Saturday, 7 July 2007

حسني عبد ربوووووووووو شفييييق عبد ربوووووو


والنبي عمري ما سمعت اسمه قبل كده
اصل انا افخر باني جاهلة كرويا
ونعم الجهل
والكورة الحقيقة بتحرق دمي وبتغيظني
لانها بتفرح الناس فرحة زائفة
وعشان كده كان نفسي الاهلي يتغلب
عشان كل سواقين الميكروباص والشحاتين
وسكان العشوائيات اهلاوية
ولما الاهلي بيكسب بيحسسهم بنصر مزيف
وينفسوا عن مكبوتاتهم في السكة الغلط
كنت عايزة الاهلي يتهزم عشان يمشوا يدلدلوا ودانهم
يمكن يفوقوا شوية
مش مهم انا حرة في رأيي
بس اللي شفته امبارح في قناة دريم واحد
بخصوص: رحيل حسني عبد ربه من وطنه
وذهابه الى نادي العدو النادي الاهلي
خطاف اللعيبة
خراب البيوت
المعتدي
الجبار
والحصار اللي اتنصب حوالين منزل حسني عبد ربو
شفيق عبد ربو
والجماهير اللي واقفة تعيط من اول واد عنده خمستاشر سنة
لراجل كهنة عنده خمسة وتمانين سنة
واللي يقول: حسني خان وطنه وبلده واهله
واحنا اللي بنقول له احنا مش عايزينك
واللي يقول: يا حسني وطنك لسة فاتح درعاته
ارجع واحنا واقفين للصبح مستنينك
ويروحوا لابوه اللي وجه له نداء: يا حسني
ارجع لوطنك واهلك وناسك
واخوه يعيط ويقول: حسني معذور وحسبي الله ونعم الوكيل
والجماهير الغفيرة متكدسة في الشارع
وواحد يقول: يعني انتوا مش عارفين احنا بنكره الاهلي ليه؟
وواحد تاني يقول: هو احنا اسرائيل؟
الحقيقة انا مش عارفة الاسماعيلي بيكره الاهلي ليه
غير انه في كل ماتش حتى لو كان الاسماعيلي بيلعب مع
السكة حديد حديد حديد
الاقي جماهير الاسماعيلي عمالة تهتف: ...امك يا اهلي
ولما تسألت عن الكراهية السريالية للاهلي قالوا لي
اصله ما اداهمش الملاعب بتاعته في العدوان الثلاثي
انما الزمالك طلع وطني مع انه بتاع الملك
====
انا ضغطي امبارح كان ح يوصل لتلات على خمسة تحت الصفر
انا اصلي لما باتضايق ضغطي بيوطى مش بيعلى
خصوصا من اهتمام البرنامج لدرجة انه حط لعبد ربو شفيق عبد ربو
اغنية الغام: لسة ناوي ع الرحيل
طيب احب انوه لجماهير الاسماعيلي اللي حسني عبد ربو اتجوز عليهم
وجماهير الاهلي خرابة النوادي
وجماهير الزمالك المسخناتية
ان سواحل سينا وحدودنا مع اسرائيل اتباعت لمستثمرين صهاينة
وان ميدان التحرير اتباع
يعني اسماعيل يس كان عنده نظرة مبعدية للامور
وان التأمين الصحي والتعليم بيتباعوا
وان ابناء قرية نوس البحر بيشتغلوا في اسرائيل
ببجاحة والحكومة مطنشاهم
وحنفي ابو دقة وغير ابو دقة وغيره وغيره
وان الناس اللي كنت عرضت فيديوهاتهم ع المدونة
بتوع العيشوائياتش
بيتم استغلالهم من كل التيارات والتوجهات والحكومات
والمافيات والتجار
هم اللي بيعملوا احداث البلطجة بفلوس
هم اللي بينتخبوا مرشحي الحزب الوطني بفلوس
هم اللي بيضربوا الناخبين بفلوس
هم اللي بيوزعوا البانجو والحشيش على طلبة الجامعة
وفي الاشارات كمان
بفلوس
هم اللي بعض الجمعيات العالمية المشبوهة بتروح تجمع منهم
معلومات وتستغلهم
هم الشرارة الاولى اللي بتنطلق منها الفتنة الطائفية
لما الحكومة تحب تشعللها عشان تفهمنا ان قانون الطوارئ
وخلفه قانون الارهاب
في مصلحة البلاد لان الامن غير مستقر
هم بتوع التحرش
وهم بتوع العنف
وهم بتوع الظلم بجد
مش الاهلي
والناس دي لها الف حق تعمل اي حاجة عشان تاكل
لان الناس دي بتشيل جرادل الكاكا على راسها
وبتاكل من الزبالة
ومستعدة تعمل اي حاجة عشان تاخد عشرين جنيه
ووجبة مكرونة "فشامنة" وكفتة
بس ولا يهمكوا
خليكوا تظاهروا وعيطوا على واحد
مخه في رجله
==
على فكرة انا شايفة ان ربنا كويس معانا قوي
كويس معانا زيادة
عشان اللي احنا فيه ده قليل على اللي بنعمله
لما هم الناس الميتة من الجوع دول
يعملوا مظاهرة عشان لعيب كورة
وما يعملوش مظاهرة عشان بيشيلوا الخرا على راسهم
يبقى خليهم بقى شايلينه
مدام عاجبهم
http://www.youtube.com/watch?v=ixvRfvpNqWg

