Saturday, 13 October 2012

ريبورت سخام لجان الاخوان

هم الاخوان دلوقت بيقولوا ان منصتهم اللي اتهدت وان اللي هد المنصة رجالة حمدين والبرادعي مع ان غزلان بيقول ان الاخوان ساعتها ما كانوش في الميدان واللي هد المنصة اللقيطة دي هم محبين مرسي
طيب، دلوقت حاليا لجان الاخوان الالكترونية في حالة هياج كامل وفاقدين السيطرة على نفسهم لانهم اتعروا واتكشفوا وارتكبوا حماقات وغباوات
انا اقولكوا هم كان في بالهم ايه
هم كان في بالهم ان عدد اللي مش مؤيدين لمرسي حيبقى قليل، حياكلوا علقة معتبرة، حيحرموا ينزلوا وحيبقوا عبرة لغيرهم، ما توقعوش ان لما يضربوا الناس قوم بقية الناس تنزل لهم.. ليه؟ لانهم يحملوا نفس غباوة مبارك
من هنا جه تضارب الاقوال بتاع: الاخوان مش في الميدان دول الشعب الجميل، الجماهير الغفيرة المطحونة، وشوش ولاد بلدنا الطيبين اللي بيحبوا مرسي (يععععع... البق الاخراني ده قلب لي معدتي) والاخوان مش في الميدان، ده الشعب
كان الخطة ان مجموعة تقول على نفسها مش اخوان تضرب المجموعة الصغيرة اللي نزلت الخميس والجمعة الصبح، ما حسبوش ان الناس حتكتر لما يلاقوا غيرهم بينضرب، تقديرهم لقوتهم ولقوة غيرهم خانهم المرة دي
فراحوا مغيرين اقوالهم في نص المعركة وقالوا: احنا موجودين بس الطرف التالت هو اللي بيضرب المتظاهرين
على اخر اليوم لما العيال جروهم زي المعيز قرروا يغيروا اقوالهم ويقولوا ان المتظاهرين هم اللي ضربوهم من غير ايتها سبب كده بسبب الحقد على الاسلام
فبقى رواية الاخوان كالتالي: الاخوان مش موجودين في الميدان واللي كسر المنصة دول الشعب اللي بيحب مرسي ولازم تعترفوا بان الشعب بيحب مرسي، والطرف التالت هو اللي بيضرب المتظاهرين، وعلى العموم اهم الاخوان انسحبوا من الميدان، اللي هم مش موجودين فيه، حقنا للدماء، ولو كانوا عايزين يولعوها كانوا فضلوا لكنهم حريصين على الوطن، وعلى فكرة بقى المتظاهرين اللي كانوا بينضربوا ما انضربوش دول ضربوا الاخوان....
اظن الكلام منطقي
والكلام المنطقي ده اللجان الالكترونية الاخوانية سارحة على النت تقوله
اللي يغيظ بقى ان الناس بتتناقش معاهم.. ممكن اعرف بتتناقشوا في ايه ومع مين؟
اي لجنة اخوان ريبورت سخام من سكات وبلاش انهاك للطاقة.. للاسف احنا ابتدينا المعركة مع الاخوان، وابتديناها بدري، انا ما كنتش حاسبة حساب اننا حنخش معاهم في معركة شبه اللي كانت مع المجلس العسكري بدري كده.. صحيح اننا دخلنا مع المجلس في معركة من يوم 9 مارس، بس المجلس دول عساكر ما يفهموش الا القوة، انا كنت فاكرة ان الاخوان اذكى من انهم يشعلوا صراع بالقوة والدراع بدري كده، وكنت فاكرة انهم مدنيين
عموما خلاص، نرتب نفسنا بقى وننظم نفسنا، ومافيش داعي لاهدار الطاقة في مناقشة الاخوان ولجانهم
انت بتتكلم مع الاخواني بهدف ايه؟
بهدف تحبط منطقه، طب هو مالوش منطق وباين وقال على رأي المثل: كدب مساوي ولا صدق منعكش.. ده بقى كدب منعكش
ولا بهدف انك تقنعه؟
ده خروووووووووووووف ده.. ما ينفعش يقتنع بحاجة
الاخواني اللي ما سابش الاخوان ايام محمد محمود ما يستاهلش الصباح ترميه عليه، ده مش بني ادم اساسا، ولا يستاهل يتف عليه حتى
ثم ده ما بيقتنعش بحاجة ده.. ده خروف
ده واحد لو المرشد بتاعه قرر يقول على البرادعي وحمدين انهم من اولياء الله الصالحين حيروح لحد بيوتهم ويقلع الجزمة ويلف حواليه ويبوس حديد الباب 
ده واحد المرشد بتاعه بيقول له اركب الاتوبيس يا مقطف يركبه،انزل من الاتوبيس ينزل، اضرب يضرب، اسحب يسحب، اعمل عجين الفلاحة.. يعجن، نوم العازب.. ينام، الليل الليل اللي يا ميمون... يتنطط
لو لجان امن دولة ولا تحريات عسكرية اقول لك ناقشهم عشان تبين الثغرات اللي في منطقهم
لو سلفيين اقول لك ناقشهم عشان دول صوتهم فعلا من دماغهم وبيقدسوا الشيوخ صحيح ويمشوا وراهم عمياني بس من باب المحبة مش التنظيم، ممكن لو اقتنع يقلب على الشيخ اللي يخلا بيه ولا يحس انه كان بيخدعه.. لكن الاخوان كده انت بتنطح في حيط
مالهمش حل غير ريبورت سخاااااام... ولك الاجر والثواب عند الله
اقولكوا سر.. انا متضايقة اننا ابتدينا المعركة مع الاخوان.. ماليش مزاج احارب اليومين دول.. بس ادي الله وادي حكمته حنعمل ايه؟ ناس بتضربنا حنجري يعني من قدامهم؟

10 comments:

m. fathei said...

