Sunday 23 December 2007

هي فوضى....هي صورة؟ هي إعععععععع

أولا انا مش عارفة هو لسة فيه حد نخبوي لحد النهاردة؟ ثانيا انا ما اقدرش استحمل التفسير الطبقي لكل حاجة كده، ثالثا ام الطبقة المتوسطة والنخبة المصرية اللي هي اوسخ نخبة على وجه البسيطة، رابعا ام التنظير بقى واللت والعجن في نفس الفكرة، خامسا ام الرمزية المباشرة اللي بتبتدي من اول اسماء الابطال ورسم الصخصيات لحد صورة عبد الناصر اللي محطوطة وش كده، سادسا اللي عايز يكتب مقالة مافيش داعي يأيفها ويعملها سيناريو ويعذبنا احنا بيها، سابعا هي افكار ياسين ولدي دي مش كانت ماتت واندفنت من زمان؟ مين اللي بعثها من الموات ونفض من عليها التراب وبلانا بيها تاني؟
تبدأ احداث الفيلم من "نور" المدرسة اللي هي المقصود بيها مستقبل مصر عشان اسمها نور وامها اسمها بهية اللي هي مصر يعني وحاتم امين الشوربة اسم الله اللي بيحبها وهي مش بتحبه، وهو طبعا رمز للفساد، والفساد ده في تحليل الفيلم وليد الفقر واليتم والغلب وطبعا لانه اتربى فقير ويتيم فهو بالتأكيد ح يطلع شرير وسادي وفاسد ومرتشي وكمان قبيح واصلع، ولان الفيلم رمزي من بتوع يوسف وهبل فنور الجميلة بتكرهه لانه قبيح قبح الفساد، وبتحب وكيل النيابة الشريف، رمز القانون، وبالمناسبة اسمه شريف وامه رمز للعلم والثقافة وتعليم الاجيال لانها ناظرة مدرسة صاحبة مبدأ وجوزها الميت المناضل السياسي، واسمه حافظ طبعا، لا وامين الشوربة حاتم! وبقى رأس الفساد هو امين الشوربة يعني المأمور والظابط دولم مجرد متسترين على فساده لكن هو اللي بيحركهم وبيستغفلهم كمان، واسهابا في الرمزية فقد ذهب حاتم الى المسجد عشان يعملوا له عمل عشان نور تحبه بس قالوا له طلبك مش عندنا قوم اذكر الله ودخلوه في الدروشة وخلوه يفقر في حلقة ذكر قام راح الكنيسة قالوا له طلبك مش عندنا قام قال لهم طيب مافيش احتفالات ولا اعياد فيه قانون طوارئ وقرر يضطهد الاقباط عشان ما عرفوش يخلوا "نور" تحبه وبعدين لما فشلت السلطة في انها تاخد شرعيتها من خلال الانتخاب والقانون اغتصبت البلد، قصدي لما فشل حاتم في انه يخلي نور تحبه واتخطبت لشريف، رمز القانون والشرعية، قام اغتصبها، والقانون طبعا ابن النضال والعلم واللي معلقين في بيتهم صورة عبد الناصر والنضال والقانون والعلم ما بيخرجوش غير من الطبقة المتوسطة اللي بتسوق الغوغاء والدهماء للثورة على الفساد اللي هم كانوا خاضعين له بارادتهم، طبعا لان الغوغاء يساقوا ولا يسوقوا، وقيادة هؤلاء الغوغاء لا تليق بواحد منهم، جربوع، لازم يبقى حد من النخبة اللي هو شريف.
في فيلم خيانة مشروعة عمل علاقة طبقة رجال الاعمال، او الرأسمالية المتعفنة، مع الطبقة الفقيرة، واللي هي عادة خالد يوسف بيحتقرها قوي وبيكرهها كمان، علاقة غير شرعية ادت الى دمارهم هم الاتنين.
لكن في هي فوضى عمل ان الطبقة المتوسطة حاولت تتصل بالرأسمالية المتعفنة ولكنها ما قدرتش تواصل بسبب اخلاقية الطبقة المتوسطة التي لا تتحمل فساد الرأسمالية، شريف وكيل النيابة، قبل ما يخطب نور، مستقبل مصر، كان خاطب سيلفيا بنت رجل الاعمال المشهور، لكنه كرهها واحتقرها لما شاف فسادها الاخلاقي ولما سقطت نفسها.
ويلخص خالد يوسف مشكلة النخبة في انها مش عارفة تخرج من ماضيها لما طلع ان الست الناظرة بتتعامل مع شريف على انه حافظ ابوه المناضل وهو قال لامه انا مش حافظ انا شريف حاولي تحبيني زي ما انا، ولما عرفت تحبه زي ماهو عرف يقود الثورة.
