Friday, 19 February 2010

تعذيب/ قضية اسماء/ دحلان

ايه الكربسة دي؟
اولا قسم شرطة محرم بيك عذب اسرة كاملة، راجل وخمس ستات وهدد واحدة منهم بالاغتصاب والتفاصيل والفيديوهات هنا
------
ثانيا:
اسرائيل دي عايشة عشان احنا اللي عايزينها تعيش، مش عشان شطارتها، ايه الخيابة دي؟ المبحوح الله يرحمه لا متأمن وغالبا ما كانش مسلح وقاعد في فندق وكان نازل يشتري مش عارفة ايه في كيس كده، وبصراحة بقى، الله يرحمه كان مستهتر قوي بالتأمين، ده ماشي كده زي ما انا بامشي في صالة بيتنا، والامارات لسبب او لآخر قررت ما تأمنش الراجل ولا حتى ببودي جارد بيلعب تايكوندو. بالذمة واحد بالمواصفات دي في فندق في دبي يتقتل ازاي؟ لو بعت اخوك الصغير ح يقتله ويرجع عادي
ايه اللي موساد عمله ده؟ جندوا اتنين جواسيس فلسطينيين، وبعتوا حداشر واحد، حدااااااااااااااااااااااااشر واحد، وضربوا باسبورات، وطلعوا معاه في الاسانسير وقعدوا يراقبوه بطريقة عاطف السكري وشكلهم باين جدا، الله يرحمه ازاي ما خدش باله؟ وللا خد باله وطنش زي المرحوم يحيى عياش؟ 
(ملحوظة: طول فترة الشغل في المقاومة بييجوا في الاخر يزهقوا ويسيبوا التأمين، لاسباب كتيرة، منها انه زهق من الخنقة بتاعة التأمين، ومنها انه بيبقى شخصيا مر بمواقف توريه ان التأمين حقيقي ما بيعملش حاجة والمسألة مسألة عمر، ده كلامهم هم)
وبعد كل فيلم ميونخ الطويل العريض ده كله، كاميرات الفيديو قفشتهم والناس كلها بتضحك عليهم، واتعرفوا واحد واحد، ويقول لك براعة شرطة دبي.... براعتها في ايه؟ في انها شغلت شريط الفيديو واتفرجت عليه؟ 
انا كان ليا وجهة نظر والظاهر انها صح، الخونة هم اللي بيشغلوا اسرائيل مش العكس
المرحوم المبحوح كان شكله اشتاق للشهادة، رحمة الله عليه، بس انا قرفانة من اسرائيل، بصراحة انا اشجع اللعبة الحلوة، ودي لعبة خايبة اخر حاجة
ده غير بقى اني متضايقة جدا انهم دفعوا كل الفلوس دي لحداشر واحد غير الاتنين الجواسيس، ايه السفه ده؟ اللي معاه قرش محيره يجيب حمام ويطيره
-----------------------
اسماء
اسماء ابراهيم في مواجهة الدكتورة ماجدة جمعة اللي قالت لهم على فلسطين ولبنان وسيناء والاردن: اسمها اسرائيل غصب عنكوا
لا
الانسة دي صعبت عليا... كده الست دي يا اتجننت يا اتجننت
مالك كان بيقول لي اكيد الموضوع فيه حاجة تانية، مش ممكن تبقى غبية كده
بس طلعت الحكاية كده واوسخ من كده والقصة كلها هنا، والانسة فرايداي ما راحتش المحكمة
 








وسقطت سبعين في المية من الدفعة

اوختشي... انت مجنونة؟
القضية اتحجزت للحكم ليوم 25 فبراير
زي ما قلت لكوا احنا عايزين نعذبها.... او نعالجها بقى

15 comments:

شمس العصارى said...

