Thursday, 11 February 2010

امين شرطة يقتل مواطن مسيحي في المنوفية

تحديث الساعة 13:40 الخميس 11 فبراير 2010
احالة الشرطي قاتل ملاك الى محاكمة عسكرية
وامين الشرطة مش مصاب ولا حاجة، كان مواطن شووجاع سمع انه مصاب، لا مافيهوش حاجة
----------------------
تحديث الساعة 00:17 الخميس 11 فبراير 2010
صاحب مدونة مواطن شووجاع بيقول انه عرف من بعض الاهالي هناك ان ملاك كان متعود السهر مع امين الشرطة
احنا مش ح نعرف نسلك مع الناس في الارياف، كل واحد ح يحكي حكاية شكل، والشرطة ما تتخيرش عنهم
------------
تحديث الساعة 23:45 الاربعاء 10 فبراير 2010

مصراوي بتقول حكاية خامسة، بتقول ان المسيحيين قالوا ان امين الشرطة اطلق العيار الناري اثناء مشادة كلامية والشرطة بتقول ان كان بينضف سلاحه قام طلعت طلقة بالغلط
الشاب اللي صور الفيديوهات ح يرفعها بكرة ان شاء الله
امممم، انا مش عايزة اقول اراء، بس الاقرب للمنطق انه يكون اطلق النار اثناء مشادة بينهم، لا انه يكون نداه وقعده جنبه وراح مموته فجأتن ولا بينضف سلاحه
بينضف سلاحه دي بيقولوها على حرس الحدود اللي بتقتلهم اسرائيل ويقولوا زميله كان بينضف سلاحه او هو كان بينضف سلاحه
وبرضه ح نشوف لسه
------------
تحديث الساعة 17:00 الاربعاء 10 فبراير 2010
دي رواية اخرى على مدونة مواطن شوجاع بيقول ان ملاك كان بيهزر مع امين الشرطة وهو بينضف سلاحه قام طلقة طلعت بالغلط. مواطن كمان ذكر ان المسلمين اعترضوا على تحويل الاودة اللي كانوا بيصلوا فيها الى كنيسة والامن حط عليها حراسة وبيقول ان مصدره احد سكان المنطقة
كمان ح تلاقوا تعليق على البوست ده من المنوفية من واحد ساكن جنب قرية تتا بيقول ان المسيحيين عاملين مظاهرات، وان الامن مظبط وماحدش يعرف ملابسات الحادث الحقيقية دي رواية رابعة للحادث
وما زلنا في انتظار بيان خالد علي ومركز هشام مبارك

