Monday 10 September 2007

عااااجل: لجنة الدعم الاجتماعي لاسر ضحايا التعذيب

صباح الخير مش ح ارغي كتير امبارح كان اجتماع التاسسي لمصريون ضد التعذيب
اتقسمنا لجان وانا بقيت مسئولة لجنة الدعم الاجتماعي لاسر ضحايا التعذيب
وجيهان شعبان مسئولة لجنة العمل الجماهيري والتعبئة وضمينا مع بعض
طبعا فيه اللجنة القانونية واللجنة الاعلامية ولجنة تقصي الحقائق
بس اهم حاجة دلوقت ان انا وجيهان ضمينا سوا واول اجتماع ان شاء الله
ح يبقى في مركز الدراسات الاشتراكية
7 ش مراد الجيزة
يوم الجمعة تاني يوم رمضان الساعة تسعة مساء
===
طبيعة عمل لجنة الدعم الاجتماعي لاسر الضحايا
كالاتي: المفروض ان واحد من اللجنة يزور اسرة من الاسر
ويعمل تقييم لحاتلها المادية والاجتماعية والمعنوية ويقدم التقييم مكتوب
دور اللجنة انها تقوم بتقديم الدعمي المادي والمعني
طبعا الدعم النفسي ربنا يخلي لنا مركز النديم ويجعله عامر
هو اللي بيعالج ضحايا التعذيب واسرهم ومش متأخر
فح تلاقوا ضحايا التعذيب معظمهم بيروحوا هناك
واللي مش بيروح يبقى اكيد ح نبعته على مركز النديم
ويبقى ده شق العلاج النفسي
لو فيه اطباء نفسيين متطوعين لعلاج حالات يبقى كتر خيرهم والله
انت شغلتك كفرد ايه؟
اللي ح يحصل ان شاء الله اننا ح نجيب قائمة
باسماء وعناوين وتليفونات اسر ضحايا التعذيب
من مركز هشام مبارك ومركز النديم
وانت سواء كنت في القاهرة او اي محافظة تانية
ح يسند اليك زيارة اقرب اسرة ليك
ما تاخدش معاك لا كاميرا ولا فيديو ولا نيلة دي مش شغلتك
دي شغلة اللجنة الاعلامية
انت شغلتك تصاحب الاسرة وبس
ازاي تعمل تقييم لحالة الاسرة
ان شاء الله فيه كورس ح اخده انا كمان معاكوا
الكورس ده محتاج جلستين بس
لما نجتمع يوم الجمعة الجاي باذن الله
ح نحدد المواعيد اللي ح ناخد فيها الحصتين دول
الكورس ده ح تديهولنا واحدة متطوعة والمفروض
ان ده ح يديلك ارشادات ازاي تزور الاسرة وازاي تتصاحب عليهم
وتخليهم يتكلموا ويثقوا فيك ويحبوك
اللي فهمته من الصديقة المتطوعة انه مثلا ح يقول لك تلبس ايه وانت رايح
يعني مش يا عم الامور تلبس شورت مشجر وفانلة كات حمرا وتضرب السبايكي والنضارة الشمس
وتخش بيهم منطقة عشوائية وللا منطقة في الارياف هوب هوب
وتقول لاسرة الضحية: فل يا معلم
ازاي تتعامل معاهم بحيث يحسوا انك واحد منهم مش ان انت ناس وهم ناس
وح يبقى عليك زيارة الاسرة دي مرة كل اسبوع
تقعد معاهم بس وترجع البيت تكتب تقييمك وتسلمه للجنة
اللجنة المفروض بقى في الدعم المادي
ان شاء الله ح نعمل صندوق عشان نقدر ندمجهم في المجتمع تاني
وندمجهم في عمل مشاريع صغيرة تدعمهم مادية
وترجعهم للحياة الطبيعية تاني
يعني مش ناويين نعملهم شحاتين ناويين نساعدهم يشتغلوا ان
شاء الله
===
بالنوسبة للعمل الجماهيري طبعا جيهان شعبان هي اللي ح تحط خطته
بس يعني مثلا من ضمن العمل الجماهيري ان النمرة اللي على اليمين دي
تتعمم
وتبقى مع كل المواطنين
====
فيه اخوة سألوا اذا كانوا في محافظات تانية
احنا محتاجين اللي في محافظات
عشان فيه اسر كتير في محافظات وطبيعي لما تبقى انت في محافظة
ح تروح للاسرة القريبة منك في نفس المحافظة
المغتربين برة مصر ح يشاركوا في دعم الصندوق
ان شاء الله اول ما نعمله ح اديكوا بياناته
====
احنا محتاجين اكبر عدد من المتطوعين وان شاء الله كل ما العدد زاد
كل ما المجهود اللي الفرد بيعمله قل
لان لو العدد قليل ح نضطر ندي الفرد اسرتين تلاتة
لكن لما يبقى العدد كبير ممكن كل فرد ياخد اسرة واحدة
وكل شغلته انه يتصاحب عليها ويزورها وبس
وما تخافوش ده عمل اجتماعي اغاثي
مافيهوش الباش
:)
الصحفيين والمحامين بس هم اللي بيتعجنوا
وهم واخدين على العجن
=====
اللي عايز ينضم للجنتين دول
الدعم الاجتماعي للاسر
والعمل الجماهير والتعبئة
يراسلنا على الميلين التاليين
او الاتصال على رقمي
0123050316
0123325173
====
ما تنسوش اول اجتماع الساعة تسعة الجمعة القادم في مركز الدراسات الاشتراكية
7 ش مراد الجيزة