فعلا المعركه ابتدت بدري بس الحمد لله كنت بقول ان الاخوان مايفرقوش حاجه عن اي تنظيم ديكتاتوري هدفعه السيطره وقمع معارضيه وقلت هيلعبوها بذكاء بس باين عليهم انهم حتي في السلطه واغبياء وفعلا عندك حق في حجتين اللي مسبش الاخوان في محمد محمود مايستهلش نعامله كبني ادم ومانتناقش مع لجانهم في بني ادم يقب علي نفسه يبقي خروف ولاء وطاعه ايه دي

abdelrhman saad said...

الاخواني اغبى من اني اتناقش معاه بس انا بحب اتريق عليه وانرفزه
وهم دلوقتي واخدين شفيق قدوه ليهم في التتويه يعني يوديك شمال ويجيبك يمين ويقولك الوطن والمصلخه العليا ويلف ويدور
وعلى فكره مش كل السلفيين بيفكروا كان عندي واحد صاحبي كان في الدعوه السلفيه كان زي شريط الكاسيت يعني يسمع كلمتين من الشيخ بتاعه ويقولهم زي ما هما لا بالزياده ولا بالنقص

abdelrhman saad said...

الاخوان اغبى من اني اتناقش معاهم بس انا بحب اتكلم معاهم عشان اتريق عليهم وانرفزهم
وهم دلوقتي واخدين شفيق مثل اعلى ليهم في التتويه يعني يوديكي يمين ويجيبك شمال ويقولك الوطن والنهضه والناس اللي فوق والناس اللي تحت وفي الآخر متطلعيش منه بحاجه

متفائل said...

معك حق .. لكن المعركة اللي بتقولي عليها دي حتتكلف دماء أكثر مما تتصوري .. دول مش جعيدي وبحطيطي بتاع الأمن المركزي شويتين ويتعب وياخد ديله في سنانه ويقول يا فكيك .. دول عقائديين وفاكرين نفسهم بيحاربوا كفار قريش (على حسب القيادة بتاعته ما معبية دماغه) .. تقدري تقوليلي إيه العمل لو إنقلب التحرير ساحة معركة بالخرطوش والسنج وسقط قتلى بالمئات ؟ مين حيخرجنا من الموقف ده ؟ كنتوا فاكرين بعبطكوا إن العملية بعد صعود الإخوان إلى السلطة حتمشي بالصندوق .. النهاردة إخوان .. بكرة وفد .. بعده مصريين أحرار .. وهكذا وكله بالصندوق .. ليه يعني ؟ فاكراها سويسرا ؟ دي مصر يا عبلة .. مصر اللي بقالها ستين سنة بدون أي ممارسة سياسية أو حزبية ديموقراطية من أي نوع .. مصر اللي مليانة عشوائيات وفقرا مش بس بيبيعوا صوتهم دول بيبيعوا كليتهم للي يدفع .. مصر المنتهكة بالفكر الوهابي التكفيري ... اللي إنتي شايفاه في أوروبا ده نتاج تلتميت سنة من الكفاح التنويري والفكر السياسي الإجتماعي وماينفعش تستورديه زي مابتستوردي العربيات وتركبيها .. مصر ترتحل الآن من (الدولة) إلى (القبيلة) وإنتوا بتتكلموا عن التغيير بالصندوق ؟ من هنا ورايح مافيش غير (صندوق) واحد بس هو الصندوق الذي ستوضع فيه جثة الشهيد

GMA said...

المعركه دي مع الاخوان ملهاش لازمه. مبارك تركته تقيله واللي جاي بعديه خسران خسران. البرادعي ذكي وحمدين حظه كويس انه بقي في المعارضه . المرحله الفاشيه جايه ببركه الاخوان بس بتأثير الزمن حينهاروا تحت وزنهم .

arabian_faithful said...

أنت تجمعكم الكراهية و نحن يجمعنا المحبة فى الله لذلك مهما فعلتم لن نخشاكم والله إنكم لأهون علينا مما تتخيلون :)

nour1971 said...

صعبانه عليا مصر اوي من اللي بيحصل فيها فين كلمه ايد واحده ايه اللي حصل ده ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

مش فاهمه said...

يانوارة ارجوكى كفايه عداوات والله مش حاينفع رجب هلال حميده و مرتضى منصور بيتكلموا عل النتخابات الجايه نقف ورا مرسى و نزقه زقة كمان بلاش اللعب بالنار كلنا خسرانين و الله
ملحوظه: انا مش اخوان و مش مقطف بودان

مش فاهمه said...

مرتضى منصور شم نفسه و نازل مؤتمرات و برامج و مصطفى بكرى ظهر تانى على الساحع ممكن نأجل معركتنا مع الأخوان لما نخلص من الأشكال الوسخه دى الأول

Cicel Saad said...

تخيلت شكل الحوار بين مرسي والنائب العام شوفي إزاي:
مرسي:انا كلمتي لا ممكن تنزل الأرض أبدا
النائب العام غاضبا: مرسييييييييييي
مرسي خائفا: خلاص تنزل المرة دي بس المرة الجاية لا ممكن تنزل أبدا