--------------

تحديث الساعة 18:36 الاربعاء 10 فبراير 2010:
مركز خالد علي اللي دايما انسى اسمه :) عارفاه انه خالد علي وبس ومركز هشام مبارك الاتنين بيتابعوا دلوقت، والمدون سجل شهادات الشهود وح ينزلها ان شاء الله، ودي رواية اخرى للخبر
واما نشوف بقى الحكاية ح توصل لفين ولو فيه تفاصيل او تصويبات للخبر ح انزلها وح نتابع مع خالد علي ومركز هشام مبارك ان شاء الله
------------
كتب البوست في تمام الساعة 17:37 الاربعاء 10 فبراير 2010
ايه الحكاية الغريبة دي؟
واحد النهاردة اتصل بيا وصحاني من النوم على مصيبة، قال لي في قرية تتا مركز منوف بالمنوفية امين شرطة قتل شاب مسيحي وانا (اللي كلمني) رايح دلوقت اشوف فيه ايه خليك معايا
باكلمه دلوقت وهو سجل شهادات الشهود
الامر كالآتي:
قرية تتا فيها حوالي من عشرين الى تلاتين اسرة مسيحية، عاملين اودة صغيرة كده يصلوا فيها، ما تتسماش كنيسة، هي ينفع تبقى مصلى، بيصلوا فيها مرة كل شهر وبيبعتوا الاطفال الصغيرة تاخد فيها درس مسيحي
جم في العيد اللي فات ده (ده كان عيد منيل ده) انطسوا في عقلهم وصلوا في المصلى ده، راحت ناس من كبار القرية مع الشرطة وقالوا للكبير بتاع المسيحيين: انت نسيت نفسك وللا ايه؟ وبهدلوه وشتموه وقفلوا المصلى وحطوا عليه حراسة امنية
حلو لحد كده؟ طبعا حلو، حلو قوي، حلو خالص، هو فيه في الدنيا احلى واجمل من كده؟ ده انا مش عارفة اعمل ايه من كتر الحلاوة اللي ساحت راحت مطرح ما راحت
ناس تصلي؟ طبعا نسيت نفسها
مش مهم، اهم سكتوا، سكتوا ما اعترضوش، لا قدموا طلب ببناء كنيسة (على حسب كلام الشاب اللي كلمني) ولا اعترضوا على قفل المصلى ولا فتحوا بقهم
ليه يابني؟
خايفين، عددهم قليل والناس في المنوفية وحشة قوي مش زي الصعيد
ده كلام الصديق اللي راح لانه عاش في القرية دي فترة
الناس وحشة ازاي يا خويا؟
قال لي: الناس في الصعيد بيتعاملوا راس براس وعيلة لعيلة، لكن قرية تتا دي بالذات ماحدش يقدر يسمي ابنه بشوي، يبقى اسمه في البيت مينا وللا بشوي واسمه في المدرسة عادل والا يطلع تلاتة
طب وبعدين؟
قال: وبعدين الحراسة محطوطة بقالها فترة، جه امين شرطة (بلا اي مبرر) قال تعالى يا ملاك، ملاك سعد ده 24 سنة نجار، واد غلبان يعني والظاهر مالوش سند، راح ملاك قال له نعم؟ قال له اقعد، الجدع قعد عادي راح مطلع الطبنجة وعمرها قدامه وقال له: الطبنجة دي ميري وكل حاجة ميري
واخدين بالكوا من الكلمة الاخيرة دي: كل حاجة ميري
وراح ضاربه رصاصة في قلبه
ومات طبعا عشان ماحدش يسأل سؤال غبي بس
الشهود قالوا لصديقنا احنا حاسين ان الموضوع مش واقف عند امين الشرطة ده والا ماتجيلوش جرأة يعمل كده، ده فوقيه حد وهو اللي مديله الاوامر دي
ولسه ما نعرفش اسم امين الشرطة
نعم؟
نعم يا امن نعم؟ ايه اللي بتعمله ده؟ فيه ايه؟ عايز مننا ايه؟ عايزين مننا ايه احنا سايبين لكوا البلد باللي فيها تعملوا ما بدا لكوا، ولسه قابضين ناس من يومين، من غير سبب، وتموتوا عيل من غير سبب
فيه ايه؟
عموما هو صديقنا لسه هناك، لما يرجع ح ينزل الفيديوهات ويبعت لي اللنكات وينزل تفاصيل اكتر واي حاجة ح نعرفها ح نقولها لكوا
دي المعلومات اللي وصلت لي لحد دلوقت ولو عرفت اي حاجة زيادة، او اي تصحيح في المعلومات على طول ح انزلها
اصل الحكاية كده زي ما حكاها الناس حاجة من ورا العقل
اكيد في خيط مفقود، مش ممكن نكون وصلنا لهذه الدرجة من الجنون... دي بقت مصحة عقلية بقى مش بلد
بس عموما، المعلومة الاكيدة دلوقت ان امين شرطة قتل مواطن، وتحت اي ظرف، المواطن ده مسلم مسيحي هندوسي، نجار او مهرب مخدرات، يعني ايه امين شرطة يقتل مواطن يعني مش فاهماها دي
------
نسيت اقول حاجة، صديقنا اللي هناك بيقول لي الناس خوافة قوي، وخايفين ان الامن يمسكهم يشبحهم وياخد نسوانهم عشان يهددهم يغيروا اقوالهم
احنا عايزين بقى نقف جنب الناس دي

30 comments:

Anonymous said...

عشان تتأكدي زي ما انا اتاكدت انك هابلة
الدنيا هاتتقفل حوالين المنوفية كلها
وابقي قابليني لو صاحبك دة رجع
بالاندر ورور بتاعة مش بس فيديوهات وصور
طب استني يافوزية لما الراجل يرجع بالسلامة!!!!!

mido said...

دى أصل الحكاية

الأمن يحاصر قرية بالمنوفية بعد احتجاج مسلمين علي بناء كنيسة بجوار مسجد

و بعدين حصل كده

أهالي قرية تتا بالمنوفية: لا توجد خلافات بين أقباط ومسلمي القرية


!!!!!!!

