Friday, 12 October 2012

موقعة الجزمة

تحديث: نسيت اهم حاجة...
محمد اتصل بطارق مراد على رقم 01289802783
------------
مش انا ضربت طارق مراد بالجزمة؟
رحت برنامج لطوني خليفة، المفروض ان البرنامج بيستضيف ضيف بيخليه يتكلم وضيف تاني بيبقى ورا ازاز مموه بيكتب ملاحظاته ولما بيعترض بيضرب زرار بيقلب نور احمر بعدها بيترفع الستار بيبين الضيف التاني اللي بيبتدي يقول ملاحظاته.. المفروض ان انا الضيف  التاني اللي ورا الستارة، والضيف اللي بيخش يطرش في الاول بيبقى طارق مراد
طبعا قال الطراش المعتاد بتاعه: الشعب المصري في ضلال، ودي مش ثورة دي نكسة، والرئيس مبارك له الفضل في الثورة العظيمة اللي هي نكسة وصفوت الشريف هو بتاع الاعلام الحر واللي قوم الثورة، اللي كانت نكسة من شوية، والبرادعي والاخوان وستة ابريل كلهم عملاء لامريكا واسرائيل، وانا نفسي ابوس رجل مبارك، وكل اللي قاموا بالثورة ارجوزات ومأجورين وحماس وحزب الله هم اللي قتلوا المتظاهرين
فطبعا ايدي ما اتشالتش من على الزرار الاحمر... بعدين اترفعت الستار وده اول ما شافني هاتك يا شتيمة فيا وفي ابويا ويقول لي الفلوس والتمويل والعربيات والهدوم
انا يتقال لي الهدوم؟ طب ممكن مش عارف ان اللانوس بالقسط.. لكن الهدوم؟ انا الهدوم؟ ده انا مرة على التويتر باقول للعيال ده انا حاطلع في التلفزيون واتكلم عن الاضراب وبتاع وحاجة اخر وطنية لقيت واحدة ما اعرفهاش بتقولي: وانت يا نوارة ناوية في المرة دي ترحمينا من الطرحة البيج ولا انت من النوع اللي بيصعب عليه العشرة؟ والبنات المنفسنة على التويتر والفيك بوص طول الوقت بيتريقوا على لبسي، حتى لما حكيت لامي وقلت لها وقال لي الهدوم راحت ضاحكة... امي اللي خلفتني.. مالها هدومي؟ مش حاجة ساترة الانسان مننا وخلاص؟ هو انا فاضية اتحنتف؟
:D
المهم قعدت اتريق عليه شوية وهو كان قال اللي حيقول المخلوع مش حيحصل كويس وانا فضلت اقول له المخلوع، المهم ابتديت اتكلم عن انجازات مبارك الوسخة طول التلاتين سنة بالارقام وقلت انا لو مفروض اعتذر يبقى اعتذر للشعب المصري وللاستاذ اللي قاعد قدامي ده لاننا اتأخرنا في الثورة لحد ما مبارك افسد الانسان وخلا بعض البني ادمين يتحولوا لكائنات مريضة وعبدة كده زي الاستاذ اللي قاعد قدامي.. وانا باتكلم طبعا ده مش بيسكت وعمال يقل ادبه ويتطاول لحد ما قال لي وهو بيبتسم ويغمز بعينه: نوارة تعالي لي وانا اظبطك!
