تصريح القوات المسلحة في التلفزيون

تحديث:
الدستور المعدل دستور مؤقت كما ورد في الخبر
يبقى فاضل لنا التلات مطالب اللي قلناهم... شوفوا بقى حتتفقوا على ايه، بس المهم تتفقوا وتحشدوا صح.
--------------
قالوا اللي فضيناهم ما كانوش متظاهرين، دول كانوا متواجدين بعد حظر التجول وعادة مافيش تظاهرات بعد حظر التجول، وقالوا قبضنا على 27 واحد طلع منهم تمانية بلطجية، وكان فيه ناس بتحدف ازايز فارغة على الجيش، واحنا بنأسف اذا كان سباب حد من شباب الثورة اتأذى بس كان فيه بلطجية مندسين وسطهم

طيب.. انا مش حادخل في مناقشات ولا مهاترات في الحادثة، الاعتصام كان دايما بيبقى بعد ساعات حظر التجول وكنا بننام في الشارع وكانوا بيسيبونا، فيه 8 بلطجية وسط 27، ده ممكن يصاغ بجملة تانية: فيه 19 بريء اتقبض عليهم، انا ما شفتش ازايز فارغة اتحدفت على الجيش عن المجلس، بس الله اعلم، يمكن حصل في الميدان، اذا كان فيه بلطجية اندسوا وسط المتظاهرين.. الله اعلم، بس البلطجية كانوا بيندسوا وبيدخلوا على المتظاهرين وبيضربوهم وبيقتلوهم زي يوم الاربعاء الدامي.. وما شفناش ضرب من القوات المسلحة لا للمتظاهرين ولا للبلطجية

على اي حال

خلاص... الموضوع ده اتقفل، واللي حصل حصل، وياريت ما يتكررش تاني، ماحدش يمد ايده علينا تاني، احنا ما اتبهدلناش كل البهدلة دي عشان نفضل ننضرب، ولو فيه بلطجية احنا اول الناس بنمسكهم ونسلمهم للقوات المسلحة، واذا كان الجيش بيأسف لشباب الثورة، شكرا وعلى راسنا، بس شباب الثورة مش عايز اسف من القوات المسلحة

شباب الثورة عايز مطالبه تتحقق، واذا كان القوات المسلحة مش عارفة تسرع في تحقيق مطالبنا، ممكن تستعين بمجلس رئاسي

1- صفوت الشريف وجمال مبارك يتقبض عليهم...... اييييييوووووووةةةةةةة اييييييييييوووووووووةةةةةة

اذا كان الجيش بيتكلم عن اندساس بلطجية، انا مصدقاه، بس احنا عشرة مع النظام ده ونعرفه اكتر منهم، ماحدش بيحرك البلطجية غير صفوت الشريف وجمال مبارك

وجمال مبارك رفض يقدم اقرار ذمة مالية... تتجمد كل فلوس جمال مبارك، وبما انه رفض تقديم اقرار ذمة مالية، يبقى يتقبض عليه، وصفوت الشريف يتقدم للتحقيق وتتجمد امواله، ويتحقق بالذات في موضوع البلطجية ده ويتجاب صفوت الشريف وجمال مبارك

2- حل امن الدولة

3- اقالة حكومة شفيق وتشكيل حكومة كفاءات من شخصيات مالهاش علاقة بالنظام البائد

4- المطلب الرابع محتاجة اتأكد انه اتحقق، اللي هو الدستور المؤقت، المستشار طارق البشري قال حاجة بالمعنى ده، بس عايزة ايضاح اكتر عشان نفهم كلنا، احنا مش قانونيين

بس كده

انا شخصيا باقترح جدول زمني

الاسبوع ده يتم تجميد اموال جمال مبارك واعتقاله لانه رافض لتقديم ذمة مالية وتقديمه بتهم التورط في الفساد بوصفه امين السياسات السابق، ويتم القبض على صفوت الشريف والتحقيق معاه في قضايا الفساد (وماحدش يدخل يحط لي اسامي كل واحد غايظه، كفاية قوي نجيب جمال مبارك وصفوت الشريف عشان العجلة تكر لوحدها، دول في ديلهم بلاوي، نجيبهم بس وربنا يسهل)

