Monday 7 April 2008

ايه موضوع الحرية الصخصية دهين

الا الواد مينو ده بيجيب اخبار عجيبة يا جدع ويقب ويغطس ويطلع بحاجة ماحدش غيره جابها مع انه الندل مسافر وسايبني في الظروف دي وانا بطبعي في الظروف المشابهة بتجيلي شرقة نميمة وماحدش بيفش غلي في النميمة غير مينو ونقعد نودود ونمسخر كل مخاليق ربنا اللي فاقعين....مرارتنا
المهم مينو جاب التهم الموجهة الى المجموعة اللي اتقبض عليها ومنها: الاعتداء على الحرية الشخصية
ورحمة شرف الحكومة وللا نطفحه اذا كنا شفناه الناس دي زعماء التهييس بلا منازع انا آسفة ان حشرة زيي تتطاول على اسيادها وتتغر وتظن في نفسها انها مؤسسة لجبهة التهييس الشعبية بينما التهييس كعلم ومنهج بحث ونظرية فلفسية اسسته الحكومة المصرية ولها حق براءة الاختراع منفردة بلا منازع
بل ان الحكومة المصرية لها كل الحق في مقاضاتي لاني سرقت حقوق الملكية الفكرية للتهييس اللي نقدر نعتبره حكرا عليها كما انني قمت بتشويه هذا العلم الثمين من خلال تناولاتي الشعبوية للتهييس دون الاستناد على اسس علمية ومرجعيات نظرية
بقى يا كفرة يا فجرة طلعتوا بتعتدوا على الحرية الصخصية والحكومة بتحافظ عليها؟
ونقدر نستنتج من كده ان المضربين كانوا بيلزموا الشواذ جنسيا بعدم معاشرة رفيقهم في ذلك اليوم مما يعد اعتداء على الحرية الشخصية
كما انهم عطلوا عيادات الاجهاض وهو ايضا اعتداء على الحرية الصخصية
ومش بعيد كمان يكون الاضراب الهدف منه المصادرة على حق الانسان في عمل علاقات حرة وهو ما يندرج تحت اطار الحرية الشخصية وعليه فان من لا يحترم الحرية الشخصية لا يجب ان نحترم حريته الشخصية
بحيث ان واحد بيغير العجلة بتاعة عربية خطيبته زي محمد الشرقاوي يتقبض عليه لانه اعتدى على حرية العجلة الشخصية، وكمان اعتدى على حرية العربية، لان العربية ما ابدتش استياءها من العجلة النايمة، ثم انه صحى العجلة من نومها واساء اليها ورفدها من شغلها لمجرد انها نامت زي اي ما بني ادم في الدنيا بينام وهو ما يعد اعتداء على الحرية الشخصية لكل من العجلة والعربية والكوريك ايضا الذي يعاني من انتهاك لحقوق الكوريكات في مصر بسبب التصرفات غير المسئولة للمعارضة المصرية
ثم ان مالك كان ماشي في الملك الصالح من غير ما يستأذن الملك الصالح اذا كان يسمح له انه يمشي فيه وللا لا؟ وهو ما يعد امتهان لآدمية شارع الملك الصالح
كمان ان محمد الاشقر اتقبض عليه من مكتبه وهو يعتدي على حرية مكتبه الشخصية حيث انه دخل على المكتب هو قاعد مع الكنبة قعدة صفا من غير ما يخبط على الباب واضطرت الكنبة انها ترفع ديل الكومبينيزون وتغطي بيه وشها وهي بتقول: يالهوي راجل؟
اما محمد عبد القدوس فقد دأب على الاعتداء على حرية الميكرفون اللي ماشي بيه على طول حيث انه اكل دماغ الميكروفون بكلام مش بالضرورة يكون الميكروفون عايز يسمعه، ومش على طول يعني، انا عمري ما عديت من قدام النقابة الا ولقيت الاستاذ محمد عبد القدوس قاعد بميكروفونه على السلم وساعات كتير بيبقى لوحده وقدامه عدد لا بأس به من رجال الامن الحريصين كل الحرص على حماية الحرية الشخصية لكل من السلمة التالتة في سلم النقابة وضرفة الباب اليمين من بوابة النقابة
كل ده وهم ساكتين له وهو ينتهك الحريات الشخصية عامدا مستعمدا
ولهذا ولكل هاتيك المجالي نطالب باحالة اوراق الشعب المصري الى فضيلة مفتي الديار المصرية

No comments: