ازاي تتضامن مع المحلة

معلش يا شباب التضامن مع المحلة دلوقت فرض عين، انا عارفة ان فيه ناس خايفة وناس مكسلة
الخوف شعور انساني طبيعي وانا شخصيا باقدره وباعتبره عذر كافي خصوصا ان حتى لو مافيش حاجة تخوف ممكن الانسان يخاف لانه بيبقى شعور غير منطقي ما يغلبوش غير التكال على الله او ان يبقى فيه جوة الانسان دافع كبير وقوي واقوى من احساسه بالخوف
طيب اللي مش ح يقدر ييجي المحلة بكرة بس ممكن يبعت للصحف وللمجلس القومي لحروق اللسان تضامنه مع اهالي المحلة ومطالبته بالافراج عن كافة المعتقلين؟
يا سيدي لو خايف روح سايبر كافيه بعيد عن المنطقة اللي ساكن فيها ولو عندك عربية ما تروحش بيها وادخل اعمل اي اكاونت لميل جديد تبعت منه رسالة تضامن ومطالبة بالافراج عن المعتقلين وامشي وما تجيش السايبر ده تاني ولا تعدي من الشارع اللي هو فيه
اظن مافيش امان اكتر من كده
اقول لك كمان، لو ح تموت من الخوف، البس جوانتي عشان ما حدش يرفع بصماتك، والله العظيم ما باتريق، ما جراش حاجة لما تخاف مش عيب، العيب انك ما تتحايلش على الخوف وتعمل اللي تقدر عليه، واللي هو واجب عليك واقل من الواجب كمان
اما الكسل فهو مش عذر، ده عذر اقبح من ذنب، مافيش في الدنيا اكسل مني ده انا بطة بلدي، بس ده مش عذر، لو المزة مستنياك في الفيوم في عز المطر ح تنط من السرير وتنزل تروح لها يعني
دي عناوين بعض الصحف والمجلس القومي لحروق اللسان اللي عرفت اجيبهم تقدر انت كمان تجيب عناوين تانية
لما عشر رسايل، ميت رسالة، عشرتلاف رسالة يوصلوهم يقدروا يتجاهلوها لكن لما يوصلهم مليون رسالة ما يقدروش يتجاهلوها
واللي عنده اقتراحات يتفضل يقولها، احنا عايزين نعمل حساب كل الناس: نعمل حساب الهتيفة، ونعمل حساب الشغيلة، ونعمل حساب كمان الخويفة والكسالى، كلهم مواطنين وكلهم لازم يتضامنوا مع المحلة، لازم
العناوين اهيه

nchr@nchr.org.eg, ahramdaily@ahram.org.eg, akhbarelyom@akhbarelyom.org, elbadeel@elbadeel.net, el3ahsera@dream.tv, editorial@almasry-alyoum.com, dostor-eg@yahoo.com, dostor_eg@yahoo.com

شوفوا انا باطلب بادب واخلاق ازاي؟ ارجوكوا يعني دي حاجة بسيطة بس يمكن تفرق لما العدد يبقى كبير

حط نفسك مكان المعتقلين واهاليهم، حط نفسك مكان ابو او اخو الولد اللي مات، حط نفسك مكان اللي فقد بصره من رصاصة مطاطية دخلت في عينه، ومن خلال خبرتي في الدنيا، اللي مش بيحط نفسه مكان الناس ويساعدهم، ربنا بيحطه بعد شوية فعلا في مكانهم ومش بيلاقي حد يساعده

كمان بالنوسبة للعاشرة مساء، هم كل ليلة بيفتحوا رسايل الاس ام اس على رقم 91235 عايزاكوا تهروهم رسايل: انا متضامن مع المحلة، نطالب بالافراج عن كل المعتقلين، انا متضامن مع المحلة، انا احب المحلة والمحلة تحبني

معلش انا عارفة انكوا ح تتنرفزوا عليا بس انا عارفة ان منى الشاذلي كويسة والله العظيم، هي يمكن تكون خافت، وكل الناس بتخاف، حتى ممكن حسن نصر الله نفسه يكون بيخاف يعني ده شعور انساني، الرسايل الكتير على الميلات والموبايل ممكن تشجع اللي خايف لانه بيحس بالونس وانه مش لوحده، وتخوف الطاغية وتحسسه انه فتح على نفسه نار جهنم، واظن برضه ان لما تجيلها ييجي مليون رسالة على الاس ام اس متضامنة مع المحلة ممكن تقرا منهم تلاتة ونبقى برضه عملنا بونط، بس انا عايزة كلام من اللي قلبكوا يحبه

شوفوا انا لسة مؤدبة

مش قادرة

جرى ايه يا روح خالتك انت وهو، الناس دي ماتت عشان بتطالب لنا بلقمة عيش واحنا قاعدين في بيوتنا، مش عارف تبعت حتة جواب؟ دي وكسة ايه دي ياربي احنا ح نتحايل عليكوا؟

بلاوي

طب الهي اللي ما يتضامنش مع المحلة تحرم عليه لقمة العيش اللي ماتوا عشان يجيبوها له، وتزول من وشه النعمة

بس هه