واقتراحي ان لو ده حصل الاسبوع ده يبقى ما ننزلش الجمعة الجاية

الاسبوع الجاي اقالة حكومة شفيق وتشكيل حكومة كفاءات وطنية مافيهاش ولا رمز واحد من رموز النظام ولا عضو واحد في الحزب الوطني

ولو اقيلت الاسبوع الجاي ما ننزلش الجمعة اللي بعدها

الاسبوع اللي بعده يتم حل جهاز امن الدولة ولو ده حصل الاسبوع البعد الجاي.... يبقى كل واحد يروح بيتهم

اظن وقت كافي اهو، وجدول زمني، بمطالب واضحة، وكل مطلب يتحقق في اسبوعه ما ننزلش جمعته 

ده مجرد اقتراح مني، وشايفة اننا لو نفذناه يبقى عدانا العيب وقزح، وفيه وقت كافي للمجلس الاعلى للقوات المسلحة مدام هو بيحب يعمل كل حاجة بالراحة وعلى مهله.. اهم تلات اسابيع طوال عراض اهم، بس نحس ان فيه استجابة لمطالبنا

وبكده، احنا نستعيد الثقة، وهم يستعيدوا الثقة برضه

---------

ملحوظة:

امبارح في وقت الضهر كده لما كنت في الميدان بعت لخالد عبد الحميد - عضو ائتلاف شباب ثورة الغضب - اقترح عليه موضوع الجدول الزمني ده - واللي هو اقتراح بلال فضل اساسا - عشان ما يبقاش مولد سيدي جمعة كل جمعة وما ردش عليا

يا ريت بما ان ائتلاف شباب ثورة الغضب هم دلوقت اللي بينظموا وبيتكلموا مع الجيش وبيتكلموا في الاعلام، يبقى هم الملزومين بموضوع الجدول الزمني ده وهم اللي يقولوا عليه للمجلس الاعلى للقوات المسلحة بما انهم على اتصال بيهم، وهم يعلنوا عنه بما انهم هم اللي بيتكلموا مع الناس والاعلام المصري قابلهم يوجهوا الناس

وكده يبقى احنا ارتاحنا وريحنا القوات المسلحة

ولا ايه؟ 

انا شخصيا... مقموصة.. اه.. زعلانة.. زعلانة زعلانة زعلانة وحاسة ان كل حاجة بتضيع وان كل حاجة بتتوضب عشان جمال مبارك او عمر سليمان يمسك وصفوت الشريف يطلع لنا تاني بما انه مستر اكس مالوش نهاية، اقصد من ناحية الثورة المضادة

ومن ناحية الجيش حاسة انه بيطبق حظر التجول والظبط والربط في الشارع اسرع ما بيستجيب لمطالب الناس

ومن ناحية الثوار حاسة ان كل واحد بيهوبص وبيجتهد بدماغه وما عمالين يفصلوا من بعض ويفكوا من بعض وده مش عاجبني

وانا شايفة ان ائتلاف شباب ثورة الغضب مسئول مدام حمل نفسه المسئولية، مدام قرر ان الناس تثق فيه، وقرر انه يتكلم مع القوات المسلحة، وقرره يطلع بيانات مع وضد، يبقى هو مسئول يصلح وضع الثورة والا لو ما عملش كده يبقى ذنبنا في رقبته، اللي يشيل مسئولية يسأل عنها

فدلوقت بقى اذا ما كانش الثوار يوحدوا نفسهم تاني ويعملوا حاجة لها راس ورجلين

واذا ما كانش الجيش يعبرنا وبدل ما كل اللي يهمه انه يمسك لنا الساعة لحظر التجول يبتدي يطبق لنا مطالبنا

انا حاقفل ضرف المدونة دي ومش عايزة ابص في خلقة حد تاني... يالا بقى اشربوها، وعليه العوض ومنه العوض

عليه العوض ومنه العوض

عليه العوض ومنه العوض