Monday, 2 July 2007

بالنوسبة للمسيحيين اللي اتكتبوا مسلمين غصبانية واقتدار

بعد التبريكات للعدالة
والتبريكات للمواطنين المصريين لانهم
خلصوا
- على رأي مراسل الجزيرة -
من صداع يزيد من الاحتقان بين المسلمين والمسيحيين
ثم التبريكات للمسلمين انهم خلصوا من تهم
ليس لهم يد فيها
وخلصوا من ناس اتحسبوا عليهم غلط
والتبريكات لمن كتب خطأ مسلم وهو مسيحي
زي اللي اتكتبوا تبعا لوالدهم
وقليل من التعازي للمسيحيين ان رجع لهم ناس
من اللي كانوا رافعين القضية
بتتلاعب بالدين
نقول آلوووووووو
هالله هالله ع الجد
مافيش جدال في ان اللي اتكتبوا خطأ
تبعا للوالد اللي اسلم
مسلمين
ان دول مش مسلمين ولا متلاعبين وانهم اخدوا حقهم
ومبروك علينا جميعا
اما بخصوص الناس اللي عليه شيكات وغير دينه
عشان يهرب
واللي عايز يخلص من مراته النكدية فاسلم
وعايز يرجع
فبرضه مبروك علينا لاننا مش ناقصين بلاوي وعلل
كفاية اللي عندنا
لكن اللي حصل ده ما يتكررش تاني
وما حدش بقى يتصور كم الاهانة اللي حسيت بيه كمسلمة
وناس بتقول لي مش عايزين دينك
وناس من القضاء بتقول لهم لا غصب عنكوا مسلمين
والمسئول عن ده اولا اللي قبل انه يشهر اسلام واحد مش مسلم
من غير الامتحان اللي نص عليه رب العزة في القرآن
كمان التساهل والاسراع في كتابة الناس دي مسلمين
يعني اللي عايز يسلم مش ح يفرق معاه الورق
عشان كده انا باطالب بقانون غير انه يشدد في الامتحان
كمان يأجل كتابة الدين الاسلامي في الاوراق
على الاقل سنتين
ودي مش ح تفرق مع واحد قلبه مسلم بجد
انا شخصيا اعرف ناس كتير مسلمين وما حدش من اهلهم يعرف
ومكتوبين مسيحيين وبيأدوا كل العبادات من غير ما حد يحس بيهم
مش قضية يعني الاوراق
اللي يروح يشهر اسلامه في الازهر
ياخد فرصة سنتين قبل ما يتكتب في الاوراق الرسمية مسلم
وبعد سنتين يرجع تاني ويمتحنوه تاني
ولو لقوه مش قد كده يدولوا فرصة سنتين كمان
ويرجع تاني ويمتحن تاني
هم المسلمين مش ناقصين عدد
ولا المسيحيين ح يفرق معاهم واحد مصر قوي كده على الاسلام
ده اولا
ثانيا
اللي اعترف بانه اسلم عشان الشيكات او الطلاق
لازم يعزر من الكنيسة
لانه لو مؤمن صالح ح يرضى بقضاء الله
مهما كان ولا انوش يغير دينه
وانا بقى عايزة اعرف مين دول اللي ادوا شهادة اسلام
لواحد متلاعب من غير ما يمتحنوه
عشان يتعاقب
عشان الشوية اللي فاتوا دول هزأونا قوي
بجد بقى كده زيادة
وعلى رأي عمرو عزت
اكثر شيء مهين كان الحكم على المسيحيين برفض دعواهم
عشان متلاعبين وكتابتهم مسلمين كأن الاسلام عقوبة
ايه البهدلة دي؟
يا ريت بقى اخوانا اياهم يرحمونا ومش كل واحد يستغل الاسلام
يعتبروه كأنه غزوة وكسبوها
وهو اصلا اداهم....دبوس
مشيها دبوس
ويا ريت بقى الحكم ده يبقى سابقة تساعد البهائيين دول راخرين
اللي مكتوبين مسلمين غصبانية واقتدار
والنبي ارحمونا وكفاية بهدلة وتهزئ بقى
لا هم عايزين الاسلام
ولا احنا عايزين ناس تتحسب علينا بالعافية
هي جوازة مصالح؟
====
مش ح اقول مبروك للاهلي لانه بقى عامل زي الحزب الوطني
ووزارة الداخلية
ومش ح اقول حظ اسعد للزمالك لانه عامل زي الفلسطينيين
نحس

23 comments:

Egyptian said...

