Monday 23 July 2007

الناس على المعبر: بدنا نروِّح

عدد الناس في القافلة اللي راحت تمثل الشعب المصري
اربعتاشر نفر معاهم كام كيس وكام صندوق
فيهم مواد غذائية وتمانية وعشرين الف جنيه
يعني العدد والمؤن والفلوس غاية في التواضع
والملحوظ ان معظم اللي راحوا ستات
مافيش غير تلاتة او اربعة رجالة تقريبا والباقي ستات
مش بس ده اللي كسفني قصاد العالقين على المعبر
حاجات كتير كسفتني
من اول اضطرار بعض اهل العريش انه يستغلوا
العالقين ويأجروا الشاليهات بسبعين جنيه في الليلة
ولو اني عذرت اهل العريش لانها مدينة فقيرة


ومهملة بالرغم من جمالها
والظاهر مش بيجيلهم سواح ومافيش قدامهم غير
الفلسطينيين العالقين عشان ياخدوا منهم فلوس
مرورا بالاكل اللي وصلهم من الاغاثة
واللي كميته قليلة قوي على عددهم
وكمان جاب لناس كتير منهم تسمم
وانتهاءا بموقف مصر الغريب في عدم فتح المعبر
اول ما رحنا اتجمعنا في مقر حزب التجمع بسيناء
قدامه بيت شهيد مات على الحدود


والحزب شكله من جوة كده






هههههههههه
كان فيه من الفلسطينيين ابو عمر وابو عبد الله
اللي كانوا بيتكلموا نيابة عن العالقين
وقالوا لنا ان معاهم قوائم باسماء المرضى
وقال انا حبيت استثمر الفلوس بشكل عملي
واقترح ان الفلوس تروح للمرضى
والمواد الغذائية البسيطة دي تروح للي في رفح
سألتهم هم المرضى فين؟
بهبلي فاكرة ان المرضى محجوزين في حتت لوحدهم
عشان ياخدوا رعاية اكتر
قالوا لي المرضى
"وين ما كان"
لما لفيت فعلا شفتهم وين ما كان
على الحصر في الشارع
تحت الشجر
في
الخيام
"وين ما كان"
الهدف من القافلة مش اننا نديهم فلوس ولا اكل
اولا لانهم
مش شحاتين
ولا سكان عشوائيات عايزين نعمل لهم
مشروع تنمية
ولا لاجئين عايزين نوفر لهم مخيمات
ولا قطط وكلاب جايين نعطف عليهم
دول مواطنين لبلد تانية
انطسوا في عقولهم وسافروا للعلاج
او العمل داخل مصر




واتحطوا في ظروف مش بتاعتهم
واتحجزوا عن اهلهم



وفرجنا عليهم العالم



وفضحناهم










وهم لا شوارعية ولا شحاتين



وفوق ده كله فيه اللي بيعايرهم
بفتح وحماس
هئ
والله وبقينا قوة عظمى وبنحجز الناس
وبقينا نعرف نذل
لا وبقينا نعرف نعاير




لفينا على الهلال الاحمر المصري
لانهم كانوا بيوزعوا عليهم مواد اغاثة
وما اعرفش ليه الظباط من فوق قالوا لنا امشوا
ما تصوروش
مع انهم ما كانوش بيعملوا حاجة وحشة
دول كانوا بيغيثوا الناس
وبعدين رحنا الخيام اللي صرفتها لهم مصر
في العريش وبرضه بتوع الامن
جولنا وقالوا لنا نعم انتوا مين
وراح متصل بالباشا وقال له: دول كلهم
صحف معارضة يا باشا
ورحنا رفح عند بيت المختار
وعند
"السجرة"
تكعيبة كده
بايت تحتها الفلسطينيين
مافيش على لسانهم كلهم غير: بدنا روِّح
بدناش اكل بدناش فلوس
عملتونا شحادين
نحنا مش شحادين نحنا بدنا نروِّح
فيه اللي قال اروح من كرم ابو سالم
من كرم ابو عفريت
بس اروح
بس الحقيقة وللامانة
الاغلبية ما كانتش عايزة تروح من كرم ابو سالم
مش الاطة والله
بس كرم ابو سالم ده بتاع اسرائيل
وفيه مطلوبين لدى اسرائيل
ده غير ان اسرائيل بتصادر الشباب كده
محبة
يعني لو عدى واحد من كرم ابو سالم
عشرة ح يتم اعتقالهم ويروحوا في النسيان
ويخلصوا من مشكلة المعبر يدخلوا في مشكلة الاسرى
انا مافياش دماغ دلوقت اقول انه واضح انها صفقة
ما بين عباس واسرائيل عشان يسلم لهم المطلوبين
على اي حال
الخلاف الفصائلي كان واضح بين العالقين
فيه اللي شتم في عباس
فيه اللي شتم في حماس
فيه اللي شتم في الاتنين
فيه اللي قال الاتنين ولادنا
ونحنا مش متبريين من حدا
نحنا بس بدنا نروح
فيه ناس بتقول اكتر من تلاتين واحد ماتوا
وفيه ناس بتقول لا اربعين
فيه ستات ولدت
كده في الشارع
والناس كرامتها واجعاها


