وبما أن العلماء قالوا لا تحاسبوا المفتي إلا على ما يسئل عنه
فانا باسأل فضيلة المفتي
إيه هو نوع المشروع اللي ممكن واد غلبان مالوش ضهر ولا واسطة
يعمله بخمسة وعشرين الف جنيه وللا حتى بخمسين الف جنيه؟
يفتح كشك مثلا؟ والمحافظة ح توافق له على الكشك من غير رشاوى؟
يفتح ورشة؟ والوزارة ح تفتح له الورشة من غير رشاوى؟
مين قال لك يا فضيلة المفتي ان العيال دي ما حاولتش تعمل مشاريع؟
طيب ما تعمل لهم انت يا فضيلة المفتي ما انت عندك صندوق
راح يرمي نفسه في البحر عشان يموت ويخلص؟
ومين اللي وصل كل هذا العدد من الشباب لانهم يرموا نفسهم يا يموتوا يا يشوفوا اي حتة غير البلد دي؟
تعرف يا فضيلة المفتي؟
العيال دول مش بيحبوا البلد دي
مش بيحبوها ابدا لانها لا علمتهم ولا وظفتهم ولا شغلتهم ولا جوزتهم ولا رحمتهم
ولا سابت رحمة ربنا تنزل
عارف يا فضيلة المفتي الشاب محتاج كام الف جنيه رشاوى عشان يعمل مشروع
بالخمسة وعشرين الف جنيه اللي حضرتك مستكبرهم قوي كأنهم ثروة طائلة؟
هو احنا ايام الجنية الجبس؟
عارف هو استلف من مين وبيع امه ايه وبهدل نفسه ازاي عشان يلم خمسة وعشرين الف جنيه
عشان يهج من البلد دي؟
ما قلتلناش يا فضيلة المفتي
ايه رأيك في ان الشباب الطماع ده لا لاقي لقمة ولا شغلة ولا كرامة في بلده
لو فتح كشك بالرشوة لازم يراضي الباشا
لو اشتغل منادي عربيات لازم يراضي الباشا
لو اشتغل سواق ميكروباص لازم يراضي الباشا
وان رضي الباشا
وممكن ما يرضاش
اصل الباشا زي الدنيا يوم في ايده ويوم
في......السلطة
طيب والمسئول عن الرشاوى والوسايط والمحسوبية حكمه يا فضيلة المفتي؟
طيب والدولة اللي شايفة شبابها - الطماع - بيرمي نفسه في البحر
عشان لقمة عيش وللا شغلانة محترمة وهي مش موفرة له حتى معاملة كريمة
يتعاملها وهو ماشي في الشارع حكمها ايه يا فضيلة المفتي؟
يعني دلوقت بقى الفلاحين اللي بيحرقوا الرز والشباب الغلبان اللي بيهج
من البطالة والفساد وخوازيق البشوات والستات اللي بتتشعلق في عربيات البوليس
عشان تترجاهم ما يقبضوش على واحدة ست غلبانة
كل دول هم المجرمين بس يا فضيلة المفتي؟
والمسئول عن ده كله مش مجرم يا فضيلة المفتي؟
ايه رأيك في توريث الحكم يا فضيلة المفتي؟
ايه رأيك في التعذيب في الاقسام يا فضيلة المفتي؟
ايه رأيك في الرشاوى والواسطة يا فضيلة المفتي؟
ايه رأيك في رجال الاعمال اللي بيفتحوا قنوات هلس ومش هاين عليهم
يعملوا مشروع عدل يشغلوا فيه الغلابة يا فضيلة المفتي؟
ايه رأيك في الدولة اللي شالت الدعم من العيش يا فضيلة المفتي وجوعت الناس؟
ايه رأيك في الدولة اللي ادت للفلاحين بذور قطن فاسدة وخربت بيتهم يا فضيلة المفتي؟
ايه رأيك في القانون الطوارئ يا فضيلة المفتي؟
إيه رأيك في المواطنين اللي ما عندهمش مية شرب ولا صرف صحي يا فضيلة المفتي؟
ايه رأيك في العمال اللي نفسهم يوصلوا لخط الفقر يا فضيلة المفتي؟
ايه رأيك في سكان العشوائيات اللي ماحدش بيرضى يشغلهم عشان قذارتهم
لان ما عندهمش مية وبيشيلوا خراهم على راسهم لان ماعندهمش مجاري يا فضيلة المفتي؟
ايه رأيك في بيع التأمين الصحي يا فضيلة المفتي؟
ايه رأيك في الملايين اللي بيولعوا بوابير الجاز في الشتا عشان ما عندهمش بطاطين
يا فضيلة المفتي؟
ما سمعناش رأيك في ده كله، وما سمعناش منك كلمة مواساة
للغلابة واهاليهم اللي عايزين يهربوا من ده كله ولو حتى بالموت
وحتى بعد الموت مش سالمين
اخدتوا منهم كل حاجة ومالهمش الا ربنا
حتى ربنا عايزين تاخدوه منهم؟
يا شماتة ابلة ظاظا فينا
ليه كده يا فضيلة المفتي
ده انا باحبك
No comments:
Post a Comment