Saturday 12 February 2011

ورانا شغل

ورانا شغل كتير قوي
اولا كل المعتقلين السياسيين لازم يخرجوا، وطبعا قانون الطوارئ يتلغي فورا زي ما الشباب طلعوا بيان في ميدان التحرير
انا مش عارفة مين المجموعة اللي طلعت البيان لان ميدان التحرير مليان مجموعات، بس انا مبسوطة من بيانهم عموما، وعلى اي حال مش مهم مين المجموعات ولا الافراد، المهم ان الناس توافق وده بيبان في سلوك الناس، وانا عن نفسي موافقة
وبعدين عايزين نعمل دستور ما يخرش المية، ما يبقاش فيه صلاحيات لفرد ابدا، دستور ديمقراطي على حق يعمله القانونيين بتاعنا، مش حنستورد دستور من حد احنا عندنا ناس جامدة كيك لعلمكوا يعني، ورئيس الوزرا يبقى بالانتخاب والمحافظين كمان، ما عادش بقى حد يعين ابن اخته تاني بعد كده ويبقى فيه آلية رقابة ومحاسبة، والدستور يضمن لنا تقسيم السلطات بحيث كل واحد فيهم يبقى صباعه في بق التاني عشان ما حدش فيهم يستفرد بينا، والسلطة للشعب
وبعدين عايزين محاسبات مالية وقوانين عدالة اجتماعية عشان ما حدش يوزع وجبات وعشرين جنيه مقابل اصوات الناخبين
وبعدين عايزين نلغي وزارة الاعلام اساسا
وعايزين اطلاق حرية تكوين الاحزاب، ما عادش بقى الحزب تحت التأسيس لمدة خمسة وتلاتين سنة والجماعة المحصورة والكلام ده تاني نسمعه
وعايزين اطلاق حرية الصحافة
وعايزين نرجع فلوسنا، الشلة اللي فاتت سرقت 132 مليار دولار من مصر، لو رجعنا نصهم وصرفناهم على الصعيد والعشوائيات حنبقى سويسرا يا جدع
عايزين فلوسنا عايزين فلوسنا عايزين فلوسنا
عايزين فلوسنا عشان عايزين نعمل مشروع الري بالتنقيط عشان نزرع الصحرا ونكتفي ذاتيا من القمح ونوفر مية ونعمل فرص عمل للفلاحين اللي تحولوا لسواقين توك توك بسبب انحسار الاراضي الزراعية
ويتعمل بقى قوانين عمل تانية خااااااااالص غير دي، حاجة تضمن حقوق العمال، مش الانسان ينام عامل يصحى مفصول ونايم في الشارع، منظر العمال قدام مجلس الشعب ده انا مش عايزة اشوفه تاني، ومصانعنا بقى ترجع لنا
وبعد كده احنا عايزين نتخلص من المعونة الامريكية تماما، واحدة واحدة كده نسلت نفسنا منها لانها خربت بيتنا وبيعتنا اللي ورانا واللي قدامنا، ونتخلص من المعونة الاوروبية كمان، يعني يبقى لنا 132 دولار متهربين ونشحت؟ نرجع فلوسنا بس ونظبط حالنا وكلها خمس ست سنين واحنا اللي ندي اوروبا وامريكا معونة، مش عايزين معونات تاني، عشان بيفرضوا علينا شروطهم الاقتصادية وبياخدوا حقهم بالفلوس دي من اراضينا وصناعتنا وبيفسدوا مسئولينا عشان بيقدموا لهم رشاوى عشان يمكنوهم انهم يسرقونا، واحدة واحدة من غير خناق كده نتخلص من المعونات الاجنبية خالص سواء للدولة او المؤسسات الاهلية، وبدل ما المؤسسات الاهلية تمشي تشحت من برة يتفتح لها مجال جمع التبرعات عشان يعرفوا يخدموا بلدهم بفلوس ولاد بلادهم
ودي المساعدة اللي الاستاذ اوباما عرضها علينا امبارح، انه يدينا فرصة نرجع فلوسنا ونصرف على نفسنا، واحنا متشكرين له قوي
متشكرين على تهنئته لينا بثورتنا
ومتشكرين والله على انه اكتشف اننا مش ارهابيين ولا متطرفين واننا زينا زي غاندي ومارتن لوثر كينج ده ايه الرتبة الجامدة دي؟ بيساوي شعب بافراد؟ ايا كانوا الافراد دول ومهما كانت عظمتهم، هم افراد، واحنا شعب، ومالناش قيادات، نتساوى بيهم ازاي يعني؟ 
ومتشكرين على انه اكتشف اننا سلميين وان المسلمين والمسيحيين مش بيقتلوا بعض ولا حاجة
ومتشكرين على انه قال لنا: والله طلعتوا ناس محترمة اهو.. امال بيقولوا عليكوا كده ليه؟
ومتشكرين على ان 400 شهيد - اللي كل الناس مصممة انهم 300 وهم 400 - ماتوا بسلاح جاي من بلده بموجب معونته
ومتشكرين على الغاز المسيل للدموع اللي شميناه ميد إن يو اس ايه
ومتشكرين على الرصاص المطاطي اللي هو كمان ميد ان يو اس ايه
ومتشكرين على اعترافه باننا بني ادمين ومن حقنا الحرية والعدالة
ومتشكرين على انه ما عرفش اننا بني ادمين زينا زيه الا لما اضطرينا نطلع بالملايين ويموت منا مئات الشهدا
ومتشكرين على انه تاني رجع يقول لنا: حنساعدكم من غير ما تطلبوا... شكرا شكرا على الرخامة يعني، تاني؟ تاني حتساعدنا من غير ما نطلب؟ مش كفاية كل المساعدات اللي بقالها تلاتين سنة؟ طب ممكن تساعدنا بناء على طلبنا بدل ما تطوع؟ احنا طالبين مساعدة فعلا: سيبنا في حالنا، يا سيدي احنا لا عايزين نتخانق معاك، ولا عايزين مساعدة منك، يا نحلة لا تقرصيني ولا عايز عسل منك
ولو سمحت ما بنحبش حد يطبطب على راسنا زي الكلب اللولو.. اصل حضرتك بتبوظ التسريحة كده واحنا لسه مشاشورين شعرنا
احنا عايزين نستقل بقى، نستقل بكل حاجة، نتملك مواردنا عشان نأكل ناسنا، ونستقل بقرارتنا، وسياساتنا، مش خلاص؟ مش العالم كله اطمن علينا اننا ناس كبار وعاقلين وشاطرين ومش ارهابيين، والسلفيين والمسيحيين قعدوا في ميدان التحرير يحبوا في بعض حب مبالغ فيه ونازلين بوس في بعض؟ سيبونا في حالنا بقى، المساعدة الوحيدة انهم يسيبونا نقف على رجلينا ونبني نفسنا لوحدنا ومش ناقصنا حاجة، لا ناقصنا علم، ولا خبرة، ولا فلوس، ولا موارد، ولا اخلاق، ولا ارادة، ولا فهم، ولا اي حاجة الحمد لله، وربنا معانا احسن من الكل، وطول عمرنا من سبعتلاف سنة ولحد دلوقت ربنا هو اللي بياخد باله منه وبيراعينا، مش محتاجين رعاية من حد، وربنا هو اللي عمل مصر دي، هو اللي رسم حدودها، لا قسمها احتلال، ولا وحدها سفاح، ولا اسسها عصابات ولا هاربين من احكام في بلادهم الاصلية، لو سمح اوباما يسيب بلدنا للي عملها هو اولى بيها
احنا ناس ميت فل وسبعتاشر ومش محتاجين اي مساعدات من حد ومش محتاجين حد يعلمنا ولا يفهمنا
قال حيساعدنا من غير ما نطلب قال، ايوة يعني ايه اللي حيلتك يا اوباما تساعدنا بيه انت؟ من ساعة ما ربنا حدفكوا علينا والمصايب نازلة ترف على راسنا، احنا نساعدك ونساعد اللي يتشدد لك، قول لنا انت ناقصك ايه واحنا نساعدك فيه
مش محتاجين بقى نتكلم عن استقلال القضاء واستقلال السلطات التشريعية
ومش عايزة اسمع حاجة اسمها الحزب الوطني تاني
اه صحيح، العادلي ماسكينه دلوقت وبيقرروه وقال ان فيه في مقرات الحزب الوطني اودة اسمها غرفة جهنم وجمال وابوه عارفين بيها وفيها مستندات مصورة وموثقة على كل المصايب
ماحدش يفرط فيه العادلي ده يا جماعة، بالراحة عليه، ماحدش يضربه، عرفوه غلطه بس لحد ما نعرف بس مين اللي اداله اوامر يفجر لنا كنيسة القديسين وليه؟ الراجل ده كنز معلومات وخلوا بالكم منه لبعدين ينتحروه
وانس الفقي اتشيع هيييع هيييع هيييع
بس يرجع الفلوس، ده سرقنا كتير قوي، يرجع اللي عليه
احنا مش عايزين ننتقم من حد، يعني مش حنمسك العساكر والبلطجية والناس اللي اخدت عشرين جنيه عشان تتصل وتقول كنتاكي وبابا مبارك ونسيب الناس اللي هلبت مليارات، احنا عايزين فلوسنا بس
والنبي يا شباب، امانة فلوسنا ترجع احسن انا محروقة على الفلوس قوي، ماحبش حد يسرقني انا
كل ده واكتر منه ورانا نعمله، ولازم نعمله كله، كله
حقنا نعمله كله، عشان كل حق حناخده، كل طوبة بنبني بيها بلدنا، كل سنبلة قمح حنزرعها، كل مسمار في صندوق انتخابي نضيف، شارب دم خيرة شبابنا، اغلى دم، بحق الدم ده ما نفرط في اي حق من حقوقنا ولا نهمل اي حاجة في بلدنا.. حررناها بالغالي، حررناها بحبة قلوبنا
------------
ويالا يا جزائر.. مستنينك شدي حيلك يا جزائر
وشدي حيلك يا يمن
وشدي حيلك يا اردن
وشدي حيلك يا كل الدول العربية.. بس ليبيا تستنى شوية عشان عايزين القذافي نلعب بيه
وتحيا تونس :)