على الفضيحة
والذل
والاهانة



والمرض
فيه واحد قال ان دي فضيحة جديدة: لاجئين
2007
بعد لاجئين 1948
واحنا مش لاجئين
واحد زعلان من وزير فلسطيني
قال عنهم يتعاملوا كأسرى حرب
وبيسأل: هو فيه حرب قامت بين مصر واسرائيل
او بين فلسطين واسرائيل
او حتى بين مصر وفلسطين عشان نتعامل كأسرى حرب؟
مختار الفلسطينيين في رفح بيحمل الاعلام
مسئولية التواطؤ على العالقين على المعبر
وبيشكر الجزيرة
فيه عقيد فلسطيني لحقه
وقال والله والقناة الاولى المصرية
ما هم مش عايزين مشاكل مع مصر
وان كان لك عند مصر حاجة
قول لها يخلف عليكي يا مصر
وكلهم زعلانين من الاعلام
الناس زعلانة قوي
ممرورة قوي
وحاسة بالاهانة والوجع
من كل الناس
وعمالين يناشدوا حسني مبارك
لدرجة ان فيه واحدة طلبت ان حسني مبارك يبقى
رئيسهم: بدناش حماس ولا فتح
بس يكون رئيسنا سنة واحدة ينظم لنا الامور
كتر خير مصر على الاقامة الهنية
والاكل المسمم
والادويا الناقصة
هم مش عايزين حاجة
هم بدهم يروحوا
مالهمش طلب من مصر غير انها
تفتح لهم المعبر
المعبر اللي وقفنا عنده
شفنا غزة قدام عنينا
غزة وقلبي عرب
خالص وبنت حلال
غزة
الامارة الاسلامية
اللي مخوفة ناس في مصر
ما خافوش ستين سنة
من وجود دولة عنصرية صهيونية
عدوة على حدودهم
وخافوا من الاهل والعشيرة
طيب الناس دول واقفين شايفين بيوتهم
قدام عنيهم
ومش عارفين يروحوا
وعلى كل الذل ده
عمالين يتشكروا لمصر
والمصريين اللي بياخدوا منهم
فلوس الاقامة وبيعايروهم
والحكومة المصرية اللي مبيتاهم
في الشارع
وشايلين الجميلة
وكمان شايلين لنا الجميلة
اننا مش لاقيين طريقة نحنن بيها الناس عليهم
غير اننا نفضحهم كده
ولو في ايدنا نفتح المعبر ح نفتحه
وللا تكونوا فاكرين انه سهل علينا
اننا نفرج العالم على الناس بالطريقة دي؟
وللا سهل عليهم انهم يتصوروا كده
وللا فاكرين ان لحم وشنا ما وقعش من الكسفة
واحنا بندي كل واحد فيهم ميت جنيه
وكيس رز وللا علبة عسل؟
بس نعمل ايه؟
الناس دي لو كسرت الحاجز وعدت
ح يبقوا ارهابيين ولاد كلب
لو عدت من معبر كرم ابو سالم
نصهم ح يتقبض عليه
وفوق البيعة ح يتقال عليهم خونة
والنص التاني ح يتقصف لان حماس
هددت بنسف المعبر
ولو فضلوا كده ح يموتوا من الذل
والقهرة والمرض والجوع
او الاكل المسمم
مافيش قدامنا غير اننا نقول
للعالم شوفوا
افتحوا المعبر للناس
على الاقل مصر تفتح من جانبها
وهم متعهدين انهم يصطفلوا مع فتح وحماس
واحدة من اللي في الخيام
قالت انهم ح يبتدوا اضراب عن الطعام
ومش عايزين مننا اكل تاني
طبعا ممكن جدا العالم يسيبهم يموتوا
ياللا يموتوا ويرتاحوا بقى
مصر ما بتستقبلش غير اللي معاهم فلوس
حتى وائل عباس قال لي دي اول مرة
اشوف فلسطينيين فقرا زينا
انا افتكرتهم مصريين
وابو الغيظ قال ما فيش عراقي يجي
الا ومعاه فلوس
!!!!
يبقى الناس دي يا تموت
يا تموت
==
دي اول مرة في حياتي ادعو لاعتصام
بس يبقى اعتصام كبير لحد ما يفتحوا
المعبر للناس دي لان دول مافيش حل
لمشكلتهم غير انهم يروحوا
لو ح يبقى عرة زي عدد القافلة بتاعتنا
يبقى بلاها
الناس بتحسبن على الظالم
والله اعلم يقصدوا مين
مصر تقدر تروحهم
مصر تقدر تفتح المعبر
تقدر حتى تفتح من جانبها بس
مصر بتعمل كده ليه؟

