ عشان بيقول لهم ملكوتي في السماء وليس على الارض، يعني حاكمكوا يهودي حاكمكوا وثني ما يخصناش ده في حاجة، علاقتك بربنا حاجة، وعلاقتك بالدولة حاجة تانية خالص.. عشان كده اليهود رفضوا رسالته لأن اليهودية قائمة على تحدي الفرعون والثورة عليه. وعشان كده المسيحي لازم له يبقى له مجتمعه المرتبط به روحانيا وهو مفصول عن المجتمع المدني اللي هو مرتبط به قانونا، وماحدش يساله بتعمل ايه في الكنيسة ولا بتتكلم بانهي لغة ولا بتتصرف ازاي طالما هو بيعطي ما لقيصر لقيصر... يطلع قيصر بقى من دماغه
احنا لما اعترضنا على تدخل الكنيسة، اعترضنا على ان قيصر بيستغلها فيما ليس هو من اختصاصها عشان يسلب المسيحيين حقوقهم المدنية مع انهم بيعطوا قيصر كل حاجة والله وبيدفعوا ضرايب ومواطنين صالحين وزي الفل، يبقى ليه قيصر يضغط على الكنيسة عشان تخلي الناس يتنازلوا عن حقوقهم من قيصر في مقابل ما بيدفعوا له ضرايبه؟
لكن ماحدش اقترح ابدا اننا نقفل الكنيسة، ولا ان المسيحيين ما يدفعوش عشورهم للكنيسة، ولا ان مدارس الكنيسة ورحلاتها ومجتمعها الخاص يتلغي
اي مطالبة للمسيحي بإنه يتخلى عن ده يبقى مطالبة له بانه يتخلى عن مسيحيته
على الجانب الآخر، محمد، ايوة بتاع الاسلام ده، سوا انت مؤمن بيه نبي او مؤمن بيه مفكر او مؤمن بيه حتى موحى اليه من الشيطان، حياته ما تتقريش غير كدهو: ثورة اجتماعية سليمة، ثم كفاح مسلح، ثم تأسيس دولة يرفع فيها الاذان ويقام فيها الصلاة. ومحمد هو مصدر الاسلام الوحيد، مالوش مساعدين ولا سكرتارية
اي مطالبة للمسلم بالتخلي عن المبادئ دي يبقى مطالبة له بانه يتخلى عن اسلامه
آز سيمبل آز ذات
الغاء تدريس الدين من المدارس في ظل دولة كل ما تلاتة يجتمعوا في جامع تقبض عليهم، والغاء المادة التانية من الدستور مش ح يضر المسيحيين في حاجة، عشان ح يفضلوا هم شعب الكنيسة والكنيسة لها سلطتها عليهم، وح يفضلوا يروحوا مدارس الاحد يدرسوا الدين
مين اللي ح يطلع دينه ومن دينه؟ المسلمين، وانا مقدرة والله الغيظ، اذا كنت انا المسلمة متغاظة من المسلمين
بس دي مش طريقة للعلاج، دي طريقة لاشعال الفتن والاستفزاز
يا سلام بقى.. يا سلام بقى الناس اللي كل ما تسمع عن كنيسة بتتبني تروح تهدها لو عرفوا ان الدين والمادة التانية اتلغوا عشان المسيحيين طلبوا كده... يا سلام يا سلام يا سلام على اللي ح نشوفه، وساعتها لو حاجة زي دي تحققت ح ينعكس الوضع ويتحول المسيحيين المصريين من مظلومين الى ظلمة، لانهم احتفظوا بحقوقهم العقائدية وسلبوها ناس تانية
واحنا لا عايزين ظالم ولا مظلوم، احنا عايزين مساواة، ومساواة مش في اطار ح اذنبكوا انتوا الاتنين، ولا في اطار، ما دام الدين بينكد على الناس كده نلغيه
