Sunday 27 February 2011

التعديلات الدستورية جميييلة

تحديث:
اللنك ده بيقول متزوجا من غير مصري.. يعني ممكن الستات تترشح، مش عارفة انهي خبر الصح، حنستنى لحين التأكد


اللنك ده فيه نص التعديلات الدستورية
وانا مبسوطة منها قوي، اهم حاجة باسطاني في التعديلات انها بتنص على ان الدستور ده مؤقت، وانه بيحط كل حاجة في ايد القضاء، ودلوقت تلقائيا القضاء بقى مستقل، انا نفسي بقى يعملوا قانون لوحده للقضاء يضمن ان القضاء ده يبقى مستقل اخر حاجة... ههههه ما اعرفش بقى انا ما بافهمش في القانون، بس اللي اقصده يعني انهم يعملوا حاجة يخلوا القاضي يمسك رئيس الجمهورية يمهمطه وما يقدرش رئيس الجمهورية يفتح بقه، نفسي منصب رئيس الجمهورية ده يبقى منصب اللي نعوز نعذبه، ومبسوطة ان الانتخابات حتبقى بالرقم القومي زي ما اللجنة قالت امبارح، والقوائم بالرقم القومي
بالنسبة للتلاتين الف توقيع اللي قلقوا الناس، هي تقلق لو قانون الاحزاب زي ما هو، لكن انا عرفت ان اللجنة انتهت من مسودة قانون الاحزاب وان شاء الله خير
انا نفسي في حاجة واحدة بس: استبعاد كل اعضاء الحزب الوطني من خوض الانتخابات المقبلة، اللي هي الشعب والشورى والرئاسة
يا ريت، انا مش طالبة حل الحزب الوطني، اللي هو مفروض والله لانه اساسا حزب مقرف، ولا طالبة استبعاده الى الابد، انا طالبة استبعادة في اول انتخابات بس
واظن ده حقنا يعني
وباطلب من لجنة التعديلات الدستورية انها تعمل لنا الحكاية دي في قوانين الانتخاب، عشان هم بيعملوا القانون كمان

انا شايفة ان التعديلات الدستورية عملت كل اللي احنا عايزينه منها لسه بقى بيعمل قانون الاحزاب وقوانين الانتخابات
وحانقل برضه نص التعديلات الدستورية عشان ننبسط كلنا بعد يوم نكد امبارح 
الحمد لله... لجنة التعديلات الدستورية ما خيبتش املنا اللي عمال يخيب مؤخرا كذا مرة كدهون

وفيما يلى نص مواد الدستور التى تم إدخال تعديلات عليها


مواد الدستور التى تم إدخال تعديلات عليها


(مادة ٧٥)


يشترط فيمن يُنتخب رئيساً للجمهورية أن يكون مصرياً من أبوين مصريين، وأن يكون متمتعاً بحقوقه المدنية والسياسية، وألا يكون قد حمل أو أى من والديه جنسية دولة أخرى، وألا يكون متزوجاً من غير مصرية، وألا تقل سنه عن أربعين سنة ميلادية.


:) المادة دي بتقول ضمنا ان مافيش ست حتترشح لأنها بتقول "وألا يكون متزوجا من غير مصرية".. يالا، نثور لكم وناكل من بيتنا، 


(مادة ٧٦)


يُنتخب رئيس الجمهورية عن طريق الاقتراع السرى العام المباشر.


ويلزم لقبول الترشيح لرئاسة الجمهورية أن يؤيد المتقدم للترشح ثلاثون عضواً على الأقل من الأعضاء المنتخبين لمجلسى الشعب أو الشورى، أو أن يحصل المرشح على تأييد ما لا يقل عن ثلاثين ألف مواطن ممن لهم حق الانتخاب فى خمس عشرة محافظة على الأقل، بحيث لا يقل عدد المؤيدين فى أى من تلك المحافظات عن ألف مؤيد.


وفى جميع الأحوال لا يجوز أن يكون التأييد لأكثر من مرشح، وينظم القانون الإجراءات الخاصة بذلك كله.


ولكل حزب من الأحزاب السياسية التى حصل أعضاؤها على مقعد على الأقل بطريق الانتخاب فى كل من مجلسى الشعب والشورى فى آخر انتخابات، أن يرشح أحد أعضائه لرئاسة الجمهورية.
هااااايل حكاية مقعد واحد بس دي، استوحياطا برضه
وتتولى لجنة قضائية عليا تسمى «لجنة الانتخابات الرئاسية»، الإشراف على انتخابات رئيس الجمهورية، بدءاً من الإعلان عن فتح باب الترشيح وحتى إعلان نتيجة الانتخاب.


وتُشكل اللجنة من رئيس المحكمة الدستورية العليا رئيساً، وعضوية كل من رئيس محكمة استئناف القاهرة وأقدم نواب رئيس المحكمة الدستورية العليا، وأقدم نواب رئيس محكمة النقض، وأقدم نواب رئيس مجلس الدولة.
هاااااااااااااااااااييييلللللل
وتكون قرارات اللجنة نهائية ونافذة بذاتها غير قابلة للطعن عليها بأى طريق وأمام أية جهة، كما لا يجوز التعرض لقراراتها بوقف التنفيذ أو الإلغاء، كما تفصل اللجنة فى اختصاصها، ويحدد القانون الاختصاصات الأخرى للجنة.
ايوة كده.. اديلو على عينه.. اقصد الرئيس القادم، ايا كان بقى
وتُشكل لجنة الانتخابات الرئاسية اللجان التى تتولى الإشراف على الاقتراع والفرز على النحو المبين فى المادة ٨٨.