87 comments:

Nadjette said...

Nawarati el 7abiba,

Alf mabroookw 3o'bal 3endna bel Jaza'er

You cannot immagine how happy I am for my people in Egypt and how happy I am for our people in Gaza, I feel their martyrs are now so happy :)
I know you're more busy than ever, me too.

O7ibbokom fi Allah

Magdy El-Serafy said...

و أمن الدولة يتفك

Unknown said...

لو قدرنا يانوارة نعمل 1 على عشرة من اللى بتقوليه ده حانبقى من أحسن بلاد الدنيا

وضيفى عليهم اننا نرجع كفاءاتنا اللى فى الخارج وشبابنا اللى طفش م البلد

بحبكم كلكم يانوارة وربنا يستر عليكم وعلينا كلنا من اللى جاى

Unknown said...

أيوه لسة فيه شغل كتير. أنا لسة كاتب ده في البوست الجديد. ياريت تدخلوا وتقولوا تعليقاتكم. وبخصوصك يانوارتنا معلهش ح تلاقيه باللغة الفصحي، أنا عارف غنك بعافية شوية في الفصحي علشان كده مش بتدخلي علي البلوج عندي- مجرد نكشة، يمكن تفلح وتلاقي وقت تدخلي البلوج عندي وتسيبي تعليق، طبعاً ح يكون شرف لي. تحياتي

Unknown said...

معلش يانوارة مهم جدا برضه انكم ماتخونوش الناس وماتخللوش فيروس الانتصار يجعلكم تحتكرون البطولة والانجاز..كان هناك الملايين من مسانديكم والداعين لكم ولكن لم يستطيعوا لظروف مختلفة الانضمام اليكم

واحذروا جيدا من كلاب النظام السابق حملة المباخر ممن تتبدل مواقفهم كالحرباء.. انهم من أسباب فساد النظام السابق فلا تدعوهم يفسدونكم ...هم العدو فاحذروهم

lastcrazyboys said...

صبـــاح الخير على الورد اللي فتح في جناين مصــر

صبــاح الحــريــة والهوا المصري العليييل

خلااااص البلــد بقت بلــدكم

ودم الشهيــد غالي

حافظــوا عليــه .. وعليها

مش فاهمه said...

ماتنسوش يا نوارة اعادة تاهيل ضباط الشرطه ارجوكى مهم قوى موضوع الشرطه ده احسن اكيد كرامتهم بتنأح عليهم و حايعملوا زى أحمد زكى فى زوجه رجل مهم
فيه اقتراح كمان ان فى عيد الثورة القادم يبقى مافيش اميه فى مصر عايزين مجموعات لمحو الأميه
ماتنسوش التعليم انا شخصيا من اهم اسباب ايمانى بالثورة التعليم الكويس لبناتى ارجوكى التعليم ده مهم

Ramagrune said...

صح يا نوارة كل اللى بتقوليه مظبوط
كل اللى احنا محتاجينه هو شوية جهد و شوية شغل بذمة و ضميير و ننسى بقى مبدا ينبنى من الحب جانب و مبدا طباخ السم بيدوقه

soreal said...

:)

Together we develop EGYPT said...

i agree with all of that
but we need implementation

Anonymous said...

على الاخوة العاملون فى الوزارات المختلفة تجميع المستندات الداله على الفساد لتجميعها وتقديمها للنائب العام

برجاء تجميع صور الشهداء ونبذه عنهم وكيفيه التواصل مع ذويهم حتى يمكن رد جزء من الجميل

Amr Ghazy said...

فكرتيني بمقال لابراهيم عيسى اسمة مشكلة مصر في حلولها
احنا فعلا نقدر نبقى قوة عظمي في ظرف 15 سنة
انا مش ببالغ محمد علي عمل امبراطورية في وقت زي ده بغض النظر عن راينا فيه
we have the potential

إيمان هلال said...

بحلم يا بلدى وحلمى جوايا

Unknown said...

عرفتم دلوقت من الذى أحرق المقر الرئيسى للحزب الوطنى فى ميدان التحرير يوم جمعة الغضب؟ ويا ترى لسه بعد كده فاضل أى حاجة فى غرفة جهنم؟ يا رب يكون العادلى عامل لنفسه نسخ من كل حاجة علشان ينكشفوا

Unknown said...

والله العظيم شئ فوق الخيال، فى قمة الفرحة أنا كنت حزين لأنى ضيعت شبابى هدر، خوف وسلبية وكنت متابع فقط للأخبار، معارض نعم أروح الإنتخابات أحيانا وأصوت ضد الحزن الوثنى بس عمرى ما كنت إيجابى زيكوا، بس أحيانا أنصح السباب اللى مش عارفين مصلحة بلدهم، امبارح رحت ميدان التحرير مع أولادى (10سنين و 12 سنة) وزوجتى وكنت بأشرح لولادى اللحظات دى وسبب فرحة الناس مش عشان كسبنا ماتش كورة ولا فزنا فى بطولة دولية ولاميدالية أوليمبية، المهم إنى شفت كل الناس فرحانة كل الناس شباب وبنات ورجالة وستات مسلمين ومسحيين طبقات شعبية وططبقات راقية، فرحة كانت مختلفة عن أى فرحة شفتها قبل كده، أنا رجعت من الخليج من شهرين ونص، كنا هناك بنخرج فى مظاهرات فرح بفرز المنتخب بماتش أو بطولة بس الفرحة اللى كانت امبارح فى كل مكان فى مصر واضحة بجد على وجوه كل الناس، ربنا يديمها علينا إن شاء الله، وكل أمنيات المصريين تتحقق.

