Friday 5 October 2012

المهم يا سيدي لما أنت 2

بخلاف ان اليومين دول عندي دربكة.. قلت ان الكتابة عن ايام الثورة مؤلمة وبتعورني
بس امبارح فيه واحد، واحد مهم قوي، ويمكن يكون اعلم واهم انسان قابلته في حياتي، ولذلك حاحتفظ باسمه لنفسي لاني مرازية ناس كتير وما احبش ان انسان بالقامة والقدر ده حد يغلط فيه نكاية فيا.. يشتموني انا، بس هو له افضال عليا وعلى غيري وهو مقامه وعلمه ما يكونش جزاءه اني اجيب له الشتيمة عشان الجراير اللي في ديلي
الانسان ده قال لي: المرحلة الراهنة هي اخطر مرحلة في سرقة الثورات لان السارق دلوقت مراهن على اليأس
على يأسنا احنا يعني.. مراهن على انك حتقول يالا تخرب تعمر اشوف انا نفسي، يالا في داهية ده شعب ابن ستين في سبعين عملنا له ده كله وراح جايب لنا ترولز 
trolls 
وممسكها الحكم وكمان بيشتمنا وماشي ورا زواحف خارجين من البلاعة يقولوا له حنوديك الجنة وهم ولا باين عليهم لا جنة ولا رضا ووشهم كله عليه غضب ربنا كأنه شعب اعمى مش شايف الشيطان المرسوم على وشوشهم.. مش دي بلدكوا؟ خدوها مش عايزينها ويعوض علينا ربنا في اللي دفعناه وفي تعبنا وشقانا، نشوف نفسنا شوية
وكمان قال لي اننا كلنا بنغلط غلطة اننا بنحكم على اللحظة الراهنة والاحداث والتفاصيل بوصفها اول الدنيا واخرها، وضرب لي مثل بالعبودية، كلنا ضد الاستعباد والعبودية، بس لو ما كانش فيه عبودية من الاساس ما كانش اوباما الكيني اللي جده مسلم وهو اسمر البشرة بقى رئيس اكبر قوة في العالم، وده مش معناه باننا كنا نرضى بالعبودية لان لو كانوا رضيوا بالعبودية ما كانش اوباما بقى رئيس برضه وكان زمانه عبد لحد دلوقت، بقول آخر، كله مقدرات، وعلى رأيه: مافيش حد بيعمل حاجة من ورا ربنا.. ولا حتى اللي بيعصاه بيعصاه من وراه، مافيش حاجة عكس ارادته، وكلها مقدرات، احنا مخلوقين لتنفيذ مقدرات معينة وغيرنا مخلوق لتنفيذ مقدرات تانية وكل ده بيطبخ في الدنيا عشان يطلع نتيجة تالتة خالص 
ومن مقدرات الله انه قال لي الكلام ده امبارح ولو تفتكروا انا كنت كاتبة امبارح: كل اللي يهمني ازور الاوليا وشوية كده بقى افكر في نفسي.. على ما الواحد ينسى ان مصر قلت باصلها معاه
اصل مصر دي مش اي بلد.. اه وربنا
معلش انا حاستشهد بكلام الانسان اللي بكلمكوا عنه ومش حاقول اسمه فحاسميه اسم حركي: الحكيم
الحكيم قال لي ان تسويق كلمة الوطن واعلاؤه على قيمة الانسان دي الغرض منها السيطرة على البشر واستعبادهم، مافيش حاجة اسمها الوطن فوق الانسان.. الانسان فوق الكل، الكون ده كله معمول عشان الانسان، مش ممكن اللي في السلطة يكنزوا الدهب والفضة ويقولوا للغلابة الوطن الوطن ويخلوهم يموتوا عشان هم يكنزوا ويحصلوا امجاد ويبقوا ابطال الحرب والسلام، مش معنى كده ان الانسان ما يموتش عشان قيمة، بس القيمة الوحيدة اللي الانسان لازم يموت عشانها هي قيمة الكرامة الانسانية.. الانسان هو الوحيد اللي يستاهل الانسان يموت عشانه
بس برضه مصر بالنسبة لي مش اي وطن ولا اي بلد.. اصلها تعب السنين، تعب سنين من ساعة ما كنت في بطن امي وهي في السجن وابويا في السجن، تعب السنين من ساعة ما اتفطمت قهرا عشان امي اتقبض عليها وهي بترضعني، تعب السنين من ساعة ما اتحرمت من ابويا وانا لسه بابثبث في الكلام، تعب السنين من ساعة ما كنت بانزل مظاهرات واحضر مؤتمرات وانا في سن المفروض اروح فيه الملاهي.. تصدقوا عمري ما رحت الملاهي ابدا في حياتي؟ والله... بس رحت ملاهي تانية فيها ضرب وعصيان... من وانا حلوة صغنونة كده... كان عندي واحدة صاحبتي مربية ابن اخوها، دخل يعمل عملية اللوز وهو عنده تسع سنين باقولها بتعيطي ليه دي عملية لوز، قالت لي: ده تعب تسع سنين مش عملية لوز
اهو انا مصر دي بالنسبة لي زي ابني اللي جاي بعد شوقة وكان بيعيا كتير وهو صغير وتعبت فيه ودورت بيه على الدكاترة
بس انا بالنسبة لي الوطن مش الارض والبتاع وكده، الوطن هو الناس اللي فيه، البني ادمين يعني
فانا مهما اتخنقت منهم واتغاظت منهم وحسيت انهم بيلسعوني على قفايا وان فيهم قسوة وبعض غباوة وشوية شر ومخ متربس، وظلم، خصوصا لما يحبوا يعملوا متدينين... لازم المتدين يظلم، ضروري يعني، ولازم هو بيظلم يبقى حاسس انه بيخدم ربنا
مهما كان من ده كله.. انا ما اقدرش اسقع دماغي.. ده تعب السنين، حيروح كده؟ انا لازم احاول لاخر لحظة
العيب بقى في الخوف على تعب السنين انه بيخليك تتعب زيادة تعب سنين تانيين جايين عشان تحافظ او تحمي او تلحق تعب السنين اللي فاتت
هييييه... لقد خلقنا الانسان في كبد
فانا بقى قلت لازم الحق نفسي في الفترة دي، ربنا قال لي على لسان الحكيم ان دي اخطر مرحلة في سرقة الثورات اللي مراهنة على اليأس
فانا مش لازم ايأس.. لا مش يالا في داهية.. والشعب ابن ستين في سبعين بس ما يتفلقش.. ناسي يتفلقوا ازاي يعني؟ واذا هم يتفلقوا التعب اللي تعبته ما يتفلقش
وانت كمان.. التعب اللي انت تعبته والعين اللي راحت والرجل اللي اتشلت والنوم اللي طار والصاحب اللي ساب مكانه فاضي وشبابك اللي قضيته في زنزانة... ما ينفعش يروح كده
امسك في تعبك بايديك وسنانك... شقاك.. انت لاقيه في الارض؟
همّ.. حناخد تعبنا من بق السبع

