Tuesday, 9 October 2012

الاخوان بييجوا عندي المدونة ليه؟ انا سبت التويتر بسببهم

وواحد كتب على التويتر ان اختفائي من التويتر سببه ان الاخوان ادوني رشوة او هددوني
الحقيقة انا مش عايزة اقعد على الصنيطر لانه مليان لجان الكترونية والكلام معاهم غير مجد
المفروض التويتر ده بنستخدمه للحشد او للتغطية واحيانا في ايام الوكسة اللي شبه ايامنا بنحط همنا على هم بعض ونقعد نولول.. بس لجان الاخوان الالكترونية كتير قوي.. ودمهم تقيل، زمان كان فيه لجان امن الدولة ولجان الجيش وكان فيه اولتراس حسان بتوع حسان ده سيدك يا كلبة يا شيعية يا بنت الحشاش.. بس كله كوم ولجان الاخوان الالكترونية كوم تاني، اولا من سمات البني ادم الغبي انه يمسك في حاجة ويفضل يقر فيها وما ينقلش، زي داستين هوفمان في فيلم رجل المطر كده لما كان بيزن في حاجة واحدة، لجان الاخوان بيمسكوا في جملة واحدة ويفضلوا يكرروها، ثانيا دمهم تقيل قوي.. انا عمري ما شوفت تقل دم كده، مافيش عندنا في مصر حد دمه تقيل كده ابدا، ولا حتى سمير صبري، دي جينات ايه دي؟ مش بتاعتنا دي، دي جينات احد الغزاة اللي جم مصر وما اندمجوش... مين اللي عامل كده؟ الهكسوس دول ولا ايه؟ ثالثا ايه العائد من الهري مع لجان الاخوان الالكترونية؟ الواحد كان بيهري مع لجان امن الدولة عشان يكشفهم، بيهري مع لجان الجيش عشان يحبط منطقهم، بيهري مع لجان السلفية عشان يبين عبطهم ويضحك الناس عليهم، انما لجان الاخوان اولا مكشوفين من اول كلمتين خصوصا لما يقولوا: انا مش اخوان على فكرة، ما عندهمش منطق عشان يحبط، الناس بتضحك عليهم من غير ما الواحد يعمل عليهم حفلة زي ما بيعمل على السلفيين... طب ايه لازمتها؟ 
فقلت ارجع للمدونة على اساس انها القاعدة الاساسية.. رايحين يعملوا اكاونتات جوجل وييجوا هنا ليه؟
هش يا لجان الاخوان.. مش عايزاكوا انا
بعدين انا طول عمري بكتب بوستات قد اللحاف عشان ماحدش يقرا الا اللي مهتم، انتوا قاعدين تقروا ده كله لواحدة مش طايقينها؟ طب وربنا لاعذبكوا ومن هنا ورايح كل بوست حيبقى مجلدات.. انا حاتوبكوا
وبمناسبة الاخوان اللي دفعوا لي الرشوة، احنا اجرنا شقة، بس على البلاط، مش ممكن كل الفولورز دول يعني لو نقطوني كل واحد بجنيه حافرش الشقة والشقق اللي في المنطقة كلها.. ولا انتوا فولورز على الفاضي؟ 

27 comments:

ahmed shosha said...

والله عسل يا نواره

ahmed shosha said...

والله عسل يا نواره

m. fathei said...

خلاص انا هبعتلك جنيه النقطه اي خدمه يانوسه

محمد اشرف(جيفارا) said...

وانا عندي اول جنيه..بس نشوفك..صحيح هتيجي بكره مسيره ماسبيرو ولالا؟؟

souvy Abd Elrahman said...

اهوه غلاسة كده

Mohamed Hammad said...

كلامك يأستاذة نوارة وهجومك على المبالغ فيه على الإخوان لدرجة انك تشككى فى جيناتهم إنهم أصلا يكونوا مصريين فيه ظلم كبير لناس وطنيين ضحوا كتير طوال 80 سنة " هم وغيرهم " لوجه الله أولا ثم علشان مصر والبلد وعلى العموم ده رأيك وانت حره فيه وده رأى لو تحبى تسمعيه ودى أقل حاجة علشان نبنى بلد إننا نسمع بعض الأول وشكرا.
للعلم أنا من الإخوان وأنا فخور بإنتمائى ده

محمد قنديل said...

مش كل الإخوان دمهم تقيل على فكرة
أنا ليا بعض معارف منهم و دمهم خفيف :)

و بالنسبة للنقوط إعزمينا على الفرح و إحنا ننقط :) و لا مفيش فرح و لا مش حنآكل الجاتوه و نشرب البيبسي و لا ايه ؟ :))

farah said...

احكي انتي بس و احنا سامعين . و بخصوص الشقة ، كله بأوانه ، متستعجليش ، مسيرها تتفرش يا عروسة

khaledelshaer said...

والله يا نوارة انتى طول عمرك جدعة لولا ان لسانك ضارب شمال شوية وساعات بتندفعى بشكل جامد

أمـل الرشـيد said...

استمري يا نواره

المشكله ان تقل دم االاخوان العنوان العريض للحركة في مصر وتونس واليمن وليبيا

انت بتبردي قلوبنا وتنسينا هم الثورة الي حصدها الاخوان ظلم



Ismail Abdelhamid said...

الف مبروك وبالرفاء والبنين ومنتظر تنشري رقم حساب النقطة عشان نجيب نقطة للاخوان

سمير أباظة said...