كلمة أخيرة دايما بأقول لكل أصحابى إننا بعد التغيير ده بعد تتوقف السرقة والنهب المنظمك لثروات بلدنا هانبقى أغنى من دول الخليج وإن شاء الله ربنا هايوفقنا لإختيار حكام يحافظوا على ثرواتنا ويكونوا على قدر المسئولية ويستحقوا ثقة المصريين

Ahmad Tawfik said...

شوفي الدنيا بتتكلم عننا إزاي... أخيراً مصر رجعت بهية.
http://www.facebook.com/profile.php?id=1073352247#!/video/video.php?v=1881382598269&comments

يقول أنى امرأة said...

و مش عايزين العك و الاعلانات الى بتبوظ البلد و البلطجيه وقت الانتخابات الى هيعك فى الدعايه او يجيب اى بلطجى مش هننتخبه

e said...

ﻭﻃﻮﻝ ﻋﻤﺮﻧﺎ ﻣﻦ ﺳﺒﻌﺘﻼﻑ ﺳﻨﺔ ﺭﺑﻨﺎ ﻭﺣﺪﻩ ﻫﻮ ﺍﻟﻠﻲ ﻭﺍﺧﺪ ﺑﺎﻟﻪ ﻣﻨﻨﺎ ﻭ ﺑﻴﺮﺍﻋﻴﻨﺎ
ﺍﻟﻠﻪ ﻳﻜﺴﻔﻚ ﺧﺎﻟﺘﻴﻨﻲ ﻭﺍﻧﺎ ﺷﺤﻂ ﻛﺪﻩ ﺍﻗﻌﺪ ﺍﻋﻴﻂ ﻃﻴﺐ ﺻﺒﺎﺡ ﺍﻟﺤﺮﻳﺔ ﻋﺎﻳﺰﻳﻨﻨﻠﻐﻲ ﺍﻟﺸﺮﻃﺔ ﺩﻱ ﻧﻌﻤﻞ ﺟﻬﺎﺯ ﺍﻣﻨﻲ ﺟﺪﻳﺪ ﺯﻱ ﺍﻟﺤﺮﺱ ﺍﻟﻮﻃﻨﻲ ﺍﻭ ﺍﻟﺸﻌﺒﻲ ﺯﻱ ﺍﻟﺠﻴﺶ ﻛﺪﻩ ﻣﻬﻤﺘﺔ ﺍﻟﺤﻔﺎﻅ ﻋﻠﻲ ﺍﻫﺪﺍﻑ ﺍﻟﺜﻮﺭﺓ ﻋﺎﻳﺰﻳﻦ ﻣﻼﻳﻜﺔ ﻓﻴﻪ ﻧﺎﺱ ﻋﻨﺪﻫﺎ ﺍﺩﺏ ﺑﺘﻌﺮﻑ ﺍﺯﺍﻱ ﺗﻌﺎﻣﻞ ﺍﻟﻨﺎﺳ ﻤﺎﻓﻴﺶ ﺗﻌﺬﻳﺐ ﻣﺎﻓﻴﺶ ﻗﻠﻪ ﺍﺩﺏ ﻭﻭﺳﺎﺧﻪ ﻳﺒﻘﻮﺍ ﺍﻟﺤﻤﺎﺓ ﻟﻠﺸﻌﺐ ﻭﺛﺮﻭﺗﻪ ﻋﺎﻳﺰﻳﻦ ﻭﺯﺍﺭﻩ ﻟﻠﺮﻗﺎﺑﻪ ﻭﺍﻟﻤﺤﺎﺳﺒﺔ ﺗﺮﺍﻗﺐ ﺍﻟﻔﺴﺎﺩ ﻭﺗﻘﻀﻲ ﻋﻠﻴﻪ ﻣﻦ ﺍﻳﻦ ﻟﻚ ﻫﺬﺍ ﻫﻮ ﺷﻌﺎﺭﻫﺎ ﺍﻟﻔﺎﺳﺪ ﻳﺘﻮﺩﻳﻪ ﻓﻲ ﺳﺘﻴﻦ ﺩﺍﻫﻴﻪ ﻋﺎﻳﺰﻳﻦ ﺯﻱ ﻣﺎﻗﺎﻝ ﺟﻤﺎﻝ ﺣﻤﺪﺍﻥ ﻧﺴﺘﺼﻠﺢ ﻣﻨﺨﻔﺾ ﺍﻟﻘﻄﺎﺭﺓ ﺍﻟﻠﻲ ﻣﻤﻜﻦ ﻳﺴﺪﺣﺎﺟﺘﻨﺎ ﻣﻦ ﺍﻟﻐﺬﺍ ﻋﺎﻳﺰﻳﻴﻦ ﺣﺎﺣﺎﺕ ﻛﺘﻴﺮﻭﻛﺘﻴﺮ ﻗﻮﻡ ﻳﺎﻣﺼﺮﻱ ﻣﺼﺮ ﺑﺘﻨﺎﺩﻱ ﻋﻠﻴﻚ

مش فاهمه said...

عايزين اغانى و ثقافه ثورة يعنى بلاش الأغانى الخرعه دى احنا ثوار و مابنرضاش بالذل عايزين ننسف حمامنا القديم

مش فاهمه said...

نوارة اعملى مقابله لضيوفك على البلوج و حاتشوفى احلى افكار

محمد نور الدين said...

ست الكل يسعد صباحك
اولا موضوع الجزائر سأحدثك عنه لاحقا
ثانيا كنت رائعة في الجزيرة لكن حكاية الزغروتة فاتتني .الله يخليك أبعثيهالي بالفيديو.
ست الكل كما تعودت أن أكون معك صريحا هناك مسألة على غاية من الأهمية يجب أن تطرح للمناقشة لأنها تخصنا نحن العرب في علاقتنا فع الشقيقة الكبرى وهذاليس موقفي اليوم أنت تعرفينه منذ تعليقاتي على مقالاتك بالدستور.
النظام المصري ومنذ السادات خلق وضعا فكريا كرسته أقلام على مدى عشرات السنين لم تعزل مصر عن محيطها العربي فحسب إنما كرست فكرا شوفينيا عنصريا استعلائيا غير مبرر، سمم علاقة العرب بمصر ولقد سمعت كلاما مشابها، بعد انتصار الثورة
نوارة الانتصار أيتهاالأيقونةالعربية الجميلة، بين الفخر الوطني والشوفينية الوطنية شعرة رفيعة تحتاج إلى التدقيق لهذا أقول مصر في أمس الحاجةإلى ثورة فكرية، في حاجة إلى تأسيس فكري جديد يواكب الثورة يجعل مصر جزء من الأمة وليس اختزالا لها
و الوحدة الأوروبية أسوة حسنة
لك اجمل التحيات

محمد نور الدين said...

