Wednesday, 4 July 2007

وقائع محاكمة إسلام نبيه



النهاردة كان زملاته في البوليس كتير قوي
زي ما المدونين كانوا عددهم لا بأس به برضه
حضرت مريم وسكوت ح نصوت ومينا ووائل عباس واسد
واحمد عبد الفتاح اللي عمل فينا مغرز وخضنا
لقيت مينا بيكلمني وبيقول لي احمد عبد الفتاح اتصل
وبيقول انه راح بدري وان الحضور الامني مكثف ومشددين الحراسة
ومانعين الدخول والظاهر الجلسة ح تبقى سرية وح تتعمل بدري
وحسسني ان فيه مفاعل نووي ح ينفجر في القاعة
وبعدين لقيت مريم بتصوصو في التليفون: انا جيت انا وسكوت ح نصوت
وقاعدي مستنينكوا جوه
وكمان جه المدون بولوتيكا ولوبي بتاعة
sinfulangel
مينا اعمل اضغط هنا
وبعدين فيه محامي من بتوع اسلام
ناسية اسمه بس موجود في الفيديو
وجه جديد بس اترافع وقال نفس الكلام اللي قاله جميل سعيد
قبل كده بخصوص ان حقوق الانسان دول ناس بطالة
ومشيهم بطال وامريكا مأشفرة عليهم اليومين دولم
وعشان كده هم فبركوا الفيديو عشان يشوهوا سمعة مصر
وجاب ملف فيه اخبار من الجرايد بتقول ان بتوع حقوق الانسان
زعلانين ان مصر دخلت لجنة حقوق الانسان
- طيب هو مين فرحان؟ -
المرافعة كاملة على اللينك ده

