Wednesday, 11 July 2007

البابا بندكت الثالث ثالث


دلوقت البابا بندكت بصدد اصدار وثيقة
كان اصدرها قبل كده قبل ما يبقى بابا
الوثيقة بتقول ان الكنيسة الكاثوليكية هي كنيسة المسيح الوحيدة
وان الكنائس التانية لا تملك اسرار الخلاص
وما معناه يعني ربنا يهديهم لان الارثودوكس متلخبطين
والبروتستانت مش مسيحيين اصلا
وكان البابا يوحنا بولس شال من الصلوات
العبارات اللي فيها لعن لليهود
قوم البابا بندكت رجعها تاني
وقبل كده شتم موسيقى الروك وقال عليها موسيقى
شيطانية
ده غير شتيمته في المسلمين
ياخي احنا مش مهم ماهو اللي رايح واللي جاي
بيدينا على قفانا ما جاتش على الراجل الابيضاني الكبارة
طيب انا عندي اقتراح
بدل ما كل سنة يعمل ازمة
يحطوا له كاميرا ويبثوها على الهواء مباشرة
على كل الفضائيات ويسيبوه يقول: اتفوووووووه عليكوا
عالم وسخة
عشان بقى نرتاح من الصداع اللي كل سنة تصريحاته
تعملهولنا
وبعد كده لازم المناصب
ايا كانت دينية او سياسية
يبقى فيها حد اقصى للسن
عشان تصلب الشرايين والزهايمر
===
تحديث
الخبر منشور عند كل الناس
الشرق الاوسط
والعربية
بس للاسف اللي عامل تغطية كاملة
هي مجلة المصور الاسبوع ده
ومالهاش موقع ع النت
الغريب في الوثيقة انها بتقول
ان الكنائس الاخرى لا تملك الا جزء من الحقيقة
وان الحقيقة الكاملة هي عند الكنيسة الكاثوليكية
دي بقى جديدة نوفي
من وانا حلوة كده
وهم علموني ان اكتر اتنين عارفين
انهم مش عارفين حاجة
هما
العالم: لانه اختبر بنفسه انه ما يعرفش حاجة
وكل ما بيعرف اكتر بيعرف انه ما يعرفش
والمؤمن: لان ربنا اخبره ان
"والله يعلم وانتم لا تعلمون"
واننا كلنا ما اوتينا من العلم الا قليلا
وانا قريت الانجيل والتوراة بتفاسيرهم
ومش حافظة منهم ايات بس فيه ايات كتير
بالمعنى ده مش بس في التوراة والانجيل
كمان في تعاليم بوذا
تلات حاجات فضلت اقرا فيهم لحد ما دماغي
كانت ح تتنقل
التاريخ
والعلوم
والاديان بشكل عام والفقه الاسلامي
بشكل خاص
وبعد ما نتعت قلبي
رميتهم في مخزن العقل الباطن
ونسيت حتى اسامي الكتب اللي قريتها
وحطيتها في مكان بعيد عن عيني
لاني طلعت منهم بحاجة واحدة
ما حدش عارف حاجة
وكل شئ جايز
والله اعلم
عشر سنين ضيعتهم في قراية الحاجات دي
عشان في الاخر اطلع بـ: الله اعلم
طيب ما هو اعلم من الاول وخلاص
ضياع وقت وفلوس واكلان دماغ ع الفاضي
عشان كده ما اتناقشتش مع مالك في موضوع العلم
عشان وانا قده كنت باقول كلامه
المهم بقى
اني ما سمعتش حد بيقول عندي الحقيقة كاملة دي
لا مسلم ولا مسيحي ولا يهودي ولا ملحد
ولا عالم ذرة حتى
مافيش غير البابا بينديكت هو اللي عنده الحقيقة كاملة
يا بخته
مرتاح
عموما دي احد مصادر الخبر
واتعبوا نفسكوا في السيرش شوية
عشان تشوفوا مصادر تانية
وبررررضه السن له حكم
ولازم يبقى فيه حد اقصى لاي حد
يمسك منصب
اي منصب
ان شالله رئاسة مراجيح مولد النبي
====
ملحوظة تانية
ايام تصريحات البابا عن الاسلام
انا كان رأيي ان ده رأيه وعقيدته
وهو حر يقول اللي هو عايزه
وما حدش ضرب الكاثوليك في العالم على ايدهم
عشان يسمعوا كلامه
والحرب على عالمنا ما كانتش مستنية تصريحات البابا
ومحاولة مسح المذابح اللي بيعملها بوش في تصريحات
البابا محاولة هابلة عبيطة عايزة تحول الصراع
لصراع ديني وهو صراع فلوس وتجارة سلاح وبس
والوثيقة دي رغم انها مزعلة الاقباط
ومجننة اليهود
ومضحكة البروتستانت عشان هم مش بيهمهم الكلام ده
الا انها بتثبت صحة كلامي
مش صحيح بقى ان جورج بوش هو اللي زق
بابا الفاتيكان عشان يبارك مذابحه
زي ما بعض المتفاتكين قالوا
ده راجل بيعلن عن رأيه وعقيدته
وهو حر
بس بررررررررررررررررررضه
السن له حكمه
وده نص الخبر من الجريدة الكاثوليكية
بالانجليزي

