Saturday, 1 September 2007

نتيجة الاستفتاء: بيني وبينك سور ورا سور

ده كان سؤال الاستفتاء
في حرب تلاتة وسبعين الجنود مشيوا على الالغام عشان يأمنوا طريق للدبابات. لو اتكررت الحرب عندك استعداد تمشي على الالغام وتصد
بجسمك المدافع؟
اللي صوتوا في الاستفتاء كانوا حوالي تلاتة ونص في المية من اللي بيدخلوا المدونة
اي والله
عدد المصوتين كانوا
230
عدد اللي دخلوا لي في الست ايام بتوع التصويت
حوالي ستلاف ونص او ازيد شوية
وعدم الاقبال على التصويت ده في حد ذاته تصويت
يعني الستة وتسعين ونص في المية اللي ما صوتوش من زوار المدونة
ممكن يبقى فيه جزء منهم مش مهتم اساسا
ممكن جزء تاني شايف انه حرب ايه هو ح يبقى في حرب تاني اصلا؟
جزء تالت بيقول ايه السؤال اللولبي ده؟ وانا ايش عرفني
جزء رابع ح يقول: مافيه كاسحات الغام
جزء خامس ح يقول انا ماليش جيش
جزء فعلا مش عارف يرد على السؤال
ده بالنوسبة للي ما صوتش
اللي صوت بقى
: النتيجة كده
تلاتين في المية قالوا: ياريت ده انا اتمنى
تمنتاشر في المية قالوا: مش عارف ح اعمل ايه ما فكرتش
تلاتة في المية قالوا: لا متهيالي ح اخاف
اتناشر في المية قالوا: وهي دي بلد الواحد يموت عشانها
خمسة وتلاتين في المية
(وهي النسبة الاكبر)
قالوا: على حسب باحارب عشان ايه ومع مين لو الحكومة دي هي اللي ح تحارب مش ح احارب معاها
امممممممم
مبدئيا انا احب احيي التلاتة في المية اللي قالوا ح اخاف
لان دي حاجة انسانية جدا، واعتقد ان اللي عنده شجاعة انه يعترف بالخوف
ح يبقى عنده شجاعة القتال
--
الحقيقة الهدف من الاستفتاء ده مش اني اعرف كام في المية مستعد يحارب
ويموت عشان مصر
لان فعلا ما حدش يقدر يعرف غير اذا حصلت بالفعل حرب
لكن هدفي هو اننا نعرف قد ايه تراب متكوم على حبنا لبلدنا
الحقيقة ان النتيجة: بيني وبينك سور ورا سور
وانا لا مارد ولا عصفور
اكبر نسبة شايفة انها ما عندهاش استعداد تموت
طول ما البلد ظالمة
لو جمعنا نسبة الناس اللي مش متأكده انها ممكن تموت عشان مصر
ح تطلع على بعضها سبعين في المية
شوية صغيرة قوي اللي هم اتناشر في المية زعلانين من مصر نفسها
وشايفين انها بلد ما تستاهلش
وخمسة وتلاتين في المية زعلانين من الظروف اللي مزعلاهم من البلد
اللي هي الحكومة وحاسين ان الحكومة دي هي الحائل اللي بينهم وبين بلدهم
وهي السور ورا سور
وهم لا مارد ولا عصفور
وممكن يكون جزء من اللي صوت على انه مش ح يحارب مع الحكومة الحالية
يكون خايف من الموت ومكسوف يعترف بده قدام نفسه وعايز يلاقي تبرير
وممكن يكون فيهم جزء شايف ان دي حكومة كافرة مثلا
وتلاتة في المية بانسانية شديدة عبروا عن مخاوفهم
وتمنتاشر في المية اظن ان مشاغل الدنيا واخداهم لدرجة انهم
ما فكروش ان مصر ممكن تبقى في خطر
او ان الاخطار اللي بيتعرضوا لها كل يوم في الاتوبيس مثلا
ممكن تبقى اولى بتفكيرهم
النتيجة ان المصوتين اكيد مش بيكرهوا مصر
بس هم زعلانين قوي

9 comments:

Monzer said...