6 comments:

Anonymous said...

أى أسرة تتبع محافظة الشرقية أرجوالأتصال بى فورا فأنا أستطع المساعدة المادية والمعنوية
أما عن الدعم النفسى وكيفية التعامل مع الأسرة أو حتى الأوراق الخاصة بالبحث الأجتماعى أو النفسى فدة كلة موجود كقوائم عندى حيث نستخدمة فى تقييم الحالات الأجتماعية والنفسية لأسر ذوى الأحتياجات الخاصة وأسر المتوفين بالحوادث
ويندرج كل ذلك تحت بند الأرشاد الاسرى ولدى كتب مترجمة حول ذلك
تشمل التعامل مع الأطفال والراشدين وفن أكتساب ثقة الأسرة والتفاعل معها
وقد عملت مع لجان ضد العنف الأسرى ولى خبرة جيدة فى هذا المجال
ع أية حال التقارير والكتب القوائم تحت أمركم أن أحتجتم أى شئ
0129196954

Anonymous said...

الله ينور عليكى يا نوارة والله انت اجدع من ميت راجل كان عندى سؤالين لو سمحت 1
-هو الموقع بتاع جمعية مصريون ضد التعذيب هو هو موقع يلا نفضحهم ولا الجمعية ليها موقع تانى
2-نمر تليفونات الأسر التى تعرضت للتعذيب حتكون على الموقع بحيث الواحد ممكن يتصل بأكتر من أسرة وشكرا

Anonymous said...

كل عام وانتم بخير وعادة الله عليكم وعلى الاهه الاسلاميه بكل خير
كل عام وانتم منصورين واقوياء
كل عام ومصر بخير
احمد الجيزاوى

Anonymous said...

هو كان اعتصام ولا اجتماع انا عايز اعرف

انا رحت هناك وكتبت على المشوار ده

Anonymous said...

أنا معاكى ان شاء الله وانتى عارفه تكلمينى أزاى :) بس انا ليا تعليق فعلا فين موقع لا للتعذيب ومصريون ضد التعذيب وكل الفاعليات اللى كانت قبلكم عاوزين نبنى على الموجود مش نعمل كيان جديد
دى المشكلة يانوارة هما بيلعبوا على نسيانا وبيلعبوا على تشتتنا لازم نوحد جهودنا ونكمل شغل بعض
تحياتى ورمضان كريم

Anonymous said...

أي حاجة في البحيرة أنا معاكم