ويُعرض مشروع القانون المنظم للانتخابات الرئاسية على المحكمة الدستورية العليا قبل إصداره وتقرير مدى مطابقته للدستور.


وتُصدر المحكمة الدستورية العليا قرارها فى هذا الشأن خلال خمسة عشر يوماً من تاريخ عرض الأمر عليها، فإذا قررت المحكمة عدم دستورية نص أو أكثر وجب إعمال مقتضى قرارها عند إصدار القانون، وفى جميع الأحوال يكون قرار المحكمة ملزماً للكافة ولجميع سلطات الدولة، ويُنشر فى الجريدة الرسمية خلال ثلاثة أيام من تاريخ صدوره.


(مادة ٧٧)


مدة الرئاسة أربع سنوات ميلادية تبدأ من تاريخ إعلان نتيجة الانتخاب، ولا يجوز إعادة انتخاب رئيس الجمهورية إلا لمدة واحدة تالية.


(مادة ٨٨)


يحدد القانون الشروط الواجب توافرها فى أعضاء مجلس الشعب ويبين أحكام الانتخاب والاستفتاء.


وتتولى لجنة عليا ذات تشكيل قضائى كامل الإشراف على الانتخاب والاستفتاء بدءاً من القيد بجداول الانتخاب وحتى إعلان نتيجته، وذلك كله على النحو الذى ينظمه القانون.


ويجرى الاقتراع والفرز تحت إشراف أعضاء من هيئات قضائية ترشحهم مجالسها العليا، ويصدر باختيارهم قرار من اللجنة العليا.


(مادة ٩٣)


تختص المحكمة الدستورية العليا بالفصل فى صحة عضوية أعضاء مجلس الشعب.


وتقدم الطعون إلى المحكمة خلال مدة لا تجاوز ثلاثين يوماً من تاريخ إعلان نتيجة الانتخاب، وتفصل المحكمة فى الطعن خلال تسعين يوماً من تاريخ وروده إليها.


وتعتبر العضوية باطلة من تاريخ إبلاغ مجلس الشعب بقرار المحكمة.


(مادة ١٣٩)


يُعين رئيس الجمهورية خلال ستين يوماً على الأكثر من مباشرته مهام منصبه، نائباً له أو أكثر ويحدد اختصاصاته، فإذا اقتضى الحال إعفاءه من منصبه وجب أن يُعين غيره.


وتسرى الشروط الواجب توافرها فى رئيس الجمهورية والقواعد المنظمة لمساءلته على نواب رئيس الجمهورية.


(مادة ١٤٨)


يعلن رئيس الجمهورية حالة الطوارئ على الوجه المبين فى القانون ويجب عرض هذا الإعلان على مجلس الشعب خلال السبعة أيام التالية ليقرر ما يراه بشأنه.


فإذا تم الإعلان فى غير دور الانعقاد وجبت دعوة المجلس للانعقاد فوراً للعرض عليه وذلك بمراعاة الميعاد المنصوص عليه فى الفقرة السابقة.


وإذا كان مجلس الشعب منحلاً يعرض الأمر على المجلس الجديد فى أول اجتماع له.


ويجب موافقة أغلبية أعضاء مجلس الشعب على إعلان حالة الطوارئ.


وفى جميع الأحوال يكون إعلان حالة الطوارئ لمدة محددة لا تجاوز ستة أشهر ولا يجوز مدها إلا بعد استفتاء الشعب وموافقته على ذلك.


(مادة ١٧٩)


تلغى


(مادة ١٨٩) فقرة أخيرة مضافة


ولكل من رئيس الجمهورية، وبعد موافقة مجلس الوزراء، ولنصف أعضاء مجلسى الشعب والشورى، طلب إصدار دستور جديد، وتتولى جمعية تأسيسية من مائة عضو، ينتخبهم أغلبية أعضاء المجلسين من غير المعينين فى اجتماع مشترك، إعداد مشروع الدستور فى موعد غايته ستة أشهر من تاريخ تشكيلها، ويعرض رئيس الجمهورية المشروع خلال خمسة عشر يوماً من إعداده على الشعب لاستفتائه فى شأنه، ويعمل بالدستور من تاريخ إعلان موافقة الشعب عليه فى الاستفتاء.


(المادة ١٨٩) مكرراً


يجتمع الأعضاء غير المعينين لأول مجلسى شعب وشورى تاليين لإعلان نتيجة الاستفتاء على تعديل الدستور لاختيار الجمعية التأسيسية المنوط بها إعداد مشروع الدستور الجديد خلال ستة أشهر من انتخابهم، وذلك كله وفقاً لأحكام الفقرة الأخيرة من المادة ١٨٩.


(المادة ١٨٩) مكرراً١


يمارس أول مجلس شورى بعد إعلان نتيجة الاستفتاء على تعديل الدستور، بأعضائه المنتخبين، اختصاصاته.


ويتولى رئيس الجمهورية، فور انتخابه، استكمال تشكيل المجلس بتعيين ثلث أعضائه، ويكون تعيين هؤلاء لاستكمال المدة الباقية للمجلس على النحو المبين بالقانون.


خلاص كده لا فيه تخلي ولا تنحي ولا حاجة تخوف ان شاء الله فيما يخص الدستور


ناقص بقى نخلص من شفيق يا راجل وجمال وصفوت ويحلوا لنا امن الدولة، عشان مافيش انتخابات محترمة حتتعمل طول ما امن الدولة عايش


امن الدولة مش لازم يعيش ليوم التلات... ولا الاربع


انا باحب طارق البشري قوي :) 
بالنسبة للناس بتوع: انا اعترض على التعديلات الدستورية.. فتقول له معترض ليه؟ يقول: عشان... عشان... عشان.... لان اساسا كده
:)
بس انا مبسوطة من حزب انا اعترض ده حتى لو مش موافقة معاهم على الاعتراضات
ما قعدنا تلاتين سنة نقول موافقون... ما جراش حاجة لما شوية يفضلوا يعترضوا عمال على بطال، على الاقل عشان يعملوا شوية توازن في حركة التاريخ

44 comments:

Talal Hefnawy said...

