ايوة يعني فين مبارك؟ وشفيق قاعد ليه؟

انا ما اقدرش اقول للناس تعمل ايه لان الناس هي اللي عملت وغيرت وكل حاجة بس انا عندي مخاوف من حقي اعبر عنها والناس تفكر وتوزنها والشعب اللي حرر بلده يقدر يلاقي لها حل

1- فين مبارك؟ 

لا بجد فين؟ ايه الغموض ده؟ بن علي راح السعودية عرفنا انه في السعودية، مبارك شوية يقولوا لنا في الامارات وشوية يقولوا في شرم الشيخ وشوية يقولوا في غيبوبة وشوية يقولوا زي القرد مافيهوش حاجة

انا مش عايزة اخوف حد، بس افتكروا ثورة مصدق وافتكروا عودة الشاه اللي قعد بعدها سنين طويلة يعذب في الايرانيين، وافتكروا ان مبارك له اذناب وعيال وناس مصالحهم متشابكة معاه ومع نظامه ومش حيسيبوه يقع بالساهل

مبارك لو في شرم الشيخ، الجيش ملزوم يقبض عليه ويتحفظ عليه لحين محاكمته

لو في الامارات يبقى الامارات ملزومة تطلع لنا بيان رسمي تقول انه عندها

وفي كل الاحوال، الراجل ده لازم يتحاكم، ويرجع الفلوس، ويتحاكم بتهمة الخيانة العظمى، العادلي بيقول انه اخد كل التعليمات من مبارك مباشرة، يعني كل ما يوجه للعادلي من تهم - ومن ضمنها الخيانة العظمى لما سحب الشرطة من الشارع - تتوجه لمبارك 

فيه حد رفع قضية دلوقت على الراجل ده؟ ولا سايبينه 

ثم شرم الشيخ ايه؟ القصر اللي قاعد فيه ده بتاعنا اساسا

اديني باحذركم اهو.. الراجل ده او ابنه او حد من نظامه ممكن يرجعوا في اي لحظة وينتقموا منا كلنا

2- وبمناسبة اي حد من نظامه.. فين عمر سليمان؟ 

قاعد فين دلوقت؟ وشغلته ايه دلوقت؟ وضعه القانوني ايه؟ عمر سليمان اسرائيل وامريكا بيحبوه... والراجل ده مجرم حرب وله تاريخ طويل من التعذيب والقتل، هو فين؟ ثابت بالوثائق انه كان بيعذب وبيقتل وبيضخ غاز مسمم في الانفاق

حد رفع عليه قضية؟ ولا مستنينه لما تترستق الامور وامريكا واسرائيل ينططوه علينا؟

3- احمد شفيق قاعد ليه؟ وايش عرفكم ان احمد شفيق مش على اتصال بمبارك وعمر سليمان

ثم هو قاعد لكن هو فين؟ مختفي من وشنا ليه؟ مش ده شفيق اللي قال علينا هايد بارك؟ مش ده شفيق اللي قال حابعت لهم بسكوت وبون بون؟ مش ده شفيق رئيس حكومة مذبحة الاربعاء؟ عادلي ايه اللي بيتحاكم على مذبحة الاربعاء؟ المذبحة دي حصلت ومحمود وجدي هو وزير الداخلية مش العادلي، وبعدين هو مش ابو العينين هو اللي اعترف انه سلط البلطجية؟

4- فين صفوت الشريف؟ فين فلوسه؟ وفين ارصدته؟ وفين التحقيق معاه؟ وهو قاعد فين دلوقت حاليا؟ 

5- انتوا ناسيين ان فيه حاجة اسمها الحرس الجمهوري ولاءهم الاول لمبارك؟ وبياخدوا اوامر من مبارك؟ ومسلحين؟ 

شفيق وحكومته ليه ما تمشيش دلوقت حالا وتتشكل حكومة كفاءات بشكل عاجل، دي تتعمل في يوم واحد

ليه ما يتمش الاعلان عن مكان مبارك والجيش يطمنا انه متحفظ عليه؟

ايه وضع الحرس الجمهوري دلوقت؟ جابو سيرة الشرطة وماحدش قال لنا ايه وضع الحرس الجمهوري

احنا عايزين الجيش يتحفظ على مبارك وصفوت الشريف وعمر سليمان ويحل حكومة شفيق والكلام ده ينفع يتعمل النهاردة، مش صعبة

وعايزين النائب العام دلوقت حالا يفتح تحقيق مع المذكورين وعلى رأسهم مبارك وولاده وعمر سليمان، وده برضه ينفع يتعمل النهاردة

وعايزين الجيش يقول لنا وضع الحرس الجمهوري بالظبط ايه دلوقت، وليه ما يتحلش؟ هو مش الحرس الجمهوري ده شغلته يحرس الرئيس؟ طب مافيش رئيس دلوقت، موجود بيعمل ايه الحرس الجمهوري ده؟ 

وعايزين حل جهاز امن الدولة 

وليه فيه قانون طوارئ دلوقت حاليا؟ 

احنا حننام كده؟ انا سمعت واحد بيقول حنرجع يوم الجمعة الجاية لميدان التحرير

جمعة جاية؟ النهاردة الاحد، انت عارف من النهاردة للجمعة ايه اللي ممكن يحصل؟ 

اديني قلت لكم مخاوفي وعقلكم في راسكم تعرفوا خلاصكم، واللي الناس حتستقر عليه انا معاكم