اللواءات بيقولوا للي في التحرير يروحوا، وانا باقول يروحوا برضه

تحديث للتذكير:
لو تذكروا المقابلة مع هشام البسطويسي لما قال ان الثورة المضادة بتعمل على ان ناس تعمل اعتصامات ومظاهرات باعداد قليلة لا تكسب الشارع، وتفضل الاعداد تتناقص لحد ما يرجعوا 200 واحد على سلم النقابة وبعدين مبارك ينزل مظاهرة مليونية ترجعه او تجيب ابنه... وقال ان النزول يوم الثلاثاء اللي كان العدد فيه 10 الاف كان غلط.. وقال لنا: ما تتكررش تاني، ركزوا على الحشد ليوم الجمعة بس، وده ضاغط كافي، النزول للتحرير في وسط الاسبوع بيستعدي الناس
---------------
اللي بيحصل ده خصم من يوم الجمعة

والحقيقة اننا كان لازم يوم الجمعة لما نزل نص العدد بتاع جمعة القرضاوي نحترز ونعرف اننا نقدم الجدول الزمني وما ننزلش الا بعد انتهاء الجدول الزمني

انما المرواح والمجي على التحرير باعداد، عشرتلاف، وبعدين خمستلاف، وبعدين دلوقت بتاع الفين واحد في التحرير، احنا كده بنخسر، وبنخسر الشارع قبل اي حاجة

حاطط وشك في وش الجيش وحكومة شفيق ومدي ضهرك للشارع كالعادة زي ما المعارضة بتعمل طول عمرها

طول عمر المعارضة حاطة وشها للنظام، والنظام حاطط وشه لامريكا وامريكا باصة لاسرائيل وواقفين عاملين طابور والناس وراهم 

بصة مبارك لامريكا خسرته كرسيه

وبصة المعارضة للجيش والشفيق حتخسرها الشارع اللي هو اساسا عمل الثورة دي

ارجعوا، مش حنعرف نحشد ليوم الجمعة كده، وكل يوم بننزل فيه من غير اذن الناس، اللي هم اهم من الجيش ومن شفيق ومن اي حد، كل ما بنخسر اكتر، وبناكل من العدد اللي جاي يوم الجمعة

الجيش ضربنا فجر 26 والناس انحازت للجيش، لاسباب عديدة:

1- فيه علاقة حب بين الجيش والشعب فعلا، الشعب بيحب الجيش، وبيهابه، وحيكرهنا لو حس اننا بنورطه في تصرفات تهز صورته في عينه، مش حيكره الجيش، ماحدش بيكره جيشه، والمصريين بالتحديد مش حيكرهوا جيشهم مهما عمل، حيكرهوا اللي اضطر جيشهم - من وجهة نظرهم - انه يعمل تصرف يتنافى مع عشمهم فيه

2- اننا في اليوم ده اعتصمنا من غير اذن الناس، ولو كان الناس اذنت لنا كانت باتت معانا

قبل ما تستأذن اللواءات، وقبل ما تستأذن اللي معاك، استأذن الناس، الناس ما اذنتش يبقى ما تكملش، رحت لقيت العدد قليل روح، الناس كده مش عايزة، ومدام مش عايزة تبقى مش عايزة

وكل ما بتشيل الناس منك كل ما بتخليهم ما ينضموش لك في اي حاجة، ما تجبرش الناس انها تنحاز انحيازات حتضرك وتضرهم

البيات يوم 25 اكل من رصيدنا

خلاص.. خلاص.. نفهم بقى؟ رحت تاني يوم ولقيت العدد قليل ولقيت الناس مش منفعلة معاك، بل ومتغاظة منك.. خلاص

خلاص انت كده بتخسرهم

يعني تخسر الجيش وتخسر الناس، وتكسب ايه؟ تكسب هبلك

مش مهم تكسب الجيش، المهم تكسب الناس

الناس نوعين، نوع بني اسرائيل ده، يولعوا بجاز وسخ

واغلبية نزلت معاك واتبهدلت واتقتلت واتعورت وبتقول لك مش عايزة انزل.. يبقى خلاص، هم ادرى، وبوصلتهم احسن، بدل ما تقعد تتكلم عليهم بشكل نخبوي وتقول جايين يطبلوا ويغنوا، جايين ياكلوا حمص الشام، اتنيل على عينك واسمع كلامهم