يا ست نوارة سايق عليكي النبي تحركي الموضوع دة شوية أحسن الناس مش فهماه لسة.

لو عاوزين فعلاً نقلل سلطة رئيس الجمهورية في الدستور الجديد ماينفعش أبداً موضوع التعيين في مجلس الشعب و الشورى دة خالص. أنا سمعت المستشار البشري امبارح بيقول ثلث الشعب و الشورى بيعينهم الرئيس.. يانهار اسود!!!!!!.. لسة هنعمل فرعون جديد. يعني رجل واحد له سلطة أربعين مليون مصري (مجازاً يعني)
.. مش معقول لو عاوزين ديمقراطية نضيفة.. يعني الرئيس كدة ضمان ثلث البرلمان مش ناقص غير ثلث كمان و نرجع تاني لموضوع موافقون موافقون و كأنك يا أبو زيد لا رحت ولا جيت.

Shrouk said...

انا كمان عجباني التعديلات قوي
:)

Anonymous said...

فيه أمل ايييييييييه
فيه أمل
أوقات بيطلع من ملل

Unknown said...

التعديلات 100% يا نوارة

بس بردو كان نفسى يزودو نقطة ان الوزير ماينفعش يرشح نفسه عضو مجلس شعب والعكس بالعكس

mohamad said...

حظر ترشيح منسوبي الحزب الوطني لمدة ستة سنوات . . وهذا نظرا لما أثبته المنسوبين المذكورين من فشل في إدارة البلاد أو ترسيخ مفاهيم الوطنية والديموقراطية في الوطن

Moataz Medhat said...

الحمد لله، و إن شاء الله تتم على خير.

بما إن الجيش قال إن كله يمشي بالقانون مش بالحكم العسكري.

ايه رأيك نرفع قضايا على الحزب الوطني بما إنهم زوروا الإنتخابات اللي فاتت و كده؟
يعني الإنسان اللي بيعمل شئ مخل بالشرف بيمنع من ممارسة حقوقه السياسية، فبالمثل عايزين نمنع الحزب إياه على الأقل من أول إنتخابات، و كل إعضاءه السابقين

ايه رأيك؟

marwa said...

سؤال: يعنى احنا هاننتخب مجلس شعب و رئيس جمهورية على الدستور المعدل و بعدين بعد شوية يعملوا دستور جديد اوم احنا نرجع ننتخب مجلس شعب و رئيس جمهورية تانى طب ليه؟؟ مانعمل ده من دلوقتى دستور محترم غير مرقع يضمن دولة برلمانية محترمة ديمقراطية هو احنا ورانا حاجة و متاخرين عليها !!!! فى حد بيجرى ورانا !!! و بعدين اى انتخابات حاليا مش فى مصلحة الديمقراطية الشعب بقاله شهر بس بيتكلم فى السياسة نقوم ندخله كده فى معارك انتخابيه و هو لسه وعيه القريب عايش على فكرة ان الانتخابات يعنى سبوبة !!! مش عارفة

Unknown said...

كمنتيني يا نواره جزاكي الله خير أنا نفسي بناتي الاتنين يكونو زيك

Unknown said...

يا نوارة في حاجة مهمة جدا تم تجاهلها و هي صلاحيات الرئيس و دي لو لم يتم تقليلها الرئيس اللي هايجي هايعدل الدستور تاني يوم و يخلي عدد المدد لا نهائي زي اللي قبله و اللي قبله!!!!! لازم يعاد النظر في صلاحيات الرئيس أرجوكم دي أهم حاجة!

Unknown said...

يا نوارة في حاجة مهمة جدا تم تجاهلها و هي صلاحيات الرئيس و دي لو لم يتم تقليلها الرئيس اللي هايجي هايعدل الدستور تاني يوم و يخلي عدد المدد لا نهائي زي اللي قبله و اللي قبله!!!!! لازم يعاد النظر في صلاحيات الرئيس أرجوكم دي أهم حاجة

yasser said...

http://masrey-mafko3.blogspot.com/2011/02/blog-post_26.html
يالا نغيظ شفيق ياراجل ومحمود يستاهل كل خير ياريت يانوارة تدعي للصفحة دى للرد على الحركة القرعة بتاعت مرتب محمود وخليه يخرص بقى

Rowaa said...

شكرا يانوارة على ان نورتينا بهذه التفاصيل وفرحتينا شويه
وانا موافقة معك على اصدار ما يمنع اى من هؤلاء الذين عملوا بالحزب الاوطنى او من تعاون مع هذه الحكومه السابقة من الترشيح
لكن مازلت مش قادرة افهم اين اهل القضاء والقانون واين العدالة فى السكوت على رأس الفساد مبارك وعائلته الذين بتذكرى اسماءهم
محاكمة العدلى واحمد عز تبدو وكانها لذر الرماد فى العيون
لازم اهل القضاء وكل الناس تطالب بحل الحكومة الحالية بل تعمل على حلها زى ما انتى بتقولى ولازم يتحكم مبارك وجمال وكل قؤلاء والا ينزل كل الشعب تانى

الله يكرمك ويوفقكم يا نوارة
رواء

elzahraamegahed said...

