Thursday 4 February 2010

والله العظيم كل يوم الجزيرة بتكبر في نظري

بعد النجاح الباهر لضرب خبر سيفون سبورت في اليوم الساقع وضرب خبر الحكم كودجا في العربية اليوم الساقع رجعت تنشر اخبار كاذبة تاني بعد ما قلنا انها تابت وارتجعت
انا بصراحة شفت الخبر ده اتلهيت واتخضيت وركبي خبطت في وداني
قام ربنا يكرمهم الشباب على التويتر قالوا لي ده تأليف وتلحين ووائل خليل جاب لي اللنك ده اجرنها بقى كدبة عالمية (عارفين يعني ايه اجرنها يا فرافير؟ :) مش ح اقول) وكل الناس بتسرح بيها
انا مش سبق وحذرت اليوم الساقع من انها تنقل من النت عمياني بالطريقة دي؟ لازم كل شوية نعمل لهم فضيحة؟ 
وقبل كده دبسوا السي ان ان بذاتها في اخبار سيفون سبورت؟ والعربية طبعا ام الكومبينيشن والبيديهات كلها
كل يوم الجزيرة بتكبر في نظري، ما شاء الله عليهم، لا عمرهم ضربوا خبر، ولا جريوا ورا اخبار منشورة في اي حتة تانية من غير ما يتأكدوا من صحتها من مراسيلنهم ومصادرهم
وعشان كده كايدين العزال مرة يقولوا عليها اسرائيلية ومرة يقولوا عليها شيعية ومرة يقولوا عليها تبع تنظيم القاعدة
وهي مش اكتر من قناة اعلامية اللي فيها بيراعوا ربنا في لقمة عيشهم وبيعملوا شغلهم
ما تنسوش تشردوا لليوم الساقع تاني، على الله يرتجعوا خالص المرة دي
حد ينقل خبر من على مجموعة على الفيس بوك؟ افرض كدبة فبراير؟ افرض واحد بيستظرف دم اهله، طب تليفون صغير للداخلية يسألوا عن صحة الواقعة طاه

8 comments:

Unknown said...

القصة ديه معروفة من زمااااااااان
و لا هى جديدة و لا حاجة
بقالها يجى سنتين
و عادى معروفة جداً

اليوم السابع بيهجص جامد بقاله فترة كبيرة

على فكرة فيه كمان قصة غرفة تغيير الملابس فى المحلات اللى قالت عليها منى الشاذلى مرة من المرات

لما بنت تخش تغير فى محل و تقيس ملابس الغرفة بتطلع اسانسير بيتسحب بيها لتحت و بعدين بيأخذوها يموتوها و ياخذوا اعضائها يبيعوها و كدة
حاجة زى ريا و سكينة بس على جديدوا
!!!!

Anonymous said...

كلمة "اجرنها" من عامية الشرقية على مايبدوومعناها بالعامية "اكمنها" حسن على

Tamer said...

انا شفت الموضوع ده فعلا على الفيس بوك من فترة كبيرة

بس انا ملاحظ حركة هما بيعملوها
في اول الخبر بيقولوا

"يتداول أعضاء "الفيس بوك" قصة لفتاة تعرضت للاغتصاب بطرقة جديدة لم تستطع فيها التعرف على الجناة، مما دفع نشطاء "الفيس بوك" لنشر القصة بهدف توعية الفتيات."

ما معناه انه اهو مالوش دعوة و مجرد ناقل و بس عشان ماحدش يقول عليا كداب انا ما قلتش ان فيه كده انا قلت ان بتوع الفيس بوك بيقولوا

الغريب اني مش عارف صحيفة تنشر حاجة تافهة كده ليه اصلا و ايه وجهة النظر

حتى التنويه ان ده (كلام ناس) مش اكتر , تنويه خفيف اوي اوي اوي اوي بحيث اللي مش هاياخد باله يحس ان الخبر بتاعهم , و اللي ياخد باله يقول هما يا دوب بيقولوا ان بتوع الفيس بوك بيقولوا

و الدليل
قــــــــــالــــــــولـــــــه

شمس العصارى said...