والله عندك حق، لا المسلمين ها ينقصوا واحد، ولا الديانات الاخرى ها تنهزم بالأفعال دي

الدين فقط بالاقتناع، و لكن نحن في مجتمعاتنا لم نعتد على أدب الاختلاف، و أسهل شئ عندنا الحرب من أجل فكر أو معتقد

wa7ed mn masr said...

تصدقى حكاية التلاعب اللى إبتداها عم مجدى مهنا دى فقعانى أوى ، ما المصريين بيتلاعبوا بكل حاجة علشان يقدروا يمشوا ع الحبل فى السيرك الكبير اللى إحنا عايشين فيه ، إشمعنى الدين اللى مش هيتلاعبوا بيه مش فاهم ، يا ستنا الحل لا فى أن الأزهر يمتحن و لا الكنيسة تعمل مش عارف إيه ، الحل إن يبقى فيه دولة و فيها قانون ينظم علاقة المواطنين ببعضهم مش وظيفته إنه يوديهم الجنة ، ممكن تفهمينى إيه علاقة الشيكات بالدين؟ . إنتِ بتقولى إنك تعرفى ناس مسلمين من غير ورق ، ممكن تقوليلى تعرفى كام حالة لإتنين من دينين مختلفين- و كل علاقتهم بأديانهم هو البطاقة- و عايزين يتجوزوا و مش عارفين ، علشان القانون بدل ما يديهم فرصة إنهم يمارسوا حقوقهم اللى من ضمنها إنهم يتجوزوا وكل واحد يفضل زى ما هو أو يلحدوا أو يتنيلوا زى ما هما عايزين بيمنعهم من أنهم يمارسوا حقوقهم دى علشان يحافظلهم ع الجنة إنشاءالله ، و النبى هو فيه كدة

الحل دولة مدنية يحكمها قانون ينظم علاقة مواطنى الدولة ببعضهم ، فالزواج بالنسبة للدولة يجب أن يكون عقد بين طرفين ليس للكنيسة أو مذهب الإمام أبو حنيفة النعمان دخل به ، و حينها إذا حدث أى نزاع يطبق القانون ، و من يريد أن يتزوج زواج دينى فقط فليس للدولة علاقة بحل مشاكله مع المؤسسات الدينية بعد ذلك

حينها و حينها فقط ستنتهى مثل هذه المشاكل ، حين تكفل الدولة لمواطنيها حقوقهم و تنظم علاقتهم لا أن تفكر فى آخرتهم ،و حينها فمن يريد أن يغير دينه فليفعل فلن يستفيد الإسلام أو المسيحية من زيادة عدد معتنقيهم بضع عشرات أو مئات و الأهم ألا تكون هناك تبعات قانونية لتغيير الدين ليبقى الدين شأناً خاصاً بين الإنسان وربه لا وسيلة لحل مشاكل الشيكات أو الزواج و الطلاق

تحياتى

عمر الشرقاوى said...

ايه يا كبيره
سوال لو سمحتى ايه اللى دخل الاهلى والزمالك فى الموضوع على فكره انتى كده هاتعملى فتنه الاسماعيلى هايزعل كده
مش عارف احينا التهيس بيجيب نتيجه عكسيه ربنا يستر علينا الايام اللى جايه واعلن انضمامى لالكبر جبهه فى تاريخ مصر المعاصر جبهه التهيس الشعبيه

Anonymous said...

صباح الخير
انا بتابع مدونتك بس بطلت اعلق عندك عشان مستفزة شوية
اعتقد في حد ردة اي حد عايز يدخل الاسلام جديد عارفة ولما نطبقة علية محدش حيتلاعب ويدخل ويخرج عشان يطلق مراتة ولا يهرب من شيك
كمان احنا دولة اسلامية في قوانين اسلامية بتنظم العلاقة بين المسلمين والمسيحيين ومخلية الاثنين يعيشوا في سلام
لما نطبق حاجة وحاجة لا بتبدا المشاكل

M.F.A

bahry said...

