Friday, 26 February 2010

ايوة اسمهم لا دينيين ويحترموا نفسيتهم بقى

انا ما اتعودتش اخش في معارك امي وابويا لاسباب عديدة منها انهم امي وابويا، ومنها برضه ان معظم اهتمامتي غير اهتماماتهم
بس مؤاخرا حصلت معركة اللا دينية دي، وعادي يعني امي قدها وقدود. انا بس ما غاظنيش غير كلمة واحدة: الشق عن الصدور
اولا: احب اوضح ان الناس اللي امي ردت عليهم انا شايفة انهم ما يستاهلوش الرد اساسا لانهم بصراحة شوية واغش ورايش وماحدش بيعيرهم اهتمام ولا بيصدقهم، بالذمة حد يرد على نبيل عمر ونبيل شرف الدين؟ وللا حتى مين بيتأثر بكلام احمد عبد المعطي حجازي مع حفظ قدره كشاعر كبير؟ وللا جابر عصفور؟ طب اللي بيقرا جابر عصفور غير امي يرفع ايده، وللا نوال السعداوي وليلى تكلا وسعد هجص؟ 
ومع ذلك، من ناحية تانية امي شايفة اني هايفة عشان بارد على علاء مبارك بكل "عوراته الذهنية" كما وصفته
خلاص، كل واحد بيرد على حد او على حاجة او على فكرة معينة مضايقاه
هو حرررررررررررررر
ثانيا: طب انا لما اكلم حد مخه على قده، مش اكلمه على قد مخه؟ ناس بتكتب عواميد بس ما بتفكش الخط ونبيل عمر ده بالذات وحياة النبي تعالوا على نفسكوا واقروا له شوية، ده كل ده بعد ما المصححين صححوا له يا عيني
هي وصفتهم بلا دينيين عشان ده توصيف اكاديمي مظبوط، وعشان التوصيف ده مش شتيمة. لا ديني لا تعني ان الانسان ملحد او كافر، ممكن واحد لا ديني وبيصلي وبيصوم وبيحج
تعريف اللا ديني هو كل من يرى فصل المظاهر الدينية عن كل او بعض مناحي الحياة العامة، بصرف النظر عن دوافعه، قد تكون دوافعه الحادية بالفعل، وقد تكون دوافعه صوفية مثلا، مش عايز يصلي قدام الناس عشان ما يتفهمش انه منافق، مش عايز يبين مظهر دينه عشان هو عايز دينه خبيئة بينه وبين ربنا، وقد يكون مؤمن بالديانة الانسانية، وقد يكون علماني، وقد يكون لا ادري، وقد يكون مؤمن
لا ديني حاجة، ولا ايماني حاجة تانية
irreligious
غير
non-believer
بس امي غلطانة، عشان الرسول بيقول خاطبوا الناس على قدر عقولهم، ناس باين من كتابتها انهم سواقين ميكروباص (استثني جابر عصفور واحمد عبد المعطي حجازي وليلى تكلا، بصرف النظر عن الخلاف الفكري، انما على الاقل متعلمين وبيفكوا الخط، والغريبة بقى ان دول التلاتة اللي ما ردوش عشان عارفين انها بتتكلم صح وعندهم فكرة عن المصطلح وتعريفه) انما الباقيين سواقين ميكروباص ولا حتى حصلوا سواقين التاكسي، تقوم تقول لهم كلام يصعب على امثالهم فهمه؟  اذا كانت الويكيبيديا العربي مش عارفة الفرق ما بين اللا ديني واللا ايماني، دول ح يعرفوا؟ 
ثالثا: لا بقى، هي غلطانة، هم مش لا دينيين، هم الحاديين
ومافيش شق عن الصدور في الحكاية دي، انا باقرا اللي مكتوب وماليش دعوة بالكاتب وممارسته الشخصية واللي في قلبه