انا على فكرة صوت على الاستفتاء ده
مش عارف أقول أن صوت على ايه ولا مش لازم
مش لازم

بس فيه عدة قناعات،
يعنى مثلا السلفيين مقنين الجهاد وواضعين شروط للجهاد، زي دار المنعة والراية والامير

يعنى مثلا إسرائيل عدوة لكل عربى أو مسلم علشان مغتصبة أرض إسلامية، هو بيضع شروط للمصرى أو الكويتى او أو علشان يحارب إسرائيل وهو مش فلسطينى، لازم يكون تحت راية لا إله إلا الله، وتحت أمير للمسلمين، ووجود دار معنة للمسلم ده تحميه ويمكن الرجعو إليها، وعدم مظنة الغلبة او الهلاك

لكن فى حالة الفلسطينى الى بيعيش تحت عدوان الاحتلال فبيتفق الكل على صد العدوان

وده نفس الحال فى مصر، أعتقد ان فى حالة وجود خطر حقيقى على مصر، الى خايف والى هايتنى كاسحات الألغام والى مخنوق م البلد، وم الحكومة ومن كله، هاينسى كل القصص ده، ده من وجهة نظرى
لان مصر لن تختذل فى حكومة او نظام مستبد، أو معارضة متفككة او فى شعب جاهل او ضعيف، على الأقل الشعب العيف ده، هايناه معدنه وهاينفض عنه التراب وهايكون ده الوقت المناسب

آسف جدا ع الإطالة

Anonymous said...

السلام عليكم
والله انتو جبهه زى العسل وانا بفكر انضم لكم
انا اول مرة ازور المدونه واول موضوع اقراه هو نتيجة الاستفتاء
بس خلى بالك الكلام مش زى الفعل احنا كنا بنكره كل حاجه ف الجيش بس لما كان بيبقى فيه تدريب بجدوبالذخيرة الحيه كنت بتشوف وحوش
ع العموم الموضوع حلو وانا عن نفسى هفكر ف السؤال ويمكن اقول انا هعمل ايه المرة الجايه
سلام
معتصم

MYLOODA said...

يا عالم ماحدش جايب سيرة ان أبو النجوم اختاروه سفيرا للفقرا رآسه براس نيلسون مانديلا

يا عالم أحمد فؤاد نجم كنز لم يؤرخ مننا

حتي مدونته ما حدش مهتم بيها بما يليق بالراجل

يا عالم حد يتناول موضوع اختيار أبو النجوم سفير للفقرا

ده شيء ليه قيمه ويطلعنا شويه من

الاحباطات اللي عايشنها

وبيت أهمية وقيمة ونتيجه الصمود والثبات علي المبدأ

شمعة نور للراجل ده مننا يا عالم

بـراااح said...

نوارة
انا واحدة مصرية جديدة في التدوين شفت التصويت و كنت من الناس اللي بصت عليه و ماصوتتش... معرفش ليه يمكن ماهتمتش ويمكن قلت حرب ايه او مافيش فايدة...بس الي انا متاكدة منه اني عمري ما غضبت من مصر ولا لمتها بالعكس انا بازعل قوي من اللي بيتكلم عنها كانها هي سبب اللي احنا فيه ... مع انها زي الجسد اللي اتملى امراض و اورام تعبته و هلكته. معقوله الوم المريض على مرضه؟
عارفة يا نوارة الكلام عن حال البلد و الاصلاح و التضحية عشانها بعيييييد عن تفكير ناس كتييير قوي مشغولين بحالهم و حياتهم و كأن اللي بيحصل دا في بلد تانية. زي بالظبط اللي بيعدي كل يوم من شارع فيه بلاعة مفتوحة مش هيبصلها و لا يهتم بيها الا لو ابنه وقع فيها ساعتها بس هيتحرك و يدور عن المسؤل و يقول يا عالم هنا فيه خطر و يمكن يدور يسد البلاعة بنفسه و كانها كانت طول الوقت مختفية و مظهرتش الا لما دخلت في مجال رؤية الساقية اللي هو مربوط فيها.
و رد على سؤالك... طول ما انا باحب البلد دي هيكون عندي استعداد. الاستعداد دا مقترن بالحب و مدفون معاه تحت اكوام التراب يوم ما ينزاح التراب هيبان الحب و الاستعداد للتضحية.

