Thursday, 11 February 2010

الشرطة في دمياط قتلت واحد زي ما اتقتل حسن المغناوتي

مش ناقص غير يقطعوا راسه ويدوها لنعيمة وتمشي مجنونة في الشارع
بالنسبة لشهادات الشهود بخصوص ملاك سعد
التشانل كلها هنا وفيها الجنازة وشهادات الشهود والشاهد ابن عمه وبيقول القتل كان عمد.. واللي بنفس اهمية القتل العمد قفل دار عبادة عشان الجماهير الغفيرة مش عايزة الناس تصلي
بالنسبة لردود الافعال المقرفة بتاعة امبارح، انا خلاص، انا ح ابتدي اكرهكوا واعمل زي ايمان بدوي اللي قررت تبقى فلسطينية وماندي فهمي اللي قررت تبقى عراقية وغادة اللي بقت عشوائية وكل ماحد يكلمها تقول له: انت ح تسكت وللا اشقك؟ وداليا اللي بتكلم والقطط والكلاب وجات تثبت لي ان القطة فعلا مشيها بطال بدليل ان بنتها الكبيرة سارحة في العمارة اللي جنبهم والحمد لله انها عرفت تنقذ البنت الصغيرة من الجو الموبوء ده وكلهم بيكرهوكوا من عمايلكوا
انا عمري ما شفت ناس مسيطرة عليهم حمية الجاهلية بالطريقة الجنونية دي، ده حتى قريش كان عندها قلب شوية ولما الارضة اكلت الصحيفة احرجت من نفسها
لمجرد ان امين الشرطة قتل مسيحي وطبعا ما ينفعش تقولوا يستاهل فبقيتوا تقولوا ليه قلتي؟ واكيد الرصاصة طلعت بالغلط، دول حتى كانوا سمنة على عسل، وليه بتقولي مسيحي؟
يا سبحان الله، عشان هو مسيحي، وعشان الحكومة قافلة لهم المصلى بتاعهم وموقفة امن عشان ما يصلوش وكمان تقتل لهم واحد لكن الواحد ده في داهية، وفي داهية يصلوا
انا مش فاهمة ازاي تقفل لهم المصلى وعادي كده ولا ادب ولا حيات، انا لو حد منعني اصلي ح اقيم صلاتي في الشارع وخلي حد ييجي يكلمني بقى
قال ومصدقين الرصاصة طلعت بالغلط، الرصاصة طلعت بالغلط وانا بانضف السلاح بتاعي دي كان بيقولها يوسف وهبي لما يضرب نار على ميمي شكيب عشان قالت له انها رايحة عند الخياطة وطلعت عند محسن سرحان بيشربوا براندي مع بعض
رصاصة طلعت بالغلط ازاي يعني؟ ويعني ايه اقول لكوا امين شرطة تقولوا لي جلد ذات؟ انا ما اعرفش ان حد من اللي بيدخل هنا بيشتغل مع الشرطة
وانا شخصيا ما باشتغلش مع الشرطة عشان الشرطة تبقى ذاتي اللي باجلدها
ايه القرف ده؟ 
وليه الواحد يركب نفسه ذنب ما عملوش بانه يدافع عن جريمة عشان عصبية الجاهلية؟ مرة تقولوا اللعيبة الجزائريين هم اللي عوروا نفسهم وانت لا انت التراس ولا انت الامن اللي طرمخ عليهم بس اخدت ذنب شهادة الزور معاهم، ومرة تدافعوا عن الجدار وانت لا انت مبارك ولا انت احمد ابو الغيط بس اخدت ذنب انك تدافع عن ظلم، وواحد ياخد رصاصة بعد ما اتقفل له دار العبادة بتاعته، دار العبادة، اللي بيدخل يصلي فيها لربنا تقوموا تعززوا على القاتل والظالم؟  طب انا عايزة اسمع مسجد اتقفل في المانيا وللا النرويج واشوف خلقة حد من اللي قعد يعزز امبارح
انا مش ح احبكوا تاني خلاص
هو بيريس بس اللي مسلم

14 comments:

كريم البحيرى said...

http://www.facebook.com/group.php?gid=300781628497&ref=mf#!/group.php?v=info&ref=mf&gid=300781628497

أوقفـــوا جـــدار العــــار

دعوكم كافة القوى الوطنية المشاركة في الحملة الشعبية لمناهضة جدار العار الفولاذي

للمشاركة في

وقفة احتجاجية أمام نقابة الصحفيين

للإحتجاج على الجدار الفولاذي الذي ينشأ الآن على طول حدود مصر مع غزة



وذلك يوم السبت ١٣ فبراير

الساعة الرابعة مساء


برجاء الحضور ونشر الدعوة

Anonymous said...