اللي يكتب يقول: مافيش حاجة اسمها مشيئة القدر وانما هي مشيئة الانسان
- مافيش حاجة اسمها غيبيات الغيبيات تفكير متخلف
- مافيش حاجة اسمها جنة ونار
- ما تقولوش السلام عليكم عشان دي تحية اسلامية(مع ان يعني المسيحيين بيقولوا سلام لكم واليهود بيقولوا شالوم، يعني مش بالضرورة تحية اسلامية، بس التحية بالسلام فعلا تحية دينية دي حقيقة)
 - الصلاة مالهاش لازمة
ده بقى ما اسموش تفكير لا ديني
ده تفكير الحادي، والالحاد مش شتيمة، ده فكر، واذا كانوا مش ملحدين يبقى عندهم مشكلة ازدواجية
قد يكون اللي كتب المقال ده خلصه ونزل صلى الضهر في الجامع جماعة، قد يكون صايم صيام داوود يوم ويوم، قد يكون لسه راجع من العمرة
ما يخصنيش انا الكلام ده انا مش ح افتش في القلوب واروح له البيت اشوفه بيصلي وللا لا
انا ليا باللي بيقوله
طيب ده اللي هم قالوه، انا شخصيا قريته وما حبتش ارد عليه
غيري، اللي هي امي، قرته وحبت ترد عليه، وحبت ياعيني تبقى مؤدبة وما تقولش ان ده تفكير الحادي، قالت لا ديني عشان يبقى التعبير مهذب وما يبقاش فيه تكفير
قاموا: 
1- اغبيا ما فهموش وما كلفوش نفسهم يقروا كتاب واحد وللا حتى يدوروا في الانسيكلوبيديا وللا على النت حتى لتعريف لا ديني
2- ما ردوش على ولا فكرة من الافكار اللي هي قالتها، هي كانت بترد على افكارهم، وانا شايفة انها شهرتهم، ولا حد حاسس بيهم اساسا، راحوا مشخصنين ونازلين شتيمة فيها هي، طب يعني انتوا كاتبين كلام مش عارفين تدافعوا عنه؟
3- ايه كمية الرعب والخوف والرعددة اللي هم فيها دي؟ 
كله بقى الا الجبن، انا ما احبش الانسان المنافق الجبان، وان قلت ما تخافش وان خفت ما تعملش
انا دلوقت لابسة بدلة رقص وبارقص، لما حد يقول لي يا رقاصة اقول له انت بتخوض في عرضي؟ 
انا محجبة وباصلي، لما حد يقول لي يا مسلمة اقول له انت بتبلغ عني الاف بي اي؟ هلا شققت عن صدري؟ 
انت كاتب، وكتبت تقول مافيش غيب ولا فيه قدر ولا فيه مشيئة قدر ولا الصلاة لها لازمة والقرآن بيحرض على العنف وشيلوا منه شوية ايات مش مناسبة ومافيش حاجة اسمها جنة ونار وما تقولوش سلامو عليكو
جات الست بالادب قالت لك انت لا ديني، وانت الحقيقة ملحد مش لا ديني، وبترد على افكارك، الله، مش انت حضرتك كاتب الافكار دي في مقال برضه وللا قلتها لها في قعدة خاصة؟ مدام اتكتب في مقال يبقى قابل للنقاش، اذا كنت حضرتك بتناقش ايات القرآن وشايف ان فيها ايات مش مناسبة، اشمعنى ايات حضرتك مش قابلة للنقاش؟ 
تقوم تترعب وتتخض وتقول: بتكفرني... الحقووووونييي، ح اتقتل، ح ييجي عيل بالدبلون يطخني
جرا ايه يا امور انت وهو؟ مش تسترجل كده وتخليك قد الكلام اللي بتقوله؟