اععععععععععععععععععععععععع
اااااااخخخخخخخخخخخخخخخخخخخ
يااااااااااااااااااااااااااااااااااعععععععععععععععععععععععععع
حد يعمل فيلم كده؟ انا ما فهمتش الرمزية دي عشان انا نبيهة حاشا وكلا عمري ما قلت على نفسي نبيهة شرف لا ادعيه وتهمة انفيها بكل قوتي، بس المباشرة دي جنون جنوووووووووووووون.
انا ناسية والله اسم الست الناظرة، لو افتكرت اسمها اكيد ح تضيف لام الرمزية بتاعة يوسف وهبي.
طيب ليه عمالة اتكلم عن خالد يوسف؟ عشان بجد الفيلم اخراج خالد يوسف، انا ماشفتش بصمة يوسف شاهين غير طبعا في مشاهد النسوان اللي بتجري ورا الرجالة، والستات اللي بتروح تلقح جتتها على الرجالة اللي بتحبهم وبتقول لهم انا بحبك حبني بقى فيقوم يحبها على طول وتروح تقول له انا عايزة احضنك مستني ايه هات بوسة وكده يعني
ممكن اعرف هو الاستاذ يوسف شاهين بيجيب البنات دول منين؟ ومين بقى قال ان الستات بتلقح جتتها على الرجالة وبتجري وراهم كده؟ ماهو مش كل ما الانسان يعمل حاجة يسحبها على كل الناس يعني وللا ايه؟
ومين اللي قال ان الفساد نتاج الفقر وان كل الفقرا يا اما ولاد وسخة فاسدين يا اما ولاد وسخة منسحقين ومستنيين بقى ام النخبة الوسخة بتاعتنا لما تنقذنا وكل مشكلة النخبة انها عايشة في الماضي ومش عارفة تجدد خطابها؟ لا مش صحيح بقى النخبة فاسدة حتى نخاع والاخوة المناضلين فاسدين حتى النخاع وياما سمعنا عن مناضلين عظماء شرشحوا بنات وخلوهم بقوا استغفر الله العظيم ولما تقول له ليه يابني تعمل في البنية كده؟ يرد بكل برود: عادي باديها تجربة هي كده احسن....وكده احسن دي يعني تحولت الى امرأة تحت العامود. وحنفي ابو دقة وغير ابو دقة وغيره وغيره. وكفاية ان كل طرف فيهم بيشتم التاني ويفرح فيه لما تحصل له مصيبة، وكفاية انهم بيحرضوا على بعض امنيا، وكفاية ان كل واحد فيهم عمال يقول على التاني افاق وكلهم افاقين، وكفاية انهم واقعا وحقيقة بيكرهوا الناس اللي هم بيدعوا انهم بيدافعوا عنهم، وكفاية انهم منفصلين عنهم وعايشين في برج عاجي، وكفاية ان شوية منهم حولوا الشعب الى شحاتين والنص التاني مش بيفوق من الخمرا وشوية منهم مادين ايدهم للعال والدون يشحتوا منهم، وكفاية انهم بيشتموا في البترو دولار وماليين كروشهم منه، وكفاية انهم بيتاجروا بآلام الناس وفقرهم عشان يحققوا امجاد شخصية ومكاسب سياسية، وكفاية خطابهم الفوقي المتعالي - زي الفيلم ده مثلا - وكفاية ادعاءاتهم وزيفهم.
ها نقول كمان وللا كفاية كده؟
بقى هي دي النخبة اللي عليها الامل؟
لا هي شريف....ولا عمرها كانت شريف، ابدا، ابدا، ابدا....من ايام ترابيزة القمار بتاعة المرحوم سعد زغلول
وطول عمرها شبشب في رجل الرأسمالية وحاقدة على الرأسماليين وعايزة تحل محلهم وتكسب من وراهم
ولا مأمور القسم والظابط هبل ولا سذج ولا بينضحك عليهم ولا كل جريمتهم انهم عاجزين قدام الفساد
لانهم هم الفساد
ولا اليتيم والجعان وسيلته الوحيدة للتنفيس عن نفسه انه يعذب غيره
ولا الفقير الشبعة بعد جوعة هو المخطط الأساسي للفساد
ولا الستات بتجري ورا الرجالة وتلقح جتتهم عليهم
ولا فيه واحدة بتقول لواحد هات بوسة وحضن
وارحمونا بقى وبطلوا تتسلوا على مواجعنا وتنظروا على جراحنا

No comments: