Wednesday, 10 February 2010

اعتصام 400 من عمال طنطا للكتان

تحديث:
هو فيه ايه النهاردة؟



تحديث:
من عند خالد علي والمركز بتاعه اسمه المركز المصري للحقوق الاقتصادية والاجتماعية
طب بذمة النبي يا خالد ده اسم يتحفظ؟
عموما ده النص والصور عنده على الفيس بوك
الشرطة تتدخل لفض اعتصام طنطا بالقوة




10 فبراير2010
فى الساعة الرابعة والنصف عصر اليوم قامت قوات الشرطة بمحاولة اقتحام اعتصام عمال طنطا للكتان بشاع حسين حجازى أمام مجلس الوزراء بوسط القاهرة، وهو الإعتصام الذى قام به العمال منذ صباح يوم 8 فبراير واستمر لليوم الثالث على التوالى احتجاجا على سياسات المستثمر السعودى عبد الله الكحكى الذى أغلق الشركة، واعتراضا على تجاهل وزارتى الإستثمار والقوى العاملة لمطالبهم، وكذلك تقاعس الإتحاد العام ونقابة النسيج.
ومنذ بداية الإعتصام كانت قوات الشرطة تقف على الحياد الإ أنها وعلى حين غره قامت فى الساعة الرابعة والنصف بالإعتداء بالضرب على العمال وتكسير واتلاف ما معهم من محتويات لمحاولة فض الإعتصام بالقوة، وتسببوا فى اصابة هشام أبو زيد القيادى العمالى بالشركة ، كما ألقو القبض على اثنين من شباب حركة تضامن وهم محمد ناجى وخالد السيد وهم الآن محتجزين بعربات شرطة تحمل أرقام 39789، كما تعرض الصحفيين جيهان شعبان وهشام فؤاد، والباحثة فاطمة رمضان للإعتداء بالضرب والسب أثناء متابعتهم للإعتصام وتم إبعادهم عن شارع حسين حجازى بالقوة .
وقد جاء هذا التدخل بعد تغيير العمال لهتافاتهم حيث كانوا طوال الأيام الماضية يرددون شعارات لا تهاجم الحكومة ولكنهم اليوم رفعوا هتافات " بالروح والدم رزق عيالنا أهم"، " تسقط حكومة الحزب الوطنى" " يا علاء قول لابوك العمال بيكرهوك" ، وحتى صدور هذا البيان عجزت الشرطة عن فض الإعتصام رغم كل هذه الاعتداءات الإ أنه شوهدت عربات من قوات الشرطة تتوافد وتتزايد على مكان الاعتصام .
ومن الجدير بالذكر ان مطالب العمال فى الاعتصام
1- صرف الارباح.
2- ربط الحافز بأجر 2008
3- رفع بدل الوجبة من 32 حتى 90 جنيه
4- إقرار العلاوة الدورية ب 10%
5- تثبيت العمالة المؤقتة
6- تسديد حصة التأمينات للعمال عن فترة الاضراب من مايو 2009 حتى نوفمبر 2009
والمركز المصرى للحقوق الاقتصادية والاجتماعية إذ يعلن تضامنه مع عمال طنطا للكتان يطالب كل القوى السياسية والنقابية والحقوقية بإعلان تضامنها مع العمال، وتقديم كافة أشكال العون والمساندة لهم، ويدين اعتداءات الشرطة ومحاولاتها فض الاعتصام .


المركز المصرى للحقوق الاقتصادية والاجتماعية
10 فبراير 2010
الساعة الخامسة عصرا
----
بالنسبة بقى لموضوع المنوفية بتاع النجار المسيحي لسه لا خالد ولا مركز هشام مبارك نزلوا بيان اول ما ينزلوا ح اجيبهولكوا ان شاء الله الاخبار المؤكدة حتى الان ان الشرطة من فترة قفلت مصلى المسيحيين وحطت عليه حراسة وان امين شرطة قتل نجار مسيحي ولحد ما تيجي اخبار تانية غير اللي في البوست ده هي دي المعلومات الواردة من الشهود، وزي ما قلت في التعليق اذا افترضنا ان الشهود بيتخيلوا بنسبة اربعين في المية فالحكومة كدابة بنسبة خمسة وتسعين في المية، وفيه جهات مستقلة متولية الموضوع وهم دول اللي ح يقولوا الحق، وانا عارفة ان نسبة لا بأس بها من المسلمين اللي عاملين متدينين مش ح يقولوا كلمة حق في الموضوع ده حتى لو طلع جزء كبير من شهادة الشهود صحيحة، عملا بقول الله: وإذا قلتم فاعدلوا ولو كان ذا قربى. والانسان عشان يبقى متدين لازم يفسر بالعكس طبعا زي ما كلنا عارفين
حاجة بقت تخنق






التفاصيل هنا وهنا
الله اكبر.... دول بيقولوا يسقط يسقط الاستثمار


الحمد لله الحمد لله الحمد لله... ايييييوة كده انطقوها بقى

 

7 comments:

نعيب زماننا said...