ولكن في اطار ان المصريين شعب ديني، يهمهم جدا انهم يمارسوا شعائرهم ويلتزموا بديانتهم بحرية ومن غير ما يعتدوا على غيرهم
الناس اللي بتطلع من صلاة الجمعة تحرق بيوت المسيحيين، مش حلها اننا ما نخليهمش يصلوا الجمعة مثلا
ولكن حلها ان يتقال لهم في صلاة الجمعة ان ربنا قال ولقد كرمنا بني ادم، ما قالش كرمنا المسلمين، كرم كل بني ادم، والناس سواسية كاسنان المشط، والتزامك بدينك يحتم عليك احترام وتبجيل اديان الاخرين والتعامل معاهم على قدم المساواة، ورواية احاديث الرسول والآيات من سورة الحج الخاصة مش بس بأن المسلم مش مفروض يعتدي على كنيسة او اي دار عبادة، ده مكلف من الله انه يحميهم ضد اي حد يحاول يعتدي عليهم
حصص الدين اذا كانت تبث الكراهية في الناس (انا مش عارفة ده حصل امتى، انا كنت باخد دين في المدرسة وما كانش فيه اي اساءة لا للمسيحيين ولا حتى لليهود) يبقى المناهج تتعدل
المادة التانية اذا كانت بتتاخد حجة عشان يترفع على الناس قضايا، المفروض يتعدل مسارها وتتاخد حجة للمطالبة بالعدل والاحسان وايتاء ذي القربى وزي ما الرسول قال:
وإن حاصرت أهل حصن فأرادوك أن تنزلهم علي حكم الله‏,‏ فلا تنزلهم علي حكم الله‏,‏ ولكن أنزلهم علي حكمك‏,‏ فإنك لا تدري‏,‏ أتصيب حكم الله فيهم أم لا؟‏(‏ أخرجه الإمام أحمد في المسند‏)
وده في الحرب فما بال في السلم
ده حل الكراهية اللي زرعت زرعا من ايام انور السادات ضد المسيحيين ايام ما السادات شتم المسيحيين وش واتهمهم بالحقد والتعصب والكراهية
زي ما استغلت عقيدة الاسلام عشان تشعل الفتنة الطائفية، من نفس العقيدة تتعالج امراض الكراهية... مش ان المسلمين يسلبوا عقيدتهم
ابدا ابدا ابدا
لا انسانيا حد في الدنيا يقبلها
ولا انا كمسلمة اقبلها
(ولا اي مسلم غيري على فكرة حتى اللي بيضرب بانجو وبيرة وما بيركعهاش)
ولا العقل ولا الحكمة يقبلوها
ببساطة لان المسلمين في العالم كله حاسين بالخوف والحصار، وفي مصر حاسين بخوف مزدوج، لاسباب سياسية واقتصادية كمان، ناس عندهم نسبة امية عالية، بيتحكموا بقانون الطوارئ والطوارق بقالهم تلاتين سنة، فترة التسعينات كان اي حد فيهم يصلي الفجر في الجامع يتقبض عليه، العراق وافغانستان... خصوصا العراق كانت صدمة عصبية شديدة قوي على المصريين بالتحديد دونا عن بقية الشعوب العربية والاسلامية بسبب ارتباط المصريين بالعراق، ماديا وعاطفيا كمان
كل دي حاجات بتخوفهم.. تهديدهم بالكلام ده بيخليهم يخافوا اكتر، وح يبقوا اعنف، ومش ح يبقى عندهم اي استعداد لسماع صوت العقل بالمرة
يوم ما ييجي واحد مسلم بجد (مش كده وكده) يقول لهم العدل والاحسان وايتاء ذي القربى، بعد ما يسمعوا ان المسيحيين وقعوا على الغاء الدين من المدارس وبيطالبوا بالغاء المادة التانية ح يطلعوا له صوت مش كويس ومش ح يسمعوه