مالها اليوم السابع مالها اصمله عليها
ماهى بتنشر اخبار زى الفل من عينة هنية اشترى ارض ب 4 مليون دولار
دلوقتى بقت وحشة
و اساسا الموضوع ده من الهبل الى بينتشر على الميلات
اى حد بتجيله رسالة بيعملها فوروارد و على المنتديات كتير من ده
ربنا يبارك لنا فى عقلنا
عقبال ما شوفك كاتبة كبيرة فى الجزيرة يارب - بس ساعتها ابقى قولى بيدوكى كام ولا حتغيرى العربية على طول هههههه
ربنا يجعلها من حظك و من نصيبك
نلتقى بعد الافتاءات

Kalimalhus said...

أنا مش عارف إيه اللى جاب سيرة الجزيرة أو العربية فى الموضوع هنا .. هههههههههه

اليوم الساقع يقوم على تحرير أخبار الموقع بتاعها جماعة من الشباب الصغير اللى طالع اليومين دول و اللى إتربى على ثقافة الفهلوة و الإستسهال و الإستهبال و الكم قبل الكيف .. ما نقدرش نقول إن ده ذنبهم قوى خصوصا إن كلامهم بياكل مع جمهورهم اللى أغلبه من ذات نفس العينة اللى طرشتها الخرابات التابعة لوزارة التغبية و التغنيم فى الربع قرن الأخير..

الجزيرة عبارة عن البى بى سى العربى .. كل اللى شاركوا فى إنطلاقها خارجين من مدرسة البى بى سى و بعض الوكالات الغربية التانية و ده بيديهم قدرة على تحقيق مهنية عالية مع رشة ملح من الإنحياز لقضايا عربية و إسلامية توافقا مع جمهورها و لأنها بتنطلق من أرض دولة صغيرة ما تنشافش على الخريطة و ده مش تعالى و لا شوفونية و لكنها الصورة اللى بدأ منها تصور أصحاب القناة لدورهم فعلا .. بمعنى إن قطر لإحساسها بإنها دولة صغيرة تبحث عن دور إحتاجت لقناة إعلامية أكبر من الدولة و المعادلة المضمونة للنجاح هى إنها تديها أكبر حرية ممكنة بحيث تجذب الجماهير اللى معدتها حجرت كل يوم فول و بتنجان و لما بيحلوا بياكلوا قرصين طعمية أو طبق بصارة و الصلطة بابا غنوج..

المهم بقى إن الجزيرة لا تختلف عن السى إن إح و فوقش نيوز و غيرها من القنوات الغربية فى حكاية المهنية و الحياد و الكلام ده كله اللى هوه فى النهاية تلييس و ضحك عالدقون و لا يسهم إلا فى إن المشاهد يبقى فى النهاية أكثر جهلا بالحقيقة مما كان قبل أن يشاهد الخبر ..

أنا عارف إن كلامى مش هيعجبك بس عديها حرية رأى و الرأى و الرأى الآخر و خليكى محايدة :P

Unknown said...

ناقص اليوم السابع تختم مقالتها بالجمله الشهيره اللى بتيجى فى أخر الأيميلات والمواضيع اللى زى دى

لو مانشرتش الخبر ده ل 50 من زمايلك بيتكم هايولع وأهلك كلهم هايموتوا

ولو نشرتها
بيكم مش هايولع وأهلك مش هايموتوا

انت بس اللى هاتتشل لوحدك علشان انت أهبل

Anonymous said...

وهي مش اكتر من قناة اعلامية اللي فيها بيراعوا ربنا في لقمة عيشهم وبيعملوا شغلهم" قناة الجزيرة بأدارتها,ومحرريها,ومذيعبها,هى اكبر واقوى مجموعة من الاعلاميين المحترفين الوطنين العروبيين الاحرار ,وهى اقوى تأثيرا -اعلاميا-من كل وزارات الخارجية العربية ومتحدثيها الرسميين بل اقوى تأثيرا من ملوك ورؤساء العرب وقنواتهم المضللة ومطبوعاتهم المزورة-مجتمعين حسن على

نعيب زماننا said...

الجزيرة تنظيم وهابي موالي لايران و تموله طهران و يستمد شرعيته من أمريكا من أجل الإساءة لسمعة قطر
و عجبي