اسوا حاجة ان الواحد يتظلم من الامن و المباحث و مش يعرف ياخد حقه ولا حتى يتكلم
يعنى الاسرة دى ايه الى يعوضها
ربنا على الظالم و المفترى و الامن و المباحث
ــــــــــــــــ
لينك دحلان مش موجود انت اكيد حطيتى لينك التعذيب مرتين
ـــــــــــــــــــــــــــ
بس هو دحلان ملوش حل غير القتل
دحلان و امثاله هما الى ضيعوا الحق الفلسطينى
ــــــــــــــــــــــــــــــــ
رحم الله المبحوح
طيب ليه الامارات تحميه ولا تأمنه ... على اساس انها بتحبه و بتناصر حماس
كلامك صح عن ذهقهم من التامين و انهم عايشوا تجارب اكبر و اخطر
بس على الاقل راح شهيد
واذا كان على الموساد اكيد هما مش اذكيا بس هما مش بيحبوا يسيبوا تفاصيل
و شرطة دبى برضه بارعة مش برضه هما ليهم " زى " شرطة و عندهم مكاتب و عربيات و بينزلوا بيها يروحو الفندق و بعد اسبوعين و من خلال الفيديو بيعرفوا كل شئ ... احنا عاوزين اكتر من كده ايه
ــــــــــــــــــــــــــــ
لنا الله
ليس لها من دون الله كاشفة

شمس العصارى said...

مسئول الحزب الناصرى بيقول انهم ادو الكتاب لمجموعة دكاترة تبع الحزب
و الدكاترة نسيوا مثلا
و المسئول افتكر لما بقت قضية
ولا الكلام ملوش اساس من الصحة و اهى واجهة و تلميعة و خلاص
كان فين ده كله و الموضوع ليه سنة
يمكن انا فعلا مش متابع هههههههه

wahat_alshohada said...

نعذبها
هى وجوزها اللى كاتب الكتاب دة
وهو بيدرس فى جامعة المنوفية
وطبعا بيعلم الاولاد من نفس الكتاب

فيه شئ خطير يا جماعة
اولا ان الكتب الجامعية لا تراجع من احد
ثانيا الكتاب دة لا يوزع فى مكتبات الجامعة
الدكتورة بتاخد اسامى الدفعة و تجيبلهم الكتب من بره على قد العدد
ولا من شاف و لا من درى

دة احنا هنوريها شوية ايام

wahat_alshohada said...

أسماء قوية جدا على فكرة و جدعة و مش بتخاف و اهلها ناس اجدع و مش خايفين و بيشجعوها بس مستغربين جدا ان استاذ جامعة يشتكى طالب ويرفع عليه قضية

خدوا دى كمان
نقلا عن مصرى فى فرنسا
"موقع إسرائيلى باللغة الفرنسية،
بيشكر ويحيي "أمانة" إستاذة جامعة حلوان!،
هايدعوها إمتي لزيارة إسرائيل!؟"
http://jssnews.com/2010/02/18/un-aut...ais-en-egypte/

Anonymous said...

يسود الفساد والجهل المهنى والنفخة الكدابة ,فى معظم اقسام الشرطة .وتعم الرشوة- على رؤس الاشهاد- والمحسوبية جميع الادارات التى تتعامل مع المواطنين ,ثم ياتى الضرب والتعذيب والسحل وهتك العرض كوسائل ترحيب من الشرطة للمواطنين . ان جهاز الشرطة يمارس اساليب البلطجة وفرض السيطرة ونظام الفتوات ويلجاء لمعتادى الاجرام-لمساعدتة- بل ويراقب الابرياء ويترك المشبوهين ولذا يخشى الجمهور التعامل مع جهاز مشبوة ويفضل حل مشاكلة بعيدا عن شرها والعياذ باللة. حسن على

Anonymous said...

برة الموضوع: لم نعرف رأيك-نوارة- فى عودة محمد البرادعى ولزومة من عدمة؟؟؟؟

مى said...

أولاً
-----
يا ترى فيه كام إست ماجدة بيخربوا فى عقول الشباب و نحن لا ندرى عنهم شيئاً
؟؟

ثانياً
------
فى موضوع الشهيد المبحوح ما يلفت الإنتباه أمران

الأول :الصهاينة يعلموا جيداً كما أى زائر لدبى أنها تخضع للمراقبة فى معظم الأماكن
و بالرغم من ذلك قاموا بمهمتهم الدنيئة
!!
فهل كانوا يريدون توصيل رسالة معينة مفادها أننا
.
.
و لا بيهمنا .. و إنتظرونا فى الحلقات القادمة
.
.


