المهم يا سيدي لما أنت 2

بخلاف ان اليومين دول عندي دربكة.. قلت ان الكتابة عن ايام الثورة مؤلمة وبتعورني

بس امبارح فيه واحد، واحد مهم قوي، ويمكن يكون اعلم واهم انسان قابلته في حياتي، ولذلك حاحتفظ باسمه لنفسي لاني مرازية ناس كتير وما احبش ان انسان بالقامة والقدر ده حد يغلط فيه نكاية فيا.. يشتموني انا، بس هو له افضال عليا وعلى غيري وهو مقامه وعلمه ما يكونش جزاءه اني اجيب له الشتيمة عشان الجراير اللي في ديلي

الانسان ده قال لي: المرحلة الراهنة هي اخطر مرحلة في سرقة الثورات لان السارق دلوقت مراهن على اليأس

على يأسنا احنا يعني.. مراهن على انك حتقول يالا تخرب تعمر اشوف انا نفسي، يالا في داهية ده شعب ابن ستين في سبعين عملنا له ده كله وراح جايب لنا ترولز 

trolls 

وممسكها الحكم وكمان بيشتمنا وماشي ورا زواحف خارجين من البلاعة يقولوا له حنوديك الجنة وهم ولا باين عليهم لا جنة ولا رضا ووشهم كله عليه غضب ربنا كأنه شعب اعمى مش شايف الشيطان المرسوم على وشوشهم.. مش دي بلدكوا؟ خدوها مش عايزينها ويعوض علينا ربنا في اللي دفعناه وفي تعبنا وشقانا، نشوف نفسنا شوية

وكمان قال لي اننا كلنا بنغلط غلطة اننا بنحكم على اللحظة الراهنة والاحداث والتفاصيل بوصفها اول الدنيا واخرها، وضرب لي مثل بالعبودية، كلنا ضد الاستعباد والعبودية، بس لو ما كانش فيه عبودية من الاساس ما كانش اوباما الكيني اللي جده مسلم وهو اسمر البشرة بقى رئيس اكبر قوة في العالم، وده مش معناه باننا كنا نرضى بالعبودية لان لو كانوا رضيوا بالعبودية ما كانش اوباما بقى رئيس برضه وكان زمانه عبد لحد دلوقت، بقول آخر، كله مقدرات، وعلى رأيه: مافيش حد بيعمل حاجة من ورا ربنا.. ولا حتى اللي بيعصاه بيعصاه من وراه، مافيش حاجة عكس ارادته، وكلها مقدرات، احنا مخلوقين لتنفيذ مقدرات معينة وغيرنا مخلوق لتنفيذ مقدرات تانية وكل ده بيطبخ في الدنيا عشان يطلع نتيجة تالتة خالص 

ومن مقدرات الله انه قال لي الكلام ده امبارح ولو تفتكروا انا كنت كاتبة امبارح: كل اللي يهمني ازور الاوليا وشوية كده بقى افكر في نفسي.. على ما الواحد ينسى ان مصر قلت باصلها معاه

اصل مصر دي مش اي بلد.. اه وربنا

معلش انا حاستشهد بكلام الانسان اللي بكلمكوا عنه ومش حاقول اسمه فحاسميه اسم حركي: الحكيم

الحكيم قال لي ان تسويق كلمة الوطن واعلاؤه على قيمة الانسان دي الغرض منها السيطرة على البشر واستعبادهم، مافيش حاجة اسمها الوطن فوق الانسان.. الانسان فوق الكل، الكون ده كله معمول عشان الانسان، مش ممكن اللي في السلطة يكنزوا الدهب والفضة ويقولوا للغلابة الوطن الوطن ويخلوهم يموتوا عشان هم يكنزوا ويحصلوا امجاد ويبقوا ابطال الحرب والسلام، مش معنى كده ان الانسان ما يموتش عشان قيمة، بس القيمة الوحيدة اللي الانسان لازم يموت عشانها هي قيمة الكرامة الانسانية.. الانسان هو الوحيد اللي يستاهل الانسان يموت عشانه

بس برضه مصر بالنسبة لي مش اي وطن ولا اي بلد.. اصلها تعب السنين، تعب سنين من ساعة ما كنت في بطن امي وهي في السجن وابويا في السجن، تعب السنين من ساعة ما اتفطمت قهرا عشان امي اتقبض عليها وهي بترضعني، تعب السنين من ساعة ما اتحرمت من ابويا وانا لسه بابثبث في الكلام، تعب السنين من ساعة ما كنت بانزل مظاهرات واحضر مؤتمرات وانا في سن المفروض اروح فيه الملاهي.. تصدقوا عمري ما رحت الملاهي ابدا في حياتي؟ والله... بس رحت ملاهي تانية فيها ضرب وعصيان... من وانا حلوة صغنونة كده... كان عندي واحدة صاحبتي مربية ابن اخوها، دخل يعمل عملية اللوز وهو عنده تسع سنين باقولها بتعيطي ليه دي عملية لوز، قالت لي: ده تعب تسع سنين مش عملية لوز

اهو انا مصر دي بالنسبة لي زي ابني اللي جاي بعد شوقة وكان بيعيا كتير وهو صغير وتعبت فيه ودورت بيه على الدكاترة

بس انا بالنسبة لي الوطن مش الارض والبتاع وكده، الوطن هو الناس اللي فيه، البني ادمين يعني

فانا مهما اتخنقت منهم واتغاظت منهم وحسيت انهم بيلسعوني على قفايا وان فيهم قسوة وبعض غباوة وشوية شر ومخ متربس، وظلم، خصوصا لما يحبوا يعملوا متدينين... لازم المتدين يظلم، ضروري يعني، ولازم هو بيظلم يبقى حاسس انه بيخدم ربنا

مهما كان من ده كله.. انا ما اقدرش اسقع دماغي.. ده تعب السنين، حيروح كده؟ انا لازم احاول لاخر لحظة

العيب بقى في الخوف على تعب السنين انه بيخليك تتعب زيادة تعب سنين تانيين جايين عشان تحافظ او تحمي او تلحق تعب السنين اللي فاتت

هييييه... لقد خلقنا الانسان في كبد

فانا بقى قلت لازم الحق نفسي في الفترة دي، ربنا قال لي على لسان الحكيم ان دي اخطر مرحلة في سرقة الثورات اللي مراهنة على اليأس

فانا مش لازم ايأس.. لا مش يالا في داهية.. والشعب ابن ستين في سبعين بس ما يتفلقش.. ناسي يتفلقوا ازاي يعني؟ واذا هم يتفلقوا التعب اللي تعبته ما يتفلقش

وانت كمان.. التعب اللي انت تعبته والعين اللي راحت والرجل اللي اتشلت والنوم اللي طار والصاحب اللي ساب مكانه فاضي وشبابك اللي قضيته في زنزانة... ما ينفعش يروح كده

امسك في تعبك بايديك وسنانك... شقاك.. انت لاقيه في الارض؟

همّ.. حناخد تعبنا من بق السبع