عيب يعني لما كريم عامر اللي كان عيل عنده 21 سنة يبقى واد راجل كده وقد الكلام اللي بيقوله ويتحمل نتيجة كلامه واراءه وانتوا شحطة كده قد ابوه وجدوده كمان وتخافوا زي العيال الصغيرة 
انت ملحد.. ده حقك، ماحدش يقدر يفرض عليك ايمان انت مش عايزه، دافع عن اعتقادك واعلنه وخليك محترم كده عشان الناس تحترمك، ماحدش ح يجيلك لحد عندك ويطبطب على قرعتك ويقول لك انت ملحد وخايف تقول يا حبيبي؟ طب انا ح اغطيك باللحاف واقوم ادافع عنك
حقك في الاعتقاد انت تدافع عنه، وحق غيرك انه يتناقش معاك فيه طالما كتبته في مقال والناس قرته، ولما حد يرد على كلامك تناقشه وتدافع عن اعتقادك حتى النفس الاخير زي الناس المحترمة بصرف النظر اتفق او اختلف معاك في الاعتقاد، مش تحولها لمعركة شخصية وتقلع ملط وتترعب، واحدة ست ومش خايفة تتناقش وانتوا رجالة بشنبات خايفين من حتى المناقشة؟
ثم ايه الاستموات ده؟ مين اللي ده اللي حيقتلكوا؟ ما اللي عايز يموتك ح يموتك عشان الكلام اللي انت كاتبه مش عشان توصيف اقل ما يقال عليه انه توصيف مجامل
وبعدين ايه حكاية: سايبة القضايا المهمة وبترد علينا دي؟ 
ههههههههههههه
صح، فدي انا معاكوا، ومغلطاها والله، انتوا فعلا مش مهمين واللي بتكتبوه يادوبك كده يتلف فيه كام قرص طعمية وللا يتحط للقطة عشان تعمل عليه بيبي
وبعد كده اللي مش قد الكلام ما يكتبوش، ماهي بتكتب اللي هي عايزاه وبيتهموها زورا انها اخوانية وشيعية وشيوعية في ذات الوقت ومش هاممها ولا بترد على الكلام ده، وفهمي هويدي بيكتب اللي هو عايزه وبيتقال عليه مافي الخمر ومش هامه
لو فيه مناقشة في الافكار بيردوا عليها
وغيرهم ناس كتير، لا شرشحوا ولا هللوا ولا حاجة، فاضلين يكتبوا اللي هم عايزينه
وح نروح بعيد ليه؟ ما احمد عبد المعطي حجازي نفسه بيكتب اللي هو عايزه مهما يتقال عليه من غير شرشحة ولا شخصنة ومن غير ما يخاف عنده رد بيرد ما عندوش بيكمل كلامه وخلاص
ثم بقى لازم النقط تتحط فوق الحروف لمصلحة الجميع
مصلحة اللي عايز حرية اعتقاد انه يحارب عشانها مش يخاف لما يتواجه بحقيقة اعتقاده
ومصلحتي انا كمؤمنة ان ما يبقاش في ناس زي عبد الله بن ابي بن سلول كده، يدعوا الايمان ويدسوا كلام 
لما واحد يقرا لك بوصفك لا ديني استقباله ح يبقى حاجة تانية غير لما يقرا لك بوصفك ديني
ولما انت تكتب بصفتك العقائدية الحقيقية انت نفسك ح تبقى مرتاح اكتر ومحترم نفسك كده وراضي عن نفسك بدل ما تهر على روحك لما حد يناقشك في افكارك يا جباااان، يااااااااا جباااااااااااااااااان
اقرف ما اقرف منه اني اشوف راجل جبان ورعديد ومنافق
وما تسألونيش اشمعنى راجل انت ذكورية؟ 
ما اعرفش دي ذكورية وللا ايه؟ بس ده احساس نفسي كده، الراجل المنافق الخواف بيصيبني بالغثيان، ممكن لو ست او خصوصا بنوتة تصعب عليا
لكن راجل لا