طيب بس فيه نقطه رئيس المحكمه الدستورية العليا اللى بيعينه رئيس الجمهوريه وده وفقا لقانون المحكمة الدستوريه العلي
ورئيس الدستورية العليا هو اللى بيبقى مسئول عن الانتخابات؟؟!! فلازم ما يبقاش فيه أى صله لرئيس الجمهوريه فى تعيين رئيس الدستورسة العليا ، لأنه قبل فترته التانيه ممكن يعين اللى على مزاجه. الكلام ده شرحه قاضى امبارح فى التليفزيون وضرب مثال بممدوح مرعى وإن ترتيبه فى أقدمية القضاه كان بعد الميه واتجاب عشان يظبط، فممكن يبقى رئيس الدستوريه ينتخبه القضاه أو أعضاء مجلس الشعب أو بالأقدمية المهم ما يبقاش لرئيس لجمهوريه أى دخل فى اختيار رئيس المحكمة الدستوريه علشان رئيس المحكمة الدستورية هو اللى بيشرف على الانتخابات

عايزين قضاء مستقل، وقانون القضاء نفسه يتفرمط،يا اما يعدلوا واللى يبقى مسئول عن الانتخابات لجنه من القضاه مش رئيس المحكمه الدستوريه اللى بيعينه الرئيس!!

وممكن نعرف هو مجلس الشورى ما اتلغاش ليه؟ ايه لزمته ؟.

elzahraamegahed said...

نواره معلش أنتى فى التحرير ؟ ممكن تطمنينا اعتصام التحرير أخباره ايه؟ ربنا يثبتكم ويايدكم ويمدكم بفضله وإن شاء الله بقدر ثقتنا فى الله يجعلنا منصورين

yasser said...

يا نوارة بالنسبة لمسالة توالى الملراءة فعادتا علماء القانون بياخذوا بمبداء ان الاصل فى اللغة هى التذكير يعنى اى كلام يقال بصيغة التذكير هو المقصود به الذكر والانثى يعنى لما اقول ان لايكون متزوج من اجنبية معناها انه اذا كانت المرشحة امراءة يجب ان لايكون زوجها مصرى الجنسية

BT said...

يا جماعه انتم سمعتم حلقه ابراهيم عيسى على الجزيره مباشر وحلقه منى الشاذلى فى العاشره مساءا
اللى سمع الحلقتين دول مش هيفرح اوى بالتعديلات ديه و هيعرف مشكلتهم ايه
احنا بكده هننتخب 6 مرات فى سنه واحده
يا ريت تشوفوا الحلقتين دول قبل ما تاخدوا التعديلات على انها مسلم بيها
علشان لو فى حاجه غلط نقف قصادها وثورتنا مترهش هباءا و نلاقى فلول النظام هى اللى بتحكمنا تانى

Unknown said...

كلام جميل و ممكن نلخص افضل التعليقات لحد دلوقتى:
اولا:حظر اعضاء الحزب الوطنى لمدة خمس سنوات من اى انتخابات علشان نضمن نظافة الحياة السياسية و يتبط ابراهيم كامل و البدراوى و محمود محى الدين و اعوانهم
ثانيا :موضوع عدم ترشيح الوزراء لمجلس الشعب و لا يكون عضو مجلس الشعب اللى بحاسب الوزير موظف عند الوزير
ثالثا:الية اختيار و انتخاب رئيس المحكمة الدستورية و ليس بالتعين

Doria said...

نوارة، نورت الانترنت. كنت خايفة لحسن تنفذي تهديدك إمبارح وأنا معتمدة عليك كواحد من مصادري في الغربة. سمعت إبراهيم عيسى بيحذر من إن انتخابات مجلس الشعب تكون بسرعة وتسبق انتخابات رئيس الجمهورية؟ أنا ما شفتش في أي حته جدول زمني مقترح لمواعيد الانتخابات. هل التعديلات الدستورية قالت حاجة عن الموضوع ده؟
http://www.youtube.com/watch?v=hX4Fs7wpanc&feature=BF&list=UL15fzTNEz3C8&index=11

http://www.youtube.com/watch?v=7EO9rUFNJmo&feature=BF&list=UL15fzTNEz3C8&index=12

http://www.youtube.com/watch?v=3Kzpw8pca2w&feature=related

http://www.youtube.com/watch?v=L9f8UgZsOMI&feature=BF&list=UL15fzT...NEz3C8&index=14

Unknown said...

