Saturday 27 February 2010

المحاولة دي مش عشانا احنا

انا بس سايباكوا تحلموا عشان ما اصدمكوش في مشاعركوا، بس ركزوا شوية
دي محاولة لتعديل الدستور بحيث انه يبقى في المستقبل في فرصة للاجيال الجاية انها تعرف تنتخب حد عدل وما يقعدوش يدفعوا تمن اللي احنا عملناه زي ما حصل لنا مع اللي قبلنا
عشان كده انا متمسكة بتغيير الدستور بما يضمن انتخابات الناس تعرف تختار فيها، واي تنازلات او زمزآت او حلول وسط ح ارقع بالصوت والطم واشد شعري واخلي اللي ما يشتري يتفرج واعمل حملة مضادة كمان، اديني باحذر اهو، احنا فينا اللي مكفينا ومش طالبة تسلية على مواجعنا
وانا عارفة ان الاختيار دلوقت ممكن جدا حسني مبارك ينجح باكتساح في انتخابات حرة نزيهة
وللا انتوا نسيتوا ان الصحفيين انتخبوا مكرم في انتخابات نزيهة؟ 
بس مش مهم، على الاقل مش ح ياخد اكتر من مدتين، على الاقل ننوع، مرة ينتخبوا حسني، مرة ينتخبوا جمال، مرة ينتخبوا علاء، مرة ينتخبوا صفوت الشريف
هيهيهيهيييييييييييي تخيلوا يا عيال لو رئيسنا صفوت الشريف بشنبه ده
اهو على الاقل العرب بقى يفوقوا (وخصوصا الغزاوية) ويبطلوا يفرقوا بين الشعب والحكومة ويبطلوا يفضلوا حاطين امل على الشعب اللي ح يثور، ويتصدموا بقى ويروحوا ينتحروا انتحار جماعي ونخلص بلا وجع دماغ
حتى لو البرادعي طلع مقلب ما يهمش
وحطوا الاحتمال ده ارجوكوا بلاش العشم الزايد ده
فيه احتمال ان البرادعي يطلع مقلب، وحياة حبيبكوا النبي حطوا الاحتمال ده ولو بنسبة واحد في المليون، ده سيدنا عمر ما وثقش في سيدنا محمد نفسه عليه الصلاة والسلام غير بعد خمس سنين من البعثة
ابوس ايديكوا... وارد، وارد انه يطلع تمثيلية او مقلب او محاولة لانقاذ النظام او حتى انقاذ اتفاقية السلام، يا سيدي اسمعني وارمي الكلام ده ورا ضهرك، وقول مجنونة بس اهو برضه تبقى حاطط احتمال ربع في المليار... والنبي، تحسبا للانهيار العصبي، ومش عشانا، عشان احنا لما بننهار بنعمل تصرفات غير مسئولة قد تؤثر على الاجيال المستقبلية
بس حتى لو طلع انشالله جاسوس اسرائيلي، مش مهم، هو احنا ايه؟ احنا نفسنا جيل مش مهم
احنا خلاص كده، اتورطنا في اتفاقية السلام دي، وبقينا فعليا محتلين بموجبها، وما عندناش الاستعداد ولا الروح ولا الجرأة اننا نحررها وندفع تمن اي حاجة، والبلد خربت على دماغنا واحنا اضفنا ابداعتنا الشخصية في الخراب
احنا جيل العبارة والدويقة والقطارات المقلوبة
احنا الجيل اللي باع البلد بمصانعها وارضها وناسها ونط في البحر عشان يخلص منها
احنا الجيل اللي بيقول: بالروح بالدم رزق عيالنا اهم وما عندوش فرصة يفكر غير في الاكل والخلاص الفردي
احنا الجيل اللي نسي ان اسرائيل دي ماهي الا اكبر عملية سطو مسلح في التاريخ
احنا جيل الجدار العازل والعيال اللي اتحرقت واحنا قافلين عليهم وغزوة الجزائر
احنا جيل الاضمحلال والفوضى
وبعد الفوضى اللي احنا عملناها دي لازم ح ييجي حاجة
اللي جايين ح يتفوا على قبورنا لو سيبنا لهم البلد كده، يمكن لو حاولنا، ولو مجرد محاولة، اننا نسيب لهم قوانين يعرفوا يستغلوها لما يحبوا يصلحوا على الاقل يعذرونا ومش لازم يترحموا علينا