صوت الحق said...

ايه الكلام دة ؟؟؟؟
اعقلي يا نوارة ابوس ايدك مش ناقصين مصايب بقي دة كلام يعقل أمين الشرطة هيقتل واحد مسيحي كدة من الباب للطاق بمناسبة ايه و لية يعني
اللي بيحكيلك القصة دية اتأثر بالاعدامات الجماعية اللي حصلت لبتوع بوكو حرام و ذاعتها الجزيرة من يومين

masrybeftraa said...

يا نهار ازرق استلموا باه يا جدعان دى حكومه تيت ووزير تيت عشان بس ماحدش يقولى ان مسيو فاروق الباز كان غلطان وهو بيقول ان العالم دول بوظوا البلد من غير علمهم لانهم لا بيعرفوا يصلحوا ولا يعرفوا يبوظوا الله يحرقهم عشان جابوا اخرنا ...........واستنوا ماذا سيحدث بعد ذلك نفسى اعرف هما بيفشخونا اوكى ليه باه بيغتتوا علينا بعد واثناء فشخهم لينا

khalil said...

نوارة يا بنتى الموضوع كدة واسع قوى اللى ابلغك تثقى فية ولا بيبالغ تاكدى من مصدر اخر تحياتى وممكن يكون حصل بس بسيناريو تانى

الخوجة said...

استحالة اللى بتقول علية يانونيمس ونوارة ده فخ خلى بالك الناس فى المنوفية مش كده ابدا

الخوجة said...


الدستور تكشف المستور فى علاج بطرس غالى على نفقة الدولة

Amr said...

هو أيه الحكايه ؟

أيه حكاية المظاهرات الى الناس بتعملها كل مالمسيحيين ياخدوا أوضه يصلوا فيها ؟

ولما يروحوا كنايس يضرب عليهم نار

أيه ؟
خلاص - بأينا بتوع ربنا أوى كده ؟
طب ماتتشطروا على اللى واكلكم بالجزمه

وهما هما الشباب اللى بيطلعوا يهتفوا يسقط الكفره تلاقيهم ماشيين ورا أى بت حلوه يتحرشوا بيها على النواصى

ده أنتوا بقيتوا تقرفوا
عليا النعمه لو الكنيسه سكتت يبأه يستاهلوا 100 مره اللى بيجرالهم بأه هه

أبو عمر - الصارم الحاسم said...

يا سلااااااااااااااااام


تن تررارار تن تن

والمفروض بقى اننا ناخد الكلام كده ونصدق


ان القصة بالظبط حصلت كده بدون حرف زائد او ناقص.... ونصدق

مع احترامي الشديد ليكي...ما هو احنا لو عندنا استعداد نصدق حاجات زي دي هنصدق...وهيبقى اللي عايز يوصلنا حاجة هيجي لنا احنا بالذات عشان احنا بنصدق


ما هو اما يتقال من ناس ان الامبراطورية المسلمة - على حد قولهم - قامت يا حرام على اشلاء الامبراطورية الرومانية اللي كانت بتتعامل مع اهل مصر والشام بمنتهى العدل والحرية الدينية ....يبقى احنا غلطانين اما ناخد القصص كده مرة واحدة ونصدقها


مع المسيحيين في مصر...ما اظنش خااالص ان ده يحصل بالصورة دي...ولغاية اما نعرف صاحبك ده خلفيته ايه-بلاش اسمه وده مفهوم - يبقى نقدر نحكم على القصة

آه...وطبعا امين الشرطة وهويته وخلفيته وايه تفاصيل الحكاية دي

mak said...

مش عارف بس القصه المكتوبه شكلها سينمائى شويتين

جبهة التهييس الشعبية said...

ح نشوف
لسه دي الرواية الاولية وما نعرفش اكتر من كده

اي حاجة ح تيجي جديدة من هناك ح نقولها واي تصويبات للقصة ح نقولها برضه انا كاتبة كده بالفعل

ومركز هشام مبارك وخالد علي بيتابعوا وح ينزلوا بيانات اكيد يشرحوا فيه القصة بالتفصيل

ولما يجيلنا الفيديوهات برضه ح ننزلها عشان نغطي القصة من كل الجوانب

مواطن مصري said...

