Monday, 1 February 2010

حماس بتهني وتبارك وبتقول لنا بالمناسبة السعيدة دي هات قطمة شنداوشت فول

 لا حول ولا قوة الا بالله، انا لما قريت بيان حماس عيطت
ومش غايظني غير اللي زي عمرو اديب: اااااه، ماهم بيقولوا كده عشان محتاجين لنا
اخص اخص اخص، الندل لما يحتكم يقدر ولا يعفيش، اخص اتفووو، هو انا لما واحد جعان يقول لي اديني قطمة يا ست الناس ربنا ما يرقد لك جتة اقول له انت بتدعي لي عشان عينك في الساندوتش يا لئيم؟ 
ده بدل ما نتكسف من نفسنا اننا اضطرينا الناس تتكلم كده معانا؟ هي دي لغة دبلوماسية دي
" إننا نناشد وندعو القيادة المصرية باسم الرابط الديني، والرابط القومي، والرابط الاجتماعي، والرابط الوطني، والرابط التاريخي، وباسم روابط المشاعر والأحاسيس أن يتم تجاوز المرحلة السابقة من التوتر مع أهلنا وشعبنا وقيادتنا في قطاع غزة".
مشاعر واحاسيس؟ الناس بتقول لنا بالذوق: اذا كنتوا البعدا عندكوا دم وبتحسوا عليه
اه يا قلبي، ايه وجع القلب ده؟ 
وانا باشكر الاخوة الفلسطينيين ياعيني اللي احتفلوا يا عيني بفوز مصر يا عيني، هو صحيح المصريين الجدد عندهم برود عاطفي زي ما مهندس حر قال، بس تصدقوا بالله الحركة دي اثرت فيهم قوي؟ ياااااااااا يعني المصريين الجدد دول مش بس ما بيحسوش، لا وكمان هايفين، بقى كل تقطيع القلب ده ما حوقش فيهم واللي حوق احتفالات بالماتش؟
هو انا كنت لمت على غزة انهم احتفلوا بالفوز، بس خلاص بقى، خليكوا معاهم كده، انتوا الظاهر فاهمينهم اكتر مني
ده حتى المصريين الجدد راقوا من ناحية الجزيرة عشان اذاعوا اغاني مصرية واحتفلوا لهم بالفوز
ياااا، هي كده يعني؟ طب سهلة يا شباب
سهلة يا جدعان اهي، ايدكوا عرفتوا ايه اللي بيزعل المصريين الجدد وايه اللي بيفرحهم، يزعلهم انك تغلبهم في ماتش ويفرحهم انك تشجعهم في ماتش، سهلة بقى، ما تبقوش مخكوا ضيق، خدوهم على عقلهم زي ما حماس عملت
يعني كان جرا ايه لو سوريا وايران وحزب الله والجزائريين هنوا مصر بالفوز؟ واذاعوا اغاني ونزلوا الشارع يهيصوا؟ كان جرا لكوا ايه؟ الكلمة الطيبة صدقة يعني وتحل مشاكل وصداع كتير، ماهي قطر الناصحة اهي انتهزت الفرصة وهاتك يا زغاريد عشان الماتش
والله مش قلة قيمة ليكوا، يعني هو لما تجبر بخاطر مراتك وتقول لها انت احلى من هيفاء وهبي يبقى بتقل قيمتك؟ 
وبعدين بالذمة الغلابة دول يتزعل منهم وللا يتزعل عليهم؟ انا كنت زعلانة منهم امبارح، وماما حننت قلبي عليهم. خلاص بقى
اديكوا عرفتوا، ما تفوتوش ماتش لمصر، ولا حتى في الدوري المحلي، ولو مش فاضيين اسألوا على النتيجة ومكالمة تليفون بالكارت مش ح تكلفكوا حاجة، مش لازم تدخلوا دولي يعني، كلمتين حلوين كده، مش ح ياثروا في الحكومة بس ح يأثروا في الناس
واديني باحذر، المصريين الجدد في تزايد والمصريين بشرطة ابتدوا يبقوا اقلية
وعليكوا وعلى صور حسن شحاتة بقى وجدو وابو تريكة وكده يعني، دول ياعيني امبارح قاعدين يكلموا بعض ويقولوا: شفتوا الناس فرحانة لنا.. شفتوا العرب مش بيكرهونا.. دول فرحانين لنا
يا عيني
طب والله غلابة
ومن هنا ورايح يا سيدي لما تلعبوا معانا ابقوا سيبوا لنا الماتش يعني فيه ايه؟ انتوا بالنسبة لكوا ده ماتش، احنا هنا بالنسبة لنا دي غزوة، ما تجبروا خاطرنا..ليه رزالة دي؟ الله
احبطوا محاولات عمرو اديب واللي فوقيه
ايه ده الغلب ده كله؟ ايه ناس يتجبر خاطرها بماتش وناس تانية تقول لنا مشاعر واحاسيس؟ انا مش قادرة استحمل الفيلم الميلودرامي ده
الا العوايل اللي اتهجرت من بيوتها في قنا رجعوا وللا لسة؟ 