17 comments:

السلام عليكم said...

انا عايزه افهم حاجه ايات ايه اللى من القران اللى ملهاش لازمه ومش مناسبهماهو الاول اتكلماو على احاديث النبى وقالوا ما قالوا فيها ثم اتدوروا على القران

وبعدين الناس دى خايفه تموت ليه اذا ماكنش فى اخره ولا جنه ولا نار

وبعدين مين وفى انهى جريده يتسمح بنشر الكلام ده ده لما ابراهيم عيسى قال الريس عيان حبسوه سنه امال السهل قوى الهجوم على كلام ربنا

انا ما قراتش الكلام الا عندك واذا كان كما قلتى فانا لست دبلوماسيه زى الكاتبه المحترمه والدتك اذا كان الاكلام ده لا يكفر قائله ايه اللى ممكن يكفره بقى

جبهة التهييس الشعبية said...

هههههههههههههه
يعني انا غلطت اني كتبت عن الموضوع

طب والله قلت لامي كده
قلت لها شهرتيهم وماحدش دريان بيهم

شمس العصارى said...

لالالالالالالالالالالا
و ما الضير فى الدخول فى معارك الحق
يعنى يبقى الحق واضح و جلى و نسيبه لوحده و منقفشس معاه
ولا دينيين دى وصف اعلى من المؤدب بشويتين تلاته
الوصف الصحيح الزنادقة و الملحدين و المنافقين و ده واضد من افعالهم و كلامهم و مش حنشق عن الى فى الصدور
نبيل عمر عاوز ينقلنا الوضع اللبنانى
و نبيل شرف الدين – خسارة فيهم الاسم اساسا – الى بيزعل لما حد يقول دعاء ال ركوب الدابة و كان مرة بيتكلم عن حاجة اسمها الكزومبلاطى و تعريفها قاله فى سطرين تلاته و هو لا يعرف الكلام ده و لا مقتنع بيه اهى سبوبة و خلاص
و حجازى لسه عايش هوجة الشيوعيين فى الستينات و مش عاوز يقتنع ان الاشراكية و الشيوعية انتهت من الوجود الا به
نوال السعدواى بتركه الرجالة و عاوزة تسمى الواد باسم الام طيب الواد ده يجى ازاى دى معزورة حكم السن برضه كبرة و خرفت
ليلى تكلا – انا ستثناها من هجومى – لانها فى الموضوع الصحيح هى بتكتب بعقيدتها و اهدافها المخبئة
وسعد واحد فنان عاش حياة الاخوة الفننيين منتظرين منه ايه
ام جابر زفت فواضح انه ماشى مع شلة النظام و عاوز يقنع الناس باحترامه على اساسا انه كان من الطليعة فى السيتنات طليعة اليساريين و الشيوعيين
ـــــــــــــــــــــــــــــــ
لا استاذة صافيناز مش غلطانة يعنى حد يشوف الحق و يسكت عنه ناس طالعة تلبس على الناس دينها نسيبهم يعنى
لا الالحاد مش فكر حتى فى كل الاديان بيقولوا ملحد يبقى مينفعش نقول عيله فكر حتى لو اتباعه كتير
لالالالالالالالالا دول لا بيصلوا ولا بيصوموا ولا هو بيقرا ايه فى صلاته – القرأن الى هو معترض عليه – هئ هئ هئ هئ
ولا يكنش بيقرا حاجات تانية
يبقى ازاى مش راكبة اساسا واحد بيقول مفيش جنة و نار يبقى يصوم لييييييييييييه واحد مش عاجبه دعاء ركوب الدابة يبقى يعرف محمد صلى الله عليه و سلم منييييييييييييييين
يبقى كان الرد عليهم مهم وواجب كل كاتب اسلامى ولا علشان هما معاهم منابر و الاسلاميين لأ
و بعدين معاكى ان الرسول قال خاطبوا الناس على قدر عقولها بس هما دول مش ملهمش عقول لا ليهم و عقول واعية و بتفكر و ليها اهداف لما يلبث الدين على الناس و يحاول هدم الدين دى اهداف كبيرة و فى ناس وراها اكيد
ولا هما صحيوا لقوا عندهم اللادينية دى فجأة
ــــــــــــــــــــــــ
و عندهم حق يخافوا من صافيناز كاظم
هما كلهم مجتمعين ميمثلوش ربع تجاربها و افكارها و خبرتها و عقلها
اما من حيث محتوى الافكار فمينفعش نقارن اساسا
ينفع نقارن الدين بالالحاد
ـــــــــــــــــــــ
تحياتنا للاستاذة صافيناز
وكل الانتقاد ليكى – قال مش متعودة اخش فى معارك امى و ابى –
حد يبقى معاه كاتب اسلامى و ميغشش منه افكار هههههههههههه ده حتى لا يجوز
انا لو ابويا شاعر و امى كاتبة كنت طلعت اشطر منك و كنت غشيت منهم
نلتقى بعد المنافقين الملحدين

Haytham Alsayes said...

السلام عليكم اولا
انا اول مرة ادخل مدونتك وعجبتني اكيد والا مبقاش عندى دم
اما بقي عن البوست الجديد ممكن كنت تسميه حزب المنافقين الجدد
ايوة دول شوية مقاطيع منافقين بيفكرونى الى اتخذه مسجد ضرار في المدينة ونزلوا هاتك ياتقطيع بكلام مسموم علي الرسول والمسلمين
بصراحة لازم نرد عليهم ونفضحهم ومنسكتش كفاينا تخريب فكري وعقلي وذهني كفاية غسيل المخ اللي بيحصلنا ليل نهار

تحياتي ليكي
وابفي شرفيني بالزيارة لمدونتى المتواضعة جدا
لو عندك وقت

زقزوق said...

نبيل شرف الدين مش لاديني ولا ملحد
دا واحد مؤمن ايمان عميق وبيحارب كل اعداء عقيدته باستماتة
الشاطر بقي يقولى عقيدته ايه

Anonymous said...

نذكرت اﻵن بيت شعر ﻻ أذكر أسم الشاعر

ضربني و بكى سبقني و اشتكى

صحيح السيدة الوالدة من حقها الغضب و التعليق هلى ما ﻻ يعجبها لكن اﻷفبياء و الصنف المذكور أساميهم ما ستفعش معاهم اﻷدب و ﻻ هم حيقهموا المكتوب ﻷن أفقهن ﻻ يسمح بذلك و ليس هناك محال للجدل ﻷن الثقافة شئ و شهادة جامعة أو معهد ده شئ آخر و أنت أقضل العارفين ولكن هل لي أن أسأل لماذا كل هذا الحقد على اﻹشنراكيين؟ يخطر ببالي بيت شعر كتبه أمير الشعراء أحمد شوقي قي مدح الرسول صلعم و غنته أم كلثوم
اﻹشتراكيون أنت إمامهم لوﻻ ******
فهل كان أحمد شوقي جاهل أو متملق و هو المولود و في فمه معلقة ذهبية؟
من المخجل أن يتهجم اﻹنسان على أشباء ﻻ علم له بها أو أنه لم يفهمها فاﻷقضل في مثل هذه الحاﻻت اﻹعراض عن ذلك و السكوت عادة أثمن من الذهب

و فقكم الله

Anonymous said...

الوصف الصحيح لهم زنادقة لأن الزنديق هو الذى يقول أنه مسلم و يطعن فى ثوابت الإسلام،و هذا أخطر من اللادينى، لأن فكره يظهر للناس كأنه جزء من الفكر الإسلامى و يكون له نسبة قبول عند غير العارفين بحقيقة الأمور، أما اللادينى فمهما تكلم فى الدين فالناس تعرف غرضه من هذا الكلام و لن يعيره أحدا أى اهتمام.

Anonymous said...

عزيزتى نواره
انا حزين لموقفك هذا كنت اعتقد انك ستكونى موضوعيه اكثر بعد ان قرأتى مقالة والدتك او على الاقل لن تكتبى عنها ولكن حزنت وآسف لكى

مواطن مصري said...

انا اكثر واحد صعبان عليا كريم عامر لا حد سأل فية ولا بيتكلم عنة

ربنا يفك سجنك يا كريم يا عامر

انا بكرهة المتطرفين الاسلامين و المسيحين و العلمانين و مدعي الليبرالية

Anonymous said...

إن كنتى تقصدي حديث صافى فى برنامج مانشيت على قناة اون تى فى

فصافى كانت فوق الرااااااااااااائعة
حطت النقط على الحروف
و قالت للأعور إنت أعور
واضحة و صريحة بدون مواربة و لا تحسيس


يغووووووووور نبيل عمر و رفعت التعيس و نبيل محارب الدين و تكلا و واكلة
و أحمس و لا رمسيس حجازى

يغور كل واحد أعور و مشوه عايزينا نقوله يا بدر البدور

هما إيه مبيستحوووووش

حاجة تزهق





هالة

عم مينا said...

نوارة

أنا مقريتش أي من الردود بتاعة الناس اللي ذكرتيهم علي الأستاذة صافيناز كاظم
اللي بكنلها كل احترام
بس مقدرش أنكر ان المقالة استفزتني أما قرأتها
مشكلتي مع المقالة مش تعريف اللادينية
مشكلتي ان المقال بيجمع ناس مختلفة بأفكار مختلفة بمطالب مختلفة و تم اختزالهم كلهم علي انهم كتلة واحدة معادية للإسلام
يعني أنا مثلاً من المؤمنين بضرورة الغاء المادة التانية من الدستور هل ده معناه اني "لاديني لابس قناع الليبرالية أحتمي اما بحكومات العسكر أو السفارات الأجنبية".. هل ده معناه انه من "الذين تحمسوا للحملة العالمية لحرمان المسلمات بالقهر و الترويع من حق ارتداء ما تمليه عليهم شريعتهم"؟
الخلط ده هو بصراحة اللي استفزني في المقالة

maman de said...