وامشي وراهم مش تمشيهم وراك، مشيك وراهم هو اللي نجح الثورة 

انا شخصيا شايفة ان يوم الجمعة مش حيبقى ناجح ولا حاجة، ولو اني نازلة، انا بانزل حتى في الحاجات اللي مش موافقة عليها عشان الواجب بس، للمؤشرات الاتية:

1- يوم الجمعة اللي فات العدد كان مليون بس تقريبا، الجمعة اللي قبلها كانت خمسة مليون، يبقى الجمعة الجاية حتتناقص

2- ضرب الجيش للمعتصمين قلل من رصيد المعتصمين مش الجيش، وشيل الناس منا

3- الناس مش شايفة سبب قوي للنزول

لذلك، كنت افضل الجدول الزمني والاعلان اننا مش حننزل لمدة تلات جمع، وحنستنى انتهاء الجدول الزمني

لكن اذا كنا حنحشد ليوم الجمعة، يبقى تأكدوا، تأكدوا، تأكدوا، ان كل يوم بننزل فيه باعداد قليلة وسط الاسبوع بيسحب اضعافه من العدد اللي جاي يوم الجمعة

الادعاء بان يوم الجمعة مش مؤثر دي هلاوس سمعية وبصرية

يوم الجمعة بيبث مباشر للقيادات العسكرية وبيسمعوا فيه بالظبط الهتافات والطلبات ايه، ويوم الجمعة ضاغط، والعدد ضاغط، واهم حاجة بالنسبة لهم العدد، لو العدد كبير حيعرفوا ان دي رغبة الناس

ودي مثلا احد الاسباب  اللي خلت بعض ظباط الجيش يقووا قلبهم ويضربونا، ان عددنا كان قليل، احنا بالنسبة لهم مش الشعب اللي ما يهونش عليهم يضربوه، احنا ناس مندسة عايزة تعطل البلد، نستاهل الضرب، دي طريقة تفكير الجيش، ودي طريقة تفكير ناس كتير.. والمفروض ان شكوانا من اننا انضربنا اليوم ده نحاول نصالح الناس فيها باننا نؤكد ان عمرنا ما حنمد ايدنا على الجيش واننا لسه بنحترم الجيش وان ده ما كانش العشم ابدا واننا متأكدين ان القيادات ما ادتش اوامر، وان فيه فعلا مندسين عشان يوقعوا بين الشعب والجيش

وده تطييب لخاطر الناس اللي بتحب الجيش.. مش مفروض انك تتجاوز مع الجيش حتى وانت بتشتكي من سوء معاملته كرامة لعيون الشعب اللي فعلا بيحبه

والله عايز تتخانق.. اتخانق، بس شوف الخناقة حتكسبك ايه؟

عايز ترجع لعقلك وتمشي ورا وجدان الشارع يبقى اللي في التحرير دلوقت يرجعوا مدام الجيش قال لهم ارجعوا، وما ينزلوش تاني لحد يوم الجمعة، ولو فيه وسيلة لتقديم جدول زمني والغاء يوم الجمعة يبقى ياريت

ياريت

ياريت

ابوس ايدكم يعني

ولازم ترجع الهيبة للجيش، مش مجاملة للجيش، مجاملة للشعب اللي فعلا بيحب الجيش، ومن زمان وهو بيحبه، ومش بيقبل عليه اهانة، وفي اي خناقة حينحاز له، حتى لو كان هو اللي غلطان، وكبيرة عنده قوي ان الجيش يعتذر، وانا شخصيا متأكدة ان فعلا القيادات ما ادتش الاوامر دي، بس حتى الظباط الصغيرين عشان يوصل له احساس اننا نستاهل الضرب، يبقى ده احساس مصريين كتير، ماهم الجيش والشعب ايد واحدة فعلا، لان الجيش من الشعب، دول مش مؤسسة معزولة زي الشرطة، دول شعب

سايس حصانك

عارفة ان الكلام ده مش حيعجب ناس كتير

وعارفة اني اساسا ماحدش بيسمع كلامي لاني واحدة ست

بس انا باخلص ضميري

الا هل بلغت؟ اللهم فاشهد