اتفرجوا على اعتداءات العمال على الامن

تحديث:
ده فيديو من عند احمد الصباغ تصبيرة على ما بقية الفيديوهات تيجي اظن احمد عبد الفتاح معاه فيديوهات كتير
وزي ما ح تلاحظوا في اعتداءات عمال المحلة على الامن ح تلاقوا ان العمال متخفيين في لبس الامن بينما الامن لابس لبس العمال لانه حب يتضامن معاهم بس هم ما قدروش الجميلة اليكم الفيديو

الصور متاخدة من مدونتي مهندس مصري وكلام
اتصلت بمعتز دلوقت وبيقول لي ان فيه اتناشر اتحولوا على مستشفى الرمد عشان عينيهم طارت وفيه عشرة في المستشفى العام اما الميتين فشهود العيان بيقولوا ان عددهم كبير قوي وانهم في مستشفى المحلة وانهم اكتر من سبعة بكتير وواحد كان جاي عشان ابنه واخد رصاصة في رقبته قال انه وهو ماشي اربعة اتقتلوا قدامه
هم اتجننوا؟ اتجننوا؟
واضح ان دي خطة مبيتة بدليل انهم مديين تعليمات للاعلام انه ما يتكلمش عن الموضوع
يا اعلام حقير ووسخ ما تبقاش تبيع علينا حرية التعبير تاني، وياريت تبقوا تشتغلوا في صباح الخير يا مصر
ومناسب جدا لعمرو اديب انه يلبس باروكة صفرا وتي شيرت فتافيت السكر هاي كول وبنطلون جلد محزق ويقدم برنامج غرائب وطرائف بنبرة صوته المزعجة دي
--
الشرقاوي ح يتعرض على النيابة تاني بكرة
مالك لسة مش لاقينه
انا مش عارفة الشاروقة دي ح تخلص امتى وللا مش ح تخلص وللا ايه؟