هى الليبرالية و العلمنة على المسلمين بس
بصراحة المقالة
واضحة للبصير كل الكارهين للاسلام سواء علمانيين لا دينيين و حاليا للاسف المسيحيين فى نفس السلة (وحدهم الهدف)
للاسف المسيحيين فاكرين معركتهم مع الاسلام و الحقيقة كلنا فى معركة مع الفساد و الظلم

حسن مدني said...

العزيزة نوارة

أنا لم أقرأ لهؤلاء الناس من فترة طويلة، ولكن أتفق معك في ضرورة أن نسمي الأشياء بأسمائها.
اللاديني، نسميه لا ديني. الكفر نسميه كفر.
لكن التزوير يبقى تجاوزات، والرقاصة تبقى فنانة، والدعارة العلني تبقى تشجيع للسياحة. وهكذا،،
هذا المنهج من استخدام أسماء الدلع، تؤدي إلى ضياع المعاني، وإهدار القيم التي تمثلها.
ويبدو أن هناك حرص على هذا المنهج.

تحياتي

Tamer said...

يا ريت لو لينك لمقالة استاذة صافيناز يا استاذة نوارة


انا متفق معاكي في الأغلب و مختلف معاكي في بعض النقط القليلة

و متفق تماما مع شمس العصاري

نعيب زماننا said...

حلوة حتة سعد هجص فعلا, و هو فعلا اسم على مسمى لم ينطق إلا هجص.
أنا ضد الرد على أي شخص,لأنه بالفعل دعاية لهم, أنا أول مرة أعرف أن الفيسبوك في جروب خاص بالملحدين المصريين كانت من صديق على الفيسبوك يحذر من وجودهم. دخلت على الجروب لقيت تقريبا اللي بيتكلموا فيه 2 أو 3 من أهل الالحاد , و عندك أمم أعضاء في الجروب عشان يردوا عليهم وبعد ما تهدى فورتهم شوية و يبطلوا رد مبيلغوش نفسهم من عضوية الجروب. فتلاقي الجروب أكتر من ألف على الأقل 700 ضد فكر الجروب بس اللي يشوفوا من برة يفتكر أن أهل الالحاد في مصر بالآلاف.
كما قلت أنا ضد الرد و لكن إذا تواجد منهم شخص قد يكون له تأثير و يثار حوله الجدل -و للأسف الجدال يجذب الكثير بفضولية كي يستمعوا إلى شبهاته رغم أنهم ليس لهم لا من العقل أو العلم للرد عليها- فهنا لابد من الرد و تفنيد الادعاءات الباطلة لأن فكره قد بدأ يتوغل في النفوس.
عبد المعطي حجازي لما بنسمعه نقول لبعض من يحاول يعلق على كلامه, يا عم سيبك ده عبمعطي حجازي و أمثاله كتير وهم كما قالت الأستاذة صافي ناز بيتفوا في بق بعض

بالنسبة لتعليق مجهول اللي جاب فيه سيرة أبيات أحمد شوقي
ياريت تقول البيتين كامليين عشان عيب نعمل مع أحمد بك شوقي شغل و لا تقربوا الصلاة

مهندس مصري said...

هاتي لنك مقال الأستاذة صافيناز علشان أقرأه و أفهم ايه اصل الموضوع بالضبط
و لو ان نص اللي انتي كتبتي أساميهم دول زبالة و النص التاني مش ولابد

حكاية مكررة..)* said...

بصي حقيقه انا ضد مصادره افكار الاخرين اين كانت ملته.او فكره
.
الاسلام كلنا نومن بانه الدين الحق
طيب ليش المسلمين يخافوا من افكار الاخرين
من اشويه ناس ماتفهم زنادقه.
عليهم ان يقولوا افكارهم ويتم الرد عليها.
والسنه هم الطائفه والله وعلم الوحيده التي ستدخل الجنه.
طيب ليش بيخافوا من افكار الشيعه
طال ان الشيعه شويه ناس متخلفه روافض.