اقتراح الفترة الزمنية ده محترم ويستحق التفكير فعلا

مبروك للزمالك الاداء والروح الجميلة وحظ اوفر في المرات القادمة

ومبروك للأهلي هذا الموسم بس ان شاء الله الموسم الجاي حتتقطعوا

انتهي عصر الت...فعيص يا أهلي

amr220 said...

مفروض خانه الديانه تتلغي من كل الاوراق الرسميه ماعدا شهاده الميلاد و الزواج و الوفاه

تحياتي

كلبوزة لكن سمباتيك said...

بس سنتين كتير يا جبهة يا اختشي افرضي في واحدة عايشة مع جوزها و غيرت دينها لازم تفترق منه لانها بقت على دين غيره في حالات خاصة
هي حكاية معقدة فعلا
بس صحيح اية علاقية الشيكات بالديانة يعني هو لما يبقى مسيحي و يسلم يقع عنه الشيك؟؟
اول مرة اسمع
ممكن نضحك على القانون و على الناس كلها بس مستحيل نخدع ربنا
و في يوم كل واحد حياخد فيه على قد ضميره و نيته
===
سايقة عليكي النبي حبيبك تلغي ام الفريفيكيشن ورد دي
===
تحياتشي

الأستاذ جمال بيه said...

هاسيبك المرة دى تتكلمى فى قضية الاحتقان الاسلامى المسيحى المفتعلة والمصطنعة بلا أسباب
كلامك ياستى يمشى فى الموضوع ده وع الراس
إنما على النعمة من نعمة ربى ما اهعديلك البق المغرض والمدسوس اللى قلتيه فى نهاية التدوينه
إيه بقى ياست البنات
هو جيمى هود بهت عليكى ولا إيه
والنعمة الشريفة شكله بهت عليكى
طب ده زملكاوى قلبه إسود وكاره الخير لرفقاء الوطن تمشى وراه ليه
إخس عليكى
منتى عارفاه ده متطرف وله رأى منيل فى كل موضوع وأوسخ حاجه فيه إنه زملكاوى وخدناه على عيبه
تقومى تمشى وراه وتقولى كلامه يبقى لأ ده كده بيعمل تصدير للثورة الزملكاوية
شفتى الحاجات اللى كانت متعلقه فى المدرجات بتاعة الزملكاوية
شفتى اليفط العملاقة
جيمى ورا كل ده
ده دسيسة زملكاويه يجب قهرها وما اكنتش يوم أظنك تلفى لفه
إخس يا نواره
النادى الأهلى قلعة الوطنية وممثل الشعب الحقيقى والخرم اللى بيجيبلنا الفرحة فى حيطة السواد اللى حبسانا فى الغم اللى اسمها مبارك وحزبه
الزمالك كمان بقى زى الفلسطينين، صدقتى حكاية الاضطهاد
إخس وألف إخس
عشان تعرفى إنهم إنتان
أنا كنت قاعد فى مكان بنتجمع فيه الاصحاب وما شابه وكنا يجى بتاع خمستاشر نفس قاعدين قدام التليفزيون والحوار كله عن جمال الاهلى وخيبة الزمالك ولا حد فاتح بقه مفيش غير واحد زملكاوى هو اللى اتبرى من لسانه وقال بق خايب عن إن الماتشات بتاع الاهلى والزمالك كلها مفاجاءات ومتستعجلوش وهبشناه طبعا لحد ما سكت
لما جه الجون بتاع الزمالك هجنا شويه بس الامر عدى على خير وصاحبنا إياه ضحك وصقف قلنا واحد زملكاوى وسط خمستاشر ميضرش
قوم الاهلى جاب جون
وانا يامؤمنه قاعد فى الصف الاولانى رحت فاز من الكرسى وناطط لفقو ولفيت وانا باهلل لقيت اللى بيهللوا معايا خمسه بس
أقليه يعنى
رحت باصص للزملكاوية وقايلهم ياولا الوسخة يابتوع التقيه
انكشفتم وعلى النعمة اللى هايفتح بقه منكم لما الزمالك يجيب جون هاشمطه
ومافيش ربع ساعه وجه الجون ف الاهلى قمت واقف وباصص لهم وقلت اللى هايفتح قه هاتبقى ليلته خره ما عدا الارجل اللى قال إنه زملكاوى م الاول يهلل زى ماهو عايز
قامو كلهم كتمو وابتسموا ابتسامة خبيثه
وربك برضه نصفنا رغم غننا العيال بتوع الزملاك تعبونا شويه
ال÷لى يانواره هو الزهرة الوحيدة اللى مفتحه فى صحراء الوطن فلا تقطفيها