15 comments:

lastcrazyboys said...

طــب والله ..انتي فعـــلاً طلعتي باين عليكي " أم بــدوي " عالآآآآآآخر

عنـــدك واحد مكانش طايق يسمع سيرة حمـــاس ..بعد لقـــاء عمـــرو أديب ...والموضوع بتاع الاحتفــالات دي

خلاااااص ..ولا كأن حـــاجة حصلت

ومش فاضل في دماغي غير كلام السيد : خالد مشعل
" اختبـــرونا "
" حمـــاس لا تأخذ أوامرها من أحــد"

وأخيـــرا ..والأهم
" الحب الحقيقي يتضح ..والمزيف يبان مع مرور الوقت "

والله رغم كل مآخــذكم على اللقـــاء ده ..انا شايف انه كان من مصلحة حماس

وآدي عينـــة قدامك ..اهو

qrique said...

دلوقتي هما عايزين شندونتش الفول و احنا مش راضيين نديهم قكمه......فهيبوصولنا فيه و هتحصلنا حاجة مش كويسه

Sahran said...

أخت نوارة

سلامة قلبك من الوجع والهم

يبدو أن الكرة أصبحت تحدد شكل العلاقات بين الدول على ما يبدو ,

ورغم كل شيء بدي أقول لك مبروك الفوز ,
صحيح أنا ما كنت مع اللي خرجوا يحتفلوا , ولكن فعلا أنا كنت سعيد بالفوز
والمشكلة هي في التركيز الإعلامي على فرحة أهالي غزة بفوز مصر في الماتش , وأنا أتذكر منذ كنت صغيرا بأن الموقف كان مشابها تماما , والشباب عندنا إشي أهلي وإشي زمالك , يعني عايشين الجو تمام

أنصحك بترك الحديث في السياسة لو بدو يوجع قلبك , واقلبيها مدونة تفاريح يمكن قلبك يرتاح


تحياااااااااااااتي لك


ودمت سالمة

Anonymous said...

أن شاء الله آخرة الظلم ده سودة و هتقلب على دماغنا فى الآخر ، انا مش عارفة هي الناس نحست و لا احنا اللى لسة عندنا شوية أحساس فاضلين . مش فاهمة أحنا فاضل يحصلنا أيه أكتر من كده ده ؟ الواحد بقى بيخاف يغمض عينه و ينام لا يموت من القهر وهو نايم من غير ما يحس . أما بخصوص " عمرو أديب " فهو من بدرى معروف ديته واحد بلمس ييحاول يلعب على الوتر الحساس عند الناس علشان يحسسهم أنه قلبه عليهم و حنين يا حبة عيني و هو اللى فى دماغه بيوصله بطريقته . اللهم عليك بالظالمين
نور على .

حكاية مكررة said...

خوفا ان اقع عرضة لقوانين أشبه بالعرفية .. تصل أحيانا إلى محاكمة النوايا(والساكت متهم) واتهم اني من محبي حزب الله
اقول مبروك الف مبروك يامصر .واعتقد حماس فعلت ما فعلت من اجل ذلك.

Dr. Eyad Harfoush said...