والله يا مؤمن انا مش عارفة امتى قلعت الجزمة وامتى حدفتها.. كل اللي فاكراه ان جزمتي لبست في وشه قبل ما طوني خليفة يكمل جملته اللي كان بيقول فيها: ما يصير ها الكلا...
الكلام يعني
وزوري بقى اتفتح: هي مين دي اللي تظبطها يا اللي امك حيرانة جابتك منين يا وسخ يا ابن الوسخة
وطوني مكتفني عشان ما اضربوش تاني والبأف واقف زي الفار وبيقول لي: انا اقصد اظبطك سياسيا.. انت اللي نيتك وحشة.. 
فلت من طوني وجريت عليه اضربه تاني باللكميات بس هو جري الجبان، وطوني رجع كتفني مع ناس تانية..
راح الاخ طارق ده واخد الجزمة بتاعتي وقال: انا واخدها حرز
:D
راحوا فريق البرنامج واخدين الشنطة بتاعته رهينة وجريوا وراه عشان يجيبوا لي الجزمة، وقالوا له هات الجزمة واحنا نديك الشنطة
طوني خليفة اعتذر لي عن سفالة هذا الشخص وقال لي: صار لي عشرين سنة بها المهنة ما شفت عمري ها الشي ولا حصل معي موقف متل هيك
وانا خارجة فجأة لقيت كل اللي في الاستوديو بيصقفوا لي ... الراجل ده محبوب قوي
:D
المهم مشيت، محمد اتصل بيا يشوفني خلصت، لجل غباوتي حكيت له، على ما رجعت له لقيته بيغلي وجاب نمرة البأف ده ما اعرفش منين واتصل بيه: انت طارق مراد؟ انا جوز الست اللي انت تطاولت عليها.. قد الكلام اللي انت قلته ده تنزل تقابلني؟ 
يقوم طارق يقوله: ايه؟ نعم؟ انا مش سامع
محمد مش يسكت بقى لا مصمم: باقولك انا جوز نوارة نجم اللي انت تطاولت عليها يا .... قد كلامك اللي قلته تنزل قدامي توريني بتظبط ازاي ولا حتعمل ... ؟ 
راح طارق قاله له: تصدق ان سافل وقليل الادب
محمد قاله: يعني حتنزل تقابلني من الاخر ولا حترغي كتير؟ حدد المكان والزمان.. قام طارق قاله: طب انا بقى مش حارد عليك.. وراح قافل السكة
:D
بعدين راح كلم عبير معدة البرنامج وقالها انت ازاي تدي نمرتي لجوز نوارة؟ قالت له ما ادتش نمرتك لحد، قعد يا عيني يشتمها وهي مالهاش ذنب، قالت له انا مش حارد عليك لاني مقدرة حالة الراجل لما واحدة ست تضربه بالجزمة بتبقى صعبة عليه.. فقعد يشتمها تاني وقال لها انا طارق نور صاحبي وحاكلمه واخرب بيتك.. قالت له الارزاق على الله انا صحفية وعضوة نقابة وكرامتي فوق كل حاجة مش من حقك تكلمني وتهيني وكمان تهددني
قعد يشتمها برضه
هو طبيعي الكائن ده؟
المهم انه مش عايز الحلقة تتذاع وبيقولها اجي بكرة نكمل الحلقة من غيرها
هم بيستضيفوه ليه بقى؟
اه.. الوطن نزلت الخبر.. للدرجة دي الراجل ده محبوب؟