وح يتوحشوا اكتر... مش طريقة دي للعلاج
ليه المسلمين عايزين المادة التانية:
اولا المادة التانية موجودة في دستور تلاتة وعشرين
ثانيا المادة التانية موجودة في معظم الدساتير في الدول اللي فيها اغلبية مسلمة ودي حماية لهم
لان الدول اللي شالت المادة دي زي تونس وتركيا مثلا طلعوا قوانين لحظر الحجاب وتعدد الزوجات مثلا.. يعني الغاء المادة دي بيهدد المسلمين في مصر انهم يتمنعوا من لبس اللي هم عايزينه حجاب بقى او نقاب، وبيهددهم ان الادان يتلغي زي ما فضل ملغي في تركيا فترة وفين على ما رجع، وبيهددهم يمكن كمان بالغاء اقامة العيد في الخلاء....إلخ، يعني بيهددهم انهم يبقوا مش مسلمين... ببساطة
ومطلب اخير للمسيحيين، ما تخلوش ناس لها اهداف سياسية تركب على كتافكوا... اللي هم الليبراليين بدون ذكر اسماء
الريبراريين دول لهم اجندة رأسمالية متأمركة فرعونية عنصرية نازية تطبيعية ما اظنش ان اغلب المسيحيين يقبلوا بيها، لان اغلب المسيحيين فقرا زي المسلمين ومتضررين من الراسمالية، واغلب المسيحيين مات لهم ناس في الحروب مع اسرائيل، والكنيسة المصرية حاربت الاحتلال الانجليزي واغلب المسيحيين بيتفاخروا بالتاريخ ده
انتوا لكوا حقوق انسانية ودينية ووطنية ولكوا تاريخ وطني مشرف ضد الاستعمار، ما تدوش فرصة لناس تركب على مطالبكوا الحقيقية الصادقة الحق وتلبسها باغراض واهداف مش ممكن ابدا ح تجيب لكوا حقكوا
بالعكس، الناس ح تسيب الليبراليين (اللي معظمهم اسمهم محمد واحمد ومصطفى) وتمسك فيكوا انتوا.. وعلى الجانب الاخر، اي حد مسلم ح يتضامن مع مطالبكوا المشروعة ح يتهم بانه بيهدد المسلمين في دينهم
دي قلة عقل دي... مفهومة طبعا، انا اتفهم قلة العقل الناتجة عن الاحساس بالمرارة والظلم والذل جدا
بس قلة العقل بتضر ما بتنفعش، خلاص تفهمناها اهو... نصلحها بقى
حدد مطالبك كمواطن مسيحي له حقوق مدنية ودينية ووطنية وانسانية من غير ما تتعرض لدين المسلمين وكأنك عايز تعاقبهم، من الاخر كده المادة التانية والدين في المدارس والادان، انت مش ح تستفيد حاجة كمسيحي من الغاء ده كله، لانك كمسيحي مش ح يفرق معاك قيصر ملحد وللا مسلم .. سيدنا المسيح قبل في حياته ولاية قيصر وثني يعني، كل الحكاية: انت عايز تعاقب المسلمين
وطبعا انا متفهمة تماما انك عايز تعاقبهم، انا فاهمة والله، وحاسة بيك تماما، وانا كمان عايزة اعاقبهم على فكرة ومتغاظة منهم قوي
لكن دي مش طريقة حل، دي طريقة تعقيد
المسلمين خايفيييييييييييييييييين ومافيش صوت عاقل ح يعرف يكلمهم بالطريقة دي طول ما فيه اصوات بتركب على المطالب المسيحية المشروعة وتحملها تهديدات للمسلمين
ده تعمد اشعال بقى