لما بتكونى منفعلة مش بتشوفى قدامك يانوارة
انت انفعلت جدا لما اتكلمت عن الموضوع ده قبل كده
مش معنى اننامش موافقين على مقتل أى بنى ادم
بس بنقول ان أكيد أمين الشرطة
مكانش يقصد يقتله كمسيحى
يبقى قريش عندها رحمة أكتر مننا
وكمان اللنك بتاع شيخ الازهر
انا مش شايفة فيه حاجة غلط
فعلا بعض الممارسات الصوفية
بعيدة جدا عن الاسلام
ومش معنى كده ان الناس كفرة
بس محتاجين حد يفهمهم براحة
ومش معنى كده برضه انه بيكفر المفتى
لأن المفتى بالعلم اللى عنده
أكيد فاهم الفرق بين الصوفية كفكرة جميلة
وأسلوب مختلف فى حب ربنا سبحانه وتعالى
وعبادته وبين الهبل اللى بيحصل فى الموالد

مش انت بس يانوارة اللى بتدورى على الحق والعدل
كتير جدا من زوار مدونتك عندهم نفس أفكارك
بس انت بتبعديهم عنك
بانفعالك الزائد ده

Nadim said...

صباحو فل يا نواره..

تعرفي.. ساعه لما بيقع في طريقي واحد من العينه البدائيه المتعصبه اللي حاسه انو كره المسيحين الركن الأول في الدين

و انو أول اسئله القبر قبل من ربك..في ناس من العينه دي يبقى عارفني من فتره و عارف اني مثقف دينيا..بس اول

ما قوله اني انا والدي مسلم ووالدتي مسيحيه بتظهر على وشه علامة جمود و تهنيج لمده 1-3 دقايق بيحاول يستوعب ثم

يقرر هيتعامل معايا ازاي في المرحله القادمه..

الأغرب ان في ناس منهم يتوتر ..لغايه ما اوضحله ان والدتي اوربيه مش مصريه ..يهدى و يرتاح كأن التعصب

محجوز بالكيلو لمسيحين مصر فقط..

بس على فكره...نفس التوتر ده ظهرلي من اتنين او تلات اشخاص مسيحين قولتلهم نفس الكلام..بس معرفش..

هل بسبب تعصب المتأسلميين ادى لأنغلاق بعض المسيحين على نفسهم خوفا او قهرا..او ان انغلاقهم حو اللي حسس

الشرذمه المتأسلمه انهم كائن غريب وسطهم .

على العموم كل النوعيات اللى فاتت للأمانه من ساعه ماجيت لمصر لا يتجاوزوا عشر اشخاص..وسط مئات يا اما فهمه

التوسط العاقل صح يا اما مش فارقه معاها الموضيع اصلا

اظن انو اعقل الحلول زي ما قال ابوكي : " وانا رأي نحلها رباني و نموت كل "المسيحين".."..اللي هما

جعانبن زي الباقي بالضبط..


و دمتي بعافيه..

متضامن معاكي said...

متزعقش .. شكرا

سيكا ها ... سيكا ها


القربة المقطوعة مش حتتنفخ يا نوارة

القربة المقطوعة حتقطع نَفَسِكْ

Anonymous said...

ومن نكد الدنيا على الحر ان يؤيد الشيخ طنطاوى ,لأن رأية قد صادق الحقيقة أو صادفها,فى شأن ما يتفرع عن الطرق الصوفية من بدع و شرك وخزعبلات ما انزل بها اللة من سلطان. وسامحونى واللة مش قصدى اؤيدة ,بس هوة المرة دى صح بالصدفة البحتة فعذرا حسن على

amr565 said...

ياريت بلاش نقول علي اي حادث مسيحي ومسلم هو حد قال علي عماد الكبير انه الشرطة عذبته لانه مسلم مثلا وغيره وغيره بالطريقة دي حنعامل المسيحيين بالشوكة والسكينة لو حبل غسيل اتسرق من بيت ححظ ايدي علي قلبي لا يطلع بيت مسيحي حرام بقي كفاية هم بيطالبوا بحذف القران من المناهج ومطالب طائفية اخري مستفزة وبحذف المادة التانية والله لو اتحكموا فينا لحيكون ترانسفير ولم اري اعتراض من صاحبة المدونة كانه
علامة الرضا من حضرتها
ساعة بحس ان فكر ابراهيم عيسي هو الذي في المدونة ..ابراهيم عيسي او ابراهيم ساويرس مش فارقة كان بيجنني بجد المسيحيين يثورا علي اسلام وفاء قسطنتين الله يرحمها لو كانت اتقتلت ويحدفوا الشرطة بالطوبة ويطلع القساوسة يقولوا اانها اتخطفت وان امن الدولة خطفها ويهيجوا المسيحيين ويقولوا ان امن الدولة خدرها ووو وفي الاخر يتم الضغط من دولة الكنيسة علي دولة مصر العربية ويتم سبي الاسيرة وفاء الي الدير والاقي ابراهيم ساويرس يقولي ليه المسلمين بيفرحوا لم واحدة تسلم وهو الاسلام حيزيد لما واحدة تسلم المهم ان المسلمين يكونوا في موضع اتهام عنده وعلي فكره موضوع المساجد والكنائس ده شبه عرف في الصعيد يعني مثلا قرية اغلبها مسيحيين وفي كام اسرة مسلمة ممنوع ان تبني مسجد واسالي في الموضوع ده علشان تتضح الصورة امامك وفي النهاية مطلوب بعض الموازنة مش كله ضرب ضرب مش كل حاجة المسلمين وحشين مفترين والمسيحيين ابرياء والمرة القادمة سوف ابعت لك تسجيل لواحد من اقباط المهجر وهو بيقول لو مسكوا الحكم حيعملوا ايه في
المسلمين علي فكره لو تم منع مشاركتي لان ازعل بس حعرف ان السبب كلامي عن ابرهيم بيجهز الشنطة
http://www.youtube.com/watch?v=DGkDXgdiSwM ده مقطع ليس له علاقة بكل ما سبق ولكنه لتطهير القلب