مش ممكن ..اراهن انك قريبة مبارك ..ومش بعيد انك تكوني هو ومتنكر علشان يرجع تاني ..انت مش هاين عليكي تكتبي بوست من غير ما تهددي في الاخر اللي يخالفك في الرأي ..
طيب احنا بقي معترضين ..ومعترضين جدا ..هو مش الدستور ده بتاعنا احنا كمان ..ولا حضرتك سيد قراره ؟؟؟
اولا دي لا يمكن تكون صياغة دستورية في منطوق المواد ..ولا يمكن دي تكون صياغة البشري ابدا .. اكيد دا واحد حكالك في التليفون وانت كتبتي ..انما كصياغه ..ضعيفة جدا وتحتمل التأويل ..ولو في حد قانوني معانا حيفهم الكلام ده كويس .. ومش معني انك ما تفهميش في القانون زي مانت بتقولي انك تقعدي تزغردي وتهيصي ..
اولا وهو المهم ..لا توجد كلمة في التعديلات تقول ان الدستور مؤقث المواد بتقول لازم دستور جديد بعد انتخاب مجلسي الشعب والشوري لكن ما حدش قال ان ده دستور مؤقت ومعني كده ان الفيلم الهندي اللي حكيتهولنا بعد مقابلتك مع البسطويسي لازال قائما ((بس انا مش مقتنع ان ده ممكن يحصل )) ..
المادة الاولي ما اشترطتش كون زوجة الرئيس من ابوين مصريين لا يحمل اي منهما جنسية اخري .. واسترط سن الاربعين او اكبر وده لا يحقق طموح المصريين .. فيه علماء معاهم دكتوراة سنهم تحت الاربعين ..
المادة الخاصة بشروط الرئاسة
تسمح باللعب والتزوير وعمر ما حد حيفكر يراجع علي 30 الف اسم او توقيع خاصة لنه في 15 محافظة. والباقي لا معني له لانه لا يوجد مجلس شعب او شوري ..ولو كان هذا الدستور مؤقت ويسقط عند تشكيل مجلسي الشعب والشوري كما تقول المادة 189 مضافة والتي تعني ان الرئيس سيعين 1/3 الاعضاء لاستكمال مجلسي الشعب والشوري اي ان انتخابات الرئيس ستكون قبل المجالس ..اذا لم يكن هناك داعي لذكر موضوع عضو واحد في البرلمان والاشارة الي انه البرلمان السابق ..يعني الحزب الوطني حتتسهل له الامور وكمان المعارضة اللي هو اختارها بنفسه ..
المصيبة الكبيرة بقي ...
اللجنة القضائية العليا المشرفة علي الانتخابات الرئاسية ستكون مكونة من رئيس المحكمة الدستورية واقدم نائب له ورئيس محكم الاشتئناف واقدم نائب له ..وأقدم نواب رئيس محكمة النقض، وأقدم نواب رئيس مجلس الدولة.
طيب رئيس المحكمة الدستورية ونائبه معينين من قيل الرئيس .. وفي جزء عجيب في الصياغة ..اللجنة المشرفة دي سيد قراره ..( لا يجوز الطعن في نتائجها ) ..يعني المطلوب من الريس في المدة الاولي يعين رئيس محمكم دسنورية ونائب ليه وكمان مجلس الدولة ونوابه ..وخلاص ضمن المدة التانية ؟؟ المفروض كان يتغير نظام التعيين في المحكمة الدسنورية الاول ويكون من مجلس الشعب ..بدل الرئيس
فين البنود اللي بتحد من صلاحيات الرئيس ؟؟ وفين الدولة البرلمانية ؟؟ يعني الرئيس اللي جاي حيكون بنفس صلاحيات فرعون اللي مشي وتشتغله التليفزيونات والفضائيات ويعملوه بطل الحرب والسلام والتنمية وانه هو اللي بني الاهرام وحفر النيل ..واسبوعين تلاقي نسخة من مبارك وناخد لنا شهرين نخلعه من الكرسي .. مش كلام الحقيقة ؟؟
فهميني بقي بتهيصي علي ايه وفرحانة بايه ؟؟ الصياغة غير محكمة وتأويلية ..انا قريت لطارق البشري حاجات ادبية ذات صياغة اكقر احكاما من دستور اللب ده .. واذا دخلنا نظرية المؤامرة بتاعت نوارة وعفريت مبارك ففي الموضوع يطلع ان الامور تخوف بجد ..انا ضد هذه التعديلات واري انها لا ترتقي الي مستوي طموحات ثورة 25 يناير ..

Unknown said...

انا هددت المخالفين في الرأي

طب ما تجيش هنا تاني بقى عشان دي مدونة مبارك

aly said...

أستاذة نوارة
بقى هلا هلا على الجد والجد هلا هلا عليه
ماينفعش ست تبقى رئيسة جمهورية
مش هتبقى خنقة في البيت وفي البلد

عموما التعديلات ممتازة وربنا يتمها على خير ويبعد عننا ولاد الحرام بعد كدة تيجي ست يجي قرد مش هتفرق

Unknown said...

ده كلام جد ولا هزار ؟؟ ما ستبعدش منك يصراحة ..انت ديكتاتورة درجة اولي ممكن نعرف اسمك نوارة نجم ايه ؟؟ وفيه مبارك في الاخر ولا لا ؟؟

سكوت هنصوت said...

طب قبل ما تتنططي كده من الفرحة..إقري الكلام ده وقوليلي رأيك ايه؟

utopia said...

نوارة لا مش لازم تطمنى ولا تثقى الا فى الله
مثلا لو استثنى الدستور ترشيح المرأة للرئاسة ده معناه ان المادة معرضة للطعن

ووجود ذكر لمجلسى الشعب والشورى ليه؟؟
ايه لازمة مجلس الشورى؟
وليه يكون من حق الرئيس ومجلس الشعب فقط تعديل الدستور هانرجع تانى ما يبقاش لنا كلمة؟
وفكرة تعيين اعضاء للشعب والشورى اكبر غلط لازم كله بالانتخاب مش هانعيده تانى

لكن انا متفق معاكى انه يجب منع اعضاء الحزب الواطى من الترشح لاى انتخابات او منصب خلال الانتخابات الاولى لانهم هايفسدوا الانتخابات 100 %
وطبعا امن الدولة وصفوت وعزمى و وزارة شفيق كلها

rahrom said...

