Saturday, 7 July 2007

معلومة وجات لحد عندي


والله أنا شلت البوست
لأن نائل الطوخي نصحني بأن الكلام ده ممكن يبقى
مش أخلاقي
ورغم حرقة دمي
ورغم إني كل ما افتكر منظر خبير الاصوات
وهو عرقه مرقه وعمال يتهزأ
أعيط بصوت عالي
بس انا استوجهت النصيحة وشفت انها مخلصة
وزي ما قلت لنائل
بصراحة انا مغلولة منه
ولو كان ابن باشا كان ياريت
عشان اطلع كل فضايح البشوات على جتته
بس عموما انا فكرت في اني اخلي الفيديو
وتشوفوه
شوفوووووووه
غصب عنكوا
والا ح افرغه تاني
كفاية الواحد يشوف الفيديو ده عشان يعرف يحكم
على اسلاك واللي بيدافع عن اسلاك
شوفوه وقولوا لي مين في الدنيا يستاهل كده؟
حتى كان لو زعيم مافيا ارهابية بتتاجر في اعضاء الاطفال
مين يستاهل كده؟
ومين قلبه يجيبه يدافع عن واحد بيعمل كده
وفوق ده كله يهين المجني عليه ويهين اهله وطبقته ومهنته
ويهين الشاهد والشهادة اللي هو حاصل عليها ومهنته
حتى لما قال له انا تمكنت من دخول كلية الاعلام والحصول على شهادة الاعلام
قال له: هئ...جامعة مفتوحة
يعني ده لو مافيش غير التعذيب اللي في المحكمة
كافي انه ياخد حكم

13 comments:

nael said...

ربنا يستر والموضوع ميبقاش فيه تجريح في حد على اساس هو كان شغال ايه وكان فقير ازاي مش على اساس هو بيفكر ازاي دلوقتي

BeLiEvEr said...

الراجل ده حد دعى عليه و الله، و قع فى طريق اللى مبيرحمش!!
رويتر !!!!!
:)))

مش مشكلة، اهوه ربنا بيخلص منه سيئات! إديله مترحمهوش يا نوارة
:)

viva egypt said...

عروستى... وربنا يستر ماطلعش انا لأنى كنت باشتغل ايام الدراسه اص محدش عارف الايام مخبياله ايه ربنا يستر

جبهة التهييس الشعبية said...

وانا ما جرحتش في حد
ومش عيب الانسان بيشتغل ايه ولا اصله ايه
وانا ابويا فلاح
وكان بيشتغل في الارض عند عمامه اللي اخدوا ارض ابوه بعد ما مات وذلوا ولاد اخوهم وحطوا ابويا في ملجأ عشان كل ذنبهم ان ابوهم مات
وبعدين طلعوه وخلوه يشتغل نفر بلقمته في ارضه

اجي انا بقى اختصم مع حد واقول عليه ده فلاح واجري وتربية ملاجئ مثلا؟
رد الفعل الطبيعي للناس كلها انهم ح يقولوا لي وايه يعني يا نوارة ما ابوكي فلاح واشتغل اجري واتربى في ملجأ

صح؟

يبقى العيب في ان ابويا فلاح

وللا العيب في وضاعتي وتنكري لاصلي

ممكن اعرف ايه اللي يجرح في ان الواحد يشتغل ويدرس
وايه اللي يجرح في ان الواحد ابوه كان راجل بسيط وعلمه؟

اللي يجرح بقى ان واحد يقف في وسط المحكمة ويمسك الشاهد ويقول له: انت كهربائي انت
دبلون

ويقول في مرافعته الجاهل الحاقد المضلل الصايع الكذاب

الحاصل على الدبلوم

لو كان خبير الاصوات ده اخوك الكبير وللا ابوك وشفته بيتهزأ كده كنت قبلت يا نائل؟

انا كل اللي عايزة اوصله ان كلنا اصلنا بسيط
حتى محمد علي باشا الكبير
كان اصلا عسكري
والمهنة البسيطة والاصل البسيط مش عيب عشان يتم الاستناد على ضعف موقف الشاهد او المدعي لمجرد انه بشهادة بسيطة ومن اصل بسيط وبيشتغل شغلانة بسيطة

انت لو كنت سمعت الكلام اللي اتقال على سواقين الميكروباص

كأنهم
untouchable
بتوع الهندوس

طيب ليه قلة الادب دي

ولو كان ابوه باشا ابن باشا

ياريت

لان بقى البشوات فضايحهم متلتلة

كنت دورت وراه وطلعت تعامله مع الانجليز والسجن اللي بيعمله للفقرا واللحمة اللي بيدفنها عشان الخدامين ما ياكلوش منها
وكنت برضه دورت في اصله
وانت عارف البشوات دول اصلهم كلهم جرابيع يعني
بس اخد البشاوية عشان قال نكتة ضحكت الخديوي وللا باس جزمة افندينا

بس للاسف
طلع ابن ناس كويسين ما يستاهلهمش وضفرهم برقبته

المفروض انه كافح وعرف معنى الكفاح
والمفروض انه يدافع عن المكافحين اللي زيه مش يتنكر لهم
وللا ايه؟

viva egypt said...