سؤالين

لو زويل ما اخدش جايزة نوفل كان حد هنا في مصر دري بيه وللا عبره؟
لو زويل فضل قاعد في مصر وما سافرش كان اخد جايزة نوفل وللا كان زمانه مدرس علوم في اي مدرسة حكومي العيال بيحطوا له بدرة العفريت في قفاه؟

Saturday 13 February 2010

هو المسئولين بيبقى عندهم اود نوم في مكاتبهم

تحديث:
معلش معلومة عرفتها من الشباب على التويتر ان المستندات دي راحت للجزيرة وحماس وما رضيوش ينشروها
الجزيرة ما نشرتهاش عشان مش ناقصة مشاكل مع فتح لانهم شراشيح - تلامذة عوكل بقى اسطى الشرشحة الاول - وحماس رفضت تنشر المستندات عشان هم هاني شاكر والراجل اخد لهم الفيديو فطبعا انهاروا ع الكرسي يا مرسي، حتى كان فيه اخ فلسطيني امبارح متغاظ من حماس لان عندهم قد المستندات دي عشر مرات ورافضين ينشروها بسبب هاني شاكر سيندروم اللي عندهم



احنا عمالين نقول لاسرائيل مالكيش لازمة لينا، من ساعة ما حدفوكي علينا واحنا ايامنا سودا، ففكرت ان يبقى لها دور فعال في حياتنا، تجيب لنا الاخبار، اهي تسلينا بدل ما احنا قاعدين كده مش فاهمين حاجة.. هو انتوا يا حزين انت وهو مش ح تبطلوا تسيبونا لحد ما نعرف الاخبار من اسرائيل؟ احنا بنتضايق كده

Friday 12 February 2010

هم بيتجاهلونا ليه؟

هو احنا كل شوية نعرف معلومة في وسط الكلام؟ يعني ما عرفناش ان فيه مرشدين سياحيين اسرائيليين في مصر بيتعاملوا مع شركات سياحية مصرية الا لما اتنين ابعدوا؟ ينفع كده يعني؟ هو كل شوية؟ احنا قفانا ورم على فكرة
لا وايه؟ ابعدوهم عشان بيقولوا ان اليهود بنوا الاهرامات، يا سلاااام، امال هم مشغلينهم ليه اساسا؟ هو فيه صهيوني ما بيقولش ان اليهود بنوا الاهرامات؟ ولا حتى اللي مش صهيوني، ده جون ستيوارت قال كده
ومنتظرين ايه من ناس عاملين صورة زي دي وناشرينها في موقع اخبار؟
انا عايزة افهم ايه الذلة اللي ماسكاها علينا اسرائيل عشان ندي لها غازنا ببلاش ونستورد احنا الغاز بفلوس ونقعد نغني ظلموه؟ بنصرف عليها ليه عشان تتقدم اكتر واكتر وتحقق تقدم في الصناعة والبحث العلمي وتستقل بامكاناتها عن امريكا وعن اي حد واحنا كل يوم نبقى تابعين اكتر واكتر وفوق البيعة نسيب عيالنا عواطلية ونشغل لهم العواطلية بتوعهم
فيه ايه المرشد السياحي الاسرائيلي زيادة عن المصري؟ انا مش ح اتكلم لا على تطبيع ولا على اهرامات ولا اسرائيل كيان عنصري غاصب ولا نيلة
انا ليه عيالي قاعدين على القهوة، خريجين سياحة وفنادق، وعواطلية واجيب انشالله حتى فلسطينيين وللا سودانيين وللا اي جنسية تانية، حتى لو عربية، اشغلهم بدل عيالي يعني؟ 
وماحدش يقول لي بيعرفوا لغات كتير، انا شخصيا اعرف ترجمانات ما بيعرفوش يقروا ولا يكتبوا ولبلب في سبع لغات
وخريجين كليات سياحة وفنادق بيعرفوا اكتر من لغة زي القرود، واللي ما بيعرفش عنده استعداد يتعلم لو ح تشغله
هي مصر دي ضرتك يا عوكل؟ ومش مزعلك غير الاهرامات اللي مبنية لناس ماتت؟ طب واللي عايشين؟
ما تبطل تتجاهلنا كده، رد علينا احنا مش عايشين معاك هنا في البيت؟ على طول يا بتاكل يا بتتفرج على الماتش يا قاعد مع صحابك على القهوة وكل يوم والتاني يجيلنا تليفونات غريبة تقول لنا كلام غريب؟

Thursday 11 February 2010

واتخنقت من الاهلاوية كمان

ايه هيستريا النقط والمراكز دي؟ يا ساتر يا رب على النفسنة، كل ده عشان كسبنا اربع ماتشات؟ متضايقين اننا فرحانين؟
طب ماشي، احنا المركز الخامس وبفارق نقط كبير مع الاهلي، وانا برضه مبسوطة، عشان عندي ثقة في حسام حسن ومش عايزاه يجيب لي الدوري
انا يكفيني انه قبب العيال الصغيرة على وش الدنيا ويعمل فريق كويس ومتماسك ويدربهم كويس قوي وينظمهم ويبقى ده انجازه السنة دي بس وبعد كده نتكلم مش قاعد ماسك في دار المسنين ... يا باي على النفسنة
انا نازلة بقى بدل ما ادب خناقة تالتة دلوقت