13 comments:

حياة الظل said...

من اجمل ما قراءة في حياتي (الحكيم قال لي ان تسويق كلمة الوطن واعلاؤه على قيمة الانسان دي الغرض منها السيطرة على البشر واستعبادهم، مافيش حاجة اسمها الوطن فوق الانسان.. الانسان فوق الكل، الكون ده كله معمول عشان الانسان، )الراجل ده ربنا رزقة احسن ميراث ومن اشرف الناس التدوينة بتاعتك ده قال كلام كتير كان في بالي ومش قادر اعبر عنه انا عن نفسي حسيت براحة بعد ما قريت الكلام ده كانه شال من حملي شوية ان في ناس تانية بتفكر بموضوع كنت فاكر نفسي انا الوحيد الي بفكر فيه

mido said...

لما بتتكلمي في الجانب الانساني يحس بذهول من جمال احساسك باللي بتقوليه على عكس لما تتكلمي في السياسية وخاصة تحليل الحدث . بحس انك مفتعلة وعصبية "مقالات التحرير مثلا" .
بالمناسبة هو انت حتفضلي ساكتة على عيسى كده لحد امتى؟ اقري مقاله عن تكريم مبارك !

HARENHOP said...

شكرا"لعدم ذكرك إسمي،ولكنني لاأستأهل كل هذا المديح يامديحة!!!!عايز أسألك سؤال واحد بس:إنتي ليه ماكنتيش بتردي علي تويتاتي ولامرة؟!؟مع إني كنت بتابعك باهتمام جامد ومدلعك ف المنشنة وكده؟؟!!ماعلينا المهم إن الكلام إللي إنتي كتباه حلو بس إنتي ناسية حاجة مهمة،إن تقريبا"نص الشعب مانتخبش مرسي ولا بيحب الإخوان،يعني مش من السهل حد يسرقه بعد مافاق من الصدمة إللي عاش فيها أكتر من 40سنة!!!