27 comments:

nonaia magnonaia said...

ههههههههههههه
واحنا كمان قايمين بالواجب يا ذات الرداء البيج :)
رااااجل من ضهر راجل

المهم اني قريت الخبر وانا بتفرج على فيلم " الفاجومي "

يعيش اهل بلدي ..

ammar salama said...

تسلم ايدك

Mohamed Eix said...

أديله على قفه أمه.... أحبك و انتي شريرة يا نوارة xD

Mohamed Eix said...

أديله على قفه أمه....أحبك و انتي شريرة يا نوارة xD

Amr Rashwan said...

Well-done.

Amr Rashwan said...

Well-done.

AmrShark said...

بعد كده تشتري جزمة 3 فرد علشان العالم دي

عاش يا بنت الأكرمين تعيشي وتدوبي على وشهم وقفاهم

AmrShark said...

بعد كده إشتري الجزم 3 فرد

تعيشي وتدوبي على وشهم وقفاهم يا بنت الأكرمين

GMA said...

طوني خليفه تكون امه داعياله لو كانت الكاميرا شغاله اثناء الاشتباك .
لو تعرفي تجيبي اللقطه دي يو تيوب حتولع
الامانه العلميه تقتضي سؤالك : انتي مقاس جزمتك كام ؟

وبعدين هما عايزين حد تاني يكمل البرنامج ليه ؟ بوش اترمت عليه الجزمه وخلص مدته عادي

أبو عفان said...

طول عمرى أقول عليكى راجل من ضهر راجل . تسلم أيديكى و تسلم جزمتك . و ياريتك تتنازلى و ترجعى للطرحة البيج و لو على سبيل التنكر ؛ علشان ما يجيش واد فلول ابن مرة وسخة زى ده يلسن على لبسك

ibrahim sharbini said...

تسلم ايدك ....احتفظي بالجزمه ممكن تعملي عليها مزاد في يوم من الايام

Mohamed Hassanien said...

لووووووول. جدعه طول عمرك يا نوارة يا بنت نجم واتجوزتي جدع. الكائنات الغريبة دي لازم يتعاملوا معاها بالجزمة والاحسن بالشبشب. يا ريت يذيعو الحلقه عشان يتعرف شكلو. والدنيا صغيرة.

Hesham Mehrem said...

أحيانا لا يكون هناك حل لهؤلاء السفلة إلا الضرب بالجزمة

مش فاهمه said...

انتى الغلطانه حد يروح برنامج لطونى خليفه بجد و الله الأشكال الوسخة دى عايزه جنازة و تشبع فيها لطم و متهيالى هو كان عارف سير البرنامج حايمشى ازاى ....ارجع واقول انتى الغلطانه

مش فاهمه said...

انتى الغلطانه حد يروح برنامج لطونى خليفه بجد و الله الأشكال الوسخة دى عايزه جنازة و تشبع فيها لطم و متهيالى هو كان عارف سير البرنامج حايمشى ازاى ....ارجع واقول انتى الغلطانه

nabil said...

تسلم الإيد اللي حدفت و الجزمة اللي لبست في وش الخنزير ده

الجزمة دي تتحط في متحف

Ehab Hassouna said...

طول عمرك جدعة يا نوارة. .. ولو محمد عرف طريقه. .. قولي لنا واحنا ننزل نظبطه معاه. .. وكله بالشرع

inmh said...

@nawaranegm
i have problems in student union please i need your help
email:engislamnazir@gmail.com

inmh said...

@nawaranegm
i have problems in student union please i need your help
email:engislamnazir@gmail.com

Ismail Abdelhamid said...

تصدقي وتآمني لالله, قولي لا اله الا الله, انا اول مرة اسمع الاسم ده, صحيح باسمع عن اولاد مبارك.. وبادعي لهم ربنا يشفيهم, لكن اسمه ايه ده عمري ما سمعت اسمه غير في مدونتك, عموما اديكي عرفتي آخرة اللعب مع الولاد اللي ابوهم ما ربهمش , يارب تتعلمي وتبطلي لعب مع ولاد ...

محمد نور الدين said...

محمد قاله: يعني حتنزل تقابلني من الاخر ولا حترغي كتير؟ حدد المكان والزمان

يعني من الآن فصاعدا نبطل مجاملة يعني من من الآن مافيهش النوارة ولا ست الكل ولا نوارة مصرو
العرب ولا أيقونة الثورة
ويبدو أيضا لا بد من التقليل من
التعليقات على مقالات التحرير

محمد said...

رغم انى من أشد معارضيكى..بس فى الموقف ده بجد برافو عليكى وتسلم ايدك

فافى said...

ههههههههههههههههههههههههههههههههه هههه انا كمان بغمزلك بس بقولك عجبنى التحديث لا صايعه يا نوارة ههههههههههههههههه
ده هو اللى هايتظبط بعد التحديث ده من معجبينك يا باشا

Sara said...

جدعة يا نوارة :)

أيـمَـن said...

ينصر دين أبوكى

tarek momen said...

قوم اذا صفعت النعال وجوههم
شكت النعال بأي ذنب تصفع

white ghost said...

نوووووارة نجم انتى شيعيه صح ؟