الشرطة في دمياط قتلت واحد زي ما اتقتل حسن المغناوتي

مش ناقص غير يقطعوا راسه ويدوها لنعيمة وتمشي مجنونة في الشارع
بالنسبة لشهادات الشهود بخصوص ملاك سعد
التشانل كلها هنا وفيها الجنازة وشهادات الشهود والشاهد ابن عمه وبيقول القتل كان عمد.. واللي بنفس اهمية القتل العمد قفل دار عبادة عشان الجماهير الغفيرة مش عايزة الناس تصلي
بالنسبة لردود الافعال المقرفة بتاعة امبارح، انا خلاص، انا ح ابتدي اكرهكوا واعمل زي ايمان بدوي اللي قررت تبقى فلسطينية وماندي فهمي اللي قررت تبقى عراقية وغادة اللي بقت عشوائية وكل ماحد يكلمها تقول له: انت ح تسكت وللا اشقك؟ وداليا اللي بتكلم والقطط والكلاب وجات تثبت لي ان القطة فعلا مشيها بطال بدليل ان بنتها الكبيرة سارحة في العمارة اللي جنبهم والحمد لله انها عرفت تنقذ البنت الصغيرة من الجو الموبوء ده وكلهم بيكرهوكوا من عمايلكوا
انا عمري ما شفت ناس مسيطرة عليهم حمية الجاهلية بالطريقة الجنونية دي، ده حتى قريش كان عندها قلب شوية ولما الارضة اكلت الصحيفة احرجت من نفسها
لمجرد ان امين الشرطة قتل مسيحي وطبعا ما ينفعش تقولوا يستاهل فبقيتوا تقولوا ليه قلتي؟ واكيد الرصاصة طلعت بالغلط، دول حتى كانوا سمنة على عسل، وليه بتقولي مسيحي؟
يا سبحان الله، عشان هو مسيحي، وعشان الحكومة قافلة لهم المصلى بتاعهم وموقفة امن عشان ما يصلوش وكمان تقتل لهم واحد لكن الواحد ده في داهية، وفي داهية يصلوا
انا مش فاهمة ازاي تقفل لهم المصلى وعادي كده ولا ادب ولا حيات، انا لو حد منعني اصلي ح اقيم صلاتي في الشارع وخلي حد ييجي يكلمني بقى
قال ومصدقين الرصاصة طلعت بالغلط، الرصاصة طلعت بالغلط وانا بانضف السلاح بتاعي دي كان بيقولها يوسف وهبي لما يضرب نار على ميمي شكيب عشان قالت له انها رايحة عند الخياطة وطلعت عند محسن سرحان بيشربوا براندي مع بعض
رصاصة طلعت بالغلط ازاي يعني؟ ويعني ايه اقول لكوا امين شرطة تقولوا لي جلد ذات؟ انا ما اعرفش ان حد من اللي بيدخل هنا بيشتغل مع الشرطة
وانا شخصيا ما باشتغلش مع الشرطة عشان الشرطة تبقى ذاتي اللي باجلدها
ايه القرف ده؟ 
وليه الواحد يركب نفسه ذنب ما عملوش بانه يدافع عن جريمة عشان عصبية الجاهلية؟ مرة تقولوا اللعيبة الجزائريين هم اللي عوروا نفسهم وانت لا انت التراس ولا انت الامن اللي طرمخ عليهم بس اخدت ذنب شهادة الزور معاهم، ومرة تدافعوا عن الجدار وانت لا انت مبارك ولا انت احمد ابو الغيط بس اخدت ذنب انك تدافع عن ظلم، وواحد ياخد رصاصة بعد ما اتقفل له دار العبادة بتاعته، دار العبادة، اللي بيدخل يصلي فيها لربنا تقوموا تعززوا على القاتل والظالم؟  طب انا عايزة اسمع مسجد اتقفل في المانيا وللا النرويج واشوف خلقة حد من اللي قعد يعزز امبارح
انا مش ح احبكوا تاني خلاص
هو بيريس بس اللي مسلم