زي احكام تصدير الغاز اللي لسه ما وقفش، زي قضية الجدار اللي حتى لو كسبناها الجدار اتبنى
مش مهم، المهم الجايين يبقى في ايدهم ورق عليه ختم النسر يثبت حقهم وربنا يسهل ويبقى عندهم الشجاعة والاستعداد للتضحية اللي مش عندنا
الفوضى اللي احنا عملناها في البلد ح تأدي لاحتمالين
اما ييجي واحد يقول: يا نهار اسود ومنيل... لالالالالا لم لم لم، هو ده كله ح يتنضف امتى؟ ويلاقي نفسه مضطر يبقى مستبد عشان يقدر ينضف
مش ممكن، مش ح نفضل نلف في الحلقة المفرغة دي
او اننا نبقى سايبين لهم قوانين وتشريعات ودستور احنا ما عرفناش نفعلهم بس اهم موجودين في الدفاتر ومختومين والورق تمام كده مظبوط، نقوم نقطع عليهم نص الطريق وما يبقاش قدامهم غير يفعلوه عشان يصلحوا اللي احنا عملناه
ولو عرفنا نصلح التلات مواد اياهم 76 و77 و88 ونشرع قانون للانتخابات، وما عملناش بيهم حاجة خالص
يبقى شكرا جدا، البلد دي مش عايزة من خلقتنا حاجة تاني وكفاية اللي عملناه فيها وكتر خيرنا اننا مش سايبين لها ميراث زبالة
على الاقل زبالتنا تدفن معانا
واذكر نفسي واياكم بحاجتين
1- مافيش داعي نهستر ونعبر عن احلام قد لا تتحقق لما نيجي نكتب عشان اعمل حسابك انك ميت وح ييجي ناس تقرا الكلام ده وتضرب كف على كف، والله لو فضلت
keeping low profile
ومقلل نبرة الخطابة والهيستريا والنتيجة طلعت احسن ح يقولوا كانوا ناس عاقلين، لو رسيت في الاخر على ورق مختوم، او حتى مجرد محاولة فاشلة ح يقولوا الناس حاولت واهي نصيبها
انما افتكر انت كمان ان الكلام الحنجوري بتاع  الاجيال السابقة اللي كان عندها كل اسباب الامل ونزل على مافيش ازاي اثر فينا وخلانا عدميين وبنتريق عليهم دلوقت، مع انهم، والشهادة لله، كانوا احسن مننا، على الاقل ما كانوش واخدين خوانة، انما احنا عندنا كل الاسباب اللي تخلينا ناخد خوانة، ما تعملش في الجايين زي ما اتعمل فينا
2- نحط في بالنا ان تعديل الدستور وتوفير قانون يضمن للاجيال الجاية فرصة للاصلاح ده العمل الوحيد العدل اللي في جيلنا، مالناش اي حاجة ايجابية تانية نقابل بيها ربنا، وده مشروع عمرنا، نعمل اللي ربنا يقدرنا عليه عشان نسيب صدقة جارية على الاقل ونبقى حريصين اننا ما نسيبش لعنة جارية زي اللي ساب لنا اتفاقية السلام اللي اتوحلنا فيها زي الدبانة اللي وقعت في العجين
عشان كده ناخد المحاولة بجدية ومن غير عشوائية ولا مجاملات ولا سلق بيض ولا هرجلة عشان احنا مش منتظرين ثمرتها في حياتنا
دي حاجة سايبينها لولاد ولادنا، يمكن، جايز، ربما يطلعوا رجالة
لو رسيت على اننا سايبين لهم مجرد محاولة، مجرد مشروع حاولنا نطبقه وفشلنا اهو برضه يبقى في ايدهم مشروع يمكن هم يعرفوا يطبقوه ويستفيدوا بيه
كفاية انهم ح يتولدوا يلاقوا البلد اتباعت... مش كمان ما يلاقوش اي حق قانوني في بلدهم
واياك حد يقول بتحبطينا، مش معقولة ابدا تبقى خريج ثانوي صنايع ونفسك تبقى دكتور ولما اقول لك ما ينفعش تقول لي بتحبطيني
طب خش ثانوي عام وذاكر ويا سيدي لو جبت مجموع الطب يبقى خير وبركة لو ما جبتوش اديك حاولت والمذاكرة دايما تنفع ما تضرش، ولو دخلت تجارة كويس برضه مش وحش، انما لسه ما قدمتش ورق الانتساب للثانوي وعمال تحوش عشان تشتري عيادة؟

