بالنوسبة للمثبطين اللي مش عايزينا ننزل يوم الجمعة

عشان ايه ما ننزلش يوم الجمعة يعني؟ اديني سبب واحد يخلينا ما ننزلش يوم الجمعة

البوست اللي فات باحذر فيه من ان اذناب النظام مازالوا موجودين وفاعلين ومعاهم سلاح وحيحاولوا يعملوا وقيعة بين الجيش والشعب

هل الرد الطبيعي انك تقول ما ننزلش يوم الجمعة؟ امال انت عامل ثورة ليه؟ عامل ثورة عشان عمر سليمان يفضل هو وزكريا عزمي في القصر الجمهوري ورجالتهم مطلوقين بسلاحهم ويفضل مبارك في القصر الرئاسي في شرم الشيخ من غير محاكمة بياكل كفيار على حسابك ويفضل عبد اللطيف المناوي يطلع في التلفزيون يدي توجيهات للثورة دلوقت ويقول لنا اقعدوا في البيوت ويفضل احمد شفيق يقول الرئيس مبارك ويحمي فلوس مبارك وعياله ومراته في الخارج ويفضل خيري رمضان يطلع واحدة تتكلم عن يوم الوفاء للرئيس الاب القائد؟ 

دي ثورة ايه دي؟ 

اولا فيه حاجة انا عايزة اوضحها: انا مبسوطة منك يا شعب... هات بوسة

الله اكبر في عيني وما شاء الله لا قوة الا بالله، ايه الفوقة والصحصحة دي؟

الناس قلقانة، ومش مبسوطة، ومتبنيين كلهم نظرية المؤامرة... قال ايه؟ قال وانا، انا نوارة، الراعي الرسمي لنظرية المؤامرة في مصر وافريقيا والعالم العربي وبلاد الشرق الادنى، انا اللي باهديهم.... ده انا عايزة اتحزم وارقص في نص الشارع

صح كده

صح... انتوا صح، ومش عايزة انا حد يطمن ولا ينام ولا يبطل شك 

وزي ما قلت في تعليق البوست السابق، الوضع سيريالي الى ابعد الحدود: الشعب بيحمي البلد من الشرطة، وبيحمي الجيش من المخابرات، وبيحايل الجيش عشان ما يزهقش، وبيحمي الثورة من رجال الاعمال، وبيصلح بوابير جاز

وكده صح، الشعب يعمل كل حاجة بايده وبنفسه ويتابع كل حاجة بنفسه وماشي بدماغه وما بيسمعش كلام حد وده صح

دلوقت المصريين والتوانسة اول ناس في التاريخ يفضلوا يبوسوا في الجيش لحد ما يزهق ويخلع رئيسه، احنا كل اللي عايزينه اننا نفضل نبوس في الجيش كده، ونحميه، لانه اخد مجازفة زعلت منه فلول النظام البائد وخلتهم عايزين ينتقموا منه، وهو اساسا مش مسيس ومش ثوري ولا حاجة، هو عايز يخلص، ومشى مبارك عشان دماغه اتدوشت، خلاص، يبقى احنا علينا اننا نحايله ونحميه من اللي متغاظين منه، وما ندوشوش لان الثورة مش ثورته، والحمد لله انها مش ثورته، دي ثورتنا احنا ومسئوليتنا احنا نحميها ونحميه عشان يفضل في صفنا ونضمن انه ما يزهقش عشان ما يقولش: كده؟ طب والله ما انا قاعد لكم، هو انا اساسا عليا من ده بايه؟

ومسئوليتنا احنا ان فلول نظام البائد تتجز من جذورها، واحنا اللي نروح نجيبها من رجليها

ازاي عايز تسيب الشارع وانت عارف ان العصابات لسه موجودة ورئيس العصابة ممكن يكون بيدي التعليمات بالتليفون؟ وازاي عايز تسيب الشارع وانت عارف ان عليك واجب تحمي الجيش؟ انت فاكر انك لما تخش بيتك بيتك الجيش كده في امان؟ 

افتكر ان حظر التجول هو اللي كان بيفتح المجال للبلطجية، وان وجود الناس في الشارع هو اللي كان بيطفش البلطجية

ومافيش حاجة تخوف

انتوا مش مستوعبين انتوا عملتوا ايه... انا مش عارفة اقولكم انا باحبكم قد ايه وفخورة بيكم قد ايه؟ انتوا جريتوا جهاز الامن، وجريتوا البلطجية، وجريتوا رئيس العصابة، وماسكين البلد تنضفوها وتحموها وتظبطوها وتبوسوا الجيش وتحضنوه، وتتبعوا بنفسكم فلول النظام، وتبصوا بنفسكم على طلباتكم بتتحقق ولا لا، وتراجعوا ورا كل حد بيعمل اي حاجة، و.. ايه ده؟ بسم الله ما شاء الله، الله اكبر في عيني، الله اكبر في عيني... اسم الله عليكم، فين هاني شاكر ييجي بجد يقولكم: والله باحبكم، الله اكبر عليكم، ربنا يخليكم ليا يا رب.. باحبكم والله باحبكم

هو ده.. هو ده لحد ما نخلص، وانا شخصيا مش عايزة اشارك في جريمة اني اطمن الناس قوي، لا خليهم كده قلقانين ومولعين كل الكشافات 

خلاص.. الناس مشمرة القميص والبنطلون وهي اللي بتعمل كل حاجة... ما حدش يثبطها ولا يهبطها

بس يساعدها، لو فيه جحر تعبان ممكن يكون غايب عنهم، لازم ينبههم، مش عشان يخشوا الاودة ويقفلوا على نفسهم بالمفتاح، عشان يمدوا العصايا ويطلعوا التعبان وينزلوا على دماغه بالشاكوش لحد ما يتفتفت 

احنا علينا اننا نعمل كل حاجة دلوقت... وتصدقوا بالله؟ طلعنا بنعرف نعمل كل حاجة لوحدنا بعون الله