Unknown said...

harenhop

ايه الكدب ده؟ هههههههههههه مش انت اللي انا اقصده

هو انت مين بقى؟

Unknown said...

لا يسرق شعب ولا تسرق ثورة فيها قلوب امثالك انت والراجل ابو حمالات, بارك الله فيكم وفي امثالكم

Unknown said...

http://t.co/nSgf4evo

عين فى الجنة said...

الحقيقة ما يحتاج الى توثيق ومجهود من من يملكون ضمير يذكرهم دائما بقول الحق ولا شيء الا الحق هو السنتين تلاته اللى قبل الثورة
ولما اقول توثيق فانا اعنى الكلمة وما تحمل من معان متعارف عليها علميا
ثم وقبل كل شيء مبروك الزواج

متفائل said...

همّ حناخد تعبنا من بق السبع ... إزاي يعني ؟ وبأي حق ؟ ماهو أصل (السبع) ده جه عبر (صناديق الإنتخابات الحرة) تلك الصناديق التي إكتسبت (حريتها) من قزايز الزيت وأمتار الدمور والإتجار بالدين وكافر اللي يقول لأ ومؤمن اللي يقول آه .. إلخ .. ولو عملتي ثورة فوق الثورة وفوق الإثنين ثورة تالتة برضة في النهاية حتصفي الأمور على صندوق الإنتخابات الحرة إياه بكل حبشتكناته ومشتملاته وتبصي تلاقي إن اللي عملتي عليهم ثورة دول هما اللي جم برضة .. وهكذا في دورة عبثية سيزيفية لا تنتهي

nosseir said...

حتى انتى يا نوارة بترددى كلام الناس الوسخة بتوع النظام السابق عن ان الشعب اساء الاختيار وجاب ناس بتضحك علية وتقولة انتخبنا وهتخش الجنة؟...هل احنا شعب اهبل للدرجة دة عشان ترددى نفس كلام العالم الوسخة دة؟...انا واحد اخترت مرسى واخترت قبلة الاخوان فى الانتخابات البرلمانية وناوى اختارهم كمان الانتخابات الجاية لانهم فى نظرى ائمن ناس اقدر ائتمنهم على الثورة....ولا عيزانى انتخب الاحزاب الكرتون اللى كانت واجة لتزيين نظام مبارك واولهم حزب الوفد..ولا انتخب البرادعى اللى هرب من المواجة فى الانتخابات الرئاسية؟..ولا انتخب صباحى اللى خزل مصر كلها بوقوفة موقف مخزى فى جولة الاعادة وكان ممكن شفيق يوصل وتضيع الثورة او على الاقل كان هيبقى فى بحور دم تانى....انا مش مضحوك عليا وانا بنتخب الاخوان...انا فى كامل وعى وعن قناعة بنتخبهم ...رغم انى للاسف مش مش متدين اصلا وربنا يهدينا....وينور بصيرتنا كلنا عشان نعرف نختار وما ينضحكش علينا من اعلام فلول مبارك اللى مسيطر الان على الاعلام الخاص

AMOON said...

نوارة حمد اللة ع السلامة ومبروك جوازك واكيد هباركلك لما ربنا يرزقك بكتاكيت يملوا عليكي الدنيا المهم بقي ياستي مش عقولك اد اية بحب ازلوبك البزيط واكيد تهكماتك و شخرياتك بس بقي يا نوارة بما ان لكل وقت ادان واكيد بعد مااتجوزتي مش قبل ما كنتي عزباء وقريبا ان شاء اللة هتكوني ماما هي دي بقي مربط الفرس باختصار يانوارة وهتعرفي دة بعدين متحبيش تشوفي حمادة بيتداول الالفاظ مش عاوز اقول البيئة اكيد كل الامهات تحب تشوف اولادها احمدزويل ولا اية يعني نتراقي بقي ونرتقي عشان حمادة يكبر ميع فش الكخ ولا اليع ربنا يوققك

احمد أبو العلا said...

أختى نوارة
مبروك زواجك واحييك وسلامى لماما

Unknown said...

دا أستاذ جلال أمين
بس البوست دا فكرني بالعيال اللجان بتوع قبل الثورة
ياترى أراضيهم فين
كان في واحد اسمه لورانس العرب لابد هنا
محدش شافه؟؟

Carfus said...

رجل و الرجال قليل
سيارات للبيع