42 comments:

Ayman said...

الله ينور عليكي يانوارة يا منورة
هو ده الكلام ولو عملنا اعادة صياغة للي قلتيه ممكن تكون كالتالي:

ما علينا سوى بذل الجهد وليس ادراك النجاح فالنجاح هو من الله لمن يستحقه اما نحن فيكفينا للنجاة امام حساب الله وامام الاجيال القادمة ان نكونوا عملنا ما علينا ودي فكرة بسيطة وبديهية ومنطقية جدا لاننا كبني ادمين لا نمتلك كل الاسباب والمسببات وانم هي بيد من خلقها ولكن ما نمتلكه هو ارادتنا وفعلنا وهو ما سنحاسب عليه وسنحساب ان قصرنا

شمس العصارى said...

" لا مفر -على ما يبدوا- من تعميد الحاكم بالدموع ..............و الدم معا "
امال انا كنت بقول ايه من كام يوم بلاش نرفع سقف الاحلام
وعلى راى فنون " مرشح مش مترشح "
نلتقى بعد الدستور
ــــــــــــــــــــــ
سؤال يا نوارة
ابتديتى تغشى افكار من الوالدة ولا ايييييه
بس لعلمك الغش كويس برضه و بيجيب نتيجة حلوة ههههههههههه
انا بعمل كده

رجاء said...

بس حسب معلوماتى جروب عايز حقى ده ملوش علاقة بالحملة وفيه جروبات كتيرة بتدعم البرادعى لكن الجروب اللى تبع الحملة هو جروب " البرادعى رئيسا "ولسة مقالوش هم ناويين يعملوا ايه الحطوة اللى جاية يعنى مفيش حاجة تستدعى القلق ده

شمس العصارى said...

انا اترددت قبل ما اتكتب التعليق ده
و تعليقى الى فات حبيت اقول كلام حلو بس مطلعش
والتعليق ده لو عاوزة متنشرهوش براحتك الخيار ليكى
ــــــــــــــــــــــــــ
قياسا على قولك ان المهللين باوباما عليهم ان يعتزروا الان
انا بطالبك انك تقولى و تكتبى - بس مش زى البوست ده الكلام الى بيلمح و ميصرحش - لا تكتبى بكل وضوح ان المحاولات التى تتم الان زى التوكيل الى منشور على النت ده و غيره دى محاولات بتاجر باحلام الناس العاديين الى مش فاهمة ولا عارفة حاجة
و انا بقلك كده علشتم فى ناس كتير بتقرالك و بتنقل عنك
و بعدين الكلام - ما بين السطور فى البوستين الاخيرين - مش كل الناس حتفهمه بسهولة
يبقى لازم تقولى بلاش نتاجر باحلام الناس و نزايد على ناس ميستاهلوش
وزى ما انتى قلتى الناس دى موجودة من سنين اشمعنا دلوقتى
معلش يا نوارة يمكن اسلوبى قاسى بس انا بطالبك بالامانة المهنية لازم تقولى و توضحى للناس الى بتقرالك
و من غير لقاء بعد

Tamer said...

خارج الموضوع
http://www.masrawy.com/News/Egypt/Politics/2010/february/27/gas.aspx

Early bird said...

يا اوختى احنا سقفنا عتبه الباب حنوطى بيه ايه اكتر من كده

بهيج الشرير said...

على فكرة ياأبلتي أنا ناوي أزور مصر قريب، ياترى نفسك في حاجة من هنا أجيبها معايا وأنا جاي

Anonymous said...

يبقي اسمها حاولنا ومسكتناش بس ياريت يكون فيه تنظيم في محاولة الضغط علي النظام وميبقاش ردنا لحظي وثم كل واحد يتفق عن التاني عيب علينا اركان النظام متفقين علي حاجات معينة واحنا مش عارفين نتفق عيب قووووووووووي

Unknown said...

أنا عن نفسى حلمى الأيام دى مش هو الدكتور البرادعى

البرادعى بالنسبه ليا حاليا" هو مجرد رمز مع حفظ المقامات طبعا" ولكن الأهم هو تعديل الدستور بالمواد المتخلفه بتاعة الأنتخابات الرئاسيه

وبعد كده اذا ربنا كرمنا والدكتور البرادعى فاز وأثبت كفائته يبأه ربنا رضى عننا أوى أوى أوى أوى ورفع غضبه عنا

بس تفتكرى أن أحنا كنا مستنيين الدكتور البرادعى علشان ييجى على الحصان الأبيض وياخد مصر وراه وينزل تتر النهايه السعيده ؟ ولا المشكله بأت فى الناس نفسهم اللى أستكانوا وبأه سهل جدا" نفوت أى حاجه من تحتهم ؟

ياخوفى يابدرااااااااان الا نكون بنحلم ومانطولش ده ولا ده ساعتها هايتحول كل مناصرين الدكتور البرادعى لخصوم والناس مابأتش حمل كسرة ضهر تانيه والمره دى الناس لو أخدت أمل ونزلت على مافيش هاتبأه أقسى من نكسة 67

نعيب زماننا said...

ألف مبروك المليون و نصف زيارة

Unknown said...