فيه حاجة مهمة يانوارة لا حاجتين اول واحدة بيقول سن الرئيس لا يقل عن 40 وبدون حد اقصى ليه مثلا واحد عنده 85 سنة زى مبارك يرشح نفسه ولا حاجة وسبعين زى عمر سليمان ولا يقل عن 40 ليه مهو كاميرون بتاع بريطانيا عنده 37
تانى حاجة الناس مابقاتش متحمسة زى الاول للمظاهرات وفيه اللى بيقول دول مش عاجبهم العجب والجيش زهق عاوزين طريقة لتوعية الغلابة دول بالكارثة المتوقعة لو ماعتصمناش تانى انا حاسة بضياع وخوف فظيع ومش شايفة حل فى الافق احساسى ان طنطاوى ستار لمبارك وبتاع ايه سافر المخلوع للنمسا بطائرة الرئاسة واستقبله السفير المتعوس بتاعنا هناك وسياسة ترك الدول المحيطة تموت زى ماهى انا يائسة جدا ارجوكى قوليلى وفهمينى بحق ربنا تردى على انا مش مقتنعة ان الجيش عمل كده بدون قصد

علاء زين الدين said...
This comment has been removed by the author.
Tears said...

نوراة انا مش فاهمه حاجة تعديلات ايه اللى جميلة ده ترقيع للدستور و اللى جاى اسوأ

اسمعى رايى البرادعى و نور و ايمن نور و ثروت بدوى و تهانى الجبالى و غيرهم كله بيقول اللى بيحصل ده ح يؤدى اعادة الوضع اسوا من ما كان و رافضين التعديلات و الاعلام الحكومة هو اللى بيطبل له

Unknown said...

هو اصلا ايه هي فايدة مجلس الشورى؟ غير مصاريف وبشر لها حصانة ووجع قلب وتلت يعينه رئيس الدولة

ما كنا اتفقنا نلغي المجلس المعيب ده اللي مافهمناش لغاية دلوقت فايدته ايه غير مضيعة الوقت والفلوس

وبعدين ليه ما سمعناش عن حق ممارسة السياسة والانتخاب للمصريين بالخارج؟

وفين القائمة النسبية ولا القايمة المطلقة؟ الانتخاب بالفردي بينجح الحزب الوطني على طول ، القبلية بالصعيد هاتحسم لصالح الوطني للاسف الشديد

معلش يا نوارة خلينا نعترض شوية وما تتحوليش حزب وطني ولا تعارضي المعارضة

Unknown said...

درب الزلق الحلقة

معاد من دولكة وصار شحاطة

الفضل والمراد من شمهورش

ابن طفيل said...

نعم للتعديلات المؤقته.. لكن لوسمحتي نستبعد الحزب الوطني لمدة 40 سنة ودي فترة معقولة لتنظيف البلد منهم.. استصال الشريف وسرور وامن الدولة دي وصفة سهلة للشعب اللي لابس عمة مايلة.. لكن المهمة الصعبة استئصال المحافظين والقبادات بالحكم المحلى وسكرتير عام المحافظة وقبادات التربية والتعليم .. ورؤساء الجامعات ونوابهم وعمداء الكليات ووكلائهم ورؤساء مجالس ادارات المؤسسات التنفيذية والصناعية والاعلامية .. وحقيقي ابدي وجعتني من الكتابة لكن الفساد في كل مكان ده الهوا اللي بنتنفسه.. ايه رأيكو نلخص ونستبعد الهوا وعيش في التهييس

Unknown said...

مش معقوله نرضى باستكمال العمل بالدستور اللي اسقطته الثورة واللا بقى يبقى مفيش ثورة وكانت مجرد مظاهرات مطالبة باصلاحات سياسية واجتماعية زي ماكانوا بيقولوا علينا. ده حتى التعديلات دي عجيبة جدا لم تمس السلطات المطلقة للرئيس .وكمان كأنها متفصلة لمنع البرادعي وزويل من الترشح. وليه أصلا يظل تلت مجلس الشوري بالتعيين. وازاي يكون النائب مش مختار من الناس وهو ممكن يمسك البلد في أي وقت لو تغيب الرئيس . ومليون حاجة تانية تخليني أقول لا تعديلات لازم إعلان دستوري ثم دستور جديد للثورة

محمد طنطاوى said...

أنا عايز اتكلم فى نقطتين هامتين ، أولا : لازم ينص فى الدستور ، إن هناك بعض الموادز لا يجوز المساس بها حال القيام بوضع دستور جديد للبلاد من هذه المواد تحديد المدة الزمنية للرئيس بأربع سنوات وألا تتجاوز مددتين كما وضع ، وهكذا
ثانينا : جدولة أسماء الحزب اللاوطنى وعدم إدراج ترشيحهم فى أى انتخابات من أول الرئاسة إلى المحليات مدى الحياة لأن شهادتهم مجروحة وثبت بما لا يدعو مجالا للشك أنهم أخطر على البلاد والعباد من الأعداء .

Unknown said...

اولا :يا ريت يكون للمصرين فى الخارج حق التصويت فى السفارات و ده عدد مش قليل ( عدة ملاين)
كمان ياريت نأخذ بالنا من حكاية الجنسية المزدوجة للوزراء دى يعنى وزير معاه جنسية كندى و لا اسرائيلى يجى يبيع غاز و لا يجيب بذور من اسرائيل ده مش مقبول تانى

محمد طنطاوى said...