====
لسة فيه فيديوهات كتير
وصور كتير
بس واحدة واحدة يا ملواني
انا اريح ساعة حتى
واحط بقية الاحداث
والصور والفيديوهات
اوعى تغير المحطة
خليك ع النكد معانا
مش ح تقدر تفتح عينيك

13 comments:

Anonymous said...

ورغم كل البيحصل دا

من يومين مصر بتستأذن من ولاية اسرائيل التابعة لولايات امريكا

بفتح المعبر لمدة يومين

واجابة ولاية اسرائيل مش هيتفتح المعبر وسبهم كدا


قلوبهم جاحدة كفرت بـ اى احساس انسانى

Anonymous said...

طبعا نا مش قصدي ان ده كفاية
بس حبيت اوضح ان فيه ناس مهتمه وان كان فاضل كتير

Anonymous said...

نوارة
الف حمد لله عالسلامة
بس واضح ان معلوماتك ناقصصة كتير عن القوافل ال بتروح للعالقين
مش ال 14 واحد هما الي مثلوا شعب مصر
دبصي يا استاذه
اتحاد الاطباء العرب كل اسبوع بيطلع قافلة اغاثية طبية
وبيديهم معونات واكل وعامل مطعم هناط للوجبات الساخت\نة وعامل شغل الله ينور عليه
وهيئة الاغاثة الانسانية برده نفس النظام تقريبا
الاسبوع ده انا شوفت القافلتين وقضيت معاهم يومين

Anonymous said...

جزاكم الله خيرا علي هذا الجهد
لكن فيه موضوع مهم مطلوب فيه وقفة
مصر متهمة إنها لوحدها السبب في غلق المعبر... أرجو متابعة هذا الرابط
http://www.aljazeera.net/NR/exeres/8FB39651-ED40-4AB5-B53E-D99B0C6261D4.htm
انا حاولت كمدون مبتدئ أغطي الموضوع عندي
http://menakefffree.blogspot.com/2007/07/blog-post_23.html
بس مطلوب جهود الاخرين... و لا تستغل العواطف لظلم بلدنا

Anonymous said...

أولا حمد لله على سلامتك و سالمة ال 14 نفر اللي معاكي

ثانيا وصلت النكد دي بتعتب متسريقهاش مني

ثالثا مصر بتمل كده عشان الأوامر العليا طالبة كده

اذا كان الشعب المصري نفسه يتمرمط
لازم يمرماطوا غيرنا كمان
هيوصلوا الناس لمرحلة و لا الحاوجة ده اذا كانوا لسه ماوصلوش ليها

حسبي الله و نعم الوكيل

Anonymous said...

عم ناكف
مصر هي المسول رقم 1 ومليون عن قفل المعبر
ولو عايزه تفتحه بكره هيتفتح
ده مش كلامي ده كلام الفلسكينين
هبقي ابعت لك فيديو فيه الكلام ده

Anonymous said...

ما من حل سوى حركة انسانية قوية تؤمن ببطلان كل اسايبنا الحالية لانشاء امجتمع الجديد وتحقيق الحلم المصرى

Anonymous said...