بالنسبة للجان الاخوان وكده انا معاكى ...اما بالنسبة لموضوع الشقة انا فولور على الفاضى

سمير أباظة said...

بالنسبة للجان الاخوان الالكترونية انا معاكى...بالنسبة لموضوع الشقة والفرش انا فولور على الفاضى حضرتك

Rania Ismail said...

نوارة شعارك حلو بس زودى على (أرواحهم على أكفهم) كلمة (وظايفهم على أكفهم) عشان الناس بتوع ثورة ايه احنا خايفين على رزقنا :)

moo said...

طيب .......... اللمونتين اللى فى الافتار يمكن يفكروكى بيا انا بكتب عندك من ايام ماكنت متنيلة قاعدة فى الميدان ومن ايام ما كنت بتدافعى عن الاخوان ومقتنعة بدورهم بس ده اتغير لاسباب انتى مقانعة بيها ومش حانقشك فيها بس اللى مزعلنى منك حاجة تانية انتى ليه مش بتحسى بقيمة نفسك وقيمة اللى بيقرولك ؟ انا مش محتاج تثبتيلى حاجة قولى اللى فى نفسك على طول واصحابك اللى محملينك جمايلهم وانهم المعين الحقيقى للثورة وعشان تفضلى الملكة بينهم يبقى لازم تمسكى الكرباج على طول مش حاينفعوك لما تقابلى وجه كريم . اوزنى كلامك بميزان الدهب انتى عارفة كويس انن حنتحاسب عليه وبعدين انا قلتليك قبل كده قدرك ان المدونة دى كانت زى شقة الطلبة للضيوف الاغراب من الكفر يعنى لازم تساع الكل ما ينفعش مالقيش مكان سواء اخوان ولا اناريكست والسلام ...... اه ابقى قولليلى يوم نقل العفش احنا عندنا خبرة كويسة فى الموضوع ده بما اننا بننقل كل تلات سنين

شمس النهار said...

اييييييييييييييه
فين ايام اللجان الالكترونيه لما كانوا بيدخلوا يشتموا وتاني يوم تلاقي المدونة بخ
ونبي كان مسلينا وكنا عارفينهم وعشرة
لكن دلوقتي الناس الجديدة دي اصلا كفته

Unknown said...

( 1المهم يا سيدى لما انت )
بجد دموعى نزلت وانا بقرأ كلامها فكرتنى بزكريات وقلبت عليا المواجع رغم انى تافه اصلا واخرى فى الثورة ساعتين زمن فى ميدان الجيزة امام مدخل شارع الهرم يوم 28 وبعد صلاة العصر روحت ادور على تليفون ارضى ويكون فيه مباشر عشان أطمن أمى فى البلد انى مليش دعوة بالحوارت دى
المهم يا نوارة حلفتك بالله وبسيدنا النبى وكل آل البيت تكتبى على طوول وكل يوم واكتر من بوست ويارب كل بوستاتك تكون اطول من ألفية ابن مالك وكتاب الف ليلة وليلة أكتبى ماتتصوريش مدونتك دى بالنسبة ليا ايه من قبل الثورة بييجى سنتين أكتبى عشان انا دلوقتى حاسس انى غريب عن المجتمع اللى عايش فيه فرحتى لما بلاقى بوست جديد على المدونة عاملة زى فرحة المسجون لما تجيله زيارة من حد من اهله
بالنسبة للنقطة والله بجد مستعد ومتهيألى الناس كلها معندهاش مانع وممكن بجد لو عرفنا طريقه نلم فلوس كتير بس انا ليا شرط ... لما اجى اتجوز تبقى تقولى للفلورز بتوعك فيه واحد غلبان اخوكم هنا وعاوزين نلمه فلوس عشان نسّتره ده اذا كان مكتوبلى جواز فى ام سنينى اللى ال35 دوول

Mahmoud Nassar said...

عليا النعمة انت عثل

Mahmoud Nassar said...

عليا النعمة عثل

Mahmoud Nassar said...

يا برنس لما ارجع ان شاء الله, النقطة بالروبليه كمان

ola sherbeini said...

حمدالله ع السلامة هنا .. والله وحشتني المدونة وبتفكرني بأيام قبل الثورة .. كنتي بتنزلي بال10 بوستات في اليوم ههه

nazi said...

ينفع كدا تسيبى طنيطر

Mahmoud Nassar said...

http://www.facebook.com/photo.php?fbid=416342061748592&set=a.205842349465232.47441.205025759546891&type=1&relevant_count=1&ref=nf

شوفى الكلام ده كدة يا برنسة

arabian_faithful said...

أنا إخوان وعندى اكونت على جوجل وبأدخل مدونتك من قبل الثورة أساساً قبل الحادثة لإنك الظاهر وقعت على دماغك بعدها :D
وأننت محتاج تتعالج نفسياً لأنك ضربت وشكلك عندك بارانويا ^_^

فافى said...

ههههههههههههههههههههههههههههههههههههه انامش اخوان بس ....
نسيتى موتوا بغيظكم ولا ايه؟

Ibrahim Jabali said...

ya brensa am from jordan n my tweets to u dosent appear at ur timeline n dont know y; but i like u so much even before there is a rev in egypt

Hesham Emara said...

سمعتى كلام نايل الشافعى مع هاله سرحان............طب اسمعيه مع يسرى فوده النهارده...لقد نجحوا فى استفاذ طاقتنا انترك ماهو اهم بكثير....واني لن افاجئ ان سمعت ان نايل الشافعى مات فى حادث غامض