بعض اليهود يطلقون حملة ضد قانون ما يسمى بـ"عودة اليهود" لإسرائيل

اليهود في اي حتة في العالم عندهم قانون بيمنحهم حق انهم يهاجروا فلسطين المحتلة دون قيد او شرط واسمه قانون العودة
بعض اليهود اللي ضد الصهيونية اطلقوا حملة على الفيس بوك ضد القانون ده 
وبعدين... ايه ده؟ ههههههههه
------
يوم السبت 13 فيه وقفة احتجاجية ضد الجدار الساعة اربعة العصر قدام نقابة الصحفيين
--------
يوم الثلاثاء 16 فبراير الجلسة بتاعة قضية الجدار في مجلس الدولة الساعة عشرة الصبح وياريت كل واحد ييجي ويجيب التوكيل بتاعه للي لسه ما جابش التوكيل
وللا اروح اجيب اليهود اللي ضد الصهيونية دول ينفعونا؟

يا نظيف اصحى وفوق ح ترجع بينا لعصر فاروق

اللهم صلي ع النبي، اللهم صلي ع النبي، الله اكبر عليهم
الا هو مافيش حد بيفهم في البلد دي غير العمال.. احنا نولع في نفسنا ونسيب البلد للعمال يمكن يعرفوا يعملوا فيها حاجة
عايزة اعرف مين اللي بيعملهم الهتافات العميقة دي؟  في هتاف واحد بيلخصوا وبيحسموا كل الطنطنات بتاعة المثقفين والريبراريين والمطبعين وخلافه
"يا نظيف اصحى وفوق ح ترجع بينا لعصر فاروق"
لا نفع مع العمال غسيل مخ ولا مسلسلات فاشلة تأليف دكتورة ما فلحتش في الطب فقررت تتحفنا بانها تشرح دماغنا

فصل اميرة الطحاوي من عملها بسبب مقال

انتوا ناس طيبة وقلبكوا فيه الخير عشان كده ربنا رازقكوا من وسع
اميرة الطحاوي الصحفية والناشطة والمدونة كانت بتشتغل في الاذاعة الهولندية، جات اذاعة هولندا بالقاهرة نشرت خبر عن غشاء البكارة الصيني فاكرينه؟ وعملوا لنا فضيحة واحرجونا في نفسيتنا وخلوا اللي ما يشتري يتفرج علينا وكل الناس بقت تلت وتعجن في سيرة البنات المصريات اللي كل واحدة منهم مشيت استغفر الله العظيم وعايزة تستر نفسها بغشاء البكارة الصيني وبقت كل القنوات تعمل برامج وواحدة من الاون تي في كلمتني عشان اتكلم في الموضوع ده وقلت لها انا باتكسف راحت ضاحكة، مش عارفة ايه اللي بيضحك؟ :) ايوة فيه حاجات معينة بتكسف الانسان ازاي يعني الواحد يتكلم في الكلام ده؟ 
المهم، اللي نشر فكرة ان الصين صنعت هاذوها المنتج خصيصا للبنات الشرقيات او بالاحرى للبنات المسلمات من الاخر كده كان موقع الاذاعة دي وقعدوا يحللوا بقى وجابوا لنا اطباء نفسيين يعالجونا من امراضنا في التلفزيون
قامت اميرة حققت الامر واتضح ان كل ده فيلم، وان المنتج مش مصنع لينا ولا حاجة وان الكلام عن انه مصنع لينا احنا بالذات ده خطاب كراهية وراحت ناشرة المقال وجايبة مصادرها مظبوط وكل حاجة تمام ومافيش اي حاجة، مهنية مظبوطة
فيها حاجة دي؟
لا، ليه وليه بقى؟ اترفدت
كده... اترفدت من شغلها
التفاصيل كلها والمقال موجودين في اللنك ده 
وهي لم تسئ للاذاعة الهولندية في حاجة، باي حق بيفصلوها من عملها؟ عموما هي رافعة قضية دلوقت
عايزين نصيح لها بقى يا شباب

