انا لازم اعتذر لعمرو خالد

اصل انا شفت كام فيتيون كده لناس لهربانة من مصحة عقلية ومسميين نفسهم دعاة، ومواطن مصري عمال يحرضني عشان اقول رأيي فيهم بالاسماء بس انا بصراحة كده وش باخاف من الاضيشهم، اذا كان بعض الاضيش عمرو خالد لما انتقدته قالوا لي كلام في منتهى الانحطاط امال بقى اللي سلوكهم كلها محروقة دول الاضيشهم ح يقولوا ايه؟

بس فيه ملحوظة، هم مالهم ومال عمرو خالد؟ ها؟ لا بجد، فيه انسان في الدنيا بيقول على نفسه داعية وعالم وكده ويطلع شرايط يشتم في انسان تاني؟ يعني ده مجهود يعني يشكروا عليه انهم يقعدوا يلتوا ويعجنوا في سيرة الراجل كده؟ وقلة ادب قلة ادب و"عمرو خالد بتاع الفنانات" ايه ده ايه ده؟ ايه شغل العوالم ده؟ وبعدين الراجل ما ردش خالص، لا تلميحا ولا تصريحا، بصراحة كبر في نظري واحترمته، يعني هو بيقول على نفسه مصلح اجتماعي، وانا من وجهة نظري المتواضعة مش شايفاه اصلح حاجة وهو بقاله سنين، شايفاه ريح ضمير الاغنيا بس، بس الظاهر اني كنت غلطانة والعيب في عيني مش فيه، والا ايه اللي يخليهم يعملوا فرقة لشتيمته بالطريقة دي وهم ناس هدفهم في الحياة انهم يجننوا الشعب؟ زي ما علاء مبارك جننا في الكورة هم بيجننونا في الدين، طب بيشتموا عمرو خالد بالهيستيريا والوضاعة دي ليه؟ اكيد له ثمرة ما انا مش شايفاها وغايظاهم، وشتيمتهم له، خلتني انا اللي مختلفة معاه احترمه واراجع نفسي واحاول ادور على الحاجة الكويسة قوي اللي عملها اللي تخليهم محروقين منه كده، واذا كان ما بيعملش حاجة غير انه بيحافظ على مخ اللي بيسمعوه من الجنان الازلي اللي مالي البلد يبقى كتر خيره بقى، ما كل الناس اتجننت اصلا، وعدم رده عليهم ولا حتى بالتلميح خلاهم قد النملة قدامي، ده لو كان الف فيهم مجلدات شتيمة ما كانش اهانهم كل الاهانة دي لما تجاهلهم ولا كأنهم شوية دبان، والله محترم، وانا لا ليا في دول ولا في دول، فقلت بقى انا لازم اعتذر للراجل وان كنت لسه مختلفة مع طريقته بس ما يستاهلش يتشتم كده ابدا بالانحطاط ده ويتخاض في سيرته بالطريقة الواطية دي... ورد فعله رد فعل واحد محترم، هم ايه دول؟ بلاش الدين والكلام ده، الست الوالدة ما علمتهمش يتكلموا ازاي؟

انا اسفة يا استاذ عمرو... واختلاف الرأي لا يفسد للاحترام قضية، كفاية انك متربي