ست الكل يسعد صباحك
اولا موضوع الجزائر سأحدثك عنه لاحقا
ثانيا كنت رائعة في الجزيرة لكن حكاية الزغروتة فاتتني .الله يخليك أبعثيهالي بالفيديو.
ست الكل كما تعودت أن أكون معك صريحا هناك مسألة على غاية من الأهمية يجب أن تطرح للمناقشة لأنها تخصنا نحن العرب في علاقتنا فع الشقيقة الكبرى وهذاليس موقفي اليوم أنت تعرفينه منذ تعليقاتي على مقالاتك بالدستور.
النظام المصري ومنذ السادات خلق وضعا فكريا كرسته أقلام على مدى عشرات السنين لم تعزل مصر عن محيطها العربي فحسب إنما كرست فكرا شوفينيا عنصريا استعلائيا غير مبرر، سمم علاقة العرب بمصر ولقد سمعت كلاما مشابها، بعد انتصار الثورة
نوارة الانتصار أيتهاالأيقونةالعربية الجميلة، بين الفخر الوطني والشوفينية الوطنية شعرة رفيعة تحتاج إلى التدقيق لهذا أقول مصر في أمس الحاجةإلى ثورة فكرية، في حاجة إلى تأسيس فكري جديد يواكب الثورة يجعل مصر جزء من الأمة وليس اختزالا لها
و الوحدة الأوروبية أسوة حسنة
لك اجمل التحيات

Abozaid said...

Please tell Mr.Ibrahim الإجابة مصر

e said...

ﺑﺼﺮﺍﺣﺔ ﺍﻭﺑﺎﻣﺎ ﻭﺷﻪ ﺣﻠﻮ ﻋﻠﻴﻨﺎ ﻭﻧﺤﺲ ﻋﻠﻲ ﺣﺴﻨﻲ ﻫﺎﻫﺎﻫﺎ ﺍﻩ ﻭﺍﻫﻞ ﻟﺒﻴﺎ ﻋﻠﻲ ﺭﺍﺳﻲ ﺑﺲ ﺍﻟﻘﺬﺍﻓﻲ ﺩﻩ ﺑﻴﺠﺒﻠﻲ ﺍﺭﺗﻜﺎﺭﻳﺎ ﻣﺰﻣﻨﺔ ﻭﺍﻟﺪﻭﺭ ﻋﻠﻴﻪ ﻗﺮﺏ

lastcrazyboys said...

الجزائريــن صحيــوا هم كمــان


دول بقى مالهمش في السلميات والحاجات دي

لو سخنــوا الأهبــل "أبو بردعـة " بتـاع طرابلس ممكن يتشــال فيها

lastcrazyboys said...

بيــان رقم (4) للقــوات المسلحــة

لو ما نضفــتوش الميــدان الليــلة دي

هنرجعلكم حســني

مواطن مصري said...

بوتلفيقة قطع النت من على الجزائرين

احنا عاوزين نساعدهم يا نوارة

لو فية لوجو و بانر نرفعة تضامن معاهم

يبقى كويس و نسيح لبوتلفيقة

Unknown said...

الف مبروك لكل المصريين ولكل الاحرار فى العالم
انشاء الله هنرجع مصر احسن مما كانت لانها بلد جميلة وشعبها طيب ورائع
المطلوب دلوقتى نرجع المصريين بتوع زمان نحب بعض ونخاف على بعض
لازم نبطل نشتم بعض واحنا بنسوق
لازم نبطل نستغل بعض
انا عارف ان سنين القهر هى السبب اللى خللى الناس اعصابها بايظة ومش مستحمله بعض..
الحمدلله الغمة انزاحت يبقى لازم نرجع لحضن بعض كاسرة واحدة بجد
حب واحترام وتكافل وتسامح
احنا شعب جميل قوى وطيب قوى وجدع قوى
يالله ياشعب ننهض ببلدنا الحلوة دى
الله واكبر الله واكبر الله واكبر

Unknown said...

الف مبروك لكل المصريين ولكل الاحرار فى العالم
انشاء الله هنرجع مصر احسن مما كانت لانها بلد جميلة وشعبها طيب ورائع
المطلوب دلوقتى نرجع المصريين بتوع زمان نحب بعض ونخاف على بعض
لازم نبطل نشتم بعض واحنا بنسوق
لازم نبطل نستغل بعض
انا عارف ان سنين القهر هى السبب اللى خللى الناس اعصابها بايظة ومش مستحمله بعض..
الحمدلله الغمة انزاحت يبقى لازم نرجع لحضن بعض كاسرة واحدة بجد
حب واحترام وتكافل وتسامح
احنا شعب جميل قوى وطيب قوى وجدع قوى
يالله ياشعب ننهض ببلدنا الحلوة دى
الله واكبر الله واكبر الله واكبر

Unknown said...

الف مبروك لكل المصريين ولكل الاحرار فى العالم
انشاء الله هنرجع مصر احسن مما كانت لانها بلد جميلة وشعبها طيب ورائع
المطلوب دلوقتى نرجع المصريين بتوع زمان نحب بعض ونخاف على بعض
لازم نبطل نشتم بعض واحنا بنسوق
لازم نبطل نستغل بعض
انا عارف ان سنين القهر هى السبب اللى خللى الناس اعصابها بايظة ومش مستحمله بعض..
الحمدلله الغمة انزاحت يبقى لازم نرجع لحضن بعض كاسرة واحدة بجد
حب واحترام وتكافل وتسامح
احنا شعب جميل قوى وطيب قوى وجدع قوى
يالله ياشعب ننهض ببلدنا الحلوة دى
الله واكبر الله واكبر الله واكبر

FATMA said...

مبرررررررررررررررررررررررررررررك يا نوارة
عايزين موقع او من هنا يا نوارة نتبادل الاراء والافكار حول بلدنا وهذه الافكار نري كيف نفعلها سواء مع السباب او المسئوليين
مثلا استقلقا القضاء
استقلال الجهات الرقابية
استقلال الازهر
توعية الناس بحقوقها
من خلال التليفزيون ومجموعات عمل منناانتظر ردك

Nahla Anwer said...

نوارة مصر ونوارتنا كلها.... ينصرررر دينككككككككككككك

mohamed aziz said...

كلام روعة بجد
وانا من اشد المعجبين بيكي
وكان نفسي اكلمك وانتو فى التحرير اشد من ازرك وازر كل الموجودين فيه عشان انا بره مصر بس والله كان قلبي معاكم

Unknown said...

أرجو قراءة مقالى فى الرابط أدناه - (مقال تحت عنوان : كيف أفسد نظام مبارك الجامعات المصرية؟) - ثم أعرف رأيكم لاحقاً إن أمكن لكم التواصل معى

http://www.facebook.com/note.php?note_id=10150093894410675&id=100000129832572

تحية من القلب إلى جيش مصر العظيم الذى يحمى ويصون ثورة الشعب كما يحمى ويصون أرض مصر وكرامتها وحضارتها ومستقبلها بإذن الله

Unknown said...

يا نوارة دول مش 132 مليار دولار
مجلة فوربس المالية تقول ان حجم الاموال المهربة من مصر خلال حكم المرحوم مبارك فى حدود ..... ثلاثة تريليون دولار
عارفة يعنى 3 وقدامها 12 صفر
ثلاثة الالاف مليون دولار يا ولاد الحرامية
من خلال قلمك يا نوارة نرجوا جميعا ان يكون هدفنا فى الايام القادم وعلى ماالجماعة القانونييين يكتبوا الدستور ان ندعوا للمطالبة ونسعى لعودة هذة الاموال
شكرا ليكى ولكل مصرى
د/خالد ابوجازية

جزائري مقهور said...

ياسلام لو تكمل الثورة بإلغاء معاهدة العار مع بني صهيون وتوقيف تصدير غاز شعب مصر لحفدة القردة والخنازير أه وثم أه حلمي أن أسمع هذا الخبر يوما عندها سأكون أسعد واحد في الدنيا ، مشكلتنا نحن الجزائريين أننا أُبتُلينا بجنيرالات عملاء لبنت الكلب فرنسا وهم أصحاب السلطة في جزائرنا الحبيبة لا بوتفليقة ولا حكومة يعني نحن لابد لنا من إسقاط الجنيرلات وليس الرئيس والحكومة هم عبارة عن عرائس القرقوز

karima said...