شمس العصاري

لا اسلوبك مش قاسي خالص
هو كده قاسي؟ :) طب تعالى اقسى عليا كل يوم بقى

ههههههههه

بالنسبة لكلامك
والله انا مش بالمح انا باصرح باللي اعرفه واي معلومة بتوصلني واي مشاعر بتنتابني باشارك كل الناس معايا

بس اللي انا فهمته ان الجروب ده مش تبع الحملة

وان البرادعي لحد دلوقت لسه ما طلبش توكيلات دي مجرد اجتهادات

فاكتفيت باني انبه ان ده غلط واظن انهم اتنبهوا لده وعرفت كمان انه توكيل قديم برضه مجرد اجتهاد من الناس

وقالوا لي امبارح ان لما البرادعي جه الامور ح تتغير لانهم مش ح يجتهدوا بقى وانما ح يمشوا تبع ما هو يقول لهم

واللي فهمته برضه ان البرادعي ما عملش حاجة لحد دلوقت غير انه قابل الشخصيات وشكل الجبهة المنيلة بنيلة دي وعين حسن نافعة منسق الجبهة وده اختيار اظن كويس لان حسن نافعة راجل محترم

اكتر من كده هو ما عملش حاجة وما طلبش من حد حاجة

فمش عايزين بس نسبق ونتهم الناس بالظن لازم نستوثق ومش اي عيل بقى ح يعمل جروب نمسك في الناس

دلوقت اللي ملزم قدامنا البرادعي

اي حركة قرعة نضرب في المليان

بهيج الشرير said...

والنبي ياأبلتي خللي بالك وأنتي بتقولي أي حركة قرعة نضرب في المليان، لأن البرادعي كده حايخاف يتحرك

شمس العصارى said...

ماهو يانوارة كل الانشطة الداعمة دلوقتى على النت و النت فقط
يبقى ده بيغلوش على الناس و عاوزين يفرضوا على الناس شخصيات انتهى عمرها الافتراضى من زمان
طيب بذمتك – وزى ما انتى قلتى – كل الناس الى فى الهوجة دى عارفة يعنى ايه تغيير الدستور و ازاى قانونا و حينفع يتغير ولا لأ ولا عارفة لما حيتغير حيبقى شكله ايه
كل الى بتكلموا عليه مدة الحكم و عدد الفترات
طيب و شكل الدولة و شكل اقتصادها و الحريات العامة كل ده حد بيعرف و لا بيتكلم عليه من الى فى الهوجة دول
و بعدين البرادعى لسه – فى رايى – انه معملش الحد الادنى من الاجماع الوطنى او اجماع النخبة
اهو ابتدا الضرب من تحت لتحت و شغل النظام اشتغل
ادى 4 احزاب عاملين مؤتمر فى مارس
حتى لو دى اجتهادات هو اشاد بشباب النت و جعله القوة المحركة
و بعدين تشكيل الجبهة من الشخصيات دول بس مينفعش خالص و انتى عارفة كده
حسن نافعة كويس طيب و غيره .. ماهو المشكلة ان البرادعى – و الامل الى الناس حاطاه فيه – حيسمع لكلام الناس دى لانهم هما الى معاه من الاول و حيحسسوه انهم فى الوضع و فاهمين
و بعدين هو جيه قابل الناس قعد اسبوع و حيسافر تانى يقعد بره شهر و نص هو الى عاوز يعمل يعمل و هو موجود هنا فى قلب الحدث و لا يعمل جبهة و يسافر و يتابع بالتليفون و النت
و مش سبق ولا حاجة احنا الناس دى نعرفها من سنين يبقى فين الاستباق و الافعال باينة وواضحة يبقى ظنونا مظبوطة
و انا مش بتكلم على الجروب ده وبس
لا انا بتكلم عن كل التصرفات سواء على النت اوفى الواقع
الجبهة دى متنفعش لانها لا تمثل ربع القوى الوطنية حتى
امال فين باقى الناس و الى قابلوه اول مرة
كان واجب عليهم يقولولنا هما قالوا ايه و اختلفوا على ايه و خصوصا البرادعى
و بعدين كل الاشخاص الى ميستاهلوش دول عاوزين يكسبوا بنط على حساب ضجة البرادعى
انا لا مع البرادعى ولا ضده الى الان
المشكلة فى الناس الى مستنية تشاهد و تعاين التغيير
بس الموضوع شكله مش بادئ بتفائل و مش مطمن

مواطن مصري said...

يا نوارة انا كاتب عندي ان البرادعي رمز مش شخص

انا مراهن على الرمز دة و عندي امل في التغير و هيهحصل لأن دي سنة الحياة

التغير قادم قادم سواء بالبرادعي او غيرة

أبو أمك said...

برضه ماننساش أن احنا الجيل الوحيد اللي طلعله البرادعي مرتين
أول مرة أنا البرادعي يا رشدي
وبعدها باكتر من ربع قرن طلع تاني يقول أنا البرادعي يا حسني

Anonymous said...