و على راي عمنا صلاح جاهين
على اسم مصر التاريخ يقدر يقول ما شاء
أنا مصر عندي أحب وأجمل الأشياء
باحبها وهيّ مالكه الأرض شرق وغرب
وباحبها وهيّ مرمية جريحة حرب
باحبها بعنف وبرقة وعلى استحياء
وأكرهها وألعن أبوها بعشق زي الداء
وأسيبها وأطفش في درب وتبقى هيّ ف درب
وتلتفت تلاقيني جنبها في الكرب
والنبض ينفض عروقي بألف نغمة وضرب
على اسم مصر

bahry said...

ايه بقي الاشتغالات دي؟؟؟
فين تصويتك يا هانم؟؟

هو انت فاكرة انك بارتداء بالطو دكتور الاسنان
والسحاحة في ايداكي
حننشغل بتحليلك النفسي ومش حنسأل عن تصويتك؟؟
أنتي حتعملي ايه؟

بس في حاجة تانية يا نوارة

انا واحد من الناس لو الحرب قامت ححارب وكل حاجة مع الحكومة الوسخة دي
بس مش حدخل في حقل الغام او ححضن مدفع والاعمال الجامدة دي

بس ححارب

بالمناسبة انا كمان بحترم جدا التلاتة في الميه

بحري

Desert cat said...

انا من الاتناشر فى المية اللى زعلانين من مصر
بس انا فى انتظار نتائج محاكمة اسلام نبيه

الطائر الحزين said...

واللى مصواتوش زعلانين أكثر

جبهة التهييس الشعبية said...

اولا
بالنسبة لاختيار بابا سفير للفقرا
فمش معقول يعني اعمل تحية لابويا على مدونتي يعني انا بالنوسبة لي موقفي ح يبقى حرج في حاجة زي دي لانها حاجة تخصني بشكل شخصي
اللي يعمل ده يبقى حد ما يقربش لاحمد فؤاد نجم

ثانيا

منذر

اه
ماهو عشان كده امريكا والحكومة المصرية والامن بيحبوا السلفيين
عشان مأجلين كل حاجة لما القيامة تقوم
والمسيح ينزل
مع ان بوش قالب لنا المنطقة ومنجدها عشان يستعجل نزول المسيح
عايز يلحق ينزله قبل ما فترة رئاسته تخلص

معتصم
نورت الجبهة يافندم

براح وبحري
ما انا قلت ان ساعة الحرب الحقيقة ح تبان
وما حدش دلوقت يقدر يتوقع ايه اللي ح يحصل

ح نبقى زي لبنان وللا زي العراق
الله اعلم

بس فيه واحد سعودي لما كنت في العاشرة مساء اتصل وقال: احنا بنحسد المصريين على وطنيتهم

هئ هئ هئ

حسدوا القرد على...مش كده؟

هو احنا حيلتنا غيرها يعني
قصدي الوطنية مش القرد

desert cat
و
الطائر الحزين
والله كلنا زعلانين
بس ما تزعلوش دي غلبانة والله

مهندس مصري said...

انا عن نفسي ساعة الحرب لو حاربت و لو إني مليش جيش حأحارب علشان أحمي بيتي و عيلتي و منطقتي مش علشان الحكومة اللي عايزة الولعة بجاز
أعتقد لو الحرب قامت حنتحول لعراق تاني بس على كبير
و الانفجارات و عمليات المقاومة و السيارات المفخخة حتبقى على ودنه
و ما تنسوش ان سلاحنا كله تقريباً أمريكي دلوقت
و الخبراء الأمريكان منتشرين في كل المواقع المهمة في الجيش
دا غير انهم بيدونا درجة تكنولوجيا أقل من اسرائيل و منهم
و أسلحة دفاعية غالبا
يا شيخة دا أنا واحد صاحبي كان في الجيش
بيدور في جوجل إيرث لقى موقع الصواريخ اللي كان متجند فيه و متصور صور واضحة و مكتوب عليه
sam site
يعني جيشنا الأمريكان عارضين صور مواقعه علني على النت