الف الف مبرووووك لشعب مصر العظيم كنتم شمعة انارت الامة العربية ..وكنتم ابطالا بكل معنى الكلمة واخص الاستاذة نوارة بالبطولة وشخصيا اعتقد بل اكاد اجزم انها السبب الرئيسي في هذا التحول التاريخي في مسار مصر والشرق الاوسط والامة العربية والان ربنا معاكم وينصركم على ما بقى من زبالة نظام مبارك

عبد الناصر محروس said...

اقول السيدة نوارة اجمل قصيده وطنيه من عمنا نجم تسلمى

Unknown said...

= = = = =
عمرو أديب من كبار الممثلين فى نظام مبارك وكان صمام أمن لمنع إنفجار الناس بتأثير استشراء الفساد فلا تنخدعوا بكلام عمرو أديب ولا أخيه (تيخه) عماد أديب فكل هؤلاء كومبارس فى نظام مبارك لمنع قيام ثورة فى مصر - أرجو أن تفهموا - ولمن لا يصدق فليراجع كلام عماد أديب الكاذب على القنوات المصرية خلال أحداث الثورة ورغيته العارمة فى إفشال الثورة والالتفاف عليه وإجهاضها لتصبح مجرد (هوجة عرابى) أخرى ثم تؤول إلى فاشوش
= = = = =

حسن على said...

نصرة قوية وفرحة قوية والف سلامة والف سلامة نصرةقوية يديمها عليا وعلى وعلى احبابى اللى حولاي هم هنايا وضى عنيا اللى صفولى مع الايام الف سلامة سلامة والف سلامة

حسن على said...

ونورك ياست الكل نور حينا وسعدك اللى لاح نور نور حينا . قصدى من الاحباب طيبة قلبهم اذكر محاسنهم واشكر فضلهم ياربى بلغهم مناهم كلهم دى الفرحة عندى يوم ما نفرح كلنا

أحمد البستاوي said...

مساء الفل يا نوارة
النهاردة يوم مختلف شمسه غير شمس الأيام اللي فاتت
شمس الحرية
---
أنا متفق معاكي إننا لازم نبني بلدنا و إن ورانا شغل . .
كنت مجهز خطة متكاملة و عاوز رأيك فيها
---
مشروع مراجعة الحاجات -- خطة إنقاذ مصر
http://afkarsoda.blogspot.com/2011/02/blog-post.html

Unknown said...

كلامك حلو و متزن

bentmasr said...

كلنا معاكي يانوارتنا امي بتقولي انا لما سمعت نوارة وهيه بتقول احنامش بنهزر علي الجزيرة صدقتهاوقلت دول مش هيتراجعو هما عارفين بيعملو ايه الف مبروك علي كل العرب

حسن على said...

عاد الزمن واعتدل كهيئتة فى البداية وللنهايات اجل مهما تطول الرواية وماينكر اللى حصل الا قليل النوايا فؤاد قاعود

GigiWorld said...

نفسي يلغوا امن الدوله



بهدلونا تلاتين سنه منهم لله


يعدموا اي ظابط عذب بنى ؤادم زيه \
او ينفوه بلاش يعدموه لازم بلدنا تنظف بقه حرام اللى كان بيحصل
ومعاطى ميه فى الميه ان اهم حاجه الفلوس دى ترجع مليم مليم وقرش وقرش


ياحبيبتى يامصر

انا مش بريئه فى حب مصر

طيوري said...

الف مبروك لينا
وربنا يبرد قلوبنا اللي اتحرقت على ورد مصر
ويرحمهم
وهقولها تاني انا بحبك اوي يانوارة البنات
وكنتي بتديني امل لما اسمعك او اقرالك
وقلبي اتخلغ عليكو لما سمعت صوتك ساعة هجوم البلطجية
مع انك وحشة وشريرة وفضحتيني لما قلت لك ماتنشريش تعليقاتي لاني ممنوعة من نزول المظاهرات او من الكتابة ليكي بس هانزل واحتمال اطلق نشرتيها بردك
بس ربنا ستر ومسحتهم وتاويت الجيريمة
انا فرحانة فرحة هبلة
بس ناقصها احساس اني كنت شاركت الناس اللي ضحت
ولو مكنتش نزلت يوم واحد بالعافية ووقفت كام ساعة في سيدي جابر كنت هاحس ان الفرحة دي مش ليا دي للناس اللي تستحق اللي احسن مني ومن اي حد ماشاركش وهو يقدر
ربنا يديم علينا نعمته وفرح قلوينا ويحفظ مصر بلدنا للاخر
ويتم علينا نعمه ويتقل الفتن قبل ميلادها يارب

طيوري said...

الف مبروك لينا
وربنا يبرد قلوبنا اللي اتحرقت على ورد مصر
ويرحمهم
وهقولها تاني انا بحبك اوي يانوارة البنات
وكنتي بتديني امل لما اسمعك او اقرالك
وقلبي اتخلغ عليكو لما سمعت صوتك ساعة هجوم البلطجية
مع انك وحشة وشريرة وفضحتيني لما قلت لك ماتنشريش تعليقاتي لاني ممنوعة من نزول المظاهرات او من الكتابة ليكي بس هانزل واحتمال اطلق نشرتيها بردك
بس ربنا ستر ومسحتهم وتاويت الجيريمة
انا فرحانة فرحة هبلة
بس ناقصها احساس اني كنت شاركت الناس اللي ضحت
ولو مكنتش نزلت يوم واحد بالعافية ووقفت كام ساعة في سيدي جابر كنت هاحس ان الفرحة دي مش ليا دي للناس اللي تستحق اللي احسن مني ومن اي حد ماشاركش وهو يقدر
ربنا يديم علينا نعمته وفرح قلوينا ويحفظ مصر بلدنا للاخر
ويتم علينا نعمه ويتقل الفتن قبل ميلادها يارب

my photos said...

مبروك لمصر وللوطن العربي
مصر ام الدنيا

my photos said...

مبروك لينا
مبروك لمصر حرة أبية

بنت من الزمن ده said...

الحمد لله انا نا نزلت وشاركت بس للاسف كان ف اخر يوم بس يللا وشي حلو
احنا عندنا طاقة كبيرة قوي و عايزين نستغلها فياريت يكون في حزب او حملة عشان نعيد بناء مصر من تاني

Ramagrune said...

علشان فلوسنا ترجع لنا لازم نشوف نتحقق من ناس كتير من رجال الاعمال زى عائلة ساويرس اللى هم شركاء لجمال و علاء مبارك و اوراسكوم ايضا شركاء فى شركة اتصالات اسرائيلية اسمهاHutchison's Israeli cellular carrier
و غيرها فى بلاد اخرى و ارجو منكى نوارة زيارة المواقع التالية لمعرفة المزيد عن شركاتهم مع عائلة مبارك
http://www.forbes.com/lists/2006/10/4MRK.html

http://naguibsawiris.wordpress.com/2010/07/10/naguib-sawiris-the-hypocrite-and-the-dictator/

http://naguibsawiris.wordpress.com/2010/07/07/22/

http://www.huffingtonpost.com/2011/02/11/how-the-mubarak-family-made-its-billions_n_821757.html

http://unveiled-naguib-sawiris.blogspot.com/2010/07/naguib-sawiris-hypocrite-and-dictator.html

http://unveiled-naguib-sawiris.blogspot.com/2010/07/naguib-sawiris-prospering-under.html

http://unveiled-naguib-sawiris.blogspot.com/2010/07/naguib-sawiris-hypocrite-and-dictator.html

http://unveiled-naguib-sawiris.blogspot.com/2010/07/naguib-sawiris-bribe-man-continued.html

http://balkans.courriers.info/article16845.html

ameena-alkuwari said...