يا نهار ابيض هوه اخينا دا طلع من الانواع عارفه يعنى ايه اصله واطى مش يعنى انسان من عيله بسيطه غير عيله مبارك لا انسان واطى يعنى واحد بيتنكر لأصله وبيستعر من اهله ودا اقل وصف للحيوان ده

nael said...

تمام. انا عارف انه انسان شرموط. لم اجادل في هذا. جادلت فقط ان يتم الاحتجاج عليه ليس على اساس عنصريته القذرة ضد الفقراء وانما على اساس هو كان شغال ايه وكان بيسرح فين
بمعنى اخر خفت الناس اللي بيقروا الكلام دا يفتكروكي بتعيبي في الراجل لانه كان بيسرح على كوبري شبين او بيستلف سكر من الجيران. الا ترين ان هذا ربما سيكون جارحا قليلا، ربما بالنسبة له وربما بالنسبة لوالده، وانا لا اعرف من هو اصلا
ارجوكي يا نوارة. ارجوكي. ركزي في خطابه العنصري السافل ضد سواقين الميكروباص او في تنكره لفقراء بلده، لكن التفاصيل الباقية دي. انا ، اخلاقيا، مبستريحش لذكرها ان ذكرت
وعموما دا يفضل راي من صديق مخلص لك ان تأخذي به او لا

ابو النجوم said...

خلى بالك يانوارة كلامك هيتفهم غلط والمثل بيقول حبيبك يقرقش لك الزلط وعدوك يتمنى لك الغلط .والكلام هنا عايم ويمس ناس كتير وناس كبار قوى فى البلد لان معظم الكبار ابوهم كونستابل وبلاش .
وبعدين ابوكى ماهو زى الفل اهو انتى هتفترى على الراجل .
باى ياحلى مهيسة فى الشعب المنيل على عينة.
ابو النجوم

جبهة التهييس الشعبية said...

viva egypt
وابو النجوم

انتوا مش معانا خاااالص
:)

believer
هههههه

نائل

حاضر يا نائل نصيحتك على راسي وح اسمعها

انت عشان شايف الامر على بعضه ممكن تكون شايف احسن مني

viva egypt said...

؟؟؟؟؟؟؟؟؟؟؟ امممممممممممممممممممممممممم ازاى طب وضحيلنا الصوره

Muslim&Quptia said...

تصحيح بسيط
محمد علي باشا الكبير قبل مايبقي عسكري كان دخاخني حضرتك
بس سيبك انتي
شردتي للراجل
ربنا داعي عليه يااما نايم مراته غضبانه منه عشان يقع تحت ايد من لايرحم:)

Desert cat said...

هو مش عيب انى اشتغل واكسب لقمتى بعرق جبينى
العيب انى اتنكر للى خلفونى واقول اصل ابويا كان الباشا فلان ولما اقابله فى اشلارع الف وشى الناحية التانيه اصله لامؤاخذه يعنى راجل على قد حاله
وعلى راى الست من فات قديمه تاه

bahry said...

العزيزة نوارة
انا مع وجهة النظر انك ممكن تتفهمي غلط في البوست ده خاصة انه متكرر ولم يضيف جديد واحد من طبقة اجتماعية عادية وبينتقد الناس علي اساس طبقي
مش ده انت قلتيه في بوست سابق بتاع الكونستبل

ويمكن ردك كان احلي واوضح من البوست نفسه

joe said...

نوارة

هذا الرجل يمارس العنصرية على نفسه و على البيئة التي خرج منها .. وهذا مرض و عقدة حقيقية .. لو كان ابن عائلة اقطاعية مثلا كنا قلنا انه تصرف ممكن يكون طبيعي
من شخص ربما تربـّى على الفكر الطبقي و العنصري .. أقول ربما .. لأنه دي مش قاعدة أبدا ..وانت عارفة ده طبعا و ما قلتي عكس ده .
ـ كتير جدا جدا من أبناء العائلات ذات الأصول الإقطاعية لا تجدي منهم أي تصرف أو كلمة عنصرية ..
ـ 90% من أبناء الوطن العربي أولاد عمال و فلاحين .. و أيضا تسعين بالمية من العباقرة حول العالم هم أبناء طبقات فقيرة و متوسطة و يمكن معدمة..و معظمهم يفخرون بذلك .. لكن هذا الرجل و أمثاله مرضى فعلا .
ـ فيه مذيع لبناني مشهور جدا و انت أكيد حا تعرفي انا بتكلم عن مين .. أنا عمري ما طقته و لا حبيته ..
لكن مرّة طلع على التلفزيون و هو بكامل أناقته و لابس بدلة تمنها يعادل أتعاب عشر قضايا لمحامي زي صاحبنا
و قال : أنا أبوي كان بيصـلـّح أحذية طول عمره .. و ربـّاني و علـّمني من شغله في تصليح أحذية الناس .. و أنا بفتخر بأبوي اللي كافح ووصلني للي بقيت فيه الان .. وقتها ما بـتـتخيلي قد ايه كبر في عيني الرجل ده ..
ـ أي شخص يعاير الناس بفقرها هو انسان فقير عقليا و عمره ما بيصير غني حتى لو كان معاه مال قارون
ـ افضحيهم يا نوارة .. يستحقوا الفضيحة و الضرب على قفاهم كمان