Desert cat said...

هو الدين بقا على الورق وخلاص
اصبح الدين المخبأ اللى بيستخبى فيه كل واحد عايز يخلص من حاجه منغصة عليه حياته
لا المسلمين مش ناقصين حد يجى قولهم بصصوا انا اسلمت اهوه وغيرت الديانة انقذونى بقا من الشيكات المتكومة فوق دماغى ولا مراتى الفقرية
ده العقول دى والناس دى ازاى كدا بمنتهى السهولة بتتلاعب بالدين
حسبنا الله ونعم الوكيل

Desert cat said...

هو الدين بقا على الورق وخلاص
اصبح الدين المخبأ اللى بيستخبى فيه كل واحد عايز يخلص من حاجه منغصة عليه حياته
لا المسلمين مش ناقصين حد يجى قولهم بصصوا انا اسلمت اهوه وغيرت الديانة انقذونى بقا من الشيكات المتكومة فوق دماغى ولا مراتى الفقرية
هو خلاص الدين بقا المخبأ لكل اللى عامل مصيبة يستخبى فيه
ده ايه الارف ده

Desert cat said...

هو الدين بقا على الورق وخلاص
اصبح الدين المخبأ اللى بيستخبى فيه كل واحد عايز يخلص من حاجه منغصة عليه حياته
لا المسلمين مش ناقصين حد يجى قولهم بصصوا انا اسلمت اهوه وغيرت الديانة انقذونى بقا من الشيكات المتكومة فوق دماغى ولا مراتى الفقرية
هو خلاص الدين بقا المخبأ لكل اللى عامل مصيبة يستخبى فيه
ده ايه الارف ده

Desert cat said...

هو الدين بقا على الورق وخلاص
اصبح الدين المخبأ اللى بيستخبى فيه كل واحد عايز يخلص من حاجه منغصة عليه حياته
لا المسلمين مش ناقصين حد يجى قولهم بصصوا انا اسلمت اهوه وغيرت الديانة انقذونى بقا من الشيكات المتكومة فوق دماغى ولا مراتى الفقرية
هو خلاص الدين بقا المخبأ لكل اللى عامل مصيبة يستخبى فيه
ده ايه الارف ده

viva egypt said...

الكلام اللى بتقوليه دا ممكن يتحقق فى دوله بتؤمن بحقوق مواطنيها دوله يحكمها قانون واضح ودستور سليم انما فى دوله مبارك وجمال وعز صعب ثم مصلحه الناس الحلوه دى بتتطلب ان الامور ماتكونش مستقره اجتماعيا علشان مانفضاش للى بيعملوه فينا ثم ان التلاعب دا اختراع مصرى اصيل فكان لازم يوصل فى يوم اننا نتلاعب بالدين ولا مش واخده بالك من المشايخ الافاضل واللى بيعملوه لتأييد دوله الظلم ولا البابا هو كمان اللى بيبارك ويأيد

viva egypt said...

الكلام اللى بتقوليه دا ممكن يتحقق فى دوله بتؤمن بحقوق مواطنيها دوله يحكمها قانون واضح ودستور سليم انما فى دوله مبارك وجمال وعز صعب ثم مصلحه الناس الحلوه دى بتتطلب ان الامور ماتكونش مستقره اجتماعيا علشان مانفضاش للى بيعملوه فينا ثم ان التلاعب دا اختراع مصرى اصيل فكان لازم يوصل فى يوم اننا نتلاعب بالدين ولا مش واخده بالك من المشايخ الافاضل واللى بيعملوه لتأييد دوله الظلم ولا البابا هو كمان اللى بيبارك ويأيد

inspector said...

