انا باكره الديمقراطية قوي

عشان نصباية وانا مش باحب اللي بينصب عليا...كل واحد يقول بقين ويوعد وعود والناس يا عيني بهبلها تنتخبه وبعدين يطلع تلاتين اللي جابوهم، طيب الديمقراطية جابت جورج بوش اللي خرب الاقتصاد الامريكاني وبيراقب تليفونات الامريكان، يعني واحد يبقى بيخون مراته مثلا، مراته ما تبقاش عارفة والسي اي ايه هي اللي تبقى عارفة؟ ده احساس فظيع، والديمقراطية جابت ساركوزي، والديمقراطية جابت توني بلير مرتين اللي في اخر فترته الناس قالت له إإإإإإإإإيييههههههههه غور بقى مش قادرييييييين. وكتير كتير، طيب الديمقراطية فشلت عندنا في الجزائر وفلسطين عشان فيه مؤامرة علينا، طيب مين اللي بيتآمر على اوروبا والدول المتغدمة؟ ماهم علمونا كده من واحنا صغيرين ان الخواجات بس هم اللي بيتآمروا ماحدش بيتآمر غيرهم، وبيتآمروا علينا احنا بالذات، يبقى ليه فشلوا بقى؟ مش معقول يتآمروا على نفسهم، ثم ان الديمقراطية حاجة والحرية حاجة تانية خالص، ايران مثلا فيها ديمقراطية زي ما الكتاب بيقول: الانتخابات حرة فعلا ونزيهة وكل المواطنين بيشاركوا فيها بصرف النظر عن دينهم ونوعهم وعليها اقبال كبير والرئيس بيجي بانتخاب حر والبرلمان، حتى المرشد العام بيجي بانتخاب الناس للجنة علمية دينية واللجنة دي بتنتخب لجنة تانية واللجنة التانية بنتخب بالتصويت المرشد الروحي، يعني حتى المؤسسة الدينية فيها انتخاب ديمقراطي، بس مافيش حرية، ممنوع الدش والنت تلات اربعه محجوب يادوبك يعني بيفتحوا يشوفوا الميل.
مش عارفة بقى...انا ح اقول انا عايزة ايه
انا عايزة بلد يبقى فيها قانون، قانون حلو يعني كويس، يبقى واضح ومحدد ويساوي بين كل الناس الامير والغفير الست والراجل المسلم والمسيحي و"ديانات أخرى" واللي ماعندوش دين كمان، ويبقى زي المسألة الهندسية كده، قانون ويطبق على المسألة مافيش حاجة متسابة لضمير القاضي ووجدان المحكمة ومزاج الحاجب وكده يعني، ويبقى قانون عادل وانساني، وفي نفس الوقت ما ينتهكش التنوع والخصوصية، يعني مش مثلا عشان الست زي الراجل يبقى الست تتفعص في المواصلات زي الراجل ولا عشان المسلم زي المسيحي قوم الاتنين مثلا يتجوزوا في الشهر العقاري وممنوع يصلوا بقى عشان ما يحصلش حزازات بينهم مثلا، أو واحد لا ديني يتجبر انه يتجوز في الجامع وللا الكنيسة، اللي في الجامع في الجامع واللي في الكنيسة في الكنيسة واللي مدني مدني وكلهم مواطنين زي بعض، ولا عشان الامير زي الغفير يبقى مثلا الغفير يطلب منه انه يدفع غرامة خمسة مليون جنيه!!!!! يعني يبقى عادل ورحيم في نفس الوقت، والرحمة تبقى بالاضعف عادة.
ويبقى فيه حرية رأي وتعبير وإبداع غير مقيدة وطول ما الكلام كلام يفضل يتعامل على انه كلام وبس.
ويبقى فيه مساواة بين الناس وتنوع كمان.
ويبقى كل الناس تشتغل الشغلانة اللي تناسب كل واحد فيهم من غير ما يبقى فيه مهنة حقيرة ومهنة محترمة، المحترم هو اللي يعمل شغله وبس، ويبقى الاجر على قد الجهد، وكل واحد يبقى عارف اللي عليه واللي له، واللي يعمل اللي عليه، ياخد كل اللي له، واللي ما يعملش اللي عليه ما يخدش اللي لغيره، وفي نفس الوقت يبقى فيه نظام يرحم المعوقين واللي قدراتهم قليلة والمسنين واللي ما يقدروش يعملوا فلوس من الشغل لانهم ما يقدروش يشتغلوا.
ويبقى فيه خطة تنمية شاملة ونزيهة وتستغل كل امكانياتنا لصالحنا، وتستغل الثروة البشرية كويس، وتستغل المعوقين بطريقة منتجة ومثمرة، وكل واحد على قد مجهوده.
ويبقى فيه نهضة في البحث العلمي، وفي النظام الاقتصادي، ويبقى عندنا اكتفاء اقتصادي وزراعي وصناعي، او شبه اكتفاء يعني، بحيث ان ما حدش يضغط علينا من برة عشان احنا محوجين له.