انا اقول لابد حاليا من تحرك شعب ليبيا لا القذافي خلاص انتهى تاريخ صلاحيته

محمد نور الدين said...

الأستاذ محمد فهمي حسين المحترم
لقد عدت إلى تحليلك الجميل الذي لم أجد فيه أي اختلاف مع وضع الجامعات الجزائرية ،إذا استثنينا الوشايات الأمنية .كما لا يختلف مع وضع بعض الجامعات العربية التي أعرفها.
بدون أدنى شك هناك أسباب كثيرة ومتنوعة التي قادت إلى أزمة التعليم ،
لكن إذا بحثنا عن السبب الجوهري، يعود في تقديري إلى غياب المشروع الوطني لأن الفئات القابضة على السلطة السياسية، وهي متشابهة في الوطن العربي، فهي إما فئات ريعية ،أو جزء من مشروع الهيمنة الخارجية. تاليا تكون فاقدة لأي مشروع وطني .و التعليم كما تعلم هو وسيلة وليس غاية .ما يعني أنه يتعذر الحديث عن وضع التعليم بمعزل عن القوى المهيمنة سياسيا .مثلا إذا أخذنا مرحلة عبد الناصر أو مرحلة هواري بومدين ،مهما اختلفنا معهم، وصحيح أنهم جعلوا الجامعة مؤسسة لإعادة إتناج الخطاب الأيديولوجي المهيمن . لكنهم كانوا أيضا يحملون مشروعا وطنيا وقوميا فجعلوا الجامعات الرافعة لهذاالمشروع.
من هنا فإن إصلاح التعليم يتعذر في ظل غياب القوى الوطنية صاحبة المشروع الوطني
لك كل الاحترام و التقدير

محمد نور الدين said...

الأستاذ محمد فهمي حسين المحترم
لقد عدت إلى تحليلك الجميل الذي لم أجد فيه أي اختلاف مع وضع الجامعات الجزائرية ،إذا استثنينا الوشايات الأمنية .كما لا يختلف مع وضع بعض الجامعات العربية التي أعرفها.
بدون أدنى شك هناك أسباب كثيرة ومتنوعة التي قادت إلى أزمة التعليم ،
لكن إذا بحثنا عن السبب الجوهري، يعود في تقديري إلى غياب المشروع الوطني لأن الفئات القابضة على السلطة السياسية، وهي متشابهة في الوطن العربي، فهي إما فئات ريعية ،أو جزء من مشروع الهيمنة الخارجية. تاليا تكون فاقدة لأي مشروع وطني .و التعليم كما تعلم هو وسيلة وليس غاية .ما يعني أنه يتعذر الحديث عن وضع التعليم بمعزل عن القوى المهيمنة سياسيا .مثلا إذا أخذنا مرحلة عبد الناصر أو مرحلة هواري بومدين ،مهما اختلفنا معهم، وصحيح أنهم جعلوا الجامعة مؤسسة لإعادة إتناج الخطاب الأيديولوجي المهيمن . لكنهم كانوا أيضا يحملون مشروعا وطنيا وقوميا فجعلوا الجامعات الرافعة لهذاالمشروع.
من هنا فإن إصلاح التعليم يتعذر في ظل غياب القوى الوطنية صاحبة المشروع الوطني
لك كل الاحترام و التقدير

بهيج الشرير said...

والنبي ياأبلتي أنا عندي سؤال! ليه دلوقت اللبو المغلوع (ملك الفياجرا وقاهر الهكسوس سابقا) قاعد في شرم الشيخ في قصر مش بتاعه وبتاع المصريين

سامح said...

عاوزين مشروع القمح بتاع سكينة فؤاد وجامعة زويل وابار فاروق الباز
وعاوزين الناس اللي اطردت بره ترجع
------------------------------------
عاوزين معرض الكتاب ، ينفع؟!
عاوزين نجري في الشارع زي المجانين من الفرحة:)

Unknown said...

شفتو كيف كل العرب احتفلو معاكم في تونس و عمان وبيروت و فلسطين .. الكل
كان مفتقد مصر وانتو اعدتوها لينا

الله اكبر عليكم يا ابطال

Unknown said...

وبعدين عايزين نلغي وزارة الاعلام اساسا


الله يخليكي يا نوارة ده من أهم المطالب. الله يخليكي الله يخليكي تخلي المطلب ده نصب عينيكي وماتضيعهوش وتوصليه لأي حد بيكتب بيانات

Unknown said...

مش عاوز أعطّلك عن الشغل يا نوّارة

بس حابب أهنّيكي

وأقولّك إني بحبّك

ومصر أوفى من الزمان.. وإحنا عارفين شعب مصر

mohsen said...

ألف مبروك علينا كلنا بفرحة التحرر من الذل والعبودية والطغيان والفساد ويلا نشمر عن سواعد الجد لنبنى مصر من جديد واللى حتحتاج منا صبر وعرق وجهاد حتى نسترجع مكانتها التى ضيعها وغيبها هذا الطاغية المخلوع ولنعد الى أخلاقنا العريقة والتى ظهرت وأصقلتهاأيام المحن الماضية من وئام وحب واخاء وتكاتف اجتماعى لجميع فئات الشعب بمختلف طبقاتها ونبذ للفرقة والخلاف .
وليتذكر كل منا أن ما تحقق كان بفضل الله ثم بفضل هؤلاء الشباب الذين ضحوا بأنفسهم ودمائهم لننال هذا النصر فلا تضيعوا هذة الدماء هباءولنعمل سويا بجهد ومثابرة لرفع مصرنا خفاقة عالية كما كانت دوما فوق الهامات ففعلا ورانا شغل كتير والله المستعان/د.محسن مسعود

أحمد طـه said...

أعتقد إن القذافي هايصدر قريبا بيان يضحكنا جميعا

nour1971 said...

mabrooooooooooooooooooooooooooooooook

حنين said...

الف مبروك للجزائر وللامة العربية وللدنيا عودة ام الدنيا التي ظننا انها ضاعت
والف مبروك للشعب المصري انتصارو على الصورة المسخ التي خدعو العالم وقالو انها صورته
تحية من قلب الجزائر ومن كل جزائري جعلتموه يسهر الليالي يتابع ثورتكم اولا باول حتى النصر
والى الامام امامكم عمل كثير وكلنا ثقة انكم ستتمونه باقرب وقت وعلى اكمل وجه
تحيا مصر..تحيا تونس..تحيا الجزائر ..وتحيا الحرية

AmartA said...

مرحبا يا ابطال مصر
الف مبروك الحرية
يشرفنا ان نحيطكم علما انه تم نقل هذه التدوينة الى منتدى مدونات ومدونون على هذا الرابط
http://www.amarta-sy.com//showthread.php?t=3306

تحيات ادارة أمارتا

محمد صبرى said...

ولو سمحت ما بنحبش حد يطبطب على راسنا زي الكلب اللولو.. اصل حضرتك بتبوظ التسريحة كده واحنا لسه مشاشورين شعرنا

:D
..........

على فكرة مامتك فتنت عليكى و قالت انك شاركتى سنة 77

:D :D

pooa said...

انا عندي اقتراح
مراقبة اي زائر اجنبي وخصوصا امريكي او من الاتحاد الاروبي ياتي لمصر لانه ممكن يبث فتنه او يفقع اسفين في الثورة او يملي اراده معينه . ونعرف جاي ليه ويكون بعدها تصريحات من أداره الثورة تاكد مطالبها عشان يعرفوا ان احنا مش نايمين

pooa said...