16 comments:

mariam said...

حقيقى اتفق معاكى جدا
فى موضوع الأهلى ده
لأنه شىء مستفز
يكفى النظر لأى قهوه بتعرض ماتش للأهلى
و تشوفى التوتر و القلق على وجوه الناس
زى اللى فى انتظار نتيجة الثانويه العامه
و لما ييجى جون بقى
كله يقوم يحضن بعض اللى يعرفه و اللى ميعرفوش
و لو اتهزم يبقى يوم مش فايت

واحد مصرى said...

قلناها قبل كده و هانقولها كمان مرة...... اللي يسكت برضاه يستاهل الضرب على قفاه... و هازيدك من الشعر بيت كمان: كل شعب يستحق حكامه...قال مظاهرة عاشان الكورة... صحيح شعب الحشيش و يوم الخميس...بلا نيلة

viva egypt said...

هيا جت على كده بس دا احنا اللى بدعنا التفاهه واحنا احسن شعب يا خد على قفاه واحنا اجدع شعب يشيل الزفت على دماغ اهله واحنا ... واحنا ... واحنا اللى فينا ناس مقتنعه ان حسنى مبارك ممكن يعمل حاجه كويسه للبلد غير انه يبيعها واحنا.... واحنا.... واحنا بتوع اللى نعرفوه احسن من اللى مانعرفوش واحنا بتوع ان لقيت بلد بتعبد العجل حش واديله واحنا اللى اتقال فينا كم ذا بمصر من المضحكات ولكن ضحك كالبكا واحنا...واحنا...واحنا اللى جبنا عبيد علشان يحكمونا واحنا اجدع ناس تعمل خدها مداس الله يسامحك قلبتى علينا المواجع

BeLiEvEr said...

إنت لسه مفهمتيش يا نوارة؟
الكورة يا بنتى ده أكبر كارت سياسى بيتلعب بيه فى مصر. و الإعلام قايم بدوره كويس فى بالكارت ده.

تفتكرى إن الناس لو مكنتش بطلع المشاعر السلبية و الغضب اللى جواها ده فى ماتشات الكورة، كانت ح طلعه فين؟
فكرى فى الإجابة، و ح تبتدى تفهمى اللعبة كويس

بالنسبة لعبد ربوووو، الناس طلعت نعش بإسمه، ده معملوش كده مع الجاسوس أصلا اللى كان بيتجسس لإسرائيل

jhon said...

والنبى بلاش فقع انا من الاسماعيليه وقال عاملنى مناحه على حسنى فنفحه مش فاهم على ايه و تهديدات بالقتل و الفشخ!!!!!!!!!!!!!!!!
ولما قلت ان دى تفاها لصاحبى زعل و قالى ما برا بيجرى اوسخ من كده قلتله برا لاقين ياكلوا هنا شحاتين بلا خرا
والاهلى ده نادى وسخ كمان اى ام لاعيب حلو يشتريه طيب بعدين يعنى ؟؟؟؟؟
الانديه بروح امه هتنافسه ازاى اذا كان معاه كل اللاعيبه الحلوين
؟؟؟؟؟؟؟؟؟
يحيى

Shark said...

متخيله ايه فى بلد لحد النهارده بيمشى فيها عربيات كارو بحمير بتشخ فى نص الشارع وميكروباصات بتطلع بلاوى سودا تدخل على صدورنا تطبق على نفسنا وعشوائيات من هنا لبكره الصبح ..... هيس هيس هتعيش وتبقى كويس

اه يا دماغى said...

والله انا معاكى

كرة ايه ووجع دماغ ايه


انا ساعات بقول انهم

شوية شباب عبيط بيجروا

وراء حتت كوتش

اسمها كره
وتعصب بغباء

وكانهم حياخدوا فلوس

خالص تحياتى

اه يا دماغى said...

والله انا معاكى

كرة ايه ووجع دماغ ايه


انا ساعات بقول انهم

شوية شباب عبيط بيجروا

وراء حتت كوتش

اسمها كره
وتعصب بغباء

وكانهم حياخدوا فلوس

خالص تحياتى

Anonymous said...

ياست نوارة انت بتروحي العشوائيات كزائرة
لو كنتي من سكانها لما تحاملتي عليهم
مدارسهم لاتعلم
ابائهم جهلاء
الجميع يريد استغلالهم
حتي انت المدافعة عن حقوق الانسان
تعتقدين انهم فرحانين بشيل الخراء
مين يقول الحق
لو جربتي الجوع
لو جربتي طفلك يبكي من المرض
ولاتجدي العلاج كنتي رحتي جري
وحطيتي صوتك في الانتخابات لصالح أي كلب يدفع لك عشرين جنية

جبهة التهييس الشعبية said...

الاخ مجهول

اولا بخصوص اني ما جربتش الجوع

لا جربته
بس مش كتير
وجربته على كبر

لا مش كنت عاملة رجيم

:)

مريت وانا كبيرة كده بظروف كان ممكن يعدي عليا تلات ايام ما الاقيش اكل فعلا

بس لك حق ما اتربتش ع الجوع

ولك حق هم معذورين في كل حاجة

حتى في انهم قصاد عشرين جنيه يمسكوا سنج ومطاوي ويبلطجوا على الناخبين

ومعذورين في احداث التحرش

ومش مبسوطين من شيل الخراء ولا حاجة

انا بقالي سنتين ونص منقطعة عنهم

ولما رحت حسيت انهم متغيرين خالص

يعني من سنتين ونص لما كنت باشتغل معاهم

كانوا راضيين

راضيين قوي

راضيين بشكل ينرفز

لكن السنة دي لما رحت لقيتهم ساخطين وبيشخطوا فينا

واول ما يشوفونا يقولوا لنا: بنشيل الخرا على راسنا

ولهم الف حق

انا مش معترضة على كل ده

انا اعتراضي على تصرفاتهم تجاه الكورة

يعني ما يعملوش مظاهرة على شيل الخرا وبس يزعقوا لنا احنا

ويعملوا مظاهرات عشان الكورة؟

اهي دي بقى حاجة تفرس

دول لو عملوا زي اطفال الشوارع اللي راحوا مصر الجديدة وبقوا يتفوا للناس في اطباقهم في المطاعم عشان ياخدوا الاكل

كان بقى احسن يا شيخ

انما كورة؟

كورة؟

كورة وموبايل وانت مش لاقي تاكل

طيب اضحكك

فيه حتى اسمها ملاعب شيحة في الجمالية

عبارة عن جبل زبالة متجبن الناس بنت عليه عشش

ولك ان تتخيل بقى عاملة ازاي

في وسط ده كله واحد راح جاب موبايل وعليه فاتورة مش عارف يدفعها

ليه؟

لما ما لقاش شغل ولا اكل ولا سكن ولا حاجة

قال طيب اجيب الموبايل واتصل بالمسابقات يمكن تضرب معايا

فضل يتصل بالمسابقات

وطبعا ضربته ما ضربتش معاه

اهو رمى الموبايل خلاص

تحياتي

Tarek said...