التغير قادم قادم سواء بالبرادعى او بغيره



الله أكبر .. قل جاء الحق و زهق الباطل إن الباطل كان زهوقا


مواطن مصرى إبن الناظر بيجمع يا رجالة


بالإنجليزى

يبقى فيه أمل إن عوكل و يا نوفل يورونا جمال خطوتهم

مواطن مصري said...

مصراوي- خاص- قال مساعد وزير الخارجية السابق د. عبد الله الأشعل إنه في حال تغيير المادة 76 من الدستور فسيخوض الانتخابات الرئاسية المقبلة مستقلاً وإذا لم يتم تغييرها فسيترشح على قائمة أحد أحزاب المعارضة.


عبدالله الأشعل : هذه أسباب ترشحي لإنتخابات الرئاسة المقبلة

http://www.masrawy.com/News/Egypt/Politics/2010/february/27/ashaal.aspx

Anonymous said...

صح التغيير قادم سواء بالبرادعى أو بغيره

علشان كده أنا أفضل بغيره
لأن ميزة البرادعى عن غيره أنه مسنود

علشان كده مش عايزه خاصة فى موضوع تغيير الدستور

خايف أقوم من النوم الصبح ألاقيهم بيقولوا
(تحيا ولاية مصر الأمريكية)
أو
(تحيا مستوطنة مصر الإسرائيلية)

و أروح الجيزة ألاقيهم بيقولوا:
ده هرم عذرا و ده هرم شيمون و ده هرم ديفيد

و اللى قاعد هناك قدام الهرم ده بن جوريون

ما هو معنى أنهم هيعملوا دستور جديد أنهم هيهدوا الدولة و يبنوها من جديد

الدولة الجديدة دى بقى هيبقى اسمها جمهورية مصر العربية و لا هيبقى اسمها إيه بالضبط

من الآخر كده أنا مش عايز استهبال هو علشان الناس كارهة مبارك يسيبوا البرادعى ده يلعب فى أم البلد براحته

اللى غايظنى أنه مش عايز يعدل الدستور ده عايز دستور جديد خالص

ليه بقى ياريت تشغلوا عقولكوا و تعرفوا أن أكيد الموضوع فيه إنّ

مش على قد الترشح لانتخابات الرئاسة

البرادعى ده اسم على مسمى و لحد الآن 100000 واحد لبسوا البردعة و هات يا نهيق

Mahmoud Ibrahem said...

طبعا انتي حرة في رؤيتك لأحلام الجيل ... بس افرضي بقي ان شاء الله يعني الاحلام دي مش اتحققت ...هتبقوا ان شاء الله فشلتوا كده ؟؟؟ بس للاسف هتكونوا متوا و مش هنلحق نقولكم انكم غلط
يالا ..يديكم طولة العمر بقي

مش فاهمه said...

اتفضلى يا ستى ادى المناظر اللى دخلت الأئتلاف و طهقتنا فى عيشتنا طول السنين اللى فاتت علشان تعرفى اننا جيل مظلوم طلعنا لقينا البشر دول كاتمين على انفاسنا و محسوبين على المعارضه
http://www.almasry-alyoum.com/article2.aspx?ArticleID=245642
بيفكرنى رفعت السعيد رئيس حزب التجمع اللى طول الصيف قاعد فى مارينا مش عارفه ازاى مارينا و تجمع بيفكرنى بعيله رمضان السكرى فىالعيال كبرت لما احمد زكى حب يجمعهم علشان يخليهم يتفقوا مع بعض قام سعيد صالح قال اول حاجه علشان الأجتماع ده ينجح ان عاطف السكرى اللى هو يونس شلبى ما يقعدش جنبى فى الأجتماع حاجه تقرف و الله

Tamer said...

و الحمد لله هانفضل كل يوم و التاني نسمع عن حركة الهبل الشعبي ولا حزب النفاق المعارض يطلع يحدف له كلمتين هبل على البرادعي و خلاص

ماجد العياطي said...

يمكن انا مش حابب النظرة التشاؤميه دي

لكن انا متفق ان البرادعي ممكن

بل احتمال كبير يطلع مقلب

او انه ملوش في حاجه

اوانه زي مانتي قولتي

لانه مش متمرس في السلطه

ما هي مصر مش زي وكالة الطاقه الذريه

في اختلاف

انا عن نفسي مش ميال للبرادعي

لكن انا ميال لبديل تاني يكون في شئ من التغير الايجابي

او حتى السلبي

اللي يخلينا نفكر وناخذ خطوة ناحة الاصلاح

ولوطلع سلبي ساعتها انا متأكد ان الناس هتتحرك لان خبططين في الراس توجع

وعموما كلامك ممتاز

وعبر عن اللي جوانا كلنا

هو احنا عايزين ايه اكتر من كده

شكرا ليكي على البوست الجامد ده

Anonymous said...