امين شرطة يقتل مواطن مسيحي في المنوفية

تحديث الساعة 13:40 الخميس 11 فبراير 2010
احالة الشرطي قاتل ملاك الى محاكمة عسكرية
وامين الشرطة مش مصاب ولا حاجة، كان مواطن شووجاع سمع انه مصاب، لا مافيهوش حاجة
----------------------
تحديث الساعة 00:17 الخميس 11 فبراير 2010
صاحب مدونة مواطن شووجاع بيقول انه عرف من بعض الاهالي هناك ان ملاك كان متعود السهر مع امين الشرطة
احنا مش ح نعرف نسلك مع الناس في الارياف، كل واحد ح يحكي حكاية شكل، والشرطة ما تتخيرش عنهم
------------
تحديث الساعة 23:45 الاربعاء 10 فبراير 2010

مصراوي بتقول حكاية خامسة، بتقول ان المسيحيين قالوا ان امين الشرطة اطلق العيار الناري اثناء مشادة كلامية والشرطة بتقول ان كان بينضف سلاحه قام طلعت طلقة بالغلط
الشاب اللي صور الفيديوهات ح يرفعها بكرة ان شاء الله
امممم، انا مش عايزة اقول اراء، بس الاقرب للمنطق انه يكون اطلق النار اثناء مشادة بينهم، لا انه يكون نداه وقعده جنبه وراح مموته فجأتن ولا بينضف سلاحه
بينضف سلاحه دي بيقولوها على حرس الحدود اللي بتقتلهم اسرائيل ويقولوا زميله كان بينضف سلاحه او هو كان بينضف سلاحه
وبرضه ح نشوف لسه
------------
تحديث الساعة 17:00 الاربعاء 10 فبراير 2010
دي رواية اخرى على مدونة مواطن شوجاع بيقول ان ملاك كان بيهزر مع امين الشرطة وهو بينضف سلاحه قام طلقة طلعت بالغلط. مواطن كمان ذكر ان المسلمين اعترضوا على تحويل الاودة اللي كانوا بيصلوا فيها الى كنيسة والامن حط عليها حراسة وبيقول ان مصدره احد سكان المنطقة
كمان ح تلاقوا تعليق على البوست ده من المنوفية من واحد ساكن جنب قرية تتا بيقول ان المسيحيين عاملين مظاهرات، وان الامن مظبط وماحدش يعرف ملابسات الحادث الحقيقية دي رواية رابعة للحادث
وما زلنا في انتظار بيان خالد علي ومركز هشام مبارك