اولا موضوع مهم بس تعرفى ايه المشكلة
المشكلة الاساسية كمسلمين هو الهزيمة الرهيبة اللى احنا عايشين فى ديجورها
ففلما بنصدق ننتصر بانضمام احد لنا
مع ان ده مش دليل ان احنا قويسين
عندي فكرة وعاوز مشاركتك فارجو ابداء رايك او دعمك
http://www.eg-migrator.blogspot.com/

ابو النجوم said...

انتى بنت ابوكى صح بقى الناس عرفوكى سرهم وانهم مسلمين فى السر وانتى فضحتيهم على النت زى عمنا احمد لما فضح الراجل بتاع الحشيش فى دريم .بصراحة الواحد يخاف يقولكم على سر يااولاد نجم .ولو انها هتطولنى برضة بس انا مسامح.
نرجع للعك اللى حاصل بين المسلمين والمسيحين وبصراحة كدة مسيحى مايعرفش دينة ويغيير علية ومسلم مابيدخلش الجامع الاتنين ولاد ستين فى سبعين ومايشرفوش اى دين ينتموا لة حتى لو كان كالى الهندى
المفروض بدل مايقعدوا يشتغلونا علشان واحد بيغيردينة علشان يخلص من مراتة بقى بالذمة دة كلام مش عارف يخلص من مرة يقوم يخلص من دينة دول عالم عايزيين الضرب باللى فى رجلك والحل للموضوع دة يشيلو خانة الديانة من البطاقة ويريحونا وانا معاكى ان
النوعيات دى عمرها ماهتعدل المايل
اما عن الاهلى ...بقى ينفع تشبهية بالناس اللى حصوا العصاية فى عين عماد الكبير .ومشيها عين علشان خاطرى
والزمالك معاكى زى الفلسطينيين بس فى قلة البخت يعنى لو لعب لواحدة هيتغلب برضة
اشكرك ياحتة من اسمى
ابو النجوم

دماغ ماك said...

tab kalemeny ana bas we 2olely mabrok 3alashan el ahly
we kalemy el 7amalawy bas we 2olelo hard luck 3alashan el zamalek
tab we naby kalemy el 7amalawy bas

hahahahaaha
wa7shteny ya bent 3amy

دماغ ماك said...

abo el negom benafso...
ya 7abeb alby wa7eshny moot
ana kont 3ayez agelak bas el bet nawara nafadetly
alf salama 3alek ya abo el nogom
shoft bentak ya 3am ahmed mesharada el ahly ezay
walahy law mesh bentak kont waretha el weel
bent ya nawara 7'aleky ahlawya zay aboky we a7'oky mak
..............
ana ma3a abo el negom enohom yeshelo mawdo3 el deiana de men el beta2a
le2en el dien fe el alb mesh fe el wara2
we elly 7awelo denhom 3alashan gawaz wala ay 7owar tany lazem la el moslemen ye2balohom wala el mese7eyen yeraga3hom..
3alashan dol mesh 3andohom dien aslan
dol nas denhom howa masla7ethom

Anonymous said...

صباح الفل جميعا على كل رواد المدونه واعضاء الجبهة وثانيا
انا عايز ارد على اللى بيكلم على حد الردة احب اقول ان حد الردة مختلف عليه اختلاف رهيب من زمان
لذا فان تطبيقه ارى انه امر غير حكيم
وبحب اقول لواحد من مصر ان اللى بيقوله هو ده الكلام السليم وهو ده الحل الوحيد الحل ده بيتلخص فى كلمتين دوله محترمــــــــــــــــــــــتة

زورو said...

http://www.alarabiya.net/articles/2007/07/03/36153.html

Anonymous said...

برافو عليكي قلتي كل اللي عاوزة اقوله ..... برافو برافو
ده مش تهييس ده عين العقل
ميمي
http://mimayaa.blogspot.com/

bluestone said...