فجَّر الدكتور أكرم الشاعر عضو الكتلة البرلمانية للإخوان المسلمين في مجلس الشعب مفاجأة مدوية اليوم أثناء اجتماع لجنة الإدارة المحلية بمجلس الشعب، كشف فيها متاجرة بعض النواب بأراضي الدولة.

واتهم الشاعر 15 نائبًا من الوطني بالتورط في الحصول على أراضٍ من أراضي شباب الخريجين ببورسعيد لأقاربهم وأبنائهم بالمخالفة للقانون، وأكد الشاعر أن هؤلاء من مجلسي الشعب والشورى.

فيما طالبت اللجنة من محافظة بورسعيد بإفادتها بالأسماء التي تضمنتها الكشوف المعتمدة من وزير الزراعة بتخصيص الأراضي لبعض الشخصيات البرلمانية وكبار الشخصيات رسميًّا، وذلك خلال أسبوع؛ حتى يتم اتخاذ إجراءات في هذه القضية.

من جانبه اعترف محمد فتح الله- مراقب عام شباب الخريجين بمحافظة بورسعيد- بتوزيع الأراضي على عددٍ من الأفراد بشكلٍ خاص؛ حيث إن القانون يمنح وزير الزراعة الحق في تخصيص الأراضي دون مزادٍ علني داخل إطار هيئة التعمير!.

وكان الشاعر كشف عن حصول 15 نائبًا بمجلسي الشعب والشورى وبعض كبار المسئولين بالدولة ومسئولين محليين بالحصول على الأراضي لأبنائهم وأقاربهم وأبناء دوائرهم، وطرح أسماء بعض هؤلاء النواب، ومنهم النائب الدكتور علي مصيلحي وزير التضامن الاجتماعي، ومحمد خليل قويطة وكيل لجنة العلاقات الخارجية (وطني)، وعبد الرحيم الغول رئيس لجنة الزراعة (وطني)؛ حيث حصل على قطعتين، وعبد المنعم نجيب وكيل لجنة القوى العاملة (وطني)، ولطفي شحاتة (وطني)، وإمام حسن توفيق (وطني)، وسلمان عامر (وطني)، ومجدي الأمير (وطني)، وعاطف أباظة (وطني)، وخالد أبو سمرة (وطني)، ومأمور قسم الجنوب، ورئيس حي الجنوب، ومدير أوقاف بورسعيد.

فيما أعلن الشاعر عن عزمه تقديم بلاغ للنائب العام يتضمن المخالفات الجسيمة في توزيع هذه الأراضي، خاصةً على النواب، واتهم المهندس أمين أباظة وزير الزراعة بتوزيع هذه الأراضي على "المحظوظين"، مطالبًا اللجنة بالنزول إلى أرض الواقع لبحث المتواجدين الفعليين في الأراضي.

وكشف الشاعر أن الذي كشف الموضوع هو ابن منير ثابت الذي رفض المحافظ تخصيص الأرض له؛ لأنه ليس من أبناء المحافظة، وأرجع المحافظ مسئولية التخصيص إلى الوزير الذي قام بدوره بتوزيع 1350 فدانًا بالأمر المباشر، فيما أوضح الشاعر أن من بين 2200 فدانٍ تم توزيع 80 فدانًا بالقرعة فقط.

Anonymous said...

فجَّر الدكتور أكرم الشاعر عضو الكتلة البرلمانية للإخوان المسلمين في مجلس الشعب مفاجأة مدوية اليوم أثناء اجتماع لجنة الإدارة المحلية بمجلس الشعب، كشف فيها متاجرة بعض النواب بأراضي الدولة.

واتهم الشاعر 15 نائبًا من الوطني بالتورط في الحصول على أراضٍ من أراضي شباب الخريجين ببورسعيد لأقاربهم وأبنائهم بالمخالفة للقانون، وأكد الشاعر أن هؤلاء من مجلسي الشعب والشورى.

فيما طالبت اللجنة من محافظة بورسعيد بإفادتها بالأسماء التي تضمنتها الكشوف المعتمدة من وزير الزراعة بتخصيص الأراضي لبعض الشخصيات البرلمانية وكبار الشخصيات رسميًّا، وذلك خلال أسبوع؛ حتى يتم اتخاذ إجراءات في هذه القضية.

من جانبه اعترف محمد فتح الله- مراقب عام شباب الخريجين بمحافظة بورسعيد- بتوزيع الأراضي على عددٍ من الأفراد بشكلٍ خاص؛ حيث إن القانون يمنح وزير الزراعة الحق في تخصيص الأراضي دون مزادٍ علني داخل إطار هيئة التعمير!.