انا قولتلكم و الله نخلص على المنايفة نفر نفر و نعمل جدار عازل حولين المنوفية و اي حد يحمل الدم المنوفية نطخة عيارين

جبهة التهييس الشعبية said...

اه
هو لحد دلوقت المعلومتان المؤكدتان:
1- ان مصلى المسيحيين اتقفل واتوقف عليه حراسة
2- ان فيه قتيل مسيحي على ايد امين شرطة

وفيه شهادة شهود معينة وح نتابع برضه

وبيان مراكز حقوق الانسان ح يوضح الحقيقة
لان اذا حطينا في الاعتبار ان شهود العيان ممكن يبالغوا
فاكيد لازم نحط في الاعتبار ان الحكومة كدابة
لازم المعلومات المؤكدة تيجي من جهة مستقلة
والجهات المستقلة بيتابعوا

بث تجريبي said...

بجد انا اتقرفت من الحورات دى كلها

quipeed said...

ايه الكلام دا ؟
انا من المنوفية ... ومن قرية جنب تتا دى بالظبط ... بس مش زى بلاش افلام سنمائية وتولعوا الموضوع وخلاص ...
كل الحكاية ان الامن مظبط الدنيا ولسه ما حدش خالص يعرف ايه الى حصل ولا اى معلومات
وكل الفيديو الى هيجيلكوا اكيد اكيد هيكون للمظاهرة الى حصلت وخلاص .. يعنى وبلاش نتكلم فى الموضوع دا اكتر من كدا علشان ما يكبرشى لحد ما نعرف الحقيقة

جبهة التهييس الشعبية said...

طب كويس، حضرتك من قرية جنب تتا، بدل ما تقول لنا ما تتكلموش في الموضوع عشان ما يكبرش قول لنا معلومات

المعلومات اللي حضرتك قلتها لنا ان الامن مظبط الدنيا

طب كويس
يعني ده كلام يتفق مع صديقي اللي راح المنوفية بالظبط ان الامن هو اللي عمل العملية وقال دي عملية ميري

المعلومة التانية ان حضرتك قلت ان فيه مظاهرات

يعني الموضوع كبر بالفعل وفيه ناس عملت مظاهرات

مش الكلام هو اللي ح يكبر الموضوع

والا لما بنتكلم عن اعتصامات العمال يبقى بنكبر الموضوع ولو سكتنا مشاكل العمال ح تتحل

لو اتكلمنا عن مظاهرات الجدار يبقى بنكبر الموضوع ولو سكتنا الجدار ح يتهد لوحده

طب ما تنزل كده وتاخد لك عربية وتجيب لنا اخبار يا اخي ينوبك فينا ثواب

بدل الواد اللي نزل من القاهرة لحد المنوفية كتر خيره

أبو عمر - الصارم الحاسم said...

مش معنى ان الامن مظبط الدنيا معناها ان الامن قتل بالطريقة دي

في اي خناقة طائفية دلوقت الامن بينزل
"يظبط الدنيا"

ولو الامن عملها بالطريقة دي - لو - يبقى الامن قتل بني آدم بدون ذنب مش قتل مسيحي كما يقول العنوان

لكن تكبير الموضوع في نشر الرواية الفظيعة قبل التثبت منها لا ...حتى وان انكرتها الجهات المستقلة - وعندك حق في موضوع الجهات المستقلة - فان اعباط المهجر سيتمرون في التحدث عن الحادثة على اساس هذه الرواية

خليني نشوف الموضوع هيرسى على ايه...بس اذا تقارير الجهات المستقلة جاءت فقط بناء على روايات طائفة واحدة وبس - يبقى معذرة برضه متكونش دليل قاطع

حسن مدني said...

سؤال مهم أحب أطرحه في هذه المناسبة

ليه لما الأمن يقتل مواطن مسلم، ينشر الخبر الأمن يقتل مواطن، وإذا كان مسيحي يبقى الأمن قتل مواطن مسيحي.
وبعدين نشوف المواطن ده ليه تم قتله أو إصابته أو عتقاله أو تعذيبه؟
يعني كل يوم هناك حالات اعتقال أو قتل أو تعذيب من الأمن. وجرائم كثيرة تحدث يومياً. ليه لما يكون طرف فيها مسيحي لازم يكون فيه إشارة إلى ذلك في الخبر؟

تحياتي

جبهة التهييس الشعبية said...