خاصةً مع توارد التكهنات إن الموضوع حيخدله يومين و يعدى


الأمر الآخر :هو بجاحة السَلَطة الفلسطينية
اللى بالرغم من إلقاء القبض على إتنين من عملائها بتهمة التمهيد و الإعداد للعملية
لكن السَلَطة لازم تبهرنا
!!
و تتهم حمساويين بإنهم هم اللى خانوا المبحوح
!!

و ده الحقيقة سلوك مش جديد على السلطة و إن كانت بتطور نفسها فى هذا المجال حتى تصيبنا بالنكد

مى said...

ثالثاً
------

موضوع البرادعى و الذى أورده أحد المعلقين هنا

موضوع بالفعل يستحق المناقشة

لكن و بصورة مبدئية

أنا أرى إن برادعى مصر هو أوباما أمريكا
بمعنى

تغيير فى الديكور مع بقاء البيت على ما هو عليه

الأمر الآخر : إن البرادعى هو أحسن وسيلة للإبتزاز الأمريكى للنظام
لمزيد من الإنبطاح

صحيح إنه لا يوجد أى وجه للمقارنة بين عوكل و البرادعى
من حيث العقل و المنطق و العلم

لكن سوء عوكل و تواضع إمكاناته
لا يبرر لنا الإرتماء فى أحضان مستقبل مجهول



الخلاصة
-------
علينا ألا نفرح بالبرادعى و لا نرفضه أيضاً
حتى نستطيع التعرف عليه جيداً
بدون تكوين آراء مسبقة .. ممكن تأثر على حكمنا عليه

Anonymous said...

السلام عليكم يا نواره انا اول مره اعلق عندك بس خدى بالك لحسن تنسوا واقعة التعذيب بتاعه محرم بك فزحمه الاحداث الضباط ولاد الكلب دوله لو شموا خبر ان الناس اتكلمت من غير مانشرشح لهم حيموتوا الراجل فيبقا لازم نحميهم على الاقل بانا نسلط الاضواء عليهم والا يبقا جنينا عليهم وجبنلهم الاذى لانهم اتكلموا

Amr said...

على فكره دبى أشتكت من حماس علشان ماكانش فيه حراسه مع الشهيد وكمان محدش قالهم علشان يوفرولوه حمايه من ناحيتهم

وبعدين المبحوح ماكانش ينفع يسيب نفسه كده ويتحرك على المكشوف لأن من دبى الموساد كان يقدر يشحنه على ااسرائيل وساعتها كان هايبأه كنز معلومات

وشرطة دبى قالت أن عملاء الموساد دول من أغبى الناس لأنهم كانوا تقريبا بيصوروا فيلم
كل تحركاتهم كانت واضحه جدا"

نعيب زماننا said...

أعتقد أن دبي أتعدت من الشرطة المصرية
دول ملفأين تهمة أتل المبحوح لحوالي 20 بني أدم من السياح الغلابة

تأريبا هو هو نفس الظابط اللي جاب سفاح بني مزار من ديله راح بعقد احتراف في شرطة دبي.

فعلا لو العالم دول هم اللي قتلوه و تبع الموساد يبقى الحمد لله أنهم خايبين كدة و فعلا يبأ أغبى جهاز مخابرات في العالم

شمس العصارى said...

http://www.youtube.com/watch?v=EvJ7R7aZ5J0 ده فيديو المتهمين فى اغتيال المبحوح
حسب ما ارودته شرطة دبى

tasneem2030 said...

استاذة مي

جبتى من الاخر فى موضوع البرادعى لانه زى اوباما اللى فرح بيه الناس و هليلوله و طلع اسوء من بوش
بالزبط زى بيريز صاحب وش السلام و فعل الشياطين , صاحب مذبحة قانا و اخواتها
التغيير يا استاذة لازم يجيي من القواعد الشعبية , و صعب انه يجيي من طرف حد حائز على الرضا الامريكى

wahat_alshohada said...

ربنا يكرمك يا مى كلامك درر

طمنونا على موضوع اسرة اسكندرية
صراحة انا مقدرتش افتح
ممكن اروح فيها خلاص الواحد مش قادر يتحمل

Amr said...

معلش يانواره
ممكن تقرى الموضوع ده وتردى عليه أحسن دمنا محروق أخر حاجه

http://www.almasry-alyoum.com/article2.aspx?ArticleID=244402&

المصرى اليوم تتهم النوبيين بالتخاريف الدينيه