Monday, 15 October 2012

لولا عيب الندم على الخير كنت اتندمت على وقفتي جنبكوا يا حازمون

تحديث:
يعني طلع معايا حق اهو والجبهة السلفية ما بتضعش في ودن اخوها متشكرين
متشكرين يا رجالة، يا محترمين، يا حقانيين، يا جدعان، يا اللي عندكوا اخلاق، اللي عندكوا عدل وانصاف.. ياللي بتخافوا من ربنا وبتشهدوا بالحق ولو على أنفسكم أو الاقربين
اخصصصصصصصصصصصصصصصصصصصصصصصص.. وانا اللي كنت فاكرة الدم حيعلمكوا.. طول عمري هابلة
-----------
الا احنا انضربنا في يوم 12 اكتوبر بالطوب والبراشوتات والخرطوش من الاخوان اللي باعوا حازمون وساعة ما كانوا بينضربوا في العباسية طلعوا الاخوان يقولوا ماحدش يعرف مين دول ولا حتى الشيخ حازم يعرفهم وما شوفناش حازمون قالوا لنا حتى حمد الله على سلامتكوا ياللي نزلتوا تنضربوا معانا وقت ما مشايخنا باعونا
قمت سائلة عليهم على التويتر
لقيت اللي بيقول لي اصل احنا مش شايفين سبب للنزول وراضيين عن التأسيسية، وواحد بيقول لي اصل الضرب كان متبادل ودي فتنة وقلنا نتجنبها
!!!!!!!!!!!!!!!!!!!!!!!!!!!!!!!!!!!
فيه مثل مصري بيقول: الكلب ما يعضش في ودن اخوه
ولولا ان الخير بيتعمل لله وما ينفعش الواحد يندم عليه كنت ندمت على وقفتي جنبكوا.. يا رجالة، يا محترمين، يا جدعان... ياللي واحدة ست نزلت تنضرب معاكوا من البلطجية والجيش وما قالتش ان الضرب متبادل بينكوا وبين اهالي العباسية زي ما الناس كانت بتقول عليكوا، وما قالتش ان معاكوا سلاح وانكوا ضربتوا الجيش زي ما الناس بتقول عليكوا، وما قالتش مين دول احنا ما نعرفهمش، وما قالتش دي فتنة بين السلفيين واهالي العباسية والسلفيين والجيش ويجب تجنبها... اللي قال كل اللي فات ده كان الاخوان بالمناسبة
انا واحدة ست.. نزلت
وكنتوا محتاجيني ومحتاجين اللي زيي من ستة ابريل ومن الاولتراس ومن الحركات المدنية، اللي كانت واقفة في محمد محمود واتباعت من الاخوان، ووقفت معاكوا وهي مش مقتنعة اصلا بمطالبكوا، احنا وانتوا عارفين ان حازم امه امريكية، وماحدش من القوى المدنية اللي نزلوا لكوا في العباسية كانوا مقتنعين بمطالبكوا، بس كنا نازلين نحميكوا
عشان ماحدش يقول دول السلفيين الارهابيين ويستفرد بيكوا ويخلص عليكوا
وعشان ندافع عن حقكوا في التظاهر والاعتصام في اي مكان وباي مطلب لان ده حقكوا
ومات ناس من الاولتراس ومن ستة ابريل وانا اتصابت في رجلي واحنا بندافع عن حقكوا في الاعتصام، وبنحميكوا من ان حد يستفرد بيكوا ويقول دول السلفيين الارهابيين
طب الناس اللي بلطجية ولا اهالي دول لما جم يضربوكوا ضربتوهم، وفيه منهم ناس ماتت... لان الطبيعي ان لما حد يبتدي الاعتداء عليك بترد عليه ويبقى اللوم على اللي اعتدى عليك.. ما قلتش ليه ان الضرب متبادل ودي فتنة ونتجنبها؟
عشان انا ارجل منكوا
هو ايه وجه اللبس في اللي حصل يوم 12 اكتوبر؟
ناس قالت انها نازلة يوم 12 اكتوبر لكشف حساب قام الاخوان قرروا ينزلوا يبوظوها لهم وراحوا هدوا لهم المنصة عشان بيهتفوا ضد مرسي ودي بداية العدوان على المتظاهرين
طبيعي يبقى الضرب متبادل، امال يعني حيضربونا ونسكت لهم؟ وانتوا لما بتوع العباسية ضربوكوا ما سكتوش ليه؟ 
الناس اللي انضربت يوم 12 اكتوبر في الميدان دي هي اللي نزلت عملت لكوا غطاء مدني عشان ماحدش يتهمكوا بالارهاب ويستحل دمكوا.. والاخوان هم اللي اعتدوا عليهم ومافيش لبس في اللي حصل
كل الحكاية انكوا مش رجالة كفاية عشان حتى تقولوا لنا: حمد الله على سلامتكوا تتقطع الايد اللي تتمد عليكوا
يالا حنقول ايه... ربنا يسلطهم عليكوا ان شاء الله، هم دول بيبقوا على حد؟ بكرة يشأمظوكوا
وابقوا تفوا في وشي لو نزلت احميكوا تاني

6 comments:

مواطن مصري said...

كلهم ولاد وسخة يا نوارة مفيش حد جدع الجدعان ماتت في الثورة

hayat ank said...

تعرفى بعد كده تقولى لازم نعمل باصلنا معرفش بقى الناس هتعمل فيكى ايييييييه مشيتى تقولى الاخوان ماعندهاش مليشيات وحازمون كويسين وصوتهم من دماغهم

hayat ank said...

بطلى بقى تعدى تبكتى فينا وتنزلينا احنا الى بننضرب ونتحبس كل مره وهم الى بيقسموا التورته لما بيبقوا ع المحك كل واحد بيروح للى شبهه بغض النظر عن اى مواقف الجيش بينحاز للنظام والاخوان بيسترجعوا تاريخهم المهبب فى العنف المسلح والسلفيين بيروحوا عند ولاد عمهم الاخوان

شريف فراج said...

بص مفروض انى من السلفية الجهادية ومن الناس اللى كانت في العباسية انا بقول ليكى احنا على صفحنا على الفيس بوك مش رحمين الاخوان لانه مش هستبدل ظلم بظلم ومن حق اى حد يخرج على الظلم والحسين خرج على ظلم يزيد ومافي حد يحتكر الدين ويتاجر بيه ومدام مرسي بيعرف يرجع فى كلمه حتى قدام عكاشة يبقى يرجع ويقول هو او منثل جماعته انهم على خطئ وخلى بالك فما شىء يجوز ضرب الاخوان للقوة المدنية حتى لو اختلفوا شكرا نوارة الثورة

مش فاهمه said...
This comment has been removed by the author.
مش فاهمه said...

نوارة ...لما يبقى نزول توفيق عكاشه و مرتضى منصور الميدان بديلا عن حازمون و الأخوان يبقى فيه حاجه غلط ارجوكى يا نوارة انتى فيكى خير كتير لازم نرتب اولوياتنا ارجوكى .....افتكرى انتى غلطتى فى حبك للعسكر و موقفك من 8 ابريل واعتذرتى جايز مانقدرش نعتذر تانى لما تلاقى نفسك واقف فى نفس الخندق مع الزند و عكاشه و مرتضى و الجبالى اعرفى ان فيه حاجه غلط