عمر سليمان بيقع

جات من الاسترالي ولا جاتش منك وانت الحبيب من صغر سنك

باتكلم عن الفلسطينيين والسيناوية

احنا عايزين نغرقه قضايا من النوع ده داخليا وخارجيا

رجاء الاتصال بمالك عدلي

0101044264

او مراسلتنا على الميل التالي

fegypt20@yahoo.com

وبما ان ماحدش ابتدا الحملة حابتديها انا

وانا كنت قلت ان لو الناس ما ابتدتش الحملة تبقى خايفة من عمر سليمان، فأحب اقول للي خايف من عمر سليمان

انا واحدة ست.. انا عندي برد... ومش خايفة من عمر سليمان، عشان الرجولة ادب مش هز كتاف

بالنوسبة لحملة عمر سليمان

انا بقى مش حابتدي الحملة دي.. عشان لو انا ابتديت الحملة دي كل الناس اللي بتنفسن عليا مش حترضى تخشها، وانا واحدة بتاعة مصلحة واكتشفت اني برجماتية

انا دلوقت حاشتغل مبلغاتية ويبقى حد غيري يبتدي الحملة.. وحد غيري يكلم اللي حيبتدي الحملة، واول ما تبتدي انا حاخش فيها، وحافضل طول ما انا فيها اقول ان فلان هو اللي ابتداها

بس التبليغة دلوقت هي الآتي:

اي حد من سيناء، او فلسطين، او اي دولة عربية عنده قضية تعذيب، او احتجاز بدون وجه حق، او مداهمة بيت، او اي انتهاك من انتهاكات حقوق انسان في رقبة عمر سليمان، اي حد عنده معلومات يمكن الاستناد اليها كأدلة او قرائن يتصل على

المحامي مالك عدلي

0101044264

او المحامي خالد علي (اتكلمت معاه من فترة وهو مستني اي حد يكلمه)

0121519598

لو حد متصل من خارج مصر يحط قبل الارقام دي الكود ده

002

او يبعت اي حاجة على الميل ده
fegypt20@yahoo.com
اهالي سيناء واهالي غزة اكتر ناس ممكن تيجي منهم قضايا

وانا حاسكت اهو لحد ما حد غيري يتكلم

استعنا ع الشقا بالله... حنئذي مين النهاردة؟

بسم الله الرحمن الرحيم الاجابة عمر سليمان

بصوا بقى

البهروزين الكبار اتحبسوا، وان شاء الله فتحي سرور حيحصلهم بكرة

واحنا في حملة تطهير مصر بقى قررنا ندخل على المستوى التاني، بعد ما ربنا كلل مجهوداتنا بالنجاح وعرفنا نئذيهم بتوفيق من ربنا 

أول حاجة، احنا عايزين عمر سليمان المختفي ده

الناس كلها مركزة على السبارس - بما فيهم مبارك وجمال اللي لولا عمر سليمان ما كانوش يعرفوا يعملوا حاجة - وناسيين اخطر رجل في العالم مستر اكس

طيب

احنا محتاجين مساعدة الاخوة الفلسطينيين، ولو تفتكروا كنت طلبت من الاخوة في فلسطين انهم يحضروا ملفات التعذيب، واللي ابنه او اخوه او اي حد قريبه مات في التعذيب ياريت برضه يساعدنا ويحضر كل ما يلزم 

ويتصل بالمحامي مالك عدلي

0101044264

وتراسلونا على الميل ده
fegypt20@yahoo.com
لإنهم حيوكلوه في تقديم بلاغات في حوادث التعذيب والقتل ضد عمر سليمان، ولو ينفع يوكلوه في انه بيجيلهم في الاحلام يخوفهم كنت قلت لهم يوكلوه والله... حسبي الله ونعم الوكيل فيه على اللي عمله فيهم

وبقى الجدار الفولاذي، وهدم الانفاق على دماغ الناس، والغاز المسمم اللي ضخه في الانفاق، وكل الحاجات الجميلة دي

امبارح كنت باتكلم مع واحدة فلسطينية على التويتر وقالت لي اصل احنا بنخاف من عمر سليمان

لالالالا ما تخافوش ما تخافوش.. خلاص.. كتفناهولكوا، ما بقاش يعض دلوقت، خايفين منه ليه؟ ثم احنا زمان كنا بنخاف منه قبل ما يتكلم، لما اتكلم كسر حاجز الخوف.. بس لكم ان تتخيلوا بقى الفلسطينيين اللي ما بيخافوش من اسرائيل بيخافوا من عمر سليمان، حتى بعد ما مبارك مشي، شوفوا بقى ده عمل ايه؟ ده خلا واحد ليبي ينتحر من كتر التعذيب 

وبعدين موضوع كنيسة القديسين ده مش حيبان كل جوانبه الا اذا اتحقق مع عمر سليمان، هو العادلي المتخلف ده يعرف يعمل حاجة لوحده؟ ده كان مجرد دراع داخلي لعمر سليمان هو النمساوي ملك الليل والعادلي ميمو ياااه، وحاجات كتير فيما يخص الفتنة الطائفية مش حتبان الا اذا اتحقق مع سليمان