9 comments:

amr220 said...

صباح الفل يا عثل


أقري الخبر اللي في الرابط و اتفرجي علي الصور


http://www.timesonline.co.uk/tol/news/uk/article2056380.ece

e7na said...

472389;ghlkhحاسس انك تقصدى حد معين بموضوع السن ده

amr220 said...

خبر عجيب فعلا

زواج ابن بن لادن من انجليزيه

العروسان التقوا في مصر و اتجوزا علي الشريعه الاسلاميه و الست غيرت اسمها ل زينه هحمد

العريس عمر بن لادن عنده 27 سنه و العروسه 51 سنه

الف مبروك

جبهة التهييس الشعبية said...

عمرو

اعوذ بالله دي مرة عنيها فيها شيطان
شكلها شرير قوي

وهو ده ابن بن لادن نفسه
يعني ابن اسامة
وللا ابن اخوه وللا ايه؟

اهو تلاقيه عبيط هو راخر

احنا

آه يا لئيم

أحمد بدوى said...

كله عك فى عك و مفيش حد بيتعلم من تاريخه ... يعنى ما هو قبل كدة الكنيسة قالت أن الأرض مركز الكون و حرقت المخالفين لكلامها و طلع كلام واحد عامل دماغ ... و بسبب الطريقة دى أوروبا بقت أغلبها ضد الدين و الكنيسة ... يعنى الراجل التالت ده متعلمش أن التطرف فى الرأى مش بيجيب غير نتيجة عكسية ؟؟؟

بعدين هو مش واخد باله أن اللى بيطلع القرار هو الكنيسة و اللى يرجع فى نفس القرار هو نفس الكنيسة ؟؟؟ يبقى ازاى عندها الحقيقة المطلقة اذا كانت بتغيرها كل شوية ؟؟

و على فكرة موضوع الحقيقة المطلقة ده موجود عند ناس كتير فى كل الأديان و العقائد مش عند الراجل ده بس يا نوارة و مسلمين كتير بيعتبروا مجرد النقاش فى أى موضوع دينى -=- نقاش يعنى أخد و رد مش أخد بس -=- اعتداء على الدين و قلة ايمان

amr220 said...

انتي مش عاجبك حد؟؟؟؟

هههههههههههههههه

اولا باين عليها حلوه من الصور و عينيها زرقه . . هي كبيره عليه 24 سنه بس . . هههههه . . بس من الصور شكلها لسه بخيرها . . و اهم حاجه انهم يكونوا بيحترموا بعض و متافهمين

ثانيا الست اسلمت و اتجوزت علي سنه الله و رسوله. . و غيرت اسمها من جين فيليكس براون ل زينة محمد . . فين الشيطان بقي؟

ثالثا ايوه دا ابن بن لادن الرابع و اسمه عمر اسامه بن لادن

رابعا ليه بس الغلط ياعثل؟ انتي تعرفيه عشان تقولي عليه عبيط؟
من الصور واضح ان شكله وسيم جدا و شكله مش متزمت و لا متطرف و لا واخد جنب

و بصراحه انا فرحت . . علي الاقل ماحدش موّت حد في الخبر ده


ناس بتجوز و فرحانه . . عقبالك يا عثل

:)

حابعت لك الصور علي الايميل بتاعك . . ياريت تعملي بوست و نشوف رأي الناس ايه؟

يااااااه . . فعلا دنيا غريبه . . ابن بن لادن يتجوز واحده انجليزيه!!! عجبي


تحياتي

amr220 said...