وكان الشاعر كشف عن حصول 15 نائبًا بمجلسي الشعب والشورى وبعض كبار المسئولين بالدولة ومسئولين محليين بالحصول على الأراضي لأبنائهم وأقاربهم وأبناء دوائرهم، وطرح أسماء بعض هؤلاء النواب، ومنهم النائب الدكتور علي مصيلحي وزير التضامن الاجتماعي، ومحمد خليل قويطة وكيل لجنة العلاقات الخارجية (وطني)، وعبد الرحيم الغول رئيس لجنة الزراعة (وطني)؛ حيث حصل على قطعتين، وعبد المنعم نجيب وكيل لجنة القوى العاملة (وطني)، ولطفي شحاتة (وطني)، وإمام حسن توفيق (وطني)، وسلمان عامر (وطني)، ومجدي الأمير (وطني)، وعاطف أباظة (وطني)، وخالد أبو سمرة (وطني)، ومأمور قسم الجنوب، ورئيس حي الجنوب، ومدير أوقاف بورسعيد.

فيما أعلن الشاعر عن عزمه تقديم بلاغ للنائب العام يتضمن المخالفات الجسيمة في توزيع هذه الأراضي، خاصةً على النواب، واتهم المهندس أمين أباظة وزير الزراعة بتوزيع هذه الأراضي على "المحظوظين"، مطالبًا اللجنة بالنزول إلى أرض الواقع لبحث المتواجدين الفعليين في الأراضي.

وكشف الشاعر أن الذي كشف الموضوع هو ابن منير ثابت الذي رفض المحافظ تخصيص الأرض له؛ لأنه ليس من أبناء المحافظة، وأرجع المحافظ مسئولية التخصيص إلى الوزير الذي قام بدوره بتوزيع 1350 فدانًا بالأمر المباشر، فيما أوضح الشاعر أن من بين 2200 فدانٍ تم توزيع 80 فدانًا بالقرعة فقط.

Unknown said...
This comment has been removed by the author.
مواطن مصري said...

اشتباكات عنيفة بين المصلين المعتكفين وقوات الجيش الإسرائيلي.. وإصابة ستة فلسطينيين برصاص القوات الإسرائيلية


اشتباكات عنيفة بين المصلين المعتكفين وقوات الجيش الإسرائيلي.. وإصابة ستة فلسطينيين برصاص القوات الإسرائيلية
اندلعت اشتباكات عنيفة بين شبان فلسطينيين وقوات الإحتلال الإسرائيلي داخل المسجد الأقصى المبارك في القدس المحتلة، واطلقت قوات الإحتلال الإسرائيلي الغاز والقنابل المسيلة للدموع في محاولة لاقتحام المسجد، مما اسفر عن إصابة ستة فلسطينيين كانوا معتكفين في المسجد برصاص مطاطي اطلقتها القوات الإسرائيلية.


http://dostor.org/politics/middle-east/10/february/28/7904

فين حماس فين فتح كلة ساكت

و محدش اتكلم لا عن ضم الحرم الابراهيمي ولا عن اقتحام القدس


ولا كلة بيتكلم بس ب اوامر من ايران ضد الجدار و شتيمة في مصر


فين جورج بلاوي حامي حمى العروبة معملش يعني مظاهرة ضد السفارة الاسرائيلية

في لندن ولا الاوامر مجتش لية يتحرك

و الله بكرة هنصحى هنسمع و قد قامت اسرائيل بضم القدس

للتراث الصهيوني ولا حد هيتحرك


مش هتتكلمي عن الي بيحصل

الاسير said...

معلش بس هو سؤال بعيد عن البوست
هما الاخوة المجاهدين بتوع القاعدة (السنة)
مع او ضد المجاهدين بتوع حزب الله (الشيعي)
http://www.moheet.com/show_news.aspx?nid=350076&pg=2

بهيج الشرير said...

والنبي ياأبلتي أنا عندي سؤال! ياترى صحيح أن عوكل الأول ملك الفياجرا وقاهر الهكسوس ناوي يبعت طيارة البطاطين والخيام والبيجامات الكستور لضحايا زلزال تشيلي بدل ضحايا الكوارث في مصر

بهيج الشرير said...

والنبي ياأبلتي أنا عندي إقتراح! إيه رأيكم نعمل دعوة للناس كلها لصلاة قضاء الحاجة أو صلاة الإستغاثة، وتكون في الخلاء زي صلاة العيدين كده، والناس كلها تدعي أن ربنا ياخد عوكل الأول ملك الفياجرا وقاهر الهكسوس وأن حباية الفياجرا تقف في زوره يارب، ونفضل نكررالموضوع ده كل يوم لغاية ماييجي اليوم اللي نغير فيه الصلاة لصلاة الجنازة

المهدى said...