عندي اقتراح
اننا نراقب كل مبعوث من امريكا والاتحاد الاروبي
لانهم اكيد جايين يملوا شروطهم ويحطوا برد وسلام على اهداف الثورة ويستغلونا بشكل جديد واول مايمشوا نعرف بالظبط هما جيين ليه وينزل شباب الثورة تاكيد لمطالبهم عشان الغرب يعرف دايما اننا مش نايمين والا هيدخلوا زي السوس ينخر في الخشب وهينخروا في الثورة ويجيبوا اخرتها
وناخد بالنا من جواسيس امريكا المصرين المتصهينن من امثال وزير الخارجيه

حياة الظل said...

الله يقويكم

Unknown said...

اولا انا في قمة السعادة و كان نفسي اكون معاكم بس معلش انا برة البلد و تاني حاجة احنا عايزين ننتخب احنا كمان و احنا برة البلد يعني السفارات هنا لازم تشتغل و بعدين العالم الي برة دي ازاي نقدر نساعدكم من الخارج يعني اية المطلوب منا بس شوري و احنا نبتدي و انتي يانوارة يانوارة الدنيا انا بحبك ربنا يكرمك وينورلك بصيرتك

arabic language said...

ياثوار انتبهوا المرحلة القادمة أخطر
لازم نكون صاحيين أحسن حد متلون يدخل في الحكومة الجديدة
أو يجيلنا رئيس له علاقات سرية مع إسرائيل أو أمريكا
الموضوع بسيط أوي
مش محتاج جاسوسية ولا حاجة
بيبان في تصريحاتهم
انتبهوا للتصريحات التي تخرج من أشخاص حتى لو كانوا عاديين وبعدها نجدهم ملأوا الإعلام والصحف
الله يحفظ الثورة ورجالها ونساءها وشبابها وأطفالها
شارك فيها كثير منهم
حتى ثورتنا تعلم العالم
أن مصر عظيمة

Unknown said...

ممكن اعرف الاخ موافقة فتحي شرور و الحج زفوت الشريف اساميهم مجتش في المنع من السفر لية انشاللة ولا كتوا مع الراس الكبيرة

Asmae said...

نوارة، أحبك في الله :)

طراوة said...

ليه يانوارة تنسي السودان دا الشعب هنا بحبك ، بس حكومتنا زي حكومتكم (السابقة ) الله لا عادها

طراوة said...

ياخوانا نحن عايزين نغير هنا عندنا اصلو بقينا بلدين بدل بلد واحة انتو كنتو مشغولين عننا يانوارة السودان خلاص حيبيعوه العندنا ديل

Adel hassan elokaby said...

نوارة احنا فعلا مش ناقصين حاجة من احد عندنا بترول كتير عندنا ذهب مناجم عندنا النيل والساحة وقناة السويس وارض كتيرة وشباب رجالة وعباقرة وعلماء المهم يكون فيه حد ادنى وحد اعلى للمرتبات مش واحد ياخد ربع مليون فى الشهر سكرتير وزير الاعلام وواحد مش لاقى ياكل لازم لازم قوانين ولانقبل الرشوة ولا ندفعها وننظف بلدنا وانفسنا من كل حاجة ولاننسى تنمية سيناء عايزين نحط فى سيناء عشرون مليون مصرى عائلات تتملك ارض ومصانع كل التنمية تتجه لسيناء لما يكون جنب اسرائيل عشرون مليون فرعون مصرى ولا العالم كله يقدر يرمش لسيناء لازم التركيز على سيناء ونطور انفسنا

Adel hassan elokaby said...

المعونة الامريكية نحصل عليها فى صورة سلع لعلمك او صناعات حربية ولابد ان يرافق الصرف خبراء من امريكا واسرائيل للتجسس ويحصلون على مرتبات اضعاف المعونة يعنى لو بناخد فى العام مليار دولار بيفرضوا علينا نشغل ناس من امريكا ورشاوى تفوق المليار يعنى علينا بالخسارة وتستنزف اموال الشعب
احنا رقم 6 فى انتاج البترول فى العالم ورقم 9 فى انتاج الدهب بلاوى كتيرة ومتاحه على الانترنت غير الغاز والقناة والسياحة التى تدار بعقول متخلفه ازاى عندنا هذا الكم من الاثار وييجى مصر فقط 12 مليون سائح فى السنه ودبى الى نار بيروح لها عشرة مليون الافكار كتيرة المهم ننظف انفسنا ونتحرك لان تكون مصر الاسد الافريقى وليس النمر الاسيوي

rahrom said...

اختى الحبيبة نوارة والله لا اجد كلمات اعبر لك بها عن اعجابى بفكرك وانا معاكى فى كل كلمة ونفسى اشارك بجد فى
كل ده بايدى مش بس بلسانى بس فيه حاجة كمان اننا نبدا بعمل اولويات دلوقتى لازم نمشى بخطى منظمة زى ما قال مرة الدكتور فاروق الباز امن ,زراعة ,صحة وتعليم
والله يخليكى اعملوا توعية للشباب بشئ مهم ان ربنا منصرناش غير لما لجانا له تعالى وحده لكان ساعتها الجيش فى بالنا هايتدخل ولا اى حد اوعى ننسى ربنا تانى لازم ودى اهم حاجة نبقى على طول موصولين بربنا ونطيعه صح فى كل حياتنا علشان مايسلطش علينا بذنوبنا اللى يظلمنا عل فكرة انا مش من اى تيار بس منظر الشباب والناس وهم بيصلوا سوا كل الاوقات مش لازم يروح بعد الغمة الكبيرة ماانزاحت علشان فى غمم كتير مستنياا ربنا يعيننا عليها ونفسى اتواصل معاكى شخصيا على الايميل لو تسمحيلى

Diaa said...

النظام البرلماني هو الحلّ الأمثل لضمان الحرية والكرامة والدّيمقراطيّة يضمن سيادة الشعب وعدم اتاحة الفرصة لسرقة الأموال والدكتاتوريّة.
في الظروف الحالية يجب أن يرتفع الصوت بأنه يجب استفتاء الشعب في ما يخص الدستور الجديد وترك الخيار له في تحديثه، من حكم رئاسي الى حكم برلماني وانا شخصيا أميل الى الحكم البرلماني المنتخب من قبل الشعب ويكون رئيس الدولة رمزا للدولة وتحصر صلاحياته وتكون الانتخابات التشريعية المقبلة متوازية مع انتخابات المجالس المحلية وبذلك يكون الشعب له الكلمة العليا في اختيار من يحكمه ويمثله في كل المؤسسات ويكون هو الرقيب على من يدريرها

جمهورية برلمانية

جمهورية برلمانية مصطلح يطلق على الدول التي يكون نظام حكمها قائم على البرلمان، فتشكيل الوزارة لابد أن يحظى بأغلبية من البرلمان وكذلك سن القوانين واعتماد الميزانية. يتكون النظام البرلماني من سلطة تنفيذية ممثلة في الوزراة ورأس الدولة والسلطة تشريعية ممثلة في البرلمان.
على النقيض من الجمهورية الرئاسية، فإن رئيس الدولة لا يملك صلاحيات تنفيذية واسعة كالتي يملكها الرئيس التنفيذي حيث تكون هذه الصلاحيات بأيدي رئيس الحكومة والذي في الأغلب يكون رئيس الوزراء.


رأس الدولة

يكون رئيساً منتخباً وهو في هذا النظام لايتمتع بسلطات حقيقية، ولكنه يمارس سلطاته من خلال الوزراة فهو يعتبر منصب شرفي لإكمال هيكله الدولة. يتم إختيار رأس الدولة إما بالانتخاب البرلماني أو الانتخاب العام من قبل الشعب.