في حاجة مهمة كمان أنا مش عارف ليه عمالين ندى للرئيس صلاحيات يعنى هو الرئيس دا مش بش ذى بقية البشر أنا بعتقد إن مهما اختار الشعب من رئيس أينا كان أكيد هيبقى فى الشعب برضه مئات الأشخاس أكفئ منه ، طيب ليه نديلو صلاحيات زياده لأزم نعامل الرئيس على إنه واحد من الشعب مش كل الشعب واحد من الناس يعنى مش كل الناس وبما إن أى عنصر من عناس السعب لا يجوز اختصاصه بتعيينٍ ما لأينٍ كان لا يجوز للرئيس اختصاصه بتعيين أى واحد لأى وظيفة ما فى الدولة أنا مش بقول نائب ولا عضو مجلس شعب ولا شورى أنا بقول ولا حتى عامل فى مستشفى ، وإللى بتعترض على الكلام دا يجبلى من الدستور ما يمنع محسوبية رئيس الدولة الجديد أو أي ضمانات تضمن تحقيق النزاهة فى الأسماء المدرجة من قبل سعادته .
مرة تانى بقولف يجب معاملة رئيس الدولة كمواطن مصرى ، والبعد تماما عن السيادة والقداسة بلا حدود واعتبار أنه بشر عادى قد يتعثر فى اختياره بقصد أو عن غير قصد وكفانا سيادة وكفانا قداسة لمدة تزيد عن الخمسين عاما .

Tamer Maverick said...

انتي عايزة تستبعدي اعضاء الحزب الوطني اللي ععددهم 3 مليون واحد
انتي متخلفة ولااية
هما دولا مش مصريين ولا اية يا هابلة
انتي متخلفة وحشاشة زي ابوكي

Unknown said...

ممكن تحاولي تركزي شوية في الكلام ... احنا مش بنهاجمك انتي كشخص.
احنا شايفين ان التعديلات (الترقيعات) الدستورية دي معيبة فعلاً. و مش لازم نبقى خبراء في القانون علشان نشوف كده بوضوح، كل الموضوع شوية تحليل للكلام المكتوب.

يعني مثلاً المادة ٧٦ بتاعت الانتخاب فيها جزء عبارة عن كارثة
و هو الجزء بتاع

"وتكون قرارات اللجنة نهائية ونافذة بذاتها غير قابلة للطعن عليها بأى طريق وأمام أية جهة، كما لا يجوز التعرض لقراراتها بوقف التنفيذ أو الإلغاء، كما تفصل اللجنة فى اختصاصها، ويحدد القانون الاختصاصات الأخرى للجنة."

الكلام ده معناه ان لجنة الانتخابات يوم ما تعلن فوز شفيق (و لا اي واحد من اللي النظام بيفكر ينزلهم الانتخابات و هيفوزهم بالتزوير غصب عننا كلنا) ساعتها هيقولوا لنا ان طز فيكم و طز في الادلة و المستندات و الفيديوهات اللي معاكم اللي بتثبت تزوير الانتخابات ... فوتوا علينا في الانتخابات الجاية و عليكوا خير

يعني يوم ما يعلنوا فوزه مفيش اي طريقة نطعن بيها على القرار ده خالص حتى لو معانا الف مستند و صورة و فيديو بتثبت التزوير .. يعني من يومها هو رئيس الجمهورية الجديد .. و ابقى انزلي اعتصمي في التحرير براحتك و هيبقى يبعت لك بونبوني كمان.

حاولى تفهمي الكلام بدون ما تخادي الموضوع بشكل شخصي.

رجل من غمار الموالى said...

السلام عليكم
بصراحة يا أخت نوارة ضياغة التعديلات مش مُحكمة
أنا ما بفهمش فى القانون قوى
لكن لازم تقليل صلاحيات رئيس الجمهورية
ويجب أن يُنتخب نائب الرئيس مع الرئيس
زى النظام الأمريكى
إزاى الرئيس يعين نائب له ممكن فى أى ظرف يكون رئيس
وكمان الرئيس هوه اللى يحدد إختصاصات النائب - ليه ؟
وإزاى
المفروض الإختصاصات تكون مُحددة سلفاً بالقانون
وليه سن الأربعين ؟
والمفروض يُمنح الشعب إمكانية تغيير الدستور
إزاى ما اعرفش
لكن ضرورى لو أراد قطاع عريض من الشعب تغيير الدستور يتغير
............
ربنا يحفظك يا نوارة ويبارك فيكى

د. هانى احمد said...

انا مع الاخت مها... فين الكلام عن صلاحيات الرئيس ... لازم تكون صلاحياته لا تتضمن تعديل الدستور ابدا بل الشعب فقط من حقه ذلك.. وبعدين بيقولوا ح يستفتونا على كل المواد دفعه واحدة وليس مادة مادة.. دة خطر جدا وفيه استهبال شويه من اللجنه مع احترامى.. لازم كل مادة لوحدها مش عايزين الحركات القرعه بتاعت زمان وهى دس السم فى العسل... وايه حكاية تعيين ثلث الاعضاء فى الشورى.. وهو الشورى ده لزمته ايه من اصله مكفايه اللجان المتخصصه فى مجلس الشعب اللى حتكون محترمه لان المجلس ح يكون ان شاء الله محترم

محمد طنطاوى said...

أنا مش فاهم موضوع الجنسية ده لكن لو بيقصدوا بيها إنه يكون معاه جنسية تانى غير المصرية يعنى معاه جنسيتين جنسية مصرية وهى الأصل وجنسية تانى وهى فرعيه لو بيقصدوا كده تبقى كارسة وهو ايه اللى يعيب الإنسان فى كده طالما إنه كفئ لهذا المنصب وهل مثلا نرفض واحد ذى الدكتور أحمد زويل لمجرد هذا الكلام العبيط لو بيقصدوه دا يبقى تهريج أكيد وإلا أنا فاهم غلط ، واتمنى أكون فاهم غلط ، وحد يوضحلى .

احلام جوليا said...