السلام عليكم

فعلا المشكلة تبكي وانتو مافيش في ايدكم حاجة تعملوها غير كدة وما عملتوهاش

بس للتصحيح يا جماعة !!! اسرائيل هي اللي قافلة المعبر مش مصر !! لأنها ببساطة بتمنع المراقبين الأوروبيين من العمل في المعبر وبالتالي المعبر قافل

حد فيكو هايسأل المراقبين دول ايه لازمتهم ؟ دول لازمتهم انهم يشغلوا الكمبيوترات ويفصحو كل حاجة بتدخل غزة وكل الامور الفنية الرقابية الأخرى

طبعا حل الامور بيلزمها تدخل سياسي قوي من جميع الاطراف ,, لكن واضح ان المشكلة هي اساسا سياسية بين فتح وحماس واسرائيل الي واقفة في النص تتفرج

جزاكم الله خير عاللي عملتوه ويجعل وشكو خير على هالناس ان شاء الله ويتفتح المعبر قريب

على فكرة انا عملت لينك للموضوع الي فات عندي ,, وكتبت عن ازمة المعبر ولو سمحتيلي اعمل رابط للموضوع ده كمان


تحياتي للجميع

Anonymous said...

نوارة
القصة ان اللى قافل المعبر هى ماما امريكا ومصر واسرائيل واى حد بينفذ الاوامر وبس
المقصود انهم يصفوا القضية وانتى عارفة يعنى اية تصفية واهو جابت نتيجة ومات تلاتين فلسطينى
واللة العظيم دول زنبهم فى رقبة الزعماء (من الزعم) يعنى ربنا هيحاسبهم والايام اللى بيعيشوها شرم شرم بكرة هيدفعوها دح دح
وانتى والاربعتاشر فرد ربنا هيكافئكم على اللى عملتوة انتم كنتم احسن من اربعتاشر مليون.
ربنا يجازيكم خير على وقفتكم دى
ابو النجوم

Anonymous said...

نوارة

في مثل شامي بيقول:


مقسوم لا تاكل

و صحيح لا تقسم

و كول لتشبع!!!!!!!!

Anonymous said...

معلش يا نوارة انا عرف انك مشغوله برفع والله انا بدعلكم كلكم وربنا يكرمكم ويجل العمل دة فى ميزان حسناتكم ويرزققم الاخلاص
ويبعد عنكم ولد حسنى المخلصين من الامن والمرشدين
بس بعد اذنك هحت الاعلان دة


الاخوة والاخوات المدونين وغير المدونين يدعوكم موقع مدون خانه (تحت الانشاء)الى الاجتماع من اجل الاتفاق على الخطوات النهائيه لنشاء مجمع المدونين (مدون خانه)وذلك يوم السبت القادم الموافق 28 / 7 / 2007 وذلك الساعه 6 مساء يوم السبت فى مركز العربى للدرسات العنوان 23 شارع باهر زغلول من شارع المنيل (الوصف بلدى : تركب حاجه الى الملك الصالح ثم تسئل عن سينما فاتن حمامه الشارع الذى على نصيته سينما فاتن حمامه امشى فيه حتى شارع باهر زغلول هو تقريبا 5 او 6 شارع على الشمال ) ونشكر بهذة المناسبه المركز العربى للدرسات من اجل اسضافه اجتماع المدونين
والدعوة متاحه لكل المدونين و كل الافكار السياسيه بلا استثناء وكل المهتم بمدونين وكل شخص يمكن ان يفيد التجربه وكل شخص يريد ان يعرف فكرة اكثر عن التجربه المدونين وكل شخص موافق على الفكرة وكل شخص معترض على الفكرة وكل شخص عوز يجب شخص لا يوجد مشاكل

الدعوة عامه
الاستفسار
0109825523
احمد الجيزاوى
http://iloveyouegypt.blogspot.com/

Anonymous said...

انا اسف وا الهي كان عندي ظروف في الشغل ما قدرتش أروح رغم اني كنت ناوي

Anonymous said...

لو في ايدنا نفتح المعبر ح نفتحه
وللا تكونوا فاكرين انه سهل علينا
اننا نفرج العالم على الناس بالطريقة دي؟
وللا سهل عليهم انهم يتصوروا كده
وللا فاكرين ان لحم وشنا ما وقعش من الكسفة
واحنا بندي كل واحد فيهم ميت جنيه
وكيس رز وللا علبة عسل؟
_______________________

وشي منكي في الارض يا فلسطين

بس هنقول ايه غير حسبي الله و نعم الوكيل

جزاك الله خير عننا كلنا يا نوارة