عارفة الناس دول بيشجعوا الأهلي ليه
عشان بلد حمرا لا تعترف إلا بالنجم الواحد
حزب واحد هو الحزب الوطني لابد أن يكسب كل إنتخابات بالذوق أو بالعافية
و برضه في الكورة لازم يكون فيه نادي واحد يكسب بالذوق أو بالعافية و كل الناس تشجعة حتي إعلانات فودافون وإل يعترض يبقى نهاره إسود

الدرويش المرووش said...

ست نوارة يا غاليه
أرجوك بلاش بهدله
حرام عليكى ده إحنا غلابه
الكلام اللى إنتى بتقوليه ده بجد ولا تسخين
لأن ده شئ خطير جدا
و عواقبه وخيمه

أنا مش عارف أنام من ساعة ما قريته

السيده فى ضهرك تقوليلنا الحقيقه
إنت برضه صوحفيه و واصله

هو حسنى فعلا مضى ولا هو ربط كلام بس

;o) ;O) ;o)

إلهى يخيب خيبتنا اللى مايقول يا عزيز

فهلاو said...

عاجل
والمصحف الشريف عاجل ولازم تكتبى الإضافة دى ع البوست

علاء مبارك رجع يا رجاله
أيوه رجع وشخط فى حسن حمدى بصوته الرجولى وقال لحسن حمدى إنت هاتهرج ياروح أمك حسنى عبد ربه يرجع للاسماعيلى وماتخدوش الفلوس اللى دفعتوها كمان أدبا ليكو يا ولاد الوس.. وراح تافف
آه والنعمة

وعاد حسنى عبد ربه لوطنه سالما غانما وباتت الاسماعيلية فى فرح وسرور وجرى لقاء سرى مع حسنى عبد ربه تم العفو عنه ونسيان ما اقترفت يداه ومنح خمسين ألف جنيه ترضيه ووعد بعقد مريح مع الاسماعيلى

وافرح ياقلبى لك نصيب تبلغ مناك ويا الحبيب افرح ياقلبى

Desert cat said...

اصلا انا بكره الكورة زى كرهى للى ما يتسمى كدا
وبتغاظ وبتنرفز جدا لما اشوف الشوارع فضايييييييييييييييه وقت المباراة ولا التفاهات اللى بتحصل بعد المباراه يا حلاوة شبابك يا مصر
بالله لو قالوا اليهود احتلوا البلد ما حد يحتحرك زى ما بنشوف بعد كل مباراة كدا

bahry said...

نوارة هانم
ازيك
البوست رائع ويفرس فعلا
والمشكلة مش في اهتمام الناس بالكورة والتعصب والعياط والانفعال الجامد ده
المشكلة ان ده علي حساب إيه؟؟
وسلم الاولويات المقلوب واللعب اللي بيتعمل علينا بالكورة واستغلال ده سياسيا

والناس في الاسماعلية واغلب المدن السوحلية بتكره الاهلي علشان سبب بسيط جدا

لان الاهلي عندهم رمز للتع..والفساد

علي فكره انا كنت من مشجعي الاهلي سابقا

بس كرهته علشان نفس السبب


بحري من اسكندرية

max.adams said...

والأسوأ أنهم يتخانقوا و الصاحب يسيب صاحبه و الصايع يغز بالسكينة و المؤدب يعد يشتم دي حاجة تخلي الواحد دماغة تشت

و السكوت هيتحاسبوا عليه لأنهم سبب رئيسي للي بيحصل استحالة المعتقلات تاخد 50 مليون أو حتى 30 مليون و الأمن المركزي مايعرفش يعمل حاجة لو المدينة و القريه و النجع طلعت عن بكرة أبيها

اذا الشعب يوما أراد الحياة فلابد أن يستجيب القدر

قالوها قديما اذن فهم لا يريدون الحياة ف تبا لهم