برافووووو المرة دى فكرتى بعقلك مش بقلبك
بالمناسبة شوفى عبد الرحمن يوسف فى العاشرة مساء
امبارح
لو ماشوفتيهاش حاولى تشوفيها ولو شوفتيها إيه رأيك؟

سامي said...

بهيج الشرير هههههههههههههههههههههههههههههههههههههههههههههههههههههههههههههههههههههههههههههههههههههههههه

Anonymous said...

إلى بهيج الشرير

أنا موافق على صلاة الحاجة لكن صلاة الجنازة لأ لأن فيها دعاء بالرحمة للميت ما هو مش هيطلع عنينا و عنين أهالينا و بعدين ندعيله بالرحمة افرض ربنا استجاب يبقى عوكل طلع كده زى الشعرة من العجين

لما يموت أنا هسجد سجدة شكر و أقول:

ألف حمد و شكر ليك يارب أخيرا مااااااات ده اليوم اللى عشت أحلم بيه طول عمرى

Dr. Eyad Harfoush said...

عش ع الريح عزف للحياة على أوتار متعددة، وسياحة داخلية في الذات بعمق طفولي رائع، وبلغة رشيقة سلسة ومميزة، وخفيفة الظل كذلك، المدونة مع طرافتها خناقة مع الحياة وضرب على وتر مشدود للحد الأقصى، وبلغة شديدة .. العفوية، هل من حق قاريء أن يسأل لماذا؟ مع تحياتي وتقديري يا نوارة الانتصار

مواطن مصري said...

الاحتلال يقتحم «الأقصى».. وتقارير إسرائيلية تكشف نوايا لضم «كنيسة القيامة» للتراث اليهودى

تصاعد التوتر إلى درجة الغليان أمس فى جميع أنحاء الضفة الغربية، من الحرم الخليلى إلى القدسى، ومن المسجد الأقصى لكنيسة القيامة، بعد أن كشفت تقارير صحفية عن مساعى إسرائيل إلى ضمها لقائمة التراث اليهودى، فيما اعتبر إعلان حرب دينية على المقدسات الإسلامية والمسيحية - على حد سواء.

http://www.almasry-alyoum.com/article2.aspx?ArticleID=245730

اسرائيل بتعلن علينا حرب دينية

Anonymous said...

hi

Anonymous said...

hi ya nawara ana b2aly ktir bashof elblog bta3ek(kol yom elsob7) w ba7eb oslobek gedan sa3at ba7'talef m3aky w sa3at benetefe2 bas fy ela7'er enty ensana mo7tarama...
belnesba l mawdo3 eltawkilat da ne3melo w la la2 w law hwa 3'alat teb2a laih elsefarat w elshahr el2akary batalo ye3mloh llnas? w elaham ana fy usa lma elsefara bet2ol la2 yeb2a a elly odamna hena?

Haytham Alsayes said...

والله كلام عشرة علي عشرة احنا لازم نشتغل ونعمل الل علينا ونسبها علي الله البرادعي او غيره التغيير جي جي لان رنا سنته كدة لو غيرنا نفسنا ربنا عيغير الوضع
تقبلي مرورى

شمس العصارى said...

ايه
مفيش جديد
ولا مشغولة اليومين دول

مواطن مصري said...

الكلمة اهي

و بقيتها في نفس الايتشانل

السيد نصرالله اطل لمناسبة ذكرى المولد النبوي الشريف واسبوع الوحدة الاسلامية موقع قناة المنار - محمد عبد الله اطل الامين العام لحزب الله السيد حسن نصرالله مساء اليوم وذلك في الاحتفال المركزي الذي يق...


http://www.youtube.com/watch?v=tqza0aW7TpE

مواطن مصري said...

شفتي الجزء دة حلو اوي

بس بيقلد ناصر قبل النكسة

http://www.youtube.com/watch?v=w6us467x7Uo

الجزء السابع

Unknown said...

مواطن يا حبيبي
دي كلمة تانية قديمة

شمس العصارى said...

" ولذلك فليس غريبا أن تبذل جهود حثيثة لإجهاضه وتشويه صورته. وفى مصر على الأقل فإن ذلك ما بدأت فيه أذرع السلطة فى الأحزاب الرسمية (التى تسمى معارضة)"
حبيبى فهمى هويدى ده
هو ليه بياخد افكارى هههههههههههههههه
اخر تعليق ليا فى البوست هنا بيقول كده
" اهو ابتدا الضرب من تحت لتحت و شغل النظام اشتغل
ادى 4 احزاب عاملين مؤتمر فى مارس"

و اهه هو بيقول الكلام تانى
انا لازم اقابل الراجل ده
ههههههههههههه