--------------

تحديث الساعة 18:36 الاربعاء 10 فبراير 2010:
مركز خالد علي اللي دايما انسى اسمه :) عارفاه انه خالد علي وبس ومركز هشام مبارك الاتنين بيتابعوا دلوقت، والمدون سجل شهادات الشهود وح ينزلها ان شاء الله، ودي رواية اخرى للخبر
واما نشوف بقى الحكاية ح توصل لفين ولو فيه تفاصيل او تصويبات للخبر ح انزلها وح نتابع مع خالد علي ومركز هشام مبارك ان شاء الله
------------
كتب البوست في تمام الساعة 17:37 الاربعاء 10 فبراير 2010
ايه الحكاية الغريبة دي؟
واحد النهاردة اتصل بيا وصحاني من النوم على مصيبة، قال لي في قرية تتا مركز منوف بالمنوفية امين شرطة قتل شاب مسيحي وانا (اللي كلمني) رايح دلوقت اشوف فيه ايه خليك معايا
باكلمه دلوقت وهو سجل شهادات الشهود
الامر كالآتي:
قرية تتا فيها حوالي من عشرين الى تلاتين اسرة مسيحية، عاملين اودة صغيرة كده يصلوا فيها، ما تتسماش كنيسة، هي ينفع تبقى مصلى، بيصلوا فيها مرة كل شهر وبيبعتوا الاطفال الصغيرة تاخد فيها درس مسيحي
جم في العيد اللي فات ده (ده كان عيد منيل ده) انطسوا في عقلهم وصلوا في المصلى ده، راحت ناس من كبار القرية مع الشرطة وقالوا للكبير بتاع المسيحيين: انت نسيت نفسك وللا ايه؟ وبهدلوه وشتموه وقفلوا المصلى وحطوا عليه حراسة امنية
حلو لحد كده؟ طبعا حلو، حلو قوي، حلو خالص، هو فيه في الدنيا احلى واجمل من كده؟ ده انا مش عارفة اعمل ايه من كتر الحلاوة اللي ساحت راحت مطرح ما راحت
ناس تصلي؟ طبعا نسيت نفسها
مش مهم، اهم سكتوا، سكتوا ما اعترضوش، لا قدموا طلب ببناء كنيسة (على حسب كلام الشاب اللي كلمني) ولا اعترضوا على قفل المصلى ولا فتحوا بقهم
ليه يابني؟
خايفين، عددهم قليل والناس في المنوفية وحشة قوي مش زي الصعيد
ده كلام الصديق اللي راح لانه عاش في القرية دي فترة
الناس وحشة ازاي يا خويا؟
قال لي: الناس في الصعيد بيتعاملوا راس براس وعيلة لعيلة، لكن قرية تتا دي بالذات ماحدش يقدر يسمي ابنه بشوي، يبقى اسمه في البيت مينا وللا بشوي واسمه في المدرسة عادل والا يطلع تلاتة
طب وبعدين؟
قال: وبعدين الحراسة محطوطة بقالها فترة، جه امين شرطة (بلا اي مبرر) قال تعالى يا ملاك، ملاك سعد ده 24 سنة نجار، واد غلبان يعني والظاهر مالوش سند، راح ملاك قال له نعم؟ قال له اقعد، الجدع قعد عادي راح مطلع الطبنجة وعمرها قدامه وقال له: الطبنجة دي ميري وكل حاجة ميري
واخدين بالكوا من الكلمة الاخيرة دي: كل حاجة ميري
وراح ضاربه رصاصة في قلبه
ومات طبعا عشان ماحدش يسأل سؤال غبي بس
الشهود قالوا لصديقنا احنا حاسين ان الموضوع مش واقف عند امين الشرطة ده والا ماتجيلوش جرأة يعمل كده، ده فوقيه حد وهو اللي مديله الاوامر دي
ولسه ما نعرفش اسم امين الشرطة
نعم؟
نعم يا امن نعم؟ ايه اللي بتعمله ده؟ فيه ايه؟ عايز مننا ايه؟ عايزين مننا ايه احنا سايبين لكوا البلد باللي فيها تعملوا ما بدا لكوا، ولسه قابضين ناس من يومين، من غير سبب، وتموتوا عيل من غير سبب
فيه ايه؟
عموما هو صديقنا لسه هناك، لما يرجع ح ينزل الفيديوهات ويبعت لي اللنكات وينزل تفاصيل اكتر واي حاجة ح نعرفها ح نقولها لكوا
دي المعلومات اللي وصلت لي لحد دلوقت ولو عرفت اي حاجة زيادة، او اي تصحيح في المعلومات على طول ح انزلها
اصل الحكاية كده زي ما حكاها الناس حاجة من ورا العقل
اكيد في خيط مفقود، مش ممكن نكون وصلنا لهذه الدرجة من الجنون... دي بقت مصحة عقلية بقى مش بلد
بس عموما، المعلومة الاكيدة دلوقت ان امين شرطة قتل مواطن، وتحت اي ظرف، المواطن ده مسلم مسيحي هندوسي، نجار او مهرب مخدرات، يعني ايه امين شرطة يقتل مواطن يعني مش فاهماها دي
------
نسيت اقول حاجة، صديقنا اللي هناك بيقول لي الناس خوافة قوي، وخايفين ان الامن يمسكهم يشبحهم وياخد نسوانهم عشان يهددهم يغيروا اقوالهم
احنا عايزين بقى نقف جنب الناس دي