نحن شعب بلا ثوابت، وذاكرته الوطنية صفر لهذا كل يوم في شأن ونعامل قضايانا بانعكاسات انفعالية

Anonymous said...

السلام عليكم

انا بتابع مدونتك من فترة ومعجبه جدا بكتاباتك ... بس للاسف انا مليش في التدوين ولا عرفت حتى اعمل كوممنت باسمي

انا بس شوفت فيديو للواد الجزائري اللي كان بيتكلم بعد ماتش الجزائر الي خسرناه
وحبيتك تشوفيه انتي كمان ورفعتهولك عاللينك ده
http://www.mediafire.com/?ezhyzzemmyy

ارجو اني مااكونش ازعجتك :)

سلام :)

سيد المعلمين said...

واحد بيسأل الريس : ينفع واحد مسيحي يمسك الحكم؟
قال له : و لا مسلم يا ... أمك !.

Anonymous said...

طبعا كلنا فرحنا بالفوز الكروى المميز لأبطال الكرة الافريقية, لكن ان نختزل كل هموم البلد فى مبارة كرة , وكأن الفوز بالكاس قد حل كل مشاكلنا واصبحنا من الدول المتقدمة, فذلك تماحك ذليل من الأعلام ومن الرسميين. فهل الفوز الرياضى يغطى على البطالة والفقر والفساد والدكتاتورية والدولة البوليسية القمعية حسن على

مواطن مصري said...

انا عندي فكرة بلا انتخبات بلا مصالحة احنا نخلي فتح و حماس تلعب نهائي كاس و الي تفوز تمسك السلطة :D'

و نفس الكلام في مصر دوري الاحزاب بلا انتخبات بلا مجلس شعب

الي يفوز بالدوري يشكل الحكومة :D

sal said...

ومن هنا ورايح يا سيدي لما تلعبوا"
معانا ابقوا سيبوا لنا الماتش يعني فيه ايه؟ انتوا بالنسبة لكوا ده ماتش، احنا هنا بالنسبة لنا دي غزوة
*****
كلمات مؤلمة والله يا سيدتى
احييك

نعيب زماننا said...

لو كان الأمر مرتبط بحماس فقط و تشجيعهم للمنتخب لهان الخطب. و لكن عندما شاهد من أعرفهم من المصريين الجدد من عبر عن فرحته بفوز منتخب مصر من الجزائريين, فقلت لهم عندها: أرأيتم حب الشعب الجزائري لنا, و أن سبكم لهم بأقذع الألفاظ كان في غير محله, يردوا و يقولوا: احنا منأصدهمش كلهم احنا أصدنا اللي بيشتموا في مصر.
يا ولاد اللللل....
أنا عمال أهاتي فيكو من الصبح أن مش لازم نعمم غلطة الحثالة على الشعب كله و أنتو فضلتو مصرين أن الجزائر كلها كده و أجي معاكو بالحجة و المنطق مش نافع و يجاوبوا بطريقة أنا أنط من الشباك أحسن ما أنام بعد الغدا, و اللي خلاكم تدركوا صحة كلامي أن 2 أو 3 من الجزائر هننونا بالكأس.
هنا السؤال لو لم نفز بالكأس كيف سيكون الحال وقتها, سيظل الاحتقان قائم حتى نفوز بأي بطولة أخرى و يهنئونا بها. انتقلت العزة من الحب و الكره في الله إلى الحب و الكره في الكرة

نعيب زماننا said...

يا جماعة أنا قررت أرشح نفسي في انتخابات رئاسة الجمهورية
و البرنامج بتاعي من بند واحد:

"و حياة أمي الله يرحمها, لن تحلم أفريقيا و لا من يعيش في أفريقيا بالكأس طالما أنا الريس بتاعكو"

شمس العصارى said...

مش عارف اعلق
مفيش كلام يتقال
كفاية قلوبنا الدامية
و من غير نلتقى بعد

محمد إسماعيل said...

قناة الأقصى التابعة لحماس تحتفل بفوز منتخب مصر و تهدي له أغنية رائعة
http://www.youtube.com/watch?v=ygjQwJmUOh0