الحمد لله أننا ماشيين في الطريق الصحيح
واحدة واحدة الشعب حيتعلم يطالب بحقه, لأن لما يتاخد منهم كل حاجة مش حيتبقى أي شيء عشان يخافوا من المخاطرة بخسارته.

lastcrazyboys said...

ماهو الأمل -بعــد ربنا- في الناس دي هية

عشان أنا عندي يقين حاليا إن أهالي العاصمة الكــرام" بتوع زمان" ..بقوا دلوقتي أهالي العاصمــة "النيــام " ..والنايتشي والقطايف
وطبعا احنا مش فاضيييين اساسا ..عشان انا لقيت الجزيرة جايبة الحشود مجتمعين في شوارع القاهرة المتفرقــة
سألت : هو احنا كسبنــا اييييه تاني ..؟

قالولي : لا ياعم ده الغاز

قلتلهم : يا نهاااار ابيض..ماله ..!!هو راخر عملوله بطوله كمان..!؟

طبعا بصة القرف اياها: لا ياعم
الحـ....... ..فيه ازمة في البلد

..فأنا انبهرت..بصراحة
لانهم عرفوا يعملوا منها أزمة ..مع اني من زماااان قوي مؤمن ان البلــد
!!."دي... بلـــد "ألغــــاز

حكاية مكررة said...

العالم تضطرون للجوء للاعتصامات للحصول على حقوقهم. بما أنهم أشتكوا أكثر من مرة لم يستطيعوا الحصول عليها



(:

مواطن مصري said...

مش دة المصنع الي اشترو سعودين

Anonymous said...

أتمنى أن نقيم كل عام فى مصر كرنفال يحمل فيه كل راقص وراقصة أنبوبة بوتاجاز ويسيرون بها فى الشوارع يعزفون عليها بمفتاح الانابيب الشهير ويرددون اغنية .. ودي رقصة الانبوبة يابا يابا على الانبوبة

شمس العصارى said...

اعتصام
لا جديد
تدخل امنى سافر
لا جديد
ضرب و اعتقالات
لا جديد
انما الجديد الهتافات
تصدقى بالله انا اتضايقت جدا جدا لما شوفت كم الهتافات - المدبرة - باسم الريس وولاده بعد بطولة الامم
كل كاتب و كل اعلامى كانوا بيتسابقوا فى تاليف الهتافات و نشرها
ادى الناس اخدت الهتافات دى و صصححت فهما ههههههه
دلوقتى انا مش زعلان من الهتافات
يارب كل يوم يطلوا 100 هتاف للريس
و كل يوم الناس حتصحح ال 100 هتاف دول
تعرفى ان السنة المالية الى فاتت وزارة الداخلية كانت زعلانة جدا انهم قلصوا ميزانيتهم و كانت حجتهم ايه
انهم هما الى بيلموا من ورا كل الوزارات التانية فى الاعتصامات و الاحتجاجات
و صرحوا انهم فى بعض الاوقات بيصرفوا 40 الف وجبة لعساكر الامن الى بيفضوا الاعتصامات و اكيد كامن بيدولهم فلوس ماهم بيتعبوا من ضرب الناس
تعرفى لو الفلوس الموجهة لفض الاعتصامات لو ادوها للناس ... الناس تسكت و تفرح كمان
لكن نقول ايه
دول يومين بتوع الشرطة و الداخلية
نلتقى بعد الوزير الحبيب

شمس العصارى said...

انا كنت علقت على البوست قبل ما اشوف الفيديو
لكن بعد ما شوفته
حزنت جدا جدا
شكل الناس بسطاء جدا
و اعتقد ان اغلبهم يمكن اول مرة يحضر اعتصام
حتى هتافاتهم بسيطة
الكلام ده كان المفروض يتقال من بداية التسعينات ايام ما بداو الخصخصة و فرحوا الناس بكلمة استثمار و فلوس كتير
لكن السلف ضيع الخلف
يياااااااااااااااه الى راح راح
تعمل ايه الناس دى بس ياربى
شوف الامن القذر بيعامل الناس ازاى
ده بيشدوا البنت من شعرها
انا قلت امبارح الحل " ان الشعب يرفع السلاح فى وجه الشرطة و الحكومة و النظام "
ما هى موتة بموته