عشان فيه احتمال ان يكون الحادث طائفي مش مجرد امين شرطة بيمارس هوايته في قتل الناس

جبهة التهييس الشعبية said...

الصارم الحاسم

بذمتك ودينك وايمانك
وحياة لا اله الا الله يا شيخ انت بالذات مهتم تعرف الحقيقة؟ ح يفرق معاك يعني؟ يعني وحياة لا اله الا الله كمان مرة لو مسيحي مات باي شكل ح يصعب عليك؟
ما تخلينا ساكتين بقى هههههه

سبايدرمان spiderman said...

طب ما بتحصل كثير بين الناس و بعضها
هما المسيحين على راسهم ريشه عشان كل خبر
يتعمل منه حبه و قبه :(

طب ما الموضوع ده بيحصل كتييييييييير جدا و مش بيتنشر حاجه ؟؟

مين الى مستفيد يعني من كده ؟؟

أبو عمر - الصارم الحاسم said...

لا خااااااااااااالص ولا يهمني في حاجة

انا اشكيف مخيف بتغذى على دماء غير المسلمين وبستلذ دماء نصارى مصر بالذات

ومعجب جدا بقدرتك على النط في عب نوايا البني آدمين....دايما كده فاقساني...خاصة في مواضيع النصارى


بس تعرفي انتي عندك حق في حاجة واحدة...ان الموضوع مايهمنيش فعلا في انه نصراني...الموضوع خدته بتعود نوعا لان ده بيحصل مع المسلمين والنصارى والهندوس والسيخ على حد السواء ....مش فارقة مع الحكومة وعساكرها


بس انا مبجريش ويبقى عندي استعداد اصدق اي حاجة جلدا للذات

Mireille said...

بصي يا نوارة أنا بصراحة مش مصدق ان أمين الشرطة ضرب الواد بالنار بدم بارد كده.. يعني القصة اللي في مصراوي أوقع
http://www.masrawy.com/News/MidEast/Reuters/2010/February/10/1233995.aspx
الراجل كان بينظف البندقية و طلعت الرصاصة غلط

مش دي المشكلة.. المشكلة انه بردو أصل الموضوع انه شوية ناس بتصلي في مكان من غير ترخيص.. أنا عاوز أفهم ازاي ممكن حاجة زي كده تدايق بني أدم.. واحد بيصلي.. واحد بيصلي.. دي الناس بتشوف بيوت الدعارة و يقولوا ملناش دعوة.. و بعدين محدش يطلع الناس تقولك أصلهم معدهمش ترخيص! لا و النبي.. مهو أكيد الناس اللي تظاهروا دول واحد منهم عنده عربية كبدة من غير ترخيص.. مبتحصلش مظاهرات ليه علشان تتشال عربية الكبدة؟

Tamer said...

ماعنديش حاجة اقولها بخصوص الموضوع
يمكن لأنه لسه مش واضح

بس انا كمان زي الصارم الحاسم ملاحظ نبرة جلد ذات عالية اوي

ehabafndy said...

الكلام ده ميخشش دماغ حد و على حد تعبير نواره نجم فى بوست قبل كده فى موضوع تانى لها كلام معاتيهى يمكن التحديث إلى إنتى عاملاه يكون أقرب للصحة أو يعنى فيه منطق شويه .

جبهة التهييس الشعبية said...

انا ما عنديش توحد مع الشرطة عشان لما تقتل حد والومها على القتل ابقى باجلد ذاتي
انا ذاتي مش الشرطة والحمد لله

مواطن شووجااع said...

والجديد اللي عرفته من أهالي المنطقة كمان إن القتيل مــــــــلاكـ كان متعود علي السهر مع أمين لشرطة .

زقزوق said...

يلا
مع المسيح ذاك افضل جداااا

Amr said...

@ زقزوق

مش عارف بس حاسس انه تعليق بايخ جدااااااااااا

menasam26 said...

هاى نوارة اسف على التأخير
انا باكتب الاحداث عندى فى مدونتى
http://love-peace-hope.blogspot.com/
هي فى الحقيقة مش هتختلف كتير عن اللى ذكرتية
دا لينك للفيديوهات اللى صورتها و هي للجنازة و شهادة قريب ملاك

http://www.youtube.com/user/menaysam13