الله يكون في عون الأخوه الاقباط


بعد كل الصويت و الجعير و مسرحيات كنت اعمي مسلم و بعدين فتحت عيني عالمسيحيه و المحطات الفضائيه و الاذاعيه و غرف الشات بتاعت التنصير و المظاهرات بتاعه امريكا و استراليا ضد المسلمين الغزاه و مطالبتهم بقطع المعونه عن مصر و حتي كمان ضرب مصر بالصواريخ


طلع ايمانهم ناقص


ههههههههههههه



ملحوظه: اخر مظاهره اقباط في امريكا كانت الشهر اللي فات في نيويورك امام الامم المتحده احتجاجا بقه علي ايه؟ ايوه .. احتجاجا علي حرب التطهير العرقي اللي في مصر ضد المسيحين


لاقيت حاجه كمان يا أبله نواره

الكشف عن وثيقه امريكيه عن تركيز المعونه الامريكيه لمصر علي مواقع تجمع الاقباط . . يعني بالعربي من جاور القبطي سعد

حصلت وكالة أنباء أمريكا إن أرابيك علي نص وثيقة مقدمة للكونجرس الأمريكي يقر فيها مسؤول بارز في هيئة المعونة الأمريكية بأن واشنطن غيرت في السنوات الأخيرة هيكل المعونة المدنية لمصر لتركز بشكل غير مسبوق علي المناطق السكنية التي يمثل الأقباط أغلبية فيها، وعلي ما سمته الوثيقة «تقوية» منظمات غير حكومية مسيحية قبطية، منها ما يقوم «بمراقبة التسامح الديني».
وقدم هذه الوثيقة الواقعة في عشر صفحات للكونجرس الأمريكي، مساعد مدير هيئة المعونة الأمريكية لشؤون آسيا والشرق الأدني جيمس أر كوندر، أمام اللجنة الفرعية لشؤون الشرق الأوسط المتفرعة عن لجنة العلاقات الخارجية في مجلس النواب الأمريكي.
وصدرت الوثيقة بتاريخ ١٧ مايو ٢٠٠٦، أي العام الماضي، غير أنها آخر وأحدث وثيقة تفصل السياسة الأمريكية فيما يتعلق بالمعونة في مصر، التي تعد ثاني أكبر متلق للمعونة الأمريكية الثنائية في العالم بعد إسرائيل.
كما أن الوثيقة هي الوحيدة التي تتعلق بالتغييرات التي تجريها الولايات المتحدة حاليا علي هيكل معونتها للحكومة المصرية. وجاء في الوثيقة بالنص: «إن مشروعات هيئة المعونة الأمريكية في الصحة والتعليم والبنية التحتية وتنمية المجتمع المدني تعمل الآن في كل منطقة ذات نسبة سكانية قبطية كبيرة، وبشكل رئيسي في جنوب مصر وفي مدن مثل القاهرة والإسكندرية».
وأضافت الوثيقة: «لقد قامت هيئة المعونة الأمريكية في برامج المياه بتركيب محطات معالجة مياه وتنقيتها رمليا وحسنت عمليات جمع المياه الفاسدة وأنظمة المعالجة، كما أعادت تأهيل وتوسيع محطات المياه في ١٨ قرية من القري ذات النسبة السكانية القبطية الكبيرة. وزادت نسبة التمويل المخصصة للقري ذات النسبة السكانية القبطية الكبيرة تحت برامج معالجة المياه وحدها علي ٢٠٠ مليون دولار خلال السنوات الخمس الماضية».

هشام رمضان said...

ايه الكلام ده ,, والله الجبهة دي لذيذة جداً ,, تحياتي لللي بيكتب فيها
ــــــــــــــــــــــــــــــــــ

الطائر الحزين said...

السلام عليكم

اليس الله بكاف عبدة
انا كفيناك المستهزئين

عارفة فعلا عندما يظن الشخص انه وصل لاعلى قمة المعرفة ينتظر يركب الزحليقة اللى نازلة علشان هينزل على رقبتة تتكسر ولا هينفع فيها جبس ولا اسمنت حتى

وفوق كل ذى علم عليم

العبرة أن غاية كل علم لابد ان تصل بنا الى عجزنا أمام علم الله
وان لم يحصل هذا سنكون مثل قارون عندما قال

انما أوتيتة على علم

فكانت النتيجة
فخسفنا به وبدارة الأرض

يبقى الباندكت الثالث يخاف على مكان معيشتة ويستنى الخسف

تحياتى