ويبقى فيه نظام صارم ضد الفساد، مش بس بالثواب والعقاب الوظيفي العادل، بس كمان بالقانون، ويبقى بيشدد العقوبة على ابناء المسئولين عشان صغار الفاسدين يخافوا ويقولوا اذا كان ابن الريس اتحبس امال انا ح يعملوا فيا ايه؟ انا اقصد الريس متقال
ويبقى فيه نظام عسكري قوي ما يعتديش على حد ويبقى عندنا قوة ردع تخوف اي حد انه يعتدي علينا.
ويبقى كل الناس عندها بيت نضيف وآدمي وبتاكل كل يوم وتشرب مية نضيفة على طول على طول وتعلم ولادها تعليم كويس وتتعالج بمستوى مرتفع، وكلهم عندهم شغل حلو يبقوا مبسوطين منه وبينتجوا.
ويبقى كل التعليم محترم، مش بس التعليم العالي، كمان التعليم الصناعي يبقى حاجة محترمة، ويستغل استغلال صح في تنمية البلد.
وايه تاني يا بتش يا نوسة وايه تاني يا بتش يا نوسة
آه وتبقى كل حاجة واضحة قدام الناس ويبقوا عارفين راسهم من رجليهم، يعني عارفين بيدفعوا ضرايب كام وبتروح فين ولمين وليه وازاي بتستخدم ويبقى فيه مشروع تنمية على كل الاصعدة في الزراعة والصناعة والعلوم والاعلام ويبقى تفاصيل المشروع كله باين للناس وعارفين تفاصيله وعارفين هم ح يشاركوا فيه ازاي. ويبقوا لما يعملوا حاجة عارفين بيعملوها ليه، ليه بيعملوا خدمة عامة وايه فايدتها؟ ليه بيروحوا يتجندوا وح يتعلموا ايه هناك؟
ولما الاشارة تبقى حمرا الناس تقف ولما تبقى خضرا الناس تمشي
وماحدش يبقى له سلطة على حد والمجتمع كله له سلطة المحاسبة على كل الناس.
ويبقى القضاء مستقل - بس يبقى معاه القانون اللي مافيهوش وجدان وناريمان ده والنبي - ويبقى من حق سواق الميكروباص اللي بيدفع ضرايب انه لما يروح مؤسسة حكومية والخدمة ما تعجبهوش يشتكي ويقول: انا بادفع ضرايب فين الخدمة اللي بالفلوس اللي بادفعها؟
ويبقى فيه مؤسسات مجتمع مدني مدعومة برضه من الضرايب...بدل التمويل والذل للي يسوا واللي ما يسواش
والله الضرايب تغطي ده كله احنا بندفع ضرايب تصرف على العالم كله ده مافيش حد بيدفع الضرايب دي كلها اللي احنا بندفعها
وايه تاني يا بتش يا نوسة وايه تاني يا بتش يا نوسة وايه تانيييي
آه
واموت شهيدة وادخل الجنة
اديني قلت بقى كل اللي نفسي فيه
شوفوا بقى ح تعملوها ازاي بس ما حدش يقول لي الديمقراطية دي تاني طلعت وحشة دي مش حلوة
ما اعرفش ايه البديل يعني ممكن يبقى حاجة تانية غير اللي موجودة دي
ممكن مثلا يبقى فيه لجنة رقابية على البرامج الانتخابية يعني في حال ما نجح الحزب الفلاني او الرئيس الفلاني يبقى فيه لجنة بتراقب تنفيذ الحزب او الرئيس للبرنامج، واذا اخل بالبورنامج يتشعلق من حواجبه عشان كداب
اه
نفسي يبقى فيه تشريع للكدابين
اللي يكدب يعملوا فيه حاجات كتير وحشة يتحبس ويتجرس ويقعد كده منبوذ في المجتمع ويتبهدل كده
عشان كداب، اللي يشهد شهادة زور يتشقلط واللي يحلف يمين قدام المحكمة ويقول مش مذنب ويطلع بالدليل انه مذنب يطلع تلاتين اللي جابوه واللي ما يكدبش يتكافئ ما اعرفش ازاي، ياخد علاوة، اعفاء من العقوبة او تخفيف للعقوبة دي اكتر حاجة عاجباني في القانون الامريكاني ان اللي بيعترف بالجريمة بيتخفف العقوبة عليه واللي بيكدب في الشهادة بياخد حكم زيادة عن الحكم المفروض ياخده في الجريمة
والله يمكن ربنا بينصرهم عشان كده
اصل الكدب وشهادة الزور والحلفان بالكدب دول حاجة وسخة جدا يعني قذرة قذرة الحقيقة
والغش برضه لازم تبقى عقوبته وحشة جدا
ويبقى فيه قانون لحماية المرأة والطفل والأقليات وتنوعاتهم
في الحالة دي بقى ناس كتير ح تهاجر لمصر...اقصد لو عرفتوا تعملوا لي اللي انا عايزاه، يبقى لازم نعمل وزارة مخصوص لاستقبال المهاجرين وتسكينهم في الشغل اللي المفروض يشتغلوه والخدمات اللي ممكن يقدموها والحقوق اللي ياخدوها
آه وتبقى عقوبة الفساد برضه شنيرة، بس على شرط، يبقى الناس كلها واصلة لحد الكفاية بحيث مايبقاش فيه حد محتاج يسرق او يرتشي عشان ياكل او يدفع فاتورة النور او لبس المدارس
ها ح تعملوا ايه بقى عشان تعملوا لي اللي انا عايزاه؟