نواره
هو بداية خانة الديانة في الورق الرسمي لازم تتلغي بقى لانها تمييز بلا هدف .. تمييز على الفاضي .. كفاية الاسماء ما هي مميزة كفاية ..
قضية الناس دي فعلا منرفزاني جدا
يعني واحد ابوه اسلم وهو طفل واخذ الطفل في حضانته ولكن حينما كبر قرر انه يريد أن يكون مسيحيا زي كل أهله ..

ده مرتد ازاي؟؟؟ واستغل الدين ولا تلاعب بيه ازاي يعني؟؟؟

اما بالنسبة للي اسلم عشان يطلق او عشان عليه احكام أو .. أو

فالأولى ان الاسلام لا يقبله لانه شخص غير أمين ويغير دينه لاغراض شخصية .. مش يتمسك بيه ويقوله انت مسلم غصبا عن عينك وعين التخين ..
ده مش منطق أصلا

وبعدين يعني ايه تلاعب يا جماعة ؟
هو الاديان بهذا الضعف حتى يتلاعب بها حفنة من البشر ..

انتي عارفة لو كانت القضية مثلا ان شخص أشهر اسلامه ثم رغب في العودة وقال كلاما مسيئا للاسلام مثلا .. ربما تكون هنا قضية انه وجه إساءة أو أذية لمشاعر المسلمين مثلا .. لكن محدش يقنعني ان واحد بني آدم هيتلاعب بدين كامل ..

فكرة السنتين دي لتأكيد الاوراق الرسمية افتكر انها فكرة ممتازة .. وصحيح ان فيه كتير من اتباع الديانتين بينتقل سرا للاخرى ويمارس كل الشعائر دون ان يعلم أحد .. واعرف حالات بعينها .. خوفا من القانون أو المجتمع أو الاسرة .. لكن الامور هتكون اسهل بكتير في حالة منح سنتين كفترة تمهيدية يخضع لها الشخص لدروس توعية وما يشبه الكورسات التعليمية لشرح وتبسيط المعتقد اللي هو مقبل على الدخول فيه

بس ده مش هينفع يتطبق صح إلا في حالة فتح باب حرية الاعتقاد .. يعني اللي عايز يعتنق الاسلام براحته واللي عايز يعتنق المسيحية هو حر ..

وربنا يحاسب الجميع على النوايا ..


انتي عارفة ان لو مبدأ حرية الاعتقاد ده اتطبق في مصر هيحصل تغيير جذري ومع الوقت الناس هتتعامل مع المشاكل الحساسة دي على انها حاجة عادية .. ومش هيعتبروه مساس بهم أو بدينهم .. نتعامل مع الفرد على انه كيان متفرد مش حاجة ضمن تصنيف كبير ..
ويمكن في يوم من الايام الناس تفوق وتدرك مثلا أن الفساد حرام
والسرقة ضد الدين
والقهر لا يليق بالبشر

فانا لا يعنيني إسلام ألف ولا دخول ألفين في المسيحية .. فهو أمر لن يضعف الاسلام ولن يمس المسيحية .. ولن يقوى إيماني أو يضعف استنادا على ارقام الداخلين والخارجين ..

العقيدة الايمان يبدأ من القلب
ويحاسب عليه القلب
فدعوا الحساب لمن يملك فحص القلوب

الدرويش المرووش said...

يا حاجه نواره
الناس دى وصلت إلى قمة التهييس
و شكلهم كده منظرين على المدونه بتاعتك و إحتمال يخصخصوها و تلاقى نفسك فى الهوا و تتشحتشفى على مدونه إيجار جديد

بالنوسبه لموضوع الأهلى
لإانا مختف معاكى كلبا و كالبا
لأن الفعل المشين اللى بيعمله الأهلى بيبقى إن أبو تريكه يدخل الكوره فى الشبكه
مش العصايه فى البتاعه
و ده فرق واضح و جوووووهررى جووووهررى
أوه أوه

وكمان الزمالك مش فلسطين
لأن الخناقه الوحيده بتبقى على اللى يجيبها م الشبكه و يسنتر
مش اللى يبوس كوندى و اللى يتف على خلقتها
الشبه الوحيد هو فى البيانات الحنجوريه اللى طالعه من فلسطين و الزمالك
مع ملاحظة إن الفلسطنيين ما عندهومش بوتيكات تتباع