لا ده راجل جامد جامد يعني... وكانوا عايزين يلبسوهولنا رئيس.. ده كان حيخلي الشعب كله ينتحر من التعذيب ويقعد هو لوحده في البلد يعذب في قطط وكلاب الشوارع لحد ما يعترفوا

احنا حنشتغل في موضوع الجدار والانفاق على ما الفلسطينيين يكلمونا يساعدونا في موضوع التعذيب والقتل والغاز المسمم وهد الانفاق على دماغهم 

بصوا بقى.. ده اللنك اللي فيه وثائق ويكيليكس اللي ترجمناها على موقع الدستور الاصلي، حتلاقوا الوثائق اللي فيها عمر سليمان واسمه في الترجمة اللي ترجمناها "مسئول امني كبير" أو "مسئول امني رفيع المستوى" المهم يعني اي مسئول اسمه مش مكتوب تعرفوا انه عمر سليمان على طول لإن ده الوحيد اللي ما نزلناش اسمه في الترجمة.... لاااااااااااا.. احنا ما بنخافش من حد.. احنا بس مش ميالين للمشاكل 

:))

عمو اللي كان مرعب... الوثائق دي ممكن نستأنس بيها في القضايا، تبقى قرينة مش دليل، لو معانا قضايا تعذيب 

المهم بقى، انا لسه قافلة مع خالد عبد الحميد وقال لي حملة تطهير مصر دي شكلها حيكبر وحنحاول نستدعي عدد اكبر من المحامين لإن الاجتماع اللي فات اللي حضره بس طبعا مالك عدلي، وسيد فتحي، وخالد عبد الحميد، وباهو، والفقيرة الى الله.. مش واحدة اسمها الفقيرة، دي انا، (معلش الناس مؤخرا بقى عندها مشكلة في الفهم فبقى الواحد لازم يوضح كل حاجة) وصحفية من الدستور. بس عمر سليمان محتاج تعاون دولي.. أو على الاقل عربي

اقصد احب اوضح - ليكون اللي صابنا هنا صاب العرب في مخهم - لو انت مش فلسطيني وعندك مشكلة تعذيب او اي انتهاكات مع عمر سليمان حضرتك برضه تقدر تكلمنا

كمان اهالي سيناء ودانهم وقعت ولوزهم نزلت في رجليهم من اللي عمر سليمان عمله فيهم وحنحاول نتصل بيهم

اي حد عنده قضية عند عمر سليمان يتصل بالنمرة اللي انا حاطاها

يالا... توكلنا على الله

حملة تطهير مصر.. لن تفلتوا

النهاردة كنت في اجتماع في مركز الهلالي لتدشين حملة تطهير مصر

ولن تفلتوا دي اقتراح سيد فتحي.. حبيت اقول بس 

المهم، حملة التوقيعات انضم اليها الائتلاف، ومركز الهلالي الحقوقي والمركز المصري الى جانب مركز هشام مبارك

التوقيعات لحد دلوقت (ورقي + الكتروني) وصلت الى 35 ألف

وعقدنا العزم على إننا حنعمل في ميدان التحرير يوم الجمعة الجاي ان شاء الله مكان مخصص لجمع التوقيعات، حتلاقونا هناك تحت يافطة مكتوب عليها: وقعوا عشان تحاكموهم.. حملة تطهير مصر

محاكمة الثلاثي المرح + ضباط امن الدولة المتورطين في التعذيب + المطالبة بالاشراف القضائي والحقوقي على جهاز الامن الوطني ده الاستفتاح وحنقدم البلاغ ده ان شاء الله يوم السبت 9 ابريل الساعة 12 ظهرا عند النائب العام ونرسل نسخة للمجلس العسكري ورئاسة الوزراء 

دي البداية 

بعد كده ان شاء الله حنتوكل على الله في الباقي

انا بس عندي نداء للإخوة الفلسطينيين والعرب اللي تعرضوا للتعذيب تحت ايد عمر سليمان وبأوامره - واحيانا كان بيعذب بنفسه - لو سمحتوا احنا محتاجين شهاداتكم لإن جرائم التعذيب لا تسقط بالتقادم 

بس المطلوب منكم دلوقت انكم تحضروا المستندات والادلة والشهادات على ما نخلص دول نبقى جاهزين نخش على عمر سليمان ان شاء الله، والمحامين المصريين متطوعين لتبني قضاياكم.. بس ابتدوا تحضير وتجميع الشهادات من دلوقت

التوقيعات اهي

<<<<<<<<<<<<<<<<<<

بعد شوية حتلاقوا الحملة على صفحة الائتلاف وعلى بقية الصفحات 

باهو حتبعت لي بقى اللنكات اضمنها هنا على المدونة