البرلمان

مجلس أو مجلسين أحدهما ديمقراطي منتخب مباشرة من الشعب والاخر ديمقراطي نسبياً. وللبرلمان عده سلطات أهمها مناقشة واعتماد مشروع الموازنة العامة للدولة الذي تقدمه الوزارة والوظيفة الثانية هي سن وتشريع القوانين ، والثالثة هي مراقبة عمل الوزارة ومسألة الوزارة سياسياً، وللبرلمان حق طرح الثقة بالوزارة ككل (مسئولية جماعية) أو بكل وزير على حدة (مسئولية فردية)،وإذا تم سحب الثقة فعلى الوزير أو الوزارة الاستقالة فوراً. وحتى لايغالى البرلمان في استعمال هذا الحق فإن للوزارة حق حل البرلمان المنتخب ،ويعاد الامر إلى الامة لتقول كلمتها في الانتخابات فإذا جاء البرلمان الجديد واقر ما نفس ما اقره القديم فلا تستطيع الوزارة حل البرلمان مرتين لنفس السبب.


الوزارة

.هى المسئولة عن الوظيفة التنفيذية وهذه المسئولية بالتبعية تصحبها سلطة فهي المهيمن الحقيقي على السلطة التنفذية، وهي همزة الوصل بين بين الهيئة التنفيذية، والهيئة التشريعية (البرلمان)، وتسأل الوزارة أمام البرلمان سياسياًَ ، ويحضر الوزراء جلسات البرلمان للدفاع عن انفسهم ولو كانوا غير اعضاء في البرلمان وانتهى العرف إلى أنه من المستحسن أن يجمع الوزير بين عضوية الوزارة وعضوية


البرلمان

رئيس مجلس الوزراء
هو الرئيس الحقيقي للحكومة. يتم في الأغلب انتخابه بأن يكون رئيس حزب الأغلبية أو تحالف الأغلبية في البرلمان. ويختار الوزراء ويمكن إنهاء حكومته فور تقديم إستقالته لرأس الدولة، وله سلطة فصل الوزراء وحل البرلمان والدعوة لانتخابات عامة.


التداخل العضوي والتداخل الوظيفي

هما من الخصائص المميزة للنظام البرلماني فالتداخل العضوي هو ان من حق الوزير ان يكون عضوا منتخبا في البرلمان اما التداخل الوظيفي فمن حق السلطة التنفيذية (الوزراة) مشاركة البرلمان في سلطة التشريع وعمل القوانين ، وكذلك بالنسبة للعمل التنفيذي الذي يتصل بالمصلحة العليا مثل المعاهدات الدولية والتي تبرم من جانب الوزارة لكنها تظل معلقة في نفاذها على تصديق البرلمان .ومن هنا فالبرلمان يشارك في العمل التنفيذي

منقول

Ahamdy said...

لازم نعمل حملة توعيه للشعب "بإختلاف طبقاته" بأن التغيير والتطوير بياخد وقت علشان ناس كتيير بعد شهر هاتبتدى تحاسب الثورة كل واحد حسب تطلعاته اللى عاوز يتعين واللى عاوز ياكل واللى عاوز شقة، أو يتعالج... وهايقارن بين القديم والجديد وانها مافرقتش ايام حسنى مش شغال ودلوقتى مش شغال. المهم دلوقتى نوعى الناس ونديهم جدول زمنى منظم بالتوقعات كمثال:
اصلاح التعليم والبحث العلمى
اصلاح العلاج والتأمين الصحى
اصلاح الخدمات العامه والمرافق
اصلاح قوانين الضرائب والجمارك والمنظومة الماليه للدوله
النهضة بالثقافة والفنون
الى اخرة من بنود الإصلاح والتطوير، احنا كمصريين بنصبر ونستحمل بس يكون شايفين الطريق وهايودينا فين من غير طريق ولا اهداف بمواعيد هانلاقى بعد فترة فتور وحساب ومقارنات من الناس البسيطة مش هاترحم حد وممكن تحبط حماس القائمين على التغيرات.

zara shaishaa said...

The people, AL SHAAB, has to be very strong on refusing Shafik and his cronies it should not be a big deal for the M Council with the help of the Supreme Court, if I name it right, to choose a temp gov it should not have 43 ministers only ten would do for a month or two till they assign a trans gov for the transitional period till the election. Be strong ALL. It is your country it is your gov it is your civil servants you have all the rights to refuse this pretentious, who was so close to late Mobarak and one of his cronies.

zara shaishaa said...

The people, AL SHAAB, has to be very strong on refusing Shafik and his cronies it should not be a big deal for the M Council with the help of the Supreme Court, if I name it right, to choose a temp gov it should not have 43 ministers only ten would do for a month or two till they assign a trans gov for the transitional period till the election. Be strong ALL. It is your country it is your gov it is your civil servants you have all the rights to refuse this pretentious, who was so close to late Mobarak and one of his cronies.

zara shaishaa said...

The people, AL SHAAB, has to be very strong on refusing Shafik and his cronies it should not be a big deal for the M Council with the help of the Supreme Court, if I name it right, to choose a temp gov it should not have 43 ministers only ten would do for a month of two till they assign a trans gov for the transitional period till the election. Be strong ALL. It is your country it is your gov it is your civil servants you have all the rights to refuse this pretentious, who was so close to late Mobarak and one of his cronies.

zara shaishaa said...

The people, AL SHAAB, has to be very strong on refusing Shafik and his cronies it should not be a big deal for the M Council with the help of the Supreme Court, if I name it right, to choose a temp gov it should not have 43 ministers only ten would do for a month of two till they assign a trans gov for the transitional period till the election. Be strong ALL. It is your country it is your gov it is your civil servants you have all the rights to refuse this pretentious, who was so close to late Mobarak and one of his cronies.

سكوت هنصوت said...

نوارة...في وقفة يوم التلات الي جاي الساعة 2 الضهر عشان المعتقلين السياسين...يا ريت تحضري وتبلغي الكل

Anonymous said...

Mohamed Al-abassy
hey,
this is my first time to read any blog and I really liked it very much. I'm really surprised to know for the first time about this society just yest. after your interview with Belal Fadl on dream TV and I've been using internet for more than 7 years and I never heard of any thing about this. I am just so surprised that despite being egyptian livin' in Alex. I know nothing about every thing..well except the protests of course w' is just a fraction of the real picture I am getting to realize. I did actually take part in it since fri. of rage 28th. but I'm always in the wrong place at the wrong time of every demo. specifically in the wrong demo. and even when I tried to talk with other people about the situation in egypt I found everyone insiston asking me the same stupid question...ARE U EGYPTION ?? and I really got very frustrated so I decided to stop participating on the day he stepped down :( and I missed the million demo march at ras el tin....the most beautiful day known in these protests as I heard.any way, I just said that cauz if I didn't, I was gonna explode that I wasn't with everybody in streets when the step down was announced.Anyway, congrats everybody and may the martyrs rest in peace isa.
thnx

Anonymous said...

Mohamed Al-abassy
hey,
this is my first time to read any blog and I really liked it very much. I'm really surprised to know for the first time about this society just yest. after your interview with Belal Fadl on dream TV and I've been using internet for more than 7 years and I never heard of any thing about this. I am just so surprised that despite being egyptian livin' in Alex. I know nothing about every thing..well except the protests of course w' is just a fraction of the real picture I am getting to realize. I did actually take part in it since fri. of rage 28th. but I'm always in the wrong place at the wrong time of every demo. specifically in the wrong demo. and even when I tried to talk with other people about the situation in egypt I found everyone insiston asking me the same stupid question...ARE U EGYPTION ?? and I really got very frustrated so I decided to stop participating on the day he stepped down :( and I missed the million demo march at ras el tin....the most beautiful day known in these protests as I heard.any way, I just said that cauz if I didn't, I was gonna explode that I wasn't with everybody in streets when the step down was announced.Anyway, congrats everybody and may the martyrs rest in peace isa.
thnx