بصي يا نواره اولا مين قال ان الستات مش بيحكموا ده معظم الحكام الي حكمونا كانوا ستاتهم هم الي بيحكموا وهم براويز علشان كده المرة الجاية عاوزين نبقى نركز على صفات مرات رئيس الجمهورية اكتر من الرئيس نفسه هههههههههههههههههههههههههه
ثانيا نتكلم بجد بقى ايه رايك ان تقدموا اقتراحات توصلوها باي طريقة للجيش او للجنة تعديل الدستور عاوزين رئيس الجمهورية ميبقاش له سلطة تغيير الدستور ولا دعوة مجلسي الشعب والشورى لتعديل الدستور وكمان عاوزين ان اعضاء الحزب الحاكم القادم ايا كان الحزب لا يزيدون عن 51% من مقاعد المجلس علشان ميحكموش ويتفقوا علينا تاني ونسبة 49 % من احزاب اخرى ومستقلين حتكون كافية لتربيطهم
ثالثا مجلس الشورى يا ما يتلغي يا ما ميبقاش غير بالانتخاب مش تعيين رئيس الجمهورية وميكنش يحتوي على اي عضو من اعضاء الحزب الحاكم كفاية عليهم مجلس الشعب
رابعاً : رئيس الجمهورية عاوزين لجنة من القضاه تعين تحت ايدها لجنه من المحاسبين تراجع ميزانية الدولة وكيفية توزيعها وميزانية الرئيس بالتفصيل وكيفية صرفها واي سرقة ولا ايد طويلة يتمسكوا فورا ويتحاكموا احنا خلاص مش بنثق في حد
مش عارفة ليه خايفة يا نواره خايفة على مصر من احمد شفيق ومن مبارك حساه زي ال حية ديله فعلا بيلعب ربنا انتقم لنا منه ورد علينا حقوقنا يا رب

احلام جوليا said...

على فكرة انا سمعت ان اعضاء الحزب الوطني الحزب اللص بدأوا يتجمعوا وبعضهم عمل بالفعل حزب سما نفسه حزب التحرير والبعض الاخر عمل حزب سمى نفسه 25 يناير خدي بالك يعني الحية بتتلون بجلد جديد نحبه

al-fekra said...

استحملونى شوية عشان انا من حزب انا معترض :)
مادة 189 لم تلزم على الاطلاق بوضع دستور جديد
دة قالك لو مجلس الشعب و الريس حبو يغيروة..يقدمو طلبات...و ثلث مجلس الشعب يوافق عليها
طب تعال بقى لنقطة التعديلات متكلمتش عليها و هى دى المشكلة..مجلس الشعب.
مجلس الشعب بردو هيتعمل بالدستور العقيم ..يعنى 50% عمال و فلاحين
و احزاب تبقى عدى عليها 5 سنين..يعنى بردو الاحزاب الى كلنا قلنا عليها كارتونية هى الى تقرر عايزين يغيرو كواد اية و لية

و منهم الحزب الوطنى الذى لم يحل بعد
و الاخوان الى لا يمثلو لية فزاعة..و لكن اعتقد ان من حقى بعد 30 سنة تشوية فى صورتهم من النظام..انهم يعرفونى على نفسهم اكتر
ثم مدام كللللللللل دة عشان فى الاخر يتعملى دستور جديد
طب متعمل يا سيدى الدستور و بعدين شوف الريس و مجلس الشعب..ولا اية؟؟؟

al-fekra said...

استحملونى شوية عشان انا من حزب انا معترض :)
مادة 189 لم تلزم على الاطلاق بوضع دستور جديد
دة قالك لو مجلس الشعب و الريس حبو يغيروة..يقدمو طلبات...و ثلث مجلس الشعب يوافق عليها
طب تعال بقى لنقطة التعديلات متكلمتش عليها و هى دى المشكلة..مجلس الشعب.
مجلس الشعب بردو هيتعمل بالدستور العقيم ..يعنى 50% عمال و فلاحين
و احزاب تبقى عدى عليها 5 سنين..يعنى بردو الاحزاب الى كلنا قلنا عليها كارتونية هى الى تقرر عايزين يغيرو كواد اية و لية

و منهم الحزب الوطنى الذى لم يحل بعد
و الاخوان الى لا يمثلو لية فزاعة..و لكن اعتقد ان من حقى بعد 30 سنة تشوية فى صورتهم من النظام..انهم يعرفونى على نفسهم اكتر
ثم مدام كللللللللل دة عشان فى الاخر يتعملى دستور جديد
طب متعمل يا سيدى الدستور و بعدين شوف الريس و مجلس الشعب..ولا اية؟؟؟

al-fekra said...

استحملونى شوية عشان انا من حزب انا معترض :)
مادة 189 لم تلزم على الاطلاق بوضع دستور جديد
دة قالك لو مجلس الشعب و الريس حبو يغيروة..يقدمو طلبات...و ثلث مجلس الشعب يوافق عليها
طب تعال بقى لنقطة التعديلات متكلمتش عليها و هى دى المشكلة..مجلس الشعب.
مجلس الشعب بردو هيتعمل بالدستور العقيم ..يعنى 50% عمال و فلاحين
و احزاب تبقى عدى عليها 5 سنين..يعنى بردو الاحزاب الى كلنا قلنا عليها كارتونية هى الى تقرر عايزين يغيرو كواد اية و لية

و منهم الحزب الوطنى الذى لم يحل بعد
و الاخوان الى لا يمثلو لية فزاعة..و لكن اعتقد ان من حقى بعد 30 سنة تشوية فى صورتهم من النظام..انهم يعرفونى على نفسهم اكتر
ثم مدام كللللللللل دة عشان فى الاخر يتعملى دستور جديد
طب متعمل يا سيدى الدستور و بعدين شوف الريس و مجلس الشعب..ولا اية؟؟؟