حسن مدني said...

يا نوارة الكلام جاي علي المرة دي

أنا سؤالي عن ليه لازم نقول مسيحي، له سبب
هل الأمين قتله لمجرد كونه مسيحي؟ أو لأنه مجرم؟ أو لأنه (القاتل) أمين شرطة شايف إنه فوق الحساب؟
وهل تفرق الجريمة كثير إذا كان القتيل مسلم أو مسيحي؟ أظن في الحالين جريمة قتل يجب عقاب القاتل.
أنا لم أدافع عن القاتل بأي حال. لكن تساءلت ليه أصدرنا الحكم بأنه قلته لمجرد كونه مسيحي؟
المفروض نعرف الوقائع كلها وبعدين نصدر الحكم. مع الرفض لفكرة قتل مواطن. إلا في الظروف الخاصة جدا مثل الدفاع عن النفس، أو الضرورة القصوى

تحياتي

Nemo said...
This comment has been removed by the author.
Nemo said...
This comment has been removed by the author.
أبو عمر - الصارم الحاسم said...

التعليقات جميلة جدا وبتقول كل حاجة تقريبا


المهم اما تسأل نوارة عن ماريان وكريستين وعن وفاء قسطنطين وعن كرستين قليني بتلاقي اما تجاهل للكلام في الموضوع او غلوشة...او زي ما كانت شايفة في حالة ماريان وكريستين انهم يستاهلوا القتل عشان هربوا واتجوزوا واسلموا

وقري عينا....اتحول لمحاكمة عسكرية في اول مرة في تاريخ الشرطة في مصر...عقبال المسلمين ان شاء الله اما الشرطة تقتل حد يبقى يتحولوا لمحاكمة عسكرية - اللي هيتحول هو المواطن المسلم اللي اتقتل في الحالة دي مش اللي قتله لا سمح الله

Tamer said...

أتفق تماما مع رأي الأخ حسن مدني

بصي يا استاذة نوارة
ماحدش فرحان ان فيه (واحد) اتقتل
ايا كان الواحد ده
و على فكرة , لو واحد مسلم اتقتل في ظروف مشابهة ما كانش رد فعل اغلب الناس اللي بتعترضي على آرائهم هايختلف حاجة خالص تقريبا

وقعة قفل المصلى
الله اعلم , انا ولا عمري رحت هناك ولا اتكلمت مع حد من هناك عشان اقدر اقيم انهي قصة فيهم الأقرب للمنطق

وقعة القتل
بعض الروايات غير منطقية بالمرة , خصوصا القائلة انه اتقتل لأنه مسيحي , ببساطة كنتي هاتلاقي امين الشرطة ده له تاريخ معتبر في الحالة دي في (الاعتداء) على المسيحيين
ما هو اكيد مش ضربت معاه كده فجأة انه هايقتل اول مسيحي يقابله
اما لو العادي بتاعه انه بيعامل ( الناس ) بإجرام فدي مش جديدة

الموضوع ببساطة بين شقين
(واحد) اتقتل
اللي يقول مسيحي و اتقتل و يستاهل يبقى غلطان
و اللي يقول مسيحي و اتقل عن عمد لأنه مسيحي برده غلطان

الرأيين غير موضوعيين بالمرة يا استاذة نوارة و لازم الموضوع يتفهم ابعاده الأول قبل كل شيء

ميادة said...

ما تكرهنيش علشان أنا بحبك
الناس باين عليها اتجننت، لو عندهم حمية ودين سايبين ليه شرب الخمور والبيرة عيني عينك في أصغر احتفال بينهم!!!!
إنت لو شفت المنظر شعر رأسك سيشيب.

Amr said...

الأهرام الأسبوعى النهارده نشرت الحادث وقالت ان المخبر كان بيأمن سلاحه وطلعت منه طلقه خطأ وانه جرى مع الأهالى ووده المستشفى

جبهة التهييس الشعبية said...

معلش يا جماعة نزلت التعليقات من غير ما اقراها

معذرة على التعليق الاخير انا مسحته