زي ما مننا بيتسجنوا منهم بيتسجنوا
بس فيه حد احسن من حد
حد بيتسجن عشان بيحب البلد دي
وحد بيتسجن عشان ابن عاق ليها
لاول مرة في تاريخ الشرطة ظابط شرطة يتسجن بجناية
تلات سنين بتهمة تعذيب مواطن غلبان
اسلام نبيه ورضا فتحي اخدوا تلات سنين سجن وفقا للمادة
107
والزامهم بالتعويض والزامهم بمصاريف القضية
وده معناه ان اسلام ورضا طلعوا من الشرطة
مبروك يا بلدي
ووحياة عيونك الحلوة اللي جابت لحمها من العياط
لنجيب لك كل اللي بكوكي تحت رجليكي ونوريكي دموعك غالية علينا قد ايه
الحضور الاعلامي كان مكثف جدا
اما المدونين فمتقدرش تقول مين حضر
تقدر تقول مين ما حضرش
تلاتة
مينا لانه كان خايف
محمد الشرقاوي بيقول انه اتعطل في المرور بس انا
عارفة انه كان خايف يسمع كلمة براءة زي مينا
ووائل عباس لانه مسافر
طبعا العيال جم من الساعة تسعة الصبح لاني كنت عاملة الدعوة
الساعة تسعة على اساس انهم يصحوا تسعة وتجربتي
بتقول ان فيه ناس لما اقول لهم تسعة ح يجوا حداشر
بس البنات الامامير الملتزمات جم تسعة وقعدوا من تسعة لحداشر يدعوا عليا
الجلسة اتأخرت عن حداشر لان عربية الترحيلات اللي جايبة اسلام
اتأخرت احمد الجيزاوي قعد يقر وينبر ويسودها في وشي:
طبعا الحكم ح يبقى لصالح اسلام طيب لو ده حصل عايزين نحضر هتاف
- لا ان شاء الله مش ح يبقى لصالحه
- يابنتي ح يبقى لصالحه ده ابن مدير امن والواد
عماد طلعوه سوابق والقاضي ح يصعب عليه اسلام
عشان التأجيل الكتير اكيد اقصى حاجة ح ياخد ايقاف تنفيذ
- امشي من وشي يا احمد
- طيب ح نهتف نقول ايه
- امشي من وشي يا احمد انا مش باعرف اهتف
- ممكن نقول حسبنا الله ونعم الوكيل
- امشي من وشي يا احمد يا جدعان حد يشيله ده
الشرطة كانت حايسة في توضيب القاعة وقعدت تكركب في الصحفيين
بثينة كامل جات وجايبة معاها مصورين
وادي تحضيرات القاعة
كان زارر عليا العياط وعمالة امسك نفسي وحاسة ان كلي بيترعش
والد اسلام دخل وكان بيقرا قرآن بس انا ما صورتوش
لان انسانيا دي حاجة مش محترمة مني لو عملت كده
وارجو ان ماحدش من اللي بيعلقوا يغلط في والد اسلام لان ده ابوه
وخلاص اسلام اخد جزاءه ومش مطلوب ولا مفترض من والده
انه ما يقفش جنب ابنه حتى لو ابنه اسلام نبيه
وبعدين دخل الاستاذ جميل سعيد وسلم عليا وقال لي مافيش شتيمة تاني بقى
عيب...حمد الله على سلامة بابا
والله صعب عليا
:)
وبعدين دخل الأستاذ ناصر امين وعماد
وضبونا وسنجفونا عشان المحكمة تعقد وكانت مهمة صعبة
لان الاعلاميين لو كانت المحكمة بتوزع فراخ ببلاش من غير انفلونزا
ما كانوش ح يبقوا بالعدد ده
وبعدين....محكمةااااااااا
وادي الحكم
الصوت مش واضح قوي لاننا كنا بعيد
طبعا انا قعدت اعيط وازغرد وانا مش باعرف ازغرد
طلعت صويت وتامر حنتكلم افتكر اني وقعت او حد ضربني
جاني لقاني قصدي ازغرد وانا وبثينة عمالين نقول يحيا العدل
اما مريم من ابناء مصر قعدت تسقف وتصوت كأنها في حفلة عمرو دياب
فيه واحدة صوتت الظاهر حد داس عليها من الصحفيين
ح تسمعوا صوتها في الاخر دي مش انا
انا ومريم اللي صويتنا في الاول بس والله كان قصدي ازغرد
الاعمال بالنيات بقى
عماد بقى فهو اللي بكاني وفرحته يا حبيبي
قعد يقول الحمد لله الحمد لله الله أكبر الله أكبر الناس عرفت اني ليا حق
!!!!!!!!!!!
اهو في الفيديو ده
واحدة بقى في وسط كل ده شايلة عيل وغلبانة
قالت لي انت كنت بتعيطي ليه
قلت لها عشان فرحانة ان اسلام اخد تلات سنين
قالت لي: طب مش حرام عليكي؟ والبنات دولم بتوع الجامعة
- قصدها على المدونات -
كانوا بيزغردوا؟ وللا هو عشان سواق ميكروباظ غلبان؟
يعني سواق الميكروباظ ده لو كان اخوكي كنت ترضي يتهان كده
وبهدلة كرامة وفي الاخر اللي عمل فيه كده ياخد تلات سنين بس؟
قعدت احاول اقنعها اننا كنا خايفين يطلع براءة
بس هي ما اقتنعتش: كل البهدلة دي وتلات سنين بس؟
بس عماد كان راضي وقال الحمد لله انهم عرفوا ان ليا حق
والاستاذ ناصر امين شايف ان ده الاول من نوعه
وكان الاستاذ جميل سعيد قال ان القاضي تعامل مع اسلام
على انه جنحة مش جناية
بس ناصر امين بيقول انه اداله الحد الادنى في الحكم في الجنايات
جميل سعيد طبعا كان متضايق
القضية خلصت بسابقة جديدة وخطوة ايجابية
عقبالك يا قنديل انت وابو المكاره وابو سحلة
===
ملحوظة: انا باشكر الاستاذ ناصر امين على مجاملته للمدونين
والحقيقة انا مش ح اشكره ولا ح اشكر المدونين ولا الصحفيين
على اننا عملنا واجبنا واقل من واجبنا ومافيش اي حد يستاهل
الشكر خااااااالص لحد ما نوصل للي احنا عايزينه الا وهو
ان الانسان المصري انسان وله كرامة ومن حقه لما يدخل القسم
بشرفه وكرامته يخرج بيهم زي ما هم من غير مساس
وان الظابط المصري يفهم انه مصري وانه بيخدمنا احنا اللي بندفع
له مرتبه من ضرايبنا وانه انسان مش كلب مسعور يطلقه علينا
اعداءنا واعداءه وانه منا واحنا منه
لحد ما ده يحصل مش من حقنا نفرح ولا من حقنا ننام
No comments:
Post a Comment