وده

وبعدين الاستاذ جميل سعيد قال انه مش بيتفرج ع الفضائيات

وانه بالصدفة المحضة البحتة الفحتة المحتة الكحتة

شاف في القاهرة اليوم برنامج بتاع عمرو اديب بيقول فيه

ان عماد بلطجي وانه ضرب اسرتين لوحده

رجاء مراجعة صورة عماد ووزنه
والمرافعة بتاعة الاستاذ جميل

على اللنك ده

وده

وبعدين ابتدى الاستاذ عصام جمعة يترافع عن رضا فتحي

امين الشرطة

الحقيقة وبالرغم من اعترافي بمنتهى الارتياح اني منحازة لعماد الكبير

وانني اتمنى ان تأخذ العدالة مجراها ويتحبس كل من اسلام نبيه ورضا فتحي

عدد لا بأس به من السنوات

الا انني يجب ان اشيد بمرافعة الاستاذ عصام جمعة

انا كمان رحت حييته

بالرغم من انها مرافعة قوية وخطرة على موقفنا

احنا وعماد يعني فيما يخص امين الشرطة يعني لانه

ما يخصوش يدافع عن اسلام

الا انها مرافعة قانونية لا فيها تجريح في سواق الميكروباص ولا الدبلون

ولا اي اهانة لا لمنظمات حقوق الانسان ولا لشخص عماد ولا لخبير الاصوات

ولا للفضائيات ولا للصحافة ولا قال كلمة واحدة فيها جرح او تحقير لانسان

وكل كلامه عن ثغرات في التحقيق وفي الاقوال

يعني بيعمل شغله صح

بيتكلم قانون وبس

وعشان كده رحت حييته بعد الجلسة

ومرافعته هنا
وهنا

وهنا

وهنا كمان
ودي كمان

وبعدين الدفاع تقدم ولكن النيابة سبقت وطلبت التأجيل
عشان تطلع على المستندات اللي قدمها دفاع اسلام
وهي ملف اخبار حقوق الانسان
ومحضر ضد عماد
مش عارفة ليه الدفاع اتضايق وكأنهم واثقين مثلا
انه ح يطلع على طول او ح ياخد براءة
وجميل سعيد قال ان اسلاك في الاحتجاز الى مدة ما يقرب
من العقوبة
والمحامي التاني واحد صاحبي انت ما تعرفوش قال خلاص
نسحب الملفات تاني لو دي ح تعطل الحكم
يا سلام
للدرجة واثقين ان الحكم في صالحهم في صالحهم
حتى من غير ملفات ولا محاضر ضد عماد؟
منين الثقة دي؟
الفيديو اهو
====
هوامش: قبل عماد تلات قضايا واحدة سرقة بالاكراه
وصاحبها معترف واضح جدا انه معترف بالاكراه هو كمان
لان نفس المجني عليه قال انه اتنشل مش انه اتسرق بالاكراه
واتنين قضايا حيازة مخدرات واحدة حشيش والتانية بانجو
وقضية الحشيش بالذات محرر المحضر قال انه فتح السيجارة
ولقاها فيها حشيش قام لفها تاني زي الشاطر وسلمها للنيابة
شرطا ان محرر المحضر كاتب انه ظبط المتهم وهو بيشرب السيجارة
يعني هو اخد السيجارة المشروبة فتحها وشاف اللي فيها ولفها تاني
طبعا دي ناس كلها معترفة
زي ما انتوا فاهمين
الاعتراف نص الجدعنة
====
الاستاذ جميل سعيد قال ان لما مدير المباحث نزل
وعرف ان عماد ضرب اسرتين
ارتعد
يامي يامي
وخاف
امسي يا عفريت امسي يا عفريت
اسم الله عليه من الخضة
====
في الاخر الاستاذ ناصر امين
مسك عماد
الشرير
البلطجي
الرجل الاخضر
ابو رجل مسلوخة
وقال له: يا عماد ارجوك امشي من وشهم
هم عايزين يئذوك ويطلعوك انسان وحش
والتاني عمال يبص له بمنتهى الطفولة والذهول
اهو
====
نسيت حاجة مهمة قوي
جميل سعيد وهو بيتكلم عن حروق اللسان
وبيقول انهم ناس واطية ودون وبطالين
لقيته بيقول وانا باتصفح النت عشان اشوف ايه حقوق الانسان
لقيت موقع لحقوق الانسان بتاع وائل عباس
وهو بيطالب الامم المتحدة بالتدخل في شئون مصر
واعادة التحقيق في مقتل السادات
وده معناه انه غير معترف بالسلطات المصرية
وبيطالب بالتدخل الاجنبي
انا سمعت كده وداني سخنت وما حسيتش غير وعمالة اعيط
واسب والعن: الله يخرب بيته السادات ده يا وائل اللي ح يوديك
في داهية ويودينا معاك
وقعدت اعيط بقية المرافعة
بعد ما خلصت: قلت له وائل عباس مالوش دعوة بحقوق الانسان
حضرتك مالك وماله
قال لي: اصل انا مش خبير في الحاجات دي
========
يييييييييييي سقط سهوا تاني
دماغ ماك جه بعد المحاكمة
والجلسة اتأجلت ليوم 2 سبتمبر وبقيت فرحانة
وح ارقص وتقريبا زغردت بس بصوت واطي

16 comments:

Saad El-Shater said...

ارجو تصفح هذه المدونة
www.ibn-elshater.blogspot.com

عبقرينو said...

السلام عليكم
شكرا يابنت عمى على التغطية دى
كنت فى مصر 48 ساعة وكنت نفسى أشوفك واتعرف عليكى لكن الظروف أتعرفت على مينا وشباب أبناء مصر
العيال دى تفرح وفيه أمل فى بكرة ان شاء الله وكل ظالم وله نهاية ان شاء الله وشكرا لكل اللى حضروا

عبقرينو said...

متأسف على لفظ العيال اللى جه غلط انا أقصد الشباب الرائع اللى هما فعلا ابناء لمصر

يَحيى المِصري said...

يا مثيت العقل و الدين
الراجل ده مقتنع فعلا باللي هو بيقوله
قال عماد ده ضرب أسرتين لوحده بطوله و قال إيه الظابط خاف و سابه

يا جدعان قلتها قبل كده و هاقولها تاني نفرض إن عماد عمل البلاوي دي كلها (على إفتراض إنه آلكابوني يعني ) يعذبوه يعني أي واحد عنده سابقة يلبسوه عصاية

Anonymous said...

انتي هايلة ،،وطريقتك في الكتابة والوصف رائعين ،،وبجد اي حد يفخر انه يدخل عندك ويقرا اللي عاوزة تقوليه ،، ربنا يحميكي انتي واللي زيك ,,امين
ميمي
http://mimayaa.blogspot.com/

محمود الدوح said...

تغطية جميلة جدا
شكرا ليكى
ونفسى اهيس بقى

demagh said...

ya3ny law makontesh kalemtek melion mara el naharda kont emta ba2a heteftekreny?

مصر هى أمى said...

نوارة

ازيك الاول معلش بقالى فترة منقطع عن التدوين

انا عايز اسال المحامى بتاع اسلاك نبيه ده ايه العلاقة بين مجتمعات حقوق الانسان انها بتاخد فلوس من امريكا وبين اللى حصل مع عماد
دا حتى ولو فرضنا انها بتاخد فلوس من امريكا ماللها والاعتداء على عماد الراجل سواق ميكروباص يعنى ولا ليه فى السياسة واخره لو راح راس البر يبقى كويس

هوا المحامى بتاع اسلاك ليه عايز يغير سير القضية ويكبرها ويبين ان جهات اجنبية هيا اللى عاملة الكلام ده يعنى هيا امريكا كانت اصلا تعرف مين اسلاك ولا حتى عماد علشان يعملوا كل الفيلم ده



يرضيكى يا نوارة اجى بعد غياب الاقيكى شايلة اسم مدونتى من عندك من القايمة

Anonymous said...

بندعي من ربنا انه اسلام نبيه و الدلدول بتاعه يتحبسوا كام سنه عشان يبقوا عبره لمن يعتبر

فعلا سفاله و قله ادب البوليس في مصر ما وردتش علي حد

من كام سنه وقفوني مجموعه ظباط شرطة علي طريق الغردقه و بالعافيه عاوزين يركبوا معايا و لما رفضت كانوا عاوزين يقبضوا عليا و يلبسوني قضيه و لما طلعتلهم باسبوري الامريكاني اعتذرو و سابوني
فعلا بلد العجب . . ابقي في بلدي و اللي يحميني باسبور اجنبي

e7na said...

صدق توقعك لاستغلال الواقعه الملفقه لعماد الكبير
احييك على نشاطك الرائع

Mohamed ElGohary said...

تصحيح معلش

أنا النيكنيم بتاعي مش بوليتيكيا، ده إسم المدونة بس :D

صلحي الإسم وشيلي التعليق ده

وبالمناسبة، ده اللينك بتاع التغطية بتاعتي

جار القمر said...

السلام عليكم ورحمة الله وبركاته
لن أعلق وأطيل
فخير الكلام ما قل ودل
وخير الكلام هو كلام الله
بسم الله الرحمن الرحيم
- ألا أن نصر الله قريب-
صدق الله العظيم
اللهم نصرك اللذي وعدت
تحياتي ....محمد علي....جار القمر

Mohamed ElGohary said...

نسيت أكتب اللينك :D

http://politikia.blogspot.com/2007/07/islam-nabih-postponded.html

viva egypt said...

انتى اتأكدتى ان المحامى دا فعلا محامى ولا يمكن مش محامى ولا اكيد مش محامى لأنه مش فاهم يعنى ايه محامى بصى كويس فى وشه نفس وشوش المحامين اياهم بتوع الجواسيس والفساد لأمؤاخذه يا فريد الديب ماعلينا ان شاء الله ربنا هايظهر الحق ويطلع عماد مجرم وسفاح وان هوه اللى ارتكب الفعل دا مع زفت الطين اسلاك ويتحكم عليه بالاعدام علشان بسلامته يستريح وشكرا لمجهودك الرائع

Deana said...

Dear Nawara- A message from my father. Egypt comes first. Please pay close attention to the safety of the Suez Canal with respect to the economic interest of the world players and it's effect on Egypt's sovereignty

amsheer said...

بصراحة اللي بيقول ان حسني حرامي يبقى مفتري: الراجل عنده سبعين مليار و هنقول ان احنا سبعين مليون مش تمانين. يعني واخد من النفر الف جنيه في السنة. يعني حوالي 80 جنيه في الشهر على 30 = 2,5 في الشهر . يعني الراجل واخد من كل مواطن تمن كانز كوكاكولا يا طماعين هتجيبوا منين ريس ارخص من . كده. ده كده بياخد